1-2. a) Dapré sa ki maké adan Éfézyen 6:16, poukwa nou bizwen on «gwo boukliyé a lafwa » ? b) A ki kèsyon nou kay réponn ?

ÈS OU ni on « gwo boukliyé a lafwa » ? (li Éfézyen 6:16). Nou sèten dè sa. Menmjan on gwo boukliyé ka pwotéjé prèskè tout kò a-w, fwa a-w ka pwotéjé-w kont mové biten ki an mond-la kon péché sèksyèl, vyolans, é plen dòt biten ki pa annakò èvè sa Bondyé enmé.

² Anplisdisa, nou ka viv adan « sé dènyé jou-la », kifè fwa an nou a léprèv touttan (2 Tim. 3:1). Kijan ou pé ègzaminé boukliyé a fwa a-w pou ou sèten kè i byen solid ? Ka ou pé fè pou tchenbé-y fò ? An-nou réponn a sé kèsyon-lasa.

3. Kijan sé sòlda-la té ka pran swen a boukliyé a yo, é poukwa yo té ka fè sa ?

³ An tan a Labib, pli souvan ki rarman boukliyé a sé sòlda-la té ni kui anlè yo. Fò sé sòlda-la té pasé luil asi boukliyé-la pou pwotéjé kui-la é pou anpéché fè-la ki anba a-y la pran wouy. Si on sòlda té ka rann-li kont kè boukliyé a-y té an mové léta, fò i té réparé-y. Konsa, sòlda-la té’é paré pou pwochen lagè-la. Kijan nou pé sèvi èvè ègzanp-lasa pou rann fwa an nou pi fò ?

4. Poukwa fò ou vérifyé léta a ‘boukliyé a fwa a-w’, é kijan ou pé fè sa ?

⁴ Menmjan ki sé sòlda-la antan a Labib, fò-w ègzaminé boukliyé a fwa a-w toutlè é fò-w pran swen a-y pou ou toujou paré pou lagè. Konm nou sé dé krétyen, nou adan on lagè èspirityèl é fò-nou goumé èvè sé mové lèspri-la (Éféz. 6:10-12). Pondòt moun pé’é pé pran swen a fwa a-w anplas a-w. Kijan ou pé sèten kè fwa a-w asé fò pou tchenbé lè ou ké jwenn éprèv ? Prèmyé biten pou ou fè sé mandé Bondyé édé-w. Apré, ou pé sèvi èvè pawòl a-y  pou pé sa vwè-w kon i ka vwè-w (Ébr. 4:12). Labib ka di : « Fè Jéova konfyans èvè tout tchè a-w é pa fyé-w a pwòp entélijans a-w » (Pwov. 3:5, 6). Aprézan, sonjé on sitiyasyon ou jwenn pa ni lontan é sonjé ki désizyon ou pran adan sitiyasyon-lasa. Pa ègzanp, ès ou té ni on gwo pwoblèm a lajan ? Ès ou sonjé pwomès-la Jéova ka fè-nou la adan Ébré 13:5 lè ou éséyé rézoud pwoblèm-lasa ? Mi sa vèwsé-lasa ka di : « An pé’é jen kité-w, é an pé’é jen lagé-w. » Ès pwomès-lasa ba-w konfyans kè Jéova té ké édé-w ? Si sé wi, sa ka montré kè ‘boukliyé a fwa a-w’ byen solid.

5. Ka ou té’é pé rivé a vwè lè ou ké ègzaminé fwa a-w ?

⁵ Si ou pran tan ègzaminé fwa a-w byen, sa ou ké vwè pé rivé a siwprann-vou. Ou pé rivé a vwè dé ti féblès kè ou poto’o jen vwè avan. Pa ègzanp, ou pé rann-vou kont kè délè ou ka dékourajé, oben ou ka two enkyèt é kè sa ka aji si fwa a-w. Oben ou pé rann-vou kont kè sèwten manti ou ka tann ka aji asi fwa a-w osi. Si sé sa ki ka rivé-w, ka ou pé fè pou pwotéjé fwa a-w pou i pa vin an pi mové léta ki i ja yé ?

