1-2. a) A ki kèsyon nou ké réponn ? b) Ka ki ka montré kè Jéova anvi édé-nou toubònman ?

 JÉOVA pé édé-nou andiré sé difikilté-la nou ka jwenn la é i pé édé-nou ni onlo jwa lèwvwè nou ka sèvi-y. Kijan i ka édé-nou ? Lè Jéova ka édé-nou, kijan nou pé pwofité dè sa a san pou san ? Adan awtik-lasa, nou ké réponn a sé kèsyon-lasa. Men pou koumansé, an-nou réponn a kèsyon-lasa : « Ès Jéova anvi édé-nou vréman ? »

² Adan lèt-la i maké ba sé Ébré-la, lapòt Pòl sèvi èvè on mo ki ka édé-nou réponn a kèsyon-lasa. Mi sa i maké : « Jéova sé sèkou an mwen, an pé ké pè. Ka on nonm pé fè-mwen ? » (Ébr. 13:6). Adan liv ki anrapò èvè Labib, yo ka di kè lèwvwè yo ka sèvi èvè lèmo « sèkou », sé pou palé dè on moun ki ka kouri édé ondòt moun ki ka mandé sèkou. Ou ka imajiné ! Sé konsi Jéova ka kouri édé on moun ki an détrès. Sé ègzaktèman sa i anvi fè pou nou. Non sèlman i anvi fè-y men i présé fè-y osi. Lè Jéova ka édé-nou, nou pé rivé andiré éprèv nou ka jwenn èvè onlo jwa.

3. Ni 3 biten Jéova ka fè pou édé-nou andiré sé éprèv-la nou ka jwenn la èvè onlo jwa. Ki biten ésa ?

³ Jéova ka édé-nou andiré sé éprèv-la nou ka jwenn la èvè onlo jwa. Kijan i ka fè sa ? Pou nou réponn a kèsyon-lasa, an-nou vwè ka liv a Izayi ka aprann-nou asi sa. Jéova té ba Izayi maké plizyè pwofési é sé pwofési-lasa ka konsèwné-nou jòdijou. Anplisdisa, lè Izayi ka palé dè Jéova, i ka sèvi èvè dé mo ki fasil a konprann. Pa ègzanp, sé sa nou pé vwè an Izayi chapit 30. Adan chapit-lasa, Izayi ka sèvi èvè plizyè ègzanp ki bèl toubònman pou montré-nou kijan Jéova ka édé pèp a-y. I ékri kè Jéova ka édé-nou 1) lèwvwè i ka pran tan kouté priyè an nou é lèwvwè i ka réponn a priyè an nou, 2) lèwvwè i ka gidonné-nou, é 3) lèwvwè i ka béni-nou jòdijou é lèwvwè i ké béni-nou plita. Konnyéla, an-nou vwè sé 3 biten-la Jéova ka fè la pou édé-nou.

4. a) Lè Jéova palé dè sé Juif-la ki té ka viv a épòk a Izayi, ka i di asi yo é anfinaldikont, ka ki rivé-yo ? b) Ki bèl èspwa Jéova ba sé Juif-la ki té fidèl la ? (Izayi 30:18, 19).

⁴ An koumansman a Izayi chapit 30, Jéova ka di kè sé Juif-la, ‘sé gason ki pa’a tann pon lang’ é ‘ki ka fè péché si péché’. Mi sa i ka di apré : « Sé on pèp ki rèbèl, […] sé gason ki vé pa kouté lwa a Jéova » (Iz. 30:1, 9). Izayi té ja anonsé kè konm sé kouté yo pa té vé kouté Jéova, Jéova té lésé malè rivé-yo (Iz. 30:5, 17 ; Jér. 25:8-11). É sé sa ki fèt apré : sé Babilonyen-la vin é yo chayé-yo Babilòn pa fòs. Men pawmi sé Juif-la, ni sa ki té fidèl é Izayi ba-yo on mésaj ki té ka ba-yo èspwa. I di-yo kè on jou Jéova té’é aji èvè konpasyon épi yo (li Izayi 30:18, 19). É sé sa Jéova fè, i woté-yo anba jouk a sé Babilonyen-la men i pa fè sa tousuit. Lèfètkè Izayi di kè « Jéova ka atann èvè pasyans pou aji èvè konpasyon épi zòt » té ka montré kè on bon moman té’é pasé avan kè Jéova té’é vin a sèkou a sèwvitè a-y ki fidèl. An réyalité, sé Juif-la yo té chayé pa fòs Babilòn rété la 70 an é apré ni sa yo ba-yo dwa viré Jérizalèm (Iz. 10:21 ; Jér. 29:10). Lèwvwè yo viré an péyi a yo, dlo té ka sòti an zyé a yo, a pa paskè, yo té ka soufè antankè èsklav men sé pas tchè a yo té kontan toubònman.

