NOUCHAK té’é vlé toutmoun vwè-nou kon on bon moun, é sa toutafè nòwmal. Men, adan mond-lasa, pou enmé fè sa ki byen sa pa toujou fasil. Poukwa ? Pas ni onlo moun ki pa « ni lanmou pou sa ki byen » (2 Tim. 3:3). Yo ka mèt prensip a Jéova dè koté, é sé konsi yo té ka di kè « sa ki byen, sé sa ki mové, é kè sa ki mové, sé sa ki byen » (Iz. 5:20). Anplisdisa, noutout enpawfè é noutout ka goumé kont mové labitid nou pran la nou lévé la. Kifè, nou pé ka santi-nou kon on sè ki té ka sèvi Jéova dépi bon enpé lanné, men ki admèt : « An ni dimal a kwè toubònman kè on moun kon mwen, sé pé on bon moun. »

Men érèzman, noutout pé kiltivé lanmou pou sa ki byen ! Sé on kalité ki ka vin dè lèspri sen a Bondyé. Kèlkanswa sa ki té’é pé anpéché-nou ni kalité-lasa, ki sé enfliyans a sa ki ka lantouré-nou, ki sé pwòp défo an nou oben sa nou ja pasé an vi an nou, lèspri sen lontan pli fò. An-nou ègzaminé ka ki lanmou pou sa ki byen é kijan nou pé montré kè nou enmé fè sa ki byen.

An dé mo kat pawòl, nou pé di kè lanmou pou sa ki byen sé bèl kalité-la ki ka pousé on moun a fè lézòt dibyen. Sa vlé di kè moun-lasa toujou ka fè sa ki dwèt é kè i pa jen ni pon méchansté an tchè a-y. On moun ki enmé sa ki byen toujou ka réfléchi a sa i pé fè pou édé lézòt é pou fè-yo dibyen.

Sèten ou konnèt moun konsa, ki toujou paré pou fè fanmi a yo oben zanmi a yo dibyen. Men enmé sa ki byen, a pa enki sa. Sé vré, pa ni ponmoun asi latè ki pé fè sa ki byen on mannyè ki pawfè. Bib-la ka di « pa ni pon nonm jis asi latè ki toujou ka fè lèbyen é ki pa’a jen péché » (Ékl. 7:20). Dayè, lapòt Pòl di sa franchman : « An sav kè andidan an mwen, kivédi adan chè an mwen, pa ni ayen ki bon » (Wom. 7:18). Donk si nou vlé kiltivé kalité-lasa, méyè biten a fè, sé pran ègzanp asi Bondyé, Sous a lanmou pou sa ki byen.

Sé Jéova ki andwa di ka ki byen. Mi sa Labib ka di dè-y : « Ou enmé sa ki byen é sa ou ka fè, sé lèbyen. Aprann-mwen lwa a-w » (Sòm 119:68). An-nou ègzaminé 2 lidé nou ka touvé adan vèwsé-lasa.

Jéova enmé sa ki byen. Kèlkèswa sa Jéova ka fè, pa ni mwayen i pa fè lèbyen. Sé konsa i yé, sa adan-y. Enki gadé sa ki rivé lè i montré Moyiz glwa a-y, ki ni lanmou pou sa ki byen adan-y. I di Moyiz : « An kay fè tout bon biten an ni pasé douvan a-w. » Aprésa, Moyiz tann on vwa ki té ka di kijan dè moun Jéova yé : « Jéova, Jéova, on Bondyé ki ka aji èvè pityé é ki ka pran penn a moun, ki pa ka fè kòlè vit, ki plen lanmou, on lanmou ki fidèl, é ki toujou ka di lavérité ; i ka aji èvè plizyè milyé moun èvè on lanmou ki fidèl, i ka padonné lè on moun fè érè, lè on moun pa rèspèkté lwa a-y é lè on moun péché, men anponjan i pé ké lésé koupab-la chapé san i pini-y » (Ègz. 33:19 ; 34:6, 7). Alò, nou ka tou konprann kè toutjan nou gadé kimoun Jéova yé,  nou ka vwè i enmé sa ki byen. Menmsi antankè nonm, Jézi pa té pé pi enmé lèbyen ki sa, i di : « Pa ni ponmoun ki ni lanmou pou sa ki byen, onsèl moun ki ni lanmou pou sa ki byen sé : Bondyé » (Lik 18:19).

