1. Ki kèsyon nou té’é pé pozé-nou ?

 ÈS DÉLÈ sa ka fè-w pè lè ou ka sonjé sé évènman-la ki kay fèt talè ? Pa ègzanp, lè yo ké détwi fo-rèlijyon-la, lè Gòg dè Magòg ké ataké-nou é lè lagè a Awmagédon ké koumansé. Sé évènman-lasa ka fè moun pè. Alò, ès délè ou ka mandé-w : « Ès an ké rété fidèl lèwvwè sa ké rivé ? » Si dé lidé konsa ja vin an lèspri a-w, sa ké édé-w toubònman si ou ègzaminé sa Jézi di disip a-y an Jan 14:1 : « Pa lésé ayen chouboulé tchè a zòt. Montré kè zò ni fwa an Bondyé ». Si ou ni on fwa ki fò, sa ké ba-w kouraj pou andiré nenpòt ki sitiyasyon ki té’é pé rivé.

2. a) Ka nou pé fè pou fwa an nou pé sa vin pi solid ? b) Ka nou ké vwè adan awtik-lasa ?

² Ka nou pé fè pou fwa an nou pé sa vin pi solid ? Nou pé pran tan gadé dépi alèla kijan nou ka réyaji lè nou ka jwenn on éprèv. Konsa, nou ké vwè adan ki domenn pou nou travay pou fwa an nou vin pi fò. Chakfwa nou ka jwenn on éprèv é kè nou ka andiré-y, fwa an nou ka vin pi fò é sa ka préparé-nou pou dòt éprèv ki ka vin dèyè do a-y. Adan awtik-lasa, nou ké vwè 4 sitiyasyon disip a Jézi jwenn ki montré kè yo pa té ni asé fwa. Nou ké vwè osi kijan nou pé andiré sitiyasyon ki ka sanm séla é kijan sa pé édé-nou pou nou pé sa andiré éprèv nou ké jwenn plita.

3. Dapré Matyé 6:30, 33 ka Jézi èspliké on mannyè ki klè ?

³ Sa toutafè nòwmal pou on misyé dè ba madanm a-y é timoun a-y bwè é manjé, lenj pou yo mèt asi yo é on koté pou yo rété. Men jòdijou, sa pa toujou fasil ! Ni sèwten frè é sè ki pèd travay a yo é magré tout éfò yo ka fè, yo pa ka rivé touvé ondòt. Ni dòt aprézan ki rèfizé on travay pas i pa té annakò èvè sa Labib ka mandé. Lè nou ka jwenn sitiyasyon  konsa, fò-nou sèten kè Jéova ké fè ansòt pou fanmi an nou ni tousa yo bizwen pou viv. Sé sa Jézi èspliké disp a-y adan diskou-la i fè asi montangn-la (li Matyé 6:30, 33). Si nou sèten a san pou san kè Jéova pé ké lagé-nou, sa ké édé-nou mèt Wayòm-la prèmyé douvan an vi an nou. É lè nou ké vwè kè Jéova ka ban-nou sa nou bizwen pou viv, nou ké vin pibon zanmi èvè-y é fwa an nou ké vin pli fò.

4-5. Kijan Jéova édé on fanmi ki vin maléré ?

⁴ An-nou pran ègzanp a fanmi Castro, on fanmi ki ka viv o Vénézyéla. Yo té enkyèt pas yo vin touvé-yo adan on sitiyasyon ki fè-yo vin maléré. An-nou vwè kijan Jéova ka édé-yo. Fanmi-lasa té ni on ti èsplwatasyon agrikòl é sa té ka pèwmèt-yo ni on dèkwa pou viv. Men on jou, déotwa boug vin akaz a yo èvè fizi, yo pran tè a yo é yo mèt-yo déwò akaz a yo. Mi sa Miguel, papa-la ka rakonté : « Alèla, sa ki ka pèwmèt-nou viv sé sa nou ka rékòlté asi on toupiti mòso tè on moun ka prété-nou. Chak maten, an ka mandé Jéova ban-nou sa ki ké fo-nou pou jouné-la. » Lavi pa fasil pou fanmi Castro men yo sèten kè Pap’an nou ki an syèl-la pé ba-yo tousa yo bizwen pou viv. Alò, yo ka kontinyé ay réinyon é yo ka kontinyé préché chak simenn. Yo ka mèt Wayòm-la prèmyé douvan adan vi a yo é Jéova ka ba-yo tousa yo bizwen.

⁵ Pannan éprèv-lasa, Miguel é madanm a-y, Yurai, toujou chèché a vwè kijan Jéova té ka pran swen a yo. Dépawfwa, Jéova té ka sèvi èvè frè é sè a lasanblé-la pou ba-yo on dèkwa oben pou édé Miguel touvé on travay. Défwa osi, Jéova sèvi èvè Bétèl-la pou édé-yo ni sa yo té bizwen. Jéova pa jen abandonné-yo. Kifè, jòdijou, fwa a fanmi Castro vin pi solid ki avan. Yoselin, pi gran fi a yo té ka rakonté kijan Jéova édé-yo adan on sitiyasyon. Aprésa, mi sa i di : « Lèwvwè nou vwè jan Jéova édé-nou, sa ankourajé-nou toubònman. Dépi sa, pou mwen, Jéova sé zanmi an mwen é an sav kè i ké toujou édé-mwen. » É mi sa i di ankò : « Sé éprèv-la nou andiré la préparé-nou pou dòt éprèv ki ka vin dèyè é ki ké pi rèd ankò. »

6. Lè nou ka jwenn pwoblèm a lajan, ka ki pé édé-nou konsolidé fwa an nou ?

⁶ Ès jòdijou, ou ni pwoblèm a lajan ? Si sé ka a-w, sa dwèt rèd pou-w men ou pé pwofité dè péryòd-lasa pou fè fwa a-w vin pli solid. Kijan ou pé fè sa ? Priyé Jéova, li Matyé 6:25-34 é pran tan réfléchi asi sa Jézi di adan sé vèwsé-lasa. Ni onlo ègzanp a sèwvitè a Bondyé ki pé itil ba-w. Pran tan réfléchi asi jan Jéova toujou pran swen a yo pas yo toujou rété fidèl a-y (1 Kor. 15:58). Si ou ka fè sa, fwa a-w ké vin pi solid é ou ké sèten kè menmjan Jéova édé sèwvitè a-y, i ké édé-w osi.  Jéova konnèt sa ou bizwen é i sav kijan i pé ba-w li. Chakfwa, ou ké vwè Jéova aji an vi a-w, fwa a-w ké vin pi solid é ou ké pé andiré éprèv ki ka vin dèyè é ki ké pi rèd ankò (Abak. 3:17, 18).

7. Kijan tanpèt-la yo ka palé an Matyé 8:23-26 montré kè sé disip-la pa té ni asé fwa ?

⁷ On jou, Jézi é disip a-y té ka vwayajé pa bato. Lèwgadé, on tanpèt enn lévé asi yo. Jézi pwofité dè moman-lasa pou montré sé disip-la kè yo pa té ni asé fwa (li Matyé 8:23-26). Tèlman tanpèt-lasa té fò, lanmè-la lévé mové é sé vag-la té ka rantré adan bato-la. Pannansitan, Jézi té ka dòmi ti dòmi a-y. Sé disip-la té ozabwa, yo kouri lévé-y pou i té pé sa sové-yo men mi sa i di-yo : « Poukwa zò pè konsa ? Kijanfè ka manké-zòt fwa konsa ? » Nòwmalman sé disip-la té dwèt sèten kè Jéova té kapab pwotéjé-yo é kè Jéova té kapab pwotéjé Jézi osi. Ka sa ka aprann-nou ? Lèwvwè nou ni on fwa ki solid, menmsi la nou yé la ni on katastròf, nou ké pé tchenbé é si gwo difikilté ka tonbé kon tanpèt asi nou, nou ké pé andiré-yo.

8-9. Ka ki soukwé fwa a Anel é kijan i woupran doubout a-y ?

