1-2. Si ou po’o paré pou pran lèbatèm, poukwa fò pa ou dékourajé-w ? (gadé imaj-la ki anlè po a jounal-la).

 SI OU ni lentansyon pran lèbatèm, sé on bèl òbjèktif ou ni la toubònman. Ès ou paré pou pran lèbatèm ? Si pou-w ou ja paré é sé ansyen-la ka pansé menm biten-la osi, dépi sa posib, pa ézité pran lèbatèm. Pas si ou fè sa, Jéova ké vidé onpakèt bénédisyon asi-w é ou ké ni tchè-kontan toubònman.

² Men siwvwè yo di-w kè fò ou pwogrésé ankò oben siwvwè voumenm ka rann-vou kont dè sa, ka pou-w fè ? Pa dékourajé-w. Ki ou jenn ki ou ja ni on bèl laj, ou pé pwogrésé é ou pé rivé atenn òbjèktif-lasa, pas sé on òbjèktif ki enpòwtan toubònman.

3. Ka on fonksyonnè ki té ka travay pou rèn a Létyopi mandé Filip, é ki kèsyon sa ka fè-nou pozé-nou ? (Akt 8:36, 38).

³ (Li Akt 8:36, 38.) Filip té ka préché bon nouvèl-la. Lèwgadé on jou, on fonksyonnè ki té ka travay pou rèn a Létyopi mandé-y : « Ka i ka anpéché-mwen pran lèbatèm ? » Misyé-la té anvi pran lèbatèm, men ès i té paré pou sa ?

4. Fonksyonnè étyopyen la té byen désidé a aprann plis biten asi Jéova. Ka ki ka montré sa ?

⁴ Fonksyonnè étyopyen la « té ay Jérizalèm pou adoré Bondyé » (Akt 8:27). I ka sanm sa i té aksèpté rèlijyon a sé Juif-la. Sèten i aprann konnèt Jéova lèwvwè i té ka étidyé Lézékriti ébrayik. Men i té vlé konnèt plis biten ankò. Dayè, lèwvwè Filip kontré-y an chimen, ka i té ka fè ? I té ka li woulo a pwofèt Izayi é i té ka éséyé konprann sa i té ka li (Akt 8:28). Sé biten-la i té ka li la pa té dé biten tousenp, men fò ou fouyé fon pou konprann sé vérité-lasa. I té ja konnèt sèwten biten tousenp men i pa té vlé kontanté-y dè sa. I té vé aprann plis biten.

5. Fonksyonnè-la ki té ka travay ba rèn a Létyopi té ka aprann onlo biten. Ès i té ka kontanté-y dè sa ?

 ⁵ Misyé-lasa, sé té « on misyé enpòwtan ki té ka travay pou Kandas, rèn a Létyopi. Sé-y ki té rèsponsab a tout trézò a rèn-la » (Akt 8:27). Sèten i dwèt té byen okipé é i té ni onlo rèsponsabilité. Men, apapousa i pa té ka touvé on tan pou adoré Jéova. A pa enki aprann i té ka aprann lavérité, men i té ka apliké sa i té ka aprann osi. Ou ka imajiné-w, misyé-la sòti an Étyopi pou ay adoré Jéova adan Tanp-la ki té Jérizalèm la. Sa dwèt mandé-y onlo tan pou fè on vwayaj long konsa ! É sa dwèt kouté-y chè ! Men konm sé té pou adoré Jéova, i pa rété gadé sa.

6-7. Étyopyen-la vin enmé Jéova pi fò. Kijan i rivé fè sa ?

⁶ Filip aprann fonksyonnè étyopyen la sèwten vérité enpòwtan é sé té dé biten ki té nouvo ba-y. Pa ègzanp, i di-y kimoun ki té Mési-la (Akt 8:34, 35). Lèwvwè Étyopyen-la vin aprann sa Jézi fè ba-y, sèten sa dwèt touché tchè a-y. Men kijan i té’é réyaji ? Sé té on étranjé ki té aksèpté rèlijyon juif la é yo té ka rèspèkté-y. Pétèt i té’é pé di kè i pé rété konsa. Men a pa sa i fè. Olyé dè sa, i vin enmé Jéova pi fò é i vin enmé Jézi tousuit. A moman-lasa, i pran on désizyon enpòwtan toubònman. Désizyon-lasa té ké chanjé vi a-y. I désidé pran lèbatèm é vin disip a Jézi. Konm Filip vwè kè i té paré pou pran lèbatèm, i batizé-y.

