1. Kijan Pawòl a Bondyé ka ban-nou sa ki fo-nou ?

NOU pé rivé about a nenpòt ki pwoblèm. Poukisa ? Pas Jéova sé Gran Pwofésè an nou (Iz. 30:20, 21). Pawòl a-y ka ban-nou tousa ki nésésè pou nou ‘ni tout kalité ki fo’ é ‘tousa nou bizwen pou fè tout bon biten ki ni a fè’ (2 Tim. 3:17). Si nou ka mété an pratik adan vi an nou sa Labib ka anségné, nou ka vin pli saj ki sé moun-la ki ka fè piblisité pou « sajès a mond-lasa » (1 Kor. 3:19 ; Sòm 119:97-100).

2. Ka nou ké vwè adan awtik-lasa ?

² Kon nou ké vwè adan awtik-lasa, byensouvan, sajès a mond-la ka ankourajé-nou a fè tousa kò an nou anvi fè. Pétèt sa rèd pou nou rézisté lèwvwè nou anvi réfléchi oben aji menmjan ki sé moun-la ki an mond-la. A pa pou ayen Labib ka di : « Tansyon a zòt pou ponmoun pa pran-zòt an pyèj a-y èvè filozofi é mansonj initil ki bazé asi mès-é-labitid a lézòm » (Kol. 2:8). Adan awtik-lasa, nou ké vwè kijan onlo moun vin asèpté 2 ‘mansonj initil’ a Satan. Chakfwa, nou ké vwè poukwa sajès a mond-la sé bétiz é poukwa sajès ki adan Pawòl a Bondyé lontan pli sipéryè ki tousa lèmond ka pwopozé.

3-4. Lè 20^èm syèk-la koumansé, kijan sa lèmond té ka pansé dè rèlasyon sèksyèl vin chanjé ?

³ Lè 20^èm syèk-la koumansé, an Éwòp é o Zétazini, sa sé moun-la té ka pansé dè rèlasyon sèksyèl chanjé onlo. Dan lèpasé, onlo moun té dakò pou di kè rèlasyon sèksyèl sé on biten ki fèt pou moun-mayé é yo pa té ka palé dè sa douvan toutmoun. Men piti-a-piti, yo lagé sé prensip-lasa, é sé moun-la koumansé asèpté onlo biten.

 ⁴ Adan lézanné 1920, mond-la viv onlo gran chanjman. Mi sa on madanm ki ka fè rèchèch ka di : « Koumansé ni onlo sèks adan film, pyès téat, mizik, liv é piblisité. É sé sa sé moun-la té ka mandé. » Pannan péryòd-lasa, sé moun-la koumansé dansé on mannyè ki pa pwòp, é yo koumansé abiyé-yo nenpòt ki jan. Kon Bib-la té anonsé anrapò èvè dènyé jou a sistèm-la, sa klè kè sé moun-la vin zanmi a plézi (2 Tim. 3:4).

5. Dépi lézanné 1960, ka ki ka pasé adan domenn sèksyèl ?

⁵ Dan lézanné 1960, onlo moun té ka viv ansanm san yo té mayé. Vin ni plis misyé ka kouché èvè misyé, plis madanm ka kouché èvè madanm é divòs vin lanmòd osi. Adan onlo anmizman, yo té ka montré plis biten sèksyèl ki avan. Pannan sé lanné-la ki sòti pasé la, mond-la koumansé fè enki bétiz adan domenn sèksyèl. Ka sa pòté ? Enki mové biten. Adan on liv, on madanm maké kè lèfètkè sé moun-la alawoulib adan domenn sèksyèl, sa ka pòté enki mové rézilta. Pa ègzanp, adan sèwten fanmi, manman-la é papa-la pa’a viv ansanm ankò, yonn adan sé paran-la ka lévé sé timoun-la tousèl, ni moun tchè a yo an bobo, oben ni dòt ankò ki pé pa rété san gadé biten pòwno. Ni onlo maladi sèksyèl ki ka kontaminé moun, kon sida pa ègzanp. Sé ondòt prèv kè sajès a mond-lasa sé bétiz (2 Pyè 2:19).

