1-2. Kimoun ki pé édé on étidyan a Labib pwogrésé é pran lèbatèm ?

MI SA Amy, on sè ki ka viv o Fidji ka di : « Lè an té ka étidyé Labib, an té enmé sa an té ka aprann toubònman. An té sav kè sa an té ka aprann sé té lavérité. Men sé yenki lèwvwè an koumansé pasé tibwen tan èvè sé frè é sè-la kè an désidé fè chanjman an vi an mwen é pran lèbatèm. » Ègzanp a Amy ka montré-nou on biten ki enpòwtan : pou on étidyan pwogrésé é pran lèbatèm, fò moun a lasanblé-la édé-y.

² Chak pwoklamatè pé fè on biten pou édé sé étidyan-la touvé plas a yo adan lasanblé-la (Éféz. 4:16). Leilani sé on pyonyé ki ka viv o Vanuatu. Mi sa i ka di : « Ni on ti pwovèb ki ka di : nou bizwen tout on vilaj pou lévé on timoun. An ka pansé kè sé menm biten lèwvwè nou ka fè disip. An jénéral, sé tout lasanblé-la ki ka édé on moun vin a lavérité. » Anplisdisa, pou on timoun vin on nonm dèmen, fanmi a-y, zanmi a-y é pwofésè a-y ni on wòl a jouwé adan sa. Menmjan-la, sé frè é sè-la pé ba sé étidyan-la dé bon ti konsèy, pé ankourajé-yo é pé ba-yo on bèl ègzanp pou yo pé sa pwogrésé é pran lèbatèm (Pwov. 15:22).

3. Ana, David é Leilani di dé bèl ti biten. Ka sa ka aprann-nou ?

³ Lèwvwè on pwoklamatè ka kondui on étid, poukwa fò i kontan lè dòt moun an lasanblé-la ka édé étidyan-la ? Ana, sé on pyonyé èspésyal ki ka viv an Mòldavi. An-nou vwè ka i ka di : « On étidyan a Labib bizwen onlo èd pou i pé sa pwogrésé, é a pa moun-la ki ka fè étid èvè-y la tousèl ki ké pé édé-y. » David sé ondòt pyonyé èspésyal ki ka viv adan menm péyi ki Ana. Mi sa i ka èspliké : « Byensouvan, sé pwoklamatè-la ka di étidyan-la on biten ki ka touché tchè a-y, é lidé-lasa pa té’é jen vin an lèspri an mwen. » Lè sélézòt pwoklamatè-la ka édé étidyan an nou,  nou ka kontan pou ondòt rézon ankò. Mi sa Leilani ka di : « Lèwvwè sé frè é sè-la ka montré étidyan-la kè yo enmé-y é kè yo ka pran swen a-y, sa ka édé-y vwè kè nou sé pèp a Jéova vréman » (Jan 13:35).

4. Ka nou ké vwè adan awtik-lasa ?

⁴ Men nou té’é pé mandé-nou : « Ka mwenmenm an mwen pé fè pou édé on étidyan pwogrésé menmsi a pa mwen ki ka fè étid a-y ? » An-nou vwè ka nou pé fè lèwvwè nou k’ay adan on étid èvè on frè oben on sè, oben lèwvwè on étidyan ka koumansé vin lasal. Anplisdisa, nou ké vwè kijan sé ansyen-la pé édé sé étidyan-la pwogrésé é pran lèbatèm.

5. Lèwvwè on pwoklamatè ka menné-w fè on étid èvè-y, ka pou ou fè ?

⁵ Lèwvwè on frè oben on sè ka fè on étid, sé li an prèmyé ki dwètèt édé étidyan-la konprann Pawòl a Bondyé. Si i ka di-w vin èvè-y adan étid-la, ou la pou soutyenn-li (Ékl. 4:9, 10). Men ka ou pé fè pou édé moun-la ki ka kondui étid-la ?

