AWTIK POU ÉTIDYÉ 28
Wayòm a Bondyé ka gouvèné !
« Wayòm a mond-la vin wayòm a Ségnè an nou é wayòm a Kris a-y » (RÉV. 11:15).
KANTIK 22 Wayòm-la anplas... Fò i vin !
ON TI LIDÉ ASI SA NOU KAY VWÈ *
1. Dè ki biten nou sèten, é poukisa ?
LÈ OU ka vwè léta a mond-la alèla, ès délè ou ni dimal a kwè kè sitiyasyon-la ké réglé on jou ? Pli sa k’ay é pli sé fanmi-la pa soudé. Sé moun-la ka vin dè plizanpli méchan é dè plizanpli égoyis. É onlo adan yo pa’a fè sé moun-la ki ka dirijé la konfyans ankò. Men an réyalité, lèfètkè sitiyasyon-la konsa é kè i ka vin pli mové, sa pé édé-w kwè plis ankò kè talè toutbiten kay ranjé. Poukwa nou ka di sa ? Pas konpòwtasyon a sé moun-la jòdila ka korèsponn ègzaktèman a sa on pwofési ki èstraòwdinè té ja anonsé anrapò èvè « sé dènyé jou-la » (2 Tim. 3:1-5). Pwofési-lasa ka réyalizé anba zyé an nou. Si on moun sensè, i oblijé rèkonnèt sa. Men ni onlo dòt pwofési ki ka palé dè wayòm-lasa. Pou fè fwa an nou vin pli fò, sa té’é byen si nou té ka wouvwè dòt pwofési ki ka réyalizé a épòk an nou.
Pwofési ki adan liv a Danyèl é adan liv a Larévélasyon ka korèsponn yonn èvè lòt menmjan pyès a on pèzèl ka rantré yonn adan lòt. Yo ka montré on mannyè ki klè ola nou yé adan kalandriyé a Jéova (gadé paragraf 2 la).
2. Ka nou ké vwè adan awtik-lasa, é poukwa ? (palé dè imaj-la ki anlè po a jounal-la).
2 Adan awtik-lasa, nou ké vwè 1) on pwofési ki ka pèwmèt-nou sav a ki moman wayòm a Bondyé koumansé gouvèné, 2) déotwa pwofési ki ka pèwmèt-nou konprann kè Jézi vin Wa a wayòm a Bondyé an syèl-la, é 3) déotwa pwofési ki ké montré-nou kijan Bondyé ké détwi lènmi a-y. Si nou mèt tout sé pwofési-lasa ansanm nou ké rann-nou kont kè yonn k’ay èvè lòt menmjan chak pyès a on pèzèl ka rantré yonn adan lòt. Sé pwofési-lasa ké montré-nou ola nou yé adan kalandriyé a Jéova.
KIJAN NOU PÉ SAV A KI MOMAN WAYÒM A BONDYÉ KOUMANSÉ GOUVÈNÉ
3. Adan Danyèl 7:13, 14 nou ka touvé on pwofési anrapò èvè Wa a wayòm a Bondyé. Ki garanti pwofési-lasa ka ban-nou ?
3 Sé Jézi Jéova chwazi pou gouvèné wayòm a-y. É lè nou ka ègzaminé pwofési-la nou ka touvé an Danyèl 7:13, 14, nou sèten a san pou san kè pa ni ponmoun ki té’é fè sa myé ki Jézi. Moun ki ka sòti adan tout nasyon ka sèvi-y èvè tchè-kontan é ponmoun pé’é vin wa an plas a-y. Adan liv a Danyèl, ni ondòt pwofési ki té ja anonsé kè Jézi té ké koumansé gouvèné an fen a on péryòd yo ka kriyé sé sèt tan-la. Alò, ès ni mwayen sav kitan Jézi vin Wa ?
4. Èspliké kijan Danyèl 4:10-17 ka pèwmèt-nou kalkilé kitan Jézi vin Wa (gadé nòt-la osi).
