1-2. An ki sans on krétyen ka touvé-y kon on batiman ki ho toubònman ? (1 Korentyen 15:58).

 AN FEN a lézanné 70, adan vil a Tokyo o Japon, yo konstwi on batiman ki té ho toubònman. Té ni 60 étaj adan. Lè sé moun-la té ka pasé owa batiman-lasa, yo té ka mandé-yo kijan batiman-lasa té’é pé rété doubout piskè adan vil-lasa té ni onlo tranmanndtè. Men ka sé moun-la ki konstwi batiman-la té fè pou i té pé sa rété doubout menmsi on tranmanndtè té fèt ? Ében lè yo fè batiman-lasa, yo fè-y on mannyè pou i pé sa pliyé lèwvwè ni on tranmanndtè olyé i fésé atè. Alò lèwvwè on tranmanndtè té’é pasé, batiman-lasa té’é boujé tibwen men i pa té’é krazé. Nou pé konparé sé krétyen-la èvè gran batiman-lasa. Kijansa ?

² Fò on krétyen karé an zafè a-y, men fò pa i two karé nonplis. Lèwvwè sé pou défann lwa a Jéova é prensip a-y, fò i montré-y fò, fò pa i bigidi (li 1 Korentyen 15:58). A moman-lasa, i ka montré kè « i paré pou i obéyi » é kè si on biten pa annakò èvè sa Jéova ka mandé, i pa ka démòd. Men fò on krétyen montré-y « rézonab » osi. Sa vé di kè lèwvwè sa posib oben kè sa nésésè, i pé’é two rèd (Jak 3:17). Si i ka rézonné konsa, sa ké anpéché-y aji on mannyè ki two karé men i pé ké aji on mannyè ki two mòl nonplis. Adan awtik-lasa, nou ké vwè ka nou pé fè pou nou pa bigidi. Nou ké vwè osi 5 biten Satan ka éséyé fè pou fè-nou bigidi é nou ké vwè ka pou nou fè pou nou pa pri adan sa.

3. An Akt 15:28, 29, ki lwa Jéova ka ban-nou ?

³ Jéova, sé Sila ki ka ban-nou lwa-la é sé li prèmyé ki ni dwa fè sa. I toujou ka ba pèp a-y dé lwa ki fasil a konprann (Iz. 33:22). Pa ègzanp, o 1^é syèk, komité santral la palé dè 3 domenn otila fò sé krétyen-la rété fò : 1) fò pa yo adoré idòl é fò-yo adoré enki Jéova, 2) fò-yo rèspèkté lwa a Bondyé ki ka di kè san-la sakré é 3) fò-yo rèspèkté prensip a Jéova anrapò  èvè péché sèksyèl (li Akt 15:28, 29). Jòdijou, kijan sé krétyen-la pé rété fò adan sé 3 domenn-lasa ?

4. Kijan nou ka montré kè sé Jéova tousèl nou ka adoré ? (Révélasyon 4:11).

⁴ Nou pa ka adoré pon idòl é nou ka adoré yenki Jéova. Jéova té mandé sé Izraélit-la pou yo té adoré enki li (Dét. 5:6-10). Lèwvwè Dyab-la vin tanté Jézi, Jézi fè-y sonjé kè sé Jéova tousèl pou nou adoré (Mat. 4:8-10). Sé pousa nou pa ka adoré pon idòl. Nou pa ka adoré ponmoun nonplis. Pa ègzanp, menmsi on moun chèf a rèlijyon, chèf a politik, kè moun-lasa ka fè ispò, kè i aktè oben kè i ka chanté, nou pé’é aji èvè-y konsi sé on bondyé. Sé Jéova tousèl nou ka adoré, sila ki « kréyé tout biten » é sé li nou ka obéyi (li Révélasyon 4:11).

5. Lavi sakré é san-la osi. Poukwa nou ka rèspèkté lwa a Jéova anrapò èvè lavi é anrapò èvè san-la ?

⁵ Lavi sakré é san-la osi. Nou ka rèspèkté lwa a Jéova anrapò èvè lavi é anrapò èvè san-la. Poukwa nou ka fè sa ? Pas Jéova ka di kè san-la ka rèprézanté vi-la é lavi sé on kado Jéova fè-nou. Kado-lasa ni onlo valè (Lév. 17:14). Lèwvwè Jéova pèwmèt lézòm manjé zannimo pou prèmyé fwa, i entèwdi-yo manjé san-la (Jén. 9:4). Lè i ba sé Izraélit-la Lwa a Moyiz, i répété-yo sa ankò (Lév. 17:10). É o 1^é syèk, i sèvi èvè komité santral la pou i mandé sé krétyen-la « pa sèvi […] èvè san » (Akt 15:28, 29). Lèwvwè nou ni désizyon a pran anrapò èvè santé an nou, nou byen désidé a obéyi a sé komandman-lasa b.