6. Ki bon rézon nou pé ni dè enkyété-nou ?

⁶ Dépawfwa, lè nou ka enkyété-nou sé pé on bon biten. Pa ègzanp, nou ka enkyété-nou pas nou anvi sav si nou ka fè Jéova é Jézi plézi. É sa toutafè nòwmal (1 Kor. 7:32). Si nou fè on péché ki grav, nou ka enkyété-nou pas nou vé wouvin bon bon zanmi èvè Bondyé (Sòm 38:18). Nou ka enkyété-nou pas nou vlé fè moun-la nou mayé èvè-y la plézi é pas nou vlé kè fanmi an nou é frè é sè an nou santi-yo byen (1 Kor. 7:33 ; 2 Kor. 11:28).

7. Dapré sa Pwovèb 29:25 ka di, poukwa fò pa nou « tranblé douvan moun » ?

⁷ Anmenmditan, lè nou two enkyèt, sa pé fébli fwa an nou. Pa ègzanp, nou pé ka enkyété-nou toutlè pou sav si nou ké ni asé manjé pou nou manjé oben si nou ké ni asé lenj pou mèt si nou (Mat. 6:31, 32). Alò, pou nou enkyété-nou mwens, pétèt nou ké vlé kouri dèyè byen matéryèl. Lanmou pou lajan pé jous rivé a pran rasin an tchè an nou. Si nou ka pèwmèt sa rivé, fwa an nou ké fébli é nou pé rivé a pèd lanmityé an nou èvè Jéova (Mawk 4:19 ; 1 Tim. 6:10). Anplis, nou pé ka enkyété-nou twòp pou ondòt biten ankò : sa moun ka pansé dè nou. Pétèt kè nou pè moun fè jé èvè tèt an nou, oben nou pè yo pèwsékité-nou. É pétèt kè nou pi pè sé biten-lasa ki nou pè fè Jéova lapenn. Pou nou pwotéjé-nou kont sa, fò-nou sipliyé Jéova pou i ban-nou fwa-la é kouraj-la nou bizwen la (li Pwovèb 29:25 ; Lik 17:5).

8. Kijan pou nou réyaji lè yo ka manti asi òwganizasyon a Jéova ?

⁸ Satan, « papa a mansonj-la » ka sèvi èvi touséla i ka kontwolé la pou simé manti si Jéova é asi frè é sè an nou (Jan 8:44). Pa ègzanp, sé apòsta-la ka pibliyé manti asi òwganizasyon a Jéova é yo ka palé dè sèwten biten ki fèt, men yo ka mété-y an jan a yo. Yo ka palé sa asi entèwnèt, an télé-la oben an radyo-la. Sé manti-lasa ka fè pawti dè « flèch plen difé » kè Satan ka voyé dèyè do an nou (Éféz. 6:16). Kijan fò-nou réyaji si on moun koumansé palé-nou dè  sé manti-lasa ? Fò-nou rèfizé kouté sa ! Poukwa ? Pas nou ni fwa an Jéova é pas nou ka fè frè é sè an nou konfyans. Sé pousa fò-nou rété lwen a tousa ki ni on rapò èvè sé apòsta-la. Fò pa nou lésé ayen ni ponmoun fè-nou ay palé èvè-yo. É menmsi nou té’é byen anvi sav sa yo ka di, nou pé ké ay palé ba yo.

9. Lè nou dékourajé, kijan sa pé aji asi nou ?

⁹ Si nou dékourajé, sa pé fébli fwa an nou. Nou pé pa fè konsi nou pa ni pon pwoblèm. Pas si nou ka aji konsa, nou sé on moun an kouyonnad. Sa pé rivé délè kè nou santi-nou dékourajé. Men fò pa nou lésé pwoblèm pran tèt an nou. Sinon, nou pé rivé a oubliyé tout sé bèl biten-la Jéova pwomèt-nou la (Rév. 21:3, 4). É tèlman nou ké dékourajé nou pé rivé a pèd tout fòs an nou é nou pé rivé a arété sèvi Jéova (Pwov. 24:10). Men fò pa nou kité sa rivé-nou.

