1-2. Lè sitiyasyon an nou ka chanjé, sa pé fè-nou vwè sé prensip-la ki an Bib-la ondòt jan. Èspliké poukwa.

 AN JÉNÉRAL lèwvwè on frè é on sè ka mayé, on ansyen ka fè on diskou é adan diskou-lasa i ka pran déotwa prensip èvè yo anrapò èvè mayé. Sèten a pa prèmyé fwa yo ka tann sé prensip-lasa. Men a moman-lasa, sé prensip-lasa ka vin pi enpòwtan pou yo. Poukwa nou ka di sa ? Pas yo ké pé apliké sé konsèy-lasa adan mayé a yo.

² Lèwvwè 2 krétyen ki mayé k’ay ni on timoun, sé menm biten-la. Pétèt pannan plizyè lanné, yo ni lokazyon tann onlo diskou ki ka èspliké kijan pou lévé timoun. Men aprézan, yo kay vwè sé prensip-lasa ondòt jan. Wi, alèla sé yo ki ké ni on timoun a lévé. Mi on gwo rèsponsabilité mi ! Sa ka montré kè lèwvwè sitiyasyon an nou ka chanjé, sa pé fè-nou vwè sé prensip-la ki an Bib-la ondòt jan menmsi nou té ja konnèt-yo byen. Sé pousa pa ègzanp, moun ki ka adoré Jéova ka li Pawòl a-y chakjou a vi a yo kon Jéova té ka mandé sé wa a Izrayèl-la fè-y é yo ka médité anlè-y (Dét. 17:19).

3. Ka nou ké vwè adan awtik-lasa ?

³ Sé paran-la, zò ni on bèl lonnè toubònman : zò pé aprann timoun a zòt konnèt Jéova. Men pou fè sa, a pa déotwa biten asi Bondyé pou aprann sé timoun-la tousèl. Fò-zò ké aprann-yo enmé Jéova èvè tout tchè a yo. Men kijan zò pé rivé fè sa ? Adan awtik-lasa nou ké vwè 4 prensip adan Labib ki ké itil pou sé paran-la (2 Tim. 3:16).  Nou ké vwè osi ki byenfé paran ki ka adoré Jéova ka jwenn lè yo ka apliké sé konsèy-lasa.

4. Bay on prensip ki pé édé sé paran-la aprann timoun a yo enmé Jéova èvè tout tchè a yo (Jak 1:5).

⁴ Prèmyé prensip : Mandé Jéova ka pou zò fè. Mandé Jéova sajès-la zò bizwen la pou aprann timoun a zòt enmé-y (li Jak 1:5). Pa ni ponmoun ki myé plasé ki Jéova pou ban-nou konsèy. Nou pé di sa pou plizyè rézon. An-nou vwè 2 adan yo. Prèmyèwman, pa ni pon papa ni pon manman ki ni plis èkspéryans ki Jéova (Sòm 36:9). É dézyèmman, sé konsèy-la i ka ban-nou la toujou ka fè-nou dibyen (Iz. 48:17).

5. a) Ki biten òwganizasyon a Jéova ka ba sé paran-la pou édé-yo ? b) Lè ou gadé vidéo-la ki ka montré kijan frè é sè Amorim lévé timoun a yo, ka sa aprann-vou ?

⁵ Jéova ka sèvi èvè Pawòl a-y Labib é èvè òwganizasyon a-y pou ban-nou nouriti èspirityèl agogo, é sa pé édé-zòt aprann timoun a zòt enmé Jéova (Mat. 24:45). Pa ègzanp, zò pé touvé dé bon ti konsèy adan ribrik-la « De l’aide pour les familles ». Pannan plizyè lanné nou té ka touvé ribrik-lasa adan Réveillez-vous ! é alèla, i asi sit an nou jw.org. Anplisdisa, asi sit-lasa ni onlo vidéo ki pé édé sé paran-la suiv konsèy a Jéova pou lévé timoun a yo b (Pwov. 2:4-6).

