AWTIK POU ÉTIDYÉ 29
KANTIK 121 Apprenons la maîtrise de soi
Rété véyatif pou tantasyon pa pran lanmen asi-w
« Rété véyatif é pa arété priyé pou tantasyon-la pa pran lanmen asi zòt » (MAT. 26:41).
ON TI LIDÉ ASI SA NOU KAY VWÈ
Nou ké vwè kè sa enpòwtan kè nou pa fè pon péché é nou ké vwè osi kè sa enpòwtan kè nou pa fè ayen ki té’é pé menné-nou asi chimen-lasa.
1-2. a) Jézi avèti disip a-y. Ka i di-yo ojis ? b) Poukwa sé disip-la lagé Jézi ? (gadé imaj-la osi).
« SÉ VRÉ, lèspri-la byen dispozé, men chè-la fèb a » (Mat. 26:41b). Lè Jézi di sé pawòl-lasa, sa montré kè i té sav byen kè konm nou enpawfè nou ka fè érè. Men Jézi avèti-nou osi lèwvwè i di sa. I té vlé di-nou kè fò pa nou two sèten dè nou. On ti moman avan Jézi té di sé pawòl-lasa, sé disip-la té di-y kè yo pa té’é jen lagé-y, é yo té sèten dè yo a moman-lasa (Mat. 26:35). Sa yo té anvi fè la té byen. Men, yo pa té ka imajiné jan on moun pé bigidi adan on batzyé lè yo ka mèt présyon anlè-y. Alò Jézi ba-yo on ti konsèy. Mi sa i di-yo : « Kontinyé véyé é pa arété priyé pou tantasyon-la pa pran lanmen asi zòt » (Mat. 26:41a).
2 Malérèzman, sé disip-la pa rété véyatif. Lèwvwè yo vin arété Jézi, ès sé disip-la rété èvè Jézi oben ès yo chapé kò a yo pas yo lésé lapè pran lanmen asi yo ? Konm yo pa té véyatif, sa yo té di kè yo pa té’é jen fè la, sé ègzaktèman sa yo fè : yo lagé Mèt a yo (Mat. 26:56).
Jézi mandé disip a-y rété véyatif é fè atansyon pou tantasyon-la pa pran lanmen asi yo, men yo ponyonn pa rété èvè-y (gadé sé paragraf 1 é 2 la).
3. a) Si nou vé rété fidèl a Jéova, poukwa fò pa nou two sèten dè nou ? b) Ka nou ké vwè adan awtik-lasa ?
3 Penga nou two sèten dè nou. Sé vré, nou byen désidé a pa fè pon biten ki pa’a fè Jéova plézi. Men, nou enpawfè osi, é on tantasyon pé fè-nou tribiché (Wom. 5:12 ; 7:21-23). Adan on batzyé, nou pé rivé a touvé-nou adan on sitiyasyon ki ka ban-nou anvi fè on mové biten. Pou nou rété fidèl a Jéova é a Gason a-y, fò-nou suiv konsèy a Jézi é fò nou fè ansòt pou nou kontinyé véyé. Awtik-lasa pé édé-nou fè sa. Pou koumansé, nou ké gadé adan ki domenn fò-nou vréman véyatif. Aprésa, nou ké vwè ka nou pé fè pou nou pa mèt-nou adan pon sitiyasyon ki té’é pé ban-nou anvi fè on biten ki pa bon. É pou fin, nou ké vwè ka pou nou fè pou nou rété véyatif.
ADAN KI DOMENN POU OU RÉTÉ VÉYATIF ?
4-5. Poukwa fò-nou rété véyatif pou nou pa fè pon péché menmsi a pa dé péché ki grav ?
4 Ni sèwten péché ki mwen grav ki dòt, men menm sé péché-lasa pé fébli lanmityé an nou èvè Jéova. Anplisdisa, sa pé fè-nou fè dòt péché ki pi grav.
5 Noutout pé touvé-nou douvan on tantasyon. É nou pi fèb adan sèwten domenn ki adan dòt. Pa ègzanp, nou pé touvé-nou ka goumé pou nou pa fè pon péché ki grav, pou nou pa mèt-nou ka fè dé biten ki pa pwòp oben pou nou pa lésé mantalité a mond-la détenn asi nou. Délè, sèwten frè é sè ka goumé pou yo pa fè on péché sèksyèl. Pétèt, ni dòt ki ka goumé rèd pas yo anvi fè dé biten ki pa pwòp, kon batdous oben gadé biten pòwno. Ni dòt ankò ki ka goumé rèd pou yo pa tranblé douvan moun, pou yo pa fè vyé kòlè, oben pou yo pa fè dòt biten ankò. Kon Jak èspliké, « chakmoun anba on éprèv lè i ka lésé pwòp anvi a-y menné-y é sédui-y » (Jak 1:14).
