1. Prèmyé fwa ou palé zanmi a-w é fanmi a-w dè lavérité, ka ki pasé, é poukwa sa siwprann-vou ?

ÈS OU ka sonjé jou-la ou dékouvè la kè sa Labib ka di sé lavérité ? Tèlman sa té klè an lèspri a-w, sa té ka koulé kon dlo asi wòch. Ou té anvi kè toutmoun konnèt sa, pas ou té sav kè vi a yo té’é vin pi bèl, é kè yo té’é ni on bèl èspwa pou dèmen (Sòm 119:105). Kifè, ou té kontan palé dè lavérité èvè fanmi a-w é zanmi a-w. Men lèwgadé, lamajorité adan yo pa kouté-w. Sa dwèt siwprann-vou !

2-3. An tan a Jézi, ka lamajorité a sé moun-la té ka pansé dè-y é dè sa i té ka anségné ?

² Lèwvwè sé moun-la pa’a kouté mésaj-la nou ka préché la, fò pa sa siwprann-nou. Jézi ki Jézi té ka fè mirak douvan sé moun-la, é poutan, apapousa yo té ka kouté-y. É sé mirak-lasa té ka montré byen kè Jéova té ka soutyenn-li. Pa ègzanp, Jézi résisité Laza, é sé chèf a rèlijyon juif la vwè sa an dé zyé a yo, men, yo pa té dakò pou di kè Jézi sé té Mési-la. Yo té jou paré a tchouyé ki Jézi ki Laza ! (Jan 11:47, 48, 53 ; 12:9-11).

³ Jézi té sav kè lamajorité a moun pa té’é kwè kè i sé Mési-la (Jan 5:39-44). Mi sa i di déotwa disip a Jan Lèbatis : « Tchè-kontan pou moun ki pa ka lésé ayen fè-yo ni dout asi mwen » (Mat. 11:2, 3, 6). Poukwa tout sé moun-lasa pa té vlé kouté Jézi ?

4. Ka nou ké vwè adan awtik-lasa ?

⁴ Adan awtik-lasa é adan tala ki ka vin la, nou ké vwè poukwa o 1^é syèk, onlo moun pa té ni fwa an Jézi. Nou ké vwè osi poukwa onlo moun pa’a kouté-nou lè nou ka  préché ba yo. É nou ké vwè osi poukwa sa enpòwtan kè nou ni on fwa ki solid pou nou pa jen arété suiv Jézi.

5. Ni onlo moun ki pa té ka kwè kè Jézi sé té Mési-la. Poukwa sa ?

⁵ Onlo moun pa suiv Jézi akòz dè koté-la i té sòti la. Sé vré, yo té dakò pou di kè Jézi sé té on moun ki ka anségné byen menm, é kè i té ka fè mirak. Men lè yo té ka vwè Jézi, sa i té ka vin an lèspri a yo, sé kè sé té gason a on chawpantyé ki pa té ni granzafè. Anplisdisa, i té sòti Nazarèt, é pa té ni ayen ki té èstraòwdinè an vil-lasa. Jous Natanaèl té ka pansé sa. Mi sa i di avan i vin disip a Jézi : « Zò ka di ni on bon biten ki pé sòti Nazarèt ? » (Jan 1:46). Pétèt Natanaèl pa gè té enmé vil-lasa. Pétèt i té ka sonjé sa Miché 5:2 té ka di. Pwofési-la té ka di kè Mési-la té’é fèt Bétléèm, men i pa té ka palé dè Nazarèt.

6. An tan a Jézi, ka ki té’é pé édé sé moun-la vwè kè sé Jézi ki té Mési-la ?

⁶ Ka Lézékriti té ka di ? Pwofèt Izayi té ja anonsé kè lènmi a Jézi pa té’é chèché a sav ola Mési-la sòti é ka ki fanmi a-y (Iz. 53:8). Poutan Bondyé té ja anonsé tout sé biten-lasa. Si sé moun-la té ranségné-yo, yo té’é sav kè Jézi fèt Bétléèm é kè wa David té fanmi èvè-y (Lik 2:4-7). Donk, si Jézi fèt Bétléèm, sé kè i fèt koté-la Miché 5:2 té ka palé la. Alò, ola pwoblèm-la té ka sòti ? Sé dè sé moun-la sa té ka vin ! Yo té two enmé jijé. É poutan yo pa té ni tout sé enfòwmasyon-la ! Kifè, yo pa suiv Jézi.