6. An Pwovèb 20:18 nou ka touvé on bèl ti prensip. Kijan sa pé édé-nou lèwvwè on moun ka menné-nou fè on étid èvè-y ?

⁶ Lèwvwè on pwoklamatè ka menné-w fè on étid èvè-y, préparé-w. On prèmyé biten pou ou fè, sé mandé pwoklamatè-la palé-w dè étidyan-la (li Pwovèb 20:18). Pétèt ou pé mandé-y : « Dè ki biten zò ké palé pannan étid-la ? Ès ni on biten an pawtikilyé kè ou anvi kè étidyan-la konprann ? Ès ni on biten pou an pa di oben pou an pa fè pannan étid-la ? Ka an pé fè pou édé étidyan-la pwogrésé ? » Nou ka tou konprann kè pwoklamatè-la pé’é palé-nou dè tout vi a étidyan-la. Men i pé ban-nou déotwa enfòwmasyon ki ké itil pou édé étidyan-la. On misyonè non a-y sé Joy ka di-nou kè i abityé ba moun sé enfòwmasyon-lasa lè i ka menné-yo fè on étid èvè-y. Mi sa Joy ka di : « Lè an ka ba-yo sé enfòwmasyon-lasa, sa ka ba-yo anvi édé étidyan-la. É yo ka pé sav sa pou yo di pannan étid-la. »

7. Poukwa lèwvwè on pwoklamatè ka mandé-w vin fè on étid èvè-y, fò ou préparé-w ?

⁷ Si on pwoklamatè ka mandé-w vin fè on étid èvè-y, sa té’é byen si ou té ka préparé lèson-la zò ké ègzaminé la (Èzra 7:10). Mi sa David, frè-la nou palé dè-y talè-la ka di : « An ka kontan toubònman lèwvwè moun-la ki ka vin fè étid-la èvè mwen la ka préparé-y. Konsa, i ka pé fè dé bèl ti komantè ki pé vréman itil pou étidyan-la. » Anplisdisa, étidyan-la ké vwè kè zò toulédé byen préparé é sé ké on bèl ègzanp pou-y. Menmsi ou pa ni tan  préparé tout lèson-la, pran on ti tan pou gadé sé lidé enpòwtan la ki adan-y la.

8. Ka ou pé fè pou sa ou ka di adan priyè a-w touché étidyan-la ?

⁸ Lapriyè, sé on biten enpòwtan lè ou ka fè on étid. Alò, réfléchi alavans pou vwè sa ou ké di sianka yo ba-w fè lapriyè. A moman-lasa, priyè-la ou ké fè la ké touché tchè a étidyan-la (Sòm 141:2). Hanae, sé on sè ki ka viv o Japon. Ni on sè ki té ka vin èvè sè-la ki té ka fè étid a-y la, é jousalè, i ka sonjé sa sè-la té ka di adan priyè a-y. Mi sa Hanae ka di : « An konstaté kè i té bon zanmi èvè Jéova, é sa ban-mwen anvi vin bon zanmi èvè Jéova osi. Lè i té ka priyé, i toujou té ka nonmé non an mwen. Sa té ka touché-mwen pas an té ka santi kè i té vréman enmé-mwen. »

9. Dapré Jak 1:19, ka ou pé fè pou fè on travay éfikas lèwvwè yo ka menné-w fè on étid ?

⁹ Soutyenn moun-la ki ka fè étid-la. Omamuyovbi, sé on pyonyé èspésyal ki ka viv o Nijérya. Mi sa i ka di : « Lè ou ka menné on moun fè on étid èvè-w, pou i pé sa fè on travay ki éfikas, fò i kouté byen. Anplisdisa, i pé’é palé twòp pas i sav kè sé onsèl moun ki dwètèt menné étid-la. » Men kijan ou ka fè pou sav a ki moman pou ou palé é ka pou ou di ? (Pwov. 25:11). Lèwvwè pwoklamatè-la ki ka fè étid-la ka palé èvè étidyan-la, kouté byen ! (Li Jak 1:19). Konsa, ou ké sav a ki moman pou ou édé étidyan-la é a ki moman ou pé édé moun-la ki ka fè étid èvè-y la. Nou ka tou konprann kè fò-nou réfléchi avan nou palé. Nou pé’é mèt-nou ka palé kon rara a simenn sent é fè pwoklamatè-la pèd fil a-y alòskè i té ka èspliké étidyan-la on biten. Nou pé’é palé dè koko alòskè sé dè zabriko pwoklamatè-la ka palé. Men si ou di on ti biten tou senp, si ou pran on ègzanp oben si ou pozé on kèsyon, ou ké pé édé étidyan-la konprann on lidé pi fasilman. Défwa, ou pé konstaté kè pa ni granzafè a ajouté. Men si ou ka félisité étidyan-la é kè ou ka montré-y kè ou ka aprésyé-y, sa ké édé-y pwogrésé.

