AWTIK POU ÉTIDYÉ 47
Pa lésé ayen fè-w arété sèvi Jéova !
« An ka fè-w konfyans, o Jéova ! » (SÒM 31:14).
KANTIK 122 Soyons fermes, inébranlables !
ON TI LIDÉ ASI SA NOU KAY VWÈ a
1. Kijan nou fè sav kè Jéova vé vin bon zanmi èvè nou ?
JÉOVA anvi nou vin bon zanmi èvè-y. Sé pousa, i ka mandé-nou rapwoché-nou dè-y (Jak 4:8). I vé vin Bondyé an nou, Pap’an nou é Zanmi an nou. I ka réponn a priyè an nou é i ka édé-nou lè nou ka jwenn difikilté. Anplisdisa, grasa òwganizasyon a-y, i ka anségné-nou é i ka pwotéjé-nou. Men ka pou nou fè pou nou rapwoché-nou dè-y ?
2. Ka nou pé fè pou nou rapwoché-nou dè Jéova ?
2 Nou pé rapwoché-nou dè Jéova lè nou ka priyé-y, lè nou ka li Pawòl a-y é lè nou ka médité asi sa nou ka li adan-y. Lè nou ka fè sa, nou ka vin enmé-y èvè tout tchè an nou é nou ka vin ni onlo rèkonésans pou-y. Anplisdisa, sa ka ban-nou anvi obéyi-y é sa ka pousé-nou ba-y sé louwanj-la i mérité la (Rév. 4:11). Pi nou ké aprann konnèt Jéova, pi nou ké fè-y konfyans é pi nou ké ni konfyans adan òwganizasyon-la i mèt an plas la pou édé-nou.
3. a) Ka Satan ka éséyé fè pou fè-nou arété sèvi Jéova ? b) Ka ki ké édé-nou pou nou pa jen lagé Jéova é òwganizasyon a-y ? (Sòm 31:13, 14).
3 Onsèl biten Satan vé sé fè-nou arété sèvi Jéova, siwtou lèwvwè nou ka jwenn difikilté. Kijan i ka fè sa ? Piti-a-piti, i ka éséyé fè-nou arété fè Jéova konfyans é arété fè òwganizasyon a-y konfyans osi. Men nou pa oblijé tonbé adan zatrap-lasa. Siwvwè nou ni fwa an Jéova é kè konfyans an nou byen chouké adan-y nou pé’é jen lagé-y é nou pé’é jen lagé òwganizasyon a-y nonplis (li Sòm 31:13, 14).
4. Ka nou ké vwè adan awtik-lasa ?
4 Adan awtik-lasa, nou ké palé dè 3 sitiyasyon nou pé jwenn andéwò a lasanblé-la ki pé fè-nou arété fè Jéova konfyans é arété fè òwganizasyon a-y konfyans osi. Nou ké vwè kijan sé sitiyasyon-lasa pé fè-nou arété sèvi Jéova é ka nou pé fè pou nou pa pri adan zatrap a Satan.
LÈ NOU KA JWENN DIFIKILTÉ
5. Piti-a-piti, akòz dè sé éprèv-la nou ka jwenn la, nou pé arété fè Jéova konfyans é nou pé arété fè òwganizasyon a-y konfyans osi. Kijansa ?
5 Dépawfwa, nou ka jwenn difikilté. Pa ègzanp, fanmi an nou vé anpéché-nou sèvi Jéova, oben nou ka pèd travay an nou. Piti-a-piti, sé éprèv-lasa té’é pé fè-nou pèd konfyans adan òwganizasyon a Jéova é fè-nou arété sèvi Jéova. Kijansa ? Lèwvwè sa ka fè on bon moman nou ka jwenn difikilté, sa pé dékourajé-nou bon dékourajé la menm. Satan ka pwofité dè sa é i ka chèché a fè-nou kwè kè Jéova pa enmé-nou. I vé nou mèt an tèt an nou kè si nou ka soufè, sé akòz dè Jéova oben akòz dè òwganizasyon a-y. Sé konsa i pran sèwten Izraélit ki té an Éjipt adan zatrap a-y. Yo té èsklav an Éjipt é odépa yo té sèten kè Jéova té chwazi Moyiz é Aaron pou woté-yo anba jouk a sé Éjipsyen-la (Ègz. 4:29-31). Men plita, lè Faraon mèt sa pi rèd asi yo, yo voyé labou asi Moyiz é Aaron. Yo di konsa : « Akòz dè zòt Faraon é sèwvitè a-y hay-nou, é zò mèt on épé an men a yo pou yo tchouyé-nou » (Ègz. 5:19-21). Yo akizé sèwvité fidèl a Bondyé. A pa ti tris sa tris ! Si sa ja ka fè on moman kè ou anba éprèv, ka ou pé fè pou ou kontinyé fè Jéova é òwganizasyon a-y konfyans a san pou san ?
