1. Dapré Matyé 7:13, 14, an ki sans nou pé di kè tout sé krétyen-la ka touvé-yo adan on vwayaj ?

ANTANKÈ krétyen vi an nou ka touvé-y kon on vwayaj. É la noutout anvi rivé sé an mond nouvo la pas mond-lasa sé Jéova, Bondyé an nou ki plen lanmou, ki ké gouvèné-y. Chakjou, nou ka goumé pou rété asi chimen a lavi. Men kon Jézi di, chimen-lasa étwèt é délè, pou suiv-li sé on konba (li Matyé 7:13, 14). Konm noutout enpawfè, nou pé pran ondòt chimen fasilman (Gal. 6:1).

2. Ka nou ké vwè adan awtik-lasa ? (gadé ti karé-la «  Imilité ka édé-nou chanjé »).

² Si nou vé rété asi chimen a lavi, fò-nou paré a chanjé mantalité an nou, konpòwtèman an nou é sa ki ni anfon a tchè an nou. Lapòt Pòl di sé krétyen Korent la kè fò yo té ‘kontinyé aksèpté kè yo koriyé-yo’ (2 Kor. 13:11). Konsèy-lasa sé pou nou osi. Adan awtik-lasa, nou ké vwè kijan Labib pé édé-nou chanjé é kijan zanmi an nou ki ni onlo èkspéryans pé édé-nou rété asi chimen a lavi. Anplis, nou ké vwè poukwa délè, sa pé rèd dè fè sa òwganizasyon a Jéova ka mandé-nou. É nou ké vwè kè imilité sé on kalité ki pé édé-nou chanjé san pèd jwa an nou.

3. Ka Pawòl a Bondyé pé édé-nou fè ?

³ Délè, pou ègzaminé sa ki an tchè an nou é sa ki an lèspri an nou, sa pa fasil. Pas tchè an nou trèt é défwa, nou ni dimal a vwè ola i bizwen menné-nou (Jér. 17:9). Nou fasil a kouyonné-nou noumenm an nou èvè « mové rézònman » (Jak 1:22). Alò, pou ègzaminé-nou, fò-nou itilizé Pawòl a Bondyé. Konsa, nou ké « pé vwè ki lidé é ki lentansyon » nou ni andidan tchè an nou (Ébr. 4:12, 13). Lè nou k’ay fè on radyo, nou pé sav ka ki ka pasé andidan kò  an nou. Menmjan-la, Pawòl a Bondyé ka édé-nou vwè sa ki ni anfon a tchè an nou. Jéova ka sèvi èvè Bib-la é i ka itilizé sé frè-la ki ka dirijé òwganizasyon a-y la pou ban-nou bon konsèy. Men pou sé konsèy-lasa fè-nou dibyen, fò-nou ni imilité.

4. Poukwa nou pé di kè onlè, wa Sayil té ka akwè-y ?

⁴ Ègzanp a wa Sayil ka montré-nou ka ki pé rivé lè nou pa ni imilité. Onlè, latè pa té ka pòté Sayil ankò pas i pa té ka admèt kè fò i té chanjé mantalité a-y é konpòwtèman a-y (Sòm 36:1, 2 ; Abak. 2:4). Pa ègzanp, Jéova té di Sayil sa pou i té fè apré i té fin bat èvè sé Amalésit-la men Sayil fè sa i té vé. É lè pwofèt Samiyèl vin di Sayil kè i pa obéyi, Sayil pa rèkonnèt érè a-y. I di Samiyèl kè sa i fè la pa té si grav ki sa é kè sé pèp-la ki té fòsé-y fè sa (1 Sam. 15:13-24). É a pa 1^é fwa i té ka aji konsa (1 Sam. 13:10-14). Malérèzman, tèlman i té ni òwgèy an tchè a-y i té ni dimal a kouté lè yo té ka ba-y on konsèy. Konm i pa té vé chanjé mantalité a-y, Jéova tonbé an zo a-y é i ba-y do.

5. Ka ègzanp a Sayil ka aprann-nou ?

⁵ Nou ponyonn pa anvi fè kon Sayil, kifè, fò-nou pozé-nou sé kèsyon-lasa : « Lè an ka li on konsèy an Bib-la, ès an ka chèché tim-tim-bwasèk mwen pa apliké-y ? Ès an ka mèt an tèt an mwen kè sa an ka fè la pa si grav ki sa ? Ès an jous ka di kè sé fòt a lézòt si an fè sa ? » Si ou rann-vou kont kè sé sa i ka rivé-w, fò ou fè éfò pou chanjé mantalité a-w. Pas siwvwè ou pa fè sa, tchè a-w ké plen òwgèy é Jéova pé’é vé frékanté-w ankò (Jak 4:6).

