1. Lè on moun ka vin lasal pou prèmyé fwa, ka i ka konstaté ? (gadé imaj-la osi).

 AN-NOU pran on ti tan pou imajiné sa : on misyé é madanm a-y ka vin réinyon an sal di Wayòm a Témwen a Jéova pou prèmyé fwa. Lè yo ka vwè jan sé frè é sè la ka akéyi-yo bra gran wouvè, é lè yo ka vwè jan yonn enmé lòt adan lasanblé-la, sa ka touché tchè a yo. Lèwvwè yo ka rantré akaz a yo, mi sa madanm-la ka di mari a-y : « Témwen a Jéova pa kon toutmoun. An té alèz an mwen èvè yo. »

2. Ka ki pé fè sèwten moun arété sèvi Jéova ?

² Lanmou-la ou ka vwè la adan lasanblé-la, sé on biten ki èstraòwdinè toubònman. Men Témwen a Jéova pa pawfè (1 Jan 1:8). Alò pi nou ké konnèt sé moun-la ki adan lasanblé an nou la, pi nou pé rivé a vwè défo a yo (Wom. 3:23). Malérèzman, lè sèwten moun ka vwè défo a lézòt, délè sa ka fè-yo arété sèvi Jéova.

3. Kijan yo té’é rèkonnèt kimoun ki sé disip a Jézi vréman ? (Jan 13:34, 35).

³ Awtik-lasa bazé asi on bèl ti vèwsé. An-nou jété on ti koudzyé asi vèwsé-lasa ankò (li Jan 13:34, 35). Ka ki ka pèwmèt-nou rèkonnèt kimoun ki disip a Jézi vréman ? Sé lanmou yonn ni pou lòt. Men Labib pa’a di kè yo té’é pawfè. Anplisdisa, nou ka konstaté kè Jézi pa di : « Sé konsa zò ké sav zò sé disip an mwen. » Men i di : « Sé konsa toutmoun ké sav zò sé disip an mwen. » Lèwvwè Jézi di sa, sé té pou montré kè yo té’é pé rèkonnèt kimoun ki vré disip a-y pas yonn té’é enmé lòt vréman é yo pa té’é atann ayen an rètou. É i té di osi kè a pa enki disip a-y tousèl ki té’é vwè sa, sélézòt moun-la té’é vwè sa osi.

4. Ki kèsyon sèwten moun té’é pé pozé-yo ?

 ⁴ Mi sa sèwten moun ki pa Témwen a Jéova té’é pé mandé-yo : « Yo ka di kè lanmou té’é pèwmèt-nou rèkonnèt kimoun ki sé disip a Jézi vréman. Men kijansa ? Kijan Jézi montré apòt a-y kè i té enmé-yo ? É kijan nou pé imité ègzanp a Jézi jòdijou ? » Menm nou ki ja Témwen a Jéova, fò nou osi nou réfléchi asi sé kèsyon-lasa. Sa ké édé-nou aji èvè lanmou plis ankò siwtou lè nou ka vwè défo a dòt moun (Éféz. 5:2).

5. Èspliké sa Jézi di adan Jan 15:12, 13.

⁵ Jézi èspliké on mannyè ki klè ki kalté lanmou disip a-y té’é ni. I di kè sé on lanmou nou pa té’é touvé pondòt koté (li Jan 15:12, 13). An-nou vwè ka i mandé-yo fè. I di-yo : « Fò yonn enmé lòt menmjan an enmé-zòt. » Ka i té vlé di pa la ? I èspliké apré kè fò on moun té enmé lézòt plis ki limenm a-y é kè lanmou-lasa té’é pé pousé on moun ki ka suiv Jézi bay vi a-y pou frè é sè a-y si sa nésésè b.

6. Kijan Pawòl a Bondyé ka montré-nou kè lanmou sé on kalité ki enpòwtan toubònman ?

⁶ Pawòl a Bondyé ka montré-nou kè lanmou sé on biten ki vréman enpòwtan. Mi déotwa vèwsé onlo moun enmé toubònman : « Bondyé sé lanmou » (1 Jan 4:8), « Fò ou enmé pwochen a-w kon voumenm » (Mat. 22:39), « Lanmou ka kouvè onpakèt péché » (1 Pyè 4:8) é « Lanmou pa ka jen disparèt » (1 Kor. 13:8). Lanmou sé on bèl kalité toubònman é sé vèwsé-lasa é dòt vèwsé ankò ka montré-nou kè sa enpòwtan kè nou montré lézòt kè nou enmé-yo.

