1-2. Pou ki rézon fò-nou aji èvè on lanmou ki fidèl ?

 NOU ni onlo bon rézon pou nou aji èvè on lanmou ki fidèl. Adan liv a Pwovèb nou ka touvé déotwa adan yo. Pa ègzanp : « Pa jen arété aji èvè on lanmou ki fidèl é èvè fidélité. [...] Konsa, ou ké on moun ki ni bon jijman ki pou Bondyé ki pou lézòm, é ou ké ni favè a yo. » « On nonm ki ni bonté [kivédi ki ka aji èvè on lanmou ki fidèl] ka fè limenm a-y dibyen. » « Moun ki ka chèché a fè sa ki jis é ki ka chèché a aji èvè on lanmou ki fidèl ké [...] touvé lavi » (Pwov. 3:3, 4 ; 11:17 ; 21:21).

² Sé vèwsé-lasa ka ban-nou 3 rézon pou nou aji èvè on lanmou ki fidèl èvè lézòt. Prèmyèwman, grasa sa, nou ni onlo valè pou Bondyé. Dézyèmman, nou ka fè noumenm an nou dibyen. Pa ègzanp, lè nou zanmi èvè frè é sè an nou sé lanmityé-lasa ka solid. Twazyèmman, grasa sa, talè nou ké ni onpakèt bénédisyon, kon pa ègzanp lavi étèwnèl. Kifè nou ni onlo bon rézon pou kouté konsèy a Jéova lè i ka di nou : « Aji yonn èvè lòt èvè on lanmou ki fidèl é èvè mizérikòd » (Zak. 7:9).

3. A ki kèsyon nou ké réponn adan awtik-lasa ?

³ Adan awtik-lasa, nou ké réponn a sé 4 kèsyon-lasa : Èvè kimoun pou nou aji èvè on lanmou ki fidèl ? Ka liv a Rit ka aprann-nou asi kalité-lasa ? Kijan nou pé aji èvè on lanmou ki fidèl épi lézòt ? Lè nou ka aji konsa, ki byenfé sa ka pwokiré-nou ?

4. Kijan nou pé aji épi on lanmou ki fidèl èvè frè é sè an nou menmjan ki Jéova ? (Mawk 10:29, 30).

⁴ Awtik a simenn pasé, édé-nou konprann kè Jéova ka aji èvè on lanmou ki fidèl enki èvè moun ki enmé-y é ki ka sèvi-y (Dan. 9:4). É nou anvi « imité Bondyé, antankè timoun kè Bondyé enmé » (Éféz. 5:1). Sé pousa, nou vlé aji èvè on lanmou ki fidèl èvè frè é sè an nou (li Mawk 10:29, 30).

5-6. On moun pé aji èvè lanmou men i pa oblijé aji èvè on lanmou ki fidèl. Bay on ti èsplikasyon.

⁵ Si nou ka konprann byen ka on lanmou ki fidèl yé, sa ké pi fasil pou nou aji konsa èvè frè é sè an nou. Onlo moun pa’a vwè ki diférans ki ni ant « lanmou » é on « lanmou ki fidèl ». Men poutan a pa menm biten la. Poukwa nou ka di sa ? An-nou pran on ègzanp.

⁶ Adan Labib nou ka touvé on bèl ègzanp a moun ki aji èvè lanmou. Pòl té ka vwayajé pa bato èvè dòt moun é bato-la chalviré. Yo échwé asi on lilèt yo ka kriyé Malt. Menmsi sé moun-Malt-la pa té konnèt-yo, yo akéyi-yo bra gran wouvè é yo aji épi yo èvè onlo lanmou. Yo montré-yo janti épi yo men sé té akòz dè sa ki té rivé é yo té’é aji konsa èvè nenpòt kimoun. Ègzanp-lasa ka montré ka sa vlé di aji épi lanmou men a pa sa ki lanmou fidèl.

