Sèwten krétyen ka sèvi èvè tablèt, téléfòn oben òwdinatè pou kominiké èvè fanmi a yo oben èvè dòt Témwen. Men on krétyen ki bon zanmi èvè Jéova ké tchenn kont dè konsèy-lasa : « On moun ki ka fè atansyon ka vwè lè ni on danjé é i ka kaché-y, men on moun ki pa ni èkspéryans ka kontinyé ay dwèt é i ka péyé sa chè » (Pwov. 27:12).

Nou sav kè Jéova vé pwotéjé-nou. Kifè, nou pa’a frékanté moun ki vé mèt zizanni an lasanblé-la, ki èskominyé oben ki ka simé enpé mové lidé (Wom. 16:17 ; 1 Kor. 5:11 ; 2 Jan 10, 11). Ni sèwten Témwen ki ni on mové konduit (2 Tim. 2:20, 21). Alò, lè nou ka chwazi zanmi an nou, fò pa nou oubliyé sa. Sa pa fasil pou sav èvè kimoun ou annafè lè sé enki mésaj yonn ka voyé ba lòt.

Lè ou ka kominiké èvè onlo moun anmenmtan asi on gwoup, fò ou pran plis prékosyon ankò lè ou ka chwazi zanmi a-w. Ni sèwten krétyen ki rantré adan on gwoup ki té plen moun adan-y men sa pa pòté ayen dè bon ba yo. Défwa, adan sé gwoup-lasa ka ni plis ki 100 moun, é délè, jous ni 1000 moun. Ès ou ka di on pwoklamatè ki adan on gwoup konsa ké rivé fè atansyon ? Awa ! Pas pa ni mwayen konnèt tout sé moun-la byen é ou pé pa sav si yo ni on fwa ki solid. An Sòm 26:4, mi sa nou ka li : « An pa’a frékanté moun ki ka kouyonné moun é an ka ba moun ki ka kaché sa yo yé gran lè a yo. » Sa ka montré kè fò-nou voyé mésaj ba moun nou konnèt byen.

É menm lè pa ni onlo moun an gwoup-la, fò on krétyen fè atansyon a konmen tan i ka pasé ka voyé mésaj é fò i véyé èvè kimoun i ka palé. Fò pa nou mèt an tèt an nou kè nou oblijé réponn a tout mésaj kè nou ka rèsèvwa. Fò-nou gadé dè ki biten mésaj-la ka palé é fò-nou éséyé vwè konmen tan sa ké pran pou nou réponn a mésaj-lasa. Pòl avèti Timoté é i di-y kè fò i véyé-y èvè moun ki enmé « fè kankan é ki enmé mélé-yo dè sa ki pa’a gadé-yo » (1 Tim. 5:13). Jòdijou osi, si nou pa fè atansyon, nou pé mèt-nou ka fè kankan oben ka mélé-nou dè sa ki pa’a gadé-nou èvè òwdinatè an nou, tablèt an nou oben téléfòn an nou.

On krétyen ki bon zanmi èvè Jéova pé’é kritiké frè é sè a-y é si yo ka di bétiz asi yo, i pé’é kouté nonplis. Anplis, krétyen-lasa pé’é ba ponmoun pon enfòwmasyon kè i pa andwa di (Sòm 15:3 ; Pwov. 20:19). É si i pa sèten kè on enfòwmasyon vré, i pé’é répété-y é i pé’é kouté-y menmsi i ni lenprésyon kè sé dènyé fré-la yo ka pòté ba-y (Éféz. 4:25). Asi jw.org é asi JW Télédifizyon, yo ka ban-nou on bon nouriti ki bazé asi Labib é yo ka ban-nou onlo enfòwmasyon. Nou pé ni konfyans adan sé enfòwmasyon-lasa.

Ni sèwten Témwen ki ka voyé mésaj pou achté, pou vann, pou fè piblisité pou on pwodui oben pou pwopozé on moun on travay. Yo ka fè sa pas yo ni on entéré adan sa men a pa sa ki ké édé frè é sè a yo vin pibon zanmi èvè Jéova. Sé krétyen-la ki vé pa lésé « lanmou pou lajan » dirijé-yo pa’a vin zanmi èvè frè é sè a yo pou halé on lajan asi yo (Ébr. 13:5).

Ès nou ké voyé mésaj pou nou mandé moun lajan pas nou bizwen soutyenn frè é sè an nou ki maléré oben pas nou bizwen édé frè é sè an nou davwa ni on siklòn oben on tranmanntè ki fèt la yo ka rété la ? Nou enmé frè é sè an nou é nou ka sousyé-nou dè yo. Sé pousa, nou ni labitid soutyenn-yo é ankourajé-yo (Jak 2:15, 16). Men si nou ka voyé mésaj asi on gwoup pou nou pé sa édé-yo, pétèt kè filyal-la é lasanblé lokal la ké ni dimal a édé-yo byen konm i fo (1 Tim. 5:3, 4, 9, 10, 16). É nou vé pa ba ponmoun lenprésyon kè sé nou yo chwazi pou nou pé sa akonpli on misyon èspésyal pou édé frè é sè an nou.

Kèlkèswa sa nou ka fè, fò nou fè-y pou ba Bondyé glwa (1 Kor. 10:31). Alò, lè nou ké ka sèvi èvè tablèt an nou, téléfòn an nou oben òwdinatè an nou pou voyé mésaj, nou ké fè atansyon é nou ké réfléchi pou nou pa tonbé adan pon pyèj.