7. Poukwa onlo moun vé pa vwè Témwen a Jéova ?

⁷ Ès ni menm pwoblèm-la jòdijou ? Wi. Lamajorité a moun ki adan pèp a Bondyé, a pa moun a lajan, men sé dé moun ki senp. Kifè, pou onlo moun, a pa dé moun ki enstwi, yo sé dé ti kakazwa (Akt 4:13). Ni moun ki ka di kè Témwen a Jéova pa ni dwa anségné Labib, pas yo pa fè gran lékòl adan domenn-lasa. Ni dòt moun ki ka di kè Témwen a Jéova sé on rèlijyon ki sòti an Amérik, alòskè lamajorité a sé Témwen a Jéova la pa’a viv la. Ni dòt moun osi ki ka di kè Témwen a Jéova pa’a kwè an Jézi. É pi tan-la té ka pasé, é pi yo té ka di biten asi yo. Pa ègzanp, yo té ka di kè Témwen a Jéova kominis, oben kè yo ka travay anba fèy ba gouvènman a Lamérik, oben kè pou rèlijyon a yo, yo paré a fè nenpòt ki biten. Alò, onlo moun vé pa vin Témwen a Jéova pas yo ka tann sé istwa-lasa é yo pa konnèt lavérité asi pèp a Bondyé.

8. Dapré Akt 17:11, ka fò sé moun-la fè si yo vlé rèkonnèt kimoun ki ka sèvi Bondyé jòdijou ?

⁸ Ka ki pé édé-nou pou nou pa pèd fwa an nou ? Fò on moun chèché a sav si sa yo ka di-y sé lavérité. Sé sa Lik, on nonm ki maké déotwa liv a Labib, té byen désidé a fè. I fè tousa i té pé pou sav « sa ki pasé vréman dépi o koumansman ». I té vlé kè sé moun-la ki té ka li liv a-y la té sèten kè sa yo té ka aprann si Jézi té « byen lavérité » (Lik 1:1-4). Sé Juif-la ki té ka rété koté-la yo té ka kriyé Béré la fè menm biten ki Lik. Lè yo tann palé dè bon nouvèl-la asi Jézi pou prèmyé fwa, yo ay gadé si sa yo té ka di-yo la, sé sa ki té maké adan Lézékriti ébrayik (li Akt 17:11). Jòdijou, fò sé moun-la fè menm biten-la osi. Fò yo ay gadé si sa yo ka anségné-yo adan pèp a Bondyé, sé sa Labib ka di. Fò yo pran tan étidyé sa pèp a Bondyé fè a épòk an nou, é si yo pran tan vérifyé tout sé biten-lasa, yo pé ké lésé  sa moun ka di oben sa moun ka pansé bouché zyé an yo. Konsa, ayen pé ké anpéché-yo suiv Jézi.

9. Ka ki pasé lè Jézi rèfizé ba-yo on sign ki sòti an syèl-la ?

⁹ Jézi té ka anségné byen menm. É an tan a-y, ni sèwten moun ki pa té pé kontanté-yo dè sa. Yo té vé plis ki sa. Yo mandé-y fè-yo vwè « on sign ki sòti an syèl-la », ki ka montré kè i sé Mési-la (Mat. 16:1). Si yo mandé Jézi fè sa, sé pétèt pas yo té mal konprann sa Danyèl 7:13, 14 té ka di. Men lè-la po’o té rivé pou Jéova réyalizé pwofési-lasa. An réyalité, yo pa té bizwen plis ki sa Jézi té ka anségné-yo la pou yo té sèten kè Jézi sé té Mési-la. Men lè Jézi rèfizé ba-yo sign-la yo té mandé la, yo arété suiv-li (Mat. 16:4).

