1-2. Ka nou pé fè pou suiv sa ki maké an Pwovèb 4:25 ? Bay on ègzanp.

 IMAJINÉ sé 3 sitiyasyon-lasa. On sè ki ja ni on bèl laj ka sonjé tout bèl biten i viv lè i té jenn. Menmsi lavi pi rèd pou-y konnyéla la, i ka kontinyé fè tousa i pé pou sèvi Jéova (1 Kor. 15:58). I ka sonjé kijan lavi ké bèl lè i ké èvè fanmi a-y é zanmi a-y an paradi-la. On sè ka sonjé kè on moun an lasanblé-la fè-y on biten ki fè-y mal, men i désidé mèt sa dèyè do a-y (Kol. 3:13). On frè ka sonjé mové biten i fè avan. Men konnyéla la, sa ki an lèspri a-y sé fè tousa i pé pou i rété fidèl a Jéova (Sòm 51:10).

² Sé 3 ègzanp-lasa ka sanm. Kijansa ? Sé frè é sè-la ka sonjé biten ki fèt avan, men a pa yenki sa ki an tèt a yo. Okontrè, « sé douvan yo ka gadé ! » (li Pwovèb 4:25).

3. Poukwa fò-nou « gadé dwèt douvan » nou ?

³ Poukwa sa enpòwtan kè nou « gadé dwèt douvan » nou ? Si on moun ka gadé dèyè do a-y, i ké toujou maché kochi. Menmjan-la, si nou toujou ka sonjé biten ki fèt avan, nou pé’é jen pé sèvi Jéova a san pou san (Lik 9:62).

4. Ka nou ké vwè adan awtik-lasa ?

⁴ Adan awtik-lasa, nou ké vwè 3 pyèj ki té’é pé fè-nou konsantré-nou twòp asi sa ki ja pasé : 1) lè nou anvi viv kon avan, 2) lè nou ni rankin é 3) lè nou ka santi-nou koupab alòskè Jéova ja padonné-nou. Nou ké vwè ki konsèy Bib-la ka ban-nou pou nou pa pri adan sé zatrap-lasa. Konsa, nou pé’é viré gadé « sa ki dèyè do an nou », men nou ké kouri dèyè « sa ki douvan an nou » (Filip. 3:13).

5. An Éklézyas 7:10, yo ka di-nou kè ni on biten pou nou pa fè. Ki biten ésa ?

⁵ (Li Éklézyas 7:10.) Si ou gadé byen, adan vèwsé-lasa yo pa’a di-nou kè sé on mové biten si nou ka mandé-nou : « Poukwa an tan lontan sa té bon ?» Paskè sé grasa Jéova  si nou ka rivé sonjé tout bèl biten nou té fè avan. É sé on bèl kado sa ! Men, vèwsé-la ka di fò pa ou di : « Poukwa biten-la té pibon ki konnyéla la ? » Kivédi kè fò-nou fè atansyon pou nou pa konparé jan nou té ka viv avan é jan nou ka viv konnyéla la, é di kè konnyéla la, ayen pa bon menm ! Adan ondòt vèwsyon a Labib, mi kijan yo tradui vèwsé-lasa : « Fò pa ou jen di : Poo ! Poukwa biten-la té pibon antan lontan ? » Pas on moun ki saj pa’a rézonné konsa. » (La Sainte Bible, sèlon L-C Fillion).

6. Pétèt nou ka di kè vi an nou té pi bèl avan. Men poukwa fò pa nou rézonné konsa ? Bay on ègzanp.

⁶ Pétèt kè nou ka di kè vi an nou té pi bèl avan. Men poukwa fò pa nou rézonné konsa ? Paskè si nou rété ka sonjé yenki sé bèl biten-la nou viv la, nou pé rivé a oubliyé tout sé difikilté-la nou té ka jwenn la. Pa ègzanp, an-nou pran ka a sé Izraélit-la. On ti moman apré yo té sòti an Éjipt, yo té ja oubliyé jan lavi té rèd pou yo adan péyi-lasa ! Ka yo té ka sonjé ? Mi sa yo di : « A pa ti sonjé nou ka sonjé sé pwason-la nou té ka manjé la an Éjipt la ! Anplis, nou té ka ni yo pou ayen. Pa menm palé dè sé konkonm-la, dè sé pastèk-la, dè sé pwaro-la, dè sé zognon-la é dè lay-la ! » (Nonb 11:5). Men ès sé pou ayen vréman kè yo té ka manjé tousa ? An réyalité, sé Izraélit-la té ka péyé sa chè, piskè yo té èsklav an Éjipt. É yo té ka fè-yo bon méchansté ! (Ègz. 1:13, 14 ; 3:6-9). Poutan, yo oubliyé tout méchansté-la yo fè-yo la, é yo té anvi viré an péyi-lasa. Olyé yo té sonjé tout sé bon biten-la Jéova té sòti fè ba yo la, yo té préféré sonjé bon biten yo té ni an Éjipt. Jéova pa té kontan-yo menm (Nonb 11:10).

