1. Fò-nou « kontinyé ni bon jijman ». Men ka sa vlé di ojis ? (2 Timoté 4:5).

 LÈ NOU ka jwenn sitiyasyon ki ka dékourajé-nou, pou nou rété fidèl a Jéova é a òwganizasyon a-y, sa pé rèd toubònman. Men ka nou pé fè pou nou rivé about a sé sitiyasyon-lasa ? Fò-nou kontinyé ni bon jijman, fò-nou rété véyatif toupannan nou ka tchenbé rèd pou fwa an nou rété fò (li 2 Timoté 4:5). Nou ké kontinyé ni bon jijman si nou ka rété kalm, si nou ka pran tan analizé sitiyasyon-la nou ka viv la byen konm i fo é si nou ka fè éfò pou vwè sé pwoblèm-la nou ni la kon Jéova ka vwè-yo. Si nou ka fè sa, sa nou ka rèsanti pé’é pran lanmen asi nou.

2. Ka nou ké vwè adan awtik-lasa ?

² Adan awtik a simenn pasé, nou vwè 3 sitiyasyon ki pé fèt andéwò a lasanblé-la é ki pé anpéché-nou rété fidèl a Jéova. Adan awtik-lasa, nou ké palé dè 3 sitiyasyon nou pé rivé a jwenn adan lasanblé-la ki pé chouboulé-nou : 1) lèwvwè nou ni lenprésyon kè on frè oben on sè pa aji byen èvè nou, 2) lèwvwè Jéova ka korijé-nou, é 3) lèwvwè lòwganizasyon ka fè on chanjman é kè nou ni dimal a adapté-nou. Lèwvwè nou ka viv dé sitiyasyon konsa, ka nou pé fè pou nou kontinyé ni bon jijman é pou nou rété fidèl a Jéova é a òwganizasyon a-y ?

3. Si nou ni lenprésyon kè on frè oben on sè pa aji byen èvè nou, kijan nou té’é pé réyaji ?

³ Ès sa ja rivé kè ou ni lenprésyon kè on moun adan lasanblé-la, pétèt on ansyen, pa aji byen èvè-w ? Sèten i pa té ni lentansyon fè-w lapenn, men sa i fè-w la sa chouboulé-w (Wom. 3:23 ; Jak 3:2). Pétèt kè akòz dè sa ou pa té ka rivé  dòmi é pétèt ou jous mandé-w : « Adan lasanblé-la on frè ka fè-mwen on biten konsa ! Ès sé vréman òwganizasyon a Bondyé ? » Sé konsa Satan té’é vé kè nou réyaji (2 Kor. 2:11). É si sé sa nou ka mèt an tèt an nou, sa pé fè-nou arété sèvi Jéova é lagé òwganizasyon a-y. Alò, si nou ni lenprésyon kè on frè oben on sè pa aji byen èvè nou, ka nou pé fè pou nou kontinyé ni bon jijman é pou nou mèt tout lidé négatif akoté ?

4. Ka Jozèf fè pou i kontinyé ni bon jijman alòskè yo té ka mal aji èvè-y é ka ègzanp a-y ka aprann-nou ? (Jénèz 50:19-21).

⁴ Pa lésé ayen égri-w. Lèwvwè Jozèf té jenngason, sé granfrè a-y la té ka fè-y vwè bon mizè. Yo té hay-li é jous ni sa adan yo ki té bizwen tchouyé-y (Jén. 37:4, 18-22). Anfinaldikont, yo vann-li pou i té vin èsklav é akòz dè sa i pran bon gaz pannan 13 an. I té’é pé mandé-y si Jéova té enmé-y vréman é si Jéova pa té lagé-y alòskè i té an détrès. Men i pa lésé sa égri-y. I kontinyé ni bon jijman é i rété kalm. Rivé onlè, i té’é pé montré sé frè a-y la ka i té ka pézé men i pa fè sa. Okontrè, i montré-yo kè i enmé-yo é i padonné-yo (Jén. 45:4, 5). Si Jozèf aji konsa sé pas i té ka vwè sitiyasyon-la kon pou i té vwè-y. Jozèf pa té ka lésé sé pwoblèm-la i té ni la pété tèt a-y men i té ka kontinyé sonjé kijan Jéova té vé kè i aji (li Jénèz 50:19-21). Ka sa ka aprann-nou ? Siwvwè yo ka mal aji èvè-w, pa fè kòlè èvè Jéova é pa mèt an tèt a-w kè Jéova lagé-w. Okontrè, sonjé tousa i ka fè pou édé-w andiré. Anplisdisa, fò ou sonjé kè « lanmou ka kouvè onpakèt péché » é fò ou fè éfò pou padonné moun ki fè-w ditò (1 Pyè 4:8).

