1. Dépawfwa, nou ka santi-nou tousèl douvan sèwten pwoblèm é nou pa’a rivé jéré sa. Ka ki pé konsolé-nou ? (Sòm 118:5-7).

ÈS SA ja rivé-w dè santi-w tousèl douvan on difikilté é ou pa’a touvé ponmoun pou édé-w ? Ni onlo moun ki ja touvé-yo adan sitiyasyon-lasa é jous sèwvitè a Bondyé ja pasé pa la (1 Wa 19:14). Si janmé sa rivé-w on jou, sonjé pwomès-la Jéova fè-nou la : « An pé’é jen kité-w, é an pé’é jen lagé-w. » Kifè, nou ké pé di èvè onlo konfyans : « Jéova sé sèkou an mwen ; an pé ké pè » (Ébr. 13:5, 6). Lapòt Pòl maké sé pawòl-lasa pou sé krétyen Jidé la, apépré an 61 a épòk an nou. Sé pawòl-lasa ka fè-nou sonjé sa ki maké an Sòm 118:5-7 (li-y).

2. Ka nou ké vwè adan awtik-lasa, é poukwa ?

² Pòl té pé di kè Jéova sé sèkou a-y pas Jéova té ja ni lokazyon édé-y a plizyè rèpriz. Pa ègzanp, 2 ou 3 lanné avan i voyé lèt-la i maké ba sé Ébré-la, Pòl manké mò adan on gwo tanpèt (Akt 27:4, 15, 20). Pannan vwayaj-lasa, Jéova édé Pòl kon i toujou té abityé fè. Jéova itilizé plizyè mwayen diféran pou i té vin o sèkou a sèwvitè a-y. An-nou vwè 3 adan yo. Pou édé-y, Jéova sèvi 1) èvè Jézi é sé zanj-la, 2) èvè sèwten moun ki ni otorité é 3) èvè sé fré é sè la. Si nou ka pran tan ègzaminé sa Pòl viv, nou ké sèten a san pou san kè Jéova ké réponn-nou lèwvwè nou ké kriyé-y o sèkou.

3. Ki kèsyon Pòl dwèt té ka pozé-y, é poukwa ?

³ Pòl té bizwen yo édé-y. An 56 a épòk an nou, Pòl té an tanp-la a Jérizalèm é on foulmoun trenné-y déwò-la é éséyé tchouyé-y. Lèlandèmen-la, yo menné Pòl douvan sannédren-la é lènmi a-y té vé fè-y fè papiyòt (Akt 21:30-32 ; 22:30 ; 23:6-10). A moman-lasa, pétèt kè Pòl di an tchè a-y : « Poo ! Konmen tan sa ké diré menm ? »

4. Kijan Jéova itilizé Jézi pou édé Pòl ?

⁴ Kijan Jézi édé Pòl ? Yo arété Pòl é lèlandèmen swa, Jézi, « Ségnè-la », té doubout akoté a-y é mi sa i di-y : « Kouraj Pòl ! Pas, menmjan ou fè tousa ou té pé pou palé dè mwen a Jérizalèm, sé menmjan-la osi fò ou palé a Wòm » (Akt 23:11). Pwomès-lasa ankourajé Pòl toubònman ! Jézi félisité Pòl pas i fè tousa i té pé pou palé dè-y a Jérizalèm. I pwomèt Pòl kè ayen pa té’é rivé-y joustan i rivé Wòm é kè Pòl té’é palé dè-y adan vil-lasa osi. Lè Jézi ba Pòl garanti-lasa, Pòl santi-y ansékirité menmjan on timoun ka santi-y ansékirité adan bra a pap’a-y.

5. Kijan Jéova itilizé on zanj pou édé Pòl ? (gadé imaj-la ki anlè po a jounal-la).

⁵ Ki dòt difikilté Pòl jwenn ? Apépré 2 an apré sa ki té rivé-y Jérizalèm, Pòl té adan on bato ki té k’ay an Itali. Lèwgadé, on gwo tanpèt lévé. Bato-la manké chalviré é tout sé moun-la ki té òbò bato-la konpranndèdi yo té kay mò. Men li Pòl, i pa té pè. Poukwa nou ka di sa ? Mi sa i di sé moun-la ki té òbò bato-la : « Yè swa, Bondyé-la an ka adoré la é kè an ka sèvi la, voyé on zanj a-y é zanj-la té doubout owa an mwen é mi sa i di-mwen : “Fò pa ou pè, Pòl. Fò ou ay douvan Séza. Anplisdisa, gay sa : grasa-w, Bondyé ké sové tout sé moun-la ki ka vwayajé èvè-w la” ». Jéova té ja sèvi èvè Jézi pou ankourajé Pòl men kou-lasa i sèvi èvè on zanj pou i té fè sa. É Pòl rivé a Wòm, kon Jéova té di (Akt 27:20-25 ; 28:16).

