1. Poukwa Jéova mérité kè nou adoré yenki li ?

JÉOVA mérité kè nou adoré yenki li, paskè sé li ki sé Kréyatè an nou é paskè sé li ki ban-nou lavi (Rév. 4:11). Men ni on danjé. Menmsi nou enmé Jéova é nou ka rèspèkté-y, sèwten biten pé rivé a vin tèlman enpòwtan an vi an nou kè yo ka anpéché-nou enmé Jéova é adoré-y a san pou san kon i mérité. Fò-nou konprann kijan sa pé rivé. Pou koumansé, an-nou vwè ka savédi adoré yenki Jéova tousèl.

2. Dapré sa ki maké adan Ègzòd 34:14, si sé Jéova tousèl nou ka adoré, ka nou ké fè ?

² Lè Labib ka di kè sé Jéova pou nou adoré, savédi kè fò-nou enmé-y fò toubònman. Si nou enmé Jéova a san pou san, sé li tousèl nou ké adoré. Nou pé ké pèwmèt ponmoun ni pon biten pran plas a-y an tchè an nou (li Ègzòd 34:14).

3. Ka ki ka pousé-nou adoré Jéova ?

³ Nou pa ka enn adoré Jéova san réfléchi. Kijan sa ? Nou ka adoré-y grasa sa nou aprann asi-y. Nou annadorasyon douvan bèl kalité a-y. Nou konnèt ka i enmé é ka i pa enmé é nou ka vwè sé biten-lasa menmjan ki-y. Nou ka konprann ki pwojé i ni pou limanité é nou ka soutyenn pwojé-lasa. I ka pèwmèt-nou vin zanmi èvè-y, é sé on lonnè pou nou (Sòm 25:14). Chak tibiten nou ka aprann asi Kréyatè an nou ka pèwmèt-nou vin pi pré-y ankò (Jak 4:8).

4. a) Ka Dyab-la ka itilizé pou nou pa enmé Jéova a san pou san ? b) Ka nou ké vwè adan awtik-lasa ?

 ⁴ Dyab-la ka dominé mond-la. I ka sèvi èvè-y pou fè-nou ba sèwten biten nou enmé plis valè an vi an nou. É i ka fè sa ki fo pou sa pé pi rèd ban nou dè lité kont féblès an nou (Éféz. 2:1-3 ; 1 Jan 5:19). I bizwen fè-nou enmé dòt biten anmenmtan ki Jéova pou nou pa enmé Jéova a san pou san. An-nou ègzaminé 2 mannyè i ka fè sa. On prèmyé biten i ka fè, sé kè i ka pousé-nou kouri dèyè lajan. É dézyèm biten-la, sé kè i ka pousé-nou a fè dé mové chwa anrapò èvè anmizman an nou.

5. Poukwa fò-nou fè atansyon pou nou pa vin enmé lajan ?

⁵ Natirèlman, nou anvi ni asé manjé pou nou manjé, lenj korèk pou nou abiyé, é on koté ki byen pou nou rété. Men fò-nou fè atansyon pou nou pa vin enmé lajan. Jòdijou, ni onlo moun adan mond a Satan ki « enmé lajan » é yo enmé sa lajan-la ka pèwmèt-yo achté (2 Tim. 3:2). Jézi té sav kè sa té’é rèd pou disip a-y dè anpéché lanmou-lasa pran rasin andidan a yo. Mi sa i di : « Ponmoun pé pa travay kon èsklav pou dé mèt : swa i ké hay yonn é i ké enmé lòt-la, oben swa i ké fidèl a yonn é i ké méprizé lòt-la. Zò pé pa travay kon èsklav pou Bondyé é pou Lajan » (Mat. 6:24). Lè on moun ka adoré Jéova, é anmenmtan i ka pasé onpakèt tan é i ka fè onpakèt éfò pou vin pli rich, sé konsi adan on sans, i ka éséyé sèvi 2 mèt. A moman-lasa, i pa enmé Jéova a san pou san.