5. Ka Miqueas fè pou i kontinyé ni bon jijman lèwvwè i té ni lenprésyon kè yo té rèd èvè-y ?

⁵ Aprézan, an-nou palé dè on frè non a-y sé Miqueas b. Sé on ansyen ki ka viv an Amérik di Sid. Onlè, i té ni lenprésyon kè sé ansyen-la té aji on mannyè ki rèd èvè-y. Mi sa i ka èspliké : « Sé prèmyé fwa an santi-mwen istrésé konsa. An té angwasé, an pa té ka rivé dòmi é tèlman an té dézèspéré, an té ka pléré. » Men magrésa, Miqueas kontinyé ni bon jijman é i fè onlo éfò pou i pa té lésé sa i té ka rèsanti pran lanmen asi-y. I té ka priyé souvan é i té ka mandé Jéova ba-y lèspri sen a-y é ba-y fòs pou i té pé sa andiré. Anplisdisa, i fè rèchèch adan piblikasyon an nou pou i té touvé déotwa ti lidé ki té’é itil ba-y. Ka sa ka aprann-nou ? Siwvwè ou ni lenprésyon kè on frè oben on sè pa aji byen èvè-w, rété kalm é pa lésé pon lidé négatif pran lanmen asi-w. Pétèt moun-la palé konsa ba-w oben aji konsa èvè-w men voumenm a-w pa sav poukwa i fè sa. Alò wouvè tchè a-w ba Jéova é mandé-y édé-w konprann sa moun-la ka pansé. Si ou ka fè sa, sa ké pi fasil pou ou mèt an tèt a-w kè frè a-w pa té ni pon mové lentansyon é pou ou mèt sa i fè-w la dèyè do a-w (Pwov. 19:11). Pa jen oubliyé kè Jéova sav tousa ki pasé, i sav sa ou ka rèsanti é i ké ba-w fòs-la ou bizwen la pou ou pé sa andiré (2 Kron. 16:9 ; Ékl. 5:8).

6. Lèwvwè Jéova ka korijé-nou, sé pas i enmé-nou. Poukwa sa enpòwtan kè nou konprann sa ? (Ébré 12:5, 6, 11).

⁶ Lèwvwè yo ka korijé-nou, sa pé fè-nou lapenn. Men siwvwè sé enki sa nou ka mèt an tèt an nou, nou pé di-nou kè sa nou fè la sé on biten an kouyonnad, kè nou pa’a vwè pou ki biten yo ka korijé-nou é kè yo on ti jan rèd èvè nou. A moman-lasa, ni on biten enpòwtan kè nou pé’é vwè, sé kè si Jéova ka korijé-nou, sé pas i enmé-nou (li Ébré 12:5, 6, 11). Si nou ka konsantré-nou enki asi sa nou ka rèsanti, sé on pòt nou ka wouvè pou Dyab-la. É li, onsèl biten i vlé sé kè lè yo korijé-nou nou pa pran sa é kè nou  ba ki Jéova ki lasanblé-la do. Alò si Jéova korijé-w, kijan ou pé kontinyé ni bon jijman ?

7. a) Kon nou ka vwè-y asi imaj-la, lè Jéova korijé Pyè é kè i aksèpté sa, kijan Jéova sèvi èvè-y ? b) Ka ègzanp a Pyè pé aprann-vou ?

⁷ Lè Jéova ka korijé-w, aksèpté sa é fè sé chanjman-la ki fo la. Jézi korijé Pyè douvan sélézòt apòt-la a plizyè rèpriz (Mawk 8:33 ; Lik 22:31-34). Pétèt kè lè sa rivé, Pyè touvé-y wont. Men i rété fidèl a Jézi. I aksèpté sé konsèy-la yo ba-y la é sa sèvi-y lèson. Jéova rékonpansé Pyè pas i montré-y fidèl é Jéova ba-y plis rèsponsabilité adan lasanblé-la (Jan 21:15-17 ; Akt 10:24-33 ; 1 Pyè 1:1). Ka ègzanp a Pyè ka aprann-nou ? Si nou jenné pas yo korijé-nou, fò pa nou konsantré-nou asi sa. Men fò nou aksèpté sé konsèy-la yo ka ban-nou la é fò nou fè sé chanjman la ki fo la. Si nou fè sa, sa ké pòté onlo bon biten pou nou é pou lézòt osi. Nou ké vin pli itil an men a Jéova é nou ké fè frè é sè an nou dibyen.

