AWTIK POU ÉTIDYÉ 41
Kijan nou pé édé on étidyan pwogrésé é pran lèbatèm ? (1é pawti-la)
« Zò montré kè zò sé on lèt kè Kris voyé, on lèt kè noumenm ékri antankè sèwvitè a-y » (2 KOR. 3:3).
KANTIK 78 « Toi qui enseignes la Parole de Dieu »
ON TI LIDÉ ASI SA NOU KAY VWÈ *
Lè on étidyan ka pran lèbatèm, a pa ti kontan moun ki an lasanblé a-y ka kontan ! (gadé paragraf 1 la).
1. Sèlon 2 Korentyen 3:1-3, lè nou ka étidyé èvè on moun é lè nou ka édé-y a pran lèbatèm, sé on bèl kado Jéova ka fè-nou. Kijansa ? (gadé imaj-la ki anlè po a jounal-la).
LÈ ON étidyan ki an lasanblé a-w ka pran lèbatèm, ka ou ka rèsanti ? A pa ti kontan ou dwèt ka kontan ! (Mat. 28:19). É siwvwè sé vou ki fè étid a-y, ou dwèt ka pi kontan ankò ! (1 Tés. 2:19, 20). Lèwvwè on moun ka pran lèbatèm sa ka montré kè moun-la ki fè étid a-y la é tout rèstan lasanblé-la fè on bèl travay pou édé-y pwogrésé. Moun-lasa ka vin touvé-y kon on lèt a rèkomandasyon, ki sé pou moun-la ki étidyé Labib èvè-y la, ki sé pou tout rèstan a lasanblé-la (li 2 Korentyen 3:1-3).
2. a) Ki kèsyon enpòwtan fò-nou ègzaminé é poukwa ? b) Ka ki on étid biblik ? (gadé nòt-la).
2 Dépi 4 lanné nou konstaté kè toupatou si latè, ni apépré 10 000 000 moun ki ka étidyé Labib * èvè nou chak mwa. É a pa ti bèl sa bèl ! Pannan sé 4 lanné-lasa ni apépré 280 000 moun ki pran lèbatèm chak lanné. Kijan nou pé édé tout sé étidyan-lasa pran lèbatèm ? Jousalè, pòt-la wouvè : Jéova ka pèwmèt-nou vin disip a Jézikris. Sé pousa, nou ka pòté bon mannèv pou édé sé étidyan-la pwogrésé vit pou yo pran lèbatèm. Fò pa nou pèd tan ! (1 Kor. 7:29a ; 1 Pyè 4:7).
3. Ki konsèy awtik-lasa ké ban-nou pou kondui on étid pibyen ?
3 Konm pa’a rété onlo tan ankò é fò nou fè disip, Komité Santral la mandé sé filyal-la ka nou pé fè pou édé sé étidyan-la pwogrésé pi vit pou yo pran lèbatèm. Adan awtik-lasa é adan awtik-la ki ka vin la nou ké vwè ki konsèy sèwten misyonè, sèwten rèsponsab a siwkonskripsyon é sèwten pyonyé ki ni onlo èkspéryans ka ban-nou * (Pwov. 11:14 ; 15:22). Yo ka èspliké anségnan-la ka i pé fè pou étid-la pòté on biten ki itil pou étidyan-la. Adan awtik-lasa, nou ké vwè 5 biten on étidyan pé fè pou i pwogrésé vit é pou i pran lèbatèm.
ÉTIDYÉ ÈVÈ MOUN-LA CHAK SIMENN
Mandé étidyan-la si zò pé fè on ti sizé pou zò pé kontinyé palé dè Labib (gadé sé paragraf 4 a 6 la).
4. Ka fò-nou sonjé lèwvwè nou ka fè étid biblik a on moun douvan pòt a kaz a-y ?
4 Sèwten frè é sè ka fè étid a étidyan a yo douvan pòt a kaz a-y. Menmsi sé on bon métòd pou koumansé on étid biblik, souvantfwa, ou pa’a rivé diskité lontan èvè moun-la é sa pa oblijé fèt chak simenn. Pou ba on moun anvi konnèt plis biten asi Labib, sèwten pwoklamatè ka ba-yo niméwo a téléfòn a yo. Konsa yo pé pawtajé on pasaj biblik èvè moun-la menm avan yo wouvwè-yo. Pétèt diskisyon-lasa pé rivé a diré plizyè mwa men étidyan-la pa oblijé fè pwogré. Ou ka di sé èvè dé ti diskisyon konsa kè moun-la ké anvi fè pwogré é ké anvi ba Jéova vi a-y é pran lèbatèm ? An pa’a kwè !
5. An Lik 14:27-33, Jézi ka di on biten ki vréman itil pou édé étidyan an nou. Ki biten ésa ?
5 Jézi sèvi èvè on ègzanp pou montré ka pou on moun fè pou vin disip a-y. I palé dè on moun ki té vé konstwi on batiman é dè on wa ki té vé ay goumé èvè ondòt nasyon. Jézi di kè fò moun-la ki k’ay konstwi batiman-la sizé dabò pou i kalkilé konmen sa ké kouté-y pou fin batiman-la. É fò wa-la sizé dabò é mandé moun konsèy pou i vwè si sé sòlda-la ké pé fè sa i désidé fè (li Lik 14:27-33). Menmjan-la osi, Jézi té sav kè si on moun té vé vin disip a-y, fò i té réfléchi byen pou i sav ka pou i fè pou suiv-li. Sé pousa, fò-nou ankourajé sé étidyan-la étidyé Labib chak simenn èvè nou. Kijan nou pé fè sa ?