6. Lè nou ka gadé sa Jézi di lasanblé a Laodisé, ka sa ka aprann-nou ?

⁶ An fen a prèmyé syèk-la, sèwten krétyen a lasanblé Laodisé té ka blagé é  yo té ka di : « An rich é an ranmasé onlo richès. An pa bizwen ayen. » Men pou Jéova é Jézi, yo té ‘anmizè, yo té ka fè lapenn a vwè, yo té pòv, avèg é toutouni’. A pa paskè yo té rich Jézi ba-yo konsèy men sé pas yo té enmé larichès é lanmou-lasa té ka détwi lanmityé a yo èvè Jéova (Rév. 3:14-17). Si nou ka santi kè nou koumansé enmé lajan, fò-nou pòté mannèv pou chanjé mannyè nou ka pansé (1 Tim. 6:7, 8). Si nou pa fè sa, nou pé’é enmé Jéova a san pou san é i pé’é aksèpté adorasyon-la nou ka ba-y la. I ‘vlé nou adoré yenki li tousèl’ (Dét. 4:24). Men kijan lajan té’é pé vin ni twòp enpòwtans adan vi an nou ?

7-9. Ka ègzanp a on ansyen non a-y sé David ka aprann-nou ?

⁷ An-nou vwè ègzanp a on ansyen non a-y sé David ki ka viv Ozétazini. I ka èspliké kè i té ka travay rèd adan antrèpriz-la i té yé la é kè i té pé sakrifyé-y pou travay a-y. Kifè, yo ba-y plis rèsponsabilité adan antrèpriz-la, yo ògmanté pèy a-y é an péyi a-y yo rèkonnèt kè i té on mèt-a-mannyòk adan travay-la i té ka fè la. Mi sa David ka di : « An tan-lasa, an té ka konpranndèdi kè si an té ka réyisi konsa sé pas Jéova té ka béni-mwen. » Men ès sé vréman Jéova ki té dèyè do a sa ?

⁸ Piti-a-piti, David rann-li kont kè travay a-y té ka détwi lanmityé a-y èvè Jéova. Mi sa i ka di-nou : « Lè an té an réinyon é menm lè an té an prédikasyon, sé pwoblèm ki té ni an travay an mwen an té ka sonjé. An té ka gangné enpé lajan, men an té ka vin dèplizanpli istrésé, é mayé an mwen té ka pran plon adan sa. »

⁹ David réyalizé kè fò i té désidé ka pou i té fè pasé an prèmyé an vi a-y. I ka di :  « An té byen désidé a chanjé sitiyasyon an mwen. » David té vlé chanjé lè a travay a-y, alò i palé sa èvè patron a-y. Men finalman ka i rivé ? David pèd travay a-y ! Ka i fè ? Mi sa i ka di : « Lèlandèmen menm, an òwganizé-mwen pou an té pé pran sèwvis pyonyé an ranfò. » Pou yo té gangné sou a pen a yo, li é madanm a-y désidé fè mennaj ba moun. Rivé onlè, David koumansé sèwvis pyonyé pèwmanan é tibwen plita mandanm a-y vin jwenn-li adan sèwvis-lasa osi. Yo chwazi fè on travay kè onlo moun pa’a vlé fè. Men sa ki pi enpòwtan pou yo, a pa dè sav ki kalté travay yo ka fè. Menmsi sa yo ka touché konnyéla sé on ti ayen parapòt a sa yo té ka touché avan, chakmwa yo ni ègzaktèman sa yo bizwen pou péyé sa yo ni a péyé. Yo ka mèt Jéova an prèmyé adan vi a yo é yomenm a yo, yo ka vwè kijan Jéova ka pran swen a moun ki ka fè chwa-lasa (Mat. 6:31-33).

10. Ka nou pé fè pou pwotéjé tchè an nou ?

¹⁰ Ki nou ni lajan ki nou pa ni, fò-nou pwotéjé tchè an nou. Kijan nou pé fè sa ? Fò pa nou lésé lanmou pou lajan pran rasin an tchè an nou. É fò pa nou lésé travay an nou vin pi enpòwtan ki sèwvis an nou pou Jéova. Ka ou pé fè pou sav si ou an ka-lasa ? Ou pé pozé-w sé kèsyon-lasa : « Èskè sa ka rivé-mwen souvan dè sonjé travay an mwen pannan mwen an réinyon oben an prédikasyon ? Ès an toujou ka mandé-mwen si an ké ni asé lajan pou lé lanné ki ka vin ? Ès ni pwoblèm an mayé an mwen akòz dè lajan oben akòz dè byen matéryèl ? Ès an paré a fè on travay ki pa ni pon valè pou lézòt men ki ké pèwmèt-mwen pasé plis tan ka sèvi Jéova ? » (1 Tim. 6:9-12). Lè nou ka réfléchi asi sé kèsyon-lasa, fò-nou sonjé kè Jéova enmé-nou é kè i ka fè moun ki enmé-y fò bèl pwomès-lasa : « An pé’é jen kité-w, é an pé’é jen lagé-w. » Sé pousa lapòt Pòl maké : « Fò pa lanmou pou lajan dirijé mannyè zò ka viv » (Ébr. 13:5, 6).