6. Ki pwomès Jézi fè, é poukwa sa pé ban-nou fòs ?

⁶ É nou, kijan Jézi ka édé-nou ? Jézi ké soutyenn-nou menmjan i soutyenn Pòl. Pa ègzanp, mi sa Jézi pwomèt toutmoun ki ka suiv-li : « An ké èvè zòt touléjou jiskatan fen a mond-la rivé » (Mat. 28:20). Sa Jézi di la pé ankourajé-nou toubònman ! Poukwa nou ka di sa ? Pas ni dé jou, biten-la ka rèd menm ! Pa ègzanp, lè on moun nou enmé ka mò, a pa 2 jou sèlman nou ka tris ; men sa pé diré  plizyè lanné. Ni sèwten moun aprézan ki ka pasé dé bout-rèd paskè laj-la ka bat-yo. É pou dòt ankò, biten-la ka rèd pas sèwten jou, moral a yo a zéro. Magrésa, nou ka touvé fòs pou nou goumé pas nou sav Jézi èvè nou « touléjou », menm lèwvwè 2 bra an nou kasé (Mat. 11:28-30).

7. Dapré sa Révélasyon 14:6 ka di, kijan Jéova ka édé-nou jòdijou ?

⁷ Adan Labib, yo ka di-nou kè Jéova ka itilizé zanj a-y pou édé-nou (Ébr. 1:7, 14). Pa ègzanp, sé zanj-la ka édé-nou lè nou ka préché bon nouvèl a Wayòm la ba moun ki sòti an ‘tout nasyon, an tout tribi é an tout lang’ (Mat. 24:13, 14 ; li Révélasyon 14:6).

8. Kijan Jéova itilizé on komandan pou vin a sèkou a Pòl ?

⁸ Kijan yo édé Pòl ? An 56 a épòk an nou, Jézi di Pòl kè i pé sèten kè i ké rivé a Wòm. Sèwten Juif ki té a Jérizalèm monté on konplo pou yo té ataké Pòl é pou yo té tchouyé-y. Klòd Lizyas sé té on komandan women é lè i vin aprann sa yo té k’ay fè Pòl, i vin a sèkou a-y. Klòd pa pèd tan. I voyé on ploton sòlda pwotéjé Pòl. Yo fè-y sòti a Jérizalèm pou yo té menné-y a Sézaré ki té a 105 kilomèt apépré. A Sézaré, on gouvènè, non a-y sé té Féliks, « di mèt déotwa gad pou véyé asi Pòl adan chato a Éwòd ». A moman-lasa, sé moun-la ki té vé tchouyé Pòl la pa té pé fè-y ayen ankò (Akt 23:12-35).

9. Kijan Fèstis édé Pòl ?

⁹ Dézan apré, Pòl té lajòl a Sézaré toujou. Konnyéla, sé Fèstis ki té ka gouvèné an plas a Féliks. Sé Juif-la pléré dèyè Fèstis pou i té pé fè Pòl désann a Jérizalèm, men Fèstis di-yo awa. Pétèt, Fèstis té sav kè sé Juif-la té « monté on konplo pou tchenbé Pòl é pou tchouyé-y pannan i té an chimen » (Akt 24:27 – 25:5).

10. Lè Pòl mandé pou Séza jijé-y, kijan Fèstis réyaji ?

¹⁰ Tibwen tan apré, yo jijé Pòl a Sézaré. Konm « Fèstis té vé fè sé Juif-la plézi », mi sa i mandé Pòl : « Ès ou vé monté Jérizalèm pou mwen pé sa jijé-w ? » Pòl té sav byen kè si i té monté Jérizalèm sé tchouyé sé Juif-la té’é tchouyé-y. É i té sav osi ka pou i té fè pou i té sové vi a-y : fò i té désann a Wòm é kontinyé préché. Mi sa i di : « Sé douvan Séza an vé ay ! » Fèstis mandé moun a-y konsèy é mi sa i réponn : « Sé douvan Séza ou vé ay, [ében] ou ké ay douvan Séza. » Konm Fèstis té dakò pou voyé Pòl a Wòm, sa sové vi a Pòl. Talè, Pòl té’é a Wòm é sé Juif-la pa té’é pé tchouyé-y ankò (Akt 25:6-12).