6. Lè fò-nou andiré éprèv nou ka jwenn, kijan ègzanp a Abakik pé édé-nou ? (Abakik 3:17-19).
6 Wouvè tchè a-w ba Jéova lè ou ka palé ba-y, mandé-y soutyenn-vou é fè tousa ki fo pou i pé sa soutyenn-vou. Pwofèt Abakik té ka jwenn onlo éprèv. I ka sanm sa i té ka mandé-y : « Ès Jéova ka enkyèté-y pou mwen ? » Alò i priyé Jéova é i wouvè tchè a-y ba-y. Mi sa i di Jéova : « Jéova, konmen tan ankò fò an ké kriyé anmwé pou-w pé tann-mwen ? […] Poukwa ou ka lésé yonn maché asi lòt konsa ? » (Abak. 1:2, 3). Lè Abakik priyé, i té sensè é Jéova réponn a priyè a sèwvitè a-y ki té fidèl (Abak. 2:2, 3). Lèwvwè i pran tan médité asi jan Jéova ja sové pèp a-y, sa fè-y ni tchè-kontan kon avan. I té sèten osi kè Jéova té ka enkyété-y pou-y é kè Jéova té’é soutyenn-li kèlkèswa éprèv-la i té’é jwenn la (li Abakik 3:17-19). Ka sa ka aprann-nou ? Lèwvwè ou ka jwenn éprèv, fò ou priyé Jéova é fò ou wouvè tchè a-w ba-y pou di-y tousa ou ka rèsanti. Aprésa, fò ou mandé-y soutyenn-vou é fò ou fè tousa ki fo pou i pé sa soutyenn-vou. Ou pé sèten kè i ké ba-w fòs-la ou bizwen la pou ou pé sa andiré. Lè voumenm a-w ké rann-vou kont kè Jéova ka soutyenn-vou, fwa a-w ké pi solid é ou ké fè Jéova konfyans plis ankò.
7. Ni sèwten moun an fanmi a Shirley ki té vé fè-y konprann on biten. Ki biten ésa é ka ki édé-y pou i kontinyé fè Jéova konfyans ?
7 Fè dé biten ki ka édé-w rété bon bon zanmi èvè Jéova. Sé sa ki édé on sè, non a-y sé Shirley b. I ka viv an Papwazi-Nouvèl-Giné é i rivé andiré éprèv i té ka jwenn. Fanmi a-y té maléré é dépawfwa yo té ni dimal a ni on dèkwa. On moun an fanmi a-y té bizwen fè-y arété fè Jéova konfyans. Mi sa moun-la di-y : « Ou di kè lèspri sen a Bondyé ka édé-zòt, men ka i ka fè pou zòt menm ? Fanmi a-w toujou maléré. Ou toujou ka préché men sé tan a-w ou ka pèd ! » Apré sa rivé, mi sa Shirley rèkonnèt : « Lèwvwè sa fèt, an fin pa mandé-mwen : “Ès Bondyé ka sousyé-y dè nou vréman ?” Alò, an désidé priyé Jéova tousuit é di-y tousa an té ni asi tchè an mwen. Anplisdisa, an kontinyé li Labib é piblikasyon an nou é an kontinyé préché é ay an réinyon. » Tousuit apré, i rann-li kont kè Jéova ka okipé dè fanmi a-y. Yo ponyonn pa té ka mò-fen é yo té ni tchè-kontan. Mi sa i di ankò : « Pou mwen, Jéova réponn a priyè an mwen » (1 Tim. 6:6-8). Alò si vou osi, ou ka fè tousa ou pé pou rété bon bon zanmi èvè Jéova, ou pé ké lésé pon éprèv é ou pé ké lésé pon dout nonplis fè-w arété sèvi Jéova.
LÈWVWÈ YO KA PÈWSÉKITÉ SÈWTEN FRÈ KI NI RÈSPONSABILITÉ ADAN ÒWGANIZASYON A JÉOVA
8. Ka ki pé rivé sèwten frè ki ni rèsponsabilité adan òwganizasyon a Jéova ?
8 Délè lenmi an nou ka sèvi èvè latélé, laradio oben Entèwnèt pou fè onlo manti monté é désann asi do a frè ki ni rèsponsabilité adan òwganisation a Jéova. É yo pé di sèwten biten osi pou mèt dout an tèt an nou parapòt a sé frè-lasa (Sòm 31:13). Yo jous ka arété sèwten adan yo é yo ka mèt-yo douvan tribinal. O 1é syèk dé biten konsa rivé osi. Pa ègzanp, yo manti asi lapòt Pòl é aprésa yo arété-y. Men kijan sé krétyen-la réyaji lèwvwè sa rivé ?
