AWTIK POU ÉTIDYÉ 19
Lanmou é Lajistis : pli fò ki laméchansté
« Pas ou pa on Bondyé ki ka pran plézi adan laméchansté. Moun ki pa bon pé pa rété owa a-w » (SÒM 5:4).
KANTIK 142 Tenons ferme notre espérance
ON TI LIDÉ ASI SA NOU KAY VWÈ *
1-3. a) Dapré sa Sòm 5:4-6 ka di, ka Jéova ka rèsanti parapòt a méchansté ki ni asi latè ? b) Poukwa sa sé délenkan sèksyèl la ka fè pa annakò ditou-ditou èvè sa « lwa a Kris » ka di ?
JÉOVA hay tout kalté méchansté (li Sòm 5:4-6). Alò nou pé imajiné jan i dwèt hay tousa sé délenkan sèksyèl la ka fè sé timoun-la ! Sé dé biten ki méchan toubònman, é ki ka répigné-y ! Konm nou ka sèvi Jéova é nou vlé vwè léchòz menmjan ki-y, sé pousa nou osi nou hay tousa sé délenkan sèksyèl la ka fè é nou pa ka toléré sa adan lasanblé krétyèn la (Wom. 12:9 ; Ébr. 12:15, 16).
2 Tousa sé délenkan sèksyèl la ka fè pa annakò ditou èvè sa « lwa a Kris » ka di ! (Gal. 6:2). Poukwa nou ka di sa ? Kon nou vwè adan awtik a simenn pasé, lwa a Kris (kivédi tousa Jézi anségné, ki sé èvè sa i di, ki sé èvè sa i fè) bazé asi lanmou é ka ankourajé a aji èvè jistis. Konm sé vré krétyen-la ka obéyi a lwa-lasa, yo ka fè tousa yo pé pou sé timoun-la santi-yo ansékirité é pou yo santi kè yo vréman enmé-yo. Pawkont, sé délenkan sèksyèl la ka aji on mannyè égoyis é ki pa jis. Akòz dè sa yo ka fè, sé timoun-la ka santi-yo an danjé é yo ka kwè kè ponmoun pa enmé-yo.
3 Malérèzman, pédofili sé on pwoblèm ou ka touvé toupatou si latè é sé on biten ou ka jwenn menm aka sé vré krétyen la. Poukwa nou ka di sa ? Paskè aprézan ni dè plizanpli moun ki « méchan » é ki ka fè-yo pasé pou sa yo pa yé, é sèwten adan yo ka éséyé rantré andidan lasanblé-la (2 Tim. 3:13). Anplisdisa, ni dé moun ki té adan lasanblé-la é ki té ka sèvi Jéova dapré yo, ki lésé vyé vis pran lanmen asi yo é ki fè malpwòpté èvè on timoun. Nou ké vwè poukwa sé péché-lasa vréman grav. Aprésa nou ké vwè ka sé ansyen-la ka fè lè on moun ka fè on péché ki grav, kon pa ègzanp lè on granmoun ka vyolé on timoun, é ka sé paran-la pé fè pou pwotéjé timoun a yo *.
ON PÉCHÉ KI GRAV TOUBÒNMAN
4-5. Poukwa nou pé di kè lè on moun ka fè malpwòpté èvè on timoun, sé on péché i ka fè kont timoun-la ?
4 Lè on granmoun ka fè malpwòpté èvè on timoun, sa ka fè onlo déga toubònman. Nonsèlman timoun-la ka soufè, men tout sé moun-la ki enmé-y la ka soufè osi, ki sé fanmi a-y oben frè é sè a-y an lasanblé krétyèn la. Pédofili, sé on péché ki grav toubònman.
5 On péché kont timoun-la. Lè on moun ka fè ondòt sibi enjistis pou fè-y soufè, sé on péché. Sé sa nou kay vwè adan pwochen awtik-la. Lè on moun ka mannyé on timoun oben lè i ka vyolé-y, i ka fè-y soufè tout vi a-y. Timoun-la ka pèd konfyans adan moun-lasa é i pé pa santi-y ansékirité ankò. Fò-nou pwotéjé sé timoun-la kont moun ki té’é anvi fè malpwòpté èvè-yo. Sa ki ka soufè akòz dè enjistis-lasa bizwen nou édé-yo é nou ba-yo fòs é kouraj (1 Tés. 5:14).
6-7. Poukwa nou pé di kè on moun ka fè malpwòpté èvè on timoun ka péché kont lasanblé-la é kont sé gouvènman-la ?