7-8. a) Ka ki ka pousé on moun aji èvè on lanmou ki fidèl ? b) Poukwa nou ké ègzaminé déotwa pasaj adan liv a Rit ?

⁷ Ki diférans ki ni ant on moun ki ka aji èvè lanmou é on moun ki ka aji èvè on lanmou ki fidèl ? A pa menm biten-la ki ka pousé yo aji. An tan a Labib, ka ki té ka pousé sèwvitè a Bondyé aji yonn èvè lòt épi on lanmou ki fidèl ? A pa paskè yo té oblijé yo té ka aji konsa. Men sé paskè yonn té enmé lòt vréman. An-nou pran ègzanp a David. Tèlman David té enmé Jonatan, i aji èvè-y épi on lanmou ki fidèl, magré Papa Jonatan té ka chèché a tchouyé-y. Plizyè lanné apré Jonatan mò, David kontinyé ni on lanmou ki fidèl pou-y pas i té ka fè Mèfibochèt, gason a Jonatan dibyen (1 Sam. 20:9, 14, 15 ; 2 Sam. 4:4 ; 8:15 ; 9:1, 6, 7).

⁸ Pou nou konprann plibyen ka ki on lanmou ki fidèl, an-nou ègzaminé déotwa pasaj adan liv a Rit b. Ka sé moun-la ki adan istwa-lasa ka aprann-nou ? É ka nou pé fè pou aji èvè on lanmou ki fidèl adan lasanblé an nou ?

9. Poukwa Noémi té ka pansé kè Jéova té kont-li ?

⁹ Liv a Rit ka rakonté istwa a Noémi, ta Rit bèlfi a-y é ta Boaz, on nonm ki té enmé Bondyé. Boaz té fanmi èvè mari a Noémi. Onlè, manjé té vin ra an Izrayèl, kifè Noémi, mari a-y é 2 gason a yo ay viv adan péyi a Moab. Men, mari a Noémi mò adan péyi-lasa. Aprésa, 2 gason a-y mayé, men malérèzman yo toulédé mò osi (Rit 1:3-5 ; 2:1). Tout sé éprèv-lasa fann tchè a Noémi, kifè i té dézèspéré. Tèlman i té dékourajé, i té ka kwè kè sé Jéova ki té kont-li. Pou palé dè sa i té ka rèsanti, mi sa i di : « Jéova viré kont-mwen. » « Toupuisan-la rann vi an mwen anmè toubònman. » « Sé Jéova ki  kont mwen é sé Toupuisan-la ki fè malè rivé-mwen » (Rit 1:13, 20, 21).

10. Ka Jéova rèsanti lè i tann sa Noémi di ?

¹⁰ Kijan Jéova réyaji lè i tann sa Noémi di ? Jéova té sav kè i té dézèspéré, alò i pa lagé-y. Okontrè, i aji épi-y èvè onlo konpasyon. I té sav kè « lè on moun ki saj anba présyon, sa pé fè-y pèd tèt a-y » (Ékl. 7:7). Kifè, i édé Noémi vwè kè i té toujou la pou soutyenn-li. Kijan i fè sa ? (1 Sam. 2:8). I pousé Rit aji èvè on lanmou ki fidèl épi Noémi. Rit édé bèlmè a-y pou i pa pèd èspwa é i édé-y vwè kè Jéova té enmé-y toujou. I fè sa èvè onlo lanmou é èvè onlo jantiyès. Ka ègzanp a Rit ka aprann-nou ?