6. Ka fò-nou rèkonnèt ?
6 Ès ou sav adan ki domenn ou pi fasil a fè on mové biten ? Siwvwè nou ka konpranndèdi nou fò adan tout domenn a vi an nou oben siwvwè nou ka mèt an tèt an nou kè ayen pé pa fè-nou bigidi, sa danjéré toubònman (1 Jan 1:8). Pòl maké kè jous moun « ki byen doubout adan lavérité » pé lésé tantasyon pran lanmen asi yo siwvwè yo pa rété véyatif (Gal. 6:1). Fò-nou gadé laréyalité anfas é fò-nou admèt kè nou pi fèb adan sèwten domenn (2 Kor. 13:5).
7. Adan ki domenn pou nou véyatif plis ankò ? Bay on ègzanp.
7 Lèwvwè nou sav adan ki domenn nou pi fasil a fè on mové biten, ka pou nou fè apré ? Fò-nou fè éfò pou nou ni plis fòs pou rété doubout-pikan lèwvwè nou ké touvé-nou douvan on tantasyon adan domenn-lasa. An-nou pran on ègzanp. An tan a Labib, pa ki koté sé lènmi-la té pé pasé pou pran on vil pi fasilman ? Pa sé pòt-la. Sé pousa yo té ka véyé sé pòt-la plis ki sélézòt koté-la. Menmjan-la, lè nou ka rann-nou kont kè nou pi fèb adan sèwten domenn, sé adan sé domenn-lasa pou nou pi véyatif ankò (1 Kor. 9:27).
KA OU PÉ FÈ POU-W PA MÉTÉ-W ADAN PON SITIYASYON KI PÉ FÈ-W FÈ ON PÉCHÉ ?
8-9. Ka jennboug-la yo ka palé an Pwovèb chapit 7 la té pé fè pou i pa té fè on péché ki grav ? (Pwovèb 7:8, 9, 13, 14, 21).
8 Ka nou pé fè pou nou pa mété-nou adan pon sitiyasyon ki pé fè-nou fè on péché ? An-nou vwè déotwa biten nou pé aprann adan istwa a jennboug-la yo ka palé an Pwovèb chapit 7 la. I kouché èvè on madanm ki té ka menné on vyé vi. Vèwsé 22 la ka di-nou kè « adan on batzyé », jennboug-la mété-y ka suiv madanm-la. Men kon nou ka vwè-y adan sé vèwsé-la ki avan la, avan i mété-y ka suiv madanm-la, i fè plizyè biten é piti-a-piti, sé biten-lasa fè-y fè on péché.
9 Ka ki fè-y fè péché-lasa ? Dabò pou yonn, lèwvwè « i pasé an lari-la ki toupré katchimen-la la madanm-la ka rété la », sé té lèswa. Aprésa, i maché an dirèksyon a kaz a madanm-la (li Pwovèb 7:8, 9). Ondòt biten i fè ankò sé kè lè i vwè madanm-la, i pa pran ondòt chimen. Olyé i té fè sa, i lésé madanm-la bo-y é i lésé-y rakonté-y kè i té ofè sakrifis a konminyon. Pétèt i rakonté jennboug-la sa, pou fè-y kwè kè i pa té on mové moun (li Pwovèb 7:13, 14, 21). Si jennboug-la té aji èvè sajès dépi odépa é kè i pa té lésé sitiyasyon-la rivé jous la, i pa té’é touvé-y douvan madanm-la é i pa té’é fè péché-la i fè la.
10. Kijan on moun ki ka sèvi Bondyé té’é pé fè menm érè ki jennboug-la yo ka palé adan liv a Pwovèb la ?
10 Istwa-lasa ka rakonté sa ki pé rivé nenpòt ki sèwvitè a Bondyé. On moun pé fè on péché ki grav é i pé ni lenprésyon kè sa rivé-y « adan on batzyé ». Pétèt i pé di : « Sa enn rivé asi mwen. » É poutan, si moun-lasa ka réfléchi asi sa ki pasé an réyalité, sèten i ké rann-li kont kè avan i fè péché-la i fè la, i té ja fè sèwten biten men i pa té aji èvè sajès. Pa ègzanp, pétèt i chwazi mové frékantasyon oben i anmizé-y èvè dé biten ki pa té pwòp, oben pétèt osi i té k’ay dé koté on krétyen pa dwètèt alé, oben asi sèwten sit entèwnèt ki pa bon pou on krétyen. Anplisdisa, pétèt i té arété priyé é i pa té ka li Labib ankò. Oben pétèt i pa té k’ay réinyon é i pa té k’ay préché nonplis. Kon nou vwè adan ègzanp a jennboug-la yo ka palé adan liv a Pwovèb, sé apré i pran on mové désizyon kè i fè on péché ki grav. Sa pa enn fèt konsa.
11. Ka pou nou fè pou nou pa fè on péché ?
11 Ka sa ka aprann-nou ? Non sèlman fò-nou fè atansyon pou nou pa fè on péché men anplisdisa, fò nou fè atansyon pou nou pa touvé-nou adan pon sitiyasyon ki té’é pé menné-nou a fè on péché. Sé ègzaktèman sa Salomon èspliké tousuit apré i palé dè sa ki rivé jennboug-la èvè madanm a vyé vi la. Mi sa i di anrapò èvè madanm-lasa : « Pa ay asi chimen a-y » (Pwov. 7:25). É i jous di : « Rété lwen a madanm-lasa, pa ay douvan pòt a kaz a-y » (Pwov. 5:3, 8). Pou nou pa fè on péché, fò-nou rété lwen a tousa ki té’é pé menné-nou asi chimen-lasa b. Pa ègzanp, ni sèwten biten Labib pa’a kondanné, men konm nou ja konnèt-nou, nou ké fè ansòt pou nou pa touvé-nou adan pon sitiyasyon oben pou nou pa fè pon biten ki té’é pé ban nou mové lanvi (Mat. 5:29, 30).
12. Ki biten Jòb désidé fè, é kijan sa édé-y a rété véyatif pou pon tantasyon pa té pran lanmen asi-y ? (Jòb 31:1)
12 Pou nou pa touvé-nou douvan on sitiyasyon ki té’é pé fè-nou fè on péché, fò nou ké fè sèwten biten pou nou rété véyatif. Sé sa Jòb ni lokazyon fè. I « pasé on kontra èvè zyé [a-y] », kivédi i té byen désidé a pa jen gadé ondòt madanm kon i pa dwètèt (li Jòb 31:1). Sa Jòb té désidé fè, sé ègzaktèman sa i té ka fè. Kifè sa té ka édé-y pou i pa fè on adiltè. Nou osi, fò nou fè sèwten biten pou nou rété véyatif é pou nou pa lésé tantasyon-la pran lanmen asi nou.
13. Poukwa fò-nou fè atansyon a sa nou ka pansé ? (gadé imaj-la osi).
13 Fò-nou fè atansyon a sa nou ka pansé osi (Ègz. 20:17). Sèwten moun ka pansé kè yo pé imajiné-yo ka fè on mové biten. É pou yo, pa ni pon pwoblèm adan sa, dépi yo pa’a fè ayen. Men rézònman-lasa pa bon. Lè on moun anvi fè on mové biten, pli i ka rété ka sonjé mové biten-lasa, pli i ké anvi fè-y, é pli i ké ni dimal a tchenn kò a-y pou i pa fè sa. Sé vré, délè dé mové lidé ka vin an tèt an noutout. Lè sa ka rivé, sa ki pi enpòwtan sé kè nou woté sé vyé lidé-lasa an tèt an nou tousuit é kè nou mèt-nou ka réfléchi asi dé bon biten. A moman-lasa, nou ka fè kon moun ki ka raché vyé zèb adan jaden a-y pou yo pa kontinyé grandi. Nou ké raché vyé lidé ki ka vin an lèspri an nou pou yo pa kontinyé grandi é pou yo pa fè-nou fè on péché ki grav (Filip. 4:8 ; Kol. 3:2 ; Jak 1:13-15).
Fò pa nou mèt-nou adan pon sitiyasyon ki té’é pé fè-nou lésé tantasyon-la pran lanmen asi nou (gadé paragraf 13 la).
14. Kidòt biten nou pé fè pou tantasyon-la pa pran lanmen asi nou ?
14 Kidòt biten nou pé fè pou tantasyon-la pa pran lanmen asi nou ? Fò nou sèten a san pou san kè lèwvwè nou ka fè sa Jéova ka mandé, sé toujou bon biten sa ké menné pou nou. Délè nou pé ni dimal a pansé kon Jéova, é pou nou anvi fè dé biten Jéova vé kè nou fè, sé pé on bab. Men si nou ka fè éfò pou nou fè sa, nou ké ni tchè-kontan vréman.