Sa Jéova ka fè, sé lèbyen. Tousa Jéova ka fè ka montré-w kè i enmé sa ki byen. « Jéova ka fè toutmoun dibyen, é kèlkanswa sa i ka fè, ou ka vwè sé èvè pityé i ka fè-y » (Sòm 145:9). Padavwa Jéova enmé sa ki byen é padavwa i pa ka fè préférans, i ka ba toutmoun lavi é tousa ki nésésè pou yo kontinyé viv (Akt 14:17). Lè i ka padonné-nou, sé on mannyè i ka montré osi kè i enmé fè sa ki byen. Adan on Sòm, nou ka li : « Vou, O Jéova, ou enmé sa ki byen é ou paré a padonné » (Sòm 86:5). Nou pé sèten kè « Jéova pé ké jen rèfizé ba moun sa ki byen, si yo toujou ka maché dwèt » (Sòm 84:11).

Bondyé kréyé-nou pòtré a-y, donk nou osi nou pé enmé sa ki byen é fè lèbyen (Jén. 1:27). Men atansyon, sa pa ka enki fèt konsa. Jéova ka mandé-nou « aprann fè sa ki byen » (Iz. 1:17). Kijan nou pé fè bèl kalité-lasa grandi andidan an nou ? An-nou vwè twa mannyè nou pé fè sa.

Prèmyèwman : an-nou priyé pou mandé Jéova lèspri sen, pas sé sa ki pé fè-nou enmé sa ki byen poudèbon (Gal. 5:22). Wi, lèspri sen pé édé-nou enmé sa ki byen é hay sa ki mové (Wom. 12:9). Labib ka di kè Jéova pé fè-nou vin ‘pi solid pou nou toujou fè sa ki byen, ki lè nou ka aji, ki lè nou ka palé’ (2 Tés. 2:16, 17).

Dézyèmman : an-nou li Pawòl a Bondyé. Konsa, Jéova pé montré-nou « chimen a sa ki byen » é i pé ban-nou tousa ki nésésè pou fè « tout bon biten ki ni a fè » (Pwov. 2:9 ; 2 Tim. 3:17). Lè nou ka li Labib é lè nou ka pran tan réfléchi asi-y, nou ka plen tchè an nou èvè bon biten asi Bondyé é asi volonté a-y. Kifè, piti-a-piti, nou ka ni on trézò ki séré la, é nou sav kè dépi nou ké bizwen nou ké pé ay pran adan-y (Lik 6:45 ; Éféz. 5:9).

Twazyèmman : an-nou fè tousa nou pé pou ‘imité sa ki byen’ (3 Jan 11). Adan Labib, ni onlo moun ki té enmé sa ki byen. Asirésèten, méyè ègzanp ki ni sé Jéova é Jézi. Men ni dòt ankò, kon Tabita é Bawnabé (Akt 9:36 ; 11:22-24). Lè ou ka li sa Labib ka di asi yo, gadé byen ka yo fè pou édé lézòt. Aprésa, réfléchi a sa ou pé fè pou édé on moun an fanmi a-w oben adan lasanblé a-w. Gadé byen osi ki byenfé Tabita é Bawnabé  pwokiré-yo difètkè yo fè lézòt dibyen. Vou osi, ou pé rékòlté menm byenfé ki yo.

Jòdijou, tin moun ki enmé sa ki byen, é nou pé pran ègzanp asi yo osi. Pa ègzanp, gay sé ansyen-la adan lasanblé lokal an nou, ki ka travay rèd, é ki enmé sa ki byen. Ou ni osi tout sé sè fidèl la. Grasa sa yo ka fè é sa yo ka di, yo ka « aprann lézòt sa ki byen » (Tit 1:8 ; 2:3). On sè yo ka kriyé Roseline ka di : « An ni on zanmi ki toujou ka fè tousa i pé pou i édé é pou i ankourajé sé frè é sè la. I ka sonjé adan ki sitiyasyon yo yé, i ka fè-yo dé tikado, oben i ka rann-yo sèwvis. Pou mwen, sé on bon moun toubònman. »

Jéova ka ankourajé sèwvitè a-y a « chèché a fè sa ki byen » (Amòs 5:14). Lè nou ka fè sa, non sèlman nou ka vin enmé prensip a-y anrapò èvè sa ki byen, men sa ka ban-nou plis balan osi pou nou fè sa ki byen.

Pou fè lézòt dibyen, pa lapenn fè gran démonstrasyon, ni dépansé onpakèt lajan ! Gadé : Ès on awtis pé penn pòtré a-w enki èvè 2 gwo koud-penso ? Awa ! Fò i fè plizyè ti koud-penso. Menmjan-la, sé enpé ti jès nou ké fè ki ké montré nou enmé sa ki byen.

Labib ka di kè fò-nou « paré » a fè sa ki byen (2 Tim. 2:21 ; Tit 3:1). Kijan nou pé fè préparasyon-lasa ? Fò-nou sousyé-nou dè sa lézòt ka viv ; konsa, pétèt nou ké vwè ka nou pé fè pou édé-yo, ‘pou byen a yo, pou fè-yo pwogrésé’ (Wom. 15:2). Pa ègzanp, nou pé pawtajé sa nou ni èvè yo (Pwov. 3:27). Nou pé envité-yo manjé on tibiten tou senp èvè nou, oben a pasé on ti moman épi nou pou ankourajé-yo. Si nou sav on moun malad, nou pé voyé on timo ba-y, pasé owa a-y, oben téléfoné-y. Wi vréman, ni onlo sitiyasyon ki pé pèwmèt-nou di dé pawòl « ki bon pou bay fòs lè sa nésésè, pou nou ba sa ki ka tann sé pawòl-lasa on biten ki ka fè-yo dibyen » (Éféz. 4:29).

Nou ka imité Jéova, nou ka fè éfò pou fè toutmoun dibyen. Sé pousa nou pa’a fè préférans. On mannyè éfikas dè fè sa, sé préché bon nouvèl a Wayòm la ba toutmoun. Menm sa ki hay-nou, nou ka chèché a fè-yo dibyen kon Jézi mandé (Lik 6:27). Lè ou enmé sa ki byen é lè ou ka fè lézòt dibyen, ou toujou an rézon, pas « pa ni pon lwa kont sé biten-lasa » (Gal. 5:22, 23). Si nou ka fè lèbyen, menm lè yo rèd èvè nou oben lè nou an difikilté, sa pé glorifyé Jéova é sa pé fè moun aksèpté lavérité (1 Pyè 3:16, 17).

« On nonm ki ka fè lèbyen ka jwenn rékonpans pou jan-la i ka aji la » (Pwov. 14:14). Ki rékonpans ? Lè nou ka fè lézòt dibyen, yo pi fasil a fè-nou dibyen anrètou (Pwov. 14:22). É menmsi yo pa’a fè-y, an-nou kontinyé fè-yo dibyen. Sa pé rann-yo pi dous é yo pé rivé a chanjé konpòwtasyon (Wom. 12:20, nòt).

Lè nou ka arété fè sa ki mové é kè nou ka fè lèbyen, noumenm ka rékòlté byenfé. Onlo frè é sè ja konstaté sa. Pa ègzanp, Nancy ka di : « Lè an té pli jenn, an té ka bétizé, an té ka menné on vyé vi, é an pa té ka rèspèkté ponmoun. Men, piti-a-piti, lè an vin konnèt prensip a Bondyé é lè an mèt-yo an pratik, an vin pi kontan. Aprézan, an ni plis konsidérasyon pou mwen menm. »

Méyè rézon nou ni dè fè sa ki byen, sé kè sa ka fè Jéova plézi. Menmsi onlo moun pa ka vwè sa nou ka fè, li Jéova ka vwè. Lè nou ni on bon lidé an tèt an nou, i okouran (Éféz. 6:7, 8). Kijan i ka rékonpansé-nou ? « Jéova kontan on moun ki enmé sa ki byen » (Pwov. 12:2). Alò an-nou kontinyé kiltivé lanmou pou sa ki byen ! Jéova ka pwomèt kè ké ni « glwa, lonnè, é lapé pou chakmoun ki ka fè sa ki byen » (Wom. 2:10).