1. Poukwa sèwten moun pa’a twòp anvi étidyé ?

JÒDIJOU ni onlo moun ki oblijé travay rèd toubònman pou yo gangné vi a yo. Onlo frè é sè ka travay onpakèt tan, yenki pou yo pwokiré fanmi a yo sa ki nésésè. Ni onlo dòt frè é sè, chak jou fò yo pran bon enpé tan pou yo ay travay é pou yo rantré akaz a yo. Ni onlo osi ki ka fè on travay rèd pétèt anba solèy cho la oben ki ka lévé chaj. É an fen a jouné-la, sé frè é sè lasa menmsi yo plen kouraj ka las toubònman ! Dènyé biten yo ka santi yo té’é fè, sé étidyé.

2. A ki moman ou ka pran on tan pou étidyé ?

² Men sé on réyalité : fò-nou òwganizé-nou pou touvé on tan pou nou étidyé Pawòl a Bondyé séryèzman é sé piblikasyon-la osi. Sé on biten ki nésésè si nou vlé ni on bèl lanmityé èvè Jéova é si nou vlé viv étèwnèlman ! (1 Tim. 4:15, 16). Ni sa ki ka lévé granbonnè maten touléjou pou étidyé lè pa ni pon bri akaz a yo é lè lèspri a yo byen fré. Ni dòt, sé an fen a jouné-la, lè yo trankil, yo ka pran on ti tan pou étidyé é pou réfléchi asi Bib-la é asi piblikasyon a lòwganizasyon.

3-4. Nou pa ni menm kantité piblikasyon ki avan. Ki chanjman ki fèt an domenn-lasa é poukwa ?

³ Sèten ou ké dakò pou di kè fò-nou touvé on tan pou étidyé. Men ka pou nou étidyé ? Pétèt kè ou ké di : « Ni tèlman biten a li ! An pé’é pé li tousa. » Ni sa ki ka rivé li tout sé piblikasyon-la é gadé tout sé vidéo-la yo ka ban-nou la, men ni onlo frè é sè ki pa’a rivé touvé tan pou yo fè sa. Komité santral la sav sa byen. Sé pousa dènyéman, i désidé diminyé si kantité piblikasyon i ka mété  a dispozisyon an nou, ki sé piblikasyon ki enprimé, ki sé piblikasyon ki anlè sit-la.

⁴ Nou pé pran on ègzanp. Konnyéla, asi jw.org^® oben adan émisyon a JW Télédifizyon kè nou ka ni chak mwa, yo ka rakonté-nou onlo biten ankourajan ki ka fèt. Kifè, nou pa’a fè Annuaire des Témoins de Jéhovah sòti ankò. Anplisdisa, alè, Tou dè Gad la (édisyon piblik) é Réveillez-vous ! ka parèt yenki twa fwa an lanné-la. Men lòwganizasyon pa fè tout sé chanjman-lasa pou nou pé sa pasé plis tan adan dòt aktivité. Sé chanjman-lasa fèt pou édé-nou konsantré-nou asi « sé biten-la ki pli enpòwtan la » (Filip. 1:10). An-nou vwè ka ou pé fè pou-w mété sa ki pli enpòwtan prèmyé douvan. Nou ké vwè osi ka ou pé fè pou-w ni plis byenfé lè ou ka étidyé Labib dè koté a-w.

5-6. Ka pou nou étidyé an prèmyé ?

⁵ Ka pou nou étidyé an prèmyé ? Nou ka tou konprann kè chakjou, fò-nou pran on tan pou étidyé Pawòl a Bondyé, Labib. Yo diminyé asi kantité vèwsé ki ni a li pou réinyon-la ki ka fèt an simenn-la pou nou pé sa ni plis tan pou réfléchi asi sa nou ka li é pou fè rèchèch. Fo pa nou enki kontanté-nou dè li mòso a Bib-la nou ni a li la, men òbjèktif-la sé dè lésé mésaj-la ki an Bib-la touché tchè an nou. Sa ké fè-nou vin pli pré Jéova (Sòm 19:14).

