Sèwten moun ki li istwa-lasa pozé-yo kèsyon-lasa. Men adan istwa-lasa, yo ka palé dè 2 misyé ki ni menm non-la : Mèfibochèt. Si nou ka pran tan ègzaminé sa ki fèt, nou ké aprann on biten entérésan.

Sé Sayil ki té wa a Izrayèl é i té ni 7 gason é 2 fi. Prèmyé gason a-y sé té Jonatan é aprésa i vin ni ondòt gason é i kriyé-y Mèfibochèt. I fè gason-lasa èvè on madanm non a-y sé Rizpa. On biten ki entérésan osi sé kè Jonatan li a tou a-y vin ni on gason é i kriyé-y Mèfibochèt osi. Kifè, wa Sayil té ni on gason non a-y sé Mèfibochèt, é i té ni pitit a on gason a-y osi ki té ni menm non-la.

Wa Sayil koumansé hay sé Gabaonit-la, kifè, i éséyé tchouyé-yotout. I ka sanm sa i fè-yo tchouyé bon déotwa adan yo. A pa té on bon biten ! Poukwa nou ka di sa ? Pas an tan a Joziyé, sé chèf a Izrayèl la té fè on alyans èvè sé Gabaonit-la pou sé Izraélit-la é sé Gabaonit-la pa jen touvé-yo an lagè (Joz. 9:3-27).

Alyans-lasa té valab toujou lèwvwè Sayil té wa. Men i pa tchenn kont dè alyans-lasa é i té bizwen fin bat èvè tout sé Gabaonit-la. Sé pousa, Sayil é fanmi a-y té rèsponsab a mò a onlo moun (2 Sam. 21:1). Aprésa, sé David ki vin wa. É sé Gabaonit-la ki chapé anba men a Sayil vin vwè-y pou yo palé-y dè sa Sayil té fè la ki té grav toubònman. Alò David mandé-yo ka pou i té fè pou fè jistis pou yo, konsa, Jéova té’é woukoumansé béni péyi-la. Sé Gabaonit-la té pé mandé lajan, men a pa sa yo té vlé. Yo té préféré David ba-yo 7 désandan a Sayil pou yo té tchouyé-yo, pas yo té monté konplo pou yo té fin bat èvè tout sé Gabaonit-la (Nonb 35:30, 31). Alò, David aksèpté (2 Sam. 21:2-6).

Lèwvwè sé Gabaonit-la ay vwè David, Sayil é Jonatan té ja mò. Yo té pran mò a yo adan on lagè. Men gason a Jonatan, Mèfibochèt, té vivan toujou. I té fè on aksidan lè i té piti é akòz dè sa, i vin endikapé é lèwvwè gran-pap’a-y ataké sé Gabaonit-la i pa té ni ayen a vwè adan sa. Anplisdisa, David té fè on alyans èvè Jonatan pou yo té pé sa rété bon bon zanmi. Désandan a yo té ka bénéfisyé dè alyans-lasa osi, kifè, Mèfibochèt, gason a Jonatan, té ka pwofité dè sa osi (1 Sam. 18:1 ; 20:42). Mi sa Labib ka di : « Wa-la [kivédi David] aji épi konpasyon èvè Mèfibochèt, gason a Jonatan, pitit a gason a Sayil, pas David é Jonatan, gason a Sayil, té fè on alyans douvan Jéova pou yo rété bon bon zanmi » (2 Sam. 21:7).

Men poutan, David aksèpté sa sé Gabaonit-la té mandé-y. I ba sé Gabaonit-la 2 gason a Sayil é pawmi yo té ni Mèfibochèt é i ba-yo 5 piti-timoun a Sayil (2 Sam. 21:8, 9). Konsa, sa vanjé tout sé Gabaonit-la Sayil é fanmi a-y té tchouyé la.

Istwa-lasa ka aprann-nou on biten ki enpòwtan toubònman. Lwa a Bondyé té klè. Mi sa lwa-lasa té ka di : « Fò pa yo tchouyé on timoun akòz dè sa pap’a-y fè » (Dét. 24:16). Si 2 gason a Sayil é 5 piti-timoun a-y té inosan, Jéova pa té’é aksèpté kè yo tchouyé-yo. Mi sa lwa-la té ka di ankò : « Yo ké tchouyé on moun yenki pou péché-la i fè la ». Lè Sayil éséyé tchouyé tout sé Gabaonit-la, i ka sanm sa sé 7 désandan a-y lasa té ni on biten a vwè adan sa. Sé pousa, yo toulésèt péyé pou mové biten-la yo fè la.

Istwa-lasa ka montré-nou kè on moun ki fè on mové biten pé pa enn di kè i pa ni ayen a vwè adan sa pas i kontanté-y dè fè sa yo té mandé-y fè. Mi sa on pwovèb ki plen sajès ka di : « Fè chimen-la pyé a-w ka pran la vin plat, é pé’é ni pon danjé asi wout a-w » (Pwov. 4:24-27 ; Éféz. 5:15).