1-2. a) Ki mésaj sé nasyon-la ké anonsé talè ? b) A ki kèsyon nou kay réponn ?

IMAJINÉ-W ! Sa ka fè lontan nou ka atann moman-lasa é mi i rivé : sé nasyon-la sòti anonsé « Lapé é lasékirité ! ». A moman-lasa, pétèt yo ké fyèw dè di kè limanité po’o jen viv ansékirité konsa. Sé nasyon-la ké vlé fè-nou kwè kè yo pé rézoud tout pwoblèm a limanité. Men ni on biten ki ké rivé apré, é yo pé’é pé anpéché sa fèt anponjan ! Poukwa ? Sèlon sé pwofési-la ki an Bib-la, « yo ké détwi onsèl kou, lamenmla », é « yo pé’é pé chapé kò a yo anponjan » (1 Tés. 5:3).

² Kifè, nou bizwen ni répons a sèwten kèsyon ki enpòwtan toubònman : Ka i ké pasé pannan « gwo tribilasyon-la » ? Ka Jéova ké vlé-nou fè pannan péryòd-lasa ? É ka pou nou fè dépi konnyéla pou nou rété fidèl pannan gwo tribilasyon-la ? (Mat. 24:21).

3. Dapré sa ki maké an Révélasyon 17:5, 15-18, kijan Bondyé ké détwi « Gran-Babilòn-la » ?

³ (Li Révélasyon 17:5, 15-18.) « Gran-Babilòn-la » ké détwi ! Kon nou sòti di, sé nasyon-la pé’é ka kontwolé ayen a moman-lasa. Poukwa ? Pas ‘Bondyé ké mèt lidé a-y an tchè a yo pou yo akonpli volonté a-y’. Ki volonté ésa ? Volonté a Bondyé sé dè détwi tout fo rèlijyon. Pawmi sé rèlijyon-lasa ni tout séla ki ka di yo krétyen la *. Bondyé ké mèt lidé a-y an tchè a sé « 10 kòn-la » é an tchè a « bèt sovaj wouj la ». Sé 10 kòn-la ka rèprézanté tout gouvènman ki ka soutyenn « bèt sovaj la ». « Bèt sovaj la », sé Òwganizasyon a Lénasyonzini (Rév. 17:3, 11-13 ;  18:8). Lè sé gouvènman-lasa ké ataké tout sé fo rèlijyon-la, sé ké koumansman a gwo tribilasyon-la. Sé on évènman ki ké rèd toubònman é ki ké fèt toutkoté si latè !

4. a) Ka sé nasyon-la pé rivé a di pou èspliké poukwa yo ataké sé fo rèlijyon-la ? b) Ka sé moun-la ki té adan sé rèlijyon-lasa dwèt ké fè ?

⁴ Nou pa sav ka sé nasyon-la ké di pou èspliké poukwa yo ka ataké Gran-Babilòn-la. Pétèt yo ké di kè sé akòz dè sé rèlijyon-la si pa ni lapé asi latè oben kè sé pas yo toujou ka mélanjé-yo an politik. Oben pétèt yo ké di sé rèlijyon-la ni twòp byen é twòp lajan (Rév. 18:3, 7). Nou ka tou konprann kè lè sé nasyon-la ké ataké sé fo rèlijyon-la, a pa tout sé moun-la ki adan sé fo rèlijyon-lasa yo ké tchouyé. I ka sanm sa sé pito sé rèlijyon-la menm yo ké détwi. Lè sé rèlijyon-la ké disparèt, sé moun-la ki té adan yo la ké rann-yo kont kè sé chèf-la yo té ni la lésé-yo tonbé, é kè yo pa fè ayen pou yo. Kifè, yo ké di yo pa ni ayen a vwè èvè sé relijyon-lasa.

5. Ka Jéova pwomèt anrapò èvè gwo tribilasyon-la, é poukwa ?

⁵ Labib pa’a di konmen tan sa ké pran pou détwi tout sé fo rèlijyon-la, men nou sav kè sa pé’é diré tèlman lontan (Rév. 18:10, 21). Jéova pwomèt kè i ké ‘diminyé asi kantité jou’ tribilasyon-la ké diré, pou « séla i chwazi la » é pou bon rèlijyon-la pa détwi adan sa (Mawk 13:19, 20). Men ka Jéova ké vlé-nou fè ant koumansman a gwo tribilasyon-la é lagè a Awmagédon ?

6. Poukwa fò pa nou yenki kontanté-nou dè pa mélé-nou adan fo-rèlijyon-la ?

⁶ Kon nou vwè adan awtik a simenn pasé, Jéova vlé sèwvitè a-y sòti adan Gran-Babilòn-la. Men si nou ka yenki kontanté-nou dè pa mélé-nou adan fo-rèlijyon-la, nou po’o adan sa. Fò-nou ay pli lwen ki sa. Fò-nou byen désidé a défann vré rèlijyon-la, li ki ka pèwmèt-nou sèvi Jéova. An-nou vwè 2 fason nou pé fè sa.