15. Lèwvwè nou toujou anvi fè sa ki byen, kijan sa pé édé-nou pou pon tantasyon pa pran lanmen asi nou ?
15 Fò nou fè on travay asi nou pou nou anvi fè enki bon biten. Si nou ka aprann « hay sa ki mal é enmé sa ki byen » nou ké pi anvi fè sa ki byen ankò, é nou ké rété lwen a sitiyasyon ki pé fè-nou fè on péché osi (Amòs 5:15). Anplisdisa, lè nou ka fè ansòt pou tousa nou anvi fè sé dé bon biten, sa ka édé-nou rété solid lè nou douvan tantasyon. Lèwvwè nou toujou anvi fè sa ki byen, sa ka édé-nou pa lésé sé tantasyon-la pran lanmen asi nou, menm lèwvwè yo ka vin jwenn-nou alòskè nou pa té ka atann-nou a sa, oben lèwvwè pa té ni mwayen nou anpéché on sitiyasyon rivé.
16. Ka nou pé fè pou nou toujou anvi fè sa ki byen ? (gadé imaj-la osi).
16 Ka nou pé fè pou nou toujou anvi fè sa ki byen ? Ében fò nou pòté bon mannèv adan sèwvis an nou pou Jéova. Pa ègzanp, lèwvwè nou k’ay réinyon oben lèwvwè nou k’ay préché, nou pa’a touvé-nou douvan pon tantasyon. Okontrè, sé la nou ka pran fòs pou nou kontinyé fè Jéova plézi plis ankò (Mat. 28:19, 20 ; Ébr. 10:24, 25). Anplisdisa, fò-nou li, fò nou étidyé é fò nou médité asi Pawòl a Bondyé, konsa, nou ké vin enmé sa ki byen plis ankò é nou ké vin hay sa ki mal plis ankò osi (Joz. 1:8 ; Sòm 1:2, 3 ; 119:97, 101). É on dènyé biten nou pé fè, sé sonjé sa Jézi di disip a-y : « Pa arété priyé pou tantasyon-la pa pran lanmen asi zòt » (Mat. 26:41). Lèwvwè nou ka pran tan priyé Pap’an nou ki an syèl-la, nou ka ba-y lokazyon édé-nou, é sa ka ban-nou fòs pou nou pi désidé ankò a fè-y plézi (Jak 4:8).
Si nou ni labitid fè dé biten pou nou rété bon bon zanmi èvè Jéova, sa ké édé-nou a pa lésé tantasyon-la pran lanmen asi nou c (gadé paragraf 16 la).
RÉTÉ VÉYATIF
17. A plizyè rèpriz, Pyè montré kè i té fèb adan on domenn. Ki domenn ésa ?
17 Pétèt nou pé rivé about a sèwten défo nou ni. Men pétèt osi, nou ké rann-nou kont kè sèwten adan yo pa’a pati menm. An-nou pran ègzanp a lapòt Pyè pou nou konprann lidé-lasa byen. Konm i té pè moun, i rènyé Jézi 3 fwa menm lannuit-la (Mat. 26:69-75). Men jou-la i palé èvè onlo kouraj pou di lavérité asi Jézi douvan Sannédren-la, i té ka sanmsa i pa té pè moun ankò (Akt 5:27-29). Men, kèlkè lanné apré, konm i « té pè sé krétyen-la ki té siwkonsi la » i arété manjé èvè sé krétyen-la ki pa té juif la pannan on moman (Gal. 2:11, 12). Mi lafrous té ka pran lanmen asi Pyè ankò. Pétèt kè anfinaldikont défo-lasa té la toujou.
18. Menmsi nou ka pansé kè nou rivé about a on vyé labitid, ka pou nou fè ?
18 Sa pé rivé kè nou ni a goumé èvè on vyé labitid kon Pyè, alòskè nou té ka pansé nou té ja rivé about a-y. Kijansa ? Mi sa on frè ka rakonté : « Pannan 10 an, an arété gadé biten pòwno, é pou mwen, an té sèten an té rivé about a pwoblèm an mwen. Men ou té’é di vyé labitid-lasa té kon bèt sovaj ki té kaché é ki té ka véyé-mwen pou soté anlè mwen. » Men érèzman frè an nou pa lagé. I byen konprann kè toutotan i ké adan mond méchan lasa, fò i ké goumé èvè vyé labitid-lasa touléjou. I fè pi atansyon pou i pa pri adan zafè a pòwnografi é madanm a-y é ansyen a lasanblé a-y soutyenn-li onlo.
