1. Ka Jéova pé fè pou i pé sa réyalizé pwojé a-y ?

JÉOVA pé divini tousa ki fo pou réyalizé pwojé a-y. Pa ègzanp, i ja ni lokazyon divini on Anségnan, on Moun ka bay rékonfò, on Prédikatè, é i ja divini plen dòt biten ankò (Iz. 48:17 ; 2 Kor. 7:6 ; Gal. 3:8). É poutan, i ka itilizé lézimen souvan pou fè volonté a-y (Mat. 24:14 ; 28:19, 20 ; 2 Kor. 1:3, 4). Anplis, Jéova pé ba nouchak sajès-la é fòs-la nou bizwen la pou nou divini sa ki fo pou i pé sa akonpli volonté a-y. Dapré sèwten èspésyalis a Labib, tout sé lidé-lasa ka rantré ègzaktèman adan sa non a Jéova vlé di.

2. a) Poukwa délè, nou pé ni lenprésyon kè Jéova pa ka itilizé-nou ? b) Ka nou ké vwè adan awtik-lasa ?

² Noutout vlé kè Jéova itilizé-nou pou i fè volonté a-y, men pétèt kè sèwten moun ka mandé-yo ès Jéova ka itilizé-yo vréman. Poukisa ? Paskè yo ni lenprésyon kè laj a yo, sitiyasyon a yo oben kapasité a yo ka anpéché-yo fè tousa yo té’é vlé fè pou Jéova. É anmenmditan, ni dòt ki ka èstimé kè yo ja ka fè asé, é yo ka konpranndèdi kè yo pa bizwen fè plis ki sa. Adan awtik-lasa, nou ké vwè kijan Jéova pé ba nenpòt adan nou sa ki nésésè pou réyalizé pwojé a-y. Aprésa, nou ké étidyé sèwten istwa adan Labib ki ka montré kijan Jéova ba sèwvitè a-y anvi-la é kapasité-la yo té bizwen la pou yo té aji. Pawmi yo té ni madanm é té ni  misyé. É pou fin, nou ké vwè ka nou pé fè pou nou lésé Jéova itilizé-nou.

3. Dapré sa nou ka touvé adan Filipyen 2:13, kijan Jéova pé ban-nou anvi aji ?

³ (Li Filipyen 2:13 *.) Jéova pé ban-nou anvi aji. Kijan i pé fè sa ? Vinvwè, nou ka rann-nou kont kè ni on moun an lasanblé-la ki bizwen èd oben nou ka konstaté ni on biten ki mérité fèt. Oben sé ansyen-la ka li on lèt a Komité santral la ki ka di kè dòt lasanblé bizwen on soutyen. A moman-lasa, pétèt nou ké mandé-nou : « Ka an pé fè pou édé ? » Oben sé on travay yo mandé-nou fè, men konm i on jan rèd a fè, nou pa sav si nou ké kapab fè-y byen konm i fo. Pétèt osi, nou sòti li déotwa vèwsé an Bib-la é nou ka mandé-nou : « Kijan an pé apliké pasaj-lasa pou édé lézòt ? » Jéova pé ké fòsé-nou fè ayen. Men lè i ka konstaté kè nou ka réfléchi pou vwè ka nou pé fè, i ka ban-nou anvi fè sa ki an lidé an nou.

4. Kijan Jéova pé ban-nou fòs pou aji ?

⁴ Jéova pé ban-nou fòs pou aji osi (Iz. 40:29). Kijan ? I pé itilizé lèspri sen a-y pou ban-nou plis kapasité ankò (Ègz. 35:30-35). Jéova pé sèvi èvè òwganizasyon a-y osi pou aprann-nou fè sèwten biten. Si ou pa sav kijan pou-w fè on biten, pa pè mandé èd. Pap’an nou ki an syèl-la sé on Dyé ki donan. Alò, fò pa nou pè mandé-y « puisans-la ki ka dépasé sa ki nòwmal » (2 Kor. 4:7 ; Lik 11:13). Adan Labib, nou ka touvé onlo ègzanp ki ka montré kijan Jéova fòwmé sèwten madanm é sèwten misyé pou yo té pé sa fè volonté a-y. É pousa, i ba-yo anvi-la é fòs-la yo té bizwen la pou yo té aji. Toupannan nou ka ègzaminé déotwa adan sé ègzanp-lasa, ou pé réfléchi asi jan Jéova té’é pé itilizé-w pou fè menm biten ki yo.