5. Ki garanti nou ka touvé an Izayi 30:19 ?

⁵ Jòdijou, sé pawòl-lasa pé ankourajé-nou : « Lè ou ké mandé sèkou, i pé’é jen pa aji èvè konpasyon épi-w » (Iz. 30:19). Izayi ka ban-nou on bèl garanti. I ka di-nou kè Jéova ké pran tan kouté priyè an nou é i ké réponn-nou. Dayè, mi sa i ka di : « Tann i ké tann-vou, i ké réponn-vou ». Sé pawòl-lasa ka rasiré-nou é ka fè-nou sonjé kè Pap’an nou anvi vin a sèkou a moun ki ka mandé-y édé-yo men a pa anvi i anvi fè sa tousèl, i présé fè sa. Lèfètkè nou sav kè Jéova vé édé-nou, sa ka édé-nou andiré èvè onlo jwa.

6. Kijan sé pawòl-la nou ka touvé adan Izayi ka montré kè Jéova ka kouté priyè a chak sèwvitè a-y ?

⁶ Ki dòt garanti nou ka touvé adan vèwsé-lasa ? Jéova ka pran tan kouté byen priyè an nouchak. Kijan nou fè sav sa ? Adan prèmyé pawti a Izayi chapit 30, Jéova ka sèvi èvè lèmo « zòt » pas i ka palé ba tout pèp a-y. Men adan vèwsé 19 la, i ka sèvi èvè lèmo « ou » é èvè lèmo « vou » pas i ka palé ba chak sèwvitè a-y. Mi sa nou ka li adan vèwsé-la : « Ou pé’é pléré ankò », « I pé’é jen pa aji èvè konpasyon épi-w » é « I ké réponn-vou ». Konm Jéova sé on Papa ki enmé tout timoun a-y, lè i ka vwè kè gason a-y oben fi a-y dékourajé i pa’a di-yo : « Fò ou fò kon frè a-w oben kon sè a-w ». I sav kè noutout diféran, i ka enkyété-y pou nouchak é i ka pran tan kouté priyè an nouchak (Sòm 116:1 ; Iz. 57:15).

7. Kijan sé pawòl-la Izayi di la é sé pawòl-la Jézi di la ka montré-nou kè sa enpòwtan kè nou kontinyé priyé ?

⁷ Lè nou ka di Jéova sa ki ka trakasé-nou, i pé réponn-nou tousuit. Kijansa ? I pé ban-nou fòs-la nou bizwen la pou nou pé sa andiré. Men imajiné kè éprèv-la nou ka jwenn la pa’a fin menm alòskè nou té ka èspéré kè i té’é ja fin. Pétèt kè a moman-lasa, nou ké bizwen mandé Jéova plis fòs é fò-nou ké fè sa a plizyè rèpriz. Dayè, sé sa Jéova ka ankourajé-nou fè lè nou ka gadé sa Izayi di : « Pa ba-y tan pozé kò a-y » (Iz. 62:7). Men ka sé pawòl-lasa vé di ? Ében fò-nou kontinyé priyé Jéova. Fò-nou fè sa konsi nou anvi anpéché-y pozé kò a-y. Sé pawòl-la Izayi di la ka fè-nou sonjé sé ègzanp-la Jézi té pran la anrapò èvè lapriyè. Nou ka touvé-yo adan Lik 11:8-10, 13. Jézi ka di-nou kè ‘fò pa nou pè mandé’  Jéova lèspri sen a-y é kè fò-nou « kontinyé mandé » Jéova li. Nou pé sipliyé Bondyé osi pou i pé sa gidé-nou. Konsa, nou ké pran bon désizyon.