⁸ An-nou vwè kijan fwa a on sè vin pi fò apré i sibi on gwo éprèv. Non a sè-lasa sé Anel. Sé on sè sélibatè ki ka viv Pòwtoriko. I andiré on gwo tanpèt. Sé té siklòn Maria. An 2017, siklòn-lasa détwi kaz a-y é akòz dè déga siklòn-lasa fè, i pèd travay a-y osi. Mi sa i ka di : « Pannan tout péryòd-lasa, an té angwasé bon angwasé la men an priyé Jéova onlo, é sa aprann-mwen fè-y konfyans é an aprann osi kijan pou an pa lésé lapè pran lanmen asi mwen. »

⁹ Anel di osi kè konm i té ka obéyi, sa édé-y andiré pwoblèm a-y. Mi sa i ka èspliké : « Konm an té ka suiv sé enstriksyon-la lòwganizasyon ka ban-nou la, sa trankilizé-mwen. An vwè jan Jéova pran swen an mwen osi. Pousa, i sèvi èvè frè é sè an mwen. Yo ankourajé-mwen é yo ban-mwen sa an té bizwen pou viv. » Mi sa i ka di ankò : « Jéova ban-mwen plis ki tousa an té ka èspéré. Sa fè fwa an mwen vin pi solid. »

10. Si konnyéla la, nou ka pasé on bout-rèd, ka pou nou fè ?

¹⁰ Ès ou ka sibi on gwo tanpèt sé jou-lasa ? Pétèt kè ni on katastròf natirèl ki fèt sé jou-lasa oben ou pé ka soufè akòz dè on maladi grav é sa ka dékourajé-w. A moman-lasa, pétèt kè ou ka santi kè ou ka néyé anba tout sé difikilté-lasa é dépawfwa, ou pa sav ka pou ou fè. Men pa lésé sa ki ka enkyété-w anpéché-w fè Jéova konfyans. Wouvè tchè a-w ba-y é ou ké santi kè i toupré a-w. É fè éfò pou ou sonjé tousa i ja fè ba-w. Konsa, fwa a-w ké vin pi solid (Sòm 77:11, 12). Ou pé sèten kè i pé’é jen lagé-w.

11. Poukwa fò-nou byen désidé a suiv sé enstriksyon-la òwganizasyon-la ka ban-nou la ?

 ¹¹ Ki dòt biten ki pé édé-w lè ou ka jwenn éprèv ? Kon Anel di, sé lè ou ka obéyi. Jéova é Jézi ka fè sé moun-la ki an tèt a òwganizasyon an nou konfyans. Aprann fè-yo konfyans osi. Sa pé rivé kè yo mandé-nou fè dé biten kè nou pé touvé on jan bizaw. Men Jéova ka béni moun ki ka obéyi. Labib ka aprann-nou kè lè on moun ka obéyi, sa pé sové vi a-y é sé sa ègzanp a onlo frè é sè ka montré (Ègz. 14:1-4 ; 2 Kron. 20:17). Pran tan médité asi ègzanp a yo. Sa ké ba-w fòs pou suiv tout sé enstriksyon-la òwganizayon a Jéova ka ban-nou la é séla i ké kontinyé ban-nou la (Ébr. 13:17). A moman-lasa, ou pé’é ni pon rézon pou ou pè gwo tanpèt-la ki ka vin la (Pwov. 3:25).

12. Dapré Lik 18:1-8, kijan fwa an nou pé édé-nou lè nou ka sibi dé biten ki pa jis ?

¹² Jézi té sav kè yo té’é fè disip a-y sibi dé biten ki pa jis é kè sa té’é soukwé fwa a yo. Pou édé-yo andiré lèwvwè yo té’é jwenn sé éprèv-lasa, i pran on ègzanp èvè yo é nou ka touvé ègzanp-lasa adan liv a Lik. Sé istwa a on vèv ki pa jen arété sipliyé on jij pou i té réglé on afè ba-y. Jij-lasa té méchan. Vèv-la té sèten kè si i té ka kontinyé ay dèyè jij-la, jij-la té’é fè on biten ba-y. É sé sa ki rivé pas jij-la fin pa fè sa i té ka mandé-y la. Ka sa ka aprann-nou ? Jéova pa enjis. Sé pousa, mi sa Jézi di : « É Bondyé alò, ès i pé’é fè ansòt pou yo fè sa ki jis pou moun kè i chwazi é ki ka pléré ba-y lajouné kon lannuit ? » (li Lik 18:1-8). Aprésa, mi sa i di ankò : « Lè Gason a lòm ké rivé, èskè i ké touvé moun asi latè ki ni on fwa kon sila ? » Lèwvwè nou ka sibi dé biten ki pa jis, kon vèv-la, fò-nou ni on fwa ki solid. É menmjan ki-y osi, fò-nou ni pasyans é fò pa nou lagé. Fò-nou sèten kè Jéova ké toujou édé-nou. Fò pa nou oubliyé kè lapriyè ni on éfé ki fò toubònman. Délè, Jéova pé réponn-nou on mannyè nou pa té’é jen imajiné.