8-9. a) Bernardo té ansyen é i pèd rèsponsabilité a-y. Odépa ka i rèsanti ? b) Ka ki édé Bernardo chanjé mannyè i té ka pansé ?

⁸ An-nou vwè ègzanp a Bernardo, on frè ki ka viv o Mozanbik. Ni kèlkè lanné dè sa, i té ansyen é i vin pèd rèsponsabilité-lasa. Odépa, ka i rèsanti ? Mi sa i ka di : « Konm lè yo korijé-mwen an pa té aksèpté sa, an té ni rankin an tchè an mwen. » I té ka mandé-y ka moun ké di adan lasanblé-la é sa té ka enkyété-y. Mi sa limenm ka rèkonnèt : « Sa pran-mwen plizyè mwa pou an té pé sa vwè sitiyasyon-la kon pou mwen vwè-y é pou mwen woukoumansé fè Jéova é òwganizasyon a-y konfyans. »

⁹ Ka ki édé Bernardo chanjé mannyè i té ka pansé ? Mi sa i ka èspliké: « Lè an té ansyen, an té ka sèvi èvè Ébré 12:7 pou édé sé frè é sè la konprann poukwa Jéova ka korijé moun. Men lè an pran on ti tan pou réfléchi asi sa, an di an tchè an mwen : “Men kimoun ki bizwen mèt vèwsé-lasa an pratik ? A pa tout sèwvitè a Bondyé alò ? Donk sa vlé di kè mwen osi, fò an apliké vèwsé-lasa.” » Aprésa, Bernardo fè chanjman é sa édé-y fè Jéova é òwganizasyon a-y konfyans plis ankò. I òwganizé-y pou ni plis tan pou li Bib a-y é pou médité asi sa i té ka li. Menmsi i toujou té ka mandé-y ka sé frè é sè la té’é di, i kontinyé préché é i kontinyé bay dé bon ti komantè pannan sé réinyon-la. Aprésa, i wouvin ansyen. Alò si Jéova korijé-w kon i fè-y pou Bernardo,  aksèpté sa é fè sé chanjman-la ki fo la menmsi ou on ti jan jenné pas yo korijé-w c (Pwov. 8:33 ; 22:4). Ou pé sèten kè Jéova ké rékonpansé-w pas ou rété fidèl a-y é pas ou rété fidèl a òwganizasyon a-y osi.

10. Ni on chanjman ki fèt é pétèt sa mèt fidélité a sèwten Izraélit a léprèv. Ki chanjman ésa ?

¹⁰ Délè òwganizasyon a Jéova ka fè sèwten chanjman é sé chanjman-lasa pé mèt fidélité an nou a léprèv. Siwvwè nou pa’a fè atansyon, sa pé jous fè-nou ba Jéova do. An-nou vwè ègzanp a sé Izraélit-la. Lèwvwè yo touvé-yo anba lwa a Moyiz, ni sèwten chanjman ki fèt. An-nou vwè kilès. Avan Jéova té ba sé Izraélit-la lwa a Moyiz, sé chèf a chak fanmi ki té ka fè travay-la prèt-la té ka fè la. Sé chèf a fanmi-la ki té ka konstwi lotèl é i té ka ofè Jéova sakrifis pou li é pou fanmi a-y (Jén. 8:20, 21 ; 12:7 ; 26:25 ; 35:1, 6, 7 ; Jòb 1:5). Men lèwvwè sé Izraélit-la touvé-yo anba lwa a Moyiz, a pa sé chèf a fanmi-la ki té ka fè travay-lasa ankò. Jéova chwazi sèwten moun adan fanmi a Aaron pou yo té vin prèt, kifè, sé yo ki té ka ofè sé sakrifis-la. Apré chanjman-lasa, siwvwè on chèf a fanmi ki pa té ka fè pawti a fanmi a Aaron té ka fè travay a on prèt alòskè i pa té andwa fè sa, yo té pé tchouyé-y d (Lév. 17:3-6, 8, 9). Ès a pa parapòt a sa kè Koré, Datan, Abiram é sé 250 chèf-la vin rèbèl é kè yo ba Moyiz é Aaron do ? (Nonb 16:1-3). Nou pa sav vréman. Men on biten nou sav, sé kè yo pa rété fidèl a Jéova. Alò, siwvwè òwganizasyon a Jéova ka fè on chanjman é kè sa ka mèt fidélité a-w a léprèv, ka ou pé fè ?

