1. Jézi ba disip a-y on komandman ki té byen klè. Kilès ? (gadé imaj-la ki anlè po a jounal-la).

AVAN jou-la i mò la, lavèy oswa, Jézi ba disip a-y on komandman ki té byen klè. I di-yo : « menmjan an enmé-zòt, zòt osi fò yonn enmé lòt. » Aprésa i di-yo : « Sé konsa toutmoun ké sav zò sé disip an mwen : si zò ni lanmou yonn pou lòt » (Jan 13:34, 35).

2. Poukwa sa enpòwtan kè nou enmé-nou ?

² Jézi di kè té’é ni mwayen vwè, on mannyè ki klè, kimoun ki disip a-y, si disip a-y té ni menmjan dè lanmou ki-y. Pawòl-lasa té vré o 1^é syèk, é jous alajouné jòdi, i vré toujou. Sé pousa sa enpòwtan toubònman kè yonn enmé lòt fò menm lè sa difisil.

3. Ka nou ké vwè adan awtik-lasa ?

³ Dépawfwa, nou ni dimal a enmé-nou fò pas noutout enpawfè. Men magrésa, fò-nou fè tousa nou pé pou imité Jézikris. Adan awtik-lasa, nou ké vwè kijan lanmou ka édé-nou fè lapé. Nou ké vwè osi kijan i ka édé-nou pa fè préférans é kijan i ka édé-nou akéyi lézòt byen. Toupannan ou ké ka ègzaminé sé lidé-lasa, sonjé kè ni dé frè é sè ki kontinyé aji èvè lanmou magré yo jwenn difikilté é pozé-w kèsyon-lasa : Ka ègzanp a yo pé aprann-mwen ?

4. Sèlon Matyé 5:23, 24, si on frè ni on biten kont nou, poukwa fò-nou fè lapé èvè-y ?

⁴ Jézi anségné-nou kè si on frè oben on sè ni on biten kont nou, fò-nou fè lapé èvè-y (li Matyé 5:23, 24). I di kè si nou vé fè Bondyé plézi, fò-nou antann-nou byen èvè lézòt. Jéova ka kontan lè nou ka fè tousa nou pé pou nou fè lapé èvè frè é sè an nou. Si nou ni rankin an tchè an nou ou si nou pa menm ka éséyé fè lapé èvè frè an nou, Jéova pé’é ba adorasyon an nou pon valè (1 Jan 4:20).

5. Poukwa on frè non a-y sé Mark té ni dimal a fè lapé ?

 ⁵ Fè lapé, a pa on biten ki toujou fasil. Poukwa ? An-nou gadé sa ki rivé on frè non a-y sé Mark *. Ni on frè ki kritiké-y é ki malpalé-y ba dòt moun an lasanblé lokal a-y é sa fè-y mal toubònman. Kijan Mark réyaji ? Mi sa i di : « An pèd sanfwa an mwen é an fè gwo kòlè. » Men aprésa, Mark règrété jan-la i té aji la é i mandé frè-la padon pas i té vlé fè lapé èvè-y. Men li frè-la pa té vé fè lapé. Odépa, mi sa Mark té ka di an tchè a-y : « Poukwa an ka chèché a fè lapé èvè misyé, piskè sé vé pa i vé pa ? » Men rèsponsab a siwkonskripsyon-la ankourajé-y é i di-y kontinyé chèché a fè lapé. Ka Mark fè ?

6. a) Ki mannèv Mark pòté pou éséyé fè lapé ? b) Kijan Mark apliké Kolosyen 3:13, 14 ?

⁶ Mark pran on tan pou analizé konpòwtèman a-y é i rann-li kont kè i pa té ni asé imilité é kè i té ka akwè-y tibwen twòp. I rèkonnèt kè fò i té chanjé mantalité a-y (Kol. 3:8, 9, 12). Èvè onlo imilité, i viré ay vwè frè-la é i woumandé-y padon pou sa i té fè. Anplisdisa, i voyé plizyè lèt ba frè-la é adan sé lèt-lasa, i té ka èspliké-y kè i té vréman dézolé parapòt a sa ki té pasé é kè i té vé kè yo mèt sa dèyè do a yo pou yo wouvin bon zanmi kon avan. Mark jous ofè frè-la dé ti kado ki, nòwmalman, té dwètèt fè-y plézi. Men malérèzman, frè-la rété faché èvè-y kanmenm. Magrésa, Mark pa jen arété enmé frè a-y é i padonné-y dè-tou-kè kon Jézi mandé (li Kolosyen 3:13, 14). Menmsi nou ka fè bon éfò pou fè lapé èvè on krétyen é kè nou ka vwè kè i pa’a mélé-y adan nou, si nou enmé-y vréman kon Jézikris mandé, nou ké kontinyé padonné-y é nou ké priyé pou sa ay myé antrè nou (Mat. 18:21, 22 ; Gal. 6:9).