⁶ Fò-nou étidyé Bib-la, men ki dòt biten fò-nou pran tan étidyé ankò ? On biten ki klè, sé kè nou vlé pran on tan pou préparé Tou dè Gad an nou, étid biblik a lasanblé-la é sélézòt pawti a réinyon-la ki ka fèt an simenn-la. Nou vlé li osi chak Réveillez-vous ! é chak Tou dè Gad ki ka sòti.

7. Si nou pa’a rivé li tousa ki ka parèt asi jw.org é asi JW Télédifizyon, poukwa fo pa nou dékourajé-nou ?

⁷ Pétèt ou ké di : « An dakò, men é tousa ki ka sòti asi jw.org é JW Télédifizyon ! A pa tibwen biten ki ni ! » An-nou pran on ègzanp : On rèstoran ka pwopozé plizyè manjé diféran é yotout ni bon gou toubònman. Sé kliyan-la pé’é pé manjé adan tout sé pla-la ki la la. Fò yo chwazi détwa adan yo. Menmjan-la, si ou pa’a rivé li é gadé tousa lòwganizasyon ka mété asi Entèwnèt, pa dékourajé-w. Fè sa ou pé. Konnyéla, an-nou vwè ki éfò sa ka mandé pou étidyé é ka pou-w fè pou étid a-w pwokiré-w onlo byenfé.

8. Ki métòd ou pé itilizé lè ou ka étidyé Tou dè Gad a-w, é ki byenfé sa ké pwokiré-w ?

⁸ Lè on moun ka étidyé, fò i li èvè on òbjèktif byen prési é fò i byen konsantré. Apatoudi li enpé paragraf vitman é souligné sé répons-la. Pa ègzanp, lè ou ka préparé on awtik adan Tou dè gad la (édisyon ki fèt pou étidyé), koumansé pa li pawti-la « On ti lidé asi sa nou kay vwè ». Ou ka touvé-y an koumansman a awtik-la. Apré, réfléchi asi tit a awtik-la, asi sé soutit-la é asi sé kèsyon-la ki ka édé-w rètyenn sé lidé enpòwtan la. Aprésa, pran tan a-w pou-w li awtik-la byen. Réfléchi byen asi fraz-la ki ka anonsé dè ki biten paragraf-la ka palé (an jénéral, sé prèmyé fraz a paragraf-la). Konsa, ou ké konprann ki òbjèktif a paragraf-la. Paragraf-la ka touvé-y anba on soutit. Alò, toupannan ou ka li awtik-la, éséyé vwè ki rapò paragraf-la ni èvè soutit-la é èvè tèm a awtik-la. Si ni déotwa mo é  déotwa lidé kè ou té’é enmé konprann pli byen, maké-yo. É aprésa, ou ké pé fè rèchèch asi yo.

9. a) Poukwa fò-nou konsantré-nou asi sé vèwsé-la lè nou ka étidyé Tou dè Gad la, é kijan nou pé fè sa ? b) Sèlon sa Joziyé 1:8 ka di, ka pou nou fè apré nou li on pasaj an Bib-la ?

⁹ Lè nou ka étidyé Tou dè Gad la, sé Labib nou ka étidyé. Alò, ba sé vèwsé-la onlo enpòwtans, siwtou séla yo ké li la pannan nou ké étidyé awtik-la èvè lasanblé-la. Éséyé vwè ki mo an vèwsé-la, oben ki èsprésyon, ka koré lidé pli enpòwtan la ki adan paragraf-la. Anplisdisa, pran tan réfléchi asi sé vèwsé-la ou li la, é éséyé vwè kijan ou pé apliké-yo adan vi a-w (li Joziyé 1:8).

10. Dapré sa ki maké an Ébré 5:14, poukwa fò sé paran-la aprann timoun a yo étidyé é fè rèchèch pannan étid familyal la ?