10. Kijan Jézi réyalizé sa Izayi té maké asi Mési-la ?

¹⁰ Ka Lézékriti té ka di ? Pwofèt Izayi ni lokazyon palé dè Mési-la. Mi sa i di : « I pé’é hélé é i pé’é lévé vwa a-y nonplis. I pé’é fè-yo tann vwa a-y an lari-la » (Iz. 42:1, 2). Jézi té ka préché ti préché a-y trankilman, men i pa jen chèché a fè moun pòté-y anlè. I pa té ka konstwi gwo tanp, i pa té ka fè kon chèf a sèwten rèlijyon, ki té ka pòté lenj èspésyal asi yo, é i pa té vlé ponmoun ba-y pon grad. Lè Jézi pasé douvan wa Éwòd pou i té pé sa jijé-y, i rèfizé fè on mirak pou fè Éwòd plézi, menmsi i té sav kè vi a-y té an danjé (Lik 23:8-11). Sé vré, Jézi fè mirak, men sa ki té pi enpòwtan pou-y, sé té préché bon nouvèl-la. Limenm di disip a-y : « Sé pousa an vin » (Mawk 1:38).

11. Ki lidé ki pa vré onlo moun ni an tèt a yo jòdila ?

¹¹ Ès ni menm pwoblèm-la jòdijou ? Nou pé di wi. Poukwa ? Pas jòdla, sa lamajorité a moun enmé, sé sé gwo légliz-la ki byen dékoré la, sé sé gwo tit-la sé chèf a rèlijyon la ka pòté la pou fè moun pòté-yo anlè, é sé sé fèt-la yo ka fè la, san menm yo sonjé kè sé prèmyé krétyen-la  pa té ka fè sé fèt-lasa. Men sé moun-la ki k’ay pran réinyon a yo sé koté-lasa pa ka aprann granzafè asi Bondyé é asi pwojé a-y. Pawkont, sé moun-la ki ka vin an réinyon an nou ka aprann sa Jéova ka atann dè nou é kijan pou nou fè volonté a-y. Sal di Wayòm an nou pwòp é tousenp. Pa ni pon biten adan-y pou fè moun vwè. Menm sé frè-la ki ka dirijé réinyon an nou pa’a pòté pon lenj èspésyal asi yo, é yo pa ni pon tit pou fè moun pòté-yo anlè. Sa nou ka anségné adan réinyon an nou é sa nou ka kwè bazé asi Pawòl a Bondyé. Magrésa, jòdijou, onlo moun pa’a kouté mésaj an nou, pas yo ka touvé kè mannyè nou ka adoré Bondyé two senp pou yo é kè sa nou ka anségné a pa sa yo anvi tann.

12. Dapré sa Ébré 11:1, 6 ka di, fò fwa an nou bazé asi on biten. Ki biten ésa ?

¹² Ka ki pé édé-nou pou nou pa pèd fwa an nou ? Mi sa lapòt Pòl di sé krétyen women la : « On moun ka ni lafwa grasa sa i ka tann. É si i ka tann, sé pas ni on moun ka palé dè Kris » (Wom. 10:17). Sé vré, ni dé fèt ki bèl toubònman. Men a pa lè nou ka fété fèt ki pa annakò èvè Pawòl a Bondyé kè nou ka fè fwa an nou grandi, men sé lè nou ka étidyé sa Pawòl a Bondyé ka di kè nou ka rivé fè sa. Fò nou ni on fwa ki solid. Pousa, fò nou ni on konésans ki ègzak. Poukwa nou ka di sa ? Pas, « san lafwa, pa ni mwayen fè Bondyé plézi » (li Ébré 11:1, 6). Sé pousa nou pa bizwen kè Bondyé ban-nou pon sign èstraòwdinè pou montré-nou kè nou touvé lavérité. Lè nou ka pran tan étidyé Labib pou fè fwa an nou vin pli fò, sa ka édé-nou vwè kè nou touvé lavérité, é sa ka édé-nou woté tout dout nou té’é pé ni an tèt an nou.