6. Ka on papa ka pansé dè sé konsèy-la li é madanm a-y ka touvé owa òwganizasyon a Jéova ?

⁶ Onlo paran di jan yo ni rèkonésans pou tousa Jéova ka fè pou édé-yo grasa òwganizasyon a-y. Mi sa on papa non a-y sé Joe ka di : « Lévé 3 timoun adan lavérité, a pa on biten ki fasil. Mwen é madanm an mwen nou ka priyé Jéova toutlè pou i pé sa édé-nou. Lèwvwè nou té ka jwenn sèwten sitiyasyon, souvantfwa té ni on awtik oben on vidéo ki té ka palé dè sa. É awtik-lasa oben vidéo-lasa té ka parèt a bon moman-la. Nou toujou ka mandé Jéova ka pou nou fè é sa ka ban-nou on bèl pal toubònman. » Joe é madanm a-y konstaté kè sé awtik-lasa é sé vidéo-lasa ka édé timoun a yo vin pibon zanmi èvè Jéova.

7. Poukwa sa enpòwtan kè sé paran-la fè tousa yo pé pou ba timoun a yo on bèl ègzanp ? (Women 2:21).

 ⁷ Dézyèm prensip : Ba timoun a zòt on bèl ègzanp. Sé timoun-la ka gadé byen sa paran a yo ka fè é souvantfwa yo ka fè menm biten ki yo. Pa ni pon paran ki pawfè é nou sav sa byen (Wom. 3:23). Men magrésa, fò sé paran-la fè tousa yo pé pou ba timoun a yo on bèl ègzanp (li Women 2:21). Mi sa on papa di lèwvwè i té ka palé dè timoun : « Menmjan ki on éponj, yo ka bwè tout ti pawòl yo ka tann é yo ka fè tousa yo ka vwè moun ki alantou a yo ka fè. » Mi sa i ka di ankò : « Lè nou ka aprann-yo fè on biten é kè yo ka vwè kè nou nou pa’a fè-y, asiré sèten, yo ké fè-nou konprann sa. » Alò si nou anvi timoun an nou enmé Jéova, fò noumenm an nou enmé Jéova fò é fò sè timoun-la vwè sa.

8-9. Ka ègzanp a Andrew é Emma ka aprann-nou ?

⁸ Sé paran-la pé aprann timoun a yo enmé Jéova plizyè mannyè diféran. Mi sa Andrew, on frè ki ni 17 an, ka sonjé : « Pap’an mwen é manman-mwen toujou montré-nou jan lapriyè té enpòwtan. Papa té ka priyé èvè mwen touléswa menmsi an té ja fè priyè an mwen. Manman é papa té ka di-nou toutlè : “Zò pé priyé Jéova kantité fwa zò vlé.” Bèl ègzanp-la yo ban-mwen la rété gravé an mémwa an mwen é jòdila, sa fasil toubònman pou mwen dè priyé Jéova é dè vwè-y kon on Papa ki plen lanmou. » Léparan, toujou sonjé kè jan-la zò enmé Jéova la pé édé timoun a zòt enmé-y osi.

⁹ Aprézan an-nou vwè ègzanp a Emma. Pap’a-y pati é i lagé fanmi-la é manman-y vin touvé-y èvè on gwo dèt asi do a-y. Mi sa i ka rakonté : « Souvantfwa, manman pa té ka ni asé lajan pou nou té pé sa viv men i toujou té ka di-nou jan Jéova ka pran swen a sèwvitè a-y. É adan jan-la i té ka viv la, an té ka vwè kè i té ka kwè adan sa menm. Manman té ka apliké sa i té ka aprann-mwen. » Ka sa ka aprann-nou ? Menm lèwvwè sitiyasyon-la difisil, sé paran-la pé ba timoun a yo on bèl ègzanp (Gal. 6:9).

10. A ki moman onlo paran Izraélit té pé palé èvè timoun a yo ? (Détéwonòm 6:6, 7).

¹⁰ Twazyèm prensip : Palé èvè timoun a zòt toutlè. Jéova té mandé sé Izraélit-la palé èvè timoun a yo touttan (li Détéwonòm 6:6, 7). Adan on jouné, sé paran-la té ni plizyè lokazyon pou yo té pé sa palé èvè timoun a yo é aprann-yo enmé Jéova èvè tout tchè a yo an menm balan-la. Pa ègzanp, on jenn gason té pé pasé onlo tan adan sé chan-la èvè pap’a-y pou édé-y simé oben rékòlté. Kanta sè a-y, i té pé pasé onlo tan adan jouné-la ka édé manman-y koud, ka tisé fil oben ka fè dòt biten an kaz-la. Toupannan yo té ka travay ansanm sé paran-la é sé timoun-la té pé palé dè onlo biten enpòwtan. Pa ègzanp, yo té pé pran tan pou palé dè jan Jéova bon é jan i ka pran swen a tout fanmi-la.

