1. Ki pwoblèm sèwvitè a Jéova pé rivé a jwenn ?

ÈS OU ka jwenn on éprèv ki ka malmenné-w ? Pétèt kè sé on moun an lasanblé-la ki fè-w on kras (Jak 3:2). Oben pétèt kolèg-travay a-w oben kanmarad-lékòl a-w ka fè jé èvè tèt a-w pas ou Témwen a Jéova (1 Pyè 4:3, 4). Oben pétèt kè fanmi a-w bizwen anpéché-w ay réinyon oben an prédikasyon (Mat. 10:35, 36). Si ou ka jwenn on éprèv ki rèd toubònman, pétèt kè sa ka ba-w anvi lagé Jéova. Kèlkèswa éprèv-la kè ou ka jwenn la, ou pé sèten kè Jéova ké ba-w sajès-la ou bizwen la pou pran bon désizyon. É anplisdisa, i ké ba-w fòs-la ou bizwen la pou andiré.

2. Dapré Women 15:4, sa nou ka li an Bib-la pé édé-nou. An ki sans ?

² Jéova mèt déotwa ègzanp an Bib-la pou montré kijan moun ki enpawfè pé andiré lè yo ka jwenn éprèv. Sé ègzanp-lasa itil pou nou toubònman pas yo la pou enstwi-nou. Dayè pou yonn, sé sa Jéova fè lapòt Pòl maké (li Women 15:4). Lè nou ka li sé istwa-lasa, sa pé konsolé-nou é sa pé ban-nou on bèl èspwa. Men a pa enki li pou nou li-yo ! Fò-nou fè plis ki sa. Fò-nou lésé sa nou ka li aji asi mantalité an nou é touché tchè an nou. Pa ègzanp, ka nou pé fè si nou bizwen on konsèy pou rézoud on pwoblèm nou ka jwenn ? Nou pé fè sé 4 biten-lasa * : 1) Priyé, 2) Fè imajinasyon an nou travay, 3) Pran tan réfléchi, é 4) Mèt sa nou aprann an pratik. Nou ké vwè kijan pou nou fè sé 4 biten-lasa. É aprésa, nou ké sèvi èvè métòd-lasa pou ègzaminé sèwten biten ki rivé wa David é lapòt Pòl.

3. Avan ou koumansé li Bib a-w ka pou ou fè, é poukwa ?

 ³ 1) Priyé. Avan ou koumansé li Bib a-w, mandé Jéova édé-w vwè kijan sa ou ké li la ké itil ba-w. Pa ègzanp, si ou ka chèché konsèy pou rézoud on pwoblèm ou ka jwenn, mandé Jéova gidé-w pou ou pé sa touvé déotwa prensip ki ké édé-w (Filip. 4:6, 7 ; Jak 1:5).

4. Lè ou ka li on istwa adan Bib-la, kijan pou ou fè imajinasyon a-w travay ?

⁴ 2) Fè imajinasyon a-w travay. Jéova ban-nou on sèwvèl ki ka pèwmèt-nou fè imajinasyon an nou travay. Sa èstraòwdinè toubònman ! Lè ou ka li istwa a on moun an Bib-la, mété-w an plas a-y é imajiné kijan sa ka pasé. Éséyé vwè sa i té ka vwè é éséyé rèsanti sa i té ka rèsanti.

5. ‘Pran tan réfléchi asi sa ou ka li’, ka sa vé di é ka ki pé édé-w fè sa ?