13. Pou ki rézon onlo moun rèfizé suiv Jézi ?

¹³ An tan a Jézi, disip a-y pa té ka rété san manjé. Lè disip a Jan Lèbatis rann-yo kont dè sa, sa siwprann-yo. Jézi èspliké kè pa té ni pon rézon kè disip a-y rété  san manjé pas i té vivan toujou (Mat. 9:14-17). Menmsi i di-yo sa, sé Farizyen-la é dòt moun ki té kont Jézi kondanné-y, pas i pa té ka suiv mès é labitid a yo. Yo fè gwo kòlè lèwvwè Jézi mété-y ka géri moun ki té malad, jou a lèsaba (Mawk 3:1-6 ; Jan 9:16). Yo té kontan di kè yo té ka rèspèkté saba-la, men anmenmtan, sa pa té ka jenné-yo dè fè konmès a lajan adan tanp-la. A pa ti kòlè yo té kòlè lè Jézi kondanné-yo pou sa ! (Mat. 21:12, 13, 15). Jézi té ka préché adan sinagòg-la a Nazarèt, é sé moun-la Jézi té ka préché ba yo la fè bon kòlè lèwvwè Jézi pran déotwa ègzanp adan istwa a nasyon a Izrayèl, pou montré-yo kè yo té égoyis, é kè yo pa té ni fwa (Lik 4:16, 25-30). Onlo moun rèfizé suiv Jézi pas sa yo té ka konpranndèdi kè i té’é fè, a pa sa i fè (Mat. 11:16-19).

14. Poukwa Jézi kondanné tradisyon a lézòm ki pa té annakò èvè Lézékriti ?

¹⁴ Ka Lézékriti té ka di ? Jéova sèvi èvè Izayi pou réponn. Mi sa i di : « Pèp-lasa ka vin owa an mwen èvè pawòl an bouch, é yo ka ban’an glwa èvè lèv a yo, men tchè a yo lwen an mwen ; é yo ka krenn-mwen sèlon komandman lézòm anségné-yo » (Iz. 29:13). Lézòm mèt tradisyon ki pa annakò èvè Lézékriti anplas. Jézi kondanné sa, é i té ni rézon fè sa. Sé moun-la ki ka di kè lwa é tradisyon a lézòm pi enpòwtan ki ta Labib ka montré kè yo pa aksèpté ni Jéova, ni sila i voyé la, kivédi Mési-la.

15. Poukwa jòdijou onlo moun pa enmé Témwen a Jéova ?

¹⁵ Ès ni menm pwoblèm-la jòdijou ? Wi. Onlo moun ka fè kòlè, pas Témwen a Jéova pa ka fété tradisyon ki pa annakò èvè Labib épi yo. Pa ègzanp, yo pa’a fété anivèwsè, é yo pa’a fété Nwèl nonplis. Ni dòt ankò ki ka fè kòlè pas Témwen a Jéova pa ka fété fèt nasyonal, oben pa ka suiv mès é labitid lèwvwè ni on mò, pas sa pa annakò èvè Pawòl a Bondyé. Moun ki pa enmé Témwen a Jéova akòz dè sé biten-lasa ka kwè, pétèt, kè Bondyé dakò èvè jan-la yo ka adoré-y la. Men yo pé pa fè Bondyé plézi si yo pi enmé tradisyon ki sa Labib ka anségné on mannyè ki klè (Mawk 7:7-9).

16. Ka pou nou fè é ka pou nou pa fè, dapré sa nou ka li an Sòm 119:97, 113, 163-165 ?

¹⁶ Ka ki pé édé-nou pou nou pa pèd fwa an nou ? Fò-nou fè tousa nou pé pou nou kontinyé enmé lwa é prensip a Jéova (li Sòm 119:97, 113, 163-165). Si nou enmé Jéova, nou ké rèfizé suiv tout tradisyon ki pa’a fè-y plézi, é nou pé’é lésé ayen anpéché-nou montré Jéova kè nou enmé-y fò.

