AWTIK POU ÉTIDYÉ 20
KANTIK 67 « Préché pawòl-la »
Fò lanmou ba-w anvi kontinyé préché !
« Fò-yo préché bon nouvèl-la pou tout sé nasyon-la dabò » (MAWK 13:10).
ON TI LIDÉ ASI SA NOU KAY VWÈ
Nou ké vwè kijan lanmou pé ban-nou balan pou préché é kijan lanmou pé édé-nou préché èvè tout tchè an nou osi.
1. Ka nou aprann adan lasanblé jénéral a 2023 ?
PANNAN lasanblé jénéral a 2023 a, yo palé dè déotwa biten nou vin konprann pibyen anrapò èvè kwayans an nou é sa ban-nou bon balan. Anplisdisa nou té kontan tann dé nouvo biten yo anonsé anrapò èvè prédikasyon-la. Pa ègzanp, nou aprann kè lèwvwè Bondyé ké détwi Gran Babilòn-la, pétèt kè aprésa sèwten moun ké vin jwenn-nou adan pèp a Jéova. Nou aprann osi kè dépi novanm 2023, sé pwoklamatè-la pé’é bizwen maké konmen lè yo préché asi rapò a prédikasyon a yo. Konm ni sé chanjman-lasa, ès sa vé di kè prédikasyon-la pa enpòwtan kon avan ? Awa, a pa sa ditou !
2. Pi tan ka pasé é pi sa enpòwtan kè nou préché. Poukwa nou ka di sa ? (Mawk 13:10).
2 Pi tan ka pasé é pi sa enpòwtan kè nou préché. Poukwa nou ka di sa ? Pas adan on ti moman lafen ké asi nou. Sonjé sa Jézi ni lokazyon di anrapò èvè prédikasyon-la ki té’é fèt pannan sé dènyé jou-la (li Mawk 13:10). Dapré liv a Matyé, Jézi di kè yo té’é préché bon nouvèl-la asi tout latè joustan « lafen » rivé (Mat. 24:14). Lèwvwè yo ka palé dè lafen, sé pou palé dè lè Bondyé ké détwi mond méchan a Satan. Sé dé biten ki ké fèt talè é Jéova ja désidé ‘ki jou’ sa ké fèt é ‘a ki lè’ sa ké fèt osi (Mat. 24:36 ; 25:13 ; Akt 1:7). Alò pi tan ka pasé, pi jou-lasa toupré rivé (Wom. 13:11). Sé pousa annatandan, fò-nou kontinyé préché.
3. Ka ki ka ban-nou anvi préché ?
3 Mi on kèsyon enpòwtan pou noutout pozé-nou : « Poukwa nou ka préché bon nouvèl-la ? » An dé mo kat pawòl, sé lanmou ki ka pousé-nou préché. Lè nou ka préché, nou ka montré kè nou enmé bon nouvèl-la, kè nou enmé sé moun-la é siwtou, kè nou enmé Jéova é non a-y. An-nou ègzaminé chak sé rézon-lasa yonn pa yonn.
NOU KA PRÉCHÉ PAS NOU ENMÉ BON NOUVÈL-LA
4. Kijan nou ka réyaji lè nou ka tann on bon nouvèl ?
4 Sonjé on bon nouvèl ou tann. Pa ègzanp sé pé on moun an fanmi a-w ki vin ni on timoun, oben ou fin pa touvé travay-la ou bizwen la. Ka ou rèsanti a moman-lasa ? Sèten ou té présé palé dè bon nouvèl-lasa èvè fanmi a-w é zanmi a-w. Ès sé konsa ou réyaji lèwvwè ou tann palé dè pi bon nouvèl-la ki ka ègzisté la : bon nouvèl a wayòm a Bondyé ?
5. Prèmyé fwa ou vin konnèt sé vérité-la ki an Bib-la, ka ou rèsanti ? (gadé sé imaj-la osi).
5 Sonjé sa ou rèsanti lèwvwè ou vin konnèt lavérité. Ou aprann kè Pap’a-w ki an syèl-la enmé-w é kè i anvi ou fè pawti a fanmi a-y ki plen èvè moun ki ka adoré-y. Ou aprann osi kè i pwomèt kè tout soufrans ké fin, kè adan nouvo mond-la ou ké pé wouvwè moun kè ou enmé é ki mò, é ou aprann enpé dòt biten ankò (Mawk 10:29, 30 ; Jan 5:28, 29 ; Wom. 8:38, 39 ; Rév. 21:3, 4). Sé vérité-lasa ni onlo valè é yo touché tchè a-w (Lik 24:32). Tèlman ou té enmé tousa ou té ka aprann, ou té anvi palé dè sa èvè dòt moun ! (konparé èvè sa ki maké adan Jérémi 20:9).