7. Ka ki édé on sè pou i pa té sonjé yenki sa i viv avan ?

⁷ Ka nou pé fè pou nou pa pri adan pyèj-lasa ? An-nou pran ègzanp a on sè ki koumansé travay an Bétèl a Bwouklin an 1945. Kèlkè lanné apré, i mayé èvè on frè ki té ka travay an Bétèl-la kon-y  menm, é yo kontinyé sèvi Jéova ansanm pannan enpé lanné. Men malérèzman mari a-y tonbé malad an 1976. I ka di kè lè mari a-y santi i té k’ay mò, i ba-y déotwa bon konsèy pou i pé sa kenbé lèwvwè i pé’é la ankò. Mi sa mari a-y di-y : « Dépi nou mayé, nou ja pasé onlo bèl moman ansanm. Pa ni onlo moun ki ja viv sa ! An sav ou pé’é jen oubliyé tout bèl moman kè nou pasé. Men pa rété sonjé yenki sa ! Tristès-la ké disparèt piti-a-piti. Pa lésé chagren-la tchouyé-w, é pa lésé malè-lasa dékourajé-w ! Men fò ou kontan lè ou ka sonjé tout bèl biten kè nou fè lè nou té ka sèvi Jéova ansanm. Sé grasa Jéova si nou ka rivé sonjé sé biten-lasa, é sé on bèl kado ! » Mi on bèl konsèy mi !

8. Kijan sè an nou suiv konsèy a mari a-y ?

⁸ Sè an nou suiv konsèy a mari a-y. I rété ka sèvi Jéova jiskatan i mò a 92 an. Kèlkè lanné avan i mò mi sa i di : « An rété ka sèvi Jéova aplentan pannan 63 an. É lè an ka viré sonjé tout bèl biten kè an fè, an pé di kè vi an mwen té bèl toubònman. » Men poukwa i ka di sa ? Mi sa i ka èspliké : « Vi an nou bèl pas nou ka fè pawti a on fanmi ki èstraòwdinè. Nou lantouré èvè frè é sè é nou ni lèspwa dè viv èvè yo adan paradi-la. Anplis, nou ké pé sèvi Jéova, Gran Kréyatè an nou, vré Bondyé-la pou touttan b. » Sè-lasa kontinyé gadé dwèt douvan a-y é sé on bèl ègzanp pou nou toubònman.

9. Sèlon Lévitik 19:18, a ki moman nou pé ni dimal a padonné ?

⁹ (Li Lévitik 19:18.) Lè sé on moun an lasanblé-la, on zanmi an nou oben on fanmi an nou ka fè-nou on biten, nou pé ni dimal a pasé si sa ! Pa ègzanp, on sè di kè ondòt sè volé lajan a-y. Men aprésa, i rann-li kont kè a pa té sa, é i mandé lòt sè-la padon. A pa pou sè-la menm ! Sa rété  anlè tchè a-y. Ès sa ja rivé-w dè rèsanti menm biten-la ? Menmsi nou po’o jen touvé-nou adan menm sitiyasyon ki sè-lasa, pétèt kè on moun ni lokazyon fè-nou on biten é nou té ka santi kè nou pa té’é jen rivé padonné moun-lasa.

10. Lèwvwè nou ni rankin an tchè an nou, ka ki pé édé-nou ?

¹⁰ Ka ki pé édé-nou lè nou ni rankin an tchè an nou ? 1^é biten pou nou sonjé sé kè Jéova ka vwè tout biten. I konnèt tousa nou ka viv é i ka vwè lè yo ka fè-nou on biten ki pa jis (Ébr. 4:13). Sa ka fè-y lapenn lè i ka vwè-nou ka soufè (Iz. 63:9). É si nou ka soufè pas yo fè-nou on biten ki pa jis, nou pé sèten kè Jéova ké fè doulè-lasa disparèt (Rév. 21:3, 4).