7. Poukwa Satan pa annéta anségné moun kè fò yonn enmé lòt é kè fò-yo ini ?

⁷ Mi sa onlo moun ka mandé-yo : « Pawmi tout sé rèlijyon-la ki la la, kijan nou pé sav kilès la ki vré la ? Yotout ka di kè yo ka anségné lavérité é poutan, yo ka anségné dé  biten ki diféran asi Bondyé. » Satan mèt onpakèt fo-rèlijyon si pyé, kifè, sé moun-la pa sav ola pou yo alé. Men on biten i pa annéta fè menm, sé fè ansòt pou moun ki diféran koté asi latè rété ini é kè yonn enmé lòt. Sé enki Jéova ki pé fè on biten konsa. Nou sav sa paskè lanmou ka vin dè-y. Sé enki moun ki ni lèspri sen a Jéova é moun Jéova ka béni ki pé enmé-yo vréman (1 Jan 4:7). Sé pousa, sa pa ka étoné-nou si Jézi di sé enki disip a-y ki té’é montré kè yonn enmé lòt vréman.

8-9. Ni onlo moun ki konstaté jan Témwen a Jéova ka aji èvè lanmou yonn èvè lòt. Lè yo vwè sa, ka sa fè-yo ?

⁸ Kon Jézi té di, onlo moun ka rèkonnèt sé vré disip-la pas yonn ka montré kè i enmé lòt vréman. An-nou palé dè on frè non a-y sé Ian. On jou, i ay adan on lasanblé ki fèt adan on istad ki té koté kaz a-y é sé té prèmyé fwa i té k’ay adan on lasanblé. Jous alajouné jòdi, i ka sonjé sa. Kèlkè mwa avan, i té ay adan menm istad-lasa pou i té vwè on match. Mi sa i ka rakonté : « Sé moun-la ki té la la pou lasanblé-la pa té menm biten ki sé moun-la ki té la jou-la an té ay gadé match-la. Sé Témwen a Jéova la té byen abiyé, yo té janti èvè toutmoun é timoun a yo té ka tchenbé kò a yo byen menm. » Mi sa i ka ajouté : « Sa ki touché-mwen plis la menm, sé kè sé moun-lasa té ka sanm sa yo té ni tchè-kontan é kè yo té anpé. Sé ègzaktèman sa an té ka chèché. An pa’a sonjé pon diskou an tann jou-lasa men sa ki touché-mwen vréman sé lè an vwè jan sé Témwen-la té ka konpòwté-yo c. » Si Témwen a Jéova ka rivé aji konsa, sé enki pas yonn enmé lòt poudèbon. Nou janti èvè frè é sè an nou é nou ka rèspèkté-yo pas nou enmé-yo.

⁹ On frè non a-y sé John rèsanti menm biten ki Ian lèwvwè i koumansé vin an réinyon. Mi sa i ka di : « Yotout té janti é an té ni lenprésyon kè sé té dé moun ki té pawfè. Lè an vwè sa, an rété èstèbèkwè. Yonn té enmé lòt poudèbon é sa montré-mwen kè an té touvé vré rèlijyon-la d. » Sa sé frè-la di la é sa onlo dòt moun ka di ka montré kè Témwen a Jéova sé dé vré krétyen.

10. Fò-nou montré frè é sè an nou kè nou enmé-yo é fò-nou fè sa siwtou lèwvwè sèwten biten ka rivé. Ki biten ésa ? (gadé nòt-la osi).

¹⁰ Kon nou vwè an koumansman a awtik-lasa, pa ni pon frè ni pon sè ki pawfè adan lasanblé-la. Délè, yo ké di-nou dé biten oben yo ké fè-nou dé biten é sa ké fè-nou mal e (Jak 3:2). Lèwvwè sa ké rivé, jan-la nou ké réyaji la ké montré si nou enmé-yo vréman. Ka ègzanp a Jézi pé aprann-nou adan domenn-lasa ? (Jan 13:15).

11. Ki défo Jak é Jan montré kè yo té ni ? (gadé imaj-la osi).

¹¹ Jézi té sav byen kè disip a-y té enpawfè. Alò, i pa té ka mandé-yo aji kon moun ki pawfè. Lè i té ka vwè kè yo té ni défo, èvè onlo lanmou, i té ka édé-yo travay asi sa pou yo té fè chanjman pou fè Jéova plézi. On jou, 2 apòt a-y, Jak é Jan, mandé manman-yo ay vwè Jézi pou yo té pé sa ni on bèl plas adan Wayòm-la (Mat. 20:20, 21). Lèwvwè  yo fè sa, yo montré kè yo té ni òwgèy an tchè a yo é kè yo té ni on manni grandè (Pwov. 16:18).