⁷ Si ou ka suiv ègzanp a Étyopyen-la, sa pé édé-w préparé-w pou pran lèbatèm, konsa vou osi ou ké pé di : « Ka i ka anpéché-mwen pran lèbatèm ? » é ou ké sèten dè-w. Fonksyonnè-lasa té anvi aprann plis biten é i té ka mèt sa i té ka aprann an pratik. I té ja enmé Jéova, men i té ka kontinyé fè dé biten pou enmé-y pi fò. An-nou vwè kijan ou pé imité-y.

8. Kijan ou pé mèt sa Jézi di an Jan 17:3 an pratik ?

⁸ (Li Jan 17:3.) Èskè sé sé pawòl-la Jézi di la ki ba-w anvi étidyé Labib ? Sé konsa sa pasé pou onlo adan nou. Men ès fò nou kontinyé aprann dòt biten ? Asirésèten. Nou ké viv pou touttan é nou pé’é jen fin ‘aprann konnèt sèl vré Dyé-la’ (Ékl. 3:11). Anplisdisa, pi nou ké aprann dé biten asi Jéova é pi nou ké enmé-y (Sòm 73:28).

9. Lèwvwè nou fin aprann sé ansègnman fondal la ki maké adan Bib-la, ka pou nou fè apré ?

⁹ Lè nou ka aprann konnèt Jéova, prèmyé biten nou ka aprann sé sé ansègnman fondal la ki an Bib-la. Adan lèt-la i maké ba sé Ébré-la, lapòt Pòl palé dè sé biten-lasa é i di kè sé té dé « biten tousenp ». I pa té ka di kè sé  « ansègnman dè baz » lasa pa té ni valè. Dayè, i konparé sé biten-lasa èvè lèt on ti bébé ka bwè (Ébr. 5:12 ; 6:1). Men i di sé krétyen-la osi kè fò yo aprann plis biten. I ankourajé-yo a aprann konnèt sé biten-la ki fon la ki adan Pawòl a Bondyé. Ès jòdijou ou anvi konnèt sé biten-lasa é ès ou anvi pwogrésé ? Ès ou anvi konnèt plis biten asi Jéova é asi pwojé a-y ?

10. An tèt a onlo moun, étidyé sé on biten ki difisil. Poukwa yo ka pansé sa ?

¹⁰ Pou onlo moun, étidyé a pa on biten ki fasil. É vou, ka ou ka pansé dè sa ? Lèwvwè ou té lékòl, ès ou aprann li é étidyé byen konm i fo ? Ès ou enmé étidyé ? Ès ou ka santi kè lè ou ka fè sa ou ka aprann onlo biten ? Oben anfinaldikont, ès ou ka di-w kè ou pa fèt pou sa ? Si sé sa ou ka pansé, a pa vou tousèl ki adan ka-lasa. Men Jéova pé édé-w. I pawfè é pa ni ponmoun ki ka anségné myé ki-y.

