1-2. Souvantfwa, ka ki ka pasé lèwvwè on étidyan a Labib ka pran lèbatèm, é ka nou ké vwè adan awtik-lasa ?

 ÈS OU ja pran tan gadé on gwoupmoun ki kay pran lèbatèm ? On ti moman avan yo té pran lèbatèm, yo pozé-yo 2 kèsyon é pétèt kè lè yo réponn a sé 2 kèsyon-lasa ou santi jan yo té sèten dè yo. Fanmi a yo é zanmi a yo té fyèw dè yo toubònman. É lè yo sòti an dlo-la, yo té kontan toubònman, toutmoun té ka aplodi-yo. Chak simenn ni milyé é milyé moun apépré ki ka ba Jéova vi a yo é ki ka pran lèbatèm ; sé konsa yo ka vin Témwen a Jéova.

² É vou, ès ou ka vwè-w ka pran lèbatèm ? Si ou ni lidé fè sa nou pé di kè ou kon on ti limyè ki ka kléré adan nwèsè a mond-lasa, pas ou ka chèché Jéova (Sòm 14:1, 2). Ki ou jenn ki ou ja ni on bèl laj, awtik-lasa fèt pou-w. Men i fèt osi pou moun ki ja pran lèbatèm, piskè yo anvi sèvi Jéova èvè plis balan ankò. É a pa pou détwa jou yo vlé fè sa men sé pou touttan. Nou ni plizyè rézon pou nou pé sa adoré Jéova é adan awtik-lasa nou kay ègzaminé 3 adan yo.

3. Poukwa sèwvitè a Jéova enmé lavérité é lajistis ? (Sòm 119:128, 163).

³ Jéova mandé sèwvitè a-y enmé lavérité (Zak. 8:19). Jézi ba disip a-y on konsèy. I di-yo kouri dèyè do a sa ki jis (Mat. 5:6). Sa vlé di kè fò-nou vréman anvi fè sa Bondyé ka di ki byen é ki jis. Ès ou enmé lavérité é lajistis ? Asiré pa pétèt. Ou hay tout kalté manti é tout kalté mové biten (li Sòm 119:128, 163). An réyalité, lèwvwè on moun ka manti, i ka  imité Satan, chèf a mond-lasa (Jan 8:44 ; 12:31). On biten kè Satan vlé fè, sé sali non a Bondyé, é non a Bondyé sen. I ka fè Jéova pasé pou on dirijan ki ka sonjé enki li é ki malonnèt, ki pa’a ba lézimen sa ki bon pou yo (Jén. 3:1, 4, 5). Akòz dè tout sé manti-lasa, onlo moun ka pansé mové biten asi Bondyé. É ni sèwten moun ki chwazi ba lavérité do pas yo pa enmé lavérité. A moman-lasa, Satan pé fè-yo fè nenpòt ki mové biten (Wom. 1:25-31).

4. Kijan Jéova ka montré kè i sé « Dyé a vérité la » ? (gadé imaj-la osi).

⁴ Jéova sé « Dyé a vérité la ». Sé pousa, i ka fè moun ki enmé-y konnèt lavérité é i ka fè sa volontyé (Sòm 31:5). Konsa i ka édé-yo pou yo pa lésé Satan kouyonné-yo èvè manti a-y. Anplisdisa, Jéova ka aprann sèwvitè a-y ka pou yo fè pou yo pa dé moun ki malonnèt é pou yo sé dé moun ki jis. Sa ka édé-yo vwè kè yo ni plis valè ki sa yomenm té ka pansé é yo ka santi-yo anpé (Pwov. 13:5, 6). Ès Jéova fè menm biten pou-w lè ou té ka étidyé Labib ? A moman-lasa, ou konstaté kè suiv chimen-la Jéova ka ban-nou la sé méyè biten limanité pé fè é sé méyè biten kè voumenm a-w pé fè (Sòm 77:13). Sé pousa ou vlé fè sa Bondyé ka di ki byen é ki jis (Mat. 6:33). Ou vlé fè moun konnèt lavérité é ou vlé montré toutmoun kè sa Satan di asi Jéova sé manti. Men kijan ou pé fè sa ?

5. Kijan ou pé défann lavérité é lajistis ?

⁵ Ou pé chwazi viv on mannyè ki ka montré kè ou ka ba tout manti a Satan do é kè ou ka défann lavérité. É ou pé montré sa on mannyè ki klè. Ou pé montré Jéova kè sé-y ou vlé pou chèf é kè ou vlé fè sa i ka di ki bon. Men kijan ou pé fè sa ? Ében sé lèwvwè ou ka priyé Jéova pou ba-y vi a-w é kè ou ka pran lèbatèm. Lè ou enmé lavérité é lè ou enmé sa ki jis, a pa ti balan sa ka ba-w pou-w pran lèbatèm !