6 On péché kont lasanblé-la. Lèwvwè on moun an lasanblé-la ka fè malpwòpté èvè on timoun, i ka sali répitasyon a lasanblé-la (Mat. 5:16 ; 1 Pyè 2:12). Sé on biten ki enjis toubònman pou tout sé krétyen fidèl la, ki a plizyè milyon é ki ka menné « on gwo konba pou lafwa » ! (Jid 3). Lè on moun ka fè dé biten ki méchan san i rèpanti-y é kè i ka sali répitasyon a lasanblé-la, nou pa’a toléré kè i rété andidan a-y.
7 On péché kont sé gouvènman-la. Sé krétyen-la dwètèt ‘soumèt-yo douvan sa ki ni otorité-la’ (Wom. 13:1). Nou ka montré kè nou ka soumèt-nou lè nou ka rèspèkté lwa a péyi-la nou ka viv adan-y la. Si on moun an lasanblé-la fè on krim, pa ègzanp si i fè malpwòpté èvè on timoun, i ka péché kont sé gouvènman-la osi (konparé èvè Akt 25:8). Sé ansyen-la pa ni pouvwa pou pini moun ki pa’a rèspèkté lwa a péyi-la. Pawkont, yo pa’a pwotéjé sé délenkan sèksyèl la dè sa gouvènman-la ka prévwa pou pini moun ki ka maltrété timoun (Wom. 13:4). Sa péchè-la simé, sé sa i ka rékòlté osi (Gal. 6:7).
8. Ka Jéova ka pansé lè on moun ka péché kont ondòt moun ?
8 Pli grav ankò, on péché kont Bondyé (Sòm 51:4). Lè on moun ka péché kont ondòt moun, i ka péché kont Jéova osi. An-nou vwè on ègzanp adan Lwa-la Bondyé té ba Izrayèl la. Lwa-la té ka di kè si on moun té ka volé biten a pwochen a-y oben si i té ka kouyonné-y, i pa té fidèl a Jéova (Lév. 6:2-4). Sa klè : lè on moun adan lasanblé-la ka fè malpwòpté èvè on timoun, i ka anpéché timoun-la santi-y ansékirité é i pa fidèl a Jéova. On moun konsa ka fè on biten ki grav, i ka sali non a Jéova toubònman. Fò-nou byen konprann kè pédofili sé on péché grav kont Bondyé. Nou kont sa a désan pou san.
9. Dépi plizyè lanné, ki konsèy bazé asi Labib òwganizasyon a Jéova ka ban-nou, é poukisa ?
9 Dépi plizyè lanné, òwganizasyon a Jéova ka ban-nou onlo konsèy bazé asi Labib anrapò èvè pédofili. Pa ègzanp, si on moun ka soufè parapòt a méchansté on pédofil fè-y lè i té timoun, ni plizyè awtik adan Tou dè Gad é adan Réveillez-vous ! ki ka di sa i pé fè pou soulajé soufrans a-y. Sé awtik-lasa montré ka lézòt pé fè pou édé-y é pou ankourajé-y, é ka sé paran-la pé fè pou pwotéjé timoun a yo. Si on moun fè malpwòpté èvè on timoun, sé ansyen-la risivwè on fòwmasyon bazé asi Labib pou konnèt sa yo dwètèt fè sianka on moun fè péché-lasa. Anplisdisa, òwganizasyon a Jéova ka kontinyé voyé enstriksyon ba sé ansyen-la pou jéré sitiyasyon konsa. Poukwa ? Pas i ka fè atansyon pou nou pran dé désizyon ki annakò èvè lwa a Kris.
KA SÉ ANSYEN-LA KA FÈ LÈ NI ON PÉCHÉ GRAV KI FÈT
10-12. a) Lè sé ansyen-la ka okipé-yo dè on péché grav, ka fò-yo sonjé, é ki òbjèktif yo ni ? b) Dapré sa Jan 5:14, 15 ka di, ka sé ansyen-la ka éséyé fè ?
10 Lè sé ansyen-la ka okipé-yo dè on péché grav, yo ka sonjé kè lwa a Kris ka mandé-yo pran swen a troupo-la èvè onlo lanmou é fè sa ki jis sèlon Bondyé. Sé pousa, lè sé ansyen-la ka vin sav kè on péché grav fèt, yo dwètèt pran tan réfléchi asi plizyè biten. Pou sé ansyen-la, sa ki pli enpòwtan sé dè fè ansòt pou non a Jéova oben répitasyon a-y rété pwòp (Lév. 22:31, 32 ; Mat. 6:9). Anplisdisa, yo ka fè tousa ki fo pou édé frè é sè a lasanblé-la a toujou ni on lanmityé solid èvè Jéova é yo vlé édé séla ki ka soufè la osi.
