ON ÈSPÉSYALIS a lamétéo ka pran tan suiv imaj a on rada. I ka vwè on gwo tanpèt ka vin èvè bon balan pou i fè bon déga on koté onpakèt moun ka rété. Sèl biten ki an lidé a-y, sé sékirité a sé moun-la ki ka rété la la. Donk i ka avèti-yo akontinyé avan i two ta.

Menmjan-la, jòdijou, Jéova ka avèti toutmoun ki ka rété asi latè pas ni on biten ki kon tanpèt ki ka vin. Tanpèt-lasa lontan pi danjéré ki tousa nou té’é pé tann palé adan lamétéo. Kijan Bondyé ka fè pou avèti lézimen ? É poukwa nou pé sèten kè i ka ba moun asé tan pou yo réyaji ? Pou nou touvé répons a sé kèsyon-lasa, an-nou pran tan gadé déotwa avèwtisman Jéova bay dan lèpasé.

Jijman a Bondyé ka touvé-yo kon tanpèt. An tan a Labib, Jéova ni lokazyon voyé plizyè « tanpèt » asi moun ki té ka rèfizé kouté-y. Men avan sa, i toujou té ka avèti-yo (Pwov. 10:25 ; Jér. 30:23). Chakfwa, i té ka avèti sé moun-la ki pa té ka obéyi la lontan alavans, é i té ka di-yo ka pou yo té fè pou yo fè volonté a-y (2 Wa 17:12-15 ; Néém. 9:29, 30). Pou ankourajé sé moun-la a fè chanjman ki nésésè, souvan Jéova té ka sèvi èvè sèwvitè fidèl a-y ki té si latè pou anonsé jijman a-y. Sé té osi pou fè-yo santi kè fò-yo té réyaji onfwa-onfwa (Amòs 3:7).

Noé sé yonn adan sé sèwvitè fidèl-lasa. Èvè onlo kouraj, Noé rété onpakèt lanné ka avèti moun ki té ka fè sa ki sal é moun ki té vyolan pou fè-yo sav kè on délij té ka vin. Toutlatè té’é kouvè èvè dlo (Jén. 6:9-13, 17). I pran tan èspliké-yo osi ka fò-yo té fè pou sové vi a yo. É tèlman i té ka préché, plita, yo di kè i sé on « nonm ki ka préché lajistis » (2 Pyè 2:5).

Magré tout éfò Noé fè, sé moun-la ki té ka viv avan Délij-la pa jen tchenn kont dè avèwtisman a Bondyé. Yo montré kè yo pa té ni fwa ditou. Rézilta : yo pèd vi a yo lè Délij-la « vin é i enn fè-yotout disparèt » (Mat. 24:39 ; Ébr. 11:7). Men lè zafè a yo vin mélé é kè yo té kay pran mò a yo, yo pa té pé di kè Jéova pa té avèti-yo.

Ni délè, Jéova té ka avèti sé moun-la jis avan jijman a-y rivé. Men magrésa, i toujou té ka fè ansòt pou sé moun-la i té ka avèti la té pé ni asé tan pou yo chanjé. Pa ègzanp, lè Jéova voyé sé 10 malè-la asi sé Éjipsyen-la, Jéova pran tan avèti-yo a chakfwa. An-nou pran ka a 7^èm malè-la : i voyé Moyiz èvè Aawon avèti Faraon é sèwvitè a-y kè on tanpèt lagrèl té ka vin é kè i té’é fè onpakèt déga toubònman. Tanpèt-la té kay koumansé lèlandèmen-la. Ou ka di Jéova ba sé moun-la asé tan pou yo té touvé on ti koté pou yo kaché é pou yo pa té pri adan sa ? Mi sa Labib ka di-nou : « Tout sèwvitè a Faraon ki pran pawòl a Jéova oséryé pòté mannèv pou yo té mèt sèwvitè a yo é zannimo a yo ansékirité. Men séla ki pa pran pawòl a Jéova oséryé kité sèwvitè a yo é zannimo a yo déwò » (Ègz. 9:18-21). Dapré sa nou ka vwè, Jéova té ja avèti-yo asé. Kifè, moun ki tchenn kont dè avèwtisman a Jéova pa soufè kon sélézòt-la.