⁵ 3) Pran tan réfléchi. Lè on moun ka pran tan réfléchi asi sa i ka li, i ka chèché a vwè kijan sa i ka li la pé itil ba-y. Lè i ka rézonné asi on sijé, i ka lyanné sa i té ja konnèt asi sijé-lasa é sa i sòti aprann. Konsa, i ka rivé konprann sijé-la pibyen. Lè ou ka li Labib é kè ou pa’a pran tan réfléchi asi sa ou ka li sé konsi ou ka achté on lanmwa, ou ka mèt tout sé pyès-la atè-la é kè ou pa jen ka monté-y. Pawkont, si ou monté tout sé pyès-la ansanm, ou ké ni on bèl ti lanmwa é ou ké pé sèvi èvè-y. Sa ka édé-nou konprann kè sé yenki lè ou ka pran tan réfléchi asi sa ou li kè sa vréman itil pou-w. Imajiné kè ou ka li istwa a on moun an Bib-la. Pou édé-w réfléchi asi sa ou ka li, mi déotwa kèsyon ou pé pozé-w : « Ka moun-lasa fè pou rézoud pwoblèm a-y ? Kijan Jéova édé-y ? Ka istwa-lasa ka aprann-mwen ? É kijan sa pé édé-mwen lè an ka jwenn éprèv ? »

6. Poukwa fò-nou mèt sa nou ka aprann an pratik ?

⁶ 4) Mèt sa ou aprann an pratik. Jézi di kè si nou pa’a mèt sa nou ka aprann an pratik, sé konsi nou ka konstwi kaz an nou anlè sab-la. Nou ka travay rèd men sa pa’a sèvi ayen, sé tan an nou nou ka pèd. Poukwa ? Pas si ni on tanpèt oben dlo monté nou pa ni kaz ankò (Mat. 7:24-27). Menmjan-la, si nou ka priyé, si nou ka fè imajinasyon an nou travay, é si nou ka pran tan réfléchi asi sa nou ka aprann men kè nou pa’a mèt sa nou aprann an pratik, sé tan an nou nou ka pèd. Kifè, lè nou ké jwenn difikilté oben lè yo ké pèwsékité-nou, fwa an nou pé’é asé solid é nou pé’é tchenbé. Men lè nou ka étidyé é kè nou ka mèt sa nou ka aprann an pratik, nou ka pran pibon désizyon, lèspri an nou ka pi trankil é fwa an nou ka vin pi solid (Iz. 48:17, 18). Konnyéla, an-nou palé dè on biten ki rivé wa David. Pou ègzaminé sa ki pasé, nou ké sèvi èvè sé 4 biten-la nou sòti vwè la.

7. Konnyéla, dè kimoun nou kay palé adan awtik-la ?

⁷ Ès on zanmi a-w oben on moun an fanmi a-w fè-w on biten ki fè-w mal ? Si sé ka a-w, ègzanp a wa David pé itil pou-w. Sa té’é byen kè nou ègzaminé kijan i réyaji lè gason a-y, Absalon, trayi-y é lè i chèché a pran wayòm-la an men a-y (2 Sam. 15:5-14, 31 ; 18:6-14).

8. Ka ou pé fè pou Jéova édé-w ?

⁸ 1) Priyé. Sonjé istwa-la ou k’ay étidyé la, é toupannan ou ka priyé Jéova di-y tousa ou ka rèsanti akòz dè sa yo fè-w la (Sòm 6:6-9). Lè ou ka palé ba Jéova, pa kaché-y ayen. Di-y tout  biten-la. Aprésa, mandé Jéova édé-w touvé déotwa prensip ki ké édé-w vwè kijan pou ou réyaji parapòt a sitiyasyon-lasa.

