1-2. a) Ka on frè oben on sè dwèt gadé avan i mandé on moun frékanté ? b) Lè nou ka di kè « 2 moun ka frékanté », ka nou vé di pa la ? (gadé nòt-la « Pou nou byen konprann »).

 ÈS OU anvi mayé ? Menmsi on moun pa bizwen mayé pou i ni tchè-kontan, onlo frè é sè ki sélibatè, té’é byen anvi mayé, ki yo jenn ki yo ja ni on ti laj. Ou ka tou konprann kè avan ou koumansé frékanté, fò ou paré pou mayé. Sa vé di kè fò ou bon bon zanmi èvè Jéova, fò ou konnèt-vou byen, é fò ou ja kapab gangné sou a pen a-w a (1 Kor. 7:36). Si ou ja paré, ou ké ni plis chans dè réyisi mayé a-w.

² Men pou touvé on bon moun pou mayé èvè-y, sa pa toujou fasil (Pwov. 31:10). É menmsi ou ka touvé on moun kè ou té’é byen anvi konnèt, sa pé on ti jan rèd pou mandé moun-la frékanté b. Adan awtik-lasa, nou ké vwè ka ki pé édé on frè oben on sè ki sélibatè touvé on moun ki k’ay èvè-y é kijan i pé mandé moun-la frékanté. Nou ké vwè osi kijan frè é sè a lasanblé-la pé soutyenn séla ki té’é byen anvi mayé la.

LÈ OU BIZWEN TOUVÉ ON MOUN POU-W MAYÉ

3. Lè on moun ki sélibatè ka chèché on moun pou mayé èvè-y, ka pou i gadé ?

³ Avan ou koumansé frékanté on moun, sa té’é byen si ou té ka chèché a sav èvè kijan dè moun ou té’é anvi mayé c. Pas si ou pa fè sa, ou pé mété-w ka frékanté on moun ki pa k’ay  èvè-w é tala ki té’é fè on bon mari oben on bon madanm pou-w, ou pé’é vwè-y. Nou ka tou konprann kè ou ké chwazi on moun ki ja batizé (1 Kor. 7:39). Men on biten pou-w sonjé, sè kè a pa paskè moun-lasa batizé kè i ké on bon moun pou-w. Mi déotwa biten pou-w mandé-w : « Ki òbjèktif an ni adan vi an mwen ? Pou mwen, ki kalité fò on moun ni pou di kè an pé mayé èvè moun-lasa ? Ès an pa’a pann chapo an mwen two ho ? »

4. Kibiten sèwten frè é sè ka mandé adan priyè a yo ?

⁴ Si ou bizwen mayé, sèten ou ja priyé Jéova pou palé-y dè sa (Filip. 4:6). Jéova pa ka pwomèt ponmoun kè i ké touvé on moun pou mayé é nou sav sa byen. Men i ka sousyé-y dè sa ou ka rèsanti é dè sa ou bizwen, é i pé édé-w toupannan ou ka chèché on moun. Alò kontinyé di-y sa ou anvi é sa ou ka rèsanti (Sòm 62:8). Mandé-y ba-w sajès é édé-w ni pasyans (Jak 1:5). John d, on frè ki sélibatè é ki ka viv o Zétazini, ka èspliké ka i ka di Jéova adan priyè a-y : « An ka di Jéova ki kalité an vé moun-la an ké mayé èvè-y la ni. An ka mandé Jéova pou i ban-mwen lokazyon jwenn on moun ki té’é pé mayé èvè mwen. An ka mandé-y osi édé-mwen ni sé kalité-la ki fo la pou an vin on bon mari. » Tanya, on sè ki ka viv Èsrilanka, ka di : « Annatandan kè an touvé on moun pou mayé, an ka mandé Jéova édé-mwen rété fidèl a-y, é an ka mandé-y édé-mwen a rété on moun ki pozitif é ki ni tchè-kontan. » Menmsi ou ni dimal a touvé on moun ki té’é pé ay èvè-w, sonjé kè Jéova ka pwomèt kè i ké ba-w tousa ou bizwen pou viv é tout lanmou-la ou bizwen la (Sòm 55:22).

