1-2. Ki difikilté onlo Témwen ka jwenn ?

LAPÒT Pòl ankourajé Timoté kontinyé préché afon, é sé pawòl-lasa sé pou nou osi (2 Tim. 4:5). Noutout vé ba Bondyé sa nou ni dè méyè men sa pa toujou fasil. Onlo adan frè é sè an nou bizwen onpakèt kouraj pou yo pé sa préché (2 Tim. 4:2). Pa ègzanp, ni onlo adan frè é sè an nou ki ka viv on koté yo pé pa préché alèz a yo oben yo ka viv on koté gouvènman-la ka entèwdi aktivité an nou. Ou ka imajiné : chakfwa yo, ka préché ba on moun yo pé mèt-yo lajòl !

² Sèwvitè a Jéova ka jwenn tout kalté difikilté é sa pé dékourajé-yo. Onlo frè é sè oblijé travay rèd pou ba fanmi a yo on dèkwa. Yo té’é byen vlé préché plis men lè fen a simenn-la rivé, yo pa ni fòs ankò. Ni dòt frè é sè ki pé pa fè granzafè pou Jéova ankò pas yo ni on maladi ki pa’a géri oben pas laj-la ka bat-yo. Jous ni sèwten adan yo ki pé pa sòti ankò, kifè yo oblijé rété akaz a yo. É ni dòt ki ka soufè pas yo ni lenprésyon kè yo pa ni pon valè pou Jéova. Mary *, sé on sè ki ka viv o Mwayen-Oriyan. Mi sa i ka rakonté : « Lè an dékourajé, an ka fè tèlman éfò mwen métrizé sa an ka rèsanti kè an ka las toubònman. Kifè, an ka santi-mwen koupab pas pa’a rété-mwen onlo tan ni asé fòs mwen ay préché. »

3. Ka nou ké vwè adan awtik-lasa ?

³ Kèlkèswa difikilté-la nou ka jwenn la, Jéova pé ban-nou fòs-la nou bizwen la pou nou pé sa andiré difikilté-lasa, é i pé édé-nou fè lè maksimòm pou nou pé sa sèvi-y. Nou ké vwè adan awtik-lasa kijan Jéova ka édé-nou. Men avan sa, an-nou ègzaminé kijan Jéova ba Pòl é Timoté  fòs pou yo té pé sa kontinyé préché afon magré yo té ka jwenn bon éprèv.

4. Ki difikilté Pòl jwenn ?

⁴ Pòl jwenn onlo difikilté. Ou ka rann-vou kont : yo ba-y kou, yo voyé wòch asi-y é yo jous mété-y lajòl ! (2 Kor. 11:23-25). Pòl limenm rèkonnèt kè fò i té goumé èvè vyé santiman i té ni an tchè a-y (Wom. 7:18, 19, 24). Anplisdisa, i té ni « on pikan andidan chè a-y ». A pa ti anvi i té anvi Bondyé woté pikan-lasa ! (2 Kor. 12:7, 8).

5. Magré Pòl té ka jwenn éprèv, ka i rivé fè ?

⁵ Jéova ba Pòl fòs pou i té kontinyé préché magré i té ka jwenn difikilté. An-nou sonjé tousa Jéova édé-y fè. Pa ègzanp, pannan Pòl té lajòl adan on kaz a Wòm, i rivé défann bon nouvèl-la douvan sèwten chèf juif é pétèt douvan gwo fonksyonè. É i pa té pè fè sa ! (Akt 28:17 ; Filip. 4:21, 22). Anplisdisa, i ni lokazyon préché ba déotwa sòlda women ki té ka véyé-y, é ba tout sé moun-la ki té ka vin vwè-y la (Akt 28:30, 31 ; Filip. 1:13). É sé pannan péryòd-lasa kè Pòl maké déotwa lèt ba sé lasanblé-la, é jous aprézan sé lèt-lasa itil pou nou. Ègzanp a Pòl ba sé krétyen Wòm la fòs, kifè, yo té ni « plis kouraj ankò pou palé dè pawòl a Bondyé san yo pè » (Filip. 1:14). Sé vré, Pòl pa té pé fè tousa i té’é vlé fè men i té ka fè lè maksimòm, é « sa fè bon nouvèl-la fè douvan » (Filip. 1:12).