11. Poukwa nou pé di kè Jéova sé « Gran Pwofésè » an nou ?

¹¹ Jéova ka di kè i sé « Gran Pwofésè a-w » (Iz. 30:20, 21). Sé on pwofésè ki ni pasyans, ki janti é ki ka konprann-vou. Lè i ka gadé zélèv a-y, sa i ka chèché a vwè sé sa ki bon andidan a yo. I pé’é jen mandé-yo fè plis ki sa yo kapab fè (Sòm 130:3). On biten pou-w sonjé osi, sé kè sé-y ki fè sèwvo a-w é sé on bèl kado i ba-w la toubònman (Sòm 139:14). Si nou toujou anvi aprann dé biten, sé paskè sé-y ki mèt sa andidan an nou. I vé kè nou toujou kontinyé aprann dé biten é kè nou ni tchè-kontan lèwvwè nou ka fè sa. Sé pousa, dépi aprézan, sa té’é byen si ou té ka fè on travay asi-w pou ou toujou anvi dékouvè dé vérité ki adan Bib-la (1 Pyè 2:2). Chwazi sèwten òbjèktif, men pa pann chapo a-w two ho é pran labitid li Bib a-w é étidyé-y (Joz. 1:8). Èvè èd a Jéova, ou ké enmé li Labib é ou ké enmé étidyé-y dèplizanplis pas sé grasa sé biten-lasa ou ké aprann konnèt-li pibyen.

12. Poukwa sa enpòwtan kè nou pran tan étidyé vi a Jézi é ministè a-y onlo ?

¹² Pran on ti tan pou médité asi vi a Jézi é asi ministè a-y é pran labitid fè sa. Si nou vé sèvi Jéova, sa enpòwtan kè nou suiv Jézi alatras. É sé siwtou pannan péryòd difisil la nou ka viv la pou nou fè sa (1 Pyè 2:21). Jézi di disip a-y kè yo té’é jwenn difikilté (Lik 14:27, 28). Men i té sèten kè yo té’é rivé about a sé difikilté-lasa, menmjan i rivé gangné mond-la (Jan 16:33). Alò pran tan étidyé vi a Jézi, é lè ou ka étidyé, ay an nannan a sa ou ka étidyé la. Chwazi òbjèktif ki ké édé-w imité Jézi adan vi a-w touléjou.

13. Ka pou-w mandé Jéova akontinyé é poukwa ?

¹³ Lè on moun konnèt onlo biten sa pa ka sifi. Poukwa nou ka di sa ? Pas si konésans-la nou ni la pa ka édé-nou konnèt Jéova pibyen é si i pa ka édé-nou ni sèwten kalité kon enmé Jéova é ni fwa adan-y, i pa ni valè (1 Kor. 8:1-3). Toupannan ou ka chèché a konnèt plis biten, mandé Jéova ba-w plis fwa é fè sa akontinyé (Lik 17:5). Lè ou ka priyé Jéova konsa, i ka réponn-vou èvè plézi. Si ou ni on konésans ki ègzak asi Bondyé é kè ou ka bazé fwa a-w asi konésans-lasa, sa ké édé-w pwogrésé (Jak 2:26).

14. Kijan lapòt Pyè montré jan sa enpòwtan kè nou apliké sa nou ka aprann ? (gadé imaj-la osi).

¹⁴ Lapòt Pyè montré kijan sa enpòwtan kè on disip a Kris mèt sa i ka aprann an pratik. Pousa, i sèvi èvè ègzanp a Noé. Jéova té kay détwi sé méchan-la an tan a Noé, é i té kay sèvi èvè on délij pou fè sa. É i di Noé sa. Lèfètkè  Noé é fanmi a-y té okouran, sa pa té ka sifi pou yo té sové. Fè on ti réfléchi asi sa : lèwvwè Pyè palé dè péryòd-la ki té avan délij-la, i di kè sé té « pannan yo té ka fè lawch-la » (1 Pyè 3:20). Sa vlé di kè Noé é fanmi a-y aji annakò èvè sa Bondyé té di-yo. Yo konstwi on lawch, kivédi on manman bato (Ébr. 11:7). Aprésa, Pyè konparé travay-la Noé fè la èvè batèm-la. Mi sa i maké : « Batèm-la, ki ka korèsponn a sa, ka sové-zòt osi konnyéla » (1 Pyè 3:21). Pou Noé é fanmi a-y té konstwi lawch-la, sa pran onpakèt tan é sa mandé-yo onlo éfò. Menmjan-la, sa ka mandé éfò pou on moun pé sa préparé-y pou i pran lèbatèm. Alò, ka pou ou fè pou préparé-w pou pran lèbatèm ?

