1. Ki biten ki pé rivé dèmen é dè kibiten nou pé sèten ?

 FÒ PA sa étoné-nou si moun ka lévé kont nou lè nou an prédikasyon, é fò pa nou touvé sa fò si dèmen biten-la ka vin pi mové (Dan. 11:44 ; 2 Tim. 3:12 ; Rév. 16:21). Men on biten nou pé sèten sé kè Jéova ké ban-nou fòs-la nou bizwen la. Poukwa nou ka di sa ? Jéova toujou édé sèwvitè a-y fè travay-la i té ba-yo la, menm lèwvwè sa pa té fasil. An-nou palé dè déotwa biten ki rivé pwofèt Ézékyèl lèwvwè Jéova té mandé-y préché pou sé Juif-la yo té chayé pa fòs Babilòn.

2. Lè Jéova palé dè sé moun-la Ézékyèl té kay préché ba-yo la, ka i di asi yo, é ka nou ké vwè adan awtik-lasa ? (Ézékyèl 2:3-6).

² Ba ki moun Ézékyèl té k’ay préché ? Jéova di kè sé moun-lasa, sé té dé moun ki té rèbèl é yo pa té vlé chanjé. I konparé sé moun-lasa èvè pikan pou montré jan yo té pé fè moun mal é i konparé-yo osi èvè on zannimo yo ka kriyé iskòwpyon pou montré jan yo té danjéré. Sé pousa Jéova ni lokazyon di Ézékyèl : « Fò pa ou pè-yo », é i fè sa a plizyè rèpriz (li Ézékyèl 2:3-6). Ézékyèl rivé fè travay a prédikasyon-la Jéova té ba-y fè la pas 1) sé Jéova ki té voyé-y, 2) lèspri sen a Bondyé té ka ba-y fòs-la i té bizwen la é 3) Pawòl a Bondyé té ka konsolidé fwa a-y. Kijan sé 3 biten-lasa édé Ézékyèl ? É nou, kijan sé 3 biten-lasa pé édé-nou jòdijou ?

3. Ki pawòl ki dwèt ba Ézékyèl bon fòs é kijan Jéova montré-y kè i té’é soutyenn-li ?

³ Jéova di Ézékyèl : « An ka voyé-w » (Ézék. 2:3, 4). Asirésèten sé pawòl-lasa ba Ézékyèl bon fòs. Poukwa nou ka di sa ? Sèten i sonjé kè lèwvwè Jéova té chwazi Moyiz é Izayi pou vin pwofèt, i té di apépré menm biten-la (Ègz. 3:10 ; Iz. 6:8). Ézékyèl té sav osi kijan Jéova té édé sé 2 pwofèt-lasa rivé about a tout difikilté yo jwenn. Alò, lèwvwè  Jéova di Ézékyèl « An ka voyé-w », é lèwvwè i woudi-y sa ankò, pwofèt-la té pé sèten kè Jéova té’é soutyenn-li. Anplisdisa, adan liv a Ézékyèl, mi pawòl-lasa nou ka touvé a plizyè rèpriz : « Jéova palé ban mwen », é mi sa Ézékyèl maké plizyè fwa : « Jéova palé ban mwen ankò » (Ézék. 3:16 ; 6:1). Asiré pa pétèt, Ézékyèl té sèten kè sé Jéova ki té voyé-y. É anplisdisa, konm pap’a-y sé té on prèt, pap’a-y dwèt té di-y kè Jéova toujou pwomèt pwofèt a-y kè i té’é soutyenn-yo. Pa ègzanp, Jéova rasiré Izaak, Jakòb é Jérémi, é i di yochak : « An la èvè-w » (Jén. 26:24 ; 28:15 ; Jér. 1:8).

4. Ki pawòl ki dwèt ankourajé Ézékyèl ?

⁴ Lèwvwè Ézékyèl té’é vin préché ba sé Izraélit-la, kijan lamajorité adan yo té’é réyaji ? Mi sa Jéova té di : « Pèp a Izrayèl pé ké dakò pou kouté-w pas yo vé pa kouté-mwen » (Ézék. 3:7). Lè pèp-la ba Ézékyèl do, an réyalité yo té ka ba Jéova do. Sé pawòl-lasa té ka montré Ézékyèl kè a pa paskè pèp-la pa té’é dakò pou kouté-y kè sa té vé di kè i té mal fè travay-la i té ka fè la antankè pwofèt. Jéova di-y osi kè lèwvwè sé jijman-la i té anonsé la té’é réyalizé, pèp-la té’é « sav kè té ni on pwofèt pawmi yo » (Ézék. 2:5 ; 33:33). Sèten sé pawòl-lasa dwèt ankourajé Ézékyèl é dwèt ba-y bon fòs pou i pé sa kontinyé travay-la Jéova té ba-y fè la.