11 Anplisdisa, si on moun adan lasanblé-la péché men i ka rèpanti-y, sé ansyen-la ka fè bon éfò pou édé-y géri èspirityèlman, kivédi pou i rètouvé on bèl lanmityé èvè Jéova (li Jak 5:14, 15). Lè on krétyen ka lésé mové lanvi pran lanmen asi-y é ka fè on péché grav, i malad èspirityèlman. Savédi kè i pèd lanmityé-la i té ni la èvè Jéova *. Adan on sans, nou pé di kè sé ansyen-la sé dé dòktè èspirityèl. Yo ka éséyé édé ‘malad-la [kivédi péchè-la] rèpran sans a-y’. Sé konsèy-la yo ka ba péchè-la bazé asi Labib é yo pé édé-y rètouvé on lanmityé solid èvè Jéova. Men tousa ké posib yenki si péchè-la ka rèpanti-y dè tou kè (Akt 3:19 ; 2 Kor. 2:5-10).
12 Sé pousa sé ansyen-la ni on gwo rèsponsabilité. Bondyé mandé-yo okipé dè twoupo-la é yo ka sousyé-yo dè-y onlo (1 Pyè 5:1-3). Yo vlé kè frè é sè a yo santi-yo ansékirité adan lasanblé-la. Kifè, yo ka aji vitman lè yo ka vin sav kè ni on péché grav ki fèt, kon pa ègzanp lè on granmoun fè malpwòpté èvè on timoun. Ka yo ka fè ? Pran tan a-w gadé sé kèsyon-la ki ka touvé-yo an koumansman a sé paragraf 13, 15 é 17 la.
13-14. Si lalwa vlé kè yo avèti-y lè yo ka di kè on granmoun fè malpwòpté èvè on timoun, èskè sé ansyen-la ka obéyi ? Bay on ti èsplikasyon.
13 Si lalwa vlé kè yo avèti-y lè yo ka di kè on granmoun fè malpwòpté èvè on timoun, èskè sé ansyen-la ka obéyi ? Wi. Si la yo ka rété la ni on lwa pou sa, fò sé ansyen-la rèspèkté-y (Wom. 13:1). Lè yo ka suiv sé lwa-lasa, yo pa ka dérèspèkté lwa a Bondyé (Akt 5:28, 29). Kifè, lè sé ansyen-la ka vin sav kè yo ka akizé on moun adan lasanblé-la dè fè malpwòpté èvè on timoun, san pèd tan, yo ka chèché konnèt ka pou yo fè pou yo obéyi a sa lwa a péyi-la ka mandé.
14 Lè sé ansyen-la ka palé ba sé timoun-la ki ka soufè la, ba fanmi a yo, é ba tout sé moun-la ki okouran a afè-lasa, yo ka fè-yo sonjé kè yo andwa avèti lalwa parapòt a sa ki fèt. Men vinvwè moun-la yo ka akizé la sé on moun adan lasanblé-la, é kè toutmoun vin sav sa i fè la ? Si on krétyen avèti lalwa, ès fò i mèt an tèt a-y kè i sali non a Bondyé lè i fè sa ? Anponjan ! Sé pédofil-la ki sali non a Bondyé.
15-16. a) Sèlon sa 1 Timoté 5:19 ka di, poukwa sa nésésè kè ni omwen 2 témwen pou yo fè on komité a disiplin ? b) Ka sé ansyen-la ka fè lè yo ka vin tann kè on moun adan lasanblé-la fè malpwòpté èvè on timoun ?
15 Adan lasanblé-la, poukwa fò i ni omwen 2 témwen pou sé ansyen-la désidé fè on komité a disiplin ? Paskè sé sa Labib ka mandé é prensip a-y jis toubònman. Lè yo ka akizé on moun é kè i ka di kè i pa fè sa, fò i ni omwen 2 témwen ki vwè sa ki pasé pou sé ansyen-la fè on komité a disiplin (Dét. 19:15 ; Mat. 18:16 ; li 1 Timoté 5:19). Ès savédi kè pou ay di lalwa kè on moun fè malpwòpté èvè on timoun, fò i ni 2 témwen osi ? Non. Sé ansyen-la oben ondòt moun pa bizwen ni 2 témwen pou ay di lalwa kè on krim fèt.
