ONLO moun sav kè an tan lontan, an Éjipt, pli souvan ki rarman, yo té ka sèvi èvè on papyé ki fèt an papiris * pou ékri. Sé Grèk-la é sé Women-la osi té ka sèvi èvè papiris pou ékri. Men pawkont, pa ni onlo moun ki sav kè yo té ka sèvi èvè plant-lasa osi pou konstwi bato.

Ja ni plis ki 2500 zan, pwofèt Izayi maké kè moun ki té ka rété koté ‘flèv a Létyopi’, voyé déotwa rèprézantan, é fò-yo té travèsé lanmè-la òbò ‘bato ki fèt an papiris’. Kèlkètan apré, pwofèt Jérémi anonsé kè sé Mèd-la é sé Pèws-la té ké pran vil a Babilòn é yo té’é mèt difé adan bato a sé Babilonyen-la, ki fèt an papiris, pou anpéché-yo chapé kò a yo (Iz. 18:1, 2 ; Jér. 51:32).

Konm Labib ka vin dè Bondyé, sa pé ké étoné on moun ki ka étidyé Labib kè sa sé awkéològ-la dékouvè ka bay laprèv kè, an tan a Labib, yo té ka sèvi èvè papiris pou konstwi bato (2 Tim. 3:16). Men ka yo dékouvè konsa ? Yo dékouvè onlo détay entérésan, ki té ka bay laprèv kè an Éjipt, yo té ka konstwi bato an papiris.

Adan tonm a sé Éjipsyen-la, yo penn é yo désiné sèwten biten, ki té ka montré kijan yo té ka rékòlté papiris-la, é kijan yo té ka sèvi èvè-y pou fè bato. Sé misyé-la té ka koupé tij a sé papiris-la, é yo té ka fè plizyè paké èvè sé tij-la, é apré yo té ka maré sé paké-la ansanm. Tij a sé papiris-la ka sanm on triyang, é lèwvwè yo maré-yo byen séré ansanm, sa ka bay on paké ki byen épé é ki solid. Dapré on liv ki ka palé dè listwa a Léjipt *, sé bato-la ki fèt an papiris la té pé miziré plis ki 17 mèt, kifè sa té ka pèwmèt-yo mèt 10 a 12 ram chak koté a bato-la.

An Éjipt, té ni onlo papiris owa Nil-la. Anplis, pou fè bato an papiris, sa pa té difisil, é menm lèwvwè bato an bwa vin lanmòd, sé péchè-la é sé chasè-la kontinyé sèvi èvè ti bato a yo an papiris.

Yo kontinyé sèvi èvè sé bato-lasa pannan plizyè lanné ankò. Plutarch, sé on moun ki maké liv é ki viv an Grès. I viv an tan a sé apòt-la, é i di kè an tan-lasa, yo té ka sèvi èvè bato an papiris toujou.