7. a) Ka Jézi ankourajé-nou fè ? b) Adan ki sitiyasyon difisil on sè touvé-y ?

 ⁷ Jézi toujou ankourajé-nou a aji èvè lézòt kon nou té’é vlé yo aji èvè nou. É i ajouté kè fò pa nou enmé yenki moun ki enmé-nou (Lik 6:31-33). Imajiné kè on moun an lasanblé-la ka fè ondòt chimen lè i ka vwè-w é i pa’a di-w bonjou. A pa on biten ki ka fèt souvan, men si sa rivé-w, kijan ou ké réyaji ? Ében sé sa ki rivé Lara. Mi sa i ka di : « Ni on sè ki pa té ka lévé-mwen digad é an pa menm té sav pou ki rézon. Sa té ka istrésé-mwen toubònman é an pa menm té anvi ay réinyon ankò. » Odépa, mi kijan Lara té ka rézonné : « Mwenmenm pa fè sè-la ayen. É dayè pou yonn, ni dòt frè é sè an lasanblé-la ki ka touvé konpòwtèman a sè-lasa étranj osi. »

8. Ki mannèv Lara pòté pou i té fè lapé, é ka èkspéryans a-y ka aprann-nou ?

⁸ Lara fè sa i té pé pou i té fè lapé èvè sè-la. I priyé Jéova é i désidé dè ay palé èvè sè-la. Yo palé dè pwoblèm-la, yonn tonbé an bra a lòt é yo fè lapé. Lara konpranndèdi kè toutbiten té rantré dan lòd. Men mi sa i ka ajouté : « Aprésa, sè-la woukoumansé pa’a kapté-mwen é i vin fwèt èvè mwen. Dé bra an mwen té kasé ! » Adan on prèmyé tan, Lara té ka kwè kè tchè a-y té’é kontan yenki si konpòwtèman a sè-la té ka chanjé. Men i fin pa konprann, kè méyè biten ki té ni a fè sé té dè kontinyé aji èvè sè-la épi lanmou é ‘padonné-y dè-tou-kè’ (Éféz. 4:32 – 5:2). Lara sonjé kè pou enmé kon Jézikris té enmé, fò pa nou ‘maké asi on ti kawné mové biten yo fè-nou’ é fò-nou ‘sipòté toutbiten, kwè toutbiten, èspéré toutbiten é andiré toutbiten’ (1 Kor. 13:5, 7). Alò Lara arété pran tèt a-y akòz dè pwoblèm-lasa. É piti-a-piti, sè-la vin pi janti èvè-y. Si ou ka chèché a fè lapé èvè frè é sè a-w é kè ou ka kontinyé enmé-yo, ou pé sèten kè Bondyé ké èvè-w, on Bondyé ki plen lanmou é ki enmé lapé (2 Kor. 13:11).

9. Dapré sa ki maké an Akt 10:34, 35, poukwa fò pa nou fè préférans ?

⁹ Jéova pa’a fè préférans (li Akt 10:34, 35). Si nou pa’a fè préférans, nou ka montré kè nou sé pitit a-y. Nou ka obéyi a komandman-la ki ka mandé-nou dè enmé pwochen an nou, é nou ka fè ansòt pou toujou ni lapé adan lasanblé-la (Wom. 12:9, 10 ; Jak 2:8, 9).

10-11. Ka on sè fè pou woté vyé santiman i té ni an tchè a-y ?

¹⁰ Sa pé rèd pou sèwten moun dè pa fè préférans. An-nou pran ègzanp a on sè non a-y sé Ruth. Lèwvwè i té jenn, fanmi a-y trapé pwoblèm èvè on étranjé ki té fè-yo on gwo méchansté. Kijan sa aji asi-y ? Mi sa i ka admèt : « Dépi yo té palé-mwen dè on biten anrapò èvè péyi-lasa, an té ka mò. Pou mwen, tout moun ki té sòti an péyi-lasa té an menm sak-la, menm sé frè é sè-la. » Kijan Ruth fè pou i té woté sé vyé santiman-lasa an tchè a-y ?