10. Ka on lèt on sè maké ka aprann-nou ?

¹⁰ An-nou pran ègzanp a on sè ki ka rété Ozétazini. Nou ké vwè kijan i fè pou fwa a-y té rété fò magré i té ka okipé dè mari a-y ki té malad toubònman. Adan on lèt i maké ba biwo mondyal la, mi sa i ka di : « Délè, sa nou té ka viv té ka istrésé-nou é sa té ka dékourajé-nou, men èspérans an nou té solid. A pa ti rèkonésans an ni pou tousa Jéova ka ban-nou pou fè fwa an nou vin pi fò é pou ankourajé-nou ! Nou vréman bizwen sé konsèy-lasa é sé ankourajman-lasa. Sa ka édé-nou kontinyé sèvi Jéova é sa ka édé-nou andiré éprèv Satan ka voyé pou fébli-nou. » Sa sè-la di la ka aprann-nou kè lè nou dékourajé, ni mwayen woupran fòs. Kijan ? Sonjé kè Satan ka sèvi èvè sé pwoblèm-la ou ni la pou i tèsté-w. Fò ou ni konfyans kè Jéova ké konsolé-w. Montré-w rèkonésan pou tout nouriti èspirityèl la i ka ban-nou la.

11. Ka fò-nou mandé-nou pou vwè si fwa an nou vréman solid ?

¹¹ Ès ou ka vwè ka fwa a-w bizwen pou i vin pi fò ? Pannan sé mwa pasé-la, ès ou goumé pou ou pa té enkyété-w twòp ?  Menmsi sé apòsta-la simé manti, ès ou rèfizé kouté-yo oben ès ou rèfizé palé ba yo ? Si ou té dékourajé, ès ou rivé woupran fòs ? Si ou rivé fè tousa savédi kè fwa a-w fò. Men fò ou fè atansyon pas Satan ni dòt zàm é i ka éséyé itilizé-yo kont vou. An-nou vwè yonn adan sé zàm-lasa.

12. Si nou two enmé lajan, kijan sa pé aji si nou ?

¹² Si nou enmé byen matéryèl, piti-a-piti fwa an nou ké fébli é nou ké arété sèvi Jéova. Mi sa lapòt Pòl ka di : ‘Pa ni pon sòlda ki ké pèd tan a-y monté on afè si i vé fè moun-la ki angajé-y la konm sòlda plézi’ (2 Tim. 2:4). Dayè pou yonn, sé sòlda Women la pa té ni dwa ay fè pondòt travay. Ka ki té’é pé rivé si on sòlda pa té ka suiv règ-lasa ?

13. Poukwa on sòlda pa té ni dwa monté pon afè ?

¹³ Éséyé imajiné : On jou maten, on gwoup sòlda ka pran tan antréné-yo pou yo ay fè lagè, men ni yonn adan yo ki pa la. Li, i okipé ka vann manjé asi mawché. Lèswa-la, sé sòlda-la ka pran tan vérifyé léta a tout ékipman a yo é yo ka filé épé a yo. Pannansitan, tala ki té ka vann manjé la ka pasé tout tan-lasa ka préparé manjé pou i ay vann lèlandèmen. Men lèlandèmen maten aprézan, sé lènmi-la ka ataké-yo alòskè yo pa té ka atann-yo. Kilès adan sé sòlda-la ki ké paré pou ay goumé é ki ké fè chèf a-y plézi ? É si ou té an lagè-lasa, owa kimoun ou té’é rété : owa on sòlda ki pran tan préparé-y oben owa tala ki té ka fè zafè a-y la ?

14. Nou ki sé sòlda a Kris, ka ki ni plis valè pou nou ?

¹⁴ Menmjan ki sé bon sòlda-la, nou pé ké pèwmèt ayen anpéché-nou rété konsantré asi sa ki pi enpòwtan : fè Chèf an nou, Jéova é Jézi plézi. Sa ni lontan plis valè ki nenpòt biten nou té’é pé ni an mond a Satan. Sé pousa nou ka òwganizé-nou pou nou ni tan-la é fòs-la nou bizwen la pou sèvi Jéova é pou ‘boukliyé a fwa an nou’ toujou rété byen  solid. Fò-nou fè ansòt osi pou rèstan a ékipman èspirityèl an nou toujou byen solid.