11. Jòdijou, a ki moman sé paran-la pé palé èvè timoun a yo ?

¹¹ Jòdijou, lavi pa kon avan. Adan onlo péyi, sé paran-la pé pa pasé onlo tan èvè timoun a yo pannan jouné-la. Souvantfwa, sé paran-la ka travay é sé timoun-la lékòl. Kifè, si sé paran-la vlé pasé on ti moman èvè timoun a yo pou yo pé sa palé ansanm, fò-yo òwganizé-yo pou sa (Éféz. 5:15, 16 ; Filip. 1:10). Jistèman, étid familyal la sé on bèl lokazyon pou yo  pé sa fè sa. Mi sa on jen frè non a-y sé Alexander ka di : « Pap’an mwen toujou té ka òwganizé-y pou nou pé sa fè étid familyal la. I pa té ka lésé ayen anpéché-nou pasé ti moman-lasa ansanm. É lèwvwè étid-la té fin nou té ka kontinyé palé ansanm. »

12. Ka pou on chèf a fanmi éséyé fè pannan étid familyal la ?

¹² Si sé vou ki sé chèf a fanmi-la, ka ou pé fè pou timoun a-w aprésyé étid familyal la ? Ou té’é pé étidyé nouvo liv-la Ou pé ni tchè-kontan pou touttan ! èvè yo. Liv-lasa pé édé-w ni dé bèl ti kozé èvè timoun a-w. Sèten ou té’é vlé yo di-w sa yo ni asi tchè a yo é sa ki ka trakasé-yo. Alò pa pwofité pou korijé-yo pannan étid familyal la. É si timoun a-w ka di on biten ki pa annakò èvè sé prensip-la ki an Bib-la, fè tousa ou pé pou ou pa fè kòlè. Okontrè, fò ou kontan pas yo di-w sa yo ka pansé franchman é ankourajé-yo pou yo pé sa santi-yo alèz pou di sa ki an tchè a yo. Sé enki lè ou ké sav sa yo ka pansé vréman kè ou ké pé édé-yo byen konm i fo.

13. A ki moman ankò sé paran-la pé édé timoun a yo vin pibon zanmi èvè Jéova ?

¹³ Léparan, pannan tout jouné-la chèché tout ti lokazyon zò ni pou zò pé sa édé timoun a zòt vin pibon zanmi èvè Jéova. Zò pa oblijé atann jou a étid-la pou fè-yo rézonné asi lanmou a Jéova. Mi sa on manman non a-y sé Lisa ka di : « Nou té ka sèvi èvè tousa ki té alantou an nou pou nou té pé sa aprann timoun an nou dé biten asi Jéova. Pa ègzanp, lèwvwè chyen an nou té ka fè dé biten ki té ka fè sé timoun-la ri, nou té ka pwofité pou èspliké-yo jan sa ka montré kè Jéova sé on Bondyé ki ni tchè-kontan é kè sé pas i fè-nou pòtré a-y kè nou osi nou pé ni tchè-kontan oben kè nou pé ri. »

14. Poukwa sa enpòwtan kè sé paran-la édé timoun a yo chwazi dé bon zanmi ? (Pwovèb 13:20).

¹⁴ Katriyèm prensip : Édé timoun a zòt chwazi dé bon zanmi. Pawòl a Bondyé ka montré kè zanmi an nou pé ni on bon oben on mové éfé asi nou (li Pwovèb 13:20). Léparan, ès zò konnèt zanmi a timoun a zòt ? Ès zò ja pasé tibwen tan  èvè yo ? Ka zò pé fè pou édé timoun a zòt chwazi zanmi a yo pawmi moun ki enmé Jéova ? (1 Kor. 15:33). Zò pé fè sa lè zò ka envité moun ki bon bon zanmi èvè Jéova pasé tan èvè fanmi a zòt (Sòm 119:63).