6. Poukwa nou pé di kè jan-la mond-la ka vwè rèlasyon sèksyèl, sé ègzaktèman sa Satan vlé ?

⁶ Mond-la ka vwè rèlasyon sèksyèl ègzaktèman kon Satan vlé. Pa ni pon dout asi sa, i kontan lèwvwè sé moun-la ka mal sèvi èvè rèlasyon sèksyèl. Sé on kado Jéova fè lézimen, men lè yo ka aji konsa, yo ka montré kè yo pa ni pon rèspé pou mayé, ondòt kado ankò Bondyé fè-nou (Éféz. 2:2). Sé grasa Bondyé si nou pé fè timoun, men lè sé moun-la ka fè péché sèksyèl, yo ka montré kè yo pa ni pon rèspé pou kado-lasa. É sa pé anpéché-yo viv pou touttan (1 Kor. 6:9, 10).

7-8. Poukwa sa Labib ka di asi rèlasyon sèksyèl ka ban-nou onlo valè é sa rézonab ?

⁷ Moun ki ka suiv sajès a lèmond ka fè jé èvè prensip a Labib anrapò èvè rèlasyon sèksyèl. Pou yo, sé prensip-lasa ja pasé dimòd. Pa ègzanp, yo ké di : « Poukwa Bondyé té’é kréyé-nou èvè lanvi sèksyèl pou mandé-nou métrizé-yo apré ? » Yo ka konprann kè nou andwa fè tousa  kò an nou anvi fè. Men Labib ka di a pa vré. Bib-la ka ban-nou onlo valè lè i ka anségné kè nou pé kontwolé mové lanvi an nou (Kol. 3:5). Anplisdisa, Jéova ka pèwmèt-nou ni rèlasyon sèksyèl on mannyè ki korèk yenki épi moun-la nou mayé èvè-y la (1 Kor. 7:8, 9). Adan on mayé, on misyé èvè madanm a-y pé ni rèlasyon sèksyèl san yo ni a règrété oben san yo enkyèt. Alòskè byensouvan, moun ki alawoulib adan domenn sèksyèl, sé sa ki ka rivé-yo.

⁸ Labib ka ankourajé-nou a vwè rèlasyon sèksyèl on mannyè ki rézonab. Sa pa ni ayen a vwè èvè sajès a mond-lasa. Labib ka di kè rèlasyon sèksyèl pé pwokiré moun plézi (Pwov. 5:18, 19). Men i ka di osi : « Fò zòchak sav kijan pou zò métrizé kò a zòt on mannyè ki sen é adan lonnè, é fò pa zò lésé tout kalté lanvi sèksyèl ki aladébandad pran lanmen asi zòt menmjan ki sé nasyon-la ki pa konnèt Bondyé » (1 Tés. 4:4, 5).

9. a) Lè 20^èm syèk-la koumansé, yo ankourajé sèwvitè a Jéova a lésé sajès a Pawòl a Bondyé, kivédi méyè sajès-la ki ni la, gidé-yo. Ankijan ? b) Ki konsèy plen sajès nou ka touvé adan 1 Jan 2:15, 16 ? c) Dapré sa nou ka li adan Women 1:24-27, ki péché sèksyèl fò nou rèfizé fè ?