9. Rakonté-nou ki pwoblèm ki té ni ant David é Absalon.

⁹ 2) Fè imajinasyon a-w travay. Réfléchi tibwen asi istwa-lasa, é éséyé imajiné jan David té ka soufè. Dépi plizyè lanné, Absalon, gason a wa David ka pòté bon mannèv pou pèp-la enmé-y plis ki pap’a-y (2 Sam. 15:7). Lè Absalon santi kè moman-la rivé pou i pran wayòm-la an men a pap’a-y, i voyé déotwa èspyon toupatou an Izrayèl. I fè sa pas i té vé kè pèp-la soutyenn-li. I jous rivé pran tèt a Aitofèl pou i té pé sa ba David do alòskè Aitofèl sé té bon zig a David é i té abityé ba David konsèy. Absalon mété-y wa limenm a-y. Aprésa, i té bizwen pongné David pou i té pé sa tchouyé-y. É pétèt a épòk-lasa, David té malad bon malad la (Sòm 41:1-9). David vin aprann sa Absalon té ni lentansyon fè é i woté kò a-y Jérizalèm. Anfinaldikont, lawmé a Absalon vin goumé èvè lawmé a David. Lawmé a Absalon pèd konba é Absalon pèd vi a-y.

10. Kijan wa David té’é pé réyaji ?

¹⁰ Aprésa, mété-w an plas a David é éséyé imajiné tousa i dwèt rèsanti lè tout sé malè-lasa rivé-y. I té enmé Absalon é i té ka fè Aitofèl konfyans. Men yo toulédé, ba-y on koud pwagna an do. Yo fè tchè a-y sengné é yo jous éséyé tchouyé-y. Lè sa rivé David, i té’é pé di kè i pa’a fè ponmoun konfyans ankò, pas yotout yo èvè Absalon. Si sèl biten i té ka sonjé sé té sové vi a-y, i té’é pé chapé kò a-y tousèl a-y oben i té’é pé lésé sitiyasyon-lasa mèt moral a-y a zéro. Men a pa sa i fè. Olyé dè sa, i andiré difikilté-lasa. Kijan i fè sa ?

11. David touvé-y adan on sitiyasyon ki té difisil toubònman. Ka i fè ?

¹¹ 3) Pran tan réfléchi. Ki prensip nou ka touvé adan istwa-lasa ? An-nou éséyé réponn a kèsyon-lasa : « Ka David éséyé fè pou réglé pwoblèm a-y ? » David pa pèd lakat é i pa enki pran on désizyon présé-présé san réfléchi pannan tèt a-y té cho. David pa lésé lafrous pran lanmen asi-y pas sinon i pa té’é jen touvé ka pou i fè. Okontrè, i mandé Jéova édé-y. Anplis, i mandé zanmi a-y édé-y é i pa pèd tan pou i té fè sa i té désidé. Menmsi i té tris toubònman, i pa fè kòlè èvè ponmoun. I kontinyé fè Jéova konfyans é i kontinyé fè zanmi a-y konfyans osi.

12. Ka Jéova fè pou édé David ?

¹² Ka Jéova fè pou édé David ? Si ou chèché plis enfòwmasyon asi istwa-lasa, ou ké rann-vou kont kè Jéova ba David fòs-la i té bizwen la pou i té andiré éprèv-lasa (Sòm 3:1-8 ; sa ki maké antèt a sòm-la). Jéova béni sé désizyon-la David pran la. É Jéova ba zanmi a David fòs-la yo té bizwen la pou yo té pé sa pwotéjé wa a yo.

13. Kijan nou pé imité David lèwvwè on moun fè-nou on biten ki fè-nou mal ? (Matyé 18:15-17).

¹³ 4) Mèt sa ou aprann an pratik. Mandé-w : « Kijan an pé imité David ? » Pétèt kè adan sèwten sitiyasyon, fò ou ké aji vit pou rézoud on pwoblèm ou ka jwenn. Sèlon sitiyasyon-la, ou pé apliké konsèy-la Jézi ban-nou la an Matyé chapit 18. Pétèt kè ou ké fè ègzaktèman sa ki maké adan pasaj-lasa oben ou ké suiv sé lidé-la ki adan-y la (li Matyé 18:15-17). Men a pa lè tèt a-w cho pou ou pran on désizyon é fò pa ou  fè sa présé-présé nonplis. Fò ou priyé Jéova pou i trankilizé lèspri a-w é pou ou mandé-y sajès-la ou bizwen la pou ou réglé pwoblèm a-w. Pa jen arété fè zanmi a-w konfyans. Okontrè, lè yo anvi édé-w, aksèpté (Pwov. 17:17). É sa ki pi enpòwtan ankò, sé kè fò ou suiv sé konsèy-la Jéova ka ba-w an Bib-la (Pwov. 3:5, 6).