6. Ka pou nou fè pou nou obéyi a prensip a Jéova anrapò èvè sa ki pa pwòp ?

⁶ Prensip a Jéova anrapò èvè sa ki pa pwòp ho toubònman é nou dakò a san pou san èvè sé prensip-lasa (Ébr. 13:4). Lapòt Pòl ka di kè fò-nou « tchouyé » manb a kò an nou. Sa vé di kè fò-nou fè tousa nou pé pou raché tout kalté vyé lanvi ki té’é andidan an nou. Nou ka fè atansyon pou nou pa gadé oben pou nou pa fè pon biten ki té’é pé fè-nou fè on péché sèksyèl (Kol. 3:5 ; Jòb 31:1). Lè nou anvi fè on biten ki pa bon, onfwamenm nou ka woté tout kalté vyé pansé an lèspri an nou oben nou ka kenbé kò an nou pou nou pa pèd lanmityé an nou èvè Jéova.

7. Ka pou nou byen désidé a fè, é poukisa ?

⁷ Jéova vé kè nou obéyi-y èvè tout tchè an nou (Wom. 6:17). Lè i ka di-nou fè on biten, sé toujou pou byen an nou é nou pé pa chanjé lwa a-y (Iz. 48:17, 18 ; 1 Kor. 6:9, 10). Sé pousa, nou ka fè tousa nou pé pou fè Jéova plézi é pou nou ni menm mantalité ki moun-la ki maké Sòm 119:112. Mi sa i ka di : « An byen désidé a toujou obéyi a lwa a-w, jiskatan lafen rivé. » Nou byen désidé a tchenbé fò men Satan ka fè tousa i pé pou fè-nou moli. Ki métòd i ka itilizé pou fè sa ?

8. Kijan Satan ka sèvi èvè pèwsékisyon-la pou fè-nou moli ?

⁸ Lè yo ka pèwsékité-nou. Délè moun ka mèt présyon asi nou oben ka aji èvè vyolans épi nou é Satan ka sèvi èvè sa pou fè-nou bigidi é anpéché-nou rété fidèl. Sa i vé sé ‘valé-nou’. Sa vé di kè i vé fè-nou pèd lanmityé an nou èvè Jéova (1 Pyè 5:8). O 1^é syèk, yo mennasé sèwten krétyen, yo ba-yo kou é yo jous tchouyé-yo pas yo té byen désidé a tchenbé fò (Akt 5:27, 28, 40 ; 7:54-60). Jòdijou, Satan ka pèwsékité-nou osi. Pa ègzanp, nou ka vwè sa on mannyè ki klè lè yo ka fè frè é sè an nou ki an Risi oben ki adan dòt péyi bon abominasyon é lèwvwè moun ki kont nou ka ataké-nou.

9. Bay on ègzanp ki ka montré poukwa sa enpòwtan kè nou fè atansyon pou nou pa pri adan zatrap ki anbafèy.

 ⁹ Lè yo bizwen pri-nou adan on zatrap ki anbafèy. Satan ka pèwsékité-nou men i pa ka fè enki sa. I ka sèvi èvè « zatrap » ki anbafèy osi (Éféz. 6:11). An-nou vwè sa ki rivé on frè non a-y sé Bob. I rantré lopital pou fè on gwo opérasyon. I di sé mèdsen-la kè i vé pa yo ba-y san anponjan. Dòktè-la ki opéré-y la té dakò pou rèspèkté désizyon a-y. Dènyé lannuit-la avan jou-la pou i té opéré la, on mèdsen ki ka ba moun landòmi vin vwè-y. Fanmi a-y té ja pati é dòktè-lasa di-y konsa kè nòwmalman, yo pé ké bizwen ba-y san men yo ni tibwen san akoté kanmenm pou sianka. Pétèt dòktè-lasa pansé kè konm fanmi a Bob pa té la, Bob té’é chanjé lidé men Bob pa démòd. I woudi mèdsen-la kè i pé’é pran san anponjan.