9. Lèwvwè lapòt Pòl té lajòl, kijan sèwten krétyen aji èvè-y ?
9 Ni sèwten krétyen ki arété soutyenn Pòl lè i té lajòl a Wòm (2 Tim. 1:8, 15). Men poukwa yo aji konsa ? Pétèt ké konm moun té ka di kè Pòl sé té on kriminèl, yo té wont (2 Tim. 2:8, 9). Oben pétèt kè yo té pè kè yo pèwsékité-yo. Kèlkanswa, ou ka imajiné sa lapòt Pòl dwèt rèsanti lè sa rivé ! I té ja andiré onlo éprèv é i ta ja riské vi a-y pou sé krétyen-lasa (Akt 20:18-21 ; 2 Kor. 1:8). Sé a moman-lasa Pòl té bizwen kè sé krétyen-lasa té soutyenn-li men yo lagé-y ! Nou, nou vé pa sanm sé frè é sè-lasa menm menm menm. Lèwvwè yo ka pèwsékité sé frè-la ki ni rèsponsabilité adan lasanblé-la, ka pou nou pa jen oubliyé ?
10. Ki biten pou nou sonjé lè nou ka vwè kè yo ka pèwsékité frè ki ni rèsponsabilité adan lasanblé-la, é poukwa fò-nou sonjé sa ?
10 Sonjé poukwa yo ka pèwsékité-nou é kimoun ki dèyè do a sa. Mi sa 2 Timoté 3:12 ka èspliké : « Tout moun ki vlé montré an vi a yo kè yo enmé Bondyé é kè yo vlé vin disip a Jézi ké jwenn pèwsékisyon ». Sé pousa lèwvwè nou ka vwè jan Satan dèyè do a sé frè-la ki ni rèsponsabilité la, sa pa ka siwprann-nou. Onsèl biten ki an tèt a-y, sé fè-yo lagé Jéova é i ka fè sa pou fè-nou pè osi (1 Pyè 5:8).
Toupannan Pòl té lajòl, Onézifò soutyenn-li èvè onlo kouraj. Menmjan-la osi, jòdijou, frè é sè an nou ka soutyenn frè é sè a yo ki lajòl kon nou ka vwè-y asi sa yo rèprézanté asi imaj-la (gadé sé paragraf 11 é 12 la).
11. Ka ègzanp a Onézifò ka aprann-nou ? (2 Timoté 1:16-18).
11 Kontinyé soutyenn frè é sè a-w é montré-yo kè ou sé on zanmi fidèl (li 2 Timoté 1:16-18). Lè lapòt Pòl té lajòl, ni sèwten krétyen ki lagé-y, men a pa sa Onézifò fè. Li ‘i pa té hont akòz dè sé chenn-la i té ni la’. I té ka chèché Pòl toupatou é lèwvwè i touvé-y, i fè tousa i té pé pou ba-y sa i té bizwen. Lè i fè sa, i riské vi a-y pou Pòl. Ka sa ka aprann-nou ? Sa pé rivé kè nou pè lézom men fò pa nou lésé sa pran lanmen asi nou. Fò pa sa anpéché-nou soutyenn frè é sè an nou lè yo ka jwenn pèwsékisyon. Alò, an-nou fè tousa nou pé pou édé frè é sè an nou (Pwov. 17:17). Fò nou montré-yo kè nou enmé-yo é kè nou ka soutyenn-yo pas yo bizwen sa.
12. Ka frè é sè an nou ki an Risi ka aprann-nou ?
12 Sonjé kijan frè é sè an nou ki an Risi ka édé frè é sè a yo ki lajòl. Lèwvwè yo ka mèt sé frè é sè la douvan on tribinal, yo ka vin an tribinal-la pou soutyenn-yo. Ka sa ka aprann-nou ? Lèwvwè yo ka manti asi on frè ki ni rèsponsabilité, kè yo ka arété-y oben kè yo ka pèwsékité-y, fò pa ou pè. Okontrè, priyé pou-y, pran swen a fanmi a-y é gadé pou vwè ka ou pé fè pou-w pé sa soutyenn-li (Akt 12:5 ; 2 Kor. 1:10, 11).
