1. Apré nou pran lèbatèm, ka pou nou kontinyé fè ?

ÈS OU ja pran lèbatèm ? Si sé sa, sé kè ou ja montré douvan toutmoun kè ou ni fwa an Jéova, é kè ou vlé sèvi-y adan òwganizasyon a-y *. Men nou ka tou konprann kè fò-nou kontinyé fè éfò pou konsolidé fwa an nou. É pi nou k’ay é pi fò-nou ni konfyans kè Jéova ka dirijé òwganizasyon a-y.

2-3. Kijan Jéova ka dirijé òwganizasyon a-y jòdijou ? Bay déotwa ègzanp.

² Jòdijou, lè nou ka gadé kijan Jéova ka dirijé òwganizasyon a-y, nou ka konprann kijan dè moun i yé, ka i ni lentansyon fè, ka i enmé é ka i pa enmé. É jistèman, an-nou palé dè 3 kalité kè nou ka vwè on mannyè ki klè adan òwganizasyon a-y.

³ Prèmyèwman, « Bondyé pa ka fè préférans » (Akt 10:34). Tèlman Jéova enmé-nou, i sakrifyé vi a gason a-y ‘an ranson pou noutout’ (1 Tim. 2:6 ; Jan 3:16). Jéova ka sèvi èvè pèp a-y pou préché bon nouvèl-la ba toutmoun ki vé kouté-y. Konsa, i ka édé on maksimòm dè moun a sové vi a yo grasa ranson-la. Dézyèmman, Jéova enmé lè toutbiten byen òwganizé é i enmé lapé (1 Kor. 14:33, 40). Sé pousa, sa toutafè nòwmal si adan pèp a Bondyé toutbiten byen òwganizé é si lamajorité a sé moun-la ka antann-yo byen. Twazyèmman, Jéova sé « Gran Pwofésè » la (Iz. 30:20, 21). Sé pousa òwganizasyon a-y ka travay rèd konsa pou anségné Bib-la, ki sé an lasanblé-la, ki sé an téritwa-la. Kijan sé 1^é krétyen-la té ka imité sé  3 kalité-lasa ? É jòdijou, kijan sèwvitè a Bondyé ka montré kè yo ni sé kalité-lasa osi ? Kijan lèspri sen pé édé-nou sèvi Jéova adan òwganizasyon a-y jòdijou ?

4. Adan Akt 1:8, ka Jézi mandé disip a-y fè, é ki èd yo té’é risivwè ?

⁴ O 1^é syèk. Mésaj-la Jézi té ka préché la té ka ba toutmoun èspwa (Lik 4:43). I mandé disip a-y kontinyé travay-la kè i té ka fè la. I di-yo fò-yo té préché « jis koté-la ki pli lwen la asi latè » (li Akt 1:8). Nou ka tou konprann kè yo pa ta pé’é fè travay-lasa tousèl a yo. Yo té ké bizwen lèspri sen kivédi « asistan-la » kè Jézi té pwomèt-yo la (Jan 14:26 ; Zak. 4:6).

5-6. Kijan lèspri sen édé disip a Jézi ?

⁵ An lan 33, jou a Lapannkòt, Jéova voyé lèspri sen a-y asi disip a Jézi. Grasa lèspri sen-lasa yo mété-yo ka préché tousuit, é adan on ti moman, plizyè mil moun aksèpté bon nouvèl-la (Akt 2:41 ; 4:4).É menm lè pèp-la koumansé pèwsékité sé disip-la, yo pa fè dèyè. Yo mandé Bondyé édé-yo pou yo pé sa kontinyé préché. Mi sa yo mandé adan on priyè : « Édé èsklav a-w pou yo kontinyé montré-yo brav pou anonsé pawòl a-w. » Yo vin touvé-yo ranpli èvè lèspri sen é ‘yo kontinyé montré-yo brav pou anonsé pawòl a Bondyé’ (Akt 4:18-20, 29, 31).

⁶ Disip a Jézi jwenn dòt difikilté ankò. Pa ègzanp, a épòk-lasa, pou touvé on woulo ki té ni Lézékriti maké anlè-y, fò ou té lévé bonnè toubònman ! É yo pa té ni piblikasyon pou édé-yo konprann Bib-la, kon nou ni jòdijou. É fò yo té préché ba moun ki té ka palé tout kalité lang. Magré difikilté yo té ka jwenn, yo kontinyé pòté bon mannèv é yo rivé fè on biten kè yo pa jen konpranndèdi yo té’é rivé fè : an 30 an apépré, yo réyisi préché bon nouvèl-la ‘toupatou asi latè’ (Kol. 1:6, 23).