Sé menm biten osi, Jéova té avèti Faraon é tout sèwvitè a-y avan 10^èm malè-la té rivé. Men sé Éjipsyen-la aji kon tèbè. Yo rèfizé kouté Jéova (Ègz. 4:22, 23). Anfinaldikont, tout prèmyé gason a yo mò douvan yo. Sa maléré papa ! (Ègz. 11:4-10 ; 12:29). Ès yo té’é ni tan kouté sé avèwtisman-lasa avan twota maré-yo ? Asirésèten ! Moyiz avèti sé Izraélit-la san pèd tan. I di-yo kè 10^èm malè-la té ka vin, é i fè-yo sav ka pou yo té fè pou sové vi a fanmi  a yo (Ègz. 12:21-28). Konmen moun ki fè sa Moyiz di ? I ka sanmsa té ni omwen twa milyon moun ki sové é ki kité Léjipt. Non sèlman pawmi yo té ni Izraélit, men té ni onpakèt étranjé é onpakèt Éjipsyen ki sové vi a yo osi (Ègz. 12:38 ; nòt).

Dapré sé ègzanp-la nou vwè la, Jéova toujou fè ansòt pou sé moun-la té ni asé tan pou yo té réyaji lè yo tann avèwtisman a-y (Dét. 32:4). Poukwa Bondyé té ka aji konsa ? Lapòt Pyè èspliké kè Jéova « vé pa ponmoun détwi, men i vé kè toutmoun rivé rèpanti-yo » (2 Pyè 3:9). Asirésèten, Jéova toujou té ka enkyété-y pou sé moun-la. I té vlé kè yo répanti-yo é kè yo fè chanjman ki té nésésè avan jijman a-y té ni tan rivé (Iz. 48:17, 18 ; Wom. 2:4).

Jòdla osi, Jéova ka avèti toutmoun toupatou si latè. Sa enpòwtan kè toutmoun réyaji onfwa-onfwa. Pannan i té si latè, Jézi avèti moun kè sistèm-la nou ka viv adan-y la ké disparèt pannan on « gwo tribilasyon » (Mat. 24:21). Anrapò èvè jijman-la ki ka vin la, Jézi bay on pwofési ki ka èspliké ègzaktèman ka disip a-y té ké vwè é ka yo té’é viv toupannan gwo tribilasyon-la té ké apwoché. Jézi palé dè sé gwo évènman-la ki ka fèt jòdila é kè noumenm nou ka vwè an dé zyé an nou (Mat. 24:3-12 ; Lik 21:10-13).

Annakò èvè pwofési-lasa, Jéova ka mandé chakmoun dè chwazi dominasyon a-y ki plen lanmou. I té ké vlé kè moun ki ka kouté-y ni on vi ki pli bèl dépi konnyéla, é kè plita yo risivwè onpakèt bénédisyon adan mond nouvo la, on mond ki ké plen jistis adan-y (2 Pyè 3:13). Jéova vlé édé moun ni lafwa adan pwomès a-y. Pousa, i ka fè-yo konnèt on mésaj ki pé sové vi a yo. Mésaj-lasa sé : « bon nouvèl a Wayòm-la ». Jézi té ja prédi kè yo té ké ‘préché mésaj-lasa toupatou asi latè, pou-y sèvi témwagnaj ba tout sé nasyon-la’ (Mat. 24:14). Moun ki ka adoré Bondyé kon i ka mandé ka fè moun konnèt mésaj a-y, é yo ka fè sa adan apépré 240 péyi. Sé Bondyé ki òwganizé-yo pou fè travay-lasa. I vlé kè on maksimòm dè moun tchenn kont dè avèwtisman a-y pou yo chapé lè tanpèt-la ki ka vin la ké rivé. Tanpèt-lasa sé ké jijman a Bondyé, on jijman ki jis (Sof. 1:14, 15 ; 2:2, 3).

Men kèsyon-la ki pli enpòwtan la, a pa dè sav si Jéova ka ba moun asé tan pou yo réyaji. On biten ki klè, sé kè i toujou ka avèti moun. Sa ki enpòwtan a sav sé : èskè sé moun-la ké tchenn kont dè avèwtisman a Bondyé pannan yo ni tan toujou ? Nou ka préché mésaj a Bondyé ; alò, an-nou kontinyé édé on maksimòm dè moun pou yo sové vi a yo lè sistèm-lasa ké bout.