6. An Sòm 45:4 nou ka touvé déotwa bon rézon pou nou enmé Jézi. Kilès ?

⁶ Poukwa ou enmé Jézi ? Adan Sòm 45:4 nou ka touvé déotwa bon rézon pou nou enmé-y (li-y). Jézi enmé lavérité, limilité é sa ki jis. Si ou enmé lavérité é si ou enmé sa ki jis, sa toutafè nòwmal ké ou enmé Jézi osi. Sonjé jan i défann sa ki jis é sa ki vré èvè onlo kouraj (Jan 18:37). Men kijan i ka fè toutmoun sav kè limilité sé on kalité ki enpòwtan ?

7. Jézi ni imilité. Poukwa sa ka ba-w anvi vin zanmi èvè-y ?

 ⁷ Jézi ka montré jan limilité sé on kalité ki enpòwtan grasa bèl ègzanp-la i ka ban-nou la. Pa ègzanp, Jézi pa jan fè moun pòté-y anlè men i toujou ba Pap’a-y glwa (Mawk 10:17, 18 ; Jan 5:19). Lè ou ka sonjé jan Jézi ni imilité, ka ou ka rèsanti ? Sèten sa ka pousé-w enmé Gason a Bondyé é suiv-li osi. Si Jézi ni imilité konsa, sé pas i enmé Pap’a-y é sé pas i ka imité Pap’a-y ki plen imilité osi (Sòm 18:35 ; Ébr. 1:3). Jézi ka imité ègzanp a Pap’a-y on mannyè ki pawfè, alò ès sa pa’a ba-w anvi vin zanmi èvè-y ?

8. Poukwa nou kontan kè Jézi sé Wa an nou ?

⁸ Nou kontan Jézi sé Wa an nou pas ponmoun pé pa dirijé myé ki-y. Sé Jéova ki fòwmé-y é sé li osi ki chwazi-y pou gouvèné (Iz. 50:4, 5). Sonjé osi jan Jézi fè entéré an nou pasé avan ta-y pas i té enmé-nou (Jan 13:1). Konm sé-y ki Wa a-w, i mérité kè ou enmé-y èvè tout tchè a-w. Jézi èspliké kè moun ki enmé-y vréman, kivédi moun i ka kriyé zanmi a-y, ka montré-y kè yo enmé-y lèwvwè yo ka suiv komandman a-y (Jan 14:15 ; 15:14, 15). Mésyé, nou pé vin zanmi a Gason a Jéova ! Mi on bèl lonnè mi !

9. An ki sans batèm-la on krétyen ka pran la ka sanm batèm-la Jézi pran la ?

⁹ On biten Jézi mandé disip a-y fè, sé pran lèbatèm (Mat. 28:19, 20). É i ba-yo lègzanp adan domenn-lasa. Adan on sans, batèm-la Jézi pran la é batèm-la disip a-y ka pran la a pa menm biten-la (gadé ti karé-la «  Ki diférans ki ni antrè batèm-la Jézi pran la é batèm a sé disip-la ? »). Men adan ondòt sans, sé 2 batèm-lasa ka sanm. Lè Jézi pran lèbatèm sé konsi i di Pap’a-y kè i vin pou fè volonté a-y (Ébr. 10:7). Sé vré kè lè on krétyen ka pran lèbatèm, i ka montré toutmoun kè i ba Jéova vi a-y. Men menmjan ki Jézi, lè on krétyen ka pran lèbatèm i ka montré kè apawtiw dè moman-lasa, i kay sèvi èvè vi a-y pou fè volonté a Bondyé olyé i fè sa limenm anvi. Sa vlé di kè lè on krétyen ka pran lèbatèm, i ka suiv ègzanp a Mèt a-y.

10. Lèfètkè ou enmé Jézi sa pé ba-w anvi pran lèbatèm. Poukwa nou ka di sa ?

¹⁰ Ou sèten kè Jézi sé sèl Gason a Jéova é kè sé-y Jéova chwazi konm Wa pou dirijé-nou. Ou sav kè i ni imilité é kè i ka imité Pap’a-y on mannyè ki pawfè. Ou vin sav osi kè i ba onpakèt moun manjé, kè i konsolé moun ki té dékourajé é kè i jous géri moun ki té malad (Mat. 14:14-21). Voumenm konstaté kè jòdijou sé li ki ka dirijé lasanblé-la (Mat. 23:10). É ou sav kè talè i ké fè plis biten ankò pas sé-y ki Wa a wayòm a Bondyé. Alò kijan ou pé montré kè ou enmé Jézi ? Ou ké montré sa si ou ka suiv ègzanp a-y (Jan 14:21). Pou koumansé, on biten ou pé fè pou suiv Jézi, sé ba Jéova vi a-w é pran lèbatèm.

