1-2. Poukwa fò sé krétyen-la entérésé-yo a sa ki maké adan liv a Lévitik ?

 LAPÒT Pòl fè jenn zanmi a-y Timoté sonjé kè « tout Ékriti-la, sé Bondyé ki enspiré-y é i itil » (2 Tim. 3:16). Kifè, liv a Lévitik itil osi. Ki valè ou ka ba liv a Lévitik ? Pou sèwten moun liv-lasa sé on liv ki plen règ ki pa ni pon itilité a épòk an nou. Men sé vré krétyen-la ka vwè liv-lasa ondòt jan.

² Yo ékri liv-lasa ni apépré 3 500 lanné, men Jéova fè ansòt pou nou bénfisyé dè-y pou « enstwi-nou » (Wom. 15:4). Liv a Lévitik ka édé-nou konprann sa Jéova ka pansé. Kifè, fò-nou pran tan ègzaminé-y. An réyalité, nou ka touvé onpakèt lèson adan liv-lasa ki ka vin dè Bondyé. An-nou arété-nou asi 4 adan yo.

3. Poukwa yo té ka ofè sakrifis Jou a Rékonsilyasyon-la ?

³ Prèmyé lèson-la : Fò Jéova ka aprésyé-nou si nou vlé i aksèpté sakrifis an nou. Chak lanné, pou Jou a Rékonsilyasyon-la, sé Izraélit-la té ka sanblé é yo té ka menné zannimo pou gran prèt-la té pé sa fè sakrifis. Sé sakrifis-lasa té ka fè sé Izraélit-la sonjé kè yo té bizwen kè Bondyé padonné péché a yo. Jou-lasa, gran prèt-la té ka rantré an Chanm-la ki Pi Sen la. Men avan i té menné san a sé bèt-la yo té sakrifyé la an chanm-lasa, i té ni ondòt biten a fè. Biten-lasa té lontan pi enpòwtan ki mandé Bondyé padon pou péché a pèp-la.

4. Sèlon sa ki maké an Lévitik 16:12, 13, lè sé té Jou a Rékonsilyasyon-la, ka gran prèt-la té ka fè avan i té antré adan Chanm-la ki Pi Sen la ? (gadé imaj-la ki anlè po a jounal-la).

 ⁴ (Li Lévitik 16:12, 13.) Éséyé imajiné jan Jou a Rékonsilyasyon-la té ka déwoulé : Gran Prèt-la ka antré adan tabèwnak-la. Sé prèmyé fwa an jouné-la i ka rantré adan Chanm-la ki Pi Sen la, é fò i ké fè sa 3 fwa. Adan on men, i ka tchenbé on bòl ki plen lansan ki ka santi bon, é an lòt men-la i ka tchenbé on bòl annò ki plen chabon-difé adan-y. I ka rété doubout on moman douvan rido a Chanm-la ki Pi Sen la. Èvè on gran rèspé, i ka antré adan Chanm-la ki Pi sen la é i ka mété-y doubout douvan lawch a alyans-la. Adan on sans, sé konsi sé douvan Jéova limenm i doubout ! Aprésa, prèt-la ka pran tan a-y pou vidé lansan sakré b la asi chabon-la é pyès-la ka plen èvè on bon ti lòdè. Plita, i ké viré antré adan Chanm-la ki Pi Sen la èvè san a sé bèt-la yo sakrifyé la pou kouvè sé péché-la. Rèmawké sa byen : i ka brilé lansan-la avan i prézanté san a sé sakrifis-la yo fè la pou kouvè sé péché-la.

5. Jan-la yo té ka sèvi èvè lansan-la Jou a rékonsilyasyon-la ka aprann-nou on biten. Ki biten ésa ?

⁵ Jan-la yo té ka sèvi èvè lansan-la Jou a rékonsilyasyon-la ka aprann-nou on biten. Labib ka montré kè priyè a sèwvitè fidèl a Jéova kon lansan pou-y (Sòm 141:2 ; Rév. 5:8). Sonjé kè sé èvè on gran rèspé gran prèt-la té ka menné lansan-la douvan Jéova. Menmjan-la, lè nou ka pwoché owa Jéova grasa lapriyè, fò-nou fè-y èvè onlo rèspé. Nou kontan davwa Kréyatè a linivè ka pèwmèt-nou pwoché owa a-y, menmjan on timoun ka fè èvè papa-y (Jak 4:8). Jéova dakò pou nou vin zanmi a-y ! (Sòm 25:14). Tèlman nou ka aprésyé privilèj-lasa, nou vé pa fè ayen pou fè Bondyé lapenn.