15. Ka ou pé fè pou montré kè ou rèpanti-w poudèbon ?

¹⁵ On prèmyé biten pou ou fè, sé rèpanti-w dè tout sé péché-la ou fè la èvè tout tchè a-w (Akt 2:37, 38). Si ou ka rèpanti-w poudèbon, sa ké édé-w chanjé konpòwtèman a-w bout pou bout. Ès ou arété fè tout mové biten Jéova hay ? Pa ègzanp, ès ou arété fè péché sèksyèl, fimé oben jiré moun é ès ou arété sèvi èvè mo sal lè ou ka palé ? (1 Kor. 6:9, 10 ; 2 Kor. 7:1 ; Éféz. 4:29). Si ou po’o arété fè sé biten-lasa, kontinyé fè éfò. Mandé moun-la ki ka étidyé Labib èvè-w la oben mandé sé ansyen-la ki adan lasanblé a-w la édé-w é ba-w konsèy. Si ou jenn, kè ou ka goumé èvè on mové labitid ki ka anpéché-w pran lèbatèm é kè ou ka rété aka fanmi a-w, pa pè mandé-yo édé-w.

16. Ki labitid pou ou pran si ou vé rété bon bon zanmi èvè Jéova ?

¹⁶ Sa enpòwtan osi kè ou fè tousa ou pé pou rété bon bon zanmi èvè Jéova. Pa ègzanp, fò ou pran labitid ay réinyon é bay dé ti komantè lè ou réinyon (Ébr. 10:24, 25). Lèwvwè tout biten ké bon pou ou pé sa vin pwoklamatè, pran labitid préché. Pi ou ké préché, pi ou ké enmé fè sa (2 Tim. 4:5). Si ou jenn é kè ou ka rété aka fanmi a-w, mi sa pou-w mandé-w : « Ès sé pas Pap’an mwen é manman-mwen dèyè do an mwen an k’ay réinyon oben an k’ay préché ? Oben ès an ka fè sa pas sé mwenmenm ki désidé sa ? » Lèwvwè sé voumenm ki ka chwazi fè sé biten-lasa, ou ka montré kè ou ni fwa adan Jéova, kè ou enmé-y é kè ou ni rèkonésans pou-y.  A moman-lasa, ou ‘ka aji on mannyè ki ka montré kè ou enmé Bondyé’ é sé konsi ou té ka ofè-y enpé kado (2 Pyè 3:11 ; Ébr. 13:15). É lèwvwè nou ka ofè-y on kado, alòskè ponmoun pa ka fòsé-nou fè sa, sa ka fè-y plézi (konparé èvè 2 Korentyen 9:7). Nou ka pran labitid fè sé biten-lasa, pas nou ka kontan lè nou ka ba Jéova sa nou ni dè méyè.

17-18. Ki kalité enpòwtan ki ké édé-w pwogrésé joustan ou pran lèbatèm, é poukwa nou ka di sa ? (Pwovèb 3:3-6).

¹⁷ Si ou ka fè éfò pou fè pwogré pas ou bizwen pran lèbatèm, pa mèt an tèt a-w kè ou pé’é jwenn pon difikilté. Pétèt kè ni sèwten moun ki ké fè jé èvè-w pas ou ka dékouvè dé nouvo biten é sé adan sa ou ka kwè alèla. Oben pétèt kè ni sa ki ké mèt baton an wou a-w oben ki ké kont vou (2 Tim. 3:12). Si ou ni on mové labitid é kè ou ka goumé èvè sa, sa pé rivé kè ou woutonbé adan sa ankò. Oben si ka rété-w onlo chimen a fè avan ou pran lèbatèm, ou pé touvé kè sa ka pran tibwen twòp tan oben sa pé rann-vou égri. Men ka ki ké édé-w andiré ? On biten ki enpòwtan toubònman : lanmou-la ou ni la pou Jéova.