11. Sèwten frè é sè janti toubònman é yo ka éséyé édé frè é sè a yo ki ka soufè. Ka ki ka pousé-yo fè sa ?

¹¹ Lè nou ni on lanmou ki fidèl pou frè é sè an nou, nou ka éséyé fè on biten pou édé-yo lèwvwè yo ka soufè. Menmjan Rit rété èvè Noémi, menmjan-la osi onlo frè é sè jòdijou ka kontinyé édé frè é sè a yo ki tris oben ki dékourajé. Yo enmé sé frè é sè-lasa onlo é yo anvi fè tousa yo pé pou yo pé sa soutyenn-yo (Pwov. 12:25, nòt ; 24:10). Sé sa lapòt Pòl ankourajé-nou fè lèwvwè i di-nou : « Palé on jan pou pé sa konsolé moun ki dékourajé, soutyenn moun ki fèb, pran pasyans èvè toutmoun » (1 Tés. 5:14).

12. Pli souvan ki rarman, ki méyè biten on moun pé fè pou édé on moun ki dékourajé ?

¹² Pli souvan ki rarman, lè on moun ka pran tan kouté on moun ki dékourajé é ka montré-y kè i enmé-y sé méyè biten i pé fè pou édé-y. Jéova ni onlo rèkonésans pou sa nou ka fè pou édé sèwvitè a-y pas yo ni onlo valè pou-y (Sòm 41:1). Mi sa nou ka li an Pwovèb 19:17 : « Moun-la ki ka ba maléré-la favè, sé prété i ka prété Jéova, é Bondyé ké rékonpansé-y pou sa i fè ».

13. a) Rit é Òwpa pa pran menm désizyon-la. Ka yochak désidé fè ? b) Poukwa désizyon-la Rit pran la montré kè i aji èvè on lanmou ki fidèl ? (gadé imaj-la ki anlè po a jounal-la).

¹³ Lè nou ka pran tan ègzaminé sa ki rivé Noémi apré mari a-y é gason a-y mò, nou ka konprann plibyen ka ki on lanmou ki fidèl. Lèwvwè Noémi vin sav kè « Jéova té okipé dè pèp a-y pas i té ba-yo manjé » i désidé viré an péyi a-y (Rit 1:6). 2 bèlfi a Noémi pati èvè-y. Men pannan yo té an chimen, Noémi ankourajé-yo viré Moab é i fè sa a 3 rèpriz. Alò, ka ki rivé ? « Òwpa bo bèlmè a-y é i pati, men Rit rété èvè bèlmè a-y » (Rit 1:7-14). Lè Òwpa désidé viré akaz a-y, i fè sa Noémi mandé-y. Men Rit, li, pa rété gadé sa Noémi té mandé-y fè, é i té byen désidé a soutyenn-li. Rit té pé rantré akaz a-y men konm i té enmé  bèlmè a-y i té préféré rété èvè-y (Rit 1:16, 17). Si Rit kontinyé soutyenn Noémi konsa, a pa paskè i té oblijé men sé paskè i té vlé fè sa. Désizyon-la Rit pran la montré jan i té ni on lanmou ki fidèl pou bèlmè a-y. Ka ègzanp a Rit ka aprann-nou ?

14. a) Jòdijou, kijan onlo frè é sè ka aji èvè on lanmou ki fidèl ? b) Dapré Ébré 13:16, ki sakrifis ki ka fè Bondyé plézi ?

¹⁴ Lè nou ni on lanmou ki fidèl, sa ka pousé-nou fè onlo éfò pou édé lézòt. Menmjan ki an tan a Labib, jòdijou onlo frè é sè ka aji èvè on lanmou ki fidèl épi frè é sè a yo é yo ka fè sa menm èvè sé frè é sè-la yo pa konnèt la. Pa ègzanp, lè yo ka aprann kè on katastròf fèt on koté, onfwamenm yo ka mandé ka yo pé fè pou bay on pal. Oben si on frè oben on sè a lasanblé-la ni pwoblèm a lajan, yo pa’a pèd tan pou fè on biten pou édé-y. Menmjan ki sé krétyen Masédwàn la ki té ka viv o 1^é syèk, yo ka fè sakrifis pou soutyenn frè é sè a yo ki bizwen èd é délè, yo jous ka fè plis ki sa yo kapab fè (2 Kor. 8:3). Lè Jéova ka vwè jan yo donan, a pa ti kontan i ka kontan ! (li Ébré 13:16).

15-16. Kijan Rit montré kè i pa té’é jen lagé ?

¹⁵ Lè nou ka ègzaminé adan Bib-la istwa a Rit é Noémi, sa pé aprann-nou onlo biten. An-nou vwè déotwa adan yo.

¹⁶ Pa lagé. Lè Rit di Noémi kè i té k’ay viv Jida èvè-y, odépa Noémi pa té dakò. Men Rit pa lagé. Alò, ka ki rivé ? « Lè Noémi vwè kè Rit té ka ensisté pou ay èvè-y, i arété di-y viré akaz a-y » (Rit 1:15-18).

17. Ka ki ké édé-w pou-w kontinyé soutyenn on moun ?

¹⁷ Ka sa ka aprann-nou ? Fò ou ni pasyans pou ou édé on moun ki ni on gwo penn an tchè a-y. Alò, fò pa ou lagé-y men fò ou kontinyé édé-y. Pétèt kè odépa, on sè c ki ka jwenn on bout-rèd pé’é vlé kè ou édé-y. Men lanmou fidèl la kè ou ni pou-y la ké pousé-w kontinyé soutyenn-li (Gal. 6:2). Pa jen pèd èspwa pas pétèt on jou i ké aksèpté kè ou édé-y é kè ou konsolé-y.

18. Ka Noémi di ki dwèt fè Rit lapenn ?

¹⁸ Fò pa ou sisèptib. Lè Noémi é Rit rivé Bétléèm, Noémi viré touvé sé vwazin-la i té ni la avan. Mi sa i di yo : « Lè an pati an té ni tousa ki té fo-mwen, men Jéova fan’an viré on men douvan on men dèyè » (Rit 1:21). Imajiné sa Rit dwèt rèsanti lè i tann Noémi di sa ! Rit fè tousa i té pé pou édé Noémi. I pléré èvè-y, i konsolé-y é i maché èvè-y pannan plizyè jou. Magré tousa, Noémi di : « Jéova fan’an viré on men douvan on men dèyè. » Noémi pa menm palé dè tout tan-la Rit té rété èvè-y la é dè sa i té fè pou édé-y. Sa dwèt fè Rit lapenn toubònman ! Men apapousa i lagé-y.

19. Délè on moun pé rèfizé kè nou édé-y. Men ka nou pé fè pou nou pa lagé-y ?

¹⁹ Ka sa ka aprann-nou ? Imajiné kè on sè ka pasé on bout-rèd é kè ou ka fè onlo éfò pou édé-y. Pétèt kè odépa, i ké di-w onlo pawòl ki ké fè-w mal men fò pa ou fè kòlè pousa. Pa lagé-y men priyé Jéova pou ou touvé on mwayen pou ou pé sa ankourajé-y (Pwov. 17:17).

20. Ka ki ba Rit fòs pou i kontinyé édé Noémi ?

 ²⁰ Lè ou ka vwè on moun bizwen èd, ankourajé-y. Rit aji épi on lanmou ki fidèl èvè Noémi, men konnyéla la sé li ki té bizwen kè yo ankourajé-y. Alò Jéova pousé Boaz ankourajé-y. Mi sa Boaz di Rit : « An ka mandé Jéova béni-w pou sa ou fè. An ka mandé Jéova, Bondyé a Izrayèl, ba-w on bèl rékonpans pas ou kouri kaché anba zèl a-y. » Sé bèl pawòl-lasa fè Rit dibyen toubònman. Mi sa i di : « Ou konsolé-mwen é lè ou palé èvè mwen ou rasiré-mwen, mwen èsklav a-w » (Rit 2:12, 13). Boaz ankourajé Rit lè i té bizwen sa é sa ba-y fòs pou i pa té lagé.