5. Kijan on frè oben on sè ki sélibatè pé jwenn èvè on moun ki enmé Jéova ? (1 Korentyen 15:58 ; gadé sé imaj-la osi).

 ⁵ Labib ka ankourajé-nou a « ni onlo biten a fè adan travay a Ségnè-la » (li 1 Korentyen 15:58). Si ou byen okipé adan sèwvis a Jéova é kè ou ka pasé tan èvè diféran frè é sè, ou ké pasé dé bon ti moman. Men sa pé ba-w osi lokazyon jwenn dòt sélibatè ki ka mèt Jéova prèmyé douvan adan vi a-yo kon vou. É davwa ou ké ka fè tousa ou pé pou fè Jéova plézi, ou ké ni tchè-kontan toubònman.

6. Lè on frè oben on sè ka chèché on moun pou mayé èvè-y, ka fò pa i oubliyé ?

⁶ Menmsi ou ka chèché on moun pou mayé, fò ou fè atansyon pou ou pa sonjé enki sa (Filip. 1:10). A pa paskè on moun ka mayé oben kè i ka rété tousèl a-y kè i ké ni tchè-kontan men sé si i bon bon zanmi èvè Jéova (Mat. 5:3). Lèfètkè ou sélibatè ou pé fè onlo biten é sa pé wouvè onlo pòt ba-w pou fè plis pou Jéova (1 Kor. 7:32, 33). Alò pannan ou sélibatè, sèvi èvè tan-la ou ni la méyè fason ki tini. Jessica, sé on sè ki ka rété o Zétazini. Lè i mayé, i té ja ni prèskè 40 an. Mi sa i ka èspliké : « Lè an té sélibatè, an té ka pòté bon mannèv adan prédikasyon-la kifè an té ni tchè-kontan menmsi an té anvi mayé. »

PRAN TAN GADÉ BYEN

7. Avan ou di on moun kè i ka entérésé-w, poukwa sa té’é pi saj kè ou pran on tan pou gadé-y ? (Pwovèb 13:16).

⁷ Vinvwè ou ka pansé kè ou touvé on moun ki ké ay byen èvè-w, ka pou-w fè ? Ès ou dwètèt ay vwè moun-lasa onfwa-onfwa pou di-y kè i ka entérésé-w ? Labib ka di kè on moun ki saj ka chèché a sav ka pou i fè avan i aji (li Pwovèb 13:16). Alò, avan ou ay di on moun kè i ka entérésé-w, vométan ou aji èvè sajès. Sa vé di kè sa té’é myé si ou té ka pran on tan pou gadé jan moun-la ka aji èvè diféran moun é jan i ka aji adan diféran sitiyasyon san i suiv kè ou ka gadé-y. Mi sa Aschwin ki ka rété o Péyiba ka di : « Adan on batzyé, sa ou ka rèsanti pou on moun pé vin fò toubònman men sé konsa sa pé disparèt osi. Alò, si ou ka pran tan a-w pou gadé moun-la ki ka entérésé-w la byen, ou pé ké enn koumansé frékanté-y paskè ou lésé sa ou ka rèsanti odépa pran lanmen asi-w. » Anplisdisa, lè ou ka pran tan gadé on moun ki ka entérésé-w, pétèt ou ké rann-vou kont kè moun-lasa pé ké ay èvè-w.

8. Si ou touvé on moun ki ka entérésé-w é kè ou bizwen òbsèwvé-y, kijan ou pé fè sa ? (gadé sé imaj-la osi).

⁸ Si ou touvé on moun ki ka entérésé-w é kè ou bizwen òbsèwvé-y, kijan ou pé fè sa pou sa pa jenné moun-la ? Pannan sé réinyon-la oben pannan sé moman-la zò ka détann-zòt la, pétèt ou pé rivé a vwè sèwten biten anrapò èvè lanmityé a-y èvè Jéova, pèwsonalité a-y, é konpòwtasyon a-y. Mi sa pou mandé-w : « Kimoun ki zanmi a-y, é dè ki biten i enmé palé ? (Lik 6:45). Ès i ni menm òbjèktif ki mwen ? » Ou té’é pé mandé sé ansyen-la ki adan lasanblé a-y la oben dòt frè é sè ki mati é ki konnèt-li byen ki répitasyon a-y é ki kalité i ni (Rit 2:11 ; Pwov. 20:18). Men lè ou ka òbsèwvé on moun ki ka entérésé-w, pran prékosyon pou sa pa jenné-y. Fè ansòt pou-w toujou rèspèkté moun-la é pa rantré two fon adan vi a-y.