5. Dapré Izayi 44:8, ki biten ki ké ban-nou kouraj ?

⁵ Nou osi, konm nou sav kè sé Jéova ki ka voyé-nou fè travay-la nou ka fè la, sa ka ban-nou kouraj. Jéova ka kriyé-nou ‘témwen a-y’ (Iz. 43:10). Mi on bèl lonnè mi ! Menmjan Jéova di Ézékyèl : « Fò pa ou pè-yo », Jéova ka di-nou osi : « Zò pa bizwen tranblé ». Lè moun kont nou, poukwa nou pa ni a pè ? Pas, kon Ézékyèl, sé  Jéova ki ka voyé-nou é i ka soutyenn-nou (li Izayi 44:8).

6. a) Kijan Jéova ka fè-nou sav kè nou pé sèten kè i ké soutyenn-nou ? b) Ki biten ki ka ban-nou fòs é kouraj ?

⁶ Jéova ka di-nou kè nou pé sèten kè i ké soutyenn-nou. Pa ègzanp, jis avan Jéova té di : « Zò sé témwen an mwen », i té di konsa : « Lè ou ké ka janmbé dlo, an ké la èvè-w, é sé flèv-la pé ké kouvè-w. Lè ou ké ka maché anmitan difé, ou pé ké brilé, é sé flanm-la pé ké wousi-w » (Iz. 43:2). Lè nou ka préché, délè nou ka jwenn tèlman difikilté kè nou pé ni lenprésyon kè sé konsi fò-nou té janmbé on gran rivyè. É délè sé difikilté-la nou ka jwenn la tèlman rèd kè nou pé ni lenprésyon kè sé konsi nou té ka maché anmitan difé. Men magrésa, grasa a Jéova nou ka kontinyé préché (Iz. 41:13). Kon an tan a Ézékyèl, lamajorité a sé moun-la pa dakò pou kouté mésaj-la nou ka préché la. Men sa vé pa di kè nou pa’a fè travay a prédikasyon an nou byen konm i fo. Lèwvwè nou ka sonjé kè Jéova ni tchè-kontan davwa nou ka kontinyé préché mésaj a Wayòm-la é kè nou ka montré-nou fidèl adan travay-lasa, sa ka ban-nou fòs é kouraj. Lapòt Pòl di kè ‘chakmoun ké ni rékonpans a-y sèlon travay-la i fè la’ (1 Kor. 3:8 ; 4:1, 2). Mi sa on sè ki pyonyé dépi plizyè lanné ka di : « Konm an sav kè Jéova ka rékonpansé éfò an nou, sa ka mèt onlo jwa an tchè an mwen ».

7. Ka Ézékyèl té ka rèsanti lèwvwè i té ka sonjé vizyon-la i té vwè la ? (gadé imaj-la ki anlè po a jounal-la).

⁷ Ézékyèl vwè on vizyon ki édé-y konprann jan lèspri sen a Bondyé puisan toubònman. Grasa a vizyon-lasa, i rivé konprann kè Jéova ka sèvi èvè lèspri sen a-y pou édé sé zanj-la ki puisan toubònman é pou déplasé sé gwo manman wou a cha-la ki an syèl-la (Ézék. 1:20, 21). Lèwvwè Ézékyèl vwè sa, kijan i réyaji ? I rakonté sa ki pasé. Mi sa i maké : « Lèwvwè an vwè sa, an tonbé atè é an bésé tèt an mwen » (Ézék. 1:28). Tèlman sa siwprann Ézékyèl, i tonbé atè. Vizyon-lasa mawké-y é chaklè i té ka sonjé-y, i té pi sèten ankò kè grasa lèspri sen a Bondyé, i té’é rivé fè travay a prédikasyon-la Bondyé té ba-y fè la.

