1-2. Délè, ka nou pé ka rèsanti lè nou ka priyé ?

 DÉLÈ, ès ou ni lenprésyon kè Jéova pa’a réponn priyè a-w ? Si sé sa ou ka rèsanti, fò ou sav kè a pa vou tousèl ki adan ka-lasa. Ni onlo frè é sè ki di osi kè sé sa yo rèsanti, siwtou lèwvwè yo jwenn éprèv. Lèwvwè nou ka soufè, nou pé ni dimal a vwè kijan Jéova ka réponn priyè an nou.

² Adan awtik-lasa, nou ké vwè poukwa nou pé sèten kè Jéova ka réponn priyè a sèwvitè a-y (1 Jan 5:15). Nou ké vwè osi poukwa délè nou pé ni lenprésyon kè i pa ka réponn priyè an nou é kijan i ka réponn.

3. Poukwa Jéova vé kè nou priyé-y ?

³ Labib ka ban-nou on garanti : Jéova enmé-nou èvè onlo tandrès é nou sé koko a zyé a-y (Ajé 2:7 ; 1 Jan 4:10). Sé pousa, i vé kè nou mandé-y èd a-y adan priyè an nou (1 Pyè 5:6, 7). I vé kè nou rété bon zanmi èvè-y é i vé édé-nou pou nou pé sa rivé about a difikilté nou ka jwenn.

4. Kijan nou fè sav kè Jéova ka réponn priyè a sèwvitè a-y ? (gadé imaj-la osi).

⁴ Adan Labib, ni onlo istwa ki ka montré kè Jéova ka réponn lèwvwè sèwvitè a-y ka priyé-y. Ès ni on ègzanp an pawtikilyé ki ka vin an lèspri a-w ? Sonjé ègzanp a wa David. Toutolon a vi a-y, té ni onlo moun ki té kont li, é i priyé Jéova pou i té mandé-y édé-y bon tibwen fwa. On jou, i sipliyé Jéova. Mi sa i di : « O Jéova, kouté priyè an mwen ; kouté lè  an ka mandé-w vin a sèkou an mwen. Réponn-mwen, pas ou fidèl é pas ou jis » (Sòm 143:1). Jéova réponn priyè a David é i sové-y anba men a tout lènmi a-y (1 Sam. 19:10, 18-20 ; 2 Sam. 5:17-25). Sé pousa David té pé di byen fò : « Jéova toupré a tout moun ki ka kriyé-y » (Sòm 145:18). Nou osi nou pé répété sa.

5. Lè sèwvitè a-y ki viv an tan lontan té ka mandé-y on biten, ès Jéova toujou réponn-yo kon yo yo té vé ? Bay on ègzanp (gadé imaj-la osi).

⁵ A pa toutlè Jéova ka réponn priyè an nou kon nou té’é vé. É sé sa ègzanp a lapòt Pòl ka montré-nou. I mandé Bondyé woté ‘on pikan i té ni andidan chè a-y’. Pwoblèm-la i té ka jwenn la pa té fasil. Kifè, a 3 rèpriz i mèt jounou atè pou priyédyé akòz dè difikilté-lasa. Ès Jéova réponn priyè a-y ? Wi, men Jéova pa réponn-li kon i té vé. Olyé i woté-y anba éprèv-lasa, Jéova ba-y fòs-la i té bizwen la pou i té pé sa kontinyé rété fidèl a-y (2 Kor. 12:7-10).

6. Poukwa délè nou pé ni lenprésyon kè Jéova pa ka réponn priyè an nou ?

⁶ Nou osi, délè lè Jéova ka réponn priyè an nou, a pa répons-lasa nou té ka atann. Men nou pé sèten kè Jéova sav ègzaktèman ka pou i fè pou édé-nou, é ponmoun pé’é pé fè sa myé ki-y. I pé jous fè « lontan-lontan plis ki tousa nou ka mandé oben kè nou ka imajiné » (Éféz. 3:20). Alò, i pé réponn priyè an nou a moman-la nou pa té ka atann la oben on mannyè nou pa té prévwa.

7. Délè nou pé mandé Jéova on biten men aprésa nou ka vwè kè fò-nou mandé-y ondòt biten. Poukwa nou ka fè sa ? Bay on ègzanp.