5. A ki moman é kijan Jéova itilizé Moyiz pou sové pèp a-y, é ka sa ka aprann-nou ?

⁵ An-nou pran ègzanp a Moyiz. Jéova fè-y divini on sovè pou sé Izraélit-la. Men a ki moman Jéova itilizé-y ? Ou ka di sé lè Moyiz santi-y kapab, apré « yo enstwi-y adan tout sajès a sé Éjipsyen-la » ? (Akt 7:22-25). Awa ! Jéova édé Moyiz divini on nonm ki ni imilité é ki dous. É sé yenki aprésa, i itilizé-y (Akt 7:30, 34-36). Jéova ba Moyiz kouraj pou i té palé ba Faraon, pli gran chèf a Léjipt (Ègz. 9:13-19). Lè nou ka vwè kijan Jéova itilizé Moyiz é a ki moman, ka nou ka aprann ? Sa ka montré-nou kè Jéova ka itilizé moun ki ka fè éfò pou imité kalité a-y é moun ki ka konté asi-y pou yo ni fòs (Filip. 4:13).

6. Lè nou ka vwè jan Jéova itilizé Bawzilay pou édé wa David, ka sa ka aprann ?

⁶ Déotwa syèk apré, Jéova itilizé Bawzilay pou édé wa David toupannan David té ka mawon Absalon, gason a-y. David é pèp-la té ka ‘mò-fen, yo té las é yo té ka mò-swèf’. Bawzilay, té ja ni on bèl laj a moman-lasa. Men sa pa anpéché-y riské vi a-y èvè dòtmoun pou yo té ba David é pèp-la tousa yo té bizwen. Bawzilay pa mèt an lidé a-y kè Jéova pé’é jen itilizé-y ankò paskè i té ja ni on bèl laj. Okontrè, èvè onlo bonté, i sèvi èvè sa i té ni pou édé sèwvitè a Bondyé ki té an difikilté (2 Sam. 17:27-29). Ka sa ka aprann-nou ? Kèlkanswa laj an nou, Jéova pé  itilizé-nou pou édé dòt frè é sè ki pa ni on dèkwa pou viv, ki yo ka rété toupré nou, ki yo ka rété adan dòt péyi (Pwov. 3:27, 28 ; 19:17). Menmsi nou pé pa édé-yo dirèktèman, pétèt nou té’é pé fè ofrann pou soutyenn tout aktivité òwganizasyon an nou ka fè toupatou asi latè. Konsa, lè sa ké nésésè, ké ni on lajan séré la pou édé lézòt kèlkèswa koté-la yo ka rété la (2 Kor. 8:14, 15 ; 9:11).

7. Kijan Jéova itilizé Siméon, é poukwa sa ka ban-nou kouraj ?

⁷ Siméon sé té on nomn fidèl ki té ka rété Jérizalèm. I té ja ni on bèl laj lè Jéova pwomèt-li kè i pa té’é mò avan i vwè Mési-la. Pwomès-lasa dwèt ba Siméon kouraj toubònman pas ni lontan i té ka atann Mési-la. Jéova rékonpansé-y pou fwa a-y é andirans a-y. On jou, « lèspri sen pousé-y », rantré an tanp-la. Lè i rivé, i vwè Jézi bébé, é Jéova itilizé Siméon pou té bay on pwofési anrapò èvè timoun-lasa ki té ké vin Mési-la (Lik 2:25-35). I ka sanm sa Siméon mò avan Jézi koumansé préché asi latè, men i té kontan davwa Jéova ba-y lonnè-lasa. É bénédisyon dèyè poko mannyé ! Adan mond nouvo la, nomn fidèl-lasa ké pé vwè tout bénédisyon fanmi ki asi latè ké risivwè grasa wayòm a Jézi (Jén. 22:18). Kèlkanswa jan Jéova ka itilizé-nou adan sèwvis a-y, nou osi, nou pé ni rèkonésans pou sa.