7. Ni 100 an dè sa, sèwvitè a Jéova rivé konprann ka i té ka atann dè yo. Kijan yo rivé konprann sa é ka yo fè ?

⁷ A épòk an nou. Jéova ka kontinyé dirijé pèp a-y é i ka ba-yo fòs-la yo bizwen la pou fè volonté a-y. I ka sèvi èvè Bib-la pou dirijé pèp a-y. Dayè pou yonn, sé lèspri sen a-y i voyé pou yo té maké Bib-la. Adan Labib, yo ka di-nou kijan Jézi préché lè i té asi latè é yo ka di-nou osi kè i mandé disip a-y kontinyé travay-la kè i té koumansé fè la (Mat. 28:19, 20). An juiyé 1881, mi sa Tou dè Gad la té ka di : « Jéova pa chwazi-nou pou moun pé sa pòté-nou anlè oben pou nou pé sa vin rich, men pito, pou nou pé sa sèvi èvè sa nou ni pou préché bon nouvèl-la. » An 1919, bwochi-la À qui l’œuvre est confiée parèt. Mi sa i té ka di : « Nou ni onlo travay pou fè, men sé travay a Ségnè-la, é grasa a fòs a-y, nou ké rivé fè-y. » Menmjan ki sé 1^é krétyen-la, sé frè-la pa bat dèyè men yo travay rèd pas yo té sèten kè lèspri sen té’é édé-yo préché ba tout kalité moun. É nou osi, nou sèten dè sa jòdijou !

8-9. Ki métòd òwganizasyon a Jéova itilizé pou préché ba on maksimòm dè moun ?

⁸ Pou préché bon nouvèl-la, òwganizasyon a Jéova sèvi èvè méyè zouti ki tini. Pawmi sé zouti-lasa nou ka touvé piblikasyon, « Photo-Drame de la Création », toundis èvè pòtvwa, vwati a opawlè é émisyon ki té ka pasé laradyo. É konnyéla, nou ka jis itilizé òwdinatè é Entèwnèt. Òwganizasyon a Bondyé ka pòté bon mannèv pou tradui sé piblikasyon-la adan onpakèt lang. É sé 1^é fwa adan listwa yo ka tradui adan tousa lang. Men  poukwa yo ka fè tousa éfò ? Pas yo vlé kè tout kalté moun tann bon nouvèl-la adan lang a tchè a yo. Jéova pa’a fè préférans ! I té ja di kè yo té’é préché bon nouvèl-la « ba tout nasyon, tout tribi, tout lang é tout pèp » (Rév. 14:6, 7). I vé kè toutmoun pé sa tann mésaj a Wayòm-la.

⁹ É si sé moun-la ka rété on koté ou pé pa rantré konsa, pas ni on kòd a fè ou ni on bayè, kijan ou pé fè pou préché ba-yo ? Jéova pousé òwganizasyon a-y touvé on mwayen pou nou pé sa préché ba sé moun-lasa adan lari. Pa ègzanp, an 2001, Komité santral la té dakò pou frè a Lafrans koumansé sèvi èvè prézantwa oben èvè dòt mwayen ankò pou mèt sé piblikasyon-la a dispozisyon a sé moun-la. Aprésa, yo fè sa dòt koté osi. A pa ti bon rézilta yo trapé ! An 2011, o Zétazini, yo éséyé on nouvo métòd a Nouyòk, adan on kawtyé toujou ni plen moun. Pannan 1^é lanné-la, sé moun-la pran 102 129 liv é 68 911 jounal. É 4 701 moun mandé pou yo étidyé Labib èvè yo. Pa ni pon dout asi sa, lèspri sen a Bondyé té ka soutyenn travay-lasa. Kifè, Komité santral la désidé yo ké pé sèvi èvè sé métòd-lasa toupatou asi latè.

10. Ka nou pé fè pou nou préché pibyen ?

¹⁰ Sa ou pé fè. Pannan sé réinyon-la, Jéova ka montré-nou kijan pou nou préché. Fò ou sèvi èvè fòwmasyon-lasa. Fò ou pran labitid préché èvè gwoup a prédikasyon a-w. Frè é sè a gwoup a-w ké édé-w préché é anségné pibyen é yo ké ankourajé-w grasa bèl ègzanp-la yo ka ba-w la. Magré ni difikilté, kontinyé préché. Pa oubliyé asi ki vèwsé awtik-lasa bazé ; i ka fè-nou sonjé kè si nou ka rivé fè volonté a Bondyé, a pa paskè nou fò men sé grasa lèspri sen a-y (Zak. 4:6). Pa jen oubliyé kè sé travay a-y nou ka fè.

