Poukwa misyé-la yo ka kriyé « entèl » di kè siwvwè i mayé èvè Rit, i « ka riské pèd » éritaj a-y ? (Rit 4:1, 6).

An tan a Labib, lèwvwè on nonm mayé té ka mò é kè i pa té ni timoun, ni déotwa kèsyon ki té mérité on répons : « Kimoun ki té’é érité dè tè a-y ? » é « Ès non a fanmi a-y té’é disparèt pou touttan ? » Lwa a Moyiz té ka palé dè sé kèsyon-lasa.

Ka ki té ka pasé lèwvwè on misyé té ka mò é kè i té ni tè oben kè on misyé té oblijé vann tè a-y pas i té vin maléré ? On frè a-y oben on bon fanmi a-y té pé rachté sé tè-la. Konsa, sé tè-la té ké rété adan fanmi-la (Lév. 25:23-28 ; Nonb 27:8-11).

Ka yo té pé fè pou non a fanmi a mò-la pa té disparèt ? Lè on misyé té ka mò, on frè a-y té ka mayé èvè madanm a-y pou ba-y on timoun. Konsa, timoun-la té ka pòté non a misyé-la ki mò la é i té ka érité dè tousa misyé-la té ni. Sé konsa sa pasé pou Rit. Sé on dispozisyon ki té plen lanmou é ki té ka pèwmèt kè madanm a moun-la ki mò la ni on moun pou okipé dè-y (Dét. 25:5-7 ; Mat. 22:23-28).

An-nou vwè ègzanp a Noémi. I té mayé èvè on misyé non a-y sé té Élimélèk. Lèwvwè Élimélèk é sé 2 gason a-y la mò, pa té ni pon misyé adan fanmi-la pou pran swen a Noémi ankò (Rit 1:1-5). Alò, lèwvwè Rit é Noémi viré Jida, Noémi ankourajé Rit pou i té ay vwè Boaz pou vwè si i té pé rachté sé tè-la yo té ni la. Boaz sé té on bon fanmi a Élimélèk (Rit 2:1, 19, 20 ; 3:1-4). Men Boaz rann-li kont kè té ni ondòt misyé ki té pi fanmi èvè Élimélèk ki-y ankò é adan Labib, pou palé dè misyé-lasa yo ka sèvi èvè lèmo « entèl ». Sé misyé-lasa ki té andwa désidé an prèmyé si i té ka rachté tousa ki té ta Élimélèk (Rit 3:9, 12, 13).

Odépa, « entèl » té paré a fè on biten pou édé Noémi (Rit 4:1-4). Sé vré, sa té’é kouté-y lajan, men i té sav kè Noémi té two vyé pou fè on timoun ki té’é érité dè tousa Élimélèk té ni. Anfinaldikont, sé « entèl » ki té’é érité dè tout tè a Élimélèk é konm « entèl » té ja ni tè, i té’é ni plis tè ankò. Alò pétèt kè lèwvwè i réfléchi asi sa, i dwèt touvé kè sé té on bon afè.

Men lè i rann-li kont kè fò i té mayé èvè Rit, i désidé kè i pé ké rachté tè a Élimélèk ankò. Mi sa i di : « An pé pa rachté-y, pas an ka riské pèd éritaj an mwen » (Rit 4:5, 6). Poukwa i chanjé fizi a-y zépòl ?

Siwvwè « entèl » oben ondòt moun té ka mayé èvè Rit é kè Rit té ka vin ni on timoun, timoun-lasa té’é érité dè tè a Élimélèk. Alò, an ki sans « entèl » té « ka riské pèd éritaj a-y » ? Labib pa’a ban-nou répons a kèsyon-lasa, men mi déotwa rézon ki té’é pé èspliké sa :

• Prèmyèwman, « entèl » té’é pèd lajan-la i itilizé la pou achté tè a Élimélèk piskè anfinaldikont tè-la pa té’é ta-y. Tè-la té’é wouvin a gason a Rit.

• Dézyèmman, i té’é oblijé ba Noémi é Rit bwè é manjé é pran swen a yo.

• Twazyèmman, si Rit té ka vin ni dòt timoun èvè « entèl » sé timoun-la « entèl » té ja ni la té’é oblijé séparé éritaj-la èvè sé timoun-lasa.

• Katriyèmman, si « entèl » pò’ò té ni timoun é kè Rit té ka ba-y on gason, plita timoun-lasa té’é érité tout tè a Élimélèk é tout tè a-y osi, kivédi lè « entèl » té’é mò, tout tè a-y té’é vin ta on timoun ki pa ka pòté non a-y men ki ka pòté non a Élimélèk. « Entèl » pa té paré a pèd tout sé biten-lasa pou Noémi. I té préféré lésé rèsponsabilité-lasa asi do a Boaz, pas apré-y sé Boaz ki té ni dwa rachté zéfé a Élimélèk. Boaz aksèpté sé rèsponsabilité-lasa pas i té vé kè ‘non a moun-la ki mò la rété lyanné èvè éritaj a moun-lasa’ (Rit 4:10).

Pétèt kè sa ki té ka entérésé « entèl » plis, sé té pa pèd non a-y é pa pèd éritaj a-y. Anfèt, i té ka rézonné konsa pas i té égoyis. Ou ka imajiné-w ? I fè tousa pou i pa té pèd non a-y, men jòdijou, kimoun ki konnèt « entèl » ? Anplisdisa, i té ni on bèl lokazyon douvan a-y, i té pé vin on zansèt a Mési-la, Jézikris. Men anfinaldikont sé Boaz ki vin ni privilèj-lasa. É tousa rivé pas « entèl » té égoyis é kè i pa té vé édé on moun ki té bizwen èd. Sa maléré ba-y toubònman ! (Mat. 1:5 ; Lik 3:23, 32).