8. Kijan Jéova pé itilizé-nou kon i itilizé Bawnabé ?

⁸ O prèmyé syèk, té ni on nonm ki té enmé pawtajé é non a-y sé té Jozèf. I fè ansòt pou i té toujou a dispozisyon a Jéova (Akt 4:36, 37). I ka sanmn i té enmé konsolé lézòt, kifè sé apòt-la kriyé-y Bawnabé, ki vlé di « gason a konsolasyon ». Pa ègzanp, apré Pòl vin krétyen, onlo frè é sè té pè vin owa-y paskè yo té sav i té ja pèwsékité moun ki té ka kwè adan Jézi. Men Bawnabé ba Pòl rékonfò é i édé-y èvè onlo bonté. Kifè, Pòl dwèt té kontan toubònman kè Bawnabé té janti èvè-y (Akt 9:21, 26-28). Kèktan apré, ansyen a Jérizalèm té vlé ankourajé sé frè é sè la ki té ka rété jous a Antyòch an Siri. Kimoun yo voyé ? Bawnabé ! Yo chwazi bon moun-la. Labib ka di-nou kè Bawnabé « koumansé ankourajé-yotout pou yo té byen désidé a kontinyé sèvi Ségnè-la èvè tout tchè a-yo » (Akt 11:22-24). Menmjan-la, jòdila, Jéova pé édé-nou pou konsolé frè é sè an nou. Pa ègzanp, i pé itilizé-nou pou konsolé frè é sè an nou ki pèd on moun yo té énmé. Si ni on moun ki malad ou ki dékourajé, i pé ban-nou anvi ay vwè-y oben téléfoné-y pou di-y dé ti mo janti pou ankourajé-y. Ès ou ké lésé Jéova itilizé-w kon i itilizé Bawnabé ? (1 Tés. 5:14).

9. Kijan Jéova édé on frè non a-y sé Vasily a divini on bon bèwjé èspirityèl, é ka sa ka aprann-nou ?

⁹ Jéova édé on frè non a-y sé Vasily pou i té pé divini on bon bèwjé èspirityèl. Vasily vin ansyen a 26 an. Pou-y, i pa té ni asé èkspéryans pou édé frè é sè a-y, siwtou séla ki té ka travèsé dé moman difisil. Men ni déotwa ansyen ki ni èkspéryans ki édé-y onlo. É ni on lékòl ki fèt pou sé ansyen-la ki ba-y on bèl fòwmasyon osi. Vasily fè onlo éfò pou pwogrésé. Pa ègzanp, i fè on lis a déotwa ti òbjèktif tou senp kè i té’é vlé atenn. Chakfwa i té ka atenn yonn adan yo, sa té ka ba-y plis konfyans. Aprézan, mi sa i ka di : « Sa ki té ka fè mwen pè avan, sé sa ki ka ban-mwen onlo jwa alè. Lè Jéova ka édé-mwen touvé bon vèwsé-la pou ba on frè oben on sè a lasanblé-la rékonfò, a pa ti kontan an kontan. » Léfrè, si zò  fè kon Vasily, é si zò ka fè tousa ki fo pou Jéova itilizé-zòt, i ké ba-zòt kapasité pou zò pé sa fè plis biten ankò adan lasanblé-la.