6. Ka pou nou éséyé fè pou étidyan-la pwogrésé ?
6 Piti-a-piti, éséyé vwè si ni mwayen diskité èvè moun-la tibwen pi lontan. Pétèt si ou ni labitid pran onsèl vèwsé èvè moun-la, éséyé vwè si ou ka pran 2. Lèwvwè moun-la ké ja abityé diskité èvè-w tibwen pli lontan, ou ké pé mandé-y si pa ni mwayen zò fè on ti sizé pou zò kontinyé palé. Sèlon jan i ké réponn-vou, ou ké sav si i ka pran étid a-y oséryé. Pétèt ou té’é pé jous mandé-y si i dakò pou fè étid a-y 2 fwa an simenn-la. Konsa, i ké pé pwogrésé pi vit. Men apatoudi étidyé 2 fwa an simenn-la, ni dòt biten a fè ankò.
PRÉPARÉ-W AVAN CHAK ÉTID
Préparé-w byen avan chak étid, é montré étidyan a-w kijan pou i préparé-y osi (gadé sé paragraf 7 a 9 la).
7. Si ou ka kondui on étid, kijan pou ou préparé-w avan ou ay fè-y ?
7 Konm ou ka anségné moun Labib, fò ou ka préparé-w avan chak étid. Ou pé koumansé pa li sé paragraf-la é gadé sé vèwsé-la. É fè on éfò pou konprann ki lidé ki pi enpòwtan. Pran tan réfléchi asi tit a lèson-la, asi sé soutit-la é asi sé kèsyon-la. Anplisdisa, réfléchi asi sé vèwsé-la ki ni a li la, asi sé imaj-la é asi sé vidéo-la ki ké édé-w èspliké sijé-la pibyen. Aprésa, sonjé étidyan a-w é éséyé vwè kijan ou té’é pé èspliké-y sijé-lasa on mannyè ki senp é pou sa klè an lèspri a-y. Konsa, i ké konprann sa ou ka èspliké-y la pibyen é sa ké pi fasil pou-y dè mété-y an pratik an vi a-y (Néém. 8:8 ; Pwov. 15:28a).
8. Kijan sa lapòt Pòl di an Kolosyen 1:9, 10 ka montré kè fò nou priyé pou sé étidyan-la ?
8 Lè ou ka préparé-w, palé Jéova dè étidyan a-w é dè sa i bizwen. Mandé Jéova édé-w pou ou pé sa anségné Pawòl a-y on mannyè ki ké touché tchè a moun-la (li Kolosyen 1:9, 10). Éséyé vwè si ni on biten étidyan-la pé’é konprann tousuit oben kè i ké ni dimal a aksèpté. Toujou sonjé kè objèktif a-w sé édé moun-la pwogrésé pou i pran lèbatèm.
9. Ka on anségnan pé fè pou édé étidyan a-y préparé-y avan étid a-y ? Bay on ti èsplikasyon.
9 Si nou ka étidyé Labib èvè on moun chak simenn, sa nou té’é vé sé kè étid-la pousé-y ni rèkonésans pou Jéova é Jézi é kè sa ba-y anvi konnèt tibwen plis biten ankò (Mat. 5:3, 6). Pou étid-la fè moun-la di byen, fò i konsantré-y asi sa i ka aprann. Sé pousa, fò-nou édé-y konprann kè fò i préparé-y avan chak étid. Pa ègzanp, fò i pran tan li lèson-la avan étid-la é fò i réfléchi alavans pou i vwè kijan i pé mèt sa i ka aprann la an pratik. Kijan ou pé édé-y préparé-y ? Ou pé montré-y kijan pou i fè si ou ka préparé on lèson èvè-y *. Ou pé montré-y kijan pou i touvé répons a sé kèsyon-la é kè si i maké déotwa mo asi piblikasyon-la, i ké sonjé répons-la pi fasilman. Aprésa, di-y bay répons-la èvè mo a-y ki ta-y. A moman-lasa, ou ké sav si i byen konprann sa i sòti vwè la. Men i ni ondòt biten ou pé ankourajé étidyan-la fè.
MONTRÉ-Y KÈ FÒ I PALÉ BA JÉOVA É KÈ FÒ I KOUTÉ-Y TOULÉJOU
Montré étidyan a-w kijan pou i palé ba Jéova é kijan pou i kouté-y touléjou (gadé sé paragraf 10 é 11 la).
10. Poukwa fò on étidyan li Labib touléjou, é ka sa ké pòté dè bon ba-y ?
10 Sé vré kè fò étidyan-la fè étid a-y chak simenn, men anplisdisa, ni sèwten biten fò i fè dè koté a-y é sa ké pwokiré-y onlo bénédisyon. Men, ka pou i fè konsa ? Fò i palé èvè Jéova é fò i kouté-y osi. I pé kouté Bondyé lè i ka li Labib touléjou (Joz. 1:8 ; Sòm 1:1-3). Asi jw.org, nou ka touvