1. Ki biten onlo adan nou ni dimal a fè ?

 ÈS SA ja rivé-w chwazi on òbjèktif èspirityèl b, men kè ou ni dimal a atenn-li ? Si ou adan ka-lasa, fò ou sav kè ou pa tousèl. Pa ègzanp, Philip té vé priyé Jéova pi souvan é i té vé priyé-y pibyen osi, men i té ni dimal a touvé tan pou fè sa. Erika té vé òwganizé-y pou rivé alè lèwvwè té ni on réinyon pou prédikasyon-la, men près touttan i té anrèta. Tomáš éséyé li tout Bib-la é i fè sa a plizyè rèpriz. Men mi sa i ka di : « An réyalité, an pa té enmé li Labib. An éséyé li-y a 3 rèpriz, men chakfwa an té ka rivé adan liv a Lévitik, an té ka lagé. »

2. Lèwvwè nou pa ka rivé atenn on òbjèktif kè nou chwazi, poukwa fò pa nou lésé sa dékourajé-nou ?

² Si ou chwazi on òbjèktif èspirityèl men kè ou pa ka rivé atenn-li, pétèt kè ou ni lenprésyon kè ou pa vo ayen. Menm lèwvwè on moun ka chwazi on òbjèktif ki tousenp, sa pé pran onlo tan é sa pé mandé onlo éfò pou i rivé atenn-li. Lèfètkè ou anvi atenn òbjèktif-lasa toujou, sa ka montré kè ou ka ba lanmityé-la ou ni la èvè Jéova onlo valè é kè ou vé ba-y sa ou ni dè méyè. É pou Jéova, tout sé éfò-la ou ka fè la ni onlo valè. Pa oubliyé, Jéova pé’é jen mandé-w fè plis ki sa ou pé fè (Sòm 103:14 ; Mich. 6:8). Alò tchenn kont dè sitiyasyon a-w é lè ou ka chwazi òbjèktif a-w, fè atansyon pou ou pa pann chapo a-w two ho. Si ou chwazi on òbjèktif ki rézonab, ka ou pé fè pou rivé atenn-li ? An-nou vwè déotwa biten ki ké pé édé-w.

3. Pou ou atenn on òbjèktif, fò ou anvi atenn-li toubònman. Poukisa ?

³ Si nou anvi atenn sé òbjèktif-la nou chwazi la pou vin pi bon zanmi èvè Jéova, fò-nou ni bon balan pou atenn-yo. On moun ki vréman anvi fè on biten, présé pou atenn òbjèktif a-y. Nou té’é pé konparé balan-lasa èvè van-la ki ka fè on bato a vwal vansé pou i rivé koté la i k’ay la. Si van-la ka kontinyé vanté, sèten moun-la ki ka menné bato-la ké rivé koté-la i k’ay la. É si ni onlo van, i pé jous rivé avan lè. Menmjan-la, si nou vréman anvi atenn on òbjèktif, nou pi fasil a atenn-li. David sé on frè ki ka viv o Salvadò. Mi sa i ka di : « Lè on moun anvi fè on biten, i ka fè plis éfò. I ka fè ansòt pou ayen pa anpéché-y atenn òbjèktif a-y. » Alò, lè ou ni on òbjèktif, ka ou pé fè pou ou anvi atenn òbjèktif-lasa plis ankò ?

4. Ka nou pé mandé Jéova adan priyè an nou ? (Filipyen 2:13 ; gadé imaj-la osi).

⁴ Mandé Jéova ba-w plis ‘balan’. Grasa lèspri sen a-y, Jéova pé ba-w balan pou atenn òbjèktif a-w (li Filipyen 2:13). Délè, nou ka chwazi on òbjèktif pas nou sav kè sé sa pou nou fè, é sé on bon biten. Men sa pa vé di kè nou vréman anvi atenn òbjèktif-lasa. Sé sa ki rivé Norina, on sè ki ka rété an Ouganda. Òbjèktif a-y, sé té étidyé Labib èvè on moun, men konm pou-y i pa té sav anségné moun, i pa té ni balan pou fè sa. Ka ki édé-y ? Mi sa i ka rakonté : « An koumansé pa priyé Jéova chakjou pou mandé-y ban-mwen anvi atenn òbjèktif an mwen plis ankò. É pou an té aji annakò èvè priyè an mwen, an fè éfò pou an té aprann anségné moun pibyen. Kèlkè mwa apré, an rann-mwen kont kè an té anvi kondui on étid plis ki avan. Menm lanné-la, an koumansé 2 étid a Labib. »