¹⁰ Sé paran-la vlé kè timoun a yo aprésyé étid familyal la chak simenn. Sa toutafè nòwmal. Alò yo toujou ka prévwa on biten prési pou étid familyal la. Men apapousa pou yo santi-yo oblijé préparé dé biten èstraòwdinè chak simenn. Pannan étid familyal la, yo pé gadé on émisyon a JW Télédifizyon ki ka parèt chak mwa. Oben délè, yo pé fè on ti aktivité èspésyal kon fabriké on toupiti lawch a Noé. Men fò aprann sé timoun-la étidyé osi. Pa ègzanp, sé timoun-la bizwen aprann préparé réinyon a yo é fò-yo aprann fè rèchèch asi on pwoblèm yo ka jwenn lékòl (li Ébré 5:14). Si on timoun abityé étidyé akaz a-y, sa ké pi fasil pou i konsantré-y si sa yo ka di an réinyon oben lasanblé, siwtou kè a pa toutlè ka ni vidéo. On biten ki sèten, sé kè kantité tan on paran ké pran pou i étidyé èvè timoun a-y ké dépann dè laj a timoun-la é dè kapasité a-y.

11. Poukwa sa enpòwtan kè nou montré étidyan an nou kijan pou yo fouyé pli fon lè yo ka étidyé dè koté a yo ?

¹¹ Moun ki ka étidyé Labib èvè nou bizwen aprann kijan pou yo étidyé dè koté a yo osi. Sé vré, odépa, nou ka kontan lèwvwè yo souligné répons a sé kèsyon-la pou préparé étid a yo oben réinyon a yo. Men fò-nou aprann-yo fè rèchèch é fò-nou montré-yo kijan pou yo fouyé on sijé lè yo ka étidyé dè koté a yo. Konsa, lè yo ké ka jwenn on pwoblèm, olyé yo ay tousuit owa on moun adan lasanblé-la pou mandé-y édé-yo, yo ké sav kijan pou yo fè rèchèch adan sé piblikasyon-la yomenm a yo pou yo touvé konsèy ki ké itil pou yo.

12. Lè nou ka étidyé, ki òbjèktif nou pé fiksé-nou ?

¹² Si ou sé on moun ki pa gè enmé étidyé, pétèt kè ou ka pansé kè ou pé’é jen pé pran plézi adan aktivité-lasa. É poutan, ni mwayen ou vin enmé sa ! Koumansé pa étidyé pannan on ti moman toukout é piti-a-piti ògmanté longè a étid-la. Fiksé-w on òbjèktif. Sé vré, prèmyé òbjèktif an nou, sé rapwoché-nou dè Jéova dè plizanpli. Men nou pé étidyé osi pou nou pé sa réponn a on kèsyon kè on moun pozé-nou oben pou nou fè rèchèch asi on pwoblèm kè nou ka rankontré.

13. a) Èspliké ka on jenn pé fè si i vlé défann kwayans a-y an lékòl a-y. b) Kijan ou pé apliké konsèy-la ou ka touvé an Kolosyen 4:6 ?

¹³ An-nou pran on ègzanp : Ès ou sé on jenn ki lékòl ? Pétèt kè kanmarad a-w ka kwè adan téori a lévolisyon. É ou té’é enmé èspliké-yo pou ki rézon ou ka kwè kè sé Bondyé ki kréyé-nou, kon Labib ka anségné. Men ou pa’a santi ou pé fè sa. Ében, mi on sijé ou pé étidyé ! Ou pé fiksé-w 2 òbjèktif : 1) fè sa ki fo pou-w vin pli sèten ankò kè sé Bondyé ki kréyé tout biten é 2) aprann défann kwayans a-w plibyen (Wom. 1:20 ; 1 Pyè 3:15). Mi on prèmyé kèsyon ou pé pozé-w : « Èvè ki prèv kanmarad-lékòl an mwen ka sèvi pou défann lévolisyon ? » Apré, ou pé fè rèchèch adan piblikasyon an nou. Pou défann kwayans a-w, sa pa oblijé rèd kon ou ka konprann. Ni onlo moun ki ka kwè adan lévolisyon, tou senplèman pas on moun yo ka rèspèkté anségné-yo téori-lasa. É pétèt kè yenki èvè yonn ou dé lidé asi sijé-lasa, ou ké pé édé on moun ki vréman vlé konnèt lavérité (li Kolosyen 4:6).