4 (Li Danyèl 4:10-17.) Sé « sèt tan-la » ka rèprézanté on péryòd ki ka diré 2 520 an. Péryòd-lasa koumansé an 607 avan épòk an nou lèwvwè sé Babilonyen-la woté dènyé wa-la Jéova té mèt asi twòn a-y a Jérizalèm. É péryòd-lasa bout an 1914 lèwvwè Jéova mèt Jézi Wa a wayòm a-y pas i sé « sila Lwa-la ka ba-y dwa la * » (Ézék. 21:25-27).
5. Poukwa pwofési a sé « sèt tan-la » ka ankourajé-nou ?
5 Poukwa pwofési-lasa ka ankourajé-nou ? Pwofési a sé « sèt tan-la » ka rasiré-nou pas i ka montré-nou kè Jéova ka réyalizé pwomès a-y a moman-la i prévwa la. Jéova té ja désidé a ki moman Jézi té’é vin Wa é lèwvwè moman-lasa rivé, Jéova fè sa i té désidé. Kifè, nou pé sèten kè sé pwofési-la ké réyalizé a moman-la i désidé la. Wi, nou pé sèten kè jou a Jéova « pé ké anrèta » (Abak. 2:3).
KIJAN NOU PÉ RIVÉ A SAV KÈ KRIS VIN WA A WAYÒM A BONDYÉ
6. a) Ka nou ka vwè asi latè ki ka montré kè Jézi ka gouvèné an syèl-la ? b) Kijan Révélasyon 6:2-8 ka montré-nou kè Jézi koumansé gouvèné ?
6 Lè ministè a Jézi té k’ay bout asi latè, i anonsé dé biten ki té’é fèt toupatou asi latè é sé biten-lasa té’é pèwmèt disip a-y sav kè i koumansé gouvèné an syèl-la. Pa ègzanp, i di kè moun té’é fè lagè, kè moun té’é mò-fen é kè té’é ni tranmanndtè. I anonsé osi kè té’é ni épidémi « on koté apré lòt », é Covid-19 la sé on ègzanp ki ka montré-nou sa byen. Tout sé biten-lasa ka fè pawti a sa Labib ka kriyé on « sign » ki ka montré kè Jézi la (Mat. 24:3, 7 ; Lik 21:7, 10, 11). Plis ki 60 an apré mò a Jézi é apré i viré an syèl-la, Jézi di lapòt Jan kè sé biten-lasa té’é fèt (li Révélasyon 6:2-8). É nou ka vwè kè tout sé biten-lasa ka fèt asi latè dépi 1914 é sé lanné-lasa Jézi vin Wa.
7. Dépi Jézi vin Wa, poukwa ni tousa malè ki ka fèt asi latè ?
7 Poukwa dépi Jézi vin Wa, sitiyasyon-la ka vin dè plizanpli mové asi latè ? An Révélasyon 6:2 nou ka touvé on enfòwmasyon ki ka édé-nou konprann sa é enfòwmasyon-lasa enpòwtan toubònman. Yo ka èspliké-nou kè prèmyé biten Jézi fè lèwvwè i vin Wa sé té ay fè lagè. Épi kimoun i ay fè lagè-lasa ? Èvè Dyab-la é démon a-y. Dapré chapit 12 a liv a Larévélasyon, Satan pèd lagè-lasa é yo jété ki li ki démon a-y asi latè. I anrajé, alò i ka fè raj a-y pasé asi lézimen é sé pousa ni tousa « malè » asi latè (Rév. 12:7-12).
Lèwvwè nou ka tann mové nouvèl, nou pa ni tchè-kontan, men lèwvwè nou ka vwè jan sé pwofési-la ka réyalizé jòdijou, sa ka montré-nou kè Bondyé mèt wayòm a-y anplas (gadé paragraf 8 la).
