1. Jòb aprann konnèt Jéova pibyen. Bay on mannyè ki édé-y fè sa.

 ADAN vi a-y, Jòb fè onlo ti kozé èvè lézòt, men ni yonn ki dwèt rété fon fon fon an lèspri a-y : sé ti kozé-la i fè èvè Jéova la. Jéova fè-y réfléchi asi sèwten biten èstraòwdinè kè i kréyé, pou Jòb vin pli sèten ankò kè i sé on Bondyé ki ni plen sajès é pou fè-y sonjé kè i pé pran swen a sèwvitè a-y. Pa ègzanp, i fè-y vwè kè i té ka ba sé zannimo-la tousa yo té bizwen pou viv é i ba-y lagaranti kè i té’é pé okipé dè-y osi (Jòb 38:39-41 ; 39:1, 5, 13-16). Lèwvwè Jòb réfléchi asi lakréyasyon, i aprann onlo biten asi pèwsonalité a Bondyé a-y.

2. Délè, pou nou gadé sa Jéova kréyé, a pa on ti afè. Poukisa ?

² Nou osi, nou pé aprann konnèt Bondyé an nou pibyen lè nou ka pran tan ègzaminé sa i kréyé. Men pou nou rivé fè sa, sa pé rèd pou nou. Si nou ka viv an vil, pétèt kè nou pa tèlman ni lokazyon gadé sa Bondyé kréyé. É menmsi nou ka viv lakanpagn, pétèt kè nou pa ni onlo tan pou fè sa nonplis. Si nou ka fè éfò pou nou gadé sa Jéova kréyé é kè nou ka pran tan an nou pou nou fè sa, nou ké rann-nou kont kè sé on bon biten toubònman. An-nou vwè poukwa nou ka di sa. Nou ké vwè osi kè Jéova é Jézi ka sèvi èvè ègzanp ki adan lakréyasyon pou anségné-nou é nou ké ègzaminé sa pou nou fè pou nou pé sa pwofité plis ankò dè sa lakréyasyon pé aprann-nou.

3. Ka ki ka montré kè Jéova té anvi kè sa i kréyé la fè tchè a Adan kontan ?

³ Lèwvwè Jéova kréyé tousa ki té asi latè, i té anvi fè tchè a Adan, prèmyé moun-la i kréyé la, kontan. Alò i mété-y on bèl ti koté, adan on paradi, pou i té pé sa dékouvè onlo biten. I mandé-y travay tè-la é pran swen a-y pou tout tè-la vin on paradi piti-a-piti (Jén. 2:8, 9, 15). Ou ka imajiné jan Adan té kontan lè i té ka vwè sé grenn-la pété an tè-la é pousé é jan i té  kontan lè i té ka vwè sé flè-la wouvè ! I té pé pran swen a Jadendédèn-la. Mésyé mi on bèl lonnè mi ! Jéova té mandé-y osi ba sé zannimo-la on non (Jén. 2:19, 20). Jéova té’é pé fè travay-lasa limenm a-y, men i té préféré ba Adan fè sa. Men avan Adan té ba sé zannimo-la on non, fò i té pran tan gadé-yo byen. Sèten i dwèt pran tan gadé ki kalté zannimo ésa é kijan sé zannimo-la té ka aji. Lè i té ka fè sa, sa dwèt té ka fè-y plézi. Toupannan i té ka fè travay-la Jéova té ba-y fè la, i dwèt vwè jan Jéova ni sajès, jan sé biten-la i kréyé la entérésan é jan yo bèl.

4. a) Fò nou pran tan gadé sa Jéova kréyé. Poukwa nou ka di sa ? b) Palé dè on biten Jéova kréyé é kè ou ka touvé èstraòwdinè.