11. Pétèt kè ni on vèwsé an Izayi ki ba Pòl bon fòs. Ki vèwsé ésa ?

¹¹ Pannan Pòl té ka atann pou yo té fè-y monté an Itali, pétèt i té ka sonjé on avèwtisman nou ka touvé adan liv a pwofèt Izayi. Izayi té ékri sé pawòl-lasa pou lènmi a Jéova. Mi sa Jéova té fè-y maké : « Fè tout plan a zòt, men sa pé’é maché. Zò pé di sa zò vé, men ayen pé’é fèt, pas Bondyé èvè nou ! » (Iz. 8:10). Pòl té sav kè Bondyé té’é édé-y é sèten sa ba-y plis fòs pou andiré sé éprèv-la kè i té k’ay jwenn la.

12. Kijan Jilyis aji èvè Pòl, é pétèt, ka sa édé Pòl konprann ?

¹² An 58 a épòk an nou, Pòl ka pati pou  Litali. Konm i té on prizonyé, ni on ofisyé women ki té ka okipé dè-y. Non a-y sé té Jilyis. Lè Pòl vin touvé-y anba rèsponsabilité a Jilyis, Jilyis té’é pé fè-y sa i vé. Swa i té ka fè-y bon méchansté oswa i té ka aji byen èvè-y. Men ka i désidé fè ? Lèlandèmen, lè yo débaké, « Jilyis aji èvè Pòl épi bonté é pèwmèt-li ay aka zanmi a-y pou yo pran swen a-y ». I jous vin a sèkou a Pòl é i sové vi a-y. Kijansa ? Sé sòlda-la té vé tchouyé tout sé prizonyé-la ki té anlè bato-la men Jilyis anpéché-yo fè sa. Poukwa ? I té byen désidé a « fè tousa i té pé pou ayen pa rivé Pòl ». Lè Pòl vwè jan Jilyis té janti èvè-y, i dwèt rann-li kont kè sé Jéova ki té dèyè do a sa. An réyalité, Jéova té ka itilizé ofisyé-lasa pou i té édé Pòl é pou i té pwotéjé-y (Akt 27:1-3, 42-44).

13. Kijan Jéova pé itilizé sé dirijan-la ?

¹³ É nou, kijan Jéova ka édé-nou ? Lè sa k’ay an sans a pwojé a-y, Jéova pé sèvi èvè lèspri sen a-y ki puisan pou pousé sèwten moun ki ni otorité a fè sa i anvi. Gadé sa wa Salomon maké : « Tchè a on wa kon ti rivyè ki an men a Jéova. I ka dirijé-y koté-la i vlé la » (Pwov. 21:1). Ka sé pawòl-lasa vlé di ? Ni mwayen lézòm fouyé on kannal pou fè on rivyè pran ondòt chimen é pou yo fè-y ay la yo vlé. Menmjan-la, Jéova pé sèvi èvè lèspri sen a-y pou fè lidé a sé dirijan-la ay an sans a volonté a-y. Jéova ka fè sa pou pousé sé dirijan-la pran désizyon ki an favè a pèp a-y (gadé Èsdras 7:21, 25, 26).

14. Dapré Akt 12:5, pou kimoun nou pé priyé ?

¹⁴ Ka nou pé fè ? Nou pé priyé « pou sé wa-la é pou moun ki ni on gwo otorité » lè yo ni désizyon a pran anrapò èvè prédikasyon-la é anrapò èvè sé réinyon-la (1 Tim. 2:1, 2, nòt ; Néém. 1:11). O prèmyé syèk, sé krétyen-la té ka priyé onlo pou frè é sè a yo ki té lajòl é nou osi nou ka fè menm biten-la jòdijou (li Akt 12:5 ; Ébr. 13:3). Anplisdisa, nou pé priyé pou sé gad-la ki an lajòl-la ki ka véyé frè é sè an nou. Nou pé priyé Jéova pou i pousé sé moun-lasa aji « épi bonté » èvè frè é sè an nou kon Jilyis fè èvè Pòl (Akt 27:3).

15-16. Kijan Jéova itilizé Aristawk é Lik pou édé Pòl ?

¹⁵ Kijan sé frè é sè-la édé Pòl ? Lè Pòl té k’ay a Wòm, Jéova sèvi a plizyè rèpriz  èvè sé frè é sè-la pou édé-y. An-nou vwè déotwa ègzanp.