14. An ki sitiyasyon 2 Timoté 1:12-16, 4:6-11 é 17-22 pé ankourajé-w ?

¹⁴ Ès fanmi a-w ka mèt présyon asi-w pas ou ka sèvi Jéova ? Oben ès ou ka viv adan on péyi yo ka entèwdi aktivité an nou oben on koté Témwen a Jéova pé pa préché kon yo vé ? Si sé sa ou ka viv, 2 Timoté 1:12-16, 4:6-11 é 17-22 * pé ankourajé-w toubònman. Pòl maké sé vèwsé-lasa pannan i té lajòl.

15. Ka ou té’é pé mandé Jéova ?

¹⁵ 1) Priyé. Avan ou li sé vèwsé-lasa, palé Jéova dè sitiyasyon a-w é dè sa ou ka rèsanti. Fò ou di-y tout biten-la. Pa kaché-y ayen. Mandé Jéova édé-w touvé déotwa prensip adan istwa a Pòl ki ké édé-w sav ka pou ou fè pou andiré sitiyasyon-la ou ka viv la.

16. Ka ki rivé Pòl ?

¹⁶ 2) Fè imajinasyon a-w travay. Éséyé mété-w an plas a Pòl. I lajòl a Wòm. I ja fè déotwa koud lajòl men fwa-lasa i sav kè yo ké tchouyé-y. Déotwa zanmi a-y lagé-y é i pran on gwo koud krazé (2 Tim. 1:15).

17. Kijan Pòl té’é pé réyaji ?

¹⁷ Pòl té’é pé rété ka sonjé kè si i pa té’é vin krétyen tout sé malè-lasa pa té’é rivé-y. Yo pa té’é jen mété-y lajòl. Ni onlo frè ki té ka rété an Azi ki lagé-y é i té’é pé fè kòlè pou sa. Anplisdisa, i té’é pé arété fè zanmi a-y konfyans men a pa sa i fè. Poukwa i té sèten kè zanmi a-y pa té’é trayi-y é kè Jéova té’é rékonpansé-y ?

18. Ka Pòl fè adan sitiyasyon difisil la i jwenn la ?

¹⁸ 3) Pran tan réfléchi. Pozé-w kèsyon-lasa : « Ka Pòl fè pou i té jéré sitiyasyon-la ? » Magré Pòl té sav kè i pa té’é tadé a mò, i pa jen oubliyé kè fò i té kontinyé ba Jéova glwa pas sé sa ki té pi enpòwtan. Anplisdisa, i kontinyé chèché a vwè kijan i té’é pé édé lézòt. I toujou té ka konté asi Jéova é i té ka palé ba-y toutlè (2 Tim. 1:3). Pòl pa rété ka sonjé sé frè-la ki lagé-y la men i té ni onlo rèkonésans pou séla ki soutyenn-li la pas yo fè sa èvè onlo lanmou é yo édé-y. Anplisdisa, Pòl kontinyé étidyé Pawòl a Bondyé (2 Tim. 3:16, 17 ; 4:13). É on biten ki pi enpòwtan ankò sé kè i té sèten a san pou san kè Jéova é Jézi té enmé-y. Yo pa jen lagé-y é i té sav kè yo té’é rékonpansé-y pou tout éfò-la i té fè la.

19. Kijan Jéova édé Pòl ?

¹⁹ Jéova té di Pòl kè davwa i krétyen, yo té’é pèwsékité-y (Akt 21:11-13). Kijan Jéova édé Pòl ? I réponn a priyè a Pòl é piti-a-piti i ba-y fòs (2 Tim. 4:17). Jéova fè Pòl sav kè i té’é rékonpansé-y pou tout bèl travay-la i té fè la. I pousé bon zanmi a Pòl édé-y.