15. Ki avèwtisman Pòl ka ban-nou é poukwa i ka fè sa ?

¹⁵ Fò-nou toujou rété véyatif ! Poukwa ? Lapòt Pòl avèti-nou ; i di kè « moun ki vréman paré a vin rich » ké « pèd chimen a lafwa » (1 Tim. 6:9, 10). Lè i ka di kè yo « pèd chimen », sé pou montré kè si nou ka kouri dèyè biten kè nou pa bizwen, nou pé rivé a dékonsantré-nou. É a moman-lasa, nou ka lésé « anvi ki pa ni pon sans é ki danjéré » pran rasin andidan an nou. Men fò-nou sonjé kè sé anvi-lasa sé zàm Satan ka itilizé pou fè fwa an nou fébli.

16. Adan Mawk 10:17-22, nou ka touvé on istwa ki ka fè-nou réfléchi. Ki kèsyon nou dwèt pozé-nou anrapò èvè istwa-lasa ?

¹⁶ Imajiné kè nou ni asé lajan pou achté onlo biten. Èskè sa mal si nou ka achté dé biten nou anvi men kè nou pa vréman bizwen ? Pa oblijé ! Men réfléchi asi sa : menmsi ou pé achté sa ou vlé, ès ou ké ni tan-la é fòs-la ki fo la pou sèvi èvè sa ou achté la é pou pran swen dè-y ? Ès nou pé vin a twòp enmé sé biten-la nou ni la ? Si nou vin enmé byen matéryèl, ès sa pé’é fè-nou aji kon jenn boug-la ki  rèfizé suiv Jézi, alòskè Jézi té ankourajé-y a travay plis pou Bondyé ? (li Mawk 10:17-22). Sèlman, sa lontan pli bèl lèwvwè nou ka viv on mannyè ki senp é lè nou ka ba Bondyé tan an nou é fòs an nou pou fè volonté a-y !

17. Ka fò pa nou jen oubliyé ?

¹⁷ Fò pa nou jen oubliyé kè nou adan on lagè é kè touléjou fò-nou paré a goumé (Rév. 12:17). Frè é sè an nou pé’é pé pòté ‘boukliyé a fwa an nou’ anplas an nou. Sé a nou dè tchenbé-y fò.

18. An tan a Labib, poukwa fò sé sòlda-la té tchenbé boukliyé a yo rèd ?

¹⁸ An tan a Labib, lè on sòlda té goumé èvè kouraj, yo té ka ba-y lonnè. Men pawkont, sé té on honté pou on sòlda lèwvwè i té ka woutouné akaz a-y san boukliyé a-y. Mi sa on women ki té èspésyalis a listwa maké : « Si on sòlda té kité boukliyé a-y dèyè do a-y, sé té pi gran honté ki té ni. » Sé pousa sé sòlda-la té ka fè atansyon pou yo té tchenbé boukliyé a yo rèd.

19. Ka nou pé fè pou nou tchenbé boukliyé a fwa an nou byen fò ?

¹⁹ Pou nou kontinyé tchenbé boukliyé a fwa an nou byen fò, fò-nou k’ay touttan an réinyon é fò-nou ka palé dè non a Jéova é dè Wayòm a-y èvè lézòt (Ébr. 10:23-25). Anplisdisa, fò-nou li pawòl a Bondyé touléjou é fò-nou mandé-y édé-nou apliké sa i ka mandé-nou (2 Tim. 3:16, 17). A moman-lasa, pon zàm Satan ké itilizé kont nou pé’é fè-nou dimal pou touttan (Iz. 54:17). ‘Gwo boukliyé a fwa’ an nou ké pwotéjé-nou. Nou ké tchenbé rèd, é nou ké travay èvè kouraj épi frè é sè an nou. Chakjou, nou ké gangné sé konba-la nou ka menné la si fwa an nou rété fò. É pi enpòwtan ankò, nou ké ka soutyenn Jézi lèwvwè i ké gangné lagè-la kont Satan é tout zanmi a-y. Mi on bèl lonnè mi ! (Rév. 17:14 ; 20:10).