1. Ka Adan é Èv pèd, é ka sa pòté ?

 SÈLON vou, kimoun ki pé ba-w méyè dirèksyon parapòt a sa ki byen é a sa ki mal ? Lè Adan é Èv manjé fwi a pyébwa a konésans a sa ki byen é a sa ki mal, yo montré on biten ki klè : yo pa té ni konfyans an Jéova, ni an prensip a-y. Yo chwazi dè désidé yomenm ka ki byen é ka ki mal (Jén. 3:22). Men réfléchi tibwen asi tousa yo pèd : lanmityé a yo èvè Jéova, lavi étèwnèl. É yo mété timoun a yo anba jouk a péché-la é anba jouk a lanmò (Wom. 5:12). Chwa-la yo fè la pòté yenki malè.

2-3. a) Kijan fonksyonnè étyopyen la réyaji lè Filip préché ba-y ? b) Ki bénédisyon nou ka rèsèvwa lè nou ka pran batèm, é ki kèsyon nou kay réponn alè ?

² Ni on gran diférans ant atitid-la Adan é Èv té ni la é jan fonksyonnè étyopyen la réyaji lè Filip préché ba-y. Tèlman fonksyonnè-la té ni rèkonésans pou sa Jéova é Jézi té fè ba-y, i batizé tousuit (Akt 8:34-38). Lè nou ka ba Jéova vi an nou é nou ka pran batèm kon étyopyen-la, nou ka montré on mannyè ki klè kè nou ni rèkonésans pou sa Jéova é Jézi fè ban nou. Nou ka montré osi kè nou ka fè Jéova konfyans é kè sé-y ki andwa di-nou ka ki byen é ka ki mal.

³ Sonjé tout sé bénédisyon-la Jéova ka ban-nou la lè nou ka sèvi-y ! Nou ké pé rètouvé tousa Adan é Èv pèd, é pawmi sé biten-lasa, ni lavi étèwnèl. Padavwa nou ni fwa adan Jézikri, Jéova ka padonné érè an nou, é i ka ban-nou on konsyans ki pwòp (Mat. 20:28 ; Akt 10:43).  Anplisdisa, nou ka rantré adan fanmi a sèwvitè a Jéova, ki ni lèspwa dè ni on bèl landèmen toubònman (Jan 10:14-16 ; Wom. 8:20, 21). Men magré ni tousa byenfé dèyè, sèwten moun ki konnèt Jéova an dé lidé. Yo po’o sav si yo ka fè kon fonksyonnè étyopyen la. Ka ki pé ka anpéché-yo pran batèm ? É kijan yo pé rivé a fè douvan magré sa ki ka frenné-yo ?

4-5. Douvan ki difikilté on jenngason é on jennfi vin touvé-yo ?

⁴ Lè ou pa ni konfyans adan-w. Fanmi a Avery Témwen a Jéova. Toutmoun ka vwè papa-y kon on bon ansyen adan lasanblé-la, é kon on papa ki plen bonté. Magrésa, Avery pran onlo tan avan i pran batèm. Poukisa ? Limenm ka èspliké : « An lidé an mwen, an pa té’é jen pé rivé a hòtè a pap’an mwen. » Pou Avery, i pa té kapab ni sèwten rèsponsabilité adan lasanblé-la. « An té pè yo mandé-mwen fè lapriyè douvan toutmoun, fè diskou oben dirijé réinyon pou prédikasyon-la. »

⁵ Hannah, ki ni 18 an, pa té ni konfyans adan-y ditou-ditou. Fanmi a-y té Témwen a Jéova, men magrésa, i pa té sèten kè i té’é rivé rèspèkté prensip a Jéova adan vi a-y. Pou kibiten ? Sé paskè, an tèt a Hannah, limenm a-y pa té vo ayen. Délè, tèlman i pa té ka santi-y byen, i té ka fè pwòp kò a-y sibi onlo atrosité, é malérèzman sa té ka rann sitiyasyon-la pli mové ankò. Mi sa i ka di : « An pa jen palé sa èvè ponmoun, pa menm èvè fanmi an mwen. É an té ka konpranndèdi Jéova pa té ké jen asèpté-mwen pas an té ka fè kò an mwen vwè mizè. »