⁷ Délè, nou ka mandé Jéova on biten. Men lè nou ka rivé konprann sa Jéova vé kè nou fè pibyen, nou pé rivé a mandé-y ondòt biten. An-nou vwè ègzanp a frè Martin Poetzinger. Kèlkètan apré i mayé, yo mété-y lajòl adan on kan nazi. Odépa, i té ka mandé Jéova pou yo té fè-y sòti an kan-la pou i pran swen a madanm a-y é pou i kontinyé préché. Men 2 simenn apré, i rann-li kont kè pa ni ayen ki té ka montré kè Jéova té kay fè on biten pou yo lagé-y. Alò mi sa i koumansé mandé Jéova adan priyè a-y : « Jéova, souplé, montré-mwen ki biten ou vé an fè. » É aprésa i koumansé sonjé ka sélézòt frè-la ki té an kan-la té ka andiré. Ni onlo adan yo ki té enkyèt pou madanm a yo é pou timoun a  yo. Alò frè Poetzinger di Jéova : « Jéova, mèsi pou nouvo travay-la ou ka ban-mwen fè la. Édé-mwen mwen pé sa ankourajé frè an mwen. » É sé ègzaktèman sa i fè toupannan i rété 9 an adan sé kan nazi la !

8. Lèwvwè nou ka priyé, ki biten pou nou pa jen oubliyé ?

⁸ Fò pa nou oubliyé kè Jéova ni on pwojé é kè i ké réyalizé pwojé-lasa a moman-la i prévwa la. I ni lentansyon fè tout sé biten-la ki ka fè-nou soufè la jòdijou disparèt, é nou pé’é jen tann palé dè sé biten-lasa ankò. A moman-lasa pé ké tini katastwòf natirèl, maladi, lanmò é dòt biten konsa ankò. Jéova ké sèvi èvè Wayòm-la pou fè sa (Dan. 2:44 ; Rév. 21:3, 4). Men annatandan, i ka lésé Satan dirijé mond-la b (Jan 12:31 ; Rév. 12:9). Siwvwè alèla i té ka mèt men a-y pou réglé pwoblèm asi latè, onlo moun té’é pé di kè jan-la Satan ka dirijé la pa si mové ki sa. Alò fò-nou atann kè Jéova réyalizé sèwten adan pwomès a-y. Men sa pa vé di kè i pa’a fè ayen ban nou. An-nou vwè déotwa biten Jéova ka fè pou édé-nou.

9. Lèwvwè nou ni on désizyon a pran, kijan Jéova ka édé-nou ? Bay on ègzanp.

⁹ I ka ban-nou sajès. Jéova ka pwomèt kè i ké ban-nou sajès-la nou bizwen la pou nou pran dé bon désizyon. Nou bizwen sajès-lasa siwtou lèwvwè nou ni on désizyon a pran ki pé chanjé tout rèstan a vi an nou. Pa ègzanp, sé pé pou vwè si nou ka rété sélibatè oben si nou ka mayé (Jak 1:5). An-nou palé dè Maria c, on sè ki sélibatè. I té pyonyé pèwmanan é i té kontan tousa i té ka fè pou Jéova. É lèwgadé i jwenn on frè. Mi sa i ka èspliké : « Nou vin bon bon zanmi é aprésa yonn touvé-y enmé lòt. An té sav kè fò an té pran on désizyon, alò a pa ti priyé an priyé Jéova pou sa. An té bizwen Jéova gidonné-mwen men an té sav byen osi kè a pa Jéova ki té’é pran désizyon-la pou mwen. » Maria sèten kè Jéova réponn priyè a-y é kè i ba-y sajès. Kijan Jéova réponn priyè a-y ? Ében lèwvwè i fè rèchèch adan piblikasyon an nou, Maria touvé déotwa awtik, é adan sé awtik-lasa, i touvé sé répons-la i té ka chèché la. Manman-y osi, ki Témwen a Jéova é ki fidèl, ba-y déotwa konsèy é i kouté sé konsèy-lasa. Sa édé Maria analizé sa i té ka rèsanti. Tousa édé Maria pran on désizyon ki plen sajès.