14-16. a) Ka pou-w fè pou-w aprann plis biten asi on liv a Labib kè ou pa byen konnèt ? b) Èspliké kijan sé vèwsé-la ki an paragraf-la pé édé-w konprann liv a Amòs plibyen (gadé osi karé-la «  Aprann konnèt sé moun-la ki an Bib-la plibyen ! »).

¹⁴ Asipozé kè pou pwochen réinyon-la, nou kay ègzaminé sa on « ti pwofèt * » ékri. Men ou pa gè konnèt pwofèt-lasa. Pétèt kè prèmyé biten ou pé fè sé chèché a konnèt plis biten asi sa i maké. Kijan ou pé fè sa ?

¹⁵ Mi on prèmyé kèsyon ou pé pozé-w : « Ka an ja sav asi pwofèt-la ki ékri liv-lasa ? Kimoun i té yé ? O i té ka viv ? Ki travay i té ka fè ? » Si ou ni tibwen plis enfòwmasyon anlè-y, ou ké konprann poukwa sé tèl ègzanp oben tèl mo i chwazi. Lè ou ka li on liv a Labib, éséyé vwè ki èsprésyon ki ké édé-w konnèt ki jan dè moun sila ki maké-y la té yé.

¹⁶ Aprésa, pétèt ou ké touvé sa entérésan dè konnèt kitan yo ékri liv-la. Pou sa, ou pé voyé on koudèy asi sa yo ka kriyé « Table des livres de la Bible », ki ka touvé-y an fen a Traduction du monde nouveau la. Ou pé sèvi osi èvè on tablo ki ka touvé-y adan Appendice A6 la. I ka ba-w ki wa é ki pwofèt ki pasé an Jida é an Izrayèl yonn apré lòt. Si liv-la ou ka étidyé la ni pwofési adan-y, sa té’é byen kè ou chèché a sav kijan sitiyasyon-la té yé lè yo ékri liv-lasa. Ki mové konpòwtèman, oben ki mové labitid pèp-la té ni, kè pwofèt-la té vlé korijé ? Kimoun ki viv anmenmtan ki-y ? Pou-w konprann sitiyasyon-la byen, pétèt ou ké bizwen ay gadé adan dòt liv a  Labib. Pa ègzanp, pou pé sa konprann sa ki té ka pasé an tan a Amòs plibyen, Amòs 1:1 ka voyé-w adan liv a 2 Wa é ta 2 Kronik. Ou pé li sé pasaj-lasa. Ondòt biten ou pé fè, sé wouvwè sa Ozé té anonsé, piskè i ka sanm sa i viv a menm épòk ki Amòs. Tousa ké édé-w konprann plibyen kijan sitiyasyon-la té yé an tan a Amòs (2 Wa 14:25-28 ; 2 Kron. 26:1-15 ; Ozé 1:1-11 ; Amòs 1:1).

17-18. Èvè sé ègzanp-la ki an paragraf-la oben èvè pwòp ègzanp a-w, montré kijan on enfòwmasyon ki ka sanm on détay pé édé-w pran plis plézi lè ou ka étidyé Labib.