11. Ki prèmyé biten ki ka fè si on moun ka pran lèbatèm ?

¹¹ Ni plizyè rézon ki ka fè si on moun ka pran lèbatèm. Men kilès la ki pi enpòwtan la ? Jézi ni lokazyon palé dè pli gran komandman-la Bondyé bay la. Mi sa komandman-lasa ka di : « Fò ou enmé Jéova Bondyé a-w èvè tout tchè a-w, èvè tout nanm a-w, èvè tout entélijans a-w é èvè tout fòs a-w » (Mawk 12:30). Ès sé konsa ou enmé Bondyé ?

12. Poukwa ou enmé Jéova ? (gadé imaj-la osi).

¹² Ni tèlman biten ki ka fè kè nou enmé Jéova ! Pa ègzanp, jòdila ou sèten kè sé-y ki sé « sous a lavi » é kè sé-y ki ka ban-nou « tout bèl don é tout kado pawfè » (Sòm 36:9 ; Jak 1:17). Tout sé bon biten-la ou ni la ka vin dè Bondyé an nou ki donan é ki enmé-nou.

13. Poukwa ranson-la sé on bèl kado toubònman ?

 ¹³ Laranson sé on bèl kado Jéova fè-nou toubònman. Poukwa nou ka di sa ? An-nou pran on ti tan pou réfléchi asi sa. Jéova é Jézi kon bag é dwèt. Mi sa Jézi ni lokazyon di : « Papa-la enmé mwen » é « An enmé Papa-la » (Jan 10:17 ; 14:31). Yo viv konmen milya lanné ansanm é pli tan té ka pasé é pli yonn vin enmé lòt fò (Pwov. 8:22, 23, 30). Éséyé imajiné jan sa dwèt fè Jéova lapenn lè i vwè Gason a-y ka soufè é lè i mò. Tèlman Bondyé té enmé lèmond, i sakrifyé Gason chéri a-y pou vou é dòt moun pé sa viv si latè pou touttan. É i fè sa volontyé (Jan 3:16 ; Gal. 2:20). Mi on bon rézon nou ni pou enmé Bondyé mi ! Pa ni plibon rézon ki sa.

14. Ki pli bèl òbjèktif ou pé ni adan lavi ?

¹⁴ Pli ou aprann konnèt Jéova, pli ou vin enmé-y. É sèten ou anvi vin bon bon zanmi èvè-y dépi konnyéla é pou touttan. Ében sé on biten ki posib pas limenm ka ankourajé-w fè dé biten pou fè tchè a-y kontan (Pwov. 23:15, 16). Ou pé di dé biten ki ké fè tchè a Jéova kontan é ou pé fè dé biten ki ké fè tchè a-y kontan osi. Sé vré, sé mannyè ou ka viv ki ké montré kè ou enmé Jéova èvè tout tchè a-w (1 Jan 5:3). Pli bèl òbjèktif ou pé ni adan lavi, sé fè Jéova plézi.

15. Kijan ou pé montré kè ou enmé Jéova ?

 ¹⁵ Kijan ou pé montré kè ou enmé Jéova ? Prèmyé biten ou pé fè sé priyé Jéova, li ki sé sèl vré Dyé-la, pou di-y kè ou ka ba-y vi a-w. Priyè-lasa sé on priyè ki vréman èspésyal (Sòm 40:8). Aprésa fò ou ké pran lèbatèm pou fè toutmoun sav kè ou ba Jéova vi a-w. Kon nou vwè-y pli ho, jou-la ou ké pran lèbatèm, ou ké kontan toubònman. Ou ké sonjé dat-lasa tout vi a-w. A moman-lasa, ou pé’é viv pou voumenm ankò men sé pou Jéova ou ké viv (Wom. 14:8 ; 1 Pyè 4:1, 2). Nou ka tou konprann kè lè ou ka réfléchi asi sa, ou pé ni lenprésyon kè désizyon-lasa sé on désizyon ki enpòwtan toubònman. É sé sa menm. Men si ou ka pran désizyon-lasa, ou ké pé viv pli bèl vi ki tini.

16. Kon Sòm 41:12 ka montré, kijan Jéova ké rékonpansé moun ki ka itilizé vi a yo pou yo sèvi-y ?

¹⁶ Pa ni ponmoun ki pli donan ki Jéova. Ou pé ba-y tousa ou vlé, i toujou ké ba-w plis ki sa ou ba-y (Mawk 10:29, 30). Jéova ké ba-w pli bèl vi on moun pé ni. Ou pé’é jan ni on vi ki ké pli entérésan ki sila i ké ba-w la é ki ké pòté bon biten ba-w konsa. Ou ké pé pwofité dè sa menmsi ou adan mond méchan lasa toujou. É bon biten dèyè poko mannyé, sé koumansé sa ka koumansé. Wi, vi-lasa ka koumansé jou-la ou ka pran lèbatèm é i pé diré pou touttan. Ou enmé Pap’a-w ki an syèl-la é i enmé-w. Pli tan ké ka pasé é pli lanmou-lasa ké vin fò. É menmjan ki-y, ou ké pé viv pou touttan (li Sòm 41:12).

