1. Ka on moun dwèt fè avan i konstwi on kaz ?

 IMAJINÉ on misyé désidé konstwi on kaz. I sav ki kaz i vlé fè. Ès fò i kouri achté sé matéryo-la é koumansé kaz-la onfwamenm ? Awa. Fò i fè on biten enpòwtan avan sa : fò i kalkilé konmen kaz-lasa ké kouté-y. Poukwa ? Pas fò i sav si i ké ni asé lajan pou fini-y. Si i pran tan kalkilé konmen sa ké kouté-y alavans, i pi sèten fin kaz a-y.

2. Dapré sa Lik 14:27-30 ka di, ka fò ou pran tan réfléchi avan ou pran lèbatèm ?

² Ou enmé Jéova é ou ni rèkonésans pou-y. Ès sa ka ba-w anvi pran lèbatèm ? Si répons-la sé wi, fò ou pran menm désizyon ki misyé-la ki anvi konstwi kaz-la. Poukwa nou ka di sa ? Pran tan réfléchi asi sa Jézi di an Lik 14:27-30 (li-y). Jézi té ka palé dè tousa sa ka mandé pou vin disip a-y. Si nou vé suiv-li, fò-nou paré a sipòté sèwten difikilté é fò-nou paré a lagé sèwten biten (Lik 9:23-26 ; 12:51-53). Alò, avan ou pran lèbatèm, fò ou byen konprann adan ki biten ou kay angajé-w. Konsa, ou ké préparé-w pibyen pou kontinyé sèvi Bondyé fidèlman apré batèm a-w.

3. Ka nou ké vwè adan awtik-lasa ?

³ Pou vin disip a Jézikri sa ka mandé onlo éfò é onlo sakrifis. Men ès sa vo lapenn ? Pa ni pon dout asi sa ! Lè on moun ka pran lèbatèm, i ka rèsèvwa onpakèt bénédisyon dépi konnyéla é plita osi. An-nou réponn a déotwa kèsyon enpòwtan anrapò èvè lèbatèm. Sa ké pèwmèt-vou sav si ou paré pou pran lèbatèm.

4. a) Ka sa vé di ‘ba Jéova vi a-w’ ? b) An Matyé 16:24 Jézi ka di kè fò on moun ‘rènyé-y limenm a-y’. Ka sa vé di ?

⁴ Ka sa vé di ‘ba Jéova vi a-w’ ? Avan ou pran lèbatèm, fò ou ba Jéova vi a-w kivédi fò ou priyé-y èvè tout tchè a-w  pou di-y kè ou ké sèvi-y tout vi a-w. Lè ou ka ba Jéova vi a-w ou ka rènyé-w voumenm a-w ; a moman-lasa Jéova ka vin pwopriyétè a-w é sa sé on gran lonnè toubònman (li Matyé 16:24). Sé konsi ou ka di-y kè konnyéla, sa ki pi enpòwtan pou-w adan lavi sé sèvi-y. É sa ka pasé avan ou chèché a fè voumenm a-w plézi (Wom. 14:8). Lè ou ka ba Jéova vi a-w sé on pwomès ou ka fè-y, on pwomès ki séryé toubònman. Men Jéova pa’a fòsé-nou fè-y pwomès-lasa. Pawkont, pou Jéova, si nou désidé fè-y pwomès-lasa, fò nou tchenn a mo an nou (Sòm 116:12, 14).

5. Ki rapò ki ni ant ‘ba Jéova vi a-w’ é ‘pran lèbatèm’ ?

⁵ Ki rapò ki ni ant ‘ba Jéova vi a-w’ é ‘pran lèbatèm’ ? Lè ou ka ba Jéova vi a-w, sé yenki vou é Jéova ki okouran a sa. Pawkont, lè ou ka batizé sé on biten ou ka fè douvan toutmoun, swa pannan on lasanblé a siwkonskripsyon oswa pannan on lasanblé réjyonal, pi souvan ki rarman. Lè ou ka pran lèbatèm ou ka montré toutmoun kè ou ba Jéova vi a-w b. Ou ka fè-yo sav kè ou enmé Jéova èvè tout tchè a-w, èvè tout nanm a-w, èvè tout entélijans a-w é èvè tout fòs a-w é kè ou byen désidé a sèvi-y pou touttan (Mawk 12:30).

6-7. Dapré sa 1 Pyè 3:18-22 ka di, poukwa sa nésésè kè nou pran lèbatèm ?

⁶ Ès sa vréman nésésè kè ou pran lèbatèm ? Pran tan réfléchi asi sé pawòl-la nou ka touvé adan 1 Pyè 3:18-22 (li-y). Awch-la Noé fè la té ka montré kè i té ni fwa an Bondyé. Menmjan-la, lè ou ka pran batèm ou ka montré toutmoun kè ou ba Jéova vi a-w. Men ès sa vréman nésésè kè ou pran lèbatèm ? Wi. Pyè ka èspliké poukwa sa nésésè. Prèmyèwman, ‘batèm-la ka sové-nou’. Sé vré, batèm-la pé sové-nou si sa nou ka fè ka montré kè nou ni fwa an Jézi kivédi si nou ka kwè kè Jézi mò pou nou, si nou ka kwè kè i résisité an syèl-la é kè i « adwat a Bondyé » konnyéla.

⁷ Dézyèmman, lè ou ka pran lèbatèm sa ka pèwmèt-vou ni ‘on konsyans ki nèt’. Lè nou ka ba Jéova vi an nou é lè nou ka pran lèbatèm, nou ka vin bon bon zanmi èvè-y. É sa, sé on lanmityé ki vréman èspésyal. Konm nou rèpanti-nou poudèbon é konm nou ni fwa adan ranson-la, Bondyé ka padonné péché an nou. A moman-lasa, nou pé ni on konsyans ki nèt douvan a-y.

8. Ka ki dwètèt ba-w anvi pran lèbatèm ?

⁸ Ka ki dwètèt ba-w anvi pran lèbatèm ? Si ou ka désidé pran lèbatèm sé pas ou pran tan étidyé Labib é ou aprann onlo biten asi Jéova. Ou dékouvè kijan dè moun i yé, sa i enmé é kijan i ka aji. Sa ou aprann asi Jéova touché tchè a-w é konnyéla ou enmé-y fò. É jistèman, prèmyé biten ki dwètèt ba-w anvi pran lèbatèm sé lanmou a-w pou Jéova.

9. Adan Matyé 28:19, 20 Jézi ka di kè fò batizé sé moun-la « an non a Papa-la, an non a Gason-la é an non a lèspri sen ». Men ka sa vlé di ?

⁹ Si ou désidé pran lèbatèm, sé osi paskè ou ka kwè adan sa ou aprann an Bib-la. Pran tan réfléchi asi sa Jézi di lè i mandé-nou fè disip (li Matyé 28:19, 20). I èspliké kè toutmoun ki ka pran lèbatèm dwètèt fè-y « an non a Papa-la, an non a Gason-la é an non a lèspri sen ». Men ka sa vlé di ? Fò ou kwè a san pou san adan sé vérité-la ki an Bib-la anrapò  èvè Jéova, anrapò èvè Jézi é anrapò èvè lèspri sen. Sé vérité-lasa ni onlo fòs é yo pé touché tchè a-w onlo toubònman (Ébr. 4:12). An-nou wouvin asi déotwa adan yo.

10-11. Ou dékouvè onlo vérité anrapò èvè Papa-la é ou ka kwè adan yo. Ki vérité ésa ?

¹⁰ Sonjé sa ou rèsanti lè ou dékouvè sé vérité-lasa asi Papa-la : ‘non a-y sé Jéova’, sé li ki « Pli Ho la asi tout latè » é sé li tousèl ki sé « vré Dyé-la » (Sòm 83:18 ; Iz. 37:16). Sé-y ki kréyé-nou é sé li ki ké ‘sové-nou’ (Sòm 3:8 ; 36:9). I pran dispozisyon pou woté-nou anba jouk a péché-la é anba jouk a lanmò é sé grasa-y nou ni lèspwa dè viv pou touttan (Jan 17:3). Lè ou ké ba Jéova vi a-w é kè ou ké pran lèbatèm ou ké montré kè ou sé on Témwen a Jéova (Iz. 43:10-12). A moman-lasa ou ké rantré adan on gran fanmi é adan fanmi-lasa ni plen moun ka adoré Jéova toupatou si latè. Sé moun-lasa fyèw dè pòté non a-y é yo fyèw dè fè dòt moun konnèt non-lasa (Sòm 86:12).

¹¹ Nou ka rivé konprann sa Labib ka anségné anlè Papa-la, é sé on gran lonnè toubònman ! Si ou ka kwè adan sé bèl vérité-lasa, ou ké anvi ba Jéova vi a-w é pran lèbatèm.

12-13. Ou dékouvè onlo vérité anrapò èvè Gason-la é ou ka kwè adan yo. Ki vérité ésa ?