10. Si ou ka palé on étidyan dè sa ou ja viv, kijan sa pé édé-y ?

¹⁰ Fè étidyan-la pwofité dè sa ou ja viv. Si sa pé édé étidyan-la, ou pé èspliké-y kijan ou fè konnèt lavérité, kijan ou rivé about a on difikilté, é kijan ou vwè men a Jéova adan vi a-w (Sòm 78:4, 7). Pétèt kè sa ou ké di-y la sé ègzaktèman sa i té bizwen tann ! Pétèt kè sa ké fè fwa a-y vin pi solid é kè sa ké édé-y pwogrésé. É pétèt kè sa ké édé-y vwè kijan i pé rivé about a on pwoblèm kè i ka jwenn (1 Pyè 5:9). Gabriyèl sé on frè ki ka viv o Brézil. Aprézan, i pyonyé pèwmanan. I ka sonjé ka ki édé-y  pwogrésé lèwvwè i té ka étidyé Labib. Mi sa i ka di : « Lè sé frè-la rakonté-mwen sa yo ja viv, sa montré-mwen kè Jéova ka vwè tout difikilté nou ka jwenn. É sa montré-mwen kè si yo rivé about a sé pwoblèm-lasa, mwen osi, an pé rivé about a yo. »

11-12. Lè on étidyan ka vin lasal, poukwa fò-nou akéyi-y bra gran wouvè ?

¹¹ Pou on étidyan pwogrésé é pran lèbatèm, fò i pran labitid vin réinyon (Ébr. 10:24, 25). Pi souvan ki rarman, 1^é moun ki ka envité étidyan-la vin lasal sé moun-la ki ka fè étid a-y la. Men lè i ké vin an réinyon, noutout ké pé ankourajé-y pou i kontinyé vin. Kijan nou pé fè sa ?

¹² Fè étidyan-la santi kè ou kontan vwè-y (Wom. 15:7). Si nou ka akéyi étidyan-la byen lè i ka vin réinyon, sa ké ba-y anvi kontinyé vin. Fò nou di étidyan-la on bèl bonjou é fò nou fè-y fè konésans èvè sélézòt frè é sè-la. Men fò nou fè sa on mannyè pou i pa santi-y jenné. Lè ou ka vwè étidyan-la, pa mèt an tèt a-w kè pwoklamatè-la ki ka fè étid a-y la ja ka okipé dè-y. Pas pétèt kè pwoklamatè-lasa po’o rivé oben kè i okipé ka fè on travay an sal-la. Pran on tan pou kouté étidyan-la byen é fè on ti kozé èvè-y. Si nou akéyi étidyan-la bra gran wouvè, kijan sa pé édé-y ? An-nou vwè ègzanp a Dimitri, on frè ki pran lèbatèm ni kèlkè lanné dè sa é ki asistan konnyéla. Lè i ka sonjé 1^é fwa i vin lasal, mi sa i ka di : « On frè vwè-mwen ka atann douvan sal-la é i santi kè an té on tijan pè. Kifè, i vin owa mwen é i fè-mwen rantré. Onlo moun vin di’an bonjou é an pa té ka atann-mwen a sa. Tèlman an touvé sa bèl, an té anvi vin réinyon touléjou ! Sé 1^é fwa an té ka viv on biten konsa ! »