12. Ès sé enki Jak é Jan ki té ni biten a chanjé adan pèwsonalité a yo ? Bay on ti èsplikasyon.

¹² Men lèwvwè sa rivé, a pa enki Jak é Jan ki montré kè yo té ni dé biten a chanjé adan pèwsonalité a yo. Gadé kijan sélézòt apòt-la réyaji : « Lèwvwè sélézòt-la, kivédi sé dis apòt-la, tann sa sé dé frè-la fè la, yo fè kòlè » (Mat. 20:24). Nou pé imajiné jan Jak, Jan é sélézòt apòt-la lévé cho jou-lasa. Pétèt mi sa sélézòt apòt-la di sé 2 frè-la : « Zò ka konprann zò pibon ki ponmoun ! Sé pousa zò mèt an tèt a zòt kè fò-zò ni on bèl plas an Wayòm-la. Men ka zò konprann ? A pa zòt tousèl ki travay rèd èvè Jézi ! Poukwa zò té’é ni on pibon plas ki nou ? » Jou-lasa, sé apòt-la oubliyé kè yotout té frè é kè fò yonn té enmé lòt.

13. Kijan Jézi réyaji lè i vwè défo a apòt a-y ? (Matyé 20:25-28).

¹³ Kijan Jézi réyaji ? I pa fè kòlè. I pa di kè i té kay chèché moun ki té’é pibon ki sé apòt-la. I pa di nonplis kè kou-lasa, i té kay chwazi moun ki té’é toujou aji épi lanmou yonn èvè lòt é kè yo té’é ni plis imilité ki sé apòt-la. Jézi té sav kè apòt a-y té anvi aji byen. Alò èvè pasyans, i fè-yo rézonné (li Matyé 20:25-28). I kontinyé aji èvè yo épi lanmou menmsi a pa té prèmyé fwa yo té ka babyé pou sav kilès adan yo ki té pli gran é  menmsi yo té’é woukoumansé fè sa ankò (Mawk 9:34 ; Lik 22:24).

14. Ki mantalité sé moun-la té ni koté-la sé apòt-la lévé la ?

¹⁴ Sèten Jézi té ka sonjé ki mantalité sé moun-la té ni koté-la sé apòt-la lévé la é i té ka tchenn kont dè sa (Jan 2:24, 25). Sé chèf a rèlijyon juif la té ka di kè siwvwè ou pa té ni on bèl plas, ou té on ti kakazwa (Mat. 23:6 ; gadé vidéo-la Les premiers sièges dans les synagogues, ki k’ay èvè nòt a Matyé 23:6 ki adan Bib-la ki fèt pou étidyé la an fransé). Yomenm té ka kwè kè yo té pibon ki ponmoun f (Lik 18:9-12). Alò Jézi té ka konprann kijan mantalité-lasa té pé aji asi mannyè sé apòt-la té ka vwè-yo yomenm a yo é asi mannyè yo té ka vwè lézòt (Pwov. 19:11). Men i pa té ka mèt an tèt a-y kè sé apòt-la pa té’é fè pon érè é lèwvwè yo té ka fè érè, i té ka pran pasyans èvè yo. I té sav kè sa yo té vé fè sé té dé bon biten. Alò, èvè onlo pasyans i té ka di-yo kè fò-yo té ni plis imilité é kè fò-yo té montré lézòt kè yo té enmé-yo olyé yo té chèché a vin pibon ki lézòt.

15. Lè nou ka vwè sa ki pasé ant Jak, Jan é sélézòt apòt-la, ka sa ka aprann-nou ?

¹⁵ Sa ki pasé ant Jak, Jan é sélézòt apòt-la pé aprann-nou onlo biten. Sé vré, lèwvwè Jak é Jan mandé on bèl plas adan Wayòm-la yo té ni tò. Men sélézòt apòt-la té ni tò osi pas yo pa fè pon éfò pou yo té rété soudé. Jézi kanta li té janti é i té enmé sé 12 apòt-la. Ka sa ka aprann-nou ? Sa ki pi enpòwtan, a pa sa lézòt ka fè-nou, men sé jan-la nou ka réyaji la lèwvwè yo ka fè on érè oben lèwvwè nou ka vwè défo a yo. Men ka ki pé édé-nou pou nou pé sa réyaji byen konm i fo ? Lèwvwè on frè oben on sè ka fè on biten ki ka fè-nou mal, mi sa pou nou mandé-nou : « Poukwa sa frè-la oben sa sè-la fè la ka malpasé-mwen konsa ? Èskè sa vé di kè an ni on biten a travay adan pèwsonalité an mwen ? Èskè frè-la oben sè-la fè sa pas alèla i ka jwenn difikilté ? Menmsi an kòlè é pou mwen an adan rézon an mwen, ès an pa té’é pé montré moun-lasa kè an enmé-y é ès an pa té’é pé pasé asi sa ? » Pi nou ké aji épi lanmou èvè lézòt é pi nou ké montré kè nou sé disip a Jézi vréman.