8. An tan a Labib, kijan sé pawòl-la nou ka touvé adan Izayi 30:20, 21 réyalizé ?

⁸ (Izayi 30:20, 21.) Lawmé a sé Babilonyen-la lantouré Jérizalèm pannan 1 an é dèmi. Pannan péryòd-lasa, a pa ti rèd biten-la té rèd ! Tèlman sé Juif-la té ka vwè mizè, Labib ka konparé sa èvè pen é dlo. Men kon sé vèwsé 20 é 21 la ka montré, Jéova té pwomèt sé Juif-la kè siwvwè yo té ka rèpanti-yo é siwvwè yo té ka chanjé konpòwtasyon a yo, i té’é sové-yo. Izayi té pwomèt-yo osi kè Jéova, « Gran Pwofésè » a yo té’ é montré-yo kijan pou yo adoré-y kon i ka mandé. Sé pawòl-lasa réyalizé lèwvwè yo libéré sé Juif-la anba jouk a sé Babilonyen-la. Jéova vin pou yo on Gran Pwofésè é grasa sa yo rivé woumèt vré adorasyon-la anplas pas Jéova té la pou édé-yo. Jòdijou osi, nou kontan toubònman pas Jéova sé Gran Pwofésè an nou.

9. Kijan Jéova ka gidé-nou jòdijou ?

⁹ Adan sé vèwsé-lasa, Izayi ka konparé-nou èvè dé zélèv. Sé Jéova ki ka anségné-nou é i ka fè sa dè 2 fason diféran. Mi sa i ka di an prèmyé : « Ou ké vwè Gran Pwofésè a-w an 2 zyé a-w. » Sé pawòl-lasa ka montré-nou kè Pwofésè-la doubout douvan zélèv a-y. Jéova ka anségné-nou é sé on bèl lonnè nou ni la menm. Kijan i ka anségné-nou ? I ka sèvi èvè òwganizasyon a-y. I ka ban-nou konsèy ki itil toubònman é nou ni onlo onlo rèkonésans pou sa ! Jéova ka sèvi èvè sé réinyon-la, sé lasanblé-la, sé piblikasyon-la é tout sé pwogram-la nou ka touvé anlè JW Télédifizyon pou anségné-nou é sa ka édé-nou andiré èvè onlo jwa pannan sé dènyé jou-la nou ka viv la ki rèd toubònman.

10. Lè yo ka di kè ‘nou ka tann on vwa dèyè do an nou’, ka sa vé di ?

¹⁰ Izayi ka palé dè on dézyèm mwayen Jéova ka itilizé pou anségné-nou. Mi sa i ka di : « Ou ké tann on vwa dèyè do a-w. » Dapré sa pwofèt-la ka di, sé konsi Jéova sé on pwofésè ki ka gadé pou vwè ka zélèv a-y bizwen é ki ka maché dèyè do a yo pou gidé-yo é di-yo ki chimen pou yo pran. Jòdijou osi, nou ka tann vwa a Bondyé dèyè do an nou é i ka palé ban nou pou di-nou ki chimen pou nou pran. Men kijansa ? A pa jòdla, yo maké sé pawòl-la ki an Bib-la. Ja ni on bèl moman kè yo fè sa. Kifè, lèwvwè nou ka li-yo, sé konsi nou ka tann vwa a Bondyé dèyè do an nou (Iz. 51:4).

11. Pou nou pé sa andiré èvè onlo jwa, ka pou nou fè é ka sa ké pòté dè bon pou nou ?

 ¹¹ Jéova ka ban-nou konsèy grasa Pawòl a-y é grasa òwganizasyon a-y. Kijan nou pé pwofité dè sa a san pou san ? Ès ou vwè kè Izayi ka palé dè 2 biten ? On prèmyé biten i ka di sé : « Mi la chimen-la yé » é aprésa i ka di : « Suiv-li » (Iz. 30:21). Sa vé di kè lèwvwè nou konnèt chimen-la sé on bon biten men sa pa’a sifi, fò-nou suiv chimen-lasa osi. Grasa Pawòl a Bondyé é grasa a sé èsplikasyon-la òwganizasyon a Jéova ka ban-nou la nou ka vin sav sa Jéova ka atann dè nou men nou ka vwè osi kijan pou nou mèt sa nou ka aprann adan Labib an pratik. Pou nou pé sa andiré èvè onlo jwa toupannan nou ka sèvi Jéova, fò-nou fè sé 2 biten-lasa é sé enki si nou fè sa kè Jéova ké béni-nou.