17. A épòk a Jézi, ka onlo Juif té ka atann dè Mési-la ?

¹⁷ A épòk a Jézi, sèwten moun té présé vwè gouvènman-la chanjé. Yo té ka èspéré kè Mési-la té’é libéré-yo anba jouk a sé Women-la ki té ka fè-yo vwè bon mizè. Men lèwvwè yo éséyé fè Jézi vin wa, i pa aksèpté (Jan 6:14, 15). Sé prèt-la, é dòt moun ankò, té pè kè Jézi éséyé chalviré gouvènman-la. Yo té sav kè sé Women-la té’é fè kòlè akòz dè sa, é kè yo té’é woté pouvwa-la yo té ba sé prèt-la. Sitiyasyon politik lasa té ka enkyété-yo tèlman kè onlo Juif rèfizé suiv Jézi.

18. Ni moun ki pa tchenn kont dè sèwten pwofési anrapò èvè Mési-la. Ki pwofési ésa ?

¹⁸ Ka Lézékriti té ka di ? Ni onlo pwofési ki té ka anonsé kè Mési-la té’é fin pa  gangné konba-la. Men ni dòt pwofési ki té ka montré osi kè fò i té mò pou péché an nou (Iz. 53:9, 12). Alò poukwa yo té ka èspéré dé biten ki pa té’é fèt ? Té ni onlo pwofési ki pa jen pwomèt kè Mési-la té’é réglé pwoblèm a yo tousuit, men a épòk a Jézi, onlo moun pa tchenn kont dè sa (Jan 6:26, 27).

19. Jòdijou, poukwa onlo moun pa dakò èvè nou ?

¹⁹ Ès ni menm pwoblèm-la jòdijou ? Wi. Ni onlo moun jòdijou ki pa dakò èvè nou, pas nou pa’a mélanjé-nou an politik. Pou yo, fò-nou voté lèwvwè ni élèksyon. Men, nou ka rann-nou kont kè pou Jéova, si nou chwazi on nonm pou dirijé-nou, sa vé di kè nou vé pa kè i dirijé-nou (1 Sam. 8:4-7). Pou sé moun-la, fò-nou té’é konstwi lékòl, lopital, é fò-nou té’é fè déotwa biten pou édé péyi-la. Yo pa dakò èvè nou pas nou ka fè tousa nou pé pou préché, olyé nou chèché a rézoud pwoblèm limanité ka jwenn alèla.

20. Dapré sa Jézi di an Matyé 7:21-23, ka ki dwètèt pi enpòwtan pou nou ?

²⁰ Ka ki pé édé-nou pou nou pa pèd fwa an nou ? (li Matyé 7:21-23). Fò-nou mèt travay-la Jézi ban-nou fè la prèmyé douvan an vi an nou (Mat. 28:19, 20). Penga nou lésé pwoblèm a mond-lasa distrè-nou. Sé vré, nou enmé sé moun-la an téritwa-la, é lèwvwè yo ka jwenn pwoblèm, sa ka touché-nou. Men nou sav kè méyè biten nou pé fè pou yo, sé édé-yo konnèt bon nouvèl a Wayòm-la, é édé-yo vin bon bon zanmi èvè Jéova.

21. Ka fò-nou byen désidé a fè ?

²¹ Adan awtik-lasa, nou vwè kat rézon ki fè si moun a épòk a Jézi rèfizé suiv-li. Nou vwè osi kè jòdijou, pou sé menm rézon-lasa, onlo moun pa dakò èvè nou. Adan awtik-la ki ka vin la, nou ké vwè 4 rézon ankò ki té’é pé anpéché-nou suiv Jézi. Fò-nou byen désidé a pa jen arété suiv Jézi, é fò-nou fè tousa nou pé pou fwa an nou rété fò !