11. Lè nou ka désidé padonné, ka sa ka pòté dè bon pou nou ?

¹¹ Anplis, fò pa nou oubliyé kè lè nou ka padonné, nou ka santi-nou pibyen. Sé sa sè-la yo té akizé la konstaté. Piti-a-piti, i rivé padonné sè-la ki té akizé-y la, kifè, i pa té ni sè-lasa asi tchè a-y ankò. I ka rèkonnèt kè lè ou ka padonné lézòt, Jéova ka padonné-w osi (Mat. 6:14). Apapoudi i pa té sav kè sa sè-la té fè-y la pa té bon, men i désidé padonné-y. Kifè, sè an nou pi kontan konnyéla la é i ka konsantré-y asi sa i pé fè pou Jéova.

12. Ka 1 Jan 3:19, 20 ka aprann-nou ?

¹² (Li 1 Jan 3:19, 20.) Sa ja rivé-noutout dè santi-nou koupab. Sèwten frè é sè ka santi-yo koupab akòz dè mové biten yo fè avan yo té vin Témwen. Ni dòt aprézan ki fè bétiz apré yo batizé é yo ka santi-yo koupab akòz dè sa (Wom. 3:23). Sé vré, nou vé fè sa ki jis, men « noutout, pi souvan ki rarman, nou ka fè érè » (Jak 3:2 ; Wom. 7:21-23). An jénéral, nou pa enmé santi-nou koupab. Men sa ni bon koté a-y osi. Poukwa ? Pas lè nou ka santi-nou koupab, sa pé édé-nou ranjé kò an nou é sa pé édé-nou pa woufè sé menm érè-la (Ébr. 12:12, 13).

13. Défwa, nou ka santi-nou koupab akòz dè on érè nou fè é nou pa’a rivé mèt sa dèyè do an nou. Poukwa sa pa bon ?

¹³ Dépawfwa, menmsi nou ja mandé Jéova padon pou on érè nou té fè, é kè i ja padonné-nou, nou ka santi-nou koupab toujou é nou pa’a rivé mèt sa dèyè do an nou. É afòs, sa pé fè-nou ditò ! (Sòm 31:10 ; 38:3, 4). Kijansa ? An-nou palé dè on sè ki té ka kontinyé santi-y koupab akòz dè péché kè i té fè avan. Mi sa i ka di : « An tèt an mwen an té ka di-mwen kè sa pa ka sèvi ayen kè an travay rèd pou Jéova, paskè dè tout fason an pé’é sové. » Ni onlo adan nou ki ja touvé-yo an menm sitiyasyon ki sè-lasa. Men fò-nou fè atansyon pou nou pa pri adan zatrap-lasa. Poukwa ? Paskè a pa ti kontan Satan té’é kontan si nou té ka arété sèvi Jéova, alòskè Jéova ja padonné-nou é kè i pé pa pi enmé-nou ki sa (gadé 2 Korentyen 2:5-7, 11).

14. Kijan nou pé sèten kè Jéova pa abandoné-nou ?

¹⁴ Magrésa, nou pé ka mandé-nou : « Kijan an pé sèten kè Jéova pa lagé-mwen ? » Men si ou ka pozé-w kèsyon-lasa sé kè ou sav kè ni mwayen Jéova padonné-w. Ni kèlkè lanné dè sa, mi sa on Tou dè Gad té ka di : « Sa pé rivé kè nou fè menm érè-la plizyè fwa. É pétèt kè jousalè, nou po’o jen rivé pèd on vyé manni nou té ni avan nou té koumansé sèvi  Bondyé. [...] Men pa dékourajé-w ! Pa mèt an tèt a-w kè ou fè on péché kè Jéova pé’é jen pé padonné. Sé ègzaktèman sa Satan té’é vé kè ou mèt an tèt a-w ! Si ou ka santi-w tris é kè ou pa’a santi-w byen an po a-w akòz dè sa ou fè la, sa ka montré kè ou sé on bon moun é kè Jéova pé padonné-w. Kontinyé montré-w toupiti é kontinyé mandé Bondyé padon. Konsa, ou ké santi-w byen an po a-w é i ké édé-w arété fè érè-lasa. On timoun pa’a rété gadé konmen fwa i k’ay owa Pap’a-y pou menm pwoblèm-la ! É chakfwa i k’ay owa pap’a-y, i ka di pap’a-y édé-y. Alò kontinyé mandé Jéova édé-w é i ké édé-w. I ké ba-w on favè kè nou ponyonn pa mérité c. »

15-16. Kijan sèwten frè é sè santi-yo lè yo rann-yo kont kè Jéova pa lagé-yo ?