7. a) Lè Jéova ka di-nou ka ki byen é ka ki mal, ka pou nou fè pou nou kontinyé suiv prensip a-y ègzaktèman kon i vlé ? b) Kijan Ébré 10:24, 25 ka montré kè sa enpòwtan kè nou réini-nou é poukwa sé aprézan pou nou fè sa plis ankò ?

 ⁷ Prèmyèwman, lè Jéova ka di-nou ka ki byen é ka ki mal, fò-nou kontinyé suiv prensip a-y ègzaktèman kon i vlé. Fò pa nou jen aksèpté sa mond-la ka fè ki pa pwòp. Pa ègzanp, nou pa ka aksèpté pon konpòwtèman sèksyèl ki pa pwòp, kon lè misyé é misyé ka mayé oben lè madanm é madanm ka mayé. É nou pa dakò nonplis èvè pon kalté konpòwtèman ki pa pwòp antrè dé moun ki ni menm sèks (Mat. 19:4, 5 ; Wom. 1:26, 27). Dézyèmman, fò-nou kontinyé réini-nou èvè frè é sè an nou pou adoré Jéova. Nou ka adoré Jéova toupatou sa posib dè adoré-y. Ki sé adan on Sal di Wayòm, ki sé aka on frè é menm on ti koté sèkré. Men kèlkèswa sa ki pasé, nou pé’é jen arété ay réinyon pou nou pé sa adoré Jéova. An réyalité, nou bizwen réinyon an nou « plis ankò davwa nou ka vwè jou-la ka rivé » (li Ébré 10:24, 25).

8. Poukwa nou pé di kè mésaj-la nou ké préché la dwèt ké diféran dè tala nou ka préché la konnyéla ?

⁸ Pannan gwo tribilasyon-la, pétèt kè mésaj-la nou ké ni a préché la pé’é menm biten ki sila nou ka préché konnyéla la. Jòdijou, nou ka anonsé bon nouvèl a Wayòm-la é nou ka fè éfò pou fè disip. Men pannan gwo tribilasyon-la, nou dwèt ké préché on mésaj ki ké frapé lèspri a moun. Labib ka konparé mésaj-lasa èvè lagrèl (Rév. 16:21). Pétèt nou ké anonsé kè talè mond a Satan ké détwi. Men sé lè moman-la ké rivé, nou ké sav ki mésaj pou nou préché ègzaktèman é kijan pou nou préché-y. Ès nou ké kontinyé sèvi èvè sé menm métòd-la nou ja ka itilizé dépi pliski 100 an ? Nou ké ni tan vwè. Kèlkèswa jan nou ké préché, i ka sanm sa sé nou ki ké anonsé mésaj a jijman a Jéova. Mi on bèl lonnè mi ! (Ézék. 2:3-5).

9. Lè sé nasyon-la ké tann mésaj an nou, kijan yo dwèt ké réyaji, men dè ki biten nou pé sèten ?

⁹ Asiré pa pétèt, lè sé gouvènman-la ké tann mésaj an nou, yo ké éséyé fè tousa yo pé pou nou pa jen préché ankò. Alò menmjan nou bizwen soutyen a Jéova lè nou ka préché konnyéla, menmjan-la, fò-nou ké konté asi-y a moman-lasa. Nou pé sèten kè Jéova ké ‘ban-nou plen fòs’ pou nou pé sa fè volonté a-y (Mich. 3:8).

10. Lik 21:25-28 anonsé kè onlo biten ké pasé pannan gwo tribilasyon-la. Kijan sé moun-la ké santi-yo lè yo ké vwè tout sé biten-lasa ?

¹⁰ (Li Lik 21:25-28.) Pannan gwo tribilasyon-la, tout biten ki té ka sanm sa ki té byen doubout ké koumansé tonbé. É lè sé moun-la ké rann-yo kont dè sa, yo ké rété èstèbèkwè. Yo ké santi-yo « angwasé », yo ké pè pèd vi a yo, men sé a moman-lasa limanité ké rantré adan on péryòd i potoko jen vwè. Sé péryòd-lasa ki ké pi mové adan listwa a limanité (Sof. 1:14, 15). A moman-lasa, menm pou pèp a Bondyé lavi dwèt ké pli rèd. Konm nou ké kontinyé pa fè pawti a mond-la, nou ké jwenn enpé difikilté. Pétèt osi, nou pé’é ni sa ki nésésè pou viv.

11. a) Poukwa toutmoun ké touné kont Témwen a Jéova ? b) Poukwa nou pa bizwen pè gwo tribilasyon-la ?