8-9. a) Ka ki rivé Ézékyèl lèwvwè Jéova mandé-y lévé ? b) Kijan Jéova ba Ézékyèl fòs pou i té pé sa préché adan on téritwa alòskè sa pa té fasil ?

⁸ Jéova di Ézékyèl : « Gason a lòm, mété-w doubout pou an palé èvè-w. » Lèwvwè Jéova ba Ézékyèl lòd-lasa, é kè i ba-y lèspri sen a-y, sa ba-y fòs-la i té bizwen la pou lévé atè-la. Mi sa Ézékyèl maké : « Lèspri sen rantré andidan an mwen é i fè-mwen doubout » (Ézék. 2:1, 2). Plita é pannan tout tan-la Ézékyèl rété ka préché la, Bondyé gidé-y èvè men a-y, kivédi i sèvi èvè lèspri sen a-y pou gidonné Ézékyèl (Ézék. 3:22 ; 8:1 ; 33:22 ; 37:1 ; 40:1). Lèspri sen ba Ézékyèl bon fòs pou i té pé sa fè travay a Bondyé. Sa vé di kè i té ka préché ba moun ki té an téritwa a-y magré sé té ‘dé moun tèt a yo rèd é ki pa té vlé chanjé’ (Ézék. 3:7). Mi sa Jéova di Ézékyèl : « An ba-w fòs pou ou doubout pikan douvan yo menmjan yo doubout pikan douvan mwen. An fè tèt a-w vin rèd menmjan tèt a yo rèd. An fè fon a-w vin kon on dyaman, an fè-y vin pi rèd ki wòch a silèks. Fò pa ou pè-yo é pa lésé figi a yo fè-w pè, pas sé on pèp ki rèbèl » (Ézék. 3:8, 9). Sé konsi Jéova té ka di Ézékyèl : « Tèt a sé moun-lasa rèd men pa lésé sa dékourajé-w. An ké ba-w fòs. »

⁹ Aprésa, lèspri sen a Bondyé menné Ézékyèl adan téritwa-la i té k’ay préché la. Mi sa i maké : « Puisans a Jéova aji fò asi  mwen toubònman. » Sa pran-y on simenn pou i té pé sa sèten dè sa i té kay préché. Pannan simenn-lasa, i aprann mésaj-la i té kay préché la é i pran on tan pou i té konprann-li byen (Ézék. 3:14, 15). Alò Jéova mandé-y ay on koté ki plat é i voyé lèspri sen a-y asi-y (Ézék. 3:23, 24). A moman-lasa Ézékyèl té paré pou i té koumansé travay a prédikasyon a-y.

10. Ka nou bizwen pou nou pé sa fè travay a prédikasyon-la é poukwa nou bizwen sa ?

¹⁰ Ka nou bizwen pou nou pé sa fè travay a prédikasyon-la byen konm i fo ? Pou nou touvé répons a kèsyon-lasa, an-nou sonjé sa ki rivé Ézékyèl. Lèspri sen a Bondyé ba-y fòs-la i té bizwen la avan i té koumansé préché. Jòdila, si nou ka rivé préché sé enki pas lèspri sen a Bondyé ka édé-nou kon i édé Ézékyèl. Poukwa nou ka di sa ? Pas Satan an lagè èvè nou é i bizwen fè-nou arété préché (Rév. 12:17). Ni onlo moun ki ka pansé kè nou pé’é jen rivé gangné Satan, pas Satan lontan pli fò ki nou. Men grasa travay a prédikasyon-la nou ka fè la, nou ka pran lanmen asi-y ! (Rév. 12:9-11). Kijan nou ka rivé fè sa ? Lè nou ka préché, nou ka montré kè Satan pa’a fè-nou pè, menmsi i ka mennasé-nou. Chakfwa nou ka préché, sé pèd Satan ka pèd konba. Alò, lè nou ka vwè jan nou ka rivé préché magré lènmi an nou ka mèt baton an wou an nou, ka sa ka montré ? Sa ka montré on mannyè ki klè kè lèspri sen ka ban-nou fòs-la nou bizwen la é kè nou ni bénédisyon a Jéova (Mat. 5:10-12 ; 1 Pyè 4:14).