10. Ka Abigayil fè, é ka ègzanp a-y ka aprann-vou ?

¹⁰ Wa Sayil té bizwen mèt men si David é si sé nonm-la ki té ka maché èvè-y la. Kifè, yo té bizwen èd. Alò, sé nonm-la ki té èvè David la mandé Nabal tibwen manjé. Sé té on Izraélit ki té rich. Pou yo, sa té toutafè nòwmal dè mandé Nabal manjé, piskè yo té ja ni lokazyon pwotéjé bèt a-y an dézè-la. Men Nabal té égoyis. I rèfizé ba-yo sa yo mandé. Alò, David fè kòlè, é i té jous vlé tchouyé Nabal é tout sé nonm-la ki té ka travay ba-y la (1 Sam. 25:3-13, 22). Men Nabal té ni on bèl ti madanm non a-y sé té Abigayil. É kon i té bèl, konsa i té ni bon jijman osi. Èvè onlo kouraj, i tonbé an pyé a David é i sipliyé-y pou i pa vanjé-y é pou i pa tchouyé Nabal. É èvè onlo jantiyès, i di David lésé sa an men a Jéova. Abigayil aji èvè onlo imilité é èvè onlo sajès é sa touché tchè a David. I rann-li kont kè sé Jéova ki té voyé Abigayil (1 Sam. 25:23-28, 32-34). Abigayil té ja kiltivé dé kalité ki pèwmèt Jéova itilizé-y. Menmjan-la, si on krétyèn ni bon jijman é si i ka palé jantiman, Jéova pé itilizé-y pou i fè fanmi a-y dibyen é moun ki adan lasanblé-la osi (Pwov. 24:3 ; Tit 2:3-5).

11. Ka sé fi a Shaloum la fè, é kimoun ki ka imité-yo jòdijou ?

¹¹ Plizyè syèk apré, Jéova itilizé moun pou réparé miray a Jérizalèm. É pawmi sé moun-lasa, té ni sé fi a Shaloum la (Néém. 2:20 ; 3:12). Magré papa yo sé té on prens, yo té paré a fè travay-lasa menmsi i té rèd é danjéré (Néém. 4:15-18). A Tekoa, té ni dé nonm enpòwtan ki ‘té ka santi yo two gran jan dè moun pou yo té pawtisipé’ adan travay-la èvè lézòt. Sèlman, sé fiy a Shaloum la pa té kon yo (Néém. 3:5). Ou ka imajiné jan sé fi a Shaloum la dwèt té kontan lèwvwè réparasyon a miray-la fin an 52 jou tousèl ! (Néém. 6:15). Jòdijou, ni dé sè ki volontè ki ka pawtisipé adan on sèwvis èspésyal pou travay ba Jéova. Pa ègzanp, yo ka konstwi oben yo ka pran swen a sé batiman-la ki fèt pou adoré Jéova. Lè yo ka fè sa, a pa ti kontan yo ka kontan ! Sé sè-lasa ni èkspéryans, yo ka pòté mannèv, é yo fidèl. Sé dé sè konsa nou bizwen pou sé pwojé-la réyisi !

12. Kijan Jéova pé itilizé-w menmjan i itilizé Tabita ?

¹² Jéova ba Tabita anvi ‘fè onlo bèl biten’ é i pousé-y ‘vin donan’ èspésyalman èvè sé vèv-la (Akt 9:36). Tèlman Tabita té donan é tèlman i té janti, onlo moun pléré lè i mò. Men yo té kontan toubònman lè lapòt Pyè wouba-y lavi ! (Akt 9:39-41). Ka ègzanp a Tabita ka aprann-vou ? Ki ou jenn, ki ou ja ni on bèl laj, ki ou sé on madanm ki ou sé on misyé, vou osi ou pé fè dé biten itil pou édé frè é sè a-w (Ébr. 13:16).