6. Ka i té ka fè Vanessa fè dèyè pou i té pran batèm ?

⁶ Lè zanmi ka détenn asi-w. Mi sa Vanessa, ki ni 22 lanné, ka di : « An té ni on bon bon zanmi menm. Sa té ka fè prèskè dis lanné nou té konnèt-nou. » Pawkont, zanmi a-y pa té ka bay pon fòs pou-y té pran batèm. Sa té ka rann Vanessa tris. I ka èspliké : « Sa rèd pou mwen dè touvé zanmi, é an té pè pou an pa jen touvé pondòt zanmi si an té ka kasé lanmityé-lasa. »

7. Ka Makayla té pè, é pou kibiten ?

⁷ Lè ou pè fè on péché grav. Makayla té ni senk lanné lè yo èskominyé frè a-y. Toupannan i té ka grandi, i vwè kijan konpòwtèman a frè a-y té ka aji asi fanmi a-y. I ka èspliké : « An té pè pran  batèm é fè on péché grav apré. Si yo té èskominyé-mwen, sa té’é fè fanmi an mwen plis lapenn ankò. »

8. Ka Miles té pè ?

⁸ Lè ou pè yo anpéché-w sèvi Jéova. Papa é bèlmè a Miles ka sèvi Jéova, men manman-y pa ka sèvi Bondyé. Mi sa Miles ka rakonté : « An té ka viv èvè manman-mwen dépi 18 lanné é an té pè di-y kè an té vlé pran batèm. An té vwè jan i té réyaji lè pap’an mwen pran pozisyon pou Jéova. Alò an té pè i mèt baton an wou an mwen. »

9. Ka i ké pasé lè, piti-a-piti, ou ké rann-vou kont jan Jéova plen pasyans é plen lanmou ?

⁹ Adan é Èv chwazi viré Jéova do pas yo pa té kiltivé on lanmou fò pou-y andidan tchè a yo. Kanmenmsa, Jéova pèwmèt-yo viv asé lontan pou yo té ni tan fè timoun é pou yo té lévé-yo dapré pwòp prensip a yo. Sa pa pran onlo tan pou konstaté kè yo té ni tò dè fè chwa-lasa. Pli gran gason a yo tchouyé frè a-y, é anfinaldikont, bon enpé moun asi latè vin vyolan é égoyis (Jén. 4:8 ; 6:11-13). Men Jéova pran dispozisyon pou sové tout timoun a Adan é Èv ki té ké vlé sèvi-y (Jan 6:38-40, 57, 58). Pli ou ké rann-vou kont jan Jéova ni onlo pasyans é jan i ni onlo lanmou, é pli lanmou-la ou ni pou-y la ké vin fò. Sèten ou pé ké vlé aji menmjan ki Adan é Èv, men ou ké pisimé ba Jéova vi a-w.

10. Poukwa lè ou ka pran tan réfléchi asi Sòm 19:7, sa pé édé-w sèvi Jéova ?

¹⁰ Kontinyé aprann konnèt Jéova. Pi ou ké aprann konnèt Jéova byen, pi ou ké sèten kè ou kapab sèvi-y èvè fidélité. Ou ka sonjé Avery ? Mi sa i di : « An koumansé ni plis konfyans adan mwen lè an li, é lè an pran tan réfléchi asi pwomès-la ki adan Sòm 19:7 » (li-y). Lè Avery rann-li kont kè Jéova ka tchenn pwomès-lasa poudèbon, lanmou i té ni pou-y vin pli fò. Non sèlman lanmou pou Jéova ka ban-nou konfyans, men i ka ban-nou fòs osi pou nou fè ki li,  ki volonté a-y pasé avan pondòt biten. É Hannah ? Ou ka sonjé-y ? I ka èspliké : « Lè an li é lè an étidyé Labib, an konprann kè lè an ka fè-mwen soufè, an ka fè Jéova soufè osi » (1 Pyè 5:7). Hannah vin on moun ki ka « mèt pawòl-la an pratik » (Jak 1:22). Ka sa pòté ba-y ? Mi sa i ka di : « Lè an vwè tout bon biten sa pòté ban mwen padavwa an obéyi Jéova, lanmou an mwen pou-y vin pli gran. Alè, an sèten kè i ké toujou gidonné-mwen lè an ké bizwen-y. » Dan lè pasé Hannah té toujou bizwen fè kò a-y vwè mizè, men jòdila, i rivé arété fè sa. I ba Jéova vi a-y é i pran batèm.

11. Ka Vanessa fè pou i té touvé bon zanmi, é ka sa ka aprann-nou ?

¹¹ Chwazi zanmi a-w byen. Finalman, Vanessa, nou palé dè-y talè la, rann-li kont kè zanmi a-y té ka détenn asi-y é kè sa té ka frenné-y pou i té sèvi Jéova. Sé pousa, i kasé lanmityé-lasa. Men a pa yenki sa i fè. I fè onlo éfò pou i té touvé nouvo zanmi adan pèp a Jéova. I ka èspliké kijan ègzanp a Noé é fanmi a-y édé-y : « Yo té lantouré èvè moun ki pa té ka sèvi Jéova, men antrè yomenm, yo té ka jwenn bon frékantasyon. » Apré i pran lèbatèm, Vanessa pran sèwvis pyonyé pèwmanan. Jòdila, mi sa i ka di : « Sa édé-mwen touvé dé bon zanmi, non sèlman adan lasanblé lokal an mwen, men adan dòt lasanblé osi. » Vou osi, ni mwayen ou touvé bon zanmi lè ou ka fè tousa ou pé adan travay-la Jéova mandé-nou fè la (Mat. 24:14).

12. Ki kalté krent Adan é Èv pa té ni, é ka sa pòté ?

¹² Fò-w ni bon krent-la. Ni désèrten krent ki bon. Pa ègzanp, fò-nou pè fè Jéova lapenn (Sòm 111:10). Si Adan é Èv té fè ansòt pou ni krent-lasa, yo pa té’é ba Jéova do. Men sé dirèktèman sa yo fè. Apré sa rivé, zyé a yo vin wouvè, kivédi, yo konprann kè yo té vin péchè. Sèl biten yo té’é pé fè, sé mèt timoun a yo anba jouk a péché-la é anba jouk a lanmò. Lè yo vin konprann an ki léta yo té yé, yo koumansé hont pas yo té toutouni. Kifè, yo pòté mannèv pou mèt on lenj asi yo (Jén. 3:7, 21).

13-14. a) Dapré 1 Pyè 3:21, poukisa fò pa nou ni lafrous douvan lanmò ? b) Ki lyannaj ki ni antrè lè nou ka pran batèm é padon a péché an nou ? c) Ki rézon nou ni dè enmé Jéova ?

 ¹³ Sé vré kè fò-nou pè fè Jéova lapenn. Men fò pa lafrous pran-nou douvan lanmò. Jéova prévwa on mwayen pou nou ni lavi étèwnèl. Si nou fè on péché, é kè nou rèpanti-nou on mannyè ki sensè, Jéova ka padonné-nou. I ka padonné-nou paskè nou ni fwa adan sakrifis a Gason a-y. É ni plizyè mannyè nou pé montré kè nou ni fwa. On mannyè nou pé fè-y é ki enpòwtan, sé lè nou ka ba Jéova vi an nou é nou ka pran batèm (li 1 Pyè 3:21).

¹⁴ Ni onlo rézon ki ka fè kè nou enmé Jéova. Non sèlman i ka ban-nou bon biten é nou ka pwofité dè yo chak jou, men anplisdisa, i ka fè-nou konnèt lavérité asi-y é asi sa i ka prévwa dè fè plita (Jan 8:31, 32). I ban-nou lasanblé krétyèn la pou gidonné-nou é pou soutyenn-nou. I ka édé-nou tchenbé douvan difikilté nou ka jwenn. I ka ban-nou osi lèspwa kè on jou nou ké pé viv pou touttan adan on mond pawfè (Sòm 68:19 ; Rév 21:3, 4). Lè nou ka réfléchi asi tousa i ja fè pou montré-nou tout lanmou i ni pou nou, nou ka anvi enmé-y. É lè nou enmé Jéova, nou ka vin ni bon krent-la : nou ka pè fè Sila nou tèlman enmé la lapenn.