21. Dapré Izayi 32:1, 2, lè sé ansyen-la ka vwè éfò a frè é sè a yo, ka yo ka fè ?

²¹ Ka sa ka aprann-nou ? Délè, sé frè é sè-la ki ka aji èvè on lanmou ki fidèl épi lézòt bizwen kè yo ankourajé-yo yo osi. Boaz félisité Rit lè i vwè jan i té janti épi Noémi. Jòdijou osi, sé ansyen-la ka félisité sé frè é sè-la adan lasanblé-la lè yo ka vwè éfò yo ka fè pou édé lézòt. Lèwvwè sé ansyen-la ka ankourajé sé frè é sè-la èvè tout tchè a yo é kè yo ka fè sa a bon moman-la, sa ka ba sé frè é sè-la fòs-la yo bizwen la pou kontinyé fè sa ki byen (li Izayi 32:1, 2).

22-23. Noémi chanjé mannyè i té ka rézonné. Kijansa é poukwa ? (Sòm 136:23, 26).

²² Kèlkètan apré, Boaz fè Rit é Noémi on bèl kado. I ba-yo bon tibwen séréal pou yo té manjé (Rit 2:14-18). Lèwvwè Noémi vwè jan Boaz donan, kijan i réyaji ? Mi sa i di : « An ka mandé Jéova béni-y pas Jéova pa jen arété aji èvè on lanmou ki fidèl èvè moun ki vivan é èvè  moun ki mò ! » (Rit 2:20a). Men a pa menm Noémi la ! Kèlkètan avan, i té tris é mi sa i té di : « Jéova viré kont mwen », é alèla tchè a-y kontan é mi sa i ka di : « Jéova pa jen arété aji èvè on lanmou ki fidèl. » Ka ki édé Noémi chanjé létadèspri a-y ?

²³ Noémi fin pa rann-li kont kè Jéova pa jen lagé-y. Lè Noémi té ka viré Jida, Jéova sèvi èvè Rit pou i té soutyenn-li (Rit 1:16). I vwè osi jan Jéova sèvi èvè Boaz pou i té édé ki li ki Rit. Anplisdisa, Boaz té ka fè pawti a sé moun-la ki té pé rachté-yo la d (Rit 2:19, 20b). Pétèt mi sa Noémi di an tchè a-y : « Alèla, an ka vwè kè Jéova pa jen lagé-mwen. Dépi odépa, i té toujou la pou mwen ! » (li Sòm 136:23, 26). Sèten Noémi té ni onlo rèkonésans pou Rit é pou Boaz ki pa jen lagé-y ! Nou ka imajiné jan yo toulétwa té ni onlo jwa an tchè a yo.

24. Poukwa nou vlé kontinyé aji èvè on lanmou ki fidèl épi frè é sè an nou ?

²⁴ Liv a Rit montré-nou ka ki on lanmou ki fidèl. Kijansa ? Nou vwè kè on lanmou ki fidèl ka pousé-nou a pa lagé frè é sè an nou lè yo ka jwenn difikilté. Lanmou-lasa ké pousé-nou fè onlo éfò pou soutyenn-yo osi. Fò sé ansyen-la pran on tan pou ankourajé séla ki ka aji épi on lanmou ki fidèl èvè lézòt. Lè nou ka édé on moun é kè nou ka vwè kè moun-lasa ka woupran fòs é kè i ka kontinyé sèvi Jéova, a pa ti kontan nou ka kontan ! (Akt 20:35). Men ni on rézon ki pli enpòwtan ankò ki ka pousé-nou kontinyé aji èvè on lanmou ki fidèl épi lézòt. Kilès ? Sé pas nou anvi imité Jéova é nou anvi mèt jwa an tchè a-y. I sé on Bondyé « ki plen lanmou » é ki ni « on lanmou ki fidèl » (Ègz. 34:6 ; Sòm 33:22).