11. Ki éfé bon déotwa anmizman pé ni si on moun ?

¹¹ Jéova vé nou pwofité dè lavi, é lè nou ka anmizé-nou, sa pé ban-nou tchè-kontan. Dayè, mi sa Pawòl a Bondyé ka di : « pli bèl biten on nonm pé fè sé manjé é bwè é sé pran plézi padavwa i travay rèd » (Ékl. 2:24). Men onlo anmizman nou ka touvé adan mond-la pé aji on vyé  jan asi nou. Sé anmizman-lasa ka pousé onlo moun aksèpté ou menm enmé sèwten biten kè Pawòl a Bondyé ka kondanné.

12. Dapré sa 1 Korentyen 10:21, 22 ka di, poukwa fò-nou fè atansyon lè nou ka chwazi anmizman an nou ?

¹² Sé Jéova tousèl nou vlé adoré. Donk, nou pé pa ka manjé asi « tab a Jéova » é asi « tab a sé démon-la » (li 1 Korentyen 10:21, 22). Pli souvan ki rarman, lè 2 moun ka manjé ansanm, sé kè yo zanmi. Si nou ka chwazi anmizman ki ni vyolans, ki anrapò èvè démon, ki ni sèks é ki ka pousé moun a ni mové lanvi é mové konpòwtasyon, an réyalité sé konsi nou ka manjé èvè lènmi a Bondyé é nou ka manjé manjé-la yo préparé la. Ki rézilta sa ké ba-y ? Non sèlman nou ké fè-nou dimal, men anplisdisa, nou ké mèt lanmityé an nou èvè Jéova andanjé osi.

13-14. Lè nou ka gadé sa Jak 1:14, 15 ka di, poukwa fò-nou fè atansyon a ki anmizman nou ka chwazi ? Bay on ègzanp.

¹³ Anmizman ka touvé-y kon on manjé. Poukwa nou pé di sa ? Lè nou kay manjé, nou pé chwazi sa nou kay mèt an bouch an nou. Men dépi nou valé manjé-la, nou pé pa chwazi kijan i ké aji asi nou. On bon manjé pé pèwmèt-nou ni on bon santé, men on manjé ki pa bon ké fè-nou mal. Nou pa oblijé vwè éfé-la tousuit, men sé plita nou ké vwè jan i ka aji asi nou.

¹⁴ Menmjan-la, lè nou ka chwazi anmizman an nou, nou pé chwazi sa nou ka mèt an lèspri an nou. Men apré, anmizman-la nou chwazi la ka aji asi jan nou ka pansé é asi sa nou ka rèsanti. Si nou chwazi on bon anmizman, sa ké fè-nou dibyen. Men si sé on mové anmizman osi, sa ké fè-nou mal (li Jak 1:14, 15). Nou pa oblijé vwè éfé-la tousuit, men asiré pa pétèt nou ké vwè sa apré. Sé pousa Labib ka fè-nou sonjé on biten : « Pa twonpé-zòt : ponmoun pé pa kouyonné Bondyé. Pas sa on moun ka simé, sé sa i ké rékòlté osi » (Gal. 6:7, 8). Sa enpòwtan toubònman kè nou rèfizé tout anmizman ki ni biten kè Jéova hay adan-y ! (Sòm 97:10).