9. Avan ou ay mandé on moun frékanté, dè ki biten pou-w sèten ?

⁹ Konmen tan pou-w rété ka gadé kijan on moun ka fonksyonné avan ou di-y kè i ka entérésé-w ? Si ou k’ay two bonnè, i ké di an tchè a-y kè ou sé on moun an kouyonnad  (Pwov. 29:20). Men si moun-la ja vwè kè ou ka touné alantou a-y, men kè ou pa’a fè pon jès pou vin palé ba-y, i pé mèt an tèt a-y kè ou pa sav sa ou vé (Ékl. 11:4). On biten pou-w pa oubliyé sé kè pou frékanté on moun, ou pa’a oblijé sèten a san pou san kè ou ké mayé èvè-y. Pawkont, fò ou byen sèten kè voumenm a-w ja paré pou mayé é kè moun-lasa pé on bon madanm oben on bon mari pou-w.

10. Ka pou-w fè si ou ka rann-vou kont kè on moun ni zyé asi-w men kè ou pa entérésé ?

¹⁰ Ka pou-w fè si ou ka rann-vou kont kè on moun ni zyé asi-w men kè ou pa entérésé ? Éséyé aji on mannyè pou moun-la konprann byen kè ou pa entérésé. Sa pa té ké janti si ou té ka lésé moun-la kwè kè pétèt ou ké aksèpté frékanté-y alòskè a pa lentansyon a-w (1 Kor. 10:24 ; Éféz. 4:25).

11. Adan sèwten péyi, sé dòt moun ka prévwa a on moun pou on sélibatè mayé. Toupannan yo ka fè sa, ka pou yo pa jen oubliyé ?

¹¹ Adan sèwten péyi, délè, sé asi sé paran-la yo ka konté pou prévwa a on moun pou mayé èvè timoun a yo. Délè osi sé pé ondòt moun ki mati ki pou chwazi èvè kimoun timoun-la ké mayé. Adan dòt péyi, fanmi-la oben sé zanmi-la ka édé on moun ki sélibatè a touvé on moun pou mayé èvè-y. Yo ka fè ansòt pou sé 2 moun-la jwenn pou yo palé é sé sé sélibatè-la ki ka désidé si yo ké frékanté-yo. Siwvwè yo ka mandé-w pou édé on sélibatè ki ka chèché on moun pou mayé, tchenn kont dè sa sé 2 moun-la enmé é dè sa yo bizwen. Si ou ka pansé kè tèl moun té’é ay byen èvè sélibatè-la ou ka édé la, éséyé ni tout sé enfòwmasyon-la ou pé ni la asi pèwsonalité a moun-la, asi kalité a-y, é siwtou asi lanmityé a-y èvè Jéova. É mi sa pou-w pa jen oubliyé : préféré moun-lasa bon bon zanmi èvè Jéova olyé i ni lajan, kè i fè gran lékòl oben kè i sé on gwotchak. É pa oubliyé kè anfinaldikont, sé frè-la é sè-la ki sélibatè la ki ké désidé si yo ké mayé (Gal. 6:5).

LÈ OU BIZWEN KOUMANSÉ FRÉKANTÉ ON MOUN

12. Si ou anvi frékanté on moun, kijan ou pé di-y sa ?

¹² Si ou anvi frékanté on moun, kijan ou pé di-y sa e ? Ou pé ba-y on randévou on koté ki  ni moun pou palé ba-y oben ou pé kriyé o téléfòn. Di-y franchman kè ou ka touvé-y agou a-w é kè ou té’é anvi konnèt-li pibyen (1 Kor. 14:9). Si i bizwen tan pou réponn-vou, ba-y tan pou réfléchi (Pwov. 15:28). É si janmen i pa dakò, aksèpté désizyon a-y.

13. Kijan pou-w réyaji siwvwè on moun ka vin di-w kè ou ka entérésé-y ? (Kolosyen 4:6).

¹³ Kijan pou-w réyaji siwvwè on moun ka vin di-w kè ou ka entérésé-y ? Sèten sa mandé moun-lasa kouraj pou vin palé ba-w, alò montré-w janti èvè-y é rèspèkté-y (li Kolosyen 4:6). Si ou bizwen tan pou réfléchi avan ou pran on désizyon, di-y sa. Men, éséyé réponn-li dépi ou ké pé (Pwov. 13:12). Si ou pa entérésé, di-y sa jantiman men fè ansòt pou sa klè an tèt a-y. Hans sé on frè ki ka rété an Otrich. Gadé kijan i réponn on sè ki fè-y sav kè i té ka entérésé-y. Mi sa i ka èspliké : « Lè an réponn-li, an palé ba-y jantiman men an fè ansòt pou sa té klè. An pa pèd tan pou réponn-li pas an pa té vé ba-y pon èspwa a mal papay. Sé pousa osi, menm apré, an té ka fè atansyon a sa an té ka di é a sa an té ka fè pou i pa pansé kè an chanjé lidé. » Pawkont, si pwopozisyon-la moun-la ka fè-w la ka entérésé-w, di-y sa ou ka rèsanti é pran tan palé èvè-y pou sav kijan zò vlé sa pasé lèwvwè zò ké ka frékanté-zòt. Pétèt sa yonn vé adan domenn-lasa pa oblijé menm biten ki sa lòt-la vé. Sé pé pas zò pa lévé adan menm péyi-la oben sé pé pou dòt rézon ankò.