6. Gran prèt-la té ka brilé lansan-la avan i té ofè sé sakrifis-la. Ka sa ka aprann-nou ?

⁶ Sonjé kè gran prèt-la té ka brilé lansan-la avan i té ofè sé sakrifis-la. Gran prèt-la té ka koumansé pa brilé lansan-la pou Jéova té aprésyé-y lè i té ké ofè sé sakrifis-la. Ka sa ka aprann-nou ? Avan i té sakrifyé vi a-y, Jézi té ni on biten enpòwtan a fè, on biten ki té pi enpòwtan ki sové limanité. Ki biten ésa ? Fò i té préparé téren-la pou Jéova té aprésyé sakrifis-la i té kay fè la. É pousa fò i té rété fidèl a san pou san pannan tout vi a-y. Konsa, Jézi té ké montré kè méyè fason ki ni pou on moun viv sé lè i ka fè volonté a Jéova. Jézi té ké montré osi kè sé Papa-y ki andwa gouvènè é kè sé Papa-y ki sé méyè dirijan ki tini.

7. Poukwa Jéova té kontan tousa Gason a-y fè asi latè ?

⁷ Pannan tout vi a-y asi latè, Jézi toujou kouté Papa-y, é i fè sa on mannyè ki pawfè. Magré yo tanté-y a plizyè rèpriz, magré i sibi éprèv ki té rèd é magré i té sav kè yo té kay fè-y bon atrosité pou yo té tchouyé-y, i té byen désidé a montré kè méyè dirijan ki tini sé Papa-y (Filip. 2:8). Lè Jézi té ka touvé-y an difikilté, ‘i té ka hélé é i té ka pléré gwo-dlo lè i té ka sipliyé’ Papa-y (Ébr. 5:7). Sa i té ka di an priyè a-y té ka sòti an fon a tchè a-y é sé priyè-lasa té ka ba-y plis fòs pou i té rété fidèl. Pou Jéova, priyè a Jézi té kon bon ti lòdè a lansan-la yo té ka  brilé an tan a sé Izraélit-la. Pannan tout vi a-y, Jézi fè Papa-y plézi toubònman é i montré kè sé Papa-y ki andwa gouvèné.

8. Ka nou pé fè pou viv menmjan ki Jézi ?

⁸ Nou pé imité Jézi si nou ka fè tousa nou pé pou nou rété fidèl a Bondyé a san pou san é si nou ka rèspèkté konsèy a Jéova é lwa a-y. Lè nou ka jwenn éprèv, nou ka sipliyé Jéova pou i pé sa édé-nou paskè nou vlé fè-y plézi. Sé konsa nou ké montré kè nou ka soutyenn dominasyon a Jéova. Nou sav byen kè Jéova pé’é kouté priyè an nou si nou ka fè biten kè i ka kondanné. Pawkont, si nou ka suiv prensip a Jéova adan vi an nou, nou pé sèten kè i ké aprésyé priyè an nou. Pou-y, yo ké kon lansan ki ka dégajé on bon ti lòdè. É nou pé sèten kè si nou ka obéyi Jéova é si nou fidèl sa ké fè Pap’an nou ki an syèl-la plézi (Pwov. 27:11).

9. Poukwa sé Izraélit-la té ka ofè sakrifis a konminyon ?

⁹ Dézyèm lèson-la : Nou ka sèvi Jéova pas nou ni rèkonésans pou-y. Pou nou èspliké sa byen, an-nou palé dè ondòt kalté sakrifis sé Izraélit-la té ka fè pou adoré Jéova. An-nou palé dè sé sakrifis a konminyon la c. Adan liv a Lévitik, nou ka aprann kè on Izraélit té pé ofè on sakrifis a konminyon pou montré Jéova rèkonésans a-y (Lév. 7:11-13, 16-18). Pa ni ayen ki té ka oblijé-y fè ofrann-lasa. Sé pas i té vlé i té ka fè sakrifis-lasa.  Kifè, sé on ofrann moun-la té ka fè dè-y menm pas i enmé Dyé a-y, Jéova. Apré, moun-lasa, fanmi a-y, é sé prèt-la té ka manjé adan vyann a bèt-la yo té sakrifyé la. Men sèwten pawti a bèt-la, sé té pou Jéova tousèl. Ki pawti ésa ?