¹² Sonjé jan ou réyaji lè ou dékouvè sèwten vérité asi Gason-la. Pa ègzanp, ou aprann kè Jézi sé dézyèm moun ki pli enpòwtan adan linivè é kè i aksèpté bay vi a-y pou nou konm ranson. Nou aprann osi kè si aksyon an nou ka montré kè nou ni fwa an ranson-la, Jéova ké padonné péché an nou, nou ké pé vin bon bon zanmi èvè-y é nou ké ni lavi pou touttan (Jan 3:16). Jézi sé Gran prèt an nou. I vé édé-nou bénéfisyé dè ranson-la é vin bon zanmi èvè Bondyé (Ébr. 4:15 ; 7:24, 25). Konm sé Jézi ki Wa a wayòm a Bondyé, Jéova ké sèvi èvè-y pou fè non a-y vin sen é pou fè laméchansté disparèt. I ké sèvi èvè-y osi pou vidé onpakèt bénédisyon asi limanité adan paradi-la ki ka vin la. É sé bénédisyon-lasa pé’é jen fin (Mat. 6:9, 10 ; Rév. 11:15). Sé Jézi nou ka imité (1 Pyè 2:21). É sa ki té pi enpòwtan pou-y an vi a-y, sé té fè volonté a Bondyé. I lésé on bèl ègzanp ban-nou an domenn-lasa (Jan 4:34).

¹³ Si ou ka aksèpté sa Labib ka anségné asi Jézi, gason-la Jéova enmé onlo la, sa ké ba-w anvi enmé-y. Si ou enmé Jézi, ou ké fè volonté a Jéova pasé avan tout biten, kon Jézi fè. Alò, ou ké anvi ba Jéova vi a-w é pran lèbatèm.

14-15. Ou dékouvè onlo vérité anrapò èvè lèspri sen a Bondyé é ou ka kwè adan yo. Ki vérité ésa ?

¹⁴ Ou dékouvè onlo vérité asi lèspri sen a Bondyé osi. Sonjé ka sa fè-w lè ou dékouvè sé vérité-lasa. Pa ègzanp, ou aprann kè lèspri sen a pa on moun, men kè sé fòs a Bondyé lèwvwè i ka sèvi èvè-y. Jéova sèvi èvè lèspri a-y pou dirijé sé nonm-la ki maké Bib-la. É sé lèspri-lasa osi ki ka édé-nou konprann Labib é apliké sa nou ka li (Jan 14:26 ; 2 Pyè 1:21). Èvè lèspri sen a-y, Jéova ka ban-nou « puisans-la ki ka dépasé sa ki nòwmal » (2 Kor. 4:7). Lèspri sen ka ban-nou fòs pou préché bon nouvèl-la, pou nou lité lè nou douvan on tantasyon, pou nou pa lésé ayen dékourajé-nou twòp é pou nou andiré lè nou ka jwenn éprèv. I ka édé-nou travay sé bèl kalité-la ki adan « fwi a lèspri » la (Gal. 5:22). Jéova pa chich lèwvwè i ka ban-nou lèspri sen a-y  si nou sensè lè nou ka mandé-y li é si nou ni konfyans adan-y (Lik 11:13).

¹⁵ Adoratè a Jéova sav kè yo pé konté asi lèspri sen a Jéova pou yo pé sa sèvi-y. Sa ka ankourajé-yo toubònman ! Si ou ka kwè adan sé vérité-la ou dékouvè la asi lèspri sen a Bondyé ou ké anvi ba Jéova vi a-w é pran lèbatèm.

16. Ka nou ja vwè adan awtik-lasa ?

¹⁶ Si ou désidé ba Jéova vi a-w é pran lèbatèm, a pa on biten pou ou pran alaléjè. Kon nou sòti vwè, fò ou paré a fè sakrifis. Men pa rété gadé sa ! Pas pou kantité bénédisyon ou ké risivwè ou pé’é menm sonjé sé sakrifis-la ou fè la. Si ou pran lèbatèm sa pé sové-w, é ou ké pé sèvi Bondyé èvè on konsyans ki nèt. Prèmyé biten ki dwètèt pousé-w a pran lèbatèm sé lanmou a-w pou Jéova. Anplisdisa, fò ou kwè a san pou san adan sé vérité-la ou dékouvè asi Papa-la, asi Gason-la é asi lèspri sen. Alò, apré tousa nou sòti ègzaminé la, ka ou té ké réponn a kèsyon-lasa : « Ès an paré pou pran lèbatèm ? »