12. Dapré Izayi 30:23-26, kijan Jéova té’é béni pèp a-y ?

¹² (Li Izayi 30:23-26.) Lèwvwè sé Juif-la yo té chayé pa fòs Babilòn viré an Izrayèl, kijan pwofési-lasa réyalizé ? Sa réyalizé lè Jéova vidé onpakèt bénédisyon asi yo : i ba-yo onlo biten pou yo té pé sa viv é i ba-yo onlo biten osi pou yo té pé sa kontinyé sèvi-y. É pi enpòwtan ankò, i ba-yo tousa yo té bizwen pou yo rété bon bon zanmi èvè-y é pou yo té woukoumansé adoré-y kon i dwètèt (Iz. 60:2). An tan-lasa, sé prèmyé fwa, Jéova té ka ba pèp a-y tousa bénédisyon. Vèwsé 26 la ka montré kè piti-a-piti Jéova voyé on limyè asi yo é sa édé-yo konprann Pawòl a-y pibyen. Grasa a tout sé bénédisyon-lasa é konm yo té ni tchè-kontan, yo té pé kontinyé sèvi Jéova èvè onlo jwa é èvè onlo kouraj (Iz. 65:14).

13. Izayi té di kè yo té’é woumèt vré adorasyon-la anplas. Kijan pwofési-lasa ka réyalizé a épòk an nou ?

¹³ Izayi té anonsé kè yo té’é woumèt vré adorasyon-la anplas. Men ès pwofési-lasa ka réyalizé jòdijou ? Wi ! Kijansa ? Dépi 1919, ni onlo moun ki sòti anba jouk a Gran Babilòn-la kivédi anba jouk a tout sé fo rèlijyon-la. Yo ka menné-yo on koté ki lontan pi bèl ki péyi-la Jéova té pwomèt sé Izraélit-la. Sé konsi yo adan on paradi kivédi on koté yo ansékirité, yo ka adoré Jéova kon i ka mandé é yotout soudé (Iz. 51:3 ; 66:8). Men poukwa nou ka di kè nou adan on paradi ?

14. Ki bénédisyon sé wen-la é sélézòt mouton-la ka jwenn é ka pou nou fè pou nou pé sa pwofité dè sa nou osi ?

¹⁴ Dépi 1919 sé wen-la adan paradi-la nou palé talè la é yo kontan yo soudé pou adoré Jéova. Piti-a-piti, ‘sélézòt mouton-la’ ki ni lèspwa dè viv asi latè ka vin adoré Jéova  ansanm èvè sé wen-la é yo ni tousa ki fo-yo pou yo rété bon zanmi èvè Jéova. Adan ansègnman-la noutout ni la, ou pa’a touvé pon manti a sé fo rèlijyon-la, noutout ka pòté bon mannèv pou préché bon nouvèl a Wayòm-la é nou kontan fè sa toubònman. Noutout pé vin bon zanmi èvè Jéova é nou pé antann-nou byen èvè frè é sè an nou ki enmé-nou é ki ka édé-nou lèwvwè nou ka jwenn difikilté. É grasa sa, nou ka andiré sé difikilté-lasa èvè onlo jwa. Nou ka rantré adan paradi-lasa lèwvwè nou ka koumansé adoré Jéova kon i ka mandé é lèwvwè nou ka fè tousa nou pé pou nou pé sa imité-y (Jan 10:16 ; Iz. 25:6 ; 65:13).

15. Sèwvitè a Jéova adan on paradi. Men ola paradi-lasa ka touvé-y ?

¹⁵ Jòdijou, ola nou ka touvé paradi-lasa ? Konm sèwvitè a Jéova ka touvé-yo toupatou asi latè, alò paradi-lasa ka touvé-y asi toutlatè. Sé pousa, kèlkèswa koté-la nou ka rété la, nou pé fè pawti a paradi-lasa si nou ka pòté bon mannèv pou soutyenn vré adorasyon-la.