15. Kijan sé paran-la pé édé timoun a yo ni dé bon zanmi ?

¹⁵ Aprézan, an-nou palé dè on papa non a-y sé Tony. I ka èspliké sa li é madanm a-y té ka fè pou édé timoun a yo touvé dé bon zanmi. Mi sa i ka di : « Dépi onpakèt lanné, mwen é madanm an mwen nou ka envité onlo frè é sè akaz an nou, ki yo jenn ki yo ja ni on ti laj. Nou té ka envité-yo manjé èvè nou é nou té ka envité-yo adan étid familyal an nou. Sé on bon mwayen pou aprann konnèt moun ki enmé Jéova é ki ka sèvi-y èvè onlo jwa. Lèwvwè rèsponsab a siwkonskripsyon-la té ka pasé oben kè dé misyonè té ka vin, nou té ka pwopozé-yo rété akaz an nou. Timoun an nou té ka aprann onlo biten lèwvwè sé frè é sè lasa té ka rakonté sa yo té ka viv, jan yo té ka pòté bon mannèv an prédikasyon é jan yo té ka travay rèd pou Jéova. Tousa édé timoun an nou vin pibon zanmi èvè Jéova. » Léparan, fò-zò byen désidé a édé timoun a zòt chwazi dé bon zanmi.

16. Si timoun a zòt ka di-zòt kè i vé pa sèvi Jéova, kijan pou zò réyaji ?

¹⁶ É si, magré tousa zò ka fè, on timoun a zòt ka di-zòt kè i vé pa sèvi Jéova ? Pa mèt an tèt a zòt kè zò échwé é kè zò pa dé bon paran. Chakmoun lib dè fè pwòp chwa a-y, sé Jéova ki kréyé-nou konsa é sa valab pou timoun a zòt osi. Kifè, nouchak pé désidé si nou ké sèvi Bondyé oben si nou pé’é sèvi-y. Si timoun a zòt désidé lagé lavérité, pa pèd èspwa, on jou i pé wouvin a Jéova. Sonjé ègzanp a gason-la ki té pèd la (Lik 15:11-19, 22-24). Tiboug-lasa té pati lwen lwen lwen a bon chimen-la men i fin pa wouvin. Pétèt ni dé moun ki té’é pé di : « Men sa sé on istwa. Ès menm biten-la pé fèt an réyalité  ? » Wi sa pé fèt ! An-nou vwè sa ki rivé on jenn non a-y sé Elie.

17. Ka ki ka ankourajé-y adan ègzanp a Elie ?

¹⁷ Mi sa Elie ka di anrapò èvè manman-y é pap’a-y : « Yo fè tousa yo té pé pou fè-mwen enmé Jéova é Pawòl a-y Labib. Men lè an vin ni 15 an apépré, an té vlé fè sa an té vlé. » Elie koumansé fè dé biten ki pa bon dèyè do a fanmi a-y. Fanmi a-y éséyé édé-y pou i té pé sa rété bon zanmi èvè Jéova, men i pa té ka tann pon lang. Aprésa i kité kaz-la é i koumansé fè enpé mové biten. Men magré tousa, dépawfwa i té ka palé dè Labib èvè on zanmi a-y. Mi sa i ka di : « Pi an té ka palé dè Jéova èvè zanmi an mwen, pi an té ka sonjé Jéova é sa té ka siwprann-mwen. Piti-a-piti sé grenn a vérité-la paran an mwen té simé an tchè an mwen la koumansé pousé. » Sa pran tibwen tan men Elie wouvin a lavérité c. Mésyé, nou ka imajiné jan paran a-y dwèt té kontan davwa yo té fè tousa yo té pé pou yo té aprann Elie enmé Jéova dépi i té toupiti ! (2 Tim. 3:14, 15).

18. Ka ou ka rèsanti lè ou ka vwè jan sé paran-la ka goumé pou aprann timoun a yo enmé Jéova ?

¹⁸ Léparan, Jéova ba-zòt on bèl lonnè toubònman, zò ka lévé on nouvo jénérasyon a moun ki ka adoré Jéova (Sòm 78:4-6). A pa on travay ki fasil. Woulo-bravo pou tout sé éfò-la zò ka fè la akontinyé pou atenn òbjèktif-lasa. Alò kontinyé fè tousa zò pé pou aprann timoun a zòt enmé Jéova é pou aprann-yo kouté-y é suiv prensip a-y ! Si zò ka fè sa, zò pé sèten kè Pap’an nou ki an syèl-la é ki plen lanmou ké kontan toubònman (Éféz. 6:4).