16 Lè sé ansyen-la ka vin tann kè on moun an lasanblé-la fè malpwòpté èvè on timoun, yo ka obéyi a sa lwa a péyi-la ka mandé. Yo ka avèti sé moun-la ki ni otorité-la. Aprésa, sé ansyen-la ka ègzaminé afè-la grasa sé prensip-la ki an Bib-la. Si moun-la yo akizé la ka di kè i inosan, sé ansyen-la ka kouté sa sé témwen-la ni a di. Si omwen 2 moun ka di kè sé sa menm ki fèt, alò sé ansyen-la ka fè on komité a disiplin (pawmi sé dé moun-lasa, fò i ni moun-la ki mèt sa ki fèt déwò, é fò i ni ondòt moun ki kapab di sa ki pasé oben ki kapab di si moun-la yo akizé la ja fè dòt ka konsa *). A pa pas pa ni on dézyèm témwen kè savédi kè moun-la yo akizé la inosan. Menmsi pa ni 2 témwen adan afè-la, sé ansyen-la ka konprann byen kè pétèt ni on péché grav ki fèt, on péché ki fè timoun-la soufè onlo é dòt moun osi. Sé ansyen-la ké kontinyé soutyenn toutmoun ki ka soufè akòz dè sa ki pasé. Anplisdisa, difètkè yo tann kè on moun an lasanblé-la fè malpwòpté èvè on timoun, yo ka rété véyatif pou yo pwotéjé sélézòt frè é sè la (Akt 20:28).
17-18. Ki wòl a on komité a disiplin ?
17 Ki wòl a on komité a disiplin ? A pa-y ka désidé si lalwa dwètèt pini pédofil-la. Sé ansyen-la ka rèkonnèt kè sé lalwa ki andwa jijé on krim é pini on moun ki pa’a rèspèkté lwa a péyi-la (Wom. 13:2-4 ; Tit 3:1). Pawkont, sé yo ké désidé si moun-lasa ké kontinyé rété adan lasanblé-la oben si i mérité èskominyé.
18 Adan on komité a disiplin, sé ansyen-la ka okipé-yo yenki dè pati èspirityèl a afè-la. Savédi yo ka okipé-yo dè lanmityé a péchè-la èvè Jéova é èvè frè é sè a-y. Yo ka suiv dirèksyon-la Bib-la ka ba-yo la pou sav si péchè-la ka rèpanti-y oben si i pa’a rèpanti-y. Si péchè-la pa’a rèpanti-y, yo ka èskominyé-y, é yo ka di tout lasanblé-la sa (1 Kor. 5:11-13). Si péchè-la ka rèpanti-y, i ké pé kontinyé a fè pati a lasanblé-la. Men sé ansyen-la ké fè-y sav kè, pétèt, i pé’é jen pé risivwè on rèsponsabilité adan lasanblé-la ankò. Anplisdisa, sé ansyen-la ka sousyé-yo dè sékirité a sé timoun-la. Kifè, si ni timoun ki minè adan lasanblé-la, yo ké pran paran a yo a pa pou di-yo kè fò-yo fè atansyon a timoun a yo èvè moun-la ki péché la. Lè sé ansyen-la ké fè sa, yo ké pran prékosyon pou yo pa di ki timoun ki soufè adan sa. Konsa, yo ké rèspèkté vi privé a-y é ta fanmi a-y.
KIJAN OU PÉ PWOTÉJÉ TIMOUN A-W
Pou pwotéjé timoun a yo kont moun ka fè malpwòpté èvè timoun, sé paran-la ka aprann-yo sa pou yo konnèt asi rèlasyon sèksyèl. Pou rivé fè sa, yo ka sèvi èvè zouti kè òwganizasyon a Bondyé ka bay (gadé sé paragraf 19 a 22 la).
19-22. Ka sé fanmi-la pé fè pou pwotéjé timoun a yo ? (gadé imaj-la ki anlè po a jounal-la).
19 Kimoun ki dwètèt pwotéjé sé timoun-la ? Fanmi a yo *. Léparan, sé timoun-la sé on kado Bondyé fè-zòt. Yo sé « on éritaj ki ka vin dè Jéova » (Sòm 127:3). Sé rèsponsabilité a zòt dè pran swen a éritaj-lasa. Ka zò pé fè pou pwotéjé timoun a zòt pou moun pa fè malpwòpté èvè yo ?