¹¹ Ruth rèkonnèt kè fò i té fè gwo éfò pou i chanjé mannyè i té ka pansé. Kifè, i pran tan li sa sèwten moun viv an péyi-lasa é plizyè rapò asi péyi-lasa adan on Annuaire ki té ka palé dè sa. Mi sa i ka di : « An fè éfò pou vwè moun a péyi-lasa on mannyè ki pozitif. An koumansé vwè kè sé frè é sè-la té ka sèvi Jéova èvè tout tchè a yo. An rann-mwen kont kè yo osi, yo ka fè pawti a fanmi entèwnasyonal an nou. » Men piti-a-piti, Ruth rann-li kont kè fò i té fè plis ki sa. Mi sa i ka ajouté : « Lèwvwè an té ka jwenn déotwa frè é sè ki té sòti an péyi-lasa, an té ka fè on éfò èspésyal pou montré-mwen janti èvè yo. An té ka fè on ti kozé èvè yo é an té ka aprann konnèt-yo plibyen. » Ka sa pòté dè bon ? Ruth ka di : « An fin pa woté tout vyé santiman an té ni an tchè an mwen pou moun a péyi-lasa. »

12. On sè non a-y sé Sarah pran konsyans kè i té ni on pwoblèm. Ki pwoblèm ésa ?

¹² Dépawfwa, ni moun ka fè préférans san menm yo rann-yo kont. Pa ègzanp, Sarah té ka konpranndèdi kè i pa té ka fè préférans pas i pa té ka rété gadé ras a moun, kantité lajan yo ni oben rèsponsabilité yo ni adan lasanblé-la. Men mi sa i ka rèkonnèt : « An fin pa pran konsyans kè an té ka fè préférans. » Kijansa ? Sarah sòti adan on fanmi ki fè gran lékòl é i té préféré rété èvè grangrèk kon-y menm. On jou, i jous di on zanmi a-y : « Yenki moun enstwi an ka frékanté, an pa’a frékanté moun ki pa katégori an mwen. » On biten ki klè sé kè fò i té chanjé mantalité a-y. Ka pou i té fè ?

13. Sarah chanjé mantalité. Ka sa ka aprann-nou ?

¹³ On rèsponsab a siwkonskripsyon édé Sarah analizé-y. Mi sa Sarah ka rakonté : « I félisité-mwen davwa an ka sèvi Jéova fidèlman, an ka fè bèl komantè an réinyon é pas i vwè kè an konnèt onlo biten an Bib-la. Aprésa, i èspliké-mwen kè toupannan nou ka fè éfò pou ni plis konésans, fò-nou travay pou ni kalité kon imilité, mizérikòd é fò-nou rèkonnèt limit an nou. » Sarah pran sa rèsponsab a siwkonskripsyon-la di-y la oséryé. Mi sa i ka di : « An réyalizé kè fò an té pli janti é kè fò an té ni plis lanmou pas sé sé biten-lasa ki pi enpòwtan. » Sé sa an fè, é an koumansé vwè frè é sè an mwen ondòt jan. Mi sa i ka èspliké : « An té ka éséyé vwè ki kalité yo ni, é ki ka fè kè Jéova ka ba-yo onlo valè. » É nou aprézan ?  A pa paskè nou fè onlo étid pou nou konpranndèdi kè nou ni dwa akwè-nou ! Si nou enmé tout frè é sè an nou fò, nou pé’é fè préférans (1 Pyè 2:17).

14. Dapré Ébré 13:16, ka Jéova ka rèsanti lèwvwè nou ka akéyi lézòt ?

¹⁴ Sa ka fè Jéova plézi lè nou ka akéyi lézòt akaz an nou (li Ébré 13:16). Pou Jéova, sé adoré nou ka adoré-y lè nou ka akéyi lézòt, siwtou lè yo pa ni granzafè (Jak 1:27 ; 2:14-17). Sé pousa adan Labib yo ka ankourajé-nou a ‘toujou akéyi lézòt byen’ (Wom. 12:13). Lè nou ka akéyi lézòt byen, nou ka montré-yo kè nou ka sousyé-nou dè yo, kè nou enmé-yo é kè nou vé vin zanmi a yo. Jéova kontan lè nou ka fè on ti bwè é manjé èvè frè é sè an nou é lè nou ka pasé on ti moman èvè yo (1 Pyè 4:8-10). Men pawfwa, nou té’é byen anvi akéyi lézòt men ni dé biten ki ka frenné-nou.