¹¹ Rivé onlè, moun ki té adan sé rèlijyon-la yo détwi la, ké anrajé kont Témwen  a Jéova pas yo ké kontinyé adoré Bondyé. Sé moun-la dwèt ké fè yon èskandal ! Yo dwèt ké palé dè sa jou asi entèwnèt ! Sé nasyon-la é Satan, chèf a yo, ké hay-nou pas sé rèlijyon an nou tousèl ki ké rété doubout. Yo pa réyisi fè sa yo té prévwa : yo pa réyisi fè tout rèlijyon ki asi latè disparèt. Alò, yotout ké touné kont nou. É sé a moman-lasa sé nasyon-la ké divini sa Labib ka kriyé Gòg dè Magòg *. Yo ké mété-yo ansanm pou ataké pèp a Bondyé an tout sans é yo pé’é fè sa jantiman (Ézék. 38:2, 14-16). Lè nou ka réfléchi si tousa, nou pé rivé a pè pas nou pa sav kijan sa ké pasé ègzaktèman *. Men on biten nou pé sèten, sé kè nou pa bizwen pè gwo tribilasyon-la, pas Jéova ké di-nou ka pou nou fè pou pwotéjé-nou (Sòm 34:19). Alò nou ké pé ‘doubout dwèt é lévé tèt an nou, pas délivrans an nou ké toupré rivé’.

12. Kijan « èsklav fidèl é prévwayan » la ka préparé-nou pou sa ki ké vin talè ?

¹² « Èsklav fidèl é prévwayan » la ka préparé-nou pou nou pé sa rété fidèl pannan gwo tribilasyon-la (Mat. 24:45). I ka fè sa diféran mannyè. An-nou vwè yonn adan yo : lasanblé réjyonal a 2016, ta 2017 é ta 2018. Sa nou aprann adan sé lasanblé-lasa rivé a bon moman-la. Yo ankourajé-nou a fè plis éfò pou travay sé kalité-la nou bizwen la padavwa jou a Jéova ka vin. An-nou wouvin asi sé kalité-lasa.

13. Kijan nou pé travay fidélité an nou, é poukwa fò-nou fè sa dépi alè ?

¹³ Fidélité : Tèm a lasanblé réjyonal 2016 sé té « Restons fidèles à Jéhovah ! ». Pwogram a lasanblé-lasa montré-nou kè si nou ni on lanmityé solid èvè Jéova, nou ké rété fidèl. I té ka fè-nou sonjé osi kè pou nou vin pli pré Jéova, fò-nou priyé-y èvè tout tchè an nou, fò-nou étidyé Pawòl a-y é lè nou ka fè sa fò-nou fé rèchèch. Konsa, nou ké ni fòs pou vin about a nenpòt ki difikilté. Konm mond a Satan kay bout talè, sa ké dèplizanpli rèd pou nou dè rété fidèl a Jéova é a wayòm a-y. É pétèt sé moun-la ké kontinyé fè jé èvè nou (2 Pyè 3:3, 4). Pli nou pé’é mélanjé-nou an mond-lasa, é pli sé moun-la ké fè jé èvè nou. Fò-nou travay fidélité an nou dépi jòdijou pou nou rété fidèl pannan gwo tribilasyon-la.

14. a) Ki chanjman ki ké fèt anrapò èvè sé frè-la ki ka dirijé òwganizasyon a Jéova si latè ? b) Poukwa nou ké bizwen rété fidèl a moman-lasa ?

¹⁴ Pannan gwo tribilasyon-la, ké ni on chanjman anrapò èvè sé frè-la ki ka dirijé òwganizasyon a Jéova si latè. Rivé onlè, Bondyé ké pran tout wen ki asi latè, é i ké sanblé-yo an syèl-la pou yo fè lagè a Awmagédon (Mat. 24:31 ; Rév. 2:26, 27). Kivédi Komité santral la pé ké si latè èvè nou ankò. Men pawkont, gran-foulmoun-la ké rété byen òwganizé. Sé dé frè plen èkspéryans ki ka fè pawti a sélézòt mouton-la ki ké dirijé-nou. A moman-lasa, fò-nou ké montré Jéova fidélité an nou. Pousa, fò-nou  ké soutyenn sé frè-lasa é fò-nou ké suiv dirèksyon-la yo ké ban-nou la. An réyalité, sé dè Jéova dirèksyon-lasa ké ka vin. Sé yenki si nou ka obéyi nou ké rété vivan !