LÈWVWÈ YO KA MALPALÉ-NOU
13. Lèwvwè yo ka malpalé-nou, sa pé fè-nou arété fè Jéova é òwganizasyon a-y konfyans. Kijansa ?
13 Dépawfwa fanmi an nou ki pa Témwen, kolèg-travay an nou oben kamarad-lékòl an nou ka malpalé-nou pas nou ka préché oben pas nou ka suiv sé lwa-la Jéova ka ban-nou la (1 Pyè 4:4). Mi sa sèwten moun ka di-nou : « An byen enmé jan a-w men rèlijyon a-w la, sa sé ondòt zafè. An ka touvé kè i two rèd é kè i pasé dimod. » Ni dòt moun aprézan ki pa ka konprann jan nou ka aji èvè moun ki èskominyé é délè, mi sa yo ka di-nou : « É daprè-w ou enmé pwochen a-w ! » Léwvwè yo ka di-nou dé biten konsa, sa pé mèt dout an tèt an nou é nou pé jous rivé a mandé-nou : « Ès Jéova pa’a mandé-mwen fè twòp biten ? Lè òwganizasyon a Jéova ka ban-nou on dirèksyon, ès sé frè-la pa two karé adan sa yo ka mandé-nou fè la ? » Si sa ka rivé kè ou pozé-w sé kèsyon-lasa, ka ou pé fè pou-w rété bon bon zanmi èvè Jéova é pou-w toujou fè òwganizasyon a-y konfyans ?
Dé moun ki té swadizan zanmi a Jòb ba-y déotwa manti é yo mèt-yo ka kritiké-y. Men i pa kouté-yo é i té byen désidé a rété fidèl a Jéova a san pou san (gadé paragraf 14 la).
14. Lèwvwè yo ka malpalé-nou paskè nou ka rèspèkté prensip a Jéova, kijan pou nou réyaji ? (Sòm 119:50-52).
14 Fò ou byen désidé a rèspèkté prensip a Jéova. Jòb sé té on moun ki té ka rèspèkté prensip a Jéova é i té sav byen kè sé Jéova tousèl ki ni dwa di sa ki byen é sa ki mal. Menmsi ni dé moun ki té ka kritiké-y pou sa, i pa té ka chanjé fizi a-y zépòl. Ni on boug ki té zanmi èvè Jòb swadizan ki éséyé fè-y mèt an tèt a-y kè menmsi i té ka fè sa ki byen, sa pa té ni pon enpòwtans pou Jéova (Jòb 4:17, 18 ; 22:3). Men Jòb ba sé manti-lasa gran lè a yo. I té sav kè tout prensip a Jéova bon é i té byen désidé a mèt sé prensip-lasa an pratik adan vi a-y. I pa lésé sa sé moun-la té ka di détenn asi-y é i toujou rété fidèl a Jéova a san pou san (Jòb 27:5, 6). Ka sa ka aprann-nou ? Fè tousa ou pé pou-w pa lésé sa sé moun-la ka di mèt dout an tèt a-w é fè-w pansé kè prensip a Jéova pa bon. Okontrè, sonjé sa voumenm a-w ja viv. Sèten ou ja rann-vou kont kè dépi ou ka mèt prensip a Jéova an pratik, vi a-w vin pi bèl. É sèten a pa onsèl fwa ou ja vwè sa. Sé pousa, fò ou byen désidé a rété adan òwganisation a Jéova ki ka défann prensip ki ni onlo valè. A moman-lasa, kèlkèswa sa moun ké di, ou pé’é lésé sa anpéché-w sèvi Jéova (li Sòm 119:50-52).
15. Poukwa yo té ka malpalé Brijit ?
15 An-nou vwè ka ki rivé Brijit, on sè ki ka rété an End. Sèwten moun an fanmi a-y té ka malpalé-y pas i té Témwen a Jéova. Mari a-y pa té Témwen. Kèlkètan apré Brijit pran lèbatèm, mari-la vin pèd travay a-y. Alò, mari a-y désidé kè yo té k’ay viv èvè fi a yo aka fanmi a-y ki té ka rété adan ondòt vil. Men Brijit té kay jwenn dòt difikilté. Konm mari a-y pa té ka travay ankò, fò Brijit té travay aplentan pou ba fanmi a-y on dèkwa. Men difikilté dèyè potoko mannyé. Si i té vé ay réinyon, fò i té fè 350 kilomèt pou i té rivé adan sal-la ki té pi pré kaz a-y la. Anplisdisa, fanmi a mari a-y té kont li pas i té ka sèvi Jéova. Tèlman sitiyasyon-la té difisil, Brijit é fanmi a-y té oblijé déménajé ankò. Aprésa, mari a-y mò é i pa té ka atann-li a sa. É kèlkètan apré, sé on fi a-y ki mò akòz dè on kansè. I té ni enki 12 an. Men sa ki té pi rèd la menm, sé kè ni moun an fanmi a-y ki té ka di konsa kè si sa rivé-y sé té fòt a-y. Yo té ka di kè si i pa té Témwen a Jéova, tout sé biten-lasa pa té’é rivé-y. Men magrésa, i kontinyé fè Jéova é òwganizasyon a-y konfyans.