17. Ki biten on moun dwèt fè avan i pran lèbatèm ?

¹⁷ Si ou ka santi kè ou paré pou pran lèbatèm, sé pas ou dwèt ja fè bon tibwen éfò pou-w té vin bon bon zanmi èvè Jéova c. Pa ègzanp, konm ou ni labitid étidyé Labib ou aprann onlo biten asi Jéova é Jézi. É konnyéla, ou ni fwa an Bondyé (Ébr. 11:6). Anplisdisa, ou ni konfyans a san pou san adan sé pwomès-la Bondyé ka fè-nou la adan Pawòl a-y Labib. É konm ou ni fwa adan sakrifis a Jézi, ou sèten ou ké sòti anba jouk a péché-la é anba jouk a lanmò. Ou rèpanti-w, kivédi ou ka règrété vréman tout sé érè-la ou fè la é ou mandé Jéova padon. Ou ‘chanjé vi a-w’ bout pou bout : ou lagé tout vyé mès ou té ni avan é ou koumansé viv on mannyè ki ka fè Jéova plézi (Akt 3:19). Anplisdisa, ou enmé palé dè fwa a-w alantou a-w. Ou fè sa ki fo pou vin on pwoklamatè ki po’o batizé é ou koumansé préché èvè lasanblé lokal a-w (Mat. 24:14). Jéova fyèw dè-w ! I kontan toubònman pas ou fè sa ki té nésésè pou rivé la ou yé la. Ou ka fè-y plézi (Pwov. 27:11).

18. Ki dòt biten on moun dwèt fè avan i pran lèbatèm ?

¹⁸ Avan ou pran lèbatèm, ou ni dòt biten a fè ankò. Kon nou vwè pli ho, fò ou ba Bondyé vi a-w. Adan on priyè ki ka sòti an fon a tchè a-w é kè ou ka fè lè ou tousèl a-w, pwomèt-li kè sa ou ké mété prèmyé douvan an vi a-w, sé volonté a-y (1 Pyè 4:2). Aprésa, di koòwdinatè a komité a sé ansyen-la kè ou anvi pran lèbatèm. I ké mandé déotwa ansyen fè on ti kozé èvè-w. Men, ou pa bizwen pè. Sonjé  kè sé frè-la janti, yo konnèt-vou é yo ja enmé-w. Adan étid a-w ou aprann sèwten ansègnman dè baz é sé dè sa yo ké palé èvè-w. Yo ka fè sa pou vérifyé kè ou byen konprann sé ansègnman-lasa é kè ou byen konprann kè lè ou ka ba Jéova vi a-w é lè ou ka pran lèbatèm sa enpòwtan toubònman. Si yo ka vwè kè ou paré, yo ké di-w kè ou pé pran lèbatèm pannan pwochen lasanblé-la.

19-20. Ka ou dwètèt fè apré ou pran lèbatèm, é kijan ou pé rivé fè sa ?

¹⁹ Apré ou pran lèbatèm, ka ou dwètèt fè d ? Toujou sonjé kè lè ou ‘ba Jéova vi a-w’ sé on pwomès ou fè-y. I vé kè ou tchenn a mo a-w. Apré batèm a-w, fò ou viv annakò èvè pwomès-la ou fè la. Kijan ou ké rivé fè sa ?

²⁰ Fò ou vin bon bon zanmi èvè frè é sè a lasanblé a-w. Konnyéla kè ou batizé, ou rantré adan on gran fanmi ki plen frè é sè adan-y (1 Pyè 2:17). Frè é sè a lasanblé a-w, ka touvé-yo kon fanmi a-w. Fò ou pran labitid ay réinyon pas sa ké édé-w vin pibon zanmi èvè frè é sè a-w. Fò ou li é fò ou pran tan réfléchi asi Pawòl a Bondyé touléjou (Sòm 1:1, 2). Apré ou li déotwa vèwsé an Bib-la, fò ou pran on moman pou réfléchi asi sé lidé-la ou sòti li la. Konsa, yo ké rantré an fon a tchè a-w. ‘Priyé toutlè’ (Mat. 26:41). Fò ou priyé Jéova èvè tout tchè a-w, konsa, ou ké vin pibon zanmi èvè-y. Fò ou ‘kontinyé chèché Wayòm-la an prèmyé’, é pousa, toujou mété prédikasyon-la prèmyé douvan an vi a-w (Mat. 6:33). Si ou pran labitid préché, fwa a-w ké rété fò é pétèt ou ké édé dòt moun angajé-yo asi chimen-la ki ké menné-yo a lavi étèwnèl (1 Tim. 4:16).

21. Ki bénédisyon batèm a-w pé pwokiré-w ?

²¹ Pa ni pi gran désizyon ou pé pran ki ba Jéova vi a-w é pran lèbatèm. Sé vré kè sa ka mandé onlo. Men ès sa vo lapenn ? Pa ni pon dout asi sa ! Tout éprèv kè ou pé jwenn adan vyé sistèm-lasa sé ‘pou on tan é sé biten ki pa’a pézé’ (2 Kor. 4:17). Grasa batèm a-w, vi a-w ké pi bèl dépi konnyéla é ou ké pé pwofité dè « vré vi-la » plita (1 Tim. 6:19). Alò souplé, pran tan réfléchi asi kèsyon-lasa : « Ès an paré pou pran lèbatèm ? ». É siwtou, pa oubliyé priyé Jéova anrapò èvè sa.