17. Ou pé ba Jéova on biten kè i pò’ò ni. Ki biten ésa ?

¹⁷ Lèwvwè ou ka ba Pap’a-w vi a-w é kè ou ka pran lèbatèm, ou ka ba-y on biten ki ni onlo valè toubònman. Sé on gran lonnè ou ni. Tout sé bèl biten-la ou ni la é tout sé bon moman-la ou ja viv la, sé Jéova ki ba-w sa. Alò pou montré jan ou kontan tousa i ba-w, sèvi-y èvè tout tchè a-w é montré-w fidèl. Lè ou ka fè sa, ou ka ba Jéova on biten kè i pò’ò ni, magré tousa ki an syèl-la é tousa ki asi latè sé ta-y (Jòb 1:8 ; 41:11 ; Pwov. 27:11). Pa ni pli bèl mannyè pou sèvi èvè vi a-w. Ou pé sèten kè pli bèl rézon ou ni pou ou pran lèbatèm sé lanmou a-w pou Jéova.

18. Ki kèsyon ou té’é pé pozé-w ?

¹⁸ Alò, ès ou ké pran lèbatèm ? Sé vou tousèl ki pé réponn a kèsyon-lasa. Men on biten ki pé édé-w réponn a kèsyon-lasa, sé si ou ka mandé-w : « Poukwa an ka atann ? » (Akt 8:36). Adan awtik-lasa, nou palé dè 3 rézon ki ka pousé on moun pran lèbatèm. Sonjé sé 3 rézon-lasa. Prèmyé-la, sé kè ou enmé lavérité é ou enmé sa ki jis. Dézyèm-la, sé kè ou enmé Jézi. É twazyèm-la, pli enpòwtan la, sé kè ou enmé Jéova. Alò mi sa pou-w mandé-w : « Ès an anvi vwè jou-la toutmoun ké di lavérité é jou-la toutmoun ké fè sa ki jis é sa ki byen ? Ès an vlé kè Gason a Bondyé vin Wa an mwen é ès an vlé suiv ègzanp a-y ? Ès an anvi sèvi Jéova pou fè tchè a-y kontan ? » Si ou réponn wi a sé kèsyon-lasa, ka ki ka anpéché-w pran lèbatèm dépi aprézan ? (Akt 16:33).

19. Poukwa fò pa ou ézité pou pran lèbatèm ? Bay on ègzanp (Jan 4:34).

¹⁹ Si ou anvi pran lèbatèm men kè anmenmditan ou an 2 lidé, pran on ti tan pou-w réfléchi asi on ègzanp Jézi pran (li Jan 4:34). I di konsa kè nouriti a-y sé fè volonté a Pap’a-y. Men poukwa i pran ègzanp-lasa ? Pas lè nou ka manjé, sa ka fè-nou dibyen. Jézi sav byen kè tousa Pap’a-y ka mandé-nou fè sé pou byen an nou. Jéova pa anvi kè nou fè ayen ki ké fè-nou ditò. Ès i vlé kè ou pran lèbatèm ? Wi (Akt 2:38). Alò ou pé sèten kè si ou ka kouté komandman-la ki ka di-w kè fò ou pran lèbatèm, sa ké fè-w dibyen toubònman. Si yo té ka ba-w manjé plibon manjé ki ti ni, ès ou té’é ézité pou pran manjé-lasa ? Awa. Alò, poukwa ou ka ézité pou-w pran lèbatèm ?

20. Ka nou ké vwè adan awtik-la ki ka vin la ?

²⁰ « Poukwa an ka atann ? » Lè ou ka réfléchi asi kèsyon-lasa pétèt kè kon onlo moun ou ka di-w : « An pò’ò paré ». Nou pé konprann sa, pas ba Jéova vi a-w é pran lèbatèm sé pli gwo désizyon kè ou ké ni a pran adan vi a-w. Alò sa toutafè nòwmal kè ou pran on ti tan pou réfléchi asi sa. Pou ou paré pou ou pé sa pran lèbatèm, sa pa’a fèt onsèl kou konsa é sa ka mandé éfò. Men si ou anvi ba Jéova vi a-w é kè ou byen désidé a fè sa, ka ou pé fè pou-w pé sa préparé-w dépi jòdla ? Sé sa nou ké vwè adan awtik-la ki ka vin la.