⁴ Fò nou pran tan gadé lakréyasyon pou ondòt rézon ankò : sé Jéova limenm ki ka mandé-nou fè sa. Mi sa i ka di : « Lévé zyé a zòt an syèl-la é gadé. » Aprésa mi kèsyon-lasa i ka pozé-nou : « Kimoun ki kréyé tousa ? » (Iz. 40:26). Nou pa bizwen réfléchi pou touvé répons-la. Jéova kréyé tousa ki an syèl-la, tousa ki asi tè-la é tousa ki an lanmè-la, é tout sé biten-lasa ka aprann-nou onlo biten asi-y (Sòm 104:24, 25). An-nou sonjé osi mannyè-la Jéova fè-nou la. Noutout nou enmé gadé bèl biten é lè nou ka vwè jan lanati bèl, nou ka touvé sa èstraòwdinè. I ban-nou kapasité pou nou vwè, pou nou tann, pou nou touché, pou nou gouté dé biten é pou nou santi sé diféran lodè-la. Grasa sé biten-lasa, nou pé aprésyé tout sé biten-la i kréyé la.

5. Dapré Women 1:20, poukwa sé on bon biten lè nou ka pran tan ègzaminé lakréyasyon ?

⁵ Nou ni ondòt rézon ankò pou ègzaminé sa Jéova kréyé é sé on rézon ki enpòwtan toubònman. Kilès ? Nou ka touvé-y an Women 1:20 (li-y). Lakréyasyon ka pèwmèt-nou vwè kalité a Jéova. Pa ègzanp, gadé sa Jéova kréyé, gadé kantité biten i fè. Tout sé biten-lasa èstraòwdinè menm ! Sa ka montré kè Jéova sé on Bondyé ki plen sajès toubònman. Jéova ka ban-nou diféran biten pou nou manjé. É lè nou ka pran tan réfléchi asi sa, sa ka montré-nou jan i enmé-nou. Lè nou ka pran tan gadé sa Jéova kréyé é kè nou ka vwè kijan dè moun i yé, nou ka aprann konnèt-li pibyen é a moman-lasa nou anvi vin pi bon zanmi èvè-y. Konnyéla, an-nou vwè jan Jéova ni lokazyon sèvi èvè kréyasyon a-y pou aprann-nou dé biten ki enpòwtan toubònman.

6. Ka ègzanp a sé zozyo-la ki ka vwayajé pou ay ondòt koté ka aprann-nou ?

⁶ Jéova toujou ka fè biten a-y a moman-la i prévwa la. Chak lanné, lèwvwè fen a mwa- d-févriyé té rivé jous a mi-mé, sé Izraélit-la té pé vwè sé sigògn-la ka volé an péyi-la. Sé zozyo-lasa té ka travèsé péyi-la pou ay o nò. Mi sa Jéova té èspliké sé Izraélit-la : « Sigògn-la ki an syèl-la sav a ki moman pou i vwayajé » (Jér. 8:7). É sé sa menm piskè sé Jéova ki chwazi a ki moman pou sigògn-la vwayajé. Menmjan-la osi, i ja prévwa a ki moman pou i fè jijman a-y. Alò lè nou ka réfléchi asi ègzanp a zozyo-lasa, nou pé sèten kè talè Jéova kay fè ansòt pou mond méchan lasa bout é i ké fè sa « a lè a-y » (Abak. 2:3).