10. Siwvwè nou ka mèt dé lidé ki pa annakò èvè sa Jéova ka di an tèt an nou, sa danjéré. Poukwa nou ka di sa ? (1 Korentyen 3:19, 20).

¹⁰ Dé lidé ki pa annakò èvè sa Jéova ka di. Si nou ka lésé moun ki ka méprizé lwa a Jéova détenn asi nou, nou pé rivé a mèt prensip a Jéova dèyè do an nou (li 1 Korentyen 3:19, 20). Pli souvan ki rarman « sajès a mond-lasa » ka pousé moun a pa kouté Bondyé. O 1^é syèk, moun ki té ka rété Pèwgam é Tiyati té ka adoré idòl é té ka fè péché sèksyèl. Ni sèwten krétyen ki koumansé suiv-yo. Alò Jézi palé ba sé lasanblé-la ki té adan sé 2 vil-lasa franchman pas ni sèwten adan yo ki té ka wousoulé moun ki té ka fè péché sèksyèl (Rév. 2:14, 20). Jòdijou osi, sé moun-la ki adan mond-lasa vé kè nou aksèpté mantalité a yo. Moun ki an fanmi an nou oben moun ki alantou an nou pé éséyé fè-nou konprann kè nou two radikal é kè nou pa bizwen suiv lwa a Jéova. Pa ègzanp, lè on moun ka fè on péché sèksyèl, yo pé di-nou kè yo pa’a vwè ka i ni dè mal adan sa é yo pé di-nou osi kè prensip a Labib pasé dimòd.

11. Toupannan nou ka fè ansòt pou nou rété fò, a kibiten fò-nou fè atansyon ?

¹¹ Pétèt kè délè nou ni lenprésyon kè lè Jéova ka mandé-nou fè on biten, i pa’a ban-nou asé èsplikasyon. É dépawfwa, pétèt kè nou anvi « ay pli lwen ki sa ki maké » (1 Kor. 4:6). An tan a Jézi, sé sa sé chèf a rèlijyon la té ka fè é sé té on péché. Yo té ka mèt lidé a yo ki ta yo adan Lwa a Moyiz, kifè, pèp-la té ni dimal a rèspèkté Lwa-la (Mat. 23:4). Jéova ka sèvi èvè Pawòl a-y é èvè òwganizasyon a-y pou di-nou sa pou nou fè é sa i ka di-nou fasil a konprann. Alò nou pa bizwen ajouté ayen adan sa i ka mandé-nou fè (Pwov. 3:5-7). Fò pa nou ay pli lwen ki sa ki maké adan Bib-la. Anplisdisa, adan sèwten domenn Labib ka lésé chakmoun fè pwòp chwa a yo, alò, nou pa ni a di frè é sè an nou ka pou yo fè.

12. Kijan Satan ka fè manti monté é désann ?

¹² Lè yo ka manti ba-w. Satan ka sèvi èvè « mansonj initil » é èvè « biten tou senp a mond-lasa » pou kouyonné moun é pou anpéché-yo rété soudé (Kol. 2:8). O 1^é syèk, adan sé manti-lasa, ou té ka touvé filozofi ki té bazé asi sa moun té ka di. Ou té ka touvé osi sa sé Juif-la té ka anségné ki pa té annakò èvè Lézékriti é yo té ka di osi kè fò sé krétyen-la té suiv Lwa a Moyiz. Men ponyonn adan sé biten-lasa pa té vré pas yo té ka anpéché sé moun-la kouté Jéova, li ki sé sous a vré Sajès-la. Jòdijou, Satan ka sèvi èvè sé rézo sosyo la, èvè latélé, é èvè Entèwnèt pou fè manti é ti pawòl monté-é-désann alòskè sé biten-lasa pa bazé asi ayen. É sé sé biten-lasa sé chèf politik la ka mèt douvan. Dayè sé sa nou konstaté a plizyè rèpriz pannan pandémi a Covid-19 la c. Sé frè é sè la ki suiv sa òwganizasyon  an nou té ka di pa té enkyèt kon sé moun-la ki té ka kouté enfòwmasyon ki pa té vré (Mat. 24:45).