16. Kidòt biten ègzanp a Jézi pé aprann-nou ?

¹⁶ Ègzanp a Jézi ka aprann-nou ondòt biten ankò. Sa ka montré-nou kè fò-nou éséyé konprann frè é sè an nou (Pwov. 20:5). Sé vré, Jézi té pé li adan tchè a moun alòskè nou, nou pé pa fè sa. Men nou pé montré kè nou ni pasyans èvè frè é sè an nou lèwvwè yo ka fè dé biten ki ka égri-nou (Éféz. 4:1, 2 ; 1 Pyè 3:8). Nou ké rivé fè sa pi fasilman siwvwè nou ka aprann konnèt-yo. An-nou vwè on ègzanp.

17. Ki bon biten sa pòté lèwvwè on rèsponsab a siwkonskripsyon aprann konnèt on frè pibyen ?

¹⁷ On rèsponsab a siwkonskripsyon ka sonjé on frè ki té adan on lasanblé i té ka vizité an Afrik dè Lès. Odépa, rèsponsab a siwkonskripsyon la té ka touvé kè frè-la pa té janti. Men ka i fè ? Mi sa i ka di : « An té’é pé pran ondòt chimen lè an té ka vwè frè-lasa ka rivé men a pa sa an fè. An désidé kè an té’é aprann konnèt-li. » Lè rèsponsab a siwkonskripsyon la pasé tibwen tan èvè frè-la, i aprann jan sa té ka pasé an fanmi a frè-la lè i  té piti é kijan sa i viv la té ka aji asi mannyè i té ka konpòwté-y èvè lézòt. Mi sa rèsponsab a siwkonskripsyon la ka di ankò : « Pou frè-lasa té fè sé chanjman-la i té anvi fè la pou i té antann-li byen èvè lézòt, a pa ti goumé i goumé. Lè an vin sav sa, sa touché-mwen. Épi lè an vin sav jan i té ja pwogrésé adan domenn-lasa, an vin ni onlo rèspé pou-y. Nou vin bon zanmi. » Alò kon ègzanp-lasa ka montré-nou, lèwvwè nou ka éséyé konprann frè é sè an nou, pi souvan ki rarman, nou ka rivé montré-yo pi fasilman kè nou enmé-yo.

18. Si on frè oben on sè fè-nou on biten ki ka fè-nou soufè, ki kèsyon pou nou pozé-nou ? (Pwovèb 26:20).

¹⁸ Si on frè oben on sè fè-nou on biten ki ka fè-nou soufè, pétèt kè nou ké anvi ay palé ba-y. Men avan nou fè sa, mi déotwa kèsyon pou nou pozé-nou : « Ès an ni tout sé détay-la anrapò èvè sa ki pasé ? » (Pwov. 18:13), « Ès moun-la ki fè-mwen lapenn la fè sa pa èspré ? » (Ékl. 7:20), « Ès sa po’o jen rivé-mwen dè fè on biten konsa ? » (Ékl. 7:21, 22) é « Lè an ké ay palé èvè frè an mwen oben sè an mwen, ès sa pé’é fè plis déga ? » (li Pwovèb 26:20). Si nou ka pran tan réfléchi asi sé kèsyon-lasa, pétèt kè nou ké fin pa di-nou kè konm nou enmé frè an nou oben sè an nou, vométan nou pasé asi sa.

19. Ka ou byen désidé a fè ?

¹⁹ Lè nou ka gadé tout Témwen a Jéova ki asi latè, nou ka vwè kè yonn enmé lòt poudèbon é sa ka montré kè yo sé vré disip a Jézi. Men nouchak ni on wòl a jouwé adan sa. Fò-nouchak montré frè é sè an nou kè nou enmé-yo poudèbon magré yo enpawfè. Lè sé moun-la ki alantou an nou la ké vwè jan nou ka konpòwté-nou, sa ké pèwmèt-yo rèkonnèt vré rèlijyon-la é yo ké vin jwenn-nou pou adoré Jéova, Bondyé an nou ki plen lanmou. Fò-nou byen désidé a kontinyé montré kè nou ni lanmou-la ki ka pèwmèt lézòt rèkonnèt sé vré krétyen-la.