KIJAN POU NOU SOUTYENN FRÈ É SÈ KI SÉLIBATÈ ?

14. Kijan nou pé soutyenn frè é sè an nou ki sélibatè ?

¹⁴ Kijan noutout pé soutyenn frè é sè ki sélibatè é ki ka chèché on moun pou mayé ? Dabò pou yonn, nou pé fè atansyon pou nou pa di-yo nenpòt ki pawòl (Éféz. 4:29). Mi sa pou nou mandé-nou : « Ès an toujou ka voyé ti pawòl pou yo anrapò èvè sa ? Dépi an ka vwè 2 moun ki sélibatè ka palé, ès an ka mèt an tèt an mwen kè yonn ka touvé lòt agou a-y ? » (1 Tim. 5:13). Anplisdisa, fò pa nou jen fè on moun ki sélibatè santi kè pas i pa mayé i ni on pwoblèm. Mi sa Hans, nou palé dè-y talè-la ka rakonté : « Ni sèwten frè é sè ki ka di-mwen :“Men ka ou ka atann pou mayé ? Pa oubliyé laj-la ka monté.” Lè sé sélibatè-la ka tann dé pawòl konsa, yo pé ni lenprésyon kè ponmoun pa enmé-yo  é sé konsi yo ka mèt 2 fwa plis présyon asi yo pou yo mayé. » Vométan nou chèché a félisité frè é sè an nou ki sélibatè ! (1 Tés. 5:11).

15. a) Avan nou fè 2 moun ki sélibatè jwenn, a ki biten pou nou fè atansyon ? (gadé imaj-la osi). b) Lè ou gadé vidéo-la, ka sa aprann-vou ? (gadé nòt-la).

¹⁵ Imajiné nou ka touvé kè 2 moun k’ay byen ansanm, ka pou nou fè ? Labib ka di-nou kè fò-nou fè atansyon a sa sé moun-lasa ka rèsanti (li Women 15:2). Ni onlo sélibatè ki pa enmé lèwvwè yo ka éséyé prévwa on moun ba yo, alò fò-nou tchenn kont dè sa (2 Tés. 3:11). Ni dòt sélibatè aprézan, sa pa ka déranjé-yo, men si yo pa mandé-nou ayen, fò pa nou pran asi nou pou fè sé biten-lasa f (Pwov. 3:27). Ni sèwten sélibatè ki préféré touvé moun a yo tousèl a yo olyé dòt moun chèché on moun ba yo. Lydia, sé on sè ki ka viv an Almagn é ki sélibatè. Mi sa i ka di : « Pétèt nou pé envité on ti gwoupmoun é envité frè-la é sè-la osi. Konsa sa ka ba-yo lokazyon pasé tibwen tan ansanm men aprésa sé yo ki ka désidé ka yo ké fè. »

16. Ka pou on krétyen sélibatè sonjé ?

¹⁶ Noutout nou pé ni tchè-kontan adan vi an nou, ki nou sélibatè, ki nou mayé ! (Sòm 128:1). Alò si ou vé mayé men kè ou po’o touvé ponmoun, kontinyé konsantré-w asi sa ou ka fè pou Jéova. Mi sa Sin Yi, on sè ki ka viv Makao ka di : « Lè ou ké konparé kantité tan ou rété sélibatè èvè kantité tan ou ké pasé adan paradi-la èvè moun-la ou ké mayé èvè-y la, ou ké vwè ou pa rété sélibatè lontan. Alò pwofité dè péryòd-lasa, pas sé on bèl moman adan vi a-w. » Men vinvwè ou koumansé frékanté on moun ? Adan awtik-la ki ka vin la, nou ké vwè déotwa konsèy pou tout biten pasé byen.