Lèwvwè nou vin konnèt bon nouvèl-la, pa té ni mwayen nou pa palé dè sa ! (gadé paragraf 5 la).
6. Ka ègzanp a Ernest é Rose ka aprann-nou ?
6 An-nou palé dè on frè non a-y sé Ernest b. Lè i té ni 10 an apépré, pap’a-y mò. Mi sa i ka rakonté : « An té ka mandé-mwen : “Ès pap’an mwen an syèl-la ? Oben ès tout biten fin pou-y ?” Lè an té ka vwè sélézòt timoun-la ki té ni pap’a yo èvè yo toujou, an té ka jalou-yo. » Souvantfwa Ernest té k’ay an simityè-la, i té ka mété-y ajounou douvan tonm a pap’a-y é i té ka priyé. Mi sa i té ka di adan priyè a-y : « Souplé Bondyé, an vé sav ola pap’an mwen yé. » Apépré 17 an apré pap’a-y mò, on Témwen a Jéova pwopozé-y étidyé Labib èvè-y é i aksèpté volontyé. I té kontan lèwvwè i aprann kè sé mò-la pa konnèt ayen, kè sé konsi sé dòmi yo ka dòmi é kè Labib ka pwomèt kè i ké ni on rézirèksyon (Ékl. 9:5, 10 ; Akt 24:15). Ni tèlman lontan i té ka atann pou ni sé répons-lasa ! Lèwvwè i té ka dékouvè sé vérité-la ki adan Bib-la, sa té ka mèt onlo jwa an tchè a-y. Onlè, Rose, madanm a-y, vin adan étid a-y é li osi i mété-y ka aprésyé sa i té ka aprann. An 1978, yotoulédé pran lèbatèm. Yo fè fanmi a yo, zanmi a yo é touséla ki té byen vé kouté-yo konnèt sé bèl vérité-la ki an Bib-la. Ki rézilta sa bay ? Ernest é Rose édé pliski 70 moun vin a lavérité.
7. Lèwvwè nou ka koumansé enmé sa nou ka aprann adan Bib-la, ka ki ka pasé ? (Lik 6:45).
7 Lèwvwè nou ka koumansé enmé sa nou ka aprann adan Bib-la, pa ni mwayen nou pa palé sa èvè dòt moun (li Lik 6:45). Nou ka rèsanti menm biten ki disip a Jézi ki viv o 1é syèk. Mi sa yo di : « Nou pé pa arété palé dè sé biten-la nou vwè la é dè sé biten-la nou tann la » (Akt 4:20). Tèlman nou enmé lavérité, nou anvi fè on maksimòm dè moun konnèt-li.
NOU KA PRÉCHÉ PAS NOU ENMÉ SÉ MOUN-LA
8. Poukwa nou anvi palé sé moun-la dè bon nouvèl-la ? (gadé ti karé-la « Aji èvè lanmou : Alé é fè disip » ; gadé imaj-la osi).
8 Menmjan ki Jéova é Gason a-y, nou enmé sé moun-la (Pwov. 8:31 ; Jan 3:16). Nou ni onlo konpasyon pou yo pas yo « san Bondyé » é yo ‘pa ni èspérans’ (Éféz. 2:12). Sé konsi yo ka néyé anba tout pwoblèm yo ka jwenn adan vi a yo é nou, nou ni on kòd pou halé-yo monté, kivédi bon nouvèl a Wayòm la. Lanmou-la é konpasyon-la nou ni pou yo la ka pousé-nou fè tousa nou pé pou nou palé-yo dè bon nouvèl-la. Lèwvwè yo ka tann bon nouvèl-lasa, sa pé ba-yo on èspwa, sa pé édé-yo ni tchè-kontan dépi konnyéla é pétèt kè grasa sa, on jou yo ké pé pwofité dè « vré vi-la », kivédi yo ké pé viv asi latè pou touttan adan nouvo mond-la (1 Tim. 6:19).
Davwa nou enmé sé moun-la é kè nou ni konpasyon pou yo, sa ka ban-nou anvi palé-yo dè bon nouvèl-la (gadé paragraf 8 la).
9. Ki mésaj nou ka préché pou avèti sé moun-la é poukwa nou ka fè sa ? (Ézékyèl 33:7, 8).
9 Davwa nou enmé sé moun-la, sa ka ban-nou anvi di-yo osi kè fen a mond méchan la toupré rivé (li Ézékyèl 33:7, 8). Nou ni konpasyon pou toutmoun é adan yo, ni moun a fanmi an nou ki pa ka sèvi Jéova. Onlo moun ka viv ti viv a yo é yo pa ka rann-yo kont sa ki kay rivé talè : « on gwo tribilasyon ; on tribilasyon konsa poko jen fèt dépi lèmond ka ègzisté, é sa pé’é jen fèt ankò » (Mat. 24:21). Nou vlé yo sav sa ki ké fèt pannan gwo tribilasyon-la, lèwvwè Bondyé ké fè jijman a-y. Dabò, Bondyé ké détwi tout sé fo rèlijyon-la, aprésa i ké détwi tout mond méchan lasa pannan Awmagédon (Rév. 16:14, 16 ; 17:16, 17 ; 19:11, 19, 20). Nou ka priyé pou on maksimòm dè moun kouté sa nou ka di-yo é pou yo chwazi sèvi Jéova èvè nou. Men ka nou pé di dè séla ki pa ka kouté-nou konnyéla ? Sé pétèt ka a sèwten moun an fanmi an nou...
10. Poukwa sa enpòwtan toubònman kè nou kontinyé di sé moun-la kè Bondyé kay détwi Gran Babilòn-la ?
10 Kon nou vwè-y adan awtik-la ki té avan la, pétèt Jéova ké désidé sové moun ki ké koumansé ni fwa adan-y lè yo ké vwè-y détwi Gran Babilòn-la. Si sé sa menm, sé alè pou nou di sé moun-la sa ki kay pasé. Sonjé sa : pétèt sa nou ka di-yo jòdila ké wouvin an lèspri a yo lèwvwè sa ké rivé (konparé èvè sa ki maké adan Ézékyèl 33:33). Pétèt yo ké sonjé sa nou té di-yo pou avèti-yo é pétèt sa ké pousé-yo sèvi Jéova èvè nou avan i two ta. Gad-la ki té ka véyé lajòl-la adan vil a Filip koumansé ni fwa adan Jéova enki apré « on gwo tranmanntè » fèt. Menmjan-la, lèwvwè Bondyé ké détwi Gran Babilòn-la, sa ké soukwé mond-lasa. É a moman-lasa, pétèt kè sèwten moun ki pa’a kouté mésaj an nou jòdila ké koumansé ni fwa an Bondyé (Akt 16:25-34).
NOU KA PRÉCHÉ PAS NOU ENMÉ JÉOVA É NOU ENMÉ NON A-Y
11. Kijan nou ka ba Jéova glwa é lonnè, é kijan nou pé ba-y puisans osi ? (Révélasyon 4:11 ; gadé sé imaj-la osi).
11 Prèmyé biten ki ka fè si nou ka préché sé kè nou enmé Jéova é kè nou enmé non a-y ki sen. Pou nou, lè nou ka préché, sé louwé nou ka louwé Bondyé an nou kè nou enmé onlo (li Révélasyon 4:11). Nou dakò a san pou san pou di kè Jéova mérité sèwvitè a-y ba-y glwa, lonnè é puisans. Nou ka ba Jéova glwa é nou ka ba-y lonnè lèwvwè nou ka ba sé moun-la ki alantou an nou la dé prèv ki solid pou yo sèten kè sé ‘Bondyé ki kréyé tout biten’ é kè sé-y ki ban-nou lavi. Nou ka ba-y puisans, lèwvwè nou ka fè tousa nou pé pou sèvi èvè tan an nou, èvè fòs an nou é èvè sa nou ni pou nou pé sa préché (Mat. 6:33 ; Lik 13:24 ; Kol. 3:23). An dé mo kat pawòl, nou pé di kè konm nou enmé Pap’an nou, nou enmé palé dè-y. Men anplisdisa, nou anvi fè dòt moun konnèt non a-y é kijan dè moun i yé. Poukwa nou ka di sa ?
Nou ka ba Jéova puisans, lèwvwè nou ka fè tousa nou pé pou sèvi èvè tan an nou, èvè fòs an nou é èvè sa nou ni pou nou pé sa préché (gadé paragraf 11 la).
12. Nou ka fè non a Jéova vin sen lè nou ka préché. Kijansa ?
12 Davwa nou enmé Jéova, sa ka ban-nou anvi fè-non a-y vin sen (Mat. 6:9). Sa vé di nou anvi di lézòt kè tout sé vyé biten-la Satan ka di la asi Jéova pa vré (Jén. 3:1-5 ; Jòb 2:4 ; Jan 8:44). Lè nou ka préché, nou anvi di tout sé moun-la ki dakò pou kouté-nou la kimoun ki Jéova. Nou anvi fè toutmoun konnèt kè pi bèl kalité a Jéova sé lanmou. Nou anvi fè-yo sav osi kè i ka gouvèné èvè jistis é kè grasa wayòm a-y, i ké woté tousa ki ka fè moun soufè. Toutmoun ki asi latè ké ni tchè-kontan é ké viv anpé (Sòm 37:10, 11, 29 ; 1 Jan 4:8). Lè nou ka palé èvè sé moun-la dè tout sé biten-lasa asi Jéova, nou ka fè non a-y vin sen. Nou kontan osi pas nou ka aji kon Témwen a Jéova dwètèt aji. Poukwa nou ka di sa ?
13. Nou sé Témwen a Jéova. Poukwa nou kontan non-la nou ka pòté la ? (Izayi 43:10-12).
13 Jéova chwazi-nou pou nou vin « témwen » a-y (li Izayi 43:10-12). Mi sa nou té pé li adan on lèt Komité santral la maké ni kèlkè lanné dè sa : « Lè yo ka kriyé-nou Témwen a Jéova, sé pi bèl lonnè nou ni c. Poukwa nou ka di sa ? An-nou pran on ègzanp. Imajiné yo akizé-w é kè pannan yo ka jijé afè a-w ou bizwen kriyé on moun pou sèvi-w témwen é pou i di toutmoun kè ou sé on moun yo pé pa di ayen asi-y. Kimoun ou té’é chwazi ? Sèten ou té’é chwazi on moun ou konnèt byen, on moun ou ka fè konfyans é ki ni on bon répitasyon pou ponmoun pa douté dè sa i ka di. Lèwvwè Jéova chwazi-nou pou nou vin témwen a-y, i montré kè i té konnèt-nou byen é kè i té ka fè-nou konfyans : i sèten kè nou ké jouwé wòl an nou byen é kè nou ké di toutmoun kè sé-y ki vré Dyé-la. Lèfètkè i chwazi-nou konm Témwen, sé on gran lonnè pou nou. Alò nou ka pwofité dè chak lokazyon nou ni pou fè moun konnèt non a-y é pou fè sé moun-la vwè kè tout sé mové biten-la yo ka di asi-y la pa vré. Lè nou ka fè sa, nou ka montré kè nou alahotè pou pòté non an nou, Témwen a Jéova. Nou fyèw dè non-lasa (Sòm 83:18 ; Wom. 10:13-15).
NOU KÉ KONTINYÉ PRÉCHÉ JOUSTAN LAFEN RIVÉ
14. Ki biten èstraòwdinè ké fèt talè ?
14 Talè ni dé biten èstraòwdinè ki ké fèt é nou ja présé vwè sa ! Nou ka èspéré kè grasa bénédisyon a Jéova, onlo moun ké vin jwenn-nou avan gwo tribilasyon-la koumansé. Nou kontan osi pas menm pannan gwo tribilasyon-la, péryòd-la ki ké pi rèd la adan Listwa, pétèt ni dòt moun ki ké sòti adan mond a Satan é ki ké vin ba Jéova louwanj èvè nou (Akt 13:48).
15-16. Ka nou byen désidé a fè é pannan konmen tan ankò nou paré a fè sa ?
15 Annatandan, ka rété-nou onlo biten a fè. Nou ni on bèl lonnè davwa nou ka pawtisipé adan on travay ki pé’é jen fèt ankò : préché bon nouvèl a wayòm a Bondyé toupatou asi latè. Men toupannan nou ka préché, fò-nou kontinyé avèti sé moun-la kè, adan on ti moman, mond méchan lasa kay bout. Fò yo sav sa ! Konsa lèwvwè jijman a Bondyé ké fèt, yo ké sav kè sé mésaj a Bondyé nou té ka préché (Ézék. 38:23).
16 Alò, ka nou byen désidé a fè ? Konm nou enmé bon nouvèl-la, nou enmé sé moun-la, é siwtou nou enmé Jéova é non a-y, nou byen désidé a kontinyé préché èvè onlo jwa é èvè onlo balan joustan Bondyé di : « Ni asé ! »
KANTIK 54 « Mi la chimen-la yé »
a Lasanblé jénéral a 2023 fèt lè 7 òktòb, adan sal a lasanblé a Témwen a Jéova ki ka touvé-y a Newburgh adan léta a Nouyòk, o Zétazini. Ou ké touvé prèmyé pawti a pwogram-la adan émisyon a JW Télédifizyon a novanm 2023 é dézyèm pati-la adan ta janvyé 2024.
b Gadé awtik-la « J’étais impressionné par les réponses claires et logiques de la Bible », adan niméwo a 1é févriyé 2015 a Tou dè Gad la.