13. Kijan konpòwtèman a-w pé édé on étidyan ?

¹³ Ba étidyan-la on bèl ègzanp. Si nou ni on bon konduit, étidyan-la ké rann-li kont kè sé nou ki ka fè sa Jézikris mandé (Mat. 5:16). Vitalii, sé on pyonyé ki ka viv an Mòldavi. Mi sa i ka di : « Lè an té ka vin lasal, an té ka véyé tousa sé Témwen-la té ka fè. Sa pèwmèt-mwen vwè kijan yo té ka viv é an vwè ki mantalité é ki konpòwtèman yo té ni. Sé konsa an vin sèten kè Témwen a Jéova, sé pèp a Bondyé vréman. »

14. Kijan ègzanp a-w pé édé on moun kontinyé pwogrésé ?

¹⁴ Avan on étidyan pran lèbatèm, fò i mèt sa i ka aprann an pratik. Sa pa toujou fasil ! Men lè étidyan-la ka vwè kè ou ka apliké sé prensip-la ki an Bib-la é kè sa ka pòté bon biten pou-w, sa ka ba-y anvi fè  menm biten ki-w (1 Kor. 11:1). Talè-la nou palé dè Hanae, an-nou vwè sa i ka di : « Sa an té ka aprann an Bib-la, sé ègzaktèman sa an té ka vwè sé frè é sè-la ka fè. An aprann kijan an té pé ankourajé lézòt, é kijan mwen fè pou padonné-yo é montré-yo kè an enmé-yo. Lèwvwè yo té ka palé dè dòt moun, yo pa jen té ka malpalé-yo. Kifè, an té anvi aji kon yo. »

15. Dapré Pwovèb 27:17, poukwa fò nou vin zanmi èvè on étidyan ki ka vin lasal ?

¹⁵ Vin zanmi èvè étidyan-la. Chakfwa étidyan-la ka vin lasal, montré-y kè ou kontan vwè-y (Filip. 2:4). Ou pé fè on ti kozé èvè-y pou aprann konnèt-li pibyen. Ou pé félisité-y pou sé pwogré-la i ka fè la. Ou pé mandé-y kijan étid a-y ka pasé, ki nouvèl a fanmi a-y oben kijan sa ka pasé an travay a-y. Men ou pé’é mélé-w dè sa ki pa’a gadé-w. Si ou ka pran tan diskité èvè étidyan-la, ou ké vin zanmi èvè-y. Pi ou ké vin zanmi èvè-y é pi étidyan-la ké pwogrésé (li Pwovèb 27:17). Jòdijou, Hanae pyonyé pèwmanan. I ka sonjé lè i koumansé vin réinyon é mi sa i ka di : « Konm an vin ni enpé zanmi an lasanblé-la, a pa ti présé an té présé vwè jou a réinyon-la rivé ! Défwa an té las, men an té k’ay kanmenm. An té ka pasé onlo bon moman èvè sé zanmi-la an té ni la an lasanblé-la, kifè, sa édé-mwen arété frékanté zanmi ki pa té ka adoré Jéova. An té vlé vin pibon zanmi èvè Jéova é èvè sé frè é sè-la. Kifè, an désidé pran lèbatèm. »

16. Ki biten ou pé fè pou étidyan-la santi-y alèz a-y adan lasanblé-la ?

¹⁶ Lè étidyan-la ka kontinyé pwogrésé, fè-y santi kè i ni plas a-y adan lasanblé-la. Pa ègzanp, ou pé envité-y akaz a-w (Ébr. 13:2). Denis, on frè ki ka viv an Mòldavi, ka sonjé kijan yo té ka aji èvè-y lèwvwè i té ka étidyé Labib. Mi sa i ka di : « A plizyè rèpriz, sé frè-la envité mwen é madanm an mwen a pasé on ti moman èvè yo. Yo èspliké-nou kijan Jéova ja ni lokazyon édé-yo adan vi a yo. A pa ti ankourajé sa ankourajé-nou ! Grasa sé ti moman-lasa, nou rann-nou kont kè antoutjan fò-nou sèvi Jéova, é si nou ka fè sa, nou ké adoumanman. » Lè on étidyan ka vin pwoklamatè, ou pé pran randévou èvè-y pou zò préché ansanm. Mi sa Diego, on frè ki ka viv o Brézil ka di : « Onlo frè menné-mwen préché èvè yo. Sé konsa an vin konnèt-yo pibyen. Yo aprann-mwen onlo biten, é an vin pibon zanmi èvè Jéova é Jézi. »