6. Dapré 2 Korentyen 12:9, 10, ka ki édé Pòl préché afon ?

⁶ Pòl té byen konprann kè si i té ka rivé fè travay-la Jéova té ba-y fè la, sé pas Jéova té ka ba-y fòs. I té sav kè si i té ka konté asi-y menm, i pa té’é jen rivé. I èspliké kè ‘lè i fèb, puisans a Bondyé ka vin pawfè’ (li 2 Korentyen 12:9, 10). Grasa lèspri sen a-y, Jéova ba Pòl bon fòs. Kifè, i rivé préché afon menmsi yo pèwsékité-y, menmsi yo mété-y lajòl é menmsi i té ni dòt difikilté ankò.

7. Timoté kontinyé préché magré i jwenn difikilté. Ki difikilté i jwenn ?

⁷ Timoté té lontan pli jenn ki Pòl, men li osi té bizwen kè Bondyé ba-y fòs pou i té kontinyé préché. Pòl té misyonè é lè i té ka fè sé vwayaj a-y la, Timoté té k’ay èvè-y. Men défwa osi,  Pòl ni lokazyon mandé Timoté a-y vwè sé lasanblé-la pou ankourajé-yo (1 Kor. 4:17). Pétèt kè Timoté té ka di an tchè a-y kè i pa té’é jen rivé fè tousa Pòl té ka mandé-y fè la. Sé dwèt pou sa Pòl di-y : « Pa lésé ponmoun méprizé jénès a-w » (1 Tim. 4:12). Anplisdisa, pannan péryòd-lasa, Timoté osi té ni « on pikan andidan chè a-y », pas byensouvan limenm osi té malad (1 Tim. 5:23). Men i té sav kè grasa lèspri sen a Bondyé, i té’é ni fòs pou kontinyé préché, é pou kontinyé édé frè é sè a-y (2 Tim. 1:7).

8. Kijan Jéova ka ba sèwvitè a-y fòs jòdijou ?

⁸ Jòdijou, Jéova ka ba sèwvitè a-y « puisans-la ki ka dépasé sa ki nòwmal » pou yo pé sa kontinyé rété fidèl (2 Kor. 4:7). An-nou vwè 4 biten Jéova ka ban-nou pou nou pé sa ni fòs é pou édé-nou rété fidèl : lapriyè, Labib, frè é sè an nou é prédikasyon-la.

9. Lè nou ka priyé, kijan sa pé édé-nou ?

⁹ Lapriyè ka ban-nou fòs. An Éfézyen 6:18, Pòl ka ankourajé-nou priyé « adan tout kalté sitiyasyon ». Konsa Jéova ké ban-nou fòs. Jonnie, sé on frè ki ka viv an Bolivi, é i vwè men a Jéova lè i té ka jwenn bon difikilté. Fanmi a-y é madanm-y touvé-yo malad bon malad-la anmenmtan. Fò i té okipé dè yo toulétwa é sa pa té mòl. Manman-y mò é madanm a-y é pap’a-y pa géri tousuit. Mi sa Jonnie ka sonjé : « Lèwvwè sa té ka vin two fò pou mwen, an té ka di Jéova tousa an té ka rèsanti é sa té ka ankourajé-mwen. » Jéova ba-y bon fòs pou i té pé sa andiré. Ronald, sé on ansyen ki ka viv an Bolivi osi. I vin sav kè manman-y ni on kansè. Malérèz-la mò on mwa apré. Ka ki édé frè-la tchenbé ? Mi sa i ka èspliké : « Lèwvwè an ka priyé, an ka di Jéova tousa an ni asi tchè an mwen. An sav kè pa ni ponmoun ki konnèt-mwen myé ki Jéova, i jous konnèt-mwen myé ki mwenmenm ankò. » Dépawfwa, nou ka santi kè nou ka néyé anba sa ki ka trakasé-nou, é nou pa sav ka pou nou di adan priyè an nou. Men Jéova vé nou di-y tousa ki an tchè an nou é tousa ki an lèspri an nou (Wom. 8:26, 27).