5. Pou nou pé sa ni plis balan pou atenn òbjèktif an nou, asi ki biten pou nou pran tan réfléchi ?

⁵ Pran tan réfléchi asi sa Jéova ja fè ba-w (Sòm 143:5). Jéova té ba lapòt Pòl favè-la i pa té mérité la é lè i té ka pran tan réfléchi asi sa, sa té ka ba-y balan pou travay rèd pou Jéova (1 Kor. 15:9, 10 ; 1 Tim. 1:12-14). Menmjan-la, pi ou ké pran tan réfléchi asi sa Jéova ja fè ba-w, pi ou ké anvi atenn òbjèktif a-w (Sòm 116:12). O Ondiras, ni on sè ki té vé vin pyonyé pèwmanan. I ka èspliké ka ki édé-y atenn òbjèktif a-y. Mi sa i ka di : « An pran tan réfléchi asi jan Jéova enmé-mwen. I fè-mwen vin adan pèp a-y. I ka pran swen an mwen é i ka pwotéjé-mwen. Lè an réfléchi asi tout sé biten-lasa, an vin enmé Jéova pi fò é sa ban-mwen anvi fè plis éfò pou an vin pyonyé. »

6. Ki dòt biten ki pé ban-nou anvi atenn òbjèktif an nou plis ankò ?

⁶ Konsantré-w asi sé bon biten-la sa ké pwokiré-w la lèwvwè ou ké atenn òbjèktif a-w. Talè la nou palé dè Erika. I té vé rivé alè adan sé réinyon-la pou prédikasyon-la é i rivé atenn òbjèktif-lasa. Kijan i rivé fè sa ? Mi sa i ka di : « An rann-mwen kont kè lèwvwè an té ka rivé anrèta adan sé réinyon-la pou prédikasyon-la, an té ka raté onlo biten. Men siwvwè an té ka rivé pi bonnè, an té’é ni tan di frè é sè an mwen bonjou é pasé on ti moman èvè yo. Anplisdisa,  adan sé réinyon-lasa, an té’é pé tann konsèy ki ka mèt plis jwa an tchè an nou é ki ka édé-nou fè on pibon travay an prédikasyon. » Erika konsantré-y asi sé bon biten-la sa té’é pwokiré-y la siwvwè i té ka rivé alè, é i rivé atenn òbjèktif a-y. É vou, ki bon biten sa ké pòté ba-w si ou ka rivé atenn òbjèktif a-w ? Ou ja ni labitid li Labib é priyé, men si òbjèktif a-w sé vin pibon adan sé domenn-lasa, sonjé kè sa ké édé-w vin pibon zanmi èvè Jéova ankò (Sòm 145:18, 19). Si ou vé imité on kalité Jézi té ni, sonjé kè lèwvwè ou ké rivé ni kalité-lasa, ou ké antann-vou pibyen èvè lézòt (Kol. 3:14). Pétèt ou ni plizyè rézon ki ka ba-w anvi atenn òbjèktif a-w. É si ou té ka maké tout sé rézon-lasa asi on ti lis ? Aprésa, pran labitid gadé lis-lasa toutlè. Nou té palé dè Tomáš osi talè la. Mi sa i ka di : « Lè an ka vwè kè an ni plizyè rézon pou atenn on òbjèktif, sa ka ban’an plis fòs pou an pa lagé. »

7. Ka ki édé Julio é madanm a-y atenn òbjèktif a yo ?

⁷ Fè ansòt pou-w pasé tan èvè frè é sè ki ké ankourajé-w (Pwov. 13:20). Julio é madanm a-y té vé bay on pal on koté té ka manké pwoklamatè é yo rivé atenn òbjèktif a yo. Kijan yo rivé fè sa ? Mi sa i ka di : « Nou chwazi dé zanmi ki té ka ankourajé-nou atenn òbjèktif an nou. Onlo adan yo té ni òbjèktif kon tan nou é yo rivé atenn-yo. Kifè yo té pé ban-nou dé bon ti konsèy. Yo té ka mandé-nou osi kijan sa té ka pasé pou nou é dépi nou té bizwen, yo té ka ankourajé-nou. »