17. Kijan sé ansyen-la pé édé sé étidyan-la ?

¹⁷ Pran on tan pou sé étidyan-la. Sé ansyen-la, montré sé étidyan-la kè zò ka  aprésyé-yo. Sa ké édé-yo pwogrésé ! Ès zò pé òwganizé-zòt pou palé èvè yo lè yo ka vin lasal ? Si zò ka sonjé non a yo lè yo ka bay on ti komantè, sèten sa ké touché-yo. Si ou sav kè ni on pwoklamatè ki ka fè on étid, ès ou té’é pé òwganizé-w pou ay adan étid-la èvè-y ? Ou pé pa imajiné kijan sa pé touché étidyan-la ! Jackie, sé on sè ki pyonyé é ki ka viv o Nijérya. Mi sa i ka di : « Lè sé étidyan-la ka vin sav kè frè-la ki èvè mwen la pou fè étid-la sé on ansyen, yo ka touvé-yo étoné. Mi sa on étidyan di : “Pastè an mwen pa té’é jen fè on biten konsa ! Li, sé yenki aka moun ki ni lajan i k’ay, é sé si ou ka péyé-y !” » Jòdijou, étidyan-lasa ka vin lasal.

18. Kijan sé ansyen-la pé apliké Akt 20:28 ?

¹⁸ Lè on pwoklamatè ni on étid, fòwmé-y é ankourajé-y. Sé ansyen-la, fò-zò édé sé pwoklamatè-la préché pibyen é anségné pibyen. Sé rèsponsabilité a zòt é fò-zò pran sa oséryé (li Akt 20:28). Si on moun on tijan pè kondui étid a-y pas zò la, zò pé pwopozé-y kondui étid-la a plas a-y. Nou palé dè Jackie tibwen pi ho. Mi sa i ka di : « Sé ansyen-la ni labitid mandé-mwen pou étidyan an mwen. É lè an ka fè on étid é kè an ka jwenn difikilté, yo ka ban-mwen dé bon ti konsèy. » Sé ansyen-la pé fè onlo biten pou ankourajé pwoklamatè ki ka kondui étid (1 Tés. 5:11). Mi sa Jackie ka ajouté : « An ka aprésyé lè sé ansyen-la ka ankourajé-mwen, é kè yo ka di-mwen kè yo ka aprésyé tout bèl travay-la an ka fè la. Sé pawòl-lasa ka fan’an dibyen, kon dlo byen frapé lè ou anba solèy cho la. Lè yo ka félisité-mwen konsa, an ka santi kè an ka fè on bèl travay èvè sé étidyan-la, é sa ka mèt onlo jwa an tchè an mwen » (Pwov. 25:25).

19. Ka ki pé mèt onlo jwa an tchè an noutout ?

¹⁹ Pétèt kè alèla nou pa’a kondui pon étid biblik. Men ni mwayen nou édé on étidyan pwogrésé é pran lèbatèm. Lè on moun ka menné-nou fè on étid, si nou préparé-nou byen, nou ké pé di on tibiten tou senp men nou pé’é palé twòp. Lè on étidyan ka vin lasal, fè tousa ou pé pou vin zanmi èvè-y. Konsa, afòs i pasé tan èvè-w, i ké anvi imité bèl ègzanp a-w. Sé ansyen-la pé ankourajé sé étidyan-la si yo ka òwganizé-yo pou pasé tibwen tan èvè yo. É lè on pwoklamatè ni on étid, yo pé ankourajé-y lè yo ka fòwmé-y é lè yo ka félisité-y. Lè on moun ka vin enmé Jéova é kè i ka pran lèbatèm, nou ka kontan toubònman lè nou jouwé on wòl adan sa, menmsi a pa granzafè nou fè.