8. Lèwvwè nou ka vwè jan sé pwofési-la ki ka konsèwné Wayòm-la ka réyalizé, poukwa sa ka ankourajé-nou ?
8 Poukwa sé pwofési-lasa ka ankourajé-nou ? Sa ki ka fèt asi latè é lèfètkè sé moun-la té’é vin dè plizanpli mové, sa té’é montré-nou kè Jézi vin Wa an syèl-la. Kifè, lèwvwè nou ka vwè jan sé moun-la égoyis é jan yonn hay lòt, sa pa dwèt étoné-nou é sa pa dwèt égri-nou. Okontrè, nou sav kè sé on pwofési ki ka réyalizé. Wayòm a Bondyé anplas ! (Sòm 37:1). Anplisdisa, nou sav kè pli Awmagédon ké toupré rivé pli biten la ké vin mové (Mawk 13:8 ; 2 Tim. 3:13). Nou ni onlo rèkonésans pou Pap’an nou ki an syèl-la é ki enmé-nou pas i ka édé-nou konprann poukwa ni tousa pwoblèm asi latè.
KIJAN BONDYÉ KÉ DÉTWI SÉLA KI KONT WAYÒM A-Y LA ?
9. Ka pwofési-la nou ka touvé an Danyèl 2:28, 31-35 ka di asi dènyé puisans mondyal la é kitan puisans-lasa vin parèt ?
9 (Li Danyèl 2:28, 31-35.) Jòdijou nou ka vwè kè pwofési-lasa osi ka réyalizé anba zyé an nou. Nabikodonozò fè on rèv ki té ni on èstati adan é rèv-lasa té ka montré sa ki té pou rivé ‘pannan sé dènyé jou-la’ apré Jézi koumansé gouvèné. Pannan péryòd-lasa, pyé a èstati-la ki fèt èvè awjil é èvè fè, kivédi dènyé puisans mondyal la, té ké fè pawti a lènmi a Jézi ki asi latè kon pwofési-la té anonsé. Puisans mondyal lasa ja parèt. I koumansé gouvèné pannan 1é gè mondyal la, lè Langlètè é Lamérik koumansé kolaboré kon bag é dwèt. Sé konsa, Langlètè é Lamérik alyansé-yo. Rèv-la Nabikodonozò té fè la té anonsé osi kè té’é ni omwen 2 biten ki té’é diféran ant puisans mondyal lasa é sé wayòm-la ki gouvèné avan-y la.
10. a) Ki biten an pawtikilyé pwofési a Danyèl té ja anonsé anrapò èvè puisans-la Langlètè é Lamérik ka fòwmé la ? b) Adan ki zatrap pou nou pa pri ? (gadé ti karé-la « Méfyé-zòt dè awjil-la ! »).
10 Prèmyé biten ki ka fè kè puisans-la Langlètè é Lamérik ka fòwmé la diféran dè sé puisans-la ki té la avan, sé kè lèwvwè yo ka palé dè pawti a èstati-la ki ka rèprézanté-y la, yo pa’a di kè i fèt èvè lò oben èvè awjan kon sélézòt pawti a èstati-la. Men yo ka di kè i fèt èvè 2 biten diféran. I fèt èvè fè é èvè awjil. Awjil-la ka rèprézanté pèp-la (Dan. 2:43, nòt an fransé). Jòdijou, nou ka vwè on mannyè ki klè kè pèp-la ka mèt baton an wou a puisans mondyal lasa pou anpéché-y fè sa i vlé. É nou ka vwè sa piskè lèwvwè ni élèksyon sé avi a pèp-la ki ka konté, yo ka désann an lari pou défann dwa a yo, sé yo ki adan sé sendika-la é souvantfwa yo ka manifèsté pou di kè yo pa dakò èvè sa gouvènman-la ka fè.
11. Lèfètkè puisans-la Langlètè é Lamérik ka fòwmé la parèt, sa ka édé-nou kwè plis ankò kè nou ka viv an tan a lafen. Poukwa nou ka di sa ?
11 On dézyèm rézon ki ka fè-nou di kè puisans-la Langlètè é Lamérik ka fòwmé la pa menm biten ki sélézòt puisans-la, sé kè adan pwofési-la yo ka di kè sé-y pyé a èstati-la ka rèprézanté. Sa vé di kè pa ni pondòt puisans ki ka vin dèyè do a-y é pa ni pondòt gouvènman ki ké pran plas a-y nonplis. Okontrè, lèwvwè Awmagédon ké rivé, wayòm a Bondyé ké détwi-y ansanm èvè tout sélézòt gouvènman-la * (Rév. 16:13, 14, 16 ; 19:19, 20).