8. Si sé enki lèwvwè nou ni balan nou ka fè éfò pou atenn òbjèktif an nou, ka ki pé rivé-nou ? (gadé imaj-la osi).

⁸ An réyalité, fò-nou rèkonnèt kè ni dé jou nou pa tèlman anvi fè sèwten biten. Men lè sa ka rivé, ès sa vé di kè pa ni mwayen nou fè pa menm onsèl pli pou atenn òbjèktif an nou ? Awa. An-nou pran on ègzanp : lèwvwè ni onlo van, on bato a vwal ka rivé koté-la i k’ay la pi fasilman. Men a pa toutlè van-la ni menm fòs-la é tin dé jou pa ni van ditou. Ès sa vé di kè moun-la ki ka menné bato-la pé pa kontinyé fè douvan ? Pa oblijé. Pa ègzanp, ni sèwten bato a vwal ki ni on motè oben ki ni ranm. Kifè, moun-la ki asi bato-la pé sèvi èvè sa pou i kontinyé vansé pou rivé la i k’ay la. Menmjan a pa toutlè van-la ni menm fòs-la, a pa toutlè nou ni menm balan-la pou fè on biten, é tin dé jou nou pa ni balan menm. Men si sé enki lèwvwè nou ni balan nou ka fè éfò pou atenn òbjèktif an nou, pétèt nou pé’é jen rivé atenn-li. Pawkont, nou pé fè kon moun-la ki asi bato-la. I ka touvé dòt mwayen pou kontinyé fè douvan pou rivé koté-la i k’ay la. Menmjan-la, nou pé kontinyé fè sèwten biten pou atenn òbjèktif an nou menmsi nou pa ni balan. Sé vré, sa ké mandé kè nou karé adan sa nou ka fè, men sa vo lapenn. An-nou vwè kijan nou pé rivé fè sa. Men avan sa, an-nou réponn a on kèsyon kè pétèt sèwten moun ka pozé-yo.

9. Ès fò-nou kontinyé fè éfò pou atenn on òbjèktif menmsi nou pa tèlman anvi atenn-li ?

⁹ Jéova vé nou sèvi-y dè-tou-kè é i vé kè  nou fè-y èvè tchè-kontan osi (Sòm 100:2 ; 2 Kor. 9:7). Alò, si nou chwazi on òbjèktif èspirityèl men kè an réyalité nou pa tèlman anvi atenn òbjèktif-lasa, ès fò-nou fè éfò pou atenn-li kanmenm ? An-nou palé dè ègzanp a lapòt Pòl. Mi sa i di : « Kò an mwen, an ka ba-y bon kou é an ka menné-y kon on èsklav » (1 Kor. 9:25-27). Menm lèwvwè Pòl pa té anvi fè sa Jéova té ka mandé-y, i té ka fè-y kanmenm. Ès Jéova té kontan lè i té ka vwè sa Pòl té ka fè pou-y ? Wi ! É dayè Jéova rékonpansé-y pou tout sé éfò-la i fè la (2 Tim. 4:7, 8).

10. Si nou pa ni balan pou atenn òbjèktif an nou men kè nou ka fè éfò pou atenn-li kanmenm, ki byenfé sa ké pwokiré-nou ?

¹⁰ Menmjan-la, Jéova ka kontan lè i ka vwè kè nou ka fè éfò pou atenn sé òbjèktif-la nou ni la alòskè nou pa ni pon balan pou atenn-yo. I ni tchè-kontan pas i sav kè menmsi nou pa enmé sa nou ka fè, nou enmé-y. Menmjan i béni éfò a Pòl, sé menmjan-la osi i ké béni éfò an nou (Sòm 126:5). É lè nou ka vwè jan Jéova ka béni-nou, sa pé ban-nou balan pou nou fè dé biten pou-y. Mi sa Lucyna, on sè ki ka rété Pològn ka di : « Délè, an pa gè anvi ay préché é sa ka rivé-mwen siwtou lèwvwè an las. Men lè an k’ay préché, aprésa, an ka tèlman kontan. Sé on bèl rékonpans toubònman. » Konnyéla, an-nou vwè ka nou pé fè lè nou pa gè ni balan pou fè on biten.