15-16. a) Poukwa sèwten moun on ti jan pè akéyi moun akaz a yo ? b) Ka ki édé Edit akéyi moun akaz a-y ?

¹⁵ Pétèt kè ni plizyè rézon diféran ki ka fè kè nou on jan pè akéyi lézòt akaz an nou. An-nou pran ègzanp a Edit, on sè ki pèd mari a-y. Avan i té vin Témwen, i pa gè té enmé rèsèvwa moun akaz a-y. An tèt a-y, fò i té lésé sa pou dòt moun pas yo té’é fè sa myé ki-y.

¹⁶ Apré i pran lèbatèm, Edit chanjé mantalité. I òwganizé-y pou i té akéyi moun akaz a-y. Mi sa i ka di : « Pannan yo té ka konstwi Sal di Wayòm an nou, on ansyen vin mandé-mwen si an té’é pé akéyi on frè é madanm a-y ki té kay vin travay asi chantyé-la pou 2 simenn. Sé la an sonjé kè Jéova té béni on vèv ki té ka rété a Sarèpta » (1 Wa 17:12-16). Edit aksèpté akéyi-yo akaz a-y. Ès Jéova béni-y ? Mi sa i ka èspliké : « Anfinaldikont, a pa yenki 2 simenn yo fè, yo rété 2 mwa. É sa fè nou vin bon bon zanmi. » Anplisdisa,  Edit vin bon bon zanmi èvè onlo frè é sè an lasanblé a-y. Jòdijou i pyonyé, é a pa ti enmé i enmé envité sé frè é sè-la ki ka préché èvè-y la bwè on ti biten akaz a-y ! Mi sa i ka di : « Lè an ka ba lézòt sa an ni, sa ka fan’an dibyen ! An réyalité, Jéova ka vidé onpakèt bénédisyon anlè mwen anrètou » (Ébr. 13:1, 2).

17. Ka Lik é madanm a-y konstaté ?

¹⁷ Pétèt kè nou ja ka akéyi moun akaz an nou, men ès ni mwayen nou fè plis ankò ? Pa ègzanp, Lik é madanm a-y, sé dé moun ki enmé akéyi akaz a yo. Yo té abityé akéyi manman-yo é pap’a yo, fanmi a yo, zanmi a yo é rèsponsab a siwkonskripsyon-la é madanm a-y. Men, mi sa Lik ka di : « Nou rann-nou kont kè nou té ka envité yenki bon moun an nou. » Ka nou fè pou pwogrésé an domenn-lasa ?

18. Lik é madanm a-y té ka akéyi yenki bon moun a yo akaz a yo. Kijan yo pwogrésé an domenn-lasa ?

¹⁸ Lik é madanm a-y konprann vréman ka sa vlé di akéyi moun lè yo pran tan réfléchi asi sa Jézi di : « Si zò enmé moun ki enmé-zòt, zò ka di zò mérité on biten ? » (Mat. 5:45-47). Yo fin pa konprann kè fò yo té imité Jéova, ki donan èvè toutmoun. Kifè, alè, yo ka aranjé-yo pou yo envité moun yo po’o té jen envité avan. É Lik ka di : « Nou ka pasé dé bèl ti moman ansanm é nou kontan sa toubònman ! Nou ka vin pli soudé é nou ka vin pibon zanmi èvè Jéova. »

19. Kijan nou pé montré kè nou sé disip a Jézi, é ka ou byen désidé a fè ?

¹⁹ Nou sòti vwè kè lè nou enmé frè é sè an nou fò, sa pé édé-nou a fè lapé èvè yo, a pa fè préférans é a ka akéyi-yo byen. Si nou ni on vyé santiman an tchè an nou pou frè é sè an nou, fò-nou woté-y. Fò-nou enmé frè é sè an nou fò, èvè tout tchè an nou. Si nou fè sa, nou ké ni tchè-kontan é nou ké montré kè nou sé disip a Jézi vréman (Jan 13:17, 35).