15. Ki kado Jéova ban-nou pou nou pé sa ni tchè-kontan ?

¹⁵ Onlo moun adan pèp a Jéova enmé gadé JW Télédifizyon, chenn a télévizyon an nou ki asi entèwnèt. On sè non a-y sé Marilyn ka di : « JW Télédifizyon ka édé-mwen vin pi pozitif, é an pé gadé tout biten asi-y pas tousa ki asi-y ka fè-mwen dibyen. Lè an ka santi-mwen tousèl oben lè an dékourajé, an ka gadé on diskou oben on kilt matinal ki ka ankourajé-mwen. Grasa tousa, an ka santi-mwen pi pré Jéova é pi pré òwganizasyon a-y. JW Télédifizyon chanjé vi an mwen bout pou bout. » Sé on bèl kado Jéova fè-nou. Ès vou osi ou ka pwofité dè-y ? Asi JW Télédifizyon, ni on émisyon ki ka parèt chakmwa é anplisdisa ni onlo biten ou pé kouté, ni onlo vidéo ou pé gadé, é ni onlo chanson. Ou pé pwofité dè tout sé biten-lasa lè ou vlé.

16-17. Poukwa fò-nou aprann jéré tan nou ka pasé ka anmizé-nou, é ka ki pé édé-nou fè sa ?

¹⁶ Non sèlman fò-nou fè atansyon a ki kalté anmizman nou ka chwazi, men fò-nou véyé konmen tan nou ka pasé ka anmizé-nou. Si nou pa fè atansyon, nou ké touvé-nou ka pasé plis tan ka anmizé-nou ki ka sèvi Jéova. Onlo moun pa’a vwè kijan yo pé fè pou jéré tan yo ka pasé ka anmizé-yo. Abigail, on sè ki ni  18 an ka di : « Lè an ka gadé télé apré an sòti anba on gwo jouné, sa ka édé-mwen détann-mwen. Men si an pa fè atansyon, an pé touvé-mwen ka pasé onpakèt tan douvan télé-la. » On jennfrè non a-y sé Samuel ka di : « Délè, an ka gadé onpakèt ti vidéo asi entèwnèt yonn dèyè lòt. An ka koumansé pa gadé on piti, dé piti, é lèwgadé 3zè oben 4èdtan ka pran-mwen adan sé vidéo-la. Tan-la ka pasé é an pa menm ka rann-mwen kont. »

¹⁷ Kijan ou pé métrizé tan-la ou ka pasé ka anmizé-w la ? Prèmyé biten ou pé fè, sé gadé konmen tan ou ka pasé ka anmizé-w konnyéla. Pa ègzanp, pannan on simenn, maké asi on kalandriyé konmen lè ou ka pasé ka gadé télé, konmen lè ou ka rété si entèwnèt, oben ka joué jé asi tablèt a-w ou pòwtab a-w. Si ou ka santi kè ou ka pasé twòp tan ka fè sé biten-lasa, éséyé mèt on pwogram anplas. Adan pwogram-lasa, koumansé pa prévwa on tan pou sa ki pli enpòwtan é aprésa, prévwa on tan pou détann-vou. Anplisdisa, mandé Jéova édé-w suiv pwogram-lasa. Konsa, ou ké ni tout tan-la é tout fòs-la ou bizwen la pou fè étid pèwsonèl a-w, pou fè étid familyal a-w, pou ay an réinyon, é pou ay préché. Anplis, ou ké pi kontan lè ou ké ka anmizé-w pas ou sav ou fè Jéova pasé an prèmyé.

18-19. Kijan nou pé montré kè sé Jéova tousèl nou ka adoré ?

¹⁸ Apré lapòt Pyè palé dè fen a mond a Satan é dè mond nouvo la ki ka vin la, mi sa i di : « Zòt kè an byen enmé, piskè zò ka atann sé biten-lasa, fè tout posib a zòt pou kè anfinaldikont i touvé-zòt san pon tach, san défo é adan lapé » (2 Pyè 3:14). Lè nou ka kouté konsèy-lasa é kè nou ka fè tousa nou pé pou kontinyé viv é adoré Jéova jan i vlé, nou ka montré kè sé li tousèl nou ka adoré.

¹⁹ Satan é mond a-y ké kontinyé pousé-nou mèt dòt biten ki Jéova an prèmyé an vi an nou (Lik 4:13). Men magré tout éprèv nou ké sibi, nou pé ké lésé pon moun ni pon biten pran plas a Jéova an tchè an nou. Nou byen désidé a adoré yenki Jéova, kon i mérité.