6. Wa Sayil é wa David pa té menm biten menm menm menm. Poukwa nou ka di sa ?

⁶ Rèmawké kè té ni on gran diférans antrè wa Sayil é wa David. Li David, i té enmé « lwa a Jéova » (Sòm 1:1-3). David té sav kè Jéova ka sové moun ki ni imilité men kè i kont moun ki ni òwgèy (2 Sam. 22:28). Kifè, David lésé lwa a Bondyé chanjé mantalité a-y. Mi sa i maké : « An ké ba Jéova louwanj pas i ban-mwen konsèy. Menm pannan lannuit, santiman an mwen ki séré pli fon andidan an mwen ka korijé-mwen » (Sòm 16:7).

7. Si nou ni imilité, ka nou ké fè ?

⁷ Si nou ni imilité, nou ké lésé Pawòl a Bondyé chanjé mantalité an nou, avan i fè-nou fè pon biten ki pa bon. Sé ké konsi nou ké tann Bondyé ka di-nou : « Mi la chimen-la yé. Suiv-li. » I ké avèti-nou si nou koumansé fè chimen kochi (Iz. 30:21). Si nou ka kouté Jéova, sa ké pwokiré-nou onlo byenfé (Iz. 48:17). Pa ègzanp, ponmoun pé’é ni a di-nou kè nou fè on biten ki pa bon é nou pé’é ni a santi-nou jenné. É nou ké vin pibon zanmi èvè Jéova pas nou ké rann-nou kont kè i ka aji èvè nou kon on Papa plen lanmou ka aji èvè timoun a-y (Ébr. 12:7).

8. An Jak 1:22-25, nou vwè kè Pawòl a Bondyé ka touvé-y kon on miwa. Kijan pou nou sèvi èvè-y ?

⁸ Pawòl a Bondyé ka touvé-y kon on miwa pou nou (li Jak 1:22-25). Toulématen, près noutout ka gadé-nou adan on glas avan nou pati. Konsa, si ni on biten ki pa k’ay, nou pé ranjé sa avan dòt moun vwè-nou. Menmjan-la, si nou ka li Labib chakjou, nou ké vwè ka ki pa bon adan mantalité an nou é nou ké vwè ka nou pé fè pou nou pé sa chanjé-y. Ni onlo moun ki ni labitid li tèks-di-jou a yo lèmaten avan yo pati, konsa, sa yo li la ké pé aji asi mantalité a yo. Kifè, an jouné-la, yo ka gadé pou vwè kijan yo pé apliké konsèy-la yo li la. Anplis, chakjou, fò-nou pran labitid étidyé Labib é pran tan réfléchi  asi-y. Pétèt kè pou nou, sé biten an kouyonnad men si nou vé rété asi chimen étwèt la ki ka menné a lavi, fò-nou fè-y.

9. Ka on zanmi a-w pé rivé a konstaté, é ka sa ké pousé-y fè ?

⁹ Ès sa ja rivé-w dè pran on chimen ki té’é fè-w kité Jéova ? (Sòm 73:2, 3). Si on zanmi a-w pran kouraj a-y a 2 men pou di-w kè sa ou ka fè la pa bon, ès ou kouté-y é ès ou suiv konsèy a-y ? Si sé sa ou fè, ou mérité félisité ! É sèten kè jous alajouné jòdi, ou ni onlo rèkonésans pou zanmi a-w pas i avèti-w (Pwov. 1:5).

10. Kijan pou ou réyaji si on zanmi a-w ka vin ba-w on konsèy ?

¹⁰ Mi sa Pawòl a Bondyé ka fè-nou sonjé : « Menmsi rèpwòch a on zanmi ka fè-w mal, sa ka montré kè i fidèl » (Pwov. 27:6). Ka pawòl-lasa vlé di ? Pou nou byen konprann, an-nou pran on ègzanp. Imajiné kè ou ka vin pou travèsé on lari, ni onpakèt vwati ka siwkilé é anmenmtan ou adan téléfòn a-w. Ou ka koumansé travèsé, é mandé-w menm si ni vwati ! Lèwgadé, on zanmi ka pongné bra a-w é i ka rédi-w asi twotwa-la. Tèlman i pongné-w fò, sa ka lésé gwo mak asi bra a-w. Men érèzman i fè sa pas si a pa té-y, vwati-la té’é ba-w yon tap ! Menmsi bra a-w rété ka fè-w mal pannan plizyè jou, ès ou ké kòlè èvè zanmi a-w pas i pongné-w fò konsa ? Awa ! Okontrè ! Ou ké byen kontan kè i édé-w. Menmjan-la, si on zanmi a-w ka vin di-w kè ou fè on biten oben ou di on biten ki pa’a fè Bondyé plézi, odépa sa pé rivé a fè-w mal. Men pa fè kòlè èvè zanmi a-w pas i vin ba-w on konsèy. Si ou aji konsa, ou ké aji kon moun sòt (Ékl. 7:9). Okontrè, di zanmi a-w mèsi pas i pran kouraj a-y a 2 men pou i té vin di-w sa anfas.

11. Lèwvwè on zanmi a yo ki enmé-yo ka ba-yo on konsèy, ni sèwten moun ki pa’a pran sa. Ka i ka fè-yo fè sa ?

¹¹ Sèwten moun pa’a pran yo ba-yo on konsèy, menmsi sé on bon zanmi ki ka ba-yo-y. Ka i ka fè-yo fè sa ? Òwgèy-la. Lèwvwè on moun ni òwgèy, i enmé yo ‘di-y sa i anvi tann’ é i ‘ka viré do a-y pou i pa kouté lavérité’ (2 Tim. 4:3, 4). Moun-lasa ka akwè-y onlo é i konnèt tout biten dapré-y. Men mi sa lapòt Pòl maké : « Si on moun ka konpranndèdi i sé on biten alòskè i pa ayen, i ka kouyonné-y limenm a-y » (Gal. 6:3). Wa Salomon ka èspliké-nou lidé-lasa an déotwa mo. Mi sa i maké : « On jenn timoun ki maléré men ki ni sajès, ni lontan plis valè ki on wa ki ja ni on bèl laj men ki sòt é ki pa jen ka kouté lè yo ka ba-y on konsèy » (Ékl. 4:13).

12. Lè nou ka li Galat 2:11-14, ka ègzanp a lapòt Pyè ka aprann-nou ?

¹² Gadé sa Pyè fè lèwvwè Pòl rèpran-y douvan toutmoun (li Galat 2:11-14). Pyè té’é pé lévé cho si i té rété gadé jan-la Pòl palé ba-y la é koté-la i fè sa la. Men Pyè pa té konsa. Sé té on boug ki té ni onlo sajès. I aksèpté konsèy-la Pòl ba-y la é i pa té ni Pòl si tchè. É plita, i jous di kè Pòl sé té ‘on frè ké i té enmé onlo’ (2 Pyè 3:15).

13. Lè nou anvi ba on moun on konsèy, ki biten pou nou pa jen oubliyé ?

¹³ Si ou ka santi kè fò ou ba on zanmi a-w on konsèy, ki biten pou ou pa jen oubliyé ? Avan ou ay vwè zanmi a-w, pozé-w kèsyon-lasa : « Ès an pa on ti jan ‘two karé’ ? » (Ékl. 7:16). Lè on moun ki two karé ka jijé lézòt, i pa’a tchenn kont dè sé prensip-la ki an Bib-la. É an jénéral, on moun konsa ka rèd èvè lézòt. Si apré ou pozé-w kèsyon-lasa, ou ka santi kè fò  ou ay palé ba zanmi a-w kanmenm, ay vwè-y pou di-y ki pwoblèm ki ni é pozé-y kèsyon pou fè-y rézonné pou édé-y konprann kè sa i ka fè la pa bon. Bazé tousa ou ka di asi Pawòl a Bondyé, é sonjé kè ou pa ni dwa jijé frè a-w. Ou la pou édé-y konprann ka Jéova ka rèsanti akòz dè sa i ka fè (Wom. 14:10). Apiyé-w asi sajès-la ki an Bib-la é, lè ou ka ba on moun on konsèy, aji èvè menm konpasyon ki Jézi (Pwov. 3:5 ; Mat. 12:20). Poukwa ? Pas Jéova ké aji èvè nou kon nou ka aji èvè lézòt (Jak 2:13).

14. Ka òwganizasyon a Bondyé ka ban-nou ?

¹⁴ Jéova ka gidé-nou asi chimen a lavi grasa òwganizasyon a-y. Òwganizasyon-lasa ka édé-nou apliké sé konsèy-la ki an Bib-la. Pa ègzanp, sé-y ki ka ban-nou sé vidéo-la é sé piblikasyon-la. É anplis, sé grasa-y si nou ka rivé ni sé réinyon-la. Nou pé manjé nouriti èspirityèl lasa zyé fèmé pas i bazé si Pawòl a Bondyé. Lè Komité santral la ka chwazi ki méyè métòd ki ni pou préché, i ka konté anlè lèspri sen. Men magrésa, sé frè-la toujou ka gadé si ni mwayen pòté on amélyorasyon. Poukwa ? Pas ‘mond-lasa sé chanjé i ka chanjé’ é fò òwganizasyon a Jéova fè kò èvè sé chanjman-lasa (1 Kor. 7:31).