10. Dapré Filipyen 4:13, kijan Jéova ka soutyenn sèwvitè a-y ? Bay on ègzanp (gadé imaj-la osi).

¹⁰ I ka ban-nou fòs pou nou pé sa andiré. Jéova ka ban-nou fòs-la nou bizwen la pou nou pé sa andiré sé difikilté-la nou ka jwenn la menmjan i fè-y pou lapòt Pòl (li Filipyen  4:13). Sé sa on frè non a-y sé Benjamin konstaté. Lè i té jenn, i pasé onlo tan èvè fanmi a-y an Afrik adan dé kan yo ka mèt moun ki té oblijé kité péyi a yo pou sové vi a yo. Mi sa i ka rakonté : « An té ka priyé Jéova toutlè é an té ka mandé-y ban-mwen fòs pou an fè-y plézi. Jéova réponn priyè an mwen. Pou sa, i trankilizé-mwen é i ban-mwen kouraj pou an té pé sa kontinyé préché. Anplisdisa, i pèwmèt-mwen ni piblikasyon ki édé-mwen rété bon bon zanmi èvè-y. » Mi sa i ka ajouté : « Lèwvwè an té ka li sa sèwten Témwen a Jéova viv é kijan Jéova édé-yo andiré, sa té ka ban-mwen plis fòs pou an té pé sa rété fidèl a Jéova. »

11-12. Kijan Jéova pé sèvi èvè frè é sè an nou pou réponn priyè an nou ? (gadé imaj-la osi).

¹¹ I ka sèvi èvè frè é sè an nou. Dènyé lannuit-la Jézi pasé la asi latè avan i té mò, i priyé oséryé menm. I sipliyé Jéova pou i pa té lésé lézòt pansé kè i sé on moun ki ka di bétiz asi Bondyé é pou yo pa kondanné-y pou sa. Men Jéova fè ondòt biten pou Jézi. I voyé yonn adan sé frè a-y la, on zanj, pou i té pé sa ba-y fòs (Lik 22:42, 43). Menmjan-la, pou i pé sa soutyenn-nou, Jéova pé pousé on frè oben on sè kriyé-nou oben vin vwè-nou pou ankourajé-nou. Noutout dwètèt chèché tout ti lokazyon nou ni pou ‘rann tchè a frè é sè an nou kontan’ grasa on « bèl ti pawòl » (Pwov. 12:25).

¹² An-nou vwè sa ki rivé on sè non a-y sé Miriam. I té tousèl akaz a-y paskè kèlkè simenn avan, i té pèd mari a-y. I té tris é tchè a-y té an bobo. I mèt pléré atè, é i pa té ka rivé arété. I té bizwen palé ba on moun. Mi sa i ka di : « An pa té ni fòs mwen kriyé ponmoun, alò an priyé Jéova. Pannan an té ka palé ba Jéova é kè an té ka pléré, téléfòn an mwen sonné. Sé té on ansyen, on bon zanmi an mwen. » Ansyen-la é madanm a-y konsolé Miriam. Miriam sèten kè sé Jéova ki pousé frè-la kriyé-y.

13. Bay on ègzanp ki ka montré kè Jéova pé itilizé moun ki pa ka adoré-y pou réponn priyè an nou.

¹³ I pé sèvi èvè moun ki pa ka adoré-y  (Pwov. 21:1). Délè, pou réponn priyè a sèwvitè a-y, Jéova ka sèvi èvè moun ki pa ka adoré-y pou édé-yo. Pa ègzanp, i sèvi èvè wa Awtagzèwsès pou édé Néémi viré Jérizalèm. Konsa Néémi té’é pé édé pèp a Jéova woukonstwi vil-la (Néém. 2:3-6). Menmjan-la, jòdijou, Jéova pé pousé moun ki pa ka sèvi-y vin a sèkou an nou.

14. Lè ou ka vwè sa ki rivé Soo Hing, ka ki ka ankourajé-w adan sa ? (gadé imaj-la osi).

¹⁴ On sè non a-y sé Soo Hing sèten kè Jéova sèvi èvè on mèdsen pou réponn priyè a-y. Gason a-y malad an tèt. Anplisdisa, timoun-la tonbé é sa té grav toubònman. Alò li é mari a-y lagé travay a yo pou yo té pé sa okipé-yo dè-y. Men akòz dè sa, yo vin trapé pwoblèm a lajan. Soo Hing té ni lenprésyon kè i pa té’é pé kenbé ankò. I wouvè tchè a-y ba Jéova é i sipliyé-y pou mandé-y fè on biten pou édé-y. Lèwgadé on mèdsen désidé fè on biten pou édé fanmi a-y. Grasa mèdsen-lasa, yo risivwè èd gouvènman-la ka bay é yo pwopozé-yo on kaz yo té pé louwé. Anplisdisa, lwayé-la pa té two chè. Aprésa, mi sa Soo Hing di : « Nou vwè men a Jéova adan sa. I sé Sila ki “ka tann priyè-la”. Nou pa ni pon dout asi sa » (Sòm 65:2).