12. Ki dòt biten ki adan pwofési a Danyèl ki ka konsolé-nou é ki ka ban-nou on èspwa ?
12 Poukwa pwofési-lasa ka ankourajé-nou ? Pas i ka ban-nou détay ki ka montré-nou kè nou ka viv an tan a lafen. Ni plis ki 2 500 lanné dè sa, Danyèl té ja anonsé kè apré Babilòn, té’é ni 4 puisans mondyal ankò ki té’é ka gouvèné asi pèp a Bondyé. Anplisdisa, i di konsa kè puisans-la Langlètè é Lamérik ka fòwmé la sé-y ki té’é dènyé puisans-la. Sé détay-lasa ka rékonfòwté-nou toubònman é grasa sa nou sèten a san pou san kè talè wayòm a Bondyé ké détwi tout sé gouvènman-la ki ka dirijé toupatou asi latè (Dan. 2:44).
13. a) Ki biten « uityèm wa-la » é sé dis wa-la yo ka palé an Révélasyon 17:9-12 ka rèprézanté ? b) Kijan pwofési-lasa réyalizé ?
13 (Li Révélasyon 17:9-12.) Tout sé déga-la 1é gè mondyal la fè la réyalizé ondòt pwofési ankò anrapò èvè sé dènyé jou-la. Dirijan a onlo péyi té vlé mèt lapé asi latè. Alò an janvyé 1920, yo kréyé sa yo ka kriyé Sosyété a sé Nasyon-la é an òktòb 1945, Lénasyonzini pran plas a-y. Adan pwofési-la, yo ka di kè òwganizasyon-lasa sé on « uityèm wa ». Men a pa on puisans mondyal. Sé sé gouvènman-la ki ka soutyenn-li la ki ka ba-y tout pouvwa-la i ni la. Labib ka kriyé sé gouvènman-lasa sé dis kòn-la oben sé dis wa-la.
14-15. a) Ka Révélasyon 17:3-5 ka aprann-nou asi « Gran Babilòn-la » ? b) Ka ki ka rivé sé fo rèlijyon-la alèla ?
14 (Li Révélasyon 17:3-5.) Lapòt Jan vwè on vizyon é adan vizyon-lasa té ni on pwòstitiyé « Gran Babilòn-la » é pwòstitiyé-lasa ka rèprézanté tout sé fo rèlijyon-la. Ka vizyon-lasa ka aprann-nou asi-y ? Ni lanné é lanné kè sé fo rèlijyon-la ka travay men-dan-lamen èvè sé gouvènman-la é kè yo ka soutyenn-yo. Men talè, Jéova ké « mèt lidé a-y an tchè a yo pou yo fè volonté a-y ». Alò ka ki ké pasé ? Ében sé gouvènman-la, kivédi sé dis wa-la ké ataké sé fo rèlijyon-la é yo ké détwi-yo (Rév. 17:1, 2, 16, 17).
15 Kijan nou fè sav kè fen a Gran Babilòn-la toupré rivé ? Pou nou pé sa réponn a kèsyon-lasa fò-nou pran tan sonjé kè an tan lontan, près tout vil a Babilòn té lantouré èvè on gran flèv yo ka kriyé Léfrat. Adan liv a Larévélasyon, yo ka palé dè « sé dlo-la » ki ka pwotéjé Gran Babilòn-la é yo ka di kè yo ka rèprézanté sé milyon moun-la ki ka soutyenn-li la (Rév. 17:15). Men liv a Larévélasyon ka di osi kè sé dlo-lasa té’é vin sèk. Sa té vlé di kè onlo moun té’é arété soutyenn Gran Babilòn-la (Rév. 16:12). É sé sa nou ka vwè jòdila. Onlo moun ka lagé sé fo rèlijyon-la é yo k’ay chèché répons a sé kèsyon-la yo ka pozé-yo la ondòt koté.
16. Lèfètkè yo kréyé Lénasyonzini é kè sé moun-la ka lagé sé fo rèlijyon-la piti-a-piti ka montré-nou on biten. Ki biten ésa é poukwa sa ka ankourajé-nou ?