20. Women 8:38, 39 ka montré-nou kè Pòl té ni on fwa ki solid. Kijan nou pé imité-y ?

²⁰ 4) Mèt sa ou aprann an pratik. Pozé-w kèsyon-lasa : « Kijan an pé fè kon Pòl ? » Kon Pòl, yo ké pèwsékité-nou pas nou ka sèvi Jéova. Fò pa sa étoné-nou (Mawk 10:29, 30). Pou nou pé sa rété fidèl a Jéova lè nou ka jwenn éprèv, fò-nou pran labitid priyé-y é fò-nou pran labitid  étidyé Pawòl a-y. É fò pa nou jen oubliyé ba Jéova glwa pas sé sa ki pi enpòwtan. Nou pé sèten kè Jéova pé’é jen lagé-nou é pa ni ayen ki ké anpéché-y enmé-nou (li Women 8:38, 39 ; Ébr. 13:5, 6).

21. Ki ègzanp ki édé Aya é Hector rivé about a sèwten difikilté yo té ka jwenn ?

²¹ Sé ègzanp-la ki an Bib-la pé édé-nou ni fòs pou andiré nenpòt ki sitiyasyon. Aya, sé on pyonyé ki ka rété o Japon é i té pè fè prézantwa é préché an lari. I pran tan réfléchi asi istwa a Jonas é konnyéla, i pa pè ankò. Hector, sé on jenn ki ka viv an Endonézi é fanmi a-y pa Témwen a Jéova. Ègzanp a Rit ba-y fòs pou i té pé sa kontinyé aprann konnèt Jéova é sèvi-y.

22. Sèwten vidéo é sèwten awtik, ka palé dè sèwten moun ki an Bib-la. Kijan sa pé édé-w ?

²² Adan Labib yo ka palé-nou dè ègzanp a onlo moun ki jwenn difikilté é ègzanp a yo pé ban-nou onlo fòs. Ola nou pé touvé plis détay asi sé ègzanp-lasa ? Adan sèwten vidéo, adan sèwten anrèjistrèman kè nou pé kouté é adan on séri a awtik yo ka kriyé « Imitez leur foi », yo ka rakonté-nou istwa a sèwten moun ki an Bib-la tèlman byen kè nou ni lenprésyon kè nou té la lè sa fèt *. Avan ou gadé, avan ou kouté oben avan ou li sé istwa-lasa, mandé Jéova gidé-w pou ou touvé déotwa lidé enpòwtan kè ou ké pé mèt an pratik. Mété-w an plas a moun-la ki ka menné istwa-la. Pran tan réfléchi asi sa sèwvitè a Jéova fè é gadé kijan Jéova édé-yo rivé about a difikilté a yo. Aprésa, mèt sa ou aprann an pratik. Di Jéova mèsi pou tousa i ja ka fè pou-w. É pou montré-y rèkonésans a-w, éséyé vwè ka ou pé fè pou ankourajé frè é sè a-w é pou soutyenn-yo.

23. Sèlon Izayi 41:10, 13, ka Jéova ka pwomèt-nou ?

²³ Konm sé Satan ki ka gouvèné mond-lasa, délè, nou ka jwenn onlo pwoblèm é défwa, nou pa sav ka pou nou fè pou rézoud-yo (2 Tim. 3:1). Men nou pa bizwen pè é fò pa nou chaléré kò an nou : menmsi nou pliyé, nou pé’é kasé pas Jéova pwomèt-nou kè i ké tchenbé-nou fò èvè men dwat a-y (li Izayi 41:10, 13). Nou pé sèten kè Jéova ké édé-nou é kè Pawòl a-y kè ban-nou fòs-la nou bizwen la pou andiré nenpòt ki difikilté.