10. Dapré Ébré 4:12, poukwa sa vréman enpòwtan kè nou li Labib é kè nou pran tan médité asi-y ?

¹⁰ Labib ka ban-nou fòs. Pawòl a Bondyé ba Pòl fòs é i konsolé-y. I pé fè menm biten pou nou osi (Wom. 15:4). Lè nou ka li Labib, é kè nou ka pran tan réfléchi asi sa nou ka li, Jéova pé édé-nou. Grasa lèspri sen a-y, Jéova pé fè-nou vwè kijan on pasaj a Labib pé itil pou nou (li Ébré 4:12). Nou palé dè Ronald talè la, mi sa i ka di : « Érèzman an té pran labitid li Labib touléswa. Lè an ka sonjé kijan dè moun Jéova yé é kijan i ka pran swen a sèwvitè a-y, sa ka ban-mwen bon fòs toubònman. »

11. Kijan Labib édé on sè ki pèd mari a-y ?

¹¹ Lè nou ka pran tan réfléchi asi Pawòl a Bondyé, sa ka édé-nou vwè pwoblèm an nou ondòt jan. Sé sa on sè ki pèd mari a-y konstaté. On ansyen di-y kè sa té’é fè-y dibyen si i té ka wouli liv a Jòb. É sé sa i fè. Odépa, sé kritiké i té ka kritiké Jòb. I té ka vwè-y ka di Jòb : « Men Jòb, ka ou négatif konsa ! » Men i rann-li kont kè sa Jòb té ka rèsanti sé ègzaktèman sa i té ka rèsanti osi. Sa édé-y pa lésé pwoblèm a-y pran tèt a-y, men rété  konsantré asi sa ki pi enpòwtan : Jéova é èspérans-la i ka ban-nou la. Kifè sa ba-y fòs pou tchenbé.

12. Kijan Jéova ka sèvi èvè frè é sè an nou pou ban-nou fòs ?

¹² Frè é sè an nou ka ban-nou fòs. Jéova ka sèvi èvè frè é sè an nou pou ban-nou fòs. Pòl maké kè i té anvi vwè frè é sè a-y « pou yonn ankourajé lòt » (Wom. 1:11, 12). Talè la nou palé dè Mary. A pa ti kontan i kontan lè i ka pasé tan èvè frè é sè a-y. Mi sa i ka di : « Jéova ka sèvi èvè frè é sè an mwen pou ban-mwen fòs alòskè byensouvan yo pa menm sav sa an ka viv. Dépawfwa, yo ka di on biten ki ka ankourajé-mwen oben yo ka voyé on ti kat ban mwen é sa ka tonbé tèk. Lè an ka jwenn sèwten sè ki viv menm biten ki mwen, sa ka fan’an dibyen pas an ka vwè kijan yo rivé about a sé difikilté-lasa. Anplisdisa, sé ansyen-la ka fan’an sonjé kè an ni onlo valè pou lasanblé-la ».

13. Lè nou k’ay réinyon, kijan yonn pé ankourajé lòt ?

¹³ Lè nou k’ay réinyon, yonn pé ankourajé lòt é sé on bèl lokazyon toubònman ! Pétèt kè ou té’é pé pwofité dè lokazyon-lasa pou di frè é sè a-w kè ou enmé-yo é pou félisité-yo pou tousa yo ka fè. Pa ègzanp, avan on réinyon koumansé, on ansyen non a-y sé Peter ay vwè on sè mari a-y pa Témwen. Mi sa i di-y : « Sè an mwen, ou pé pa imajiné kijan sa ka ankourajé-mwen lè an ka vwè-w èvè 6 timoun a-w. Sa ka fan’an plézi dè vwè tout timoun a-w toujou byen abiyé é yo toujou byen préparé pou bay on ti komantè. » Lèwvwè sè-la tann sa, sa touché-y tèlman, dlo sòti an zyé a-y. Mi sa i di : « A pa jé ! Sé ègzaktèman sa an té bizwen tann jòdila ».

14. Kijan prédikasyon-la ka édé-nou ?

¹⁴ Prédikasyon-la ka ban-nou fòs. Ki sé moun-la ka kouté-nou, ki sé moun-la pa’a kouté-nou, lè nou ka palé dè sé vérité-la ki an Bib-la, sa ka fè-nou dibyen (Pwov. 11:25). On sè non a-y sé Stacy rann-li kont kè prédikasyon-la ka ban-nou fòs toubònman. Yo èskominyé on moun an fanmi a-y é sa chouboulé-y onlo menm. Mi sa Stacy té ka di an tchè a-y : « Pétèt an té’é pé fè dòt biten pou édé-y men ka an té’é pé fè ? Sé yenki sa i té ka sonjé ! » Ka ki édé-y woupran doubout a-y ? Prédikasyon-la ! Lè i té an prédikasyon, i té ka sonjé yenki sé moun-la ki an téritwa-la é i té ka éséyé vwè ka i té’é pé fè pou édé-yo. Mi sa i ka rakonté : « Pannan péryòd-lasa, grasa Jéova, an ni on étidyan ki té ka pwogrésé byen menm. Sa ankourajé-mwen toubònman ! An rann-mwen kont kè sa ki édé-mwen plis sé prédikasyon-la ».

