Jézi té vlé kè toutmoun antann-yo byen yonn èvè lòt é sé sa i anségné. Men on jou mi sa i di apòt a-y : « Pa konprann an vin pou mèt lapé asi latè. A pa lapé, men sé pito épé-la an vin mèt. Pas an vin mèt lagè ant gason-la é papa-y, ant fi-la é manman-y, ant bèlfi-la é bèlmè a-y » (Mat. 10:34, 35). Ka Jézi té vlé di pa la ?

Jézi pa té vlé mèt zizanni adan sé fanmi-la, men i té sav kè a pa toutmoun adan on fanmi ki té’é aksèpté mésaj a-y é kè sa té’é mèt zizanni adan fanmi-la. Sé pousa, siwvwè on moun té vlé vin disip a-y é pran lèbatèm, fò i té byen konprann kè dépawfwa, fanmi a-y pa té’é dakò èvè désizyon-la i pran la. É si moun-la i mayé èvè-y la oben dòt moun an fanmi a-y té ka lévé kont li é té ka éséyé mèt baton an wou a-y, sa pa té’é fasil pou-y dè suiv sa Jézi anségné.

Labib ka ankourajé sé krétyen-la « viv byen èvè toutmoun » (Wom. 12:18). Men sa Jézi anségné pé vin kon « épé » adan on fanmi. Kijansa ? Sa ka rivé lèwvwè sèwten moun adan on fanmi ka aksèpté sa Jézi anségné alòskè dòt vé pa tann palé dè sa menm é kè yo jous kont sa Jézi anségné. Kifè, moun ki ka fè pawti a menm fanmi-la, kivédi moun ki ka viv adan menm kaz-la ka vin « lènmi » èvè moun-la ki ka aprann konnèt lavérité (Mat. 10:36).

Dépawfwa, on disip a Jézi ki pa ni tout fanmi a-y adan lavérité pé touvé-y douvan on chwa : swa fò i ké chwazi fè Jéova é Jézi plézi, oswa fò i ké chwazi fè fanmi a-y plézi. Pa ègzanp, fanmi a-y ki pa adan lavérité pé mèt présyon asi-y pou i pé sa fété on biten ki pa annakò èvè Pawòl a Bondyé. Men a moman lasa, ka i ké fè ? Mi sa Jézi di : « On moun ki enmé pap’a-y oben manman-y plis ki mwen pa mérité vin disip an mwen » (Mat. 10:37). Nou ka tou konprann kè Jézi pa té vlé di kè dépi on moun ka vin disip a-y fò pa i enmé fanmi a-y kon avan, men sa i té vlé sé té montré disip a-y ka pou yo té mèt prèmyé douvan adan vi a yo. Kifè, siwvwè ni moun adan fanmi an nou ki bizwen anpéché-nou fè volonté a Jéova, nou ké kontinyé enmé-yo. Men moun-la nou ké pli enmé la sé Bondyé.

Sé vré, lèwvwè moun an fanmi an nou kont nou pas nou ka sèvi Jéova, sa pé rann-nou tris. Men, fò disip a Jézi toujou sonjé sé pawòl-lasa : « Moun-la ki pa ka pran poto-siplis a-y é ki pa ka suiv-mwen pa mérité vin disip an mwen » (Mat. 10:38). Sa vé di kè si fanmi a on krétyen ka fè-y soufè pas yo pa dakò pou i sèvi Jéova, i paré a andiré sa. Men i ka èspéré kè on jou, grasa bèl konduit a-y, fanmi a-y ké chanjé é kè yo ké anvi konnèt mésaj-la ki an Bib-la (1 Pyè 3:1, 2).