13. Ki biten ki pé distrè-nou, é poukwa fò-nou fè atansyon pou nou pa pri adan sa ?

¹³ Lè ni biten ki pé distrè-nou. Fò pa nou jen arété konsantré-nou asi « sa ki pli enpòwtan » (Filip. 1:9, 10). Sé biten-la ki pé distrè-nou la pé fè-nou pèd onpakèt tan é onlo énèwji. Dé biten nou ni labitid fè touléjou, kon manjé, bwè, anmizé-nou é travay, pé rivé a vin on biten ki ka distrè-nou siwvwè sé sé biten-lasa nou ka mèt prèmyé douvan adan vi an nou (Lik 21:34, 35). Anplisdisa, touléjou nou ka tann oben nou ka li kè sé moun-la ka manifèsté é kè adan lapolitik, yo adan on déba ki pa’a fin menm. Panga nou lésé sé kalté biten-lasa distrè-nou. Sinon, an tchè an nou oben an lèspri an nou, nou té’é pé mèt-nou ka pran pawti adan sé domenn-lasa. Nou sòti palé dè déotwa métòd Satan ka itilizé pou frenné balan a moun ki byen désidé a fè sa ki byen. Aprézan, an-nou vwè kijan nou pé tchenn-li tèt é tchenbé fò.

14. Bay on prèmyé biten ou pé fè pou rété fò.

¹⁴ Sonjé poukwa ou ba Jéova vi a-w é poukwa ou pran lèbatèm. Ou fè sé 2 biten-lasa pas ou té vlé fè Jéova plézi. Sonjé sa ki fè-w vin sèten kè ou té touvé lavérité. Ou aprann konnèt Jéova, ou vin enmé-y é ou koumansé ni rèspé pou Pap’a-w ki an syèl-la. Fwa a-w vin pi fò é sa ba-w fòs pou ou té pé sa rèpanti-w. Tchè a-w pousé-w a lagé tout sé mové biten-la ou té ka fè la é a ranjé vi a-w pou i annakò èvè volonté a Jéova. Sa trankilizé-w lè ou vin konprann kè Bondyé té padonné-w (Sòm 32:1, 2). Ou mété-w k’ay adan tout sé réinyon-la é ou koumansé palé alantou a-w dè tout sé bèl biten-la ou té aprann la. Dépi jou-la ou ba Jéova vi a-w la é ou pran lèbatèm, ou ka maché asi chimen a lavi, é ou byen désidé a kontinyé maché asi chimen-lasa (Mat. 7:13, 14).

15. Lè nou ka étidyé Pawòl a Bondyé é kè nou ka médité anlè-y, ki bon biten sa ka menné ban nou ?

¹⁵ Étidyé Pawòl a Bondyé é médité asi sa ou ka aprann. Pou on pyébwa pé sa rété doubout, fò rasin a-y ka désann fon an tè-la.  Menmjan-la, pou nou pé sa rété doubout pikan, fò fwa an nou byen chouké adan Pawòl a Bondyé. Pli on pyébwa ka grandi, pli rasin a-y ka kouri atè-la é ka plonjé désann fon an tè-la. Menmjan-la, lè nou ka étidyé Pawòl a Bondyé é kè nou ka médité anlè-y, nou ka fè fwa an nou vin pi fò, é nou ka vin pi sèten ankò kè pa ni ayen ki pibon ki sa Bondyé ka mandé-nou fè (Kol. 2:6, 7). Sonjé jan Jéova soutyenn sèwvitè a-y ki té ka viv an tan a Labib. Délè i di-yo ka pou yo té fè ègzaktèman, i ba-yo déotwa konsèy é i pwotéjé-yo. Pa ègzanp, Ézékyèl vwè on zanj adan on vizyon. Zanj-la té ka miziré tanp-la é i té ka pran travay-lasa oséryé menm. Toupannan Ézékyèl té ka gadé sa, i té byen konsantré pou éséyé konprann tousa zanj-la té ka fè. Grasa vizyon-lasa, fwa a Ézékyèl vin pi fò, é jòdila, vizyon-lasa ka aprann-nou jan sa enpòwtan kè nou rèspèkté sé prensip-la Jéova mèt anplas la anrapò èvè vré adorasyon-la d (Ézék. 40:1-4 ; 43:10-12). Nou osi, sa ka fè-nou dibyen toubònman lè nou ka étidyé Pawòl a Bondyé, lè nou k’ay an nannan a-y é lè nou ka médité anlè-y.