7. Lè nou ka sonjé jan sèwten zozyo ka volé an syèl-la, ki garanti sa ka ban-nou ? (Izayi 40:31).

⁷ Jéova ka ba sèwvitè a-y fòs. Jéova pwomèt kè lèwvwè on sèwvitè a-y fèb oben lè i dékourajé, i ké ba-y fòs. É i sèvi èvè pwofèt Izayi pou di sa. Grasa fòs-la i té’é ba sèwvitè a-y, yo té’é kapab « volé ho an syèl-la konsi yo [té] ni zèl kon ta sé èg-la » (li Izayi 40:31). Sé Izraélit-la té ni labitid vwè jan sé èg-la ka monté an syèl-la é jan sé bèt-la pa ka fè éfò pou bat zèl a yo. Yo ka rivé fè sa pas lè ni on van cho ki ka monté an syèl-la, yo ka pwofité pou van-lasa voyé-yo monté pi ho an syèl-la. Sa ka fè-nou sonjé kè menmjan Jéova ka ba sé zozyo-lasa fòs, i pé ba sèwvitè a-y fòs osi ! Lè ou ka vwè on zozyo ka monté ho ho ho an syèl-la é kè i pa gè ka bat zèl a-y pou fè sa, sonjé kè Jéova kapab ba-w fòs pou édé-w sipòté sé pwoblèm-la ou ka jwenn la. Sé konsi i ka fè-w monté pi ho ki sé pwoblèm-lasa pou ou pé sa vwè-yo ondòt jan é pou ou pé sa rivé about a yo.

8. Jòb réfléchi asi sa Jéova kréyé. Poukwa sé té on bon biten pou-y é ka sa ka aprann-nou ?

⁸ Jéova sé on moun nou pé fè konfyans a san pou san. Jòb té ni konfyans an Jéova é Jéova édé-y fè-y konfyans plis ankò (Jòb 32:2 ; 40:6-8). Adan ti kozé-la Jéova fè èvè Jòb la, i fè Jòb réfléchi asi onlo bèl biten kè i kréyé, kon sé zétwal-la, sé niyaj-la é sé zéklè-la. Anplisdisa, i fè Jòb réfléchi osi asi sèwten zannimo, kon toro sovaj la é chouval-la (Jòb 38:32-35 ; 39:9, 19, 20). Tout sé biten-lasa fè Jòb vwè on mannyè ki klè jan Jéova ni puisans, jan i ni lanmou é jan i ni sajès adébòdé. Grasa ti kozé-lasa, Jòb vin ni konfyans an Jéova kon pa tini (Jòb 42:1-6). Menmjan-la, lèwvwè nou ka pran tan analizé sa Jéova kréyé, nou ka rann-nou kont kè Jéova lontan pi saj é lontan pi puisan ki nou. Kifè nou pé sèten kè Jéova pé fè tout sé éprèv-la nou ka jwenn la disparèt é kè i ké fè-y osi. Lè nou ka réfléchi asi sa, ès sa pa’a ban-nou anvi fè-y konfyans plis ankò ?

9-10. Ka solèy-la é lapli-la ka aprann-nou asi Jéova ?

⁹ Pa ni on biten Jézi pa té konnèt asi lanati, piskè lèwvwè Pap’a-y té ka kréyé linivè, i pawtisipé adan sa. Dayè, lèwvwè i té ka travay èvè Pap’a-y, i té « on zouti byen filé » (Pwov. 8:30). Aprésa, lèwvwè i vin asi latè, i sèvi èvè lakréyasyon pou fè disip a-y konnèt Pap’a-y. An-nou vwè déotwa biten i anségné.

¹⁰ Jéova ka montré kè i enmé toutmoun. Adan Sèwmon-la i fè anlè montangn-la, Jézi palé disip a-y dè 2 biten kè onlo moun pa menm ka pran tan sonjé : solèy-la é lapli-la. É poutan san sé biten-lasa, lavi pa té ké posib. Jéova té’é pé fè ansòt pou moun ki pa ka sèvi-y pa pwofité dè sé biten-lasa. Men tèlman Jéova janti, i ka lésé toutmoun pwofité dè solèy-la é dè lapli-la (Mat. 5:43-45). Jézi sèvi èvè sa pou aprann disip a-y kè Jéova vlé kè nou montré toutmoun kè nou enmé-yo. Chakfwa nou ka gadé solèy-la ka kouché é kè nou ka touvé sa bèl, oben chakfwa nou ka gadé lapli-la ka tonbé é kè nou ka santi kè sa ka rafréchi-nou, an-nou réfléchi asi jan Jéova ka montré kè i enmé toutmoun menmjan-la.  Nou osi, ègzanp a Jéova pé pousé-nou montré toutmoun kè nou enmé-yo, lèwvwè nou ka préché ba toutmoun.

