AN TAN a Labib, on entandan sé té on moun ki té ka okipé dè kaz a ondòt moun oben dè byen a-y. An ébré é an grèk, yo ka sèvi èvè lèmo « entandan » pou palé dè moun-la ki ka jéré oben ki ka okipé dè on kaz.

Lè Jozèf, gason a Jakòb, té èsklav an Éjipt, i vin on entandan ; i té ka okipé-y dè kaz a mèt a-y. Mèt a-y ki té on Éjipsyen « ba Jozèf okipé-y dè tousa i té ni » (Jén. 39:2-6). Plita, lè Jozèf limenm vin on gran chèf an Éjipt, i ba on entandan okipé dè kaz a-y (Jén. 44:4).

An tan a Jézi, souvantfwa, moun ki té ni tè té ka rété anvil ; kifè yo pa té ka rété toupré a sé èsplwatasyon agrikòl la yo té ni la. Sé pousa, yo té ka chwazi on entandan pou kontwolé sa sé ouvriyé-la té ka fè adan èsplwatasyon-la touléjou.

Kimoun ki té pé vin entandan ? O prèmyé syèk, on ékriven Women non a-y sé Columelle té ka konséyé dè pran on èsklav ki té ja jérè, oben on moun ki « té ja ni on èkspéryans ». « Fò pa i té lésé sé ouvriyé-la fè sa yo vlé, men fò pa i té two rèd nonplis ». Mi sa i ka di ankò : « Sa ki pi enpòwtan pou on entandan, sé kè fò pa i konprann i konnèt tout biten men fò i toujou vé aprann plis ».

Pou palé dè sèwten travay ki ka fèt adan lasanblé krétyèn la, Pawòl a Bondyé ka sèvi èvè ègzanp a on entandan é dè sa i ka fè. Pa ègzanp, lapòt Pyè ankourajé sé krétyen-la sèvi èvè sé kapasité-la Bondyé ba-yo la ‘pou sèvi lézòt kon moun ki ka byen jéré favè-la Bondyé ba-yo la é kè yo pa menm mérité’ (1 Pyè 4:10).

Jézi limenm palé dè on entandan adan on ègzanp nou ka touvé an Lik 16:1-8. Anplisdisa, adan on pwofési ki ka montré kè Kris ké la antankè Wa, Jézi pwomèt disip a-y kè i ké mèt on « èsklav fidèl é prévwayan » oben on « entandan fidèl » anplas. Wòl a entandan-lasa sé té ké dè ba disip a Jézi nouriti èspirityèl la yo bizwen la pannan sé dènyé jou-la (Mat. 24:45-47 ; Lik 12:42). Nou kontan toubònman pas entandan fidèl la ka préparé piblikasyon ban nou pou fè fwa an nou vin pi fò ! Anplis, i ka voyé-yo toupatou si latè.