⁹ Lè 20^èm syèk-la koumansé, sèwvitè a Jéova pa lésé moun ki pa sav ka ki byen é ka ki mal ankò kouyonné-yo (Éféz. 4:19). Yo fè onlo éfò pou kontinyé suiv prensip a Jéova. Tou dè Gad a out 1926, an fwansé, té ka ankourajé madanm é misyé a fè atansyon a sa yo ka pansé é a sa yo ka fè pou yo rété pwòp é sen, siwtou lèwvwè yo èvè on moun ki pa menm sèks ki yo. Kèlkèswa sa ki té ka pasé alantou a yo, sèwvitè a Jéova lésé sajès a Pawòl a Bondyé, kivédi méyè sajès-la ki ni la, gidé-yo (li 1 Jan 2:15, 16). Nou ni onlo rèkonésans an tchè an nou pou Jéova davwa i ban-nou Pawòl a-y ! Nou ni onlo rèkonésans osi pas Jéova ka ban-nou, grasa òwganizasyon a-y, nouriti èspirityèl la nou bizwen la pou nou pa lésé sajès a mond-lasa adan domenn sèksyèl kouyonné-nou * (li Women 1:24-27).

10-11. Dapré Labib, kijan sé moun-la té’é yé adan dènyé jou a sistèm-la ?

¹⁰ Labib té ja anonsé kè, adan dènyé jou a mond-lasa, sé moun-la té ké « égoyis » oben té « ké sonjé yenki yomenm » (2 Tim. 3:1, 2 ; nòt). Kifè, nou pa étoné si mond-la ka ankourajé sé moun-la a aji on jan ki égoyis. On ansiklopédi ka èspliké kè, adan lézanné 1970, yo pibliyé onlo liv ki té ka ba moun konsèy asi kijan pou yo réyisi vi a yo. Sèwten adan sé liv-lasa té ka di kè jan ou yé ou yé é kè ou pa ni ayen a chanjé. Fò pa ou vwè ayen dè mové adan jan-la ou yé la. Pa ègzanp, yonn adan sé liv-la té ka di : « Fò-w enmé-w voumenm a-w, pas pa ni pli bèl moun ki-w asi latè. Sé-w ki pli enpòwtan é sé-w ki mérité plis rèspé. » Menm liv-lasa té ka di kè sé a chak moun limenm a-y dè vwè kijan pou i konpòwté-y é kijan pou i aji dapré sa i ka vwè ki jis é ki konvènab.

¹¹ Ès lidé-lasa ka fè-w sonjé on biten ? Sé apépré sa Satan té vlé fè Èv fè. I di-y konsa kè i té’é pé vin ‘kon Bondyé é kè i té’é pé konnèt sa ki byen é sa ki mal’ (Jén. 3:5). Jòdijou, ni moun latè pa’a pòté-yo, kifè, pou yo, pa menm Bondyé pa ni a di-yo ka ki byen é ka ki mal. Sé on biten ou ka konstaté lè ou ka gadé ki valè sé moun-la ka ba mayé.

12. Kijan mond-la ka ankourajé moun a vwè mayé ?

 ¹² Labib ka di kè on mari é madanm a-y dwètèt rèspèkté-yo. Yo dwètèt rèspèkté osi pwomès-la yo fè la jou a mayé a yo. Anplisdisa, dapré Labib, fò-yo byen désidé a rété ansanm yonn èvè lòt. I ka di : « On nonm ké kité manman-y é papa-y, é i ké rété èvè madanm a-y é toulédé ké fè onsèl chè » (Jén. 2:24). Pawkont, sé moun-la ki ka lésé sajès a mond-la détenn asi yo, ka di kè chak moun adan mayé-la dwètèt rété konsantré asi sa limenm bizwen. On liv ki ka palé dè divòs ka di kè, adan sèwten péyi, lè dé moun ka mayé, yo té ni labitid pwomèt-yo kè yo té’é rété ansanm jiskatan yo mò. Men aprézan, sé moun-la préféré di kè yo ké rété ansanm jiskatan yo pé’é enmé-yo ankò. Donk pou onlo moun, mayé sé biten a dé jou. Ki rézilta sa pòté ? Sa détui onlo fanmi é ni onlo moun tchè a yo an bobo toubònman. Pa ni pon dout asi sa, mond-la pa’a rèspèkté mayé, é jan-la yo ka vwè léchòz sé bétiz.

13. Poukwa Jéova hay moun ki ni owgèy ?

¹³ Labib ka di : « Jéova hay toutmoun ki ni owgèy an tchè a-y » (Pwov. 16:5). Poukwa Jéova hay moun ki ni owgèy ? Paskè lè on moun two égoyis, é kè i ka ankourajé lézòt a fè menm biten, i ka vin ni òwgèy kon Satan. Ou ka rann-vou kont : sé Jézi Bondyé itilizé pou kréyé tout biten, men Satan konpranndèdi kè Jézi té kay mété-y ajounou douvan a-y pou adoré-y ! (Mat. 4:8, 9 ; Kol. 1:15, 16). Lè on moun ka akwè-y konsa, i ka montré on mannyè ki klè kè pou Jéova, sajès a mond-la sé bétiz.

14. Kijan Women 12:3 ka édé-nou vwè-nou on mannyè ki rézonab ?

¹⁴ Grasa Labib, nou pé vwè-nou on mannyè ki rézonab. I ka di osi kè sa nòwmal dè ni tibwen lanmou pou noumenm. Jézi di : « Fò-w enmé pwochen a-w kon  voumenm » (Mat. 19:19). Savédi kè fò-nou sousyé-nou dè sa nou bizwen, men on mannyè ki rézonab. Men Labib ka anségné-nou kè fo pa nou jen konpranndèdi kè nou ni plis valè ki lézòt. I plito ka di : « Pa fè ayen èvè lidé a babyé an tèt a-w, ni paskè ou vlé mété-w pli douvan ki lézòt, men, èvè imilité, kontinyé vwè lézòt kon moun ki ni plis valè ki-w » (Filip. 2:3 ; li Women 12:3).

15. Sèlon vou, lè Labib ka di-nou ka pou nou pansé dè noumenm, poukwa sé konsèy-la i ka bay la vréman bon ?

¹⁵ Jòdijou, pou onlo moun ki ni sajès a mond-la, lè Labib ka di kè fo pa nou ni twòp lanmou pou noumenm, sa i ka di la sé bétiz. Dapré yo, si nou ka ba lézòt plis valè ki nou, lézòt pé rivé a pran-nou pou on tèbè é yo pé rivé a pran on pyé asi nou. Men an réyalité, lè ou ka gadé atitid égoyis lasa kè mond a Satan ka ankourajé, ki rézilta sa ka pòté ? Ka ou ka konstaté ? Èskè moun ki égoyis ni tchè-kontan ? Ès vi a fanmi a yo bèl ? Ès yo ni vré zanmi ? Ès yo sé zanmi a Bondyé ? Dapré sa ou ja vwè, kilès ki ka bay méyè rézilta ? Sajès a mond-la oben sajès a Labib ?

16-17. Pou ki biten nou rèkonésan, é poukwa ?

¹⁶ Lè on moun ka suiv konsèy a séla ki ni sajès a mond-la, i ka sanm on touris ki ka mandé ondòt touris ki chimen pou i pran, alòskè yo toulédé pèd. Mi sa Jézi di parapòt a moun a épòk a-y ki té ni sajès swadizan : « Yo sé dé gid ki avèg. É si on avèg ka gidé ondòt avèg, yo toulédé ké tonbé adan on tou » (Mat. 15:14). Mi on biten ki sèten, pou Bondyé, sajès a mond-la sé bétiz.

¹⁷ Labib ki plen sajès ja montré ka i ka pézé. Konsèy a-y toujou « itil pou anségné, pou korijé, pou woumèt tout biten annòd, pou fòwmé moun pou yo maché dwèt » (2 Tim. 3:16, nòt). Grasa òwganizasyon a-y, Jéova ka pwotéjé-nou kont sajès a mond-la. A pa ti rèkonésan nou rèkonésan pou sa ! (Éféz. 4:14). Nouriti èspirityèl-la i ka ban-nou la ka ban-nou fòs-la nou bizwen la pou kontinyé suiv prensip ki adan Pawòl a-y. Nou ni tchè-kontan pas nou ni méyè konsèy ki tini pou gidé-nou : sajès a Labib !