15. Kijan nou pé ni plis andirans, é poukwa sa enpòwtan dè travay kalité-lasa dépi aprézan ?

¹⁵ Andirans : Tèm a lasanblé réjyonal 2017 sé té « Pa lagé ! ». Pwogram a lasanblé-lasa pèwmèt-nou ni plis fòs pou andiré difikilté. Nou aprann kè a pa lè tout biten bèl nou pé di nou ni andirans. Men sé lè nou ka konté asi Jéova nou pé ni plis andirans (Wom. 12:12). Fò pa nou janmen oubliyé sa Jézi pwomèt : « Sila ki ké andiré jiskatan lafen rivé ké sové » (Mat. 24:13). Pwomès-lasa ka fè-nou konprann kè fò-nou rété fidèl kèlkèswa difikilté nou pé ka jwenn. Si dépi konnyéla nou ka andiré chakfwa nou jwenn on éprèv, fwa an nou ké vin pli fò avan gwo tribilasyon-la koumansé.

16. Ka i ka ban-nou kouraj, é grasa ki biten nou pé ni plis kouraj dépi alè ?

¹⁶ Kouraj : Tèm a lasanlé réjyonal 2018 sé té « Maré ren a-w ! ». Pwogram a lasanblé-lasa fè-nou sonjé kè a pa lè nou ka konté asi noumenm nou ké ni kouraj. Menmjan fò-nou konté si Jéova pou nou ni andirans, menmjan-la osi fò-nou konté si-y pou nou ni kouraj. Kijan nou pé aprann konté si Jéova plis ankò ? Sé lè nou ka li Pawòl a-y touléjou é lè nou ka pran tan réfléchi si jan i ni lokazyon sové pèp a-y (Sòm 68:20 ; 2 Pyè 2:9). Lè sé nasyon-la ké ataké-nou pannan gwo tribilasyon-la, nou ké bizwen aji èvè kouraj é nou ké bizwen mèt konfyans an nou an Jéova kon nou pò’ò jen fè-y avan (Sòm 112:7, 8 ; Ébr. 13:6). Si nou ka konté asi Jéova dépi aprézan, nou ké ni kouraj-la nou bizwen la lè Gòg ké ataké-nou *.

17. Poukwa fò pa nou pè Awmagédon ? (gadé imaj-la ki anlè po a jounal-la).

¹⁷ Kon nou vwè adan awtik a simenn pasé, onlo adan nou viv pannan sé dènyé  jou-la tout vi a yo. Kifè, nou ni lèspwa dè pasé gwo tribilasyon-la vivan. Sistèm-lasa ké bout èvè lagè a Awmagédon. Sèlman, nou pa bizwen pè ayen. Poukwa ? Paskè sé ké lagè a Jéova, kifè nou pé ké ni a goumé (Pwov. 1:33 ; Ézék. 38:18-20 ; Zak. 14:3). Lè Jéova ké fè Jézi sign, Jézi ké menné lawmé a Bondyé o konba. I ké vin èvè sé wen-la ki résisité la, é i ké ni plizyè milyé zanj èvè-y osi. Ansanm-ansanm, yo ké goumé èvè Satan, èvè démon a-y, é èvè touséla ki ka soutyenn Satan asi latè (Dan. 12:1 ; Rév. 6:2 ; 17:14).

18. a) Ka Jéova pwomèt ? b) Kijan sa nou ka touvé adan Révélasyon 7:9, 13-17 ka fè-nou ni konfyans kè nou ké sové ?

¹⁸ Jéova fè pwomès-lasa : « Kèlkèswa zàm yo fè kont vou, ponyonn pé ké sèvi ayen » (Iz. 54:17). On« gran-foulmoun » ki plen adoratè a Jéova ki rété fidèl ké rété vivan apré « gwo tribilasyon »-la ! Yo ké kontinyé sèvi-y fidèlman (li Révélasyon 7:9, 13-17). Labib ka ban-nou tout rézon ki ni pou nou ni konfyans kè nou ké sové ! Nou sav kè Jéova « ka pwotéjé moun ki fidèl » (Sòm 31:23). Touséla ki enmé Jéova é ki ka ba-y glwa ké kontan toubònman lè yo ké vwè-y défann non a-y ki sen (Ézék. 38:23).

19. Talè, ni on bèl biten nou té ka èspéré ki ké fèt. Ki biten ésa ?

¹⁹ Éséyé vwè kijan nou té’é pé touné 2 Timoté 3:2-5 pou palé dè moun ki ké adan mond nouvo la. Adan mond-lasa, Satan pé’é ka aji asi ponmoun ankò (gadé ti karé-la «  Dèmen sé moun-la ké... »). Mi sa frè George Gangas * ki té adan Komité santral la té ka di : « Sèlman, a pa ti bèl sa ké bèl lè toutmoun asi latè ké ka adoré Jéova ansanm ! Talè, zò ké pé viv adan mond nouvo la. Zò ké viv lontan, kon Jéova. Zò ké viv pou touttan. » Sé vré, nou ni on bèl èspwa toubònman !