11. Kijan Jéova pé édé-nou ni plis métriz ?

¹¹ Priyé Jéova pou mandé-y ba-w métriz. Lè on moun ni métriz, i pé fè ansòt pou sa i ka rèsanti pa pran lanmen asi-y é pou i pa fè nenpòt ki biten. An jénéral, lè nou ka sèvi èvè èsprésyon-lasa sé pou palé dè jan on moun ka kenbé kò a-y pou i pa fè mové biten. Men, nou bizwen ni métriz osi pou nou pé sa fè sa ki byen, siwtou lèwvwè fò-nou fè on biten ki difisil a fè oben lèwvwè fò-nou fè on biten kè nou pa tèlman anvi fè. Pa oubliyé kè kalité-lasa ka fè pawti a fwi a lèspri sen. Alò pou ou pé sa ni métriz, fò ou mandé Jéova ba-w lèspri sen a-y (Lik 11:13 ; Gal. 5:22, 23). Nou palé dè David talè la. I ka èspliké kijan lapriyè édé-y. I té ja ka étidyé tousèl a-y men i té vé pran labitid fè sa chak simenn. Mi sa i ka di : « An té ka mandé Jéova édé-mwen ni métriz. Grasa-y, an koumansé suiv on pwogram pou étidyé tousèl an mwen é jis a jòdijou an po’o jen arété suiv-li. »

12. Kijan Éklézyas 11:4 ka édé-nou atenn òbjèktif an nou ?

¹² Pa atann kè sitiyasyon a-w vin pawfè. Adan mond-lasa, biten a ponmoun pé’é jen vin pawfè. Alò, si sé sa ou ka atann, pétèt kè ou pé ké jen atenn òbjèktif a-w (li Éklézyas 11:4). Mi sa on frè, non a-y sé Dayniel ka di : « Kèlkèswa sitiyasyon a on moun, toujou ké ni on biten pou frenné-y. Alò lè nou ni on biten a fè, fò pa nou atann kè sitiyasyon an nou vin pibon men méyè biten pou nou fè sé koumansé travay pou atenn òbjèktif an nou. » Paul, on frè ki ka rété an Ouganda ka ban-nou ondòt rézon ankò ki ka fè kè nou pa dwètèt voyé sa nou ni a fè pou plita. Mi sa i ka di : « Lè nou ka éséyé fè on biten menmsi nou adan on sitiyasyon ki difisil, nou ka ba Jéova on biten pou i béni. » (Mal. 3:10).

13. Lè nou ka chwazi òbjèktif kè nou ké pé atenn fasilman poukwa sé on bon biten ?

¹³ Chwazi òbjèktif kè ou ké pé atenn fasilman. Délè nou pa ka anvi fè on biten pas nou ka pansé kè òbjèktif-la nou chwazi la two difisil pou nou. Si ou ka rann-vou kont kè òbjèktif-la ou chwazi-la two rèd ba-w, ès ou pa té’é pé chwazi dé òbjèktif ki pi piti é ki ké édé-w rapwoché-w dè òbjèktif-la ou té vé atenn la odépa ? Pa ègzanp, si ou vé ni on kalité, ès ou pa té’é pé koumansé pa montré kè ou ni kalité-lasa adan dé toupiti biten ? Si ou vé li tout Bib-la, pétèt  kè odépa ou pa oblijé li onlo pasaj. Nou palé dè Tomáš an koumansman a awtik-la, i té ka goumé bon goumé la pou i té rivé li Labib adan on lanné. Mi sa i ka di : « An té désidé li Labib men an té ka fè sa ogalo. Alò an désidé éséyé ankò, men kou-lasa, an òwganizé-mwen pou an té li déotwa vèwsé adan on chapit chakjou é pou an té médité asi sa an té ka li. A moman-lasa, an koumansé aprésyé li Bib an mwen. » Pi Tomáš té enmé li Labib, pi i té ka pasé tan ka fè sa. Anfinaldikont, i réyisi li tout Labib adan on lanné c.

14. Ki difikilté noutout pé rivé a jwenn ?

¹⁴ Malérèzman, menmsi nou byen anvi fè tousa nou ni a fè é menmsi nou ka fè éfò pou nou séryé an zafè an nou, ni dé jou, biten-la pa bon menm. Pa ègzanp, « évènman nou pa té prévwa » pé anpéché-nou ni tan-la nou bizwen la pou nou pé sa atenn òbjèktif an nou (Ékl. 9:11). Lèwvwè nou ka jwenn difikilté, sa pé dékourajé-nou é a moman-lasa, nou pa ni onlo fòs (Pwov. 24:10). Konm nou enpawfè, nou pé fè érè é akòz dè sa nou pé pran bon gaz pou atenn òbjèktif an nou (Wom. 7:23). É délè, pétèt sé las nou las (Mat. 26:43). Kijan nou pé rivé about a sé difikilté-lasa ?