¹⁷ Lè ou ka li Labib, sa byen lè ou sé on moun ki toujou vlé aprann plis biten. Imajiné kè ou ka li chapit 12 a pwofési a Zakari, ki ka anonsé mò a Mési-la (Zak. 12:10). Lè ou rivé an vèwsé 12 la, ou ka li kè « toutmoun ki an fanmi a Natan » ké pléré toubònman lè Mési-la ké mò. Olyé ou enki janbé détay-lasa, mi on kèsyon ou pé pozé-w : « Ka désandan a Natan ni a vwè èvè Mési-la ? Ès ni mwayen an ni plis enfòwmasyon asi détay-lasa ? » Pou ni répons a sé kèsyon-lasa, fò-w fè konsi ou sé on « détèktiv ». Zakari 12:12 ka voyé-w adan 2 Samiyèl 5:13, 14, é la, ou ka li kè Natan sété on gason a David. Zakari 12:12 ka voyé-w adan Lik 3:23 é 31 osi. É la, ou ka konstaté kè Jézi sété on désandan a Natan é kè Natan sété on zansèt a Mari (gadé awtik-la « Qui était le père de Joseph ? » adan Tou dè Gad la, édisyon piblik, n° 3, 2016, paj 9, an fwansé). Sé enfòwmasyon-lasa ka ba-w anvi konnèt plis, pa vré ? Ou sav kè ni on pwofési ki té ka anonsé kè Jézi sé té ké on désandan a David (Mat. 22:42). Men David té ni pliski 20 gason. É Zakari ka anonsé  kè, an pawtikilyé, sé pitit a Natan, ki té on zansèt a Jézi é a Mari, ki té ké ni on bon rézon pou pléré pou mò a Jézi. Ès ou pa’a touvé kè sé on détay vréman entérésan ?

¹⁸ An-nou pran ondòt ègzanp. Adan prèmyé chapit a Lik, nou ka li kè lanj Gabriyèl vin vwè Mari é i anonsé-y on mésaj anrapò èvè tigason-la i té kay ni la. Mi sa i di-y : « I ké vin on moun enpòwtan é yo ké kriyé-y Gason a Sila ki Pli Ho la. Jéova Dyé ké ba-y dominasyon a David zansèt a-y. I ké gouvèné asi désandan a Jakòb pou touttan » (Lik 1:32, 33). Pétèt kè nou té’é anvi arété-nou asi prèmyé pawti a mésaj a Gabriyèl, ki ka présizé kè yo té ké kriyé Jézi « Gason a Sila ki Pli Ho la ». Men Gabriyèl di osi kè Jézi té ké gouvèné. On kèsyon nou pé pozé-nou sé : Kijan Mari konprann mésaj-lasa ? Èskè, an tèt a Mari, Jézi té ké gouvèné Izrayèl an plas a Éwòd oben an plas a on moun ki té ké vin apré-y ? Si Jézi té ka vin wa, Mari té ké on sòt dè Rèn, é fanmi a-y té’é viv adan on chato. Sèlman, pa ni ayen ka montré kè Mari palé Gabriyèl dè posibilité-lasa, ni kè i mandé on bèl plas an Wayòm-la, kon 2 disip a Jézi ni lokazyon fè (Mat. 20:20-23). Détay-lasa ka fè-nou konprann plibyen ankò kè Mari sété on madanm ki té ni onlo imilité toubònman !

19-20. Sèlon Jak 1:22-25 é 4:8, ki òbjèktif nou ni lè nou ka étidyé ?

¹⁹ Fò-nou sonjé kè lè nou ka étidyé Labib é piblikasyon an nou, prèmyé òbjèktif an nou sé rapwoché-nou dè Jéova. Nou anvi vwè plibyen ankò « kijan dè moun » nou yé é ki chanjman nou mérité fè pou nou fè Bondyé plézi (li Jak 1:22-25 ; 4:8). Alò chakfwa nou kay étidyé, fò-nou mandé Jéova lèspri sen a-y. Fò-nou mèt jounou atè pou mandé-y édé-nou pwofité dè étid pèwsonèl an nou anplen. Anplisdisa, fò-nou mandé Jéova édé-nou vwè-nou jan i ka vwè-nou.

²⁰ Adan on sòm, mi sa yo ka di dè on sèwvitè a Bondyé ki té fidèl : « Plézi a-y sé adan lwa a Jéova i yé, é i ka li lwa-lasa touba lajouné kon lannuit. [...] I ké réyisi adan tousa i ka fè » (Sòm 1:2, 3). Noutout anvi vin kon nonm-lasa !