16. Kijan Jéova béni Brijit pas i mèt konfyans a-y adan-y é adan òwganizasyon a-y ?
16 Konm Brijit té ka rété lwen lwen lwen a lasanblé-la, ni on rèsponsab a siwkonskripsyon ki ankourajé-y préché alantou akaz a-y é i di-y fè sé réinyon-la akaz a-y. Odépa, i di an tchè a-y kè i pé’é rivé fè sa. Men i suiv konsèy a frè-la kanmenm. I koumansé préché alantou akaz a-y é i koumansé fè sé réinyon-la akaz a-y. Anplisdisa, i kontinyé édé fi a-y vin bon bon zanmi èvè Jéova é i té ka fè tousa i té pé pou yo té toujou fè étid familyal la. Ka sa pòté dè bon ba-y ? Ében i koumansé onlo étid é plizyè étidyan a-y pran lèbatèm. An 2005, i vin pyonyé pèwmanan. É nou pé di kè konfyans-la i té ni adan Jéova la é lèfètkè i rété fidèl a òwganizasyon a Jéova, sa menné bon biten ba-y. Sé fi a-y la ka sèvi Jéova é yo fidèl a-y. Anplisdisa, konnyéla la ni 2 lasanblé koté-la i ka rété la. Sè-la sèten kè Jéova ba-y fòs-la i té bizwen la pou rivé andiré tout sé difikilté-la i té ka jwenn la é pou i té andiré osi tousa fanmi a-y di asi do a-y.
RÉTÉ FIDÈL A JÉOVA É A ÒWGANIZASYON A-Y
17. Ka pou-w byen désidé a fè ?
17 Satan vé fè-nou kwè kè Jéova pa ka édé-nou lè nou anba éprèv é kè nou ka fè kò an nou vwè mizè lèwvwè nou ka soutyenn òwganizasyon a Jéova. I vé lafwous pran lanmen asi nou lè yo ka manti asi frè an nou ki ni rèsponsabilté adan òwganizasyon a Jéova oben lè yo ka pèwsékité-yo, oben lè yo ka mèt-yo lajòl. Anplisdisa, délè moun ki alantou an nou ka malpalé-nou. É Satan ka sèvi èvè sa pou fè-nou arété fè òwganizasyon a Jéova konfyans é pou nou arété ba prensip a Jéova valè. Men nou konnèt sé zatrap-la Satan ka itilizé la byen menm é nou pa ka lésé sa kouyonné-nou (2 Kor. 2:11). Satan ka simé onlo manti, alò, fò ou ba sé manti-lasa gran lè a yo, fò ou rété fidèl a Jéova é a òwganizasyon a-y. Wi, fò ou byen désidé a fè sé biten-lasa. É on biten pou ou pa jen oubliyé sé kè Jéova pé ké jen lagé-w (Sòm 28:7). Alò, fè tousa ou pé pou ayen pa fè-w arété sèvi Jéova ! (Wom. 8:35-39).
18. Ka nou ké vwè adan awtik-la ki ka vin la ?
18 Adan awtik-lasa, nou vwè kè nou pé jwenn difikilté andéwò a lasanblé-la. Men délè osi nou pé jwenn difikilté andidan lasanblé-la. É a moman-lasa pétèt kè nou ké ni dimal a fè Jéova é òwganizasyon a-y konfyans. Siwvwè nou ka touvé-nou adan on sitiyasyon konsa, kijan pou nou réyaji ? Sé sa nou ké vwè adan awtik-la ki ka vin la.
KANTIK 118 « Ban-nou plis fwa »
a Pou nou andiré pannan sé dènyé jou-la é pou nou rété fidèl a Jéova, fò-nou kontinyé fè Jéova é òwganizasyon a-y konfyans. Men Dyab-la ka éséyé sèvi èvè éprèv nou ka jwenn pou fè-nou pèd konfyans-lasa. Adan awtik-lasa, nou ké vwè 3 biten Satan ka fè pou anpéché-nou rété fidèl a Jéova é a òwganizasyon a-y. É nou ké vwè ka pou nou fè pou nou pa lésé-y pran lanmen asi nou.
b Yo chanjé sèwten non.