15. Ka ègzanp a Mary ka aprann-nou ?

¹⁵ Pou sèwten moun, yo pa’a fè granzafè an prédikasyon. Si sé ka a-w, sonjé kè Jéova kontan lè i ka vwè kè ou ka fè tousa ou pé an prédikasyon. An-nou wouvin asi ègzanp a Mary. I déménajé adan on téritwa pou i ay préché adan ondòt lang, é odépa, i pa té ka santi-y itil. Mi sa i ka èspliké : « An té ka bay on répons tou senp, an té ka li on vèwsé oben an té ka bay on trak. Sé sa an té pé fè tousèl. » Pou-y a pa granzafè i té ka fè lè i té ka gadé sa sélézòt frè é sè-la ki té ka palé lang-la byen té ka fè. Men lè i rann-li kont kè Jéova té ka itilizé-y kanmenm, i pa té ka vwè sa menmjan-la. Mi sa i di : « Sé vérité-la ki an Bib-la tou senp é yo pé chanjé vi a on moun ».

16. Si nou pé pa kité kaz an nou pou ay préché, ka ki pé édé-nou ?

 ¹⁶ A pa ti kontan Jéova kontan lè i ka vwè kè nou anvi préché menmsi nou oblijé rété akaz an nou. I pé édé-nou préché ba moun ki ka pran swen an nou oben ba sé enfiwmyé-la oben ba sé mèdsen-la ki ka vin vwè-nou akaz an nou. Si nou ka konparé sa nou ka fè jòdijou èvè sa nou té ka fè avan, sa ka riské dè dékourajé-nou. Si nou ka sonjé kè Jéova toujou la pou édé-nou, sa ké ban-nou fòs pou andiré kèlkèswa éprèv-la nou ka jwenn la é nou ké ni tchè-kontan.

17. Dépawfwa, nou ka préché é nou ni lenprésyon sa pa’a maché, men dapré Éklézyas 11:6, poukwa fò-nou kontinyé fè-y kanmenm ?

¹⁷ Lè nou ka préché, nou ka simé grenn a vérité men nou pa sav kilès adan yo ki ké pousé (li Éklézyas 11:6). Pa ègzanp, Barbara, sé on sè ki ja ni plis ki 80 lanné, i té ni labitid préché pa téléfòn é voyé lèt ba moun. On jou, i voyé on lèt ba on moun é i mèt Tou dè Gad a 1^é Maws 2014 adan. Adan Tou dè Gad lasa, té ni on awtik, tèm a-y sé té « Ce que Dieu a fait pour vous ». I voyé lèt-lasa ba on misyé é madanm a-y men i pa té sav kè yo té èskominyé. Yo li jounal-lasa é yo wouli-y ankò. Pou misyé-la, sé Jéova ki té ka palé ba-y dirèktèman. Lèwgadé, yo woukoumansé vin an réinyon é finalman yo wouvin Témwen a Jéova alòskè sa té ka fè plis ki 27 an yo té lagé lavérité. Lèt-la Barbara voyé la pòté bon biten é lè i rann-li kont dè sa, sèten sa dwèt ankourajé-y é ba-y onlo fòs !

18. Si nou vé Bondyé ban-nou fòs, ka pou nou fè ?

¹⁸ Jéova ka ban-nou plizyè biten pou ban-nou fòs. Pa ègzanp, i ka ban-nou : lapriyè, Labib, frè é sè an nou é prédikasyon-la. Lè nou ka sèvi èvè sé biten-lasa, nou ka montré Jéova kè nou sèten kè i pé édé-nou é kè nou sav kè i anvi fè-y. Alò an-nou fè fon asi Pap’an nou ki an syèl-la, ki kontan « itilizé fòs a-y an favè a tousa ki ka sèvi-y èvè tout tchè a yo » (2 Kron. 16:9).