10. An Lévitik 3:6, 12, 14-16, yo ka palé-nou dè sé sakrifis a konminyon la. Ki lyannaj ki ni ant sé sakrifis-lasa é sa ki té ka pousé Jézi fè volonté a Papa-y ?

¹⁰ Twazyèm lèson-la : Konm nou enmé Jéova, nou ka ba-y sa nou ni dè méyè. Pou Jéova, sa ki té méyè an bèt-la sé té grès-la. Anplisdisa, i fè sé Izraélit-la sav kè ni dòt pawti a bèt-la, kon sé ren-la, ki té ni onlo valè èspésyal pou-y (li Lévitik 3:6, 12, 14-16). Kifè, Jéova té ka kontan toubònman lè on Izraélit té ka ofè-y sé pawti enpòwtan lasa é grès-la. On Izraélit ki té ka fè on ofrann kon sila té ka montré kè i té vréman anvi ba Jéova sa i ni dè méyè. Menmjan-la, Jézi ofè Jéova sa i té ni dè méyè. I sèvi Papa-y èvè tout nanm a-y é pas i té enmé-y (Jan 14:31). Jézi té ka pran plézi a fè volonté a Jéova ; i té enmé lwa a Jéova onlo menm (Sòm 40:8). Sa dwèt té ka fè Jéova plézi toubònman, lè i té ka vwè kè Jézi ka sèvi-y dè-tou-kè !

11. Poukwa nou pé di kè sèwvis an nou ka touvé-y kon sé sakrifis a konminyon la, é ki rékonfò sa ka pòté ban nou ?

¹¹ Menmjan ki sé sakrifis a konminyon la, sèwvis an nou pou Jéova ka pèwmèt-nou montré-y sa nou ka rèsanti pou-y. Nou ka ba Jéova sa nou ni dè méyè, é si nou ka fè sa sé pas nou enmé-y dè-tou-kè. A pa ti kontan Jéova kontan lè i ka vwè plizyè milyon moun ka sèvi-y pas yo enmé-y fò é pas yo enmé sé konsèy-la i ka ba-yo la ! Sa ka fè-nou dibyen lè nou ka sonjé kè non sèlman Jéova ka vwè sa nou ka fè, men anplisdisa i ka vwè sa ki ka pousé-nou aji. É i ka aprésyé sa toubònman. Pa ègzanp, si ou ja ni on tilaj é kè ou pé pa fè tousa ou té’é vlé, ou pé sèten kè Jéova ka konprann sitiyasyon a-w. Ou pé ni lenprésyon kè ou pa’a ba Jéova granzafè. Men li Jéova, sa i ka gadé, sé kè lanmou-la ou ni anfon a tchè a-w la ka pousé-w fè tousa ou pé. Lè ou ka ba Jéova sa ou ni dè méyè, i ka aksèpté-y èvè plézi.

12. Ka Jéova té ka rèsanti lè yo té ka ofè-y on sakrifis a konminyon, é dè ki biten nou pé sèten ?

¹² Ka sé sakrifis a konminyon la ka aprann-nou ? Toupannan difé-la té ka tchuit méyè pati a bèt-la, lafimé-la té ka monté é sa té ka fè Jéova plézi toubònman. Alò ou pé sèten kè Jéova ka kontan-w toubònman lè ou ka fè tousa ou pé pou sèvi-y (Kol. 3:23). I dwèt ka souri, tèlman i fyèw dè-w. Kèlkèswa éfò-la nou pé fè la, ki i piti ki i gwo, Jéova ka ba-y on gran valè, é i pé’é jen oubliyé sa (Mat. 6:20 ; Ébr. 6:10).

13. Sèlon Lévitik 9:23, 24, kijan Jéova montré kè i té dakò pou yo té nonmé sé prèt-la ?

¹³ Katriyèm lèson-la : Jéova ka béni òwganizasyon a-y asi latè. Sonjé sa ki pasé an 1512 avan épòk an nou, lè yo monté tabèwnak-la an pyé a Mòn Sinayi la (Ègz. 40:17). Moyiz té ka dirijé on sérémoni é pannan sérémoni-lasa yo mété Aawon é gason a-y prèt. Tout nasyon a Izrayèl té rasanblé pou yo té vwè sé prèt-la ofè prèmyé sakrifis a yo (Lév. 9:1-5). Kijan Jéova montré kè i té dakò pou yo té nonmé sé prèt-lasa ? Ében, pannan Aawon é Moyiz té ka béni  pèp-la, on difé sòti an syèl-la é i brilé tout sakrifis-la ki té asi lotèl-la (li Lévitik 9:23, 24).