13. Kijan priyè a on jennfi édé fanmi a-y ?

¹³ An-nou palé dè sa ki rivé Vero, on sè ki ka rété o Kongo Kinchasa. Li, mari a-y ki pa Témwen a Jéova é fi a yo ki ni 15 an té ka rété adan on vilaj. Men on jou, onpakèt sòlda ataké vilaj a yo. Kifè, yo té oblijé chapé kò a yo. Pannan yo té ka chapé, yo tonbé asi on baraj é déotwa sòlda tchenbé-yo é yo mennasé-yo. Yo di-yo konsa kè yo kay tchouyé-yo. Vero mété-y ka pléré é lè fi a-y vwè sa, i éséyé trankilizé-y. I mété-y ka priyé tout fòs a-y é i sèvi èvè non a Jéova a plizyè rèpriz adan priyè a-y. Lè timoun-la fin priyé, komandan-la mandé-y : « Jennfi, kimoun ki aprann-vou priyé konsa ? » Mi sa timoun-la réponn-li : « Sé manman-mwen é i sèvi  èvè ègzanp a priyè-la nou ka touvé an Matyé 6:9-13. » Aprésa, mi sa komandan-la di-y : « Jennfi, vou é fanmi a-w zò pé alé, é an ka mandé Jéova Bondyé a zòt pwotéjé-zòt ! »

14. Ki biten ki pé soukwé fwa an nou, é ka ki pé édé-nou andiré ?

¹⁴ Sa ki rivé fanmi-lasa ka montré-nou kè fò pa nou jen oubliyé kè lapriyè ni onlo valè toubònman. Men lèwvwè Jéova pa’a réponn a priyè an nou tousuit oben lèwvwè i pa’a fè on biten èstraòwdinè pou réponn a priyè an nou, sa pé aji asi fwa an nou. Menmjan ki vèv-la Jézi palé la, fò-nou kontinyé priyé é fò-nou sèten kè Bondyé pé ké lagé-nou é kè i ké fin pa réponn a priyè an nou. Fò-nou kontinyé sipliyé-y osi pou i ban-nou lèspri sen (Filip. 4:13). Fò pa nou oubliyé kè talè, tèlman Jéova ké béni-nou, nou pé’é ka sonjé tout sé soufrans-la nou ka viv la. Lè nou ka andiré sé éprèv-la nou ka jwenn la èvè èd a Jéova, nou ka vin pi fò é sa ka préparé-nou pou andiré sé éprèv-la ki ka vin la (1 Pyè 1:6, 7).

15. Dapré Matyé 17:19, 20, ka ki rivé disip a Jézi ?

¹⁵ Jézi di disip a-y kè si yo ni lafwa, yo ké pé andiré nenpòt ki éprèv (li Matyé 17:19, 20). On jou, yo pa rivé fè on démon sòti asi on moun alòskè dabitid yo té ka rivé fè sa. Poukwa fwa-lasa sa pa maché ? Jézi di-yo kè sé pas yo pa té ni asé fwa. Aprésa, i di-yo kè si yo ni onlo fwa, yo ké pé andiré gwo difikilté menmsi sé difikilté-lasa ka sanm on gwo montangn ! Jòdijou, nou pé touvé-nou anba gwo difikilté é nou pé ni lenprésyon kè nou pé’é jen rivé about a sé difikilté-lasa.