11. O 1^é syèk, sé frè a komité santral la travay men-dan-lamen pou fè ansòt kè pèp a Bondyé byen òwganizé. Kijan yo fè sa ?

¹¹ O 1^é syèk. Sé frè a komité santral la té Jérizalèm an tan-lasa, é yo travay men- dan-lamen pou fè ansòt kè pèp a Bondyé byen òwganizé é pou i viv adan lapé (Akt 2:42). Pa ègzanp, an 49 a épòk an nou, yo réglé on pwoblèm ki té ni anrapò èvè siwkonsizyon-la grasa lèspri sen. Si yo pa té réglé pwoblèm-lasa, yo té’é ni dimal a préché bon nouvèl-la. Sé vré, sé ansyen-la é sé apòt-la sé té dé juif. Men apapousa yo lésé tradisyon juif-la aji asi yo. É yo pa lésé sa konpatriyòt a yo té ka di aji asi yo nonplis.Yo té préféré lésé Pawòl a Bondyé é lèspri sen gidé-yo (Akt 15:1, 2, 5-20, 28). Ki rézilta sa bay ? Jéova béni désizyon a yo, kifè, lasanblé-la rété soudé, yo té ka antann-yo byen, é travay a prédikasyon-la kontinyé fè douvan (Akt 15:30, 31 ; 16:4, 5).

12. Ka ki ka montré kè pèp a Bondyé byen òwganizé é kè i ka travay pou lapé ?

¹² A épòk an nou. Òwganizasyon a Jéova ka fè ansòt pou pèp a Bondyé byen òwganizé é pou toutmoun rété soudé. Adan le Phare de la Tour de Sion et Messager de la Présence de Christ a 15 novanm 1895, té ni on awtik bazé si 1 Korentyen 14:40. Tit a-y sé té : « Avec bienséance et ordre ». Mi sa i té ka di : « Sé apòt-la ba sé 1^é krétyen-la onlo konsèy pou yo té rété òwganizé. Sa ké bon ban nou si nou ka kontinyé suiv ‘sa yo maké an tan lontan pou enstwi-nou’ » (Wom. 15:4). Jòdijou, òwganizasyon a Jéova ka travay rèd pou pèp a Bondyé rété òwganizé é pou i viv anpé kon sa té ka fèt an tan a sé 1^é krétyen-la. Si ou k’ay adan ondòt péyi é ondòt lasanblé, é kè ou k’ay an réinyon pou suiv Tou dè Gad la, ou ké alèz a-w paskè ou ké sav kijan sa ka pasé é ki awtik yo ké étidyé. Sa ka montré kè nou soudé é kè sé yenki grasa lèspri sen a Bondyé kè sa pé fèt (Sof. 3:9, nòt).

13. Ki kèsyon Jak 3:17 ka ankourajé-nou pozé-nou ?

¹³ Sa ou pé fè. Jéova vé kè sèwvitè a-y fè tousa yo pé pou yo ‘rété ini grasa lèspri sen é grasa lapé ki ka lyanné-yo’ (Éféz. 4:1-3). Alò pozé-w sé kèsyon-lasa : « Ès an ka fè tousa an pé pou ni lapé an lasanblé-la é pou i rété soudé ? Ès an ka fè sa sé ansyen-la ka mandé ? Ès yo pé  fè-mwen konfyans, siwtou si an ni rèsponsabilité an lasanblé-la ? Ès an toujou alè é ès an toujou paré pou édé lézòt ? » (li Jak 3:17). Si ou ka vwè ou mérité pwogrésé adan sèwten domenn, mandé Jéova lèspri sen a-y. Pi ou ké lésé lèspri sen aji anlè-w é asi sa ou ka fè, pi sé frè é sè-la ké enmé-w é ké aprésyé sa ou ka fè adan lasanblé-la.