15. Lè nou ka jwenn on difikilté, poukwa fò pa nou mèt an tèt an nou kè nou pé’é jen rivé atenn òbjèktif an nou ? (Sòm 145:14).

¹⁵ Sonjé kè a pa paskè ou ka jwenn on difikilté kè ou pé’é rivé atenn òbjèktif a-w. Labib ka di-nou kè nou pé rivé a ni pwoblèm si pwoblèm. Men i ka di on mannyè ki klè osi kè nou pé woupran doubout an nou siwtou siwvwè Jéova ka soutyenn-nou (li Sòm 145:14). Mi sa Philip, on frè nou palé dè-y talè la ka di : « Sa ki pi enpòwtan, a pa kantité fwa an tonbé, men sé kantité fwa an ka woupran doubout an mwen. » Talè la nou palé dè David, é mi sa i ka di : « Lèwvwè on biten pa’a fèt kon an té’é vlé, oben kè ni on jou ayen pa maché pou mwen, an pa’a  lésé sa anpéché-mwen fè douvan. Okontrè, an ka éséyé vwè sa kon on bèl lokazyon pou an montré Jéova kè an enmé-y. » Wi, lèwvwè ou ka éséyé atenn òbjèktif a-w menm lè ou ka jwenn difikilté, ou ka montré Jéova kè ou anvi fè-y plézi poudèbon. Ou ka imajiné jan Jéova dwèt ni tchè-kontan lè i ka vwè tout sé éfò-la ou ka kontinyé fè la !

16. Lèwvwè nou pa ka rivé fè on biten, ka sa ka montré-nou délè ?

¹⁶ Lèwvwè ou pa ka rivé atenn òbjèktif a-w, vwè sa kon on lokazyon pou ou aprann on biten. Gadé pou vwè poukwa ou pa rivé atenn òbjèktif a-w. Mi sa pou-w mandé-w : « Ka an pé fè pou sa pa rivé ankò ? » (Pwov. 27:12). Délè, lè nou pa ka rivé fè on biten, sa pé montré-nou kè lè nou chwazi òbjèktif an nou, nou pann chapo an nou two ho. Si ou ka pansé kè pétèt sé ka a-w, pran on ti tan pou analizé òbjèktif a-w é gadé pou vwè si sé on òbjèktif ou pé rivé atenn d. Jéova pé’é jen di kè ou sé on féba pas ou pa rivé atenn on òbjèktif ki té two fò pou-w (2 Kor. 8:12).

17. Poukwa fò ou sonjé tousa ou ja rivé fè ?

¹⁷ Sonjé tousa ou ja rivé fè. Labib ka di kè « Bondyé pa enjis pou oubliyé sa zò fè » (Ébr. 6:10). Alò nou nonplis, fò pa nou oubliyé sa. Réfléchi asi tousa ou ja fè : pétèt kè alèla ou bon bon zanmi èvè Jéova, kè ou koumansé palé dè-y èvè moun ki alantou a-w oben kè ou pran lèbatèm. Menmjan ou rivé pwogrésé pou ou té pé sa atenn sèwten òbjèktif èspirityèl ou té ni, sé menmjan-la osi, ou pé kontinyé pwogrésé pou ou atenn òbjèktif-la ou ni la alèla (Filip. 3:16).

18. Toupannan ou ka éséyé atenn òbjèktif a-w, ka pou ou gadé ? (gadé imaj-la osi).

¹⁸ Èvè èd a Jéova, ou pé rivé atenn òbjèktif a-w. A moman-lasa ou ké kon on moun ki ka menné on bato é ki kontan lè i ka rivé koté-la i k’ay la. Men fò pa ou jen oubliyé kè onlo moun ki ka menné bato ni tchè-kontan pannan tout vwayaj a yo. Sé konsa vou osi ou ké ni tchè-kontan si ou ka gadé pou vwè kijan Jéova ka édé-w é ka béni-w toupannan ou ka éséyé atenn on òbjèktif pou vin pi bon zanmi èvè-y (2 Kor. 4:7). Si ou pa lagé, ou ké jwenn onlo bénédisyon é yo ké pi bèl ki séla ou ja ni la (Gal. 6:9).