13. Kijan Jéova itilizé on sè ki té timid non a-y sé Ruth, é ka sè-lasa woutyenn ?

¹³ On sè timid non a-y sé Ruth té vlé vin misyonè. Lè i té jenntifi, i té ka kouri ogalo pou ay distribiyé trak dè kaz-an-kaz. Mi sa i ka di : « An té tèlman enmé aktivité-lasa ! ». Men vin douvan pòt a moun pou palé èvè yo é pou fè-yo konnèt mésaj a Wayòm-la, sé té on konba pou-y. Magré i té timid, Ruth pran sèwvis pyonyé pèwmanan a 18 an. An 1946, i fè  lékòl a Galaad, é aprésa i sèvi a Away é o Japon. Jéova itilizé-y on mannyè èstraòwdinè pou préché bon nouvèl-la adan sé péyi-lasa. Apré i préché pannan 80 lanné, mi sa Ruth ka woutyenn : « Jéova toujou soutyenn-mwen. I édé-mwen vin about a timidité an mwen. An vréman sèten kè i pé itilizé nenpòt ki moun dépi moun-lasa ka fè-y konfyans. »

14. Dapré sa Kolosyen 1:29 ka di, ka fò-nou fè, si nou vlé Jéova itilizé-nou ?

¹⁴ Dépi nanni-nannan, Jéova itilizé sèwvitè a-y onlo mannyè diféran. É vou, ka i ké fè-w divini ? Sa ka dépann onlo dè éfò ou paré a fè (li Kolosyen 1:29). Si ou paré pou lésé Jéova itilizé-w, i pé fè-w divini on prédikatè ki ka pòté bon mannèv, on zouti-filé lè ou ka anségné, on moun ki sav konsolé lézòt. I pé fè-w divini osi on zouti-filé adan travay-la ou ka fè la, on zanmi ki toujou la pou lézòt, oben tousa i bizwen pou fè volonté a-y réyalizé.

15. Dapré sa 1 Timoté 4:12, 15 ka di, anrapò èvè ki biten sé jennfrè-la dwèt sipliyé Jéova jòdijou ?

¹⁵ É si ou sé on jennfrè ki toupré vin on granmoun, ka ou pé fè ? Nou bizwen onlo frè ki plen énèwji ki té’é byen vlé ni plis rèsponsabilité pou vin sèwvitè a lasanblé. Adan onlo lasanblé, ni plis ansyen ki sèwvitè. Jennfrè, ès ou té’é paré a fè plis adan lasanblé a-w ? Délè, mi sa sèwten frè ka di : « An kontan an ka sèvi Jéova. An ja batizé é an ja ka préché, an pa bizwen fè plis ki sa. » Si sé sa ou ka rèsanti, sipliyé Jéova pou i ba-w anvi fè sa ki fo pou vin on sèwvitè a lasanblé. Sipliyé-y osi pou i ba-w fòs pou ou pé sa fè tousa ou pé pou sèvi-y èvè lanmou (Ékl. 12:1). Nou bizwen-w ! (li 1 Timoté 4:12, 15).

16. Ka fò-nou mandé Jéova, é poukwa ?

¹⁶ Jéova pé fè-w divini tousa i bizwen pou akonpli volonté a-y. Alò, mandé-y pou i ba-w anvi fè volonté a-y. Aprésa, mandé-y pou i ba-w fòs pou fè tousa ou pé pou sèvi-y. Ki ou jenn, ki ou ja ni on bèl laj, itilizé tan a-w, fòs a-w, sa ou ni, é kapasité a-w pou onoré Jéova (Ékl. 9:10). Lè lokazyon ka prézanté pou fè plis ba Jéova, pa lésé lapè anpéché-w fè tousa ou pé pou sèvi-y. É menmsi ou ni lenprésyon kè ou pa kapab, pa lésé sa frenné-w nonplis. Lè nou ka fè tousa nou pé pou sèvi Pap’an nou, nou ka ba-y glwa-la i mérité la, é sé on privilèj èstraòwdinè toubònman !