16. Bob fè ansòt pou i ni on tchè ki solid. Kijan sa pwotéjé-y ? (Sòm 112:7).

¹⁶ Fò pa ou ni on tchè fèb men fò ou travay pou ou ni on tchè ki solid. Wa David di kè i pé’é jen arété enmé Jéova adan on chanson kè i maké. Mi sa chanson-lasa ka di : « Tchè an mwen solid, o Bondyé » (Sòm 57:7). Nou osi, nou pé ni on tchè ki solid, kivédi nou pé fè Jéova konfyans a san pou san (li Sòm 112:7). Talè la nou palé dè Bob. An-nou vwè kijan sa édé-y. Lèwvwè mèdsen-anèstézis-la di kè i té’é mèt tibwen san akoté ba-y sianka, onfwamenm Bob di-y konsa kè si yo pé rivé a ba-y san, i ka sòti an lopital-la onfwa-onfwa. Mi sa i èspliké apré : « An pa té ni pon dout asi sa pou an té fè é an pa té ka enkyété-mwen pou sa ki té’é pé rivé. »

17. Ka ègzanp a Bob ka aprann-nou ? (gadé imaj-la osi).

¹⁷ Bob pa bigidi pas lontan avan i té rantré an lopital-la, i té ja désidé kè i pa té’é démòd parapòt a san-la. Ka ki pousé-y pran désizyon-lasa ? Prèmyèwman, i té vlé fè Jéova plézi. Dézyèmman, Labib é piblikasyon an  nou ka di kè lavi é san-la sakré é i té ja pran tan étidyé sa byen konm i fo. Twazyèmman, i té sèten kè si i té ka kouté Jéova, Jéova té’é béni-y. Nou osi, nou pé fè ansòt pou nou ni on tchè ki solid kèlkèswa sé éprèv-la nou ka jwenn la.

18. Barak té ka fè Jéova konfyans. Ki bèl ègzanp i lésé ban nou ? (gadé imaj-la ki anlè po a jounal-la).

¹⁸ Fè Jéova konfyans. Barak gangné on konba pas i té ni konfyans adan dirèksyon-la Jéova té ba-y la. A épòk-lasa, pa té ni pa menm onsèl boukliyé oben onsèl lans an Izrayèl. Magrésa, Jéova mandé-y ay goumé èvè on lawmé ki té ni zàm kon zàm fèt. Sé té lawmé a sé Kananéyen-la é sé Siséra ki té chèf a yo (Jij 5:8). Débora, on madanm ki té pwofèt, di Barak désann adan on savann pou ay goumé èvè Siséra é sé 900 cha-la i té ni la. Konm téren-la té plat adan savann-la, sé moun-la ki té adan sé cha-la té’é alèz a yo é sé Izraélit-la té’é ni dimal a goumé èvè yo. Barak té sav sa byen men i obéyi kanmenm. Sé Izraélit-la té asi Mòn Tabò la. Lèwvwè yo mèt-yo ka désann, Jéova fè on kalté gwo lapli tonbé. Tout cha a Siséra touvé-yo pri adan labou-la é Jéova ba Barak laviktwa (Jij 4:1-7, 10, 13-16). Nou osi, Jéova ké ban-nou laviktwa si nou ka fè-y konfyans é siwvwè nou ni konfyans adan dirèksyon-la òwganizasyon a-y ka ban-nou la (Dét. 31:6).

19. Poukwa ou byen désidé a tchenbé fò ?

¹⁹ Toutotan nou ké ka viv adan mond-lasa, nou ké ni a goumé pou nou tchenbé fò (1 Tim. 6:11, 12 ; 2 Pyè 3:17). Fò-nou byen désidé a rété doubout-pikan pou nou pa bigidi douvan pèwsékisyon é pou nou pa lésé pon zatrap ki anbafèy pri-nou. Fò pa nou mèt-nou ka pansé kon sé moun-la ki adan mond-lasa nonplis é fò pa nou lésé ponmoun kouyonné-nou, ni pon biten distrè-nou (Éféz. 4:14). An-nou rété doubout-pikan, an-nou kontinyé montré Jéova kè nou enmé-y é an-nou fè ansòt pou ayen pa anpéché-nou suiv komandman a-y. An menm balan-la, fò-nou montré-nou rézonab adan sèwten domenn, kivédi fò pa nou two karé. Adan awtik-la ki ka vin la, nou ké palé dè 2 ègzanp ki pawfè adan domenn-lasa, ègzanp a Jéova é ègzanp a Jézi.