11. Ka ègzanp a sèwten Kèatit ka aprann-nou ?

¹¹ Soutyenn òwganizasyon a Jéova lè i ka fè on chanjman. Lè yo té ka vwayajé adan dézè-la, fò sé Lévit-la ki té ka fè pawti a fanmi a sé Kèatit-la té fè on travay ki té enpòwtan toubònman. Chaklè sé Izraélit-la té ka pati ondòt koté, ni sèwten Kèatit ki té ka pòté lawch a Alyans la toupannan yo té ka maché douvan pèp-la (Nonb 3:29, 31 ; 10:33 ; Joz. 3:2-4). Mi on bèl lonnè mi ! Men lèwvwè sé Izraélit-la enstalé-yo adan péyi-la Jéova té pwomèt-yo la, té’é ni sèwten chanjman. Poukwa nou ka di sa ? Pas sé Kèatit-la pa té’é bizwen déplasé awch-la kon yo té ka fè-y avan. Sé pousa, an tan a wa Salomon, ni sèwten Kèatit ki té ka fè pawti a moun yo té chwazi pou chanté, ni dòt ki té ka véyé sé pòt-la é ni dòt ankò ki té ka okipé-yo dè manjé-la ki té adan sé dépo-la (1 Kron. 6:31-33 ; 26:1, 24). Men adan Labib, pa ni pon koté yo ka di kè sé Kèatit-la di kè yo pa té kontan, oben kè yo voyé labou é kè yo mandé fè on travay enpòwtan kon travay-la yo té ka fè la avan. Ka sa ka aprann-nou ? Fò ou soutyenn sé chanjman-la òwganizasyon a Jéova ka fè la èvè tout tchè a-w é fò ou fè sa menm lèwvwè chanjman-lasa ka konsèwné-w pèwsonèlman. Kèlkèswa travay-la yo ka ba-w fè la, fè ansòt pou sa mèt onlo jwa an tchè a-w. Fò ou toujou sonjé kè a pa sa yo ka ba-w fè oben koté-la yo ka voyé-w la ki ka fè kè ou ni onlo valè. Sé pas ou ka obéyi Jéova kè ou ni onlo valè pou-y (1 Sam. 15:22).

12. Ka Zaina rèsanti lèwvwè òwganizasyon-la voyé-y fè ondòt travay ?

¹² An-nou palé dè Zaina, on sè ki ka viv o Mwayen-Oriyan. I rété plis ki 23 an ka  travay adan Bétèl-la é i té enmé travay-la i té ka fè la toubònman. Men yo mandé-y kité Bétèl-la pou i vin pyonyé èspésyal. Mi sa i ka di : « Mésyé, lè yo di’an sa, sa choké-mwen toubònman ! An té ni lenprésyon kè an té on manb initil é an té ka mandé-mwen toutlè ki mové biten an fè ». Men anplisdisa, sèwten frè é sè a lasanblé a-y té ka di-y dé biten ki té ka fè-y lapenn. Mi sa yo té ka di-y : « Si ou té ka travay byen adan Bétèl-la, yo pa té’é ba-w biyé-palapenn a-w. » Onlè, Zaina té tèlman dékourajé kè touléswa i té ka pléré gwodlo. Men mi sa i ka di : « An té sèten kè Jéova té enmé-mwen é an té sèten kè òwganizasyon-la sé ta-y. » Magré sitiyasyon-lasa, kijan Zaina kontinyé ni bon jijman ?

13. Zaina rivé about a sé lidé négatif la i té ni la. Kijan i fè sa ?

¹³ Sèwten lidé négatif té ka vin an lèspri a Zaina men i rivé about a sa. Kijan i rivé fè sa ? I li plizyè awtik nou ka touvé adan piblikasyon an nou ki té ka palé dè pwoblèm-la i té ka jwenn la. Adan niméwo a 1^é févriyé 2001 a Tou dè gad la, i touvé on awtik ki édé-y toubònman. Tit a-y sé : « Vous pouvez vaincre le découragement ! » Awtik-lasa ka èspliké sa Mawk, on moun ki maké on liv a Labib, rèsanti lèwvwè yo voyé-y fè ondòt travay pou Jéova é kè yo fè sa a plizyè rèpriz. Mi sa Zaina ka sonjé : « Ègzanp a Mawk té ka touvé-y kon bon ti rimèd ki té ka édé-mwen goumé lèwvwè an té dékourajé. » Anplisdisa, Zaina pa jen lagé zanmi a-y. I kontinyé frékanté frè é sè a-y, é i kontinyé préché èvè yo. Menmsi sa i té ka rèsanti la té ka fè-y mal, i pa té ka sonjé enki sa. I rann-li kont kè lè òwganizasyon a Jéova ka pran on désizyon, sé frè-la ki antèt a òwganizasyon-la toujou ka lésé lèspri sen gidé-yo. I vwè kè sé frè-la ki ni rèsponsabilité adan lasanblé-la ka enkyété-yo pou-y vréman. I réyalizé osi kè òwganizasyon a Jéova ka fè tousa i pé pou travay a Jéova kontinyé fè douvan.