15. Ki difikilté sèwten pwoklamatè ka jwenn ?

¹⁵ Lè òwganizasyon a Jéova ka ban-nou on nouvo èsplikasyon, oben lè i ka ban-nou plis enfòwmasyon asi sa ki byen é asi sa ki mal, nou ka aksèpté é nou ka apliké. Men si i ka fè on chanjman ki ka konsèwné-nou, kijan nou ka réyaji ? Pa ègzanp, konnyéla la, pou konstwi on sal é pou pran swen a-y, sa ka kouté lontan pli chè ki avan. Sé pousa Komité santral la di kè fò plizyè lasanblé lokal sèvi èvè menm Sal di Wayòm la. Kifè, yo fè plizyè lasanblé lokal fè onsèl é yo vann sèwten Sal di Wayòm. É konm sèwten koté ka manké sal, yo ka sèvi èvè lajan-lasa pou konstwi sé sal-lasa. Si la ou ka viv la, yo vann déotwa sal é yo fè plizyè lasanblé fè onsèl, pétèt kè ou ni dimal a fè kò èvè chanjman-lasa. Ni sèwten pwoklamatè ki ka fè plis chimen ki avan pou ay réinyon. Ni dòt ki travay rèd pou té konstwi on sal é pou pran swen a-y é lè yo ka vwè kè Lòwganizasyon ka vann-li, yo ni dimal a  aksèpté sa. Pétèt kè yo ni lenprésyon kè yo pèd tan a yo é kè tout travay-la yo fè la pa sèvi ayen. Men magrésa, yo ka soutyenn dispozisyon-lasa é yo mérité félisité toubònman !

16. Si nou ka fè sa ki maké an Kolosyen 3:23, 24 sa ké ban-nou tchè-kontan. Kijansa ?

¹⁶ Travay-la nou ka fè la sé ta Jéova é sé-y ki ka dirijé òwganizasyon a-y. Si nou pa jen oubliyé sa, nou toujou ké ni tchè-kontan (li Kolosyen 3:23, 24). Wa David ofè onpakèt lajan pou yo té konstwi tanp-la é sé on bèl ègzanp pou nou. Mi sa i di : « Kimoun an yé, é ka pèp an mwen yé, pou nou pé sa fè don konsa volontyé ? Pas tout biten ka vin dè-w, é sa nou ba-w la, sé an pwòp men a-w sa sòti » (1 Kron. 29:14). Nou osi, lè nou ka fè on don, lajan-la nou ka bay la, sé Jéova menm ki ban-nou-y. Men Jéova ka aprésyé lè nou ka itilizé tan an nou, fòs an nou é lajan an nou pou soutyenn travay-la i ban-nou fè la (2 Kor. 9:7).

17. Si ou ka vwè kè ou ni sèwten biten a chanjé, poukwa fò pa ou dékourajé-w ?

¹⁷ Pou nou rété asi chimen étwèt la ki ka menné a lavi, fò-nou suiv ègzanp a Jézi alatras (1 Pyè 2:21). Si ou ka santi kè ou ni sèwten biten a chanjé, pa dékourajé. Pas sé on bon biten ; é sa ka montré kè ou anvi fè sa Jéova ka mandé. Pa oubliyé : Jéova sav kè noutout enpawfè é i pa’a mandé-nou fè ègzaktèman kon Jézi fè.

18. Si nou anvi rivé an mond nouvo la, ka pou nou fè ?

¹⁸ Sé douvan pou nou gadé é fò-nou toujou paré a chanjé mantalité an nou, konpòwtèman an nou é sa nou ni anfon a tchè an nou (Pwov. 4:25 ; Lik 9:62). Fò-nou ni imilité, ‘fò-nou kontinyé ni tchè-kontan é fò-nou kontinyé aksèpté kè yo korijé-nou’ (2 Kor. 13:11). Si nou ka fè sa, ‘Bondyé-la ki plen lanmou la é ki enmé lapé ké èvè nou’. I ké édé-nou ni tchè-kontan dépi konnyéla é i ké ban-nou lavi étèwnèl adan mond nouvo la.