16 Poukwa sé pwofési-lasa ka ankourajé-nou ? Lèfètkè yo kréyé Lénasyonzini é lèfètkè pli tan ka pasé pli sé moun-la ka arété soutyenn sé fo rèlijyon-la, sa ka montré-nou kè nou ka viv sé dènyé jou-la. Men a pa paskè sé moun-la ka lagé sé fo rèlijyon-la kè sé fo rèlijyon-la ké disparèt. Kon nou vwè-y talè la, sé Jéova ki ké mèt lidé a-y adan tchè a sé dis wa-la, kivédi sé gouvènman-la ki ka soutyenn Lénasyonzini « pou yo fè volonté a-y ». Lèwvwè sé nasyon-lasa ké détwi sé fo rèlijyon-la, sa ké fèt onsèl kou é sa ké siwprann toutmoun * (Rév. 18:8-10). Lèwvwè sa ké fèt, sa ké soukwé moun toupatou asi latè é sèten sa ké menné bon difikilté. Men sèwvitè a Bondyé ké ni tchè-kontan pou omwen 2 rézon. Fo-rèlijyon-la, ki lènmi a Bondyé dépi onpakèt lanné, pé’é ka ègzisté ankò é kèlkè tan apré, Bondyé ké libéré-nou dè mond méchan lasa (Lik 21:28).
FÒ OU NI FWA KÈ JÉOVA KÉ TOUJOU PWOTÉJÉ PÈP A-Y DÈMEN
17-18. a) Ka nou pé fè pou kontinyé konsolidé fwa an nou ? b) Ka nou ké vwè adan awtik-la ki ka vin la ?
17 Danyèl té anonsé kè té’é ni « vré konésans-la pou tann-é-konprann ». É sé ègzaktèman sa ki pasé ! Jòdila nou ka rivé konprann sé pwofési-la ki ka konsèwné épòk an nou (Dan. 12:4, 9, 10). Yo ka réyalizé ègzaktèman kon Jéova té anonsé. Sa tèlman èstraòwdinè ! Pa ni mwayen nou pa ba Jéova louwanj pousa é di-y mèsi pou Pawòl a-y (Iz. 46:10 ; 55:11). Alò, an-nou kontinyé ay an nannan a Bib-la lè nou ka étidyé é an-nou kontinyé édé lézòt konnèt Jéova. Si nou ka fè sa, sa ké konsolidé fwa an nou. Jéova ké pwotéjé tout sé moun-la ki ka fè-y konfyans a san pou san é i ké ba-yo « lapé akontinyé » (Iz. 26:3).
18 Adan awtik-la ki ka vin la, nou ké ègzaminé déotwa pwofési ki ka konsèwné sé lasanblé-la an tan a lafen. Kon nou ké vwè-y, sé pwofési-lasa ka montré kè nou ka viv adan sé dènyé jou-la. Anplisdisa, nou ké vwè kijan Jézi, Wa an nou, ké pran swen a disip a-y ki fidèl.
KANTIK 61 Témoins, en avant !
^ Jòdijou nou ka viv on épòk ki èstraòwdinè toubònman é pétèt sé prèmyé fwa nou ka viv on biten konsa adan Listwa ! Jéova mèt Wayòm a-y anplas é sé sa onlo pwofési ki adan Bib-la té ja anonsé. Adan awtik-lasa nou ké ègzaminé déotwa adan sé pwofési-lasa. Sa ké édé-nou pou nou pé sa ni plis fwa adan Jéova. Konsa nou ké kontinyé rété kalm é nou ké kontinyé fè Jéova konfyans dépi konnyéla é nou ké fè sa dèmen osi.
^ Gadé liv-la Ou pé ni tchè-kontan pou touttan ! (lèson 32, pwen 4), é gadé osi vidéo-la Wayòm a Bondyé koumansé gouvèné an 1914 asi jw.org.
^ Pou-w ni plis enfòwmasyon asi pwofési-lasa, gadé niméwo a 15 jen 2012 a Tou dè Gad la paj 14-19.
^ Pou ni plis enfòwmasyon asi évènman ki ké fèt talè, gadé chapit 21 a liv-la Le Royaume en action !