11. Lè nou ka gadé sé zozyo-la, poukwa sa pé ankourajé-nou ?

¹¹ Jéova ka ban-nou sa nou bizwen pou viv. Adan Sèwmon-la i fè asi montangn-la, Jézi di osi : « Pran tan gadé sé mwano-la : yo pa ka simé, yo pa ka rékòlté é yo pa ka mèt dè koté ; magrésa, Pap’a zòt ki an syèl-la ka ba-yo manjé. » Pétèt kè sé moun-la ki té ka kouté Jézi la té pé vwè sé zozyo-la volé an syèl-la lèwvwè i mandé-yo : « Zò pa’a di zò ni plis valè ki yo ? » (Mat. 6:26). Èvè onlo lanmou, Jézi édé disip a-y vwè kè Jéova ké pran swen a yo (Mat. 6:31, 32). Ègzanp-lasa ki adan lanati ka aprann-nou on biten ki ka kontinyé ankourajé moun ki ka sèvi Jéova jòdijou é ki fidèl. On jenn sè ki pyonyé an Èspangn té dékourajé pas i pa té ka rivé touvé on kaz ki té ké bon pou-y. Men on jou, i mété-y ka gadé sé zozyo-la é lè i vwè jan yo té ka manjé sé ti grenn-la é sé ti fwi-la ki té atè-la, sa wouba-y fòs. Mi sa i ka èspliké : « Lè an vwè jan Jéova té ka pran swen a sé zozyo-lasa, sa fan’an sonjé kè Jéova té’é pran swen an mwen osi. » Tibwen tan apré, i touvé on kaz.

12. Ka Matyé 10:29-31 ka di asi sé zozyo-la, é ka sa ka aprann-nou asi Jéova ?

¹² Jéova ka ba-nouchak onlo valè. Avan Jézi té voyé sé apòt-la préché, i pran on ègzanp èvè yo pou montré-yo kè fò pa yo té pè siwvwè yo té ka jwenn moun ki té kont yo (li Matyé 10:29-31). I palé-yo dè mwano-la. Ou té ka touvé onpakèt a sé zozyo-lasa an Izrayèl. An tan a Jézi, zozyo-lasa près pa té ni valè. Poutan, i di disip a-y : « Ponyonn adan yo pa’a tonbé atè pou Pap’a zòt pa vwè sa. » Aprésa i di-yo osi : « Zò ni plis valè ki onlo ti mwano. » I di-yo sa pou montré-yo kè yochak té ni valè pou Jéova. Alò menmsi yo té ka jwenn pèwsékisyon, yo pa té bizwen pè. Aprésa, lèwvwè yo préché adan sé vil-la é adan sé vilaj-la, é lè yo vwè ti zozyo ka volé, sèten sé disip-la sonjé sa Jézi té di-yo. Lè ou ka vwè on ti zozyo, vou osi sonjé kè ou ni onlo valè pou Jéova, kè ou ni lontan « plis valè ki onlo ti mwano ». Si ou ka jwenn moun ki kont vou, sa ké ba-w fòs (Sòm 118:6).