¹⁸ Lanmou-la ou ni la pou Jéova, sé on bèl kalité é sé pi bèl kalité on moun pé ni (li Pwovèb 3:3-6). Lè ou enmé Jéova fò, sa pé édé-w tchenbé lèwvwè ou anba éprèv. Souvantfwa, Labib ka di kè Jéova ni on lanmou ki fidèl pou sèwvitè a-y. Konm Jéova ni lanmou-lasa, i pé’é jen lagé sèwvitè a-y é i pé’é jen arété enmé-yo (Sòm 100:5). Jéova fè-w pòtré a-y (Jén. 1:26). Kijan ou pé montré kè vou osi ou ni lanmou-lasa ?

19. Ka ou pé fè pou ou ni plis rèkonésans ankò pou tousa Jéova fè ba-w ? (Galat 2:20).

¹⁹ Montré kè ou ni rèkonésans (1 Tés. 5:18). Chakjou, pozé-w kèsyon-lasa : « Kijan Jéova montré-mwen kè i enmé-mwen ? » Aprésa, pa oubliyé di-y mèsi. Adan priyè a-w, palé dè biten byen prési kè i fè ba-w. Fò ou fè kon lapòt Pòl. Tousa Jéova ka fè pou montré-w kè i enmé-w, vwè sa kon dé ti kado i ka fè-w (li Galat 2:20). Pozé-w kèsyon-lasa : « Ès sa pa’a ban-mwen anvi montré-y kè an enmé-y osi ? » Lè ou ké touvé-w douvan tantasyon oben douvan difikilté, lanmou-la kè ou ni la pou Jéova ké édé-w tchenbé. Anplisdisa, sa ké édé-w pa pèd sé bon labitid-la ou ni la pou ou rété bon  bon zanmi èvè-y. Konsa, touléjou Bondyé fè jou ou ké montré Pap’a-w jan ou enmé-y.

20. Lè ou ka ba Jéova vi a-w, ka sa vé di é poukwa sé on désizyon ki enpòwtan ?

²⁰ On jou, tèlman ou ké enmé Jéova fò, ou ké priyé-y é ou ké ba-y vi a-w. Priyè-lasa sé ké on priyè èspésyal. Lè ou ka ba Jéova vi a-w, ou ka pwomèt-li kè ou ké kontinyé sèvi-y, ki biten-la bon ki biten-la pa bon. Men mi sa pou ou sonjé : dépi ou ba Jéova vi a-w, ou sé ta-y é sé pou touttan. Mésyé, mi on bèl lonnè mi ! Ou pé’é ni a woufè priyè-lasa ankò. Sé vré kè désizyon-lasa a pa on biten an kouyonnad. Sé on biten ki séryé. Men sonjé kè menmsi ou ni onlo désizyon a pran adan vi a-w, pa ni biten ki pi bèl ki lè ou ka ba Jéova vi a-w (Sòm 50:14). Satan ké pòté bon mannèv pou anpéché-w sèvi Jéova èvè tout tchè a-w, pas sa i vé sé kè ou pa rété fidèl a Jéova. Men pa lésé Satan pran lanmen asi-w ! (Jòb 27:5). Lè ou enmé Jéova fò é kè ou ka pwomèt-li kè ou ké sèvi-y pou touttan, sa ka ba-w anvi tchenn a mo a-w é sa ka ba-w anvi vin pi bon zanmi èvè-y.

21. Poukwa nou pé di kè lèwvwè on moun ka pran lèbatèm, sé koumansé i ka koumansé sèvi Jéova ?

²¹ Apré ou ba Jéova vi a-w, ay vwè sé ansyen-la ki adan lasanblé a-w la é di-yo kè ou anvi pran lèbatèm. Men on biten pou ou pa jen oubliyé, sé kè lè ou ka pran lèbatèm, sé koumansé ou ka koumansé sèvi Jéova. Ou kay pé sèvi-y pou touttan dépi konnyéla. Alò, fè ansòt pou enmé Jéova pi fò é chwazi òbjèktif ki ké édé-w enmé-y pi fò touléjou a vi a-w. Si ou fè sa, sa ké préparé-w pou pran lèbatèm. Jou-la ou ké pran batèm-la, sa ké bèl menm. Men sé koumansé vwayaj a-w ké koumansé èvè Jéova. Alò, fè tousa ou pé pou enmé Jéova é Jézi pi fò dépi konnyéla é pou touttan !