¹⁵ Onlo frè é sè rann-yo kont kè Jéova pa jen abandoné-yo, é sa konsolé-yo toubònman. Ni kèlkè lanné dè sa, on frè li on awtik a Tou dè Gad ki té ka montré kijan Labib pé édé on moun chanjé. Adan awtik-lasa, yo té ka palé dè on sè ki viv onlo biten ki té rèd an vi a-y. É akòz dè sa, i té ni dimal a kwè kè Jéova té enmé-y. Menm apré batèm a-y, i rété ka goumé èvè sé mové lidé-lasa onpakèt lanné. Men konm i pran tan réfléchi asi ranson-la, sa édé-y konprann kè Jéova enmé-y d.

¹⁶ Kijan ègzanp a sè-la édé frè-la ? Mi sa frè-la ka di : « Lè an té jenn, an té pran labitid gadé foto pòwno. An té ni dimal a arété sa ! É pa ni lontan dè sa, an woutonbé adan sa ankò. Men an mandé sé ansyen-la édé-mwen, kifè an pwogrésé é an rivé about a pwoblèm-lasa. Sé ansyen-la montré-mwen kè Jéova enmé-mwen é kè Jéova vé padonné-mwen. Men magrésa, dépawfwa, an ka santi kè an pa ni pon valè, é an ka mandé-mwen kijan Jéova pé enmé on moun kon mwen. Lè an li ègzanp a sè-lasa, sa édé-mwen toubònman. Konnyéla la, an ka konprann kè lè an ka di kè Jéova pé pa padonné-mwen, sé konsi an ka di-y kè sakrifis a gason a-y pa asé gran pou kouvè péché  an mwen. An dékoupé awtik-lasa é an mété-y on koté. Konsa, chakfwa kè an ni lenprésyon kè Jéova pa enmé-mwen, an ka rèli-y é an ka pran tan réfléchi anlè-y. »

17. Pòl rivé mèt tout mové biten i fè dèyè do a-y. Kijan i rivé fè sa ?

¹⁷ Sé ègzanp-lasa ka fè-nou sonjé lapòt Pòl. Avan i té vin krétyen, i fè onpakèt mové biten. Pòl pa oubliyé sa i té fè, men i pa arété-y asi sa (1 Tim. 1:12-15). I té sav kè grasa ranson-la, Jéova té pé padonné-y é kè ranson-la sé on kado kè Jéova té fè pou-y osi (Gal. 2:20). Kifè, Pòl pa té ka santi-y koupab ankò, men i té byen désidé a ba Jéova sa i ni dè mèyè.

18. Ka nou vwè adan awtik-lasa ?

¹⁸ Adan awtik-lasa, nou palé dè plizyè pyèj diféran. Ka sa aprann-nou ? 1) Sé grasa Jéova kè nou ka rivé sonjé tout bèl biten kè nou fè avan. Men kèlkèswa sa nou ni lokazyon viv an vi an nou, sa nou ké viv an paradi-la ké lontan pi bèl ! 2) Si on moun fè-nou on biten ki pa bon é kè nou ka chwazi padonné-y, nou ké konsantré-nou asi travay-la Jéova ban-nou fè la. 3) Si nou ka santi-nou koupab alòskè Jéova ja padonné-nou, sa ké anpéché-nou sèvi Jéova èvè plézi. Kifè, kon Pòl, fò-nou mèt fon an tèt an nou kè Jéova padonné-nou.

19. Kijan nou fè sav kè an mond nouvo la nou pé’é viré sonjé bétiz kè nou fè avan ?

¹⁹ Nou ni lèspwa dè viv pou touttan. Lèwvwè nou ké adan mond nouvo la, tousa ou vwè ki ka rann-nou tris, nou pé’é ka sonjé sa ankò. Anrapò èvè épòk-lasa, mi sa Bib-la ka di : « Ponmoun pé ké sonjé biten ki ja pasé » (Iz. 65:17). Sé vré, ni sèwten pawmi nou ki rété ka sèvi Jéova tout vi a yo, é yo vyéyi. Men an paradi-la, toutmoun ké vin jenn kon avan (Jòb 33:25). Alò fò-nou mèt fon an tèt an nou kè lèpasé sé lèpasé ! Sé douvan pou nou gadé ! É fò-nou òwganizé-nou pou nou rantré an mond nouvo la.