13. Lakréyasyon pé aprann-nou onlo biten. Si nou vlé pwofité dè sa, ka pou nou fè ?

¹³ Nou pé aprann plis biten ankò asi Jéova grasa sa i kréyé. Kijan nou pé fè sa ? Prèmyèwman, fò nou pran tan gadé sa i kréyé. Dézyèmman, fò nou réfléchi asi sa lakréyasyon ka aprann-nou asi Jéova. Men pou fè sé biten-lasa, sa pa toujou fasil. Mi sa Géraldine, on sè ki ka rété o Kamwoun, konstaté : « An grandi an vil é pou an té pé sa pran tan gadé lanati, fò an té oblijé-mwen fè sa. » É mi sa on ansyen, non a-y sé Alfonso, ka èspliké : « An ka rann-mwen kont kè pou gadé sa Jéova kréyé é pou médité asi sa lakréyasyon ka anségné-mwen asi Jéova, fò an prévwa dé ti moman pou fè sa é fò an tousèl a sé moman-lasa. »

14. Ka David aprann lèwvwè i té ka médité asi sa Bondyé kréyé ?

 ¹⁴ David té ka pran on tan pou médité asi sa Bondyé kréyé. Mi sa i di Jéova : « Lè an ka vwè syèl a-w, tousa ou fè èvè men a-w, lalin-la é sé zétwal-la ou fè la, an ka mandé-mwen : “Ka lòm yé pou ou sonjé-y é ka pitit a lòm yé pou ou pé sa okipé dè-y ?” » (Sòm 8:3, 4). Lèswa, lèwvwè David té ka pran tan lévé tèt a-y pou gadé sé zétwal-la ki té an syèl-la, i té ka di kè sa té bèl toubònman men a pa sa tousèl i té ka sonjé. I té ka réfléchi asi sa sé zétwal-la té ka aprann-li asi Bondyé. Sé konsa i vwè jan Bondyé ni onlo puisans é onlo sajès. Dòt lè, i pran tan réfléchi asi jan kò a-y dévlopé lè i té an vant a manman-y. Lè i réfléchi asi sa, i rété èstèbèkwè. Sa édé-y vwè pibyen ankò jan Jéova ni sajès (Sòm 139:14-17).

15. Jéova kréyé onlo biten é sé biten-lasa ka fè-nou vwè kalité a-y. Bay on ègzanp ki ka montré sa (Sòm 148:7-10).

¹⁵ Kon David, pou médité asi on biten èstraòwdinè Jéova kréyé, ou pa bizwen ay lwen. Si ou gadé alantou a-w, ou ké vwè kè ni onlo biten ki pé édé-w konnèt Jéova pibyen. Pa ègzanp, lè ou ka santi solèy-la asi po a-w, ès sa pa’a fè-w sonjé puisans a Jéova ? (Jér. 31:35). Lè ou ka vwè on ti zozyo ka konstwi nich a-y, ès sa pa’a fè-w sonjé sajès a Jéova ? Lè ou ka vwè on tichyen ka éséyé mòdé ké a-y, sa ka fè-w ri é pétèt sa ka fè-w sonjé kè Jéova ni tchè-kontan. É lè ou ka vwè on manman ka jouwé èvè tibébé a-y, pétèt ou anvi di Jéova mèsi pas i enmé-nou. A pa tibwen biten ki pé aprann-nou konnèt Bondyé an nou ! An réyalité, tousa Jéova kréyé, ki sa gran, ki sa piti, ki sa toupré an nou, ki sa lwen an nou, ka ba-y louwanj (li Sòm 148:7-10).

16. Ka fò-nou byen désidé a fè ?

¹⁶ Bondyé an nou ni onlo sajès, i plen lanmou, i puisan toubònman é tousa i fè bèl menm. Si nou ka pran tan gadé lanati, nou ké pé aprann onlo biten asi sé bèl kalité-lasa é nou ké pé aprann onlo dòt biten ankò. Alò an-nou prévwa on moman pou nou gadé sa Jéova kréyé é pou nou réfléchi asi tousa sa ka aprann-nou asi Jéova, é an-nou pran labitid fè sa. Pli nou ké fè sa, pli nou ké vin bon bon zanmi èvè-y (Jak 4:8). Adan awtik-la ki ka vin la, nou ké vwè kijan sé paran-la pé sèvi èvè bèl biten Bondyé kréyé pou édé timoun a yo vin bon zanmi èvè Kréyatè a yo.