16. Geydi té ni fwa é sa édé-y andiré lèwvwè mari a-y mò. Kijansa ?

¹⁶ An-nou palé dè Geydi, on sè ki ka rété o Gwatémala. On jou, li é mari a-y Edi té ka sòti réinyon é yo té ka rantré akaz a yo. Lèwgadé, yo tchouyé mari a-y douvan-y. Geydi té ni fwa é sa édé-y andiré sitiyasyon-lasa menmsi tchè a-y té an bobo. Kijansa ? Mi sa i ka di : « Lè an ka priyé Jéova, an ka lagé sa ki two lou ban mwen asi-y é sa ka trankilizé-mwen. An ka vwè kè Jéova ka pran swen an mwen. Pousa, i ka sèvi èvè fanmi an mwen é èvè sé frè é sè-la ki adan lasanblé-la. An ka fè ansòt pou an toujou ni onlo biten a fè pou Jéova é sa ka soulajé penn an mwen. Konsa, an ka pran lavi jan i ka vin é an pa’a pran tèt an mwen pou sa ki ké fèt dèmen. Sa an viv la montré-mwen kè si an jwenn ondòt éprèv plita, an ké pé andiré grasa Jéova, grasa Gason a-y é grasa lòwganizasyon. »

17. Ka pou nou fè lè nou ka jwenn difikilté ki ka sanm on gwo montangn ?

¹⁷ Ès ou pèd on zanmi a-w oben on fanmi a-w ? Si sé ka a-w, pran tan wouli pasaj  a Labib ki ka rakonté kijan yo résisité sèwten moun. Konsa, ou ké ni plis fwa adan larézirèksyon. Ès ou tris toubònman pas yo èskominyé on moun an fanmi a-w ? Si sé sa, étidyé Labib pou voumenm a-w sèten kè Jéova toujou ka korijé èvè jistis. Chakfwa ou ka jwenn on difikilté, fè ansòt pou fwa a-w vin pi fò. Di Jéova tousa ou ka rèsanti. Pa rété tousèl a-w men rété bon bon zanmi èvè frè é sè a-w (Pwov. 18:1). Menmsi sa ka fè-w pléré lè ou ka sonjé sa ki pasé, kontinyé fè dé biten ki ké édé-w andiré (Sòm 126:5, 6). Pa pèd bon labitid a-w : kontinyé ay réinyon, kontinyé préché é kontinyé li Bib a-w. É anplisdisa, fò ou toujou sonjé sé bèl bénédisyon-la Jéova ka pwomèt-vou la. Lè ou ké rann-vou kont kè Jéova toujou la pou vou, fwa a-w ké vin pli fò.

18. Lèwvwè nou ka rann-nou kont kè nou pa ni asé fwa, ka pou nou fè ?

¹⁸ Si sé éprèv-la ou ja viv la oben sé éprèv-la ou ka viv la konnyéla la ka montré kè ou pa ni asé fwa, fò pa ou dékourajé-w. Sé aprézan pou ou fè fwa a-w vin pi fò. Ou pé mandé Jéova menm biten ki sé apòt-la. Mi sa yo mandé-y : « Ban-nou plis fwa » (Lik 17:5). Réfléchi asi ègzanp a sé frè é sè-la nou vwè adan awtik-lasa. Kon Miguel é Yurai, pran tan sonjé tousa Jéova ja fè pou soutyenn-vou. Kon fi a Vero é kon Anel, priyé Jéova èvè tout tchè a-w siwtou lèwvwè ou an détrès. É kon Geydi, pa jen oubliyé kè Jéova pé sèvi èvè fanmi a-w oben èvè frè é sè a lasanblé-la pou édé-w. Siwvwè ou ka fè fon asi Jéova dépi konnyéla pou andiré éprèv, ou ké rann-vou kont kè i ka aji adan vi a-w é pi ou ké rann-vou kont dè sa, pi ou ké sèten kè lèwvwè ou ké jwenn dòt éprèv, i ké la pou édé-w.

19. a) Dè kibiten Jézi té sèten ? b) É nou, dè kibiten nou pé sèten ?

¹⁹ Jézi édé disip a-y vwè kè yo té bizwen ni plis fwa adan sèwten domenn (Jan 14:1 ; 16:33). Men i té sèten kè yo té’é rivé andiré nenpòt ki éprèv grasa Jéova. I té sèten osi kè on gran-foulmoun té’é sòti anba gwo tribilasyon-la vivan pas yo té’é ni on fwa ki solid (Rév. 7:9, 14). Ès ou ké fè pawti a gran-foulmoun-lasa ? Wi, grasa Jéova ou ké rivé si dépi konnyéla ou ka fè tousa ou pé pou konsolidé fwa a-w ! (Ébr. 10:39).