19. Ka nou pé fè siwvwè nou pò’ò rivé about a sèwten défo nou ni ?
19 Siwvwè nou ni on défo é kè nou pò’ò rivé about a-y, ka nou pé fè pou sa pa pousé-nou a fè on mové biten ? Fò-nou suiv konsèy-la Jézi ban-nou la : « Rété véyatif ». Sa vé di kè fò-nou fè atansyon an nou pou nou pa lésé pon tantasyon pran lanmen asi nou. Menm lèwvwè nou ka santi kè nou fò, an-nou kontinyé fè atansyon pou nou pa pran pon chimen ki ké menné-nou douvan on tantasyon (1 Kor. 10:12). Kontinyé fè sé biten-la ki ka édé-w goumé èvè défo a-w. Pwovèb 28:14 ka di : « Tchè-kontan pou moun ki toujou véyatif » (2 Pyè 3:14).
SI OU KA RÉTÉ VÉYATIF, SA KÉ PWOKIRÉ-W ONLO BYENFÉ
20-21. a) Si nou ka rété véyatif pou tantasyon-la pa pran lanmen asi nou, ki bon biten sa ké menné ban-nou ? b) Si nou ka fè éfò pou nou pa lésé tantasyon-la pran lanmen asi nou, ka Jéova ké fè pou nou ? (2 Korentyen 4:7).
20 Nou pé sèten kè lèwvwè nou ka fè éfò pou nou rété véyatif, a pa pou ayen nou ka fè sa. Lèwvwè on moun ka fè on péché, i ka « pran plézi pannan on ti tan », men lèwvwè i ka obéyi Jéova, i ka lontan pibyen (Ébr. 11:25 ; Sòm 19:8). Poukwa nou ka di sa ? Paskè Jéova kréyé-nou on jan pou nou viv annakò èvè prensip a-y (Jén. 1:27). Lèwvwè nou ka viv on mannyè ki ka fè Jéova plézi, sa ka pèwmèt-nou ni on konsyans ki nèt é sa ka ban-nou lèspwa kè on jou nou ké pé viv pou touttan (1 Tim. 6:12 ; 2 Tim. 1:3 ; Jid 20, 21).
21 Sé vré, « chè-la fèb ». Men sa vé pa di kè nou pé pa fè ayen kont sa. Jéova toujou paré pou i édé-nou (li 2 Korentyen 4:7). Fò pa nou oubliyé kè puisans-la Jéova ka ban-nou la ka dépasé sa ki nòwmal. Men prèmyé biten pou nou fè sé fè tousa nou pé pou goumé èvè sé tantasyon-la nou ka jwenn la. Nou pé sèten kè si nou ka fè éfò pou nou pa lésé tantasyon-la pran lanmen asi nou, Jéova ké réponn priyè an nou : i ké ban-nou plis fòs lèwvwè nou ké bizwen (1 Kor. 10:13). Wi, asirésèten, grasa Jéova, nou pé rété véyatif pou tantasyon-la pa pran lanmen asi nou.
KANTIK 47 Prie Jéhovah chaque jour
a POU NOU BYEN KONPRANN : Lè yo ka palé dè « lèspri-la » adan Matyé 26:41, sé pou palé dè on fòs kè nou ni andidan an nou ki ka fè-nou rèsanti sé biten-la nou ka rèsanti la é ki ka fè-nou aji kon nou ka aji la. Lè yo ka palé dè « chè-la » aprézan, sé pou palé difètkè nou sé dé moun ki enpawfè é ki ka fè péché. Sa vé di kè menmsi nou byen anvi fè sa ki byen, si nou pa’a véyé-nou, nou pé lésé tantasyon-la pran lanmen asi nou é nou pé rivé a fè on mové biten.
b On moun ki fè on péché ki grav pé touvé dé bon ti konsèy adan liv-la Ou pé ni tchè-kontan pou touttan ! I pé gadé sé pwen 1 a 3 la ki adan lèson 57 la. I pé gadé osi awtik-la « Sé douvan pou ou gadé » adan niméwo a novanm 2020 a Tou dè Gad la paj 27-29, § 12-17.
c SA NOU KA VWÈ ASI IMAJ-LA : On frè ka fè tèks di jou a-y lèmaten, i ka li bib a-y lèmidi, é lèswa, i ka pran réinyon a simenn-la.