20 Prèmyèwman, chèché a ni plis enfòwmasyon asi sijé-lasa. Chèché a sav ki jan dè moun ka fè malpwòpté èvè timoun é ki métòd yo ka itilizé pou pyéjé-yo. Rété véyatif : rété lwen a tout sitiyasyon é a nenpòt ki moun ki ka sanm sa i danjéré (Pwov. 22:3 ; 24:3). Sonjé kè, byensouvan, on délenkan sèksyèl sé on moun timoun-la konnèt byen é on moun i ka fè konfyans.
21 Dézyèmman, kontinyé kominiké èvè timoun a-w byen (Dét. 6:6, 7). Pou fè sa, pran tan a-w pou kouté-yo (Jak 1:19). Fò-w sonjé kè byensouvan, lè on timoun ka soufè pas yo fè malpwòpté èvè-y, i pa anvi palé dè sa. Pétèt i pè yo pa kwè-y, oben pétèt kè moun-la ki fè-y soufè la mennasé-y pou i pa di ponmoun ayen. Si ou ni lenprésyon kè ni on biten ki pa kay, éséyé fè timoun a-w palé, men fè sa jantiman. Pozé-y kèsyon é pran tan kouté-y lè i ka réponn-vou.
22 Twazyèmman, anségné timoun a-w. Di-y tousa fò i konnèt asi biten sèksyèl, men tchenn kont dè laj a-y é dè sa i pé konprann. Èspliké-y ka pou i fè é ka pou i di si on moun éséyé mannyé-y on fason ki pa dwètèt. Sèvi èvè sé zouti-la òwganizasyon a Jéova ka ban-nou la pou pwotéjé sé timoun-la (gadé karé-la « Ranségné-w é édiké timoun a-w »).
23. Lè on moun ka fè malpwòpté èvè on timoun, kijan nou ka vwè sa ? A ki kèsyon nou ké réponn adan awtik-la ki ka vin la ?
23 Pou Témwen a Jéova, fè malpwòpté èvè on timoun sé on péché ki grav é on biten ki méchan toubònman. Konm lasanblé an nou ka soumèt-yo a lwa a Kris, sé pousa yo pa ka pwotéjé sé pédofil-la kont konsékans a péché a yo. Men ka nou pé fè pou édé tousa ki ka soufè pas on granmoun fè malpwòpté èvè yo ? Awtik-la ki ka vin la ké réponn a kèsyon-lasa.
KANTIK 103 Les bergers, des dons de Dieu
^ par. 5 Adan awtik-lasa, nou ké vwè ka nou pé fè pou pwotéjé sé timoun-la kont sé délenkan sèksyèl la. Nou ké vwè osi ka sé ansyen-la pé fè pou pwotéjé lasanblé-la é ka sé paran-la pé fè pou timoun a yo toujou santi-yo ansékirité.
^ par. 3 POU NOU BYEN KONPRANN : Pédofili, sé lè on granmoun ka fè malpwòpté èvè on timoun, lè i ka sèvi èvè on timoun pou kontanté lanvi sèksyèl a-y. Adan pédofili, ni rèlasyon sèksyèl, rèlasyon sèksyèl pa bouch oben pa fès, lè on moun ka mannyé pawti sèksyèl a on timoun, lè i ka mannyé tété a-y oben fès a-y. Adan-y ni dòt vyé vis ankò. Fò-nou sonjé kè lè yo maltrété on timoun, lè yo pwofité dè-y, a pa fòt a timoun-la si yo sèvi èvè-y. Pli souvan ki rarman, sé délenkan sèksyèl la ka sèvi èvè tifi. Men onlo tigason ka pri adan sa osi. Menmsi lamajorité a sé délenkan sèksyèl la sé dé nonm, ni madanm ki pédofil osi.
^ par. 11 A pa paskè on moun malad èspirityèlman kè i pé pran sa pou èskiz pou i fè on péché grav. Péchè-la rèsponsab anplen dè sé mové chwa-la é dè sé mové biten-la i fè la. Jéova ké jijé-y pou sa (Wom. 14:12).
^ par. 16 Si sé ansyen-la tann-di kè on moun fè on malpwòpté èvè on timoun, pannan yo ké ka palé ba moun-lasa, yo pé’é jen fè sa douvan timoun-la. On moun pé rakonté sé ansyen-la sa timoun-la di, sé pé papa-y oben maman-y oben ondòt moun ki alèz èvè timoun-la. Konsa, timoun-la pé’é ni a soufè plis ankò.
^ par. 19 Sé konsèy-la sé paran-la ka risivwè la valab osi pou tousa ki rèsponsab dè on timoun ki pa ta yo.