15. Kijan Makayla fè pou rivé about a krent-la i té ni la dè fè on péché grav ?

¹⁵ Makayla, kè nou ja nonmé pli ho, rivé about a krent-la i té ni la dè fè on péché grav lè i konprann kè tchè a Jéova gran wouvè pou padonné-y. Mi sa i ka èspliké : « An konprann kè noutout enpawfè é kè noutout ka fè érè. Men an konprann osi kè Jéova enmé-nou é kè i ka padonné-nou grasa ranson-la. » Lanmou a-y pou Jéova ba-y balan pou ba Jéova vi a-y é pou pran batèm.

16. Miles té pè yo anpéché-y sèvi Jéova. Ka ki édé-y pa lésé krent-lasa frenné-y ?

¹⁶ Miles té pè kè manman-y éséyé mèt baton an wou a-y lè i té’é désidé pran batèm. Sé pousa, i chèché konsèy owa rèsponsab a siwkonskripsyon a-y. Miles ka di : « Li osi té grandi adan on fanmi ki té ni onsèl paran ki té Témwen. I édé-mwen réfléchi asi sa an té pé di manman-mwen pou fè-y konprann kè sété chwa pèwsonèl an mwen dè pran batèm, é kè a pa pap’an mwen ki té dèyè désizyon an mwen. » Manman Miles mal réyaji. Anfinaldikont, Miles té oblijé kité kaz-la, men i tchenn a mo a-y, i rété fidèl a sa i té désidé. I ka èspliké : « Lè an réfléchi asi bon biten Jéova fè ban-mwen, sa touché tchè an mwen toubònman. Lèwvwè an pran tan réfléchi asi sakrifis a Jézi, ranson-la, an réyalizé kè a pa ti enmé Jéova enmé-mwen. Sa  pousé-mwen a ba-y vi an mwen é a pran batèm. »

17. Ka noutout pé fè ?

¹⁷ Lè Èv manjé fwi a pyébwa-la adan Jadendédèn-la, i viré Papa-y do. É lèwvwè Adan vin fè menm biten ki-y, i montré kè i pa té ni pon rèkonésans ditou pou tousa Jéova té fè ba-y. Noutout pé montré kè nou pa dakò ditou-ditou èvè désizyon a Adan é Èv. Lè nou ka pran lèbatèm, nou ka montré Jéova kè nou pa ni pon dout kè sé-y ki andwa désidé ka ki byen é ka ki mal ban nou. Nou ka bay laprèv kè nou enmé Pap’an nou é kè nou ka fè-y konfyans.

18. Kijan ou pé réyisi sèvi Jéova fidèlman ?

¹⁸ Apré nou pran lèbatèm, sa ki pli rèd sé dè suiv prensip a Jéova chakjou, olyé nou suiv tan nou. Men ni plizyè milyon moun ki ka rivé fè-y. Ou pé fè kon yo si ou toujou ka chèché a konprann Labib pli byen, si ou ka kontinyé vin réinyon chak simenn, é si ou ka fè bon enpé éfò pou fè lézòt konnèt sa ou aprann asi Papa-w, ki plen lanmou (Ébr. 10:24, 25). Avan ou pran on désizyon, kouté ki konsèy Jéova ka ba-w adan Pawòl a-y é grasa òwganizasyon a-y (Iz. 30:21). É konsa, tousa ou ké fè ké réyisi (Pwov. 16:3, 20).

19. Ka ou dwèt kontinyé aprésyé, é poukisa ?

¹⁹ Si ou ka kontinyé aprésyé tout bon biten sa ka pòté ba-w lè ou ka suiv dirèksyon a Jéova, lanmou a-w pou-y é pou prensip a-y ké grandi. Konsa, ayen adan tousa Satan ka propozé-w pé ké fè-w arété sèvi Jéova. Imajiné vi a-w adan mil lanné. Ou ké ka sonjé lè ou désidé pran batèm, é ou ké pé di kè pa té ni méyè désizyon ki sa !