11. Kijan lèspri sen a Bondyé ké édé-nou, é ka nou pé fè pou Bondyé kontinyé ban-nou lèspri sen a-y ?

¹¹ Lè nou ka sonjé jan Jéova ba Ézékyèl fòs-la i té bizwen la pou i té pé sa préché, ka sa ka aprann-nou ankò ? Lèspri sen a Jéova pé ban-nou fòs-la nou bizwen la pou nou pé sa andiré nenpòt ki pwoblèm nou té’é pé jwenn an prédikasyon (2 Kor. 4:7-9). Si nou vé kè Bondyé kontinyé ban-nou  lèspri sen a-y, ka pou nou fè ? Fò-nou priyé Jéova toulongalé é fò-nou sèten kè Jéova ké tann priyè an nou. Mi sa Jézi ni lokazyon di disip a-y : « Kontinyé mandé [...]. Kontinyé chèché [...]. Kontinyé kongné [...]. » Si nou fè sa, nou pé sèten kè Jéova ké réponn. I ké « ba séla ki ka mandé-y la lèspri sen » (Lik 11:9, 13 ; Akt 1:14 ; 2:4).

12. Dapré Ézékyèl 2:9–3:3, ola woulo-la té ka sòti, é ka ki té maké adan-y ?

¹² Lèspri sen a Bondyé ba Ézékyèl kouraj-la i té bizwen la pou préché, men a pa sa tousèl ki édé-y. Anplisdisa, Pawòl a Bondyé konsolidé fwa a-y. Adan on vizyon, Ézékyèl vwè on men ki té ka tchenn on woulo (li Ézékyèl 2:9–3:3). Ola woulo-lasa té ka sòti ? Ka ki té maké adan-y ? Kijan woulo-lasa plen vant a Ézékyèl ? An-nou gadé sa. Woulo-la té ka sòti an twòn a Bondyé. I ka sanm sa Jéova sèvi èvè on zanj pou ba Ézékyèl woulo-la. Pétèt sé yonn adan sé 4 zanj-la Ézékyèl té vwè la tibwen avan adan vizyon-la (Ézék. 1:8 ; 10:7, 20). Adan woulo-lasa té ni on mésaj ki té ka vin dè Bondyé é mésaj-lasa té long. Sé té on jijman pou Ézékyèl té anonsé sé moun-la yo té chayé pa fòs Babilòn pas yo té rèbèl (Ézék. 2:7). Mésaj-lasa té maké ki douvan woulo-la, ki dèyè a-y.

13. Ka Jéova mandé Ézékyèl fè èvè woulo-la, é poukwa lè i manjé woulo-la i touvé-y bon ?

¹³ Jéova mandé pwofèt a-y manjé woulo-la é i di-y ‘plen vant a-y èvè-y’. Ézékyèl kouté Jéova é i manjé tout woulo-la. Men ka pawti a vizyon-lasa té vé di ? Avan Ézékyèl té ay anonsé mésaj-lasa, fò i té konprann-li byen menm. Fò limenm a-y té kwè adan mésaj-lasa pou i té ni balan pou préché. Men aprésa ni on biten ki fèt é sa siwprann Ézékyèl toubònman. Ézékyèl rann-li kont kè woulo-lasa ‘té dous an bouch a-y kon siwo myèl’ (Ézék. 3:3). Poukisa ? Pas pou Ézékyèl, lèfètkè i té ka palé an non a Jéova, sé té on lonnè pou-y. Sé té on biten ki té dous é ki té agréyab kon siwo myèl (Sòm 19:8-11). I té ni onlo rèkonésans pou Jéova pas Jéova té chwazi-y pou vin pwofèt a-y.

14. Ézékyèl té paré a fè travay-la Jéova té ba-y fè la. Ka ki édé-y fè sa ?

¹⁴ Aprésa Jéova di Ézékyèl : « Kouté tousa an ké di-w é pran sa oséryé » (Ézék. 3:10). An réyalité, Jéova té ka mandé Ézékyèl éséyé sonjé tout sé pawòl-la ki té maké adan woulo-la é pran tan réfléchi asi-y. Grasa sa, fwa a-y té’é vin pli fò é i té’é ni on mésaj puisan pou ba sé Juif-la yo té chayé pa fòs la (Ézék. 3:11). Lèwvwè Ézékyèl té’é konprann mésaj a Bondyé byen menm é kè i té’é mété-y ka kwè adan-y, i té’é paré pou fè travay-la Jéova té ba-y fè la. Non sèlman, i té’é paré a fè travay-lasa men i té’é kontinyé fè-y joustan i fin-li (gadé osi Sòm 19:14).

15. Ki biten fò-nou pran oséryé pou nou kontinyé préché ?

¹⁵ Pou nou pé sa kontinyé préché, nou osi, fò-nou kontinyé lésé Pawòl a Bondyé konsolidé fwa an nou. Fò-nou pran tousa Jéova ka di-nou oséryé. Jòdila, Jéova ka sèvi èvè sa ki maké adan Pawòl a-y, Labib, pou palé ban nou. Pawòl a Bondyé pé aji asi sa nou ka pansé, asi sa nou ka rèsanti é asi sa ki ka pousé-nou aji. Men kijan nou pé sèten kè Pawòl a Bondyé ka aji asi nou toujou ?

16. Ka nou pé fè pou Pawòl a Bondyé pé sa konsolidé fwa an nou, é kijan nou pé fè-y rantré anfon a tchè an nou ?

¹⁶ Lèwvwè nou ka manjé on biten é kè  manjé-la ka désann, nou ka santi-nou anfòm. Menmjan-la osi, lèwvwè nou ka étidyé Pawòl a Bondyé é kè nou ka pran tan réfléchi anlè-y, sa ka fè fwa an nou vin pli fò. Sé sa ègzanp a woulo-la ka aprann-nou. Jéova vé kè nou ‘plen vant an nou’ èvè Pawòl a-y, kivédi i vlé kè nou konnèt Pawòl a-y byen. Pousa, fò-nou priyé-y, fò-nou li Pawòl a-y é fò-nou pran tan réfléchi asi-y. Prèmyèwman, fò-nou priyé pou préparé tchè an nou pou Pawòl a Bondyé pé sa rantré andidan a-y. Aprésa fò-nou li déotwa pasaj a Labib. É pou fin, fò-nou pran on ti tan pou réfléchi é pou nou pé ay an nannan a sa nou sòti li la. Si nou fè sa, ka sa ké bay ? Ében pi nou ké pran tan réfléchi asi sa nou ké li, pi Pawòl a Bondyé ké konsolidé fwa an nou.

17. Poukwa fò-nou pran tan réfléchi asi sa nou ka li adan Labib ?

¹⁷ Poukwa fò-nou li Labib é fò-nou pran tan réfléchi asi sa nou ka li ? Pas sé sa ki ka ban-nou fòs pou nou préché mésaj a Wayòm-la konnyéla la. É pétèt kè talè, lèwvwè Jéova ké mandé-nou anonsé on mésaj a jijman, sé sa ki ké édé-nou osi. Anplisdisa, si nou ka pran tan réfléchi asi sé bèl kalité-la Jéova ni la, nou ké vin pi bon zanmi èvè-y. Grasa sa, nou ké ni on biten ki dous é ki agréyab kon siwo myèl : lèspri an nou ké trankil é nou ké ni tchè-kontan ! (Sòm 119:103).

18. Ka moun ki adan téritwa an nou ké oblijé admèt ?

¹⁸ Sé vré kè, nou, nou pa pwofèt kon Ézékyèl men nou byen désidé a kontinyé préché mésaj a Jéova ki adan Pawòl a-y jiskatan Jéova désidé kè nou ja préché asé. Lèwvwè jou a jijman-la ké rivé, ponmoun an téritwa-la pé’é pé di kè Jéova pa avèti-y oben kè i pa lévé-y digad (Ézék. 3:19 ; 18:23). Yo ké oblijé admèt kè mésaj-la nou té ka préché la té ka vin dè Bondyé.

19. Ka ki ké ban-nou fòs pou nou fè travay a prédikasyon-la ?

¹⁹ Ka ki ké ban-nou fòs pou nou pé sa fè travay a prédikasyon-la ? Menmjan ki Ézékyèl, ni 3 biten ki ka ban-nou fòs. Nou ka kontinyé préché pas nou sav kè sé Jéova ki ka voyé-nou fè sa, pas lèspri sen a-y ka ban-nou fòs é pas Pawòl a-y ka konsolidé fwa an nou. Konm nou sav kè Jéova la èvè nou é kè i ka édé-nou, nou byen désidé a préché é a andiré « jous a lafen » (Mat. 24:13).