14. Dapré Kolosyen 1:9, 10, kijan Jéova anségné sé 1^é krétyen-la ?

¹⁴ O 1^é syèk. Jéova enmé anségné sèwvitè a-y (Sòm 32:8). Sa i anvi, sé kè yo konnèt-li, kè yo enmé-y é kè yo viv pou touttan. Sé biten-lasa pa té’é pé fèt si i pa té ka anségné-yo (Jan 17:3). O 1^é syèk, i sèvi èvè lasanblé-la pou anségné pèp a-y (li Kolosyen 1:9, 10). É lèspri sen, « asistan »-la kè Jézi té pwomèt-la jouwé on wòl enpòwtan adan sa (Jan 14:16). I édé sé disip-la konprann Pawòl a Bondyé plibyen, i fè-yo sonjé onlo biten kè Jézi té di-yo é kè i té fè. É aprésa, yo té pé jous li sé biten-lasa adan Lézévanjil. Sa yo aprann la konsolidé fwa a yo, é sa édé-yo enmé Bondyé pli fò. Anplisdisa, yo vin enmé Bondyé é frè é sè a yo pi fò ankò.

15. An Izayi 2:2, 3 Jéova ka fè-nou on pwomès. Kijan pwomès-lasa ka réyalizé an 2 zyé an nou ?

¹⁵ A épòk an nou. Jéova té anonsé kè « adan sé dènyé jou-la », on foulmoun ki sòti adan tout nasyon té’é ay asi montangn a-y, kivédi yo té’é sanblé èvè pèp a-y pou yo anségné-yo (li Izayi 2:2, 3). Jòdijou, pwofési-lasa ka réyalizé an 2 zyé an nou. Onlo moun ka vin adoré Bondyé èvè sèwvitè a-y. É on biten ki klè sé kè vré rèlijyon-la lontan plibon ki tout sélézòt rèlijyon-la. Anplisdisa, a pa tibwen enfòwmasyon Jéova ka ba pèp a-y si Labib konnyéla la ! (Iz. 25:6). I ka ban-nou tout sé enfòwmasyon-lasa grasa « èsklav  fidèl é prévwayan la ». Pa ègzanp, i ka ban-nou awtik, diskou, vidéo é fim (Mat. 24:45). Éliyou, zanmi a Jòb, di on bèl biten si Bondyé é nou dakò èvè sa. Mi sa i di : « Ki Pwofésè ki kon-y ? » (Jòb 36:22).

16. Ka ou pé fè pou pwogrésé ?

¹⁶ Sa ou pé fè. Lèspri sen ké édé-w mèt an pratik sa ou ka li é sa ou ka aprann an Bib-la. Ou pé priyé menmjan ki nonm-la ki maké Sòm 86 la. Mi sa i di : « O Jéova, montré-mwen chimen a-w. An ké maché adan vérité a-w. Fè ansòt pou an krenn non a-w èvè tout tchè an mwen » (Sòm 86:11). Anplisdisa, fò ou li Labib, fò ou étidyé-y é fò ou étidyé sé piblikasyon-la kè òwganizasyon a Jéova ka ban-nou la. Men a pa enki aprann pou aprann ! Fò ou lésé sé vérité-lasa rantré an fon a tchè a-w é fò ou mété-yo an pratik. Lèspri sen a Jéova pé édé-w fè sa. É fò ou toujou chèché a ankourajé frè é sè a-w (Ébr. 10:24, 25). Poukwa sa ? Paskè sé fanmi a-w. Mandé Jéova lèspri sen a-y pou i édé-w fè komantè ki ka sòti an fon a tchè a-w. Lèwvwè ou ni on sijé oben on diskou a prézanté, ou pé mandé Jéova lèspri sen a-y pou ou pé fè sa byen. Konsa, ou ké montré Jéova é Jézi kè ou enmé « mouton » a yo onlo. É kon ou sav, sé mouton-la ni onlo valè pou yo (Jan 21:15-17).

17. Kijan ou pé montré kè ou ka soutyenn òwganizasyon a Jéova ?

¹⁷ Talè, ké rété onsèl òwganizasyon si latè : sé ta Bondyé é i ka dirijé-y èvè lèspri sen a-y. Sé pousa fò ou travay épi tout tchè a-w èvè òwganizasyon a Jéova. Jéova pa’a fè préférans, alò lè ou an prédikasyon, préché ba tout kalité moun. Menmjan ki-y, fò ou montré kè ou enmé lapé é kè ou enmé lè tout biten byen òwganizé. É pousa, fè tousa ki fo pou lasanblé-la rété byen soudé. Gran Pwofésè a-w ka ba-w tout enfòwmasyon ou bizwen, alò pwofité dè sa a fon ! Konsa, menmsi talè mond a Satan kay détwi, vou, ou pé’é pè. Olyé dè sa, ou ké pran kouraj é ou ké kontinyé sèvi Jéova èvè frè é sè a-w.