16. Jòdijou nou adan on paradi ki bèl toubònman, ka pou nou fè pou nou pa jen oubliyé sa ?

¹⁶ Adan lasanblé-la, nou adan on fanmi ki soudé é fanmi-lasa toupatou asi latè. Fò-nou kontinyé ni rèkonésans pou lasanblé-lasa pou nou kontinyé rété adan paradi-la nou ja adan-y la. Kijan nou pé fè sa ? Ében nou ké rivé fè sa si nou ka konsantré-nou asi sé bèl kalité-la sé moun-la ki adan paradi-lasa ni la olyé nou konsantré-nou asi sé défo-la yo ni la (Jan 17:20, 21). Poukwa sa enpòwtan ? An-nou pran on ègzanp. Adan on foré, ni tout kalté pyébwa é yotout diféran. Menmjan-la, nou pé di kè lasanblé-la ka touvé-y kon foré-lasa. Ni tout kalté moun adan é chakmoun la diféran (Iz. 44:4 ; 61:3). « Foré-lasa » bèl toubònman é sé pousa, fò-nou fè éfò pou nou konsantré-nou asi sa olyé nou konsantré-nou asi sé défo-la sé « pyébwa-la » ni la, kivédi asi défo a frè é sè an nou ki alantou an nou. Siwvwè nou pa’a fè sa, nou pé rivé a oubliyé jan nou ni on bèl fanmi ki toupatou asi latè é ki ka fè pawti a lasanblé-la.

17. Ka chakmoun pé fè pou lasanblé-la rété soudé ?

¹⁷ Ka nouchak pé fè pou lasanblé-la rété soudé ? Fò-nou travay pou toutmoun antann-yo byen adan lasanblé-la (Mat 5:9 ; Wom. 12:18). Tousa nou ka fè pou yonn byen èvè lòt adan lasanblé-la ka fè paradi an nou vin pi bèl menmsi sé on tou piti biten  nou ka fè. Fò pa nou jen oubliyé kè tout sé moun-la ki adan paradi-lasa, sé Jéova ki fè-yo vin owa a-y pou yo pé sa adoré-y kon i ka mandé (Jan 6:44). Sèwvitè a Jéova ni onlo valè pou-y. Alò, imajiné jan Jéova dwèt kontan lè i ka vwè kè sèwvitè a-y ka fè tousa yo pé pou toujou ni lapé adan lasanblé-la é pou yotout rété soudé (Iz. 26:3 ; Ajé 2:7).

18. Asi ki biten fò-nou pran tan réfléchi é poukwa fò-nou fè sa ?

¹⁸ Jéova ka ban-nou onlo bon biten toubònman, men ka nou pé fè pou nou pé sa pwofité dè sa a san pou san ? Pou sa, fò-nou étidyé Pawòl a-y é fò-nou étidyé sé piblikasyon-la. Fò-nou pran tan réfléchi asi sa nou ka étidyé la osi. Lèwvwè nou ké fè sa, sa ké édé-nou travay sé kalité-la on krétyen dwètèt ni la. Nou ké vin enmé frè é sè an nou ‘konsi yo ka fè pawti a fanmi an nou’ é nou ké ‘enmé-yo èvè onlo tandrès’ (Wom. 12:10). Lè nou ka pran tan réfléchi asi tout sé bénédisyon-la Jéova ka ban-nou la aprézan, nou ka vin pibon zanmi èvè-y. Anplisdisa, lèwvwè nou ka pran tan réfléchi asi sé bénédisyon-la i pwomèt-nou la, sa ka ban-nou anvi sèvi Jéova pou touttan é nou vé lésé èspérans-lasa byen fon an tèt an nou. Lè nou ka fè tout sé biten-lasa, sa ka édé-nou sèvi Jéova èvè onlo jwa.

19. a) Dapré Izayi 30:18, dè ki biten pou nou sèten ? b) Ka nou pé fè pou nou pé sa andiré èvè onlo jwa ?

¹⁹ Jéova « ké mété-y doubout » pou aji an favè an nou lè i ké détwi mond méchan lasa (Iz. 30:18). Sé vré, alèla Jéova po’o détwi mond a Satan men konm sé on Bondyé ki jis, lè lè-la ké rivé, i ké fè mond a Satan fè pach. Pa menm on ti jou anplis i pé’é ba-y (Iz. 25:9). Menmjan ki Jéova, nou ja présé vwè jou-lasa rivé pou Bondyé libéré-nou. Toupannan nou ka atann jou-lasa, fò-nou byen désidé a priyé, a étidyé, a mèt Pawòl a Bondyé an pratik é a pran tan réfléchi a jan Jéova ka béni-nou. Jéova ka ban-nou sé trézò-lasa, alò, fò-nou ba-yo onlo valè. Konsa, sa ké édé-nou sèvi Jéova é andiré difikilté nou ka jwenn èvè onlo jwa.