15. Kijan on sè rann-li kont kè Jéova té ka réponn priyè a-y ?

¹⁵ An jénéral, Jéova pa’a fè on biten èstraòwdinè pou réponn priyè an nou. Men i ka réponn-nou é répons-la i ka ban-nou la sé ègzaktèman sa nou bizwen pou nou rété fidèl a-y. Sé pousa, fò ou toujou chèché a vwè kijan Jéova ka réponn priyè a-w. On sè, non a-y sé Yoko, té ni lenprésyon kè Jéova pa té ka réponn priyè a-y. Alò, i pran on ti kawné é i mété-y ka maké tousa i té ka mandé Jéova adan priyè a-y. I lésé kèlkètan pasé é i viré gadé sa i té maké adan kawné-la. I rann-li kont kè Jéova té réponn prèstout sé priyè-la i té fè la é kè Jéova té jous réponn sèwten priyè kè i té ja oubliyé. Nou osi, fò-nou pran on ti tan pou nou gadé pou vwè kijan Jéova ka réponn priyè an nou (Sòm 66:19, 20).

16. Poukwa nou bizwen fwa pou aksèpté sé répons-la Jéova ka ban-nou la lè nou ka priyè-y ? (Ébré 11:6).

¹⁶ Fò nou ni fwa pou nou priyé Jéova é fò  nou ni fwa osi pou nou aksèpté répons-la i ka ban-nou la, kèlkèswa répons-la (li Ébré 11:6). An-nou vwè ègzanp a Mike é madanm a-y, Chrissy. Òbjèktif a yo sé té ay travay adan on Bétèl. Mi sa Mike ka èspliké : « Pannan plizyè lanné nou ranpli on dèmann pou nou té pé sa ay travay an Bétèl-la. Nou priyé Jéova parapòt a òbjèktif-lasa é a pa onsèl fwa nou fè sa. Men yo pa jen kriyé-nou pou nou vin travay adan Bétèl-la. » Mike é Chrissy té sèten kè Jéova té sav kijan pou i té itilizé-yo adan òwganizasyon a-y é ka ki té myé pou yo. Yo kontinyé fè tousa yo té pé pou Jéova. Yo té pyonyé pèwmanan é yo ay on koté té ka manké pwoklamatè. Anplisdisa, yo édé pou konstwi plizyè batiman ki fèt pou adoré Jéova. Jòdijou, Mike rèsponsab a siwkonskripsyon é èvè madanm a-y, yo ka vizité plizyè lasanblé. Mi sa Mike konstaté : « Jéova toujou réponn priyè an nou. Pétèt a pa sa nou té ka atann men i réponn é i jis ban-nou plis ki sa nou té ka èspéré. »

17-18. Dapré Sòm 86:6, 7, dè ki biten nou pé sèten ?

¹⁷ (Li Sòm 86:6, 7.) Sé David ki maké sòm-lasa é i té sèten kè Jéova té ka kouté priyè a-y é kè i té ka réponn-li. Vou osi, ou pé sèten dè sa. Sé ègzanp-la nou vwè la adan awtik-lasa ka montré kè Jéova pé ban-nou sajès-la é fòs-la nou bizwen la pou nou pé sa andiré. I pé sèvi èvè frè é sè an nou adan lasanblé-la é i pé jous sèvi èvè moun ki po’o ka adoré-y pou édé-nou.

¹⁸ A pa toutlè Jéova ka réponn-nou kon nou té’é vé men i toujou ka réponn-nou. I ka ban-nou ègzaktèman sa nou bizwen é i ka fè sa o bon moman. Alò kontinyé priyé Jéova èvè onlo fwa. Mèt fon an tèt a-w kè i ké toujou pran swen a-w dépi konnyéla é kè adan nouvo mond-la, i ké « rasazyé anvi a tousa ki ka viv » (Sòm 145:16).