14. Lè yo mété Aawon é gason a-y prèt an Izrayèl, Jéova té dakò. Poukwa sa enpòwtan pou nou dè sav sa ?

¹⁴ Jéova fè mirak èstraòwdinè lasa lè yo té ka mèt Aawon Gran Prèt. Poukwa i fè sa ? Jéova té vlè montré kè i té ka soutyenn Aawon é gason a-y kè yo té sòti chwazi antankè prèt. É lè sé Izraélit-la vwè kè Jéova té ka soutyenn sé prèt-la, yomenm a yo osi konprann kè fò-yo té soutyenn sé prèt-la. Eskè enfòwmasyon-lasa ka pòté on biten ban nou ? Wi ! Sé prèt-la an Izrayèl té ka rèprézanté dòt prèt ki té ké jouwé on wòl pi enpòwtan ankò. Kris sé Gran Prèt-la. 144 000 moun ké sèvi Jéova akoté a-y an syèl-la antankè wa é prèt (Ébr. 4:14 ; 8:3-5 ; 10:1).

15-16. Kijan Jéova ka montré kè i ka aprésyé « èsklav fidèl é prévwayan la » ?

¹⁵ An 1919, Jézi chwazi déotwa frè ki wen pou yo té fòwmé sa yo ka kriyé adan Bib-la « èsklav fidèl é prévwayan la ». Èsklav-lasa ka dirijé travay a prédikasyon-la é i ka ba disip a Jézi « manjé a yo lè yo bizwen-y » (Mat. 24:45). Ès ni prèv ki ka montré kè Jéova ka aprésyé èsklav-lasa ?

¹⁶ Satan é sé moun-la ki èvè-y la ka chèché a frenné travay a èsklav-la. Siwvwè èsklav-la pa té ni Jéova èvè-y, i pa té’é annéta fè travay-la i ka fè la. Ni 2 gè mondyal ki ja fèt é ni plizyè kriz ékonomik ki ja touché lèmondantyé. Anplisdisa, yo ja maltrété é yo ja pèwsékité pèp a Bondyé bon enpé menm. Men magré sa, èsklav fidèl é prévwayan la ka kontinyé ba disip a Jézikris nouriti èspirityèl la yo  bizwen la. Gadé kantité piblikasyon nou ni a dispozisyon an nou jòdijou ! Yo disponib an plis ki 900 lang é yo gratui ! Sé on prèv ki ka montré kè Jéova ka soutyenn èsklav-la. Men nou ni ondòt prèv ankò : prédikasyon-la. Yo ka préché bon nouvèl-la « toupatou asi latè » ! (Mat. 24:14). Pa ni pon dout asi sa, Jéova ka gidé é i ka béni òwganizasyon a-y onlo menm.

17. Ka nou pé fè pou soutyenn òwganizasyon-la Jéova ka itilizé la ?

¹⁷ Mi on kèsyon nou pé pozé-nou : « Ès an ni rèkonésans pou Jéova davwa an ka fè pawti a òwganizasyon a-y asi latè ? » An tan a Moyiz, Jéova fè difé sòti an syèl-la pou i té montré kè i té ka soutyenn sé prèt-la yo té nonmé la. Ében, menmjan-la jòdijou, Jéova ka montré on mannyè ki klè kè i ka soutyenn òwganizasyon a-y. Tousa ka pousé-nou montré Jéova rèkonésans an nou (1 Tés. 5:18, 19). Kijan nou pé montré kè nou ka soutyenn òwganizasyon-la Jéova ka dirijé-la ? Fò-nou suiv tout konsèy ki bazé asi Labib kè nou ka touvé adan piblikasyon an nou, é kè nou ka tann lè nou réinyon é lè nou lasanblé. Anplisdisa, fò-nou fè tousa nou pé pou préché é pou anségné (1 Kor. 15:58).

18. Ka ou byen désidé a fè ?

¹⁸ Fò-nou byen désidé a apliké sé lèson-la ki an liv a Lévitik la. An-nou fè éfò pou Jéova aprésyé-nou é pou i aprésyé sakrifis an nou. An-nou kontinyé sèvi Jéova èvè on tchè ki plen rèkonésans. An-nou kontinyé ba Jéova sa nou ni dè méyè pas nou enmé-y dè-tou-kè. É an-nou soutyenn òwganizasyon-la i ka béni la dè-tou-kè. Konsa, nou ké montré Jéova kè sèvi-y antankè Témwen sé on lonnè pou nou é sa ni onlo valè !