¹⁶ Aristawk é Lik, sé té 2 bon zanmi a Pòl. Lèwvwè Pòl té k’ay a Wòm, yo désidé ay èvè-y *. Aristawk é Lik té ka riské vi a yo lè yo désidé fè vwayaj-lasa, pas sé té on vwayaj ki té danjéré toubònman. Adan Labib, yo pa’a di-nou kè Jézi té di ni Lik, ni Aristawk, kè yo té’é rivé a Wòm san ayen rivé-yo. Men yo désidé a-y kanmenm pou yo té pé sa édé Pòl. Sé yenki déotwa tan apré, pannan yo té òbò bato-la, kè yo vin sav kè ayen pa té’é rivé-yo. Kifè, lèwvwè Lik é Aristawk baké òbò bato-la a Sézaré, Pòl dwèt di Jéova mèsi èvè tout tchè a-y. I di-y mèsi davwa i itilizé sé 2 frè-lasa pou édé-y, 2 frè ki té plen kouraj (Akt 27:1, 2, 20-25).

17. Kijan Jéova itilizé sé frè é sè-la pou édé Pòl ?

¹⁷ Sé frè é sè-la édé Pòl a plizyè rèpriz pannan vwayaj a-y. Lèwvwè yo fè èskal a Sidon, Jilyis pewmèt Pòl ay aka zanmi a-y pou yo pran swen a-y. Aprésa, lè Pòl é zanmi a-y rivé Putéoli, ‘yo jwenn déotwa frè, é sé frè-la ensisté pou yo té pasé 7 jou èvè yo’. Sé frè é sè-la té ka okipé dè Pòl é dè zanmi a-y byen konm i fo é toupannan yo té ka fè sa, sèten Pòl dwèt pwofité pou ankourajé-yo (gadé Akt 15:2, 3). Pòl é zanmi a-y woupran fòs é aprésa, yo kontinyé vwayaj a yo (Akt 27:3 ; 28:13, 14).

18. Poukwa Pòl di Bondyé mèsi é ka ki ba-y kouraj ?

¹⁸ Pannan Pòl té an chimen pou i té ay a Wòm, pétèt i sonjé sé pawòl-la i té maké la 3 an avan pou sé frè é sè-la ki té ka rété an vil-lasa. Mi sa i té di-yo : « Sa ka fè plizyè lanné an anvi vin vwè-zòt » (Wom. 15:23). Men Pòl pa jen konpranndèdi kè i té’é rivé a Wòm antankè prizonyé. Lèwvwè sé frè-la vin sav kè i ka rivé, yo ay jwenn-li. A pa ti ankourajé sa dwèt ankourajé-y ! « Lè Pòl vwè-yo i di Bondyé mèsi é sa ba-y onlo kouraj  » (Akt 28:15). Sèlon vèwsé-lasa, sé sé frè-la ki té la, men, sé Jéova Pòl ka di mèsi. Poukwa ? Pas la ankò, Pòl vwè kè sé Jéova ki ka itilizé sé frè-la pou édé-y.

19. Dapré 1 Pyè 4:10, kijan Jéova pé itilizé-nou pou soutyenn on frè oben on sè ?

¹⁹ Ka nou pé fè ? Ès ni frè é sè an lasanblé a-w ki ka soufè pas yo malad oben pas yo ni dòt pwoblèm ankò ? Sé pé osi pas yo pèd on moun yo té enmé. Si nou ka vin sav kè on moun bizwen nou soutyenn-li, nou pé priyé Jéova pou i édé-nou vwè ka nou té’é pé di oben ka nou té’é pé fè pou montré moun-lasa kè nou enmé-y. Pétèt kè sa nou ké di oben sa nou ké fè sé ègzaktèman sa frè an nou oben sè an nou bizwen * (li 1 Pyè 4:10). Si nou ka édé frè é sè an nou, yo ké kwè pi fò ankò adan pwomès-la Jéova fè-nou la en Ébré 13:5 : « An pé’é jen kité-w é an pé’é jen lagé-w ». Yo ké ni lenprésyon kè sé konsi sé ba yo Jéova ka palé. Sèten sa ké mèt onlo jwa an tchè a-w !

20. Labib ka di : « Jéova sé sèkou an mwen ». Poukwa nou sèten dè sa ?

²⁰ Menmjan ki Pòl é zanmi a-y, nou osi nou pé jwenn onlo gwo difikilté ki ka touvé-yo kon tanpèt. Anmenmtan, nou sav osi kè nou pé tchenn tchè pas Jéova èvè nou. I ka itilizé Jézi é sé zanj-la pou édé-nou. Anplisdisa, Jéova pé itilizé sé dirijan-la pou édé-nou si sa k’ay an sans a pwojé a-y. É kon onlo adan nou ja konstaté, Jéova pé itilizé lèspri sen a-y pou pousé sé frè é sè-la édé-nou. Kifè, kon Pòl, nou ké pé di : « Jéova sé sèkou an mwen ; an pé ké pè. Ka on nonm pé fè-mwen ? » É nou pé’é ni pon dout asi sa ! (Ébr. 13:6).