14. Ki chanjman Vlado té ni dimal a aksèpté é ka ki édé-y ?

¹⁴ Vlado sé on ansyen ki ka rété an Slovéni é i ni 73 an. Lèwvwè òwganizasyon-la fè lasanblé a-y é ondòt lasanblé fè onsèl é kè yo fèmé sal di Wayòm la i té k’ay adan-y la, i pa rivé aksèpté sa fasilman. Mi sa i ka di : « An pa té ka konprann poukwa yo té fèmé bèl ti sal-lasa. Yo té sòti fè dé ti travo adan-y é konm an ka travay bwa, an té fè déotwa mèb pou sal-lasa. Anplisdisa, lèwvwè  òwganizasyon a Jéova fè sé 2 lasanblé-la fè onsèl, sa pa té fasil pou frè é sè ki ja ni on bèl laj kon mwen. » Men ka ki édé Vlado soutyenn chanjman-lasa ? Mi sa i ka di : « Lèwvwè òwganizasyon a Jéova ka fè chanjman é kè nou ka adapté-nou, sé bon biten sa ka pòté ban nou, é anplisdisa, sa ka préparé-nou pou dòt chanjman ki ka vin dèyè é ki ké pli gwo ki sa ». Ès òwganizasyon a Jéova fè lasanblé a-w é ondòt lasanblé fè onsèl, oben ès i voyé-w fè ondòt travay ? Pétèt kè pou ou fè kò èvè sa, a pa on ti afè ! Si sé ka a-w, ou pé sèten kè Jéova ka konprann sa ou ka rèsanti. Men si ou ka soutyenn sé désizyon-la òwganizasyon a Jéova ka pran la é kè ou ka rété fidèl a Jéova é a òwganizasyon a-y, i ké béni-w (Sòm 18:25).

15. Sèwten sitiyasyon pé rivé adan lasanblé-la é sa pé rèd toubònman. Ki sitiyasyon ésa é kijan nou pé kontinyé ni bon jijman lèwvwè nou ka jwenn sé sitiyasyon-lasa ?

¹⁵ Talè sistèm-lasa kay bout é fò pa sa étoné-nou si sèwten sitiyasyon ki rèd toubònman ka rivé adan lasanblé-la. Nou vlé rété fidèl a Jéova men sé sitiyasyon-lasa pé mèt fidélité an nou a léprèv. Sé pousa, fò-nou kontinyé ni bon jijman. Si ou ni lenprésyon kè yo pa ka aji byen èvè-w, fò pa ou lésé sa égri-w. Si Jéova korijé-w, pa lésé lawont pran lanmen asi-w, aksèpté sé konsèy-la yo ba-w la é fè sé chanjman-la ki fo la. Anplisdisa, lè òwganizasyon a Jéova ka fè chanjman ki ka konsèwné-w pèwsonèlman, aksèpté sé chanjman-lasa dè-tou-kè é suiv nouvo dirèksyon-la yo ka ba-w la.

16. Ka ou pé fè pou ou toujou fè Jéova é òwganizasyon a-y konfyans ?

¹⁶ Ou pé kontinyé fè Jéova é òwganizasyon a-y konfyans menm lèwvwè ou ka jwenn sitiyasyon ki ka mèt fidélité a-w a léprèv. Pou sa, fò ou kontinyé ni bon jijman, fò ou rété kalm, fò ou analizé sitiyasyon-la byen konm i fo é fò ou vwè sitiyasyon-lasa kon Jéova ka vwè-y. Pran labitid fè rèchèch asi dé moun ki adan Labib é ki viv menm sitiyasyon ki-w é pran tan médité asi ègzanp a yo. Fò ou byen désidé a fè sa. Mandé Jéova soutyenn-vou. Pa rété tousèl a-w. Okontrè fò-w rété soudé èvè frè é sè a-w. A moman-lasa, kèlkèswa sitiyasyon-la ou ké jwenn la, Satan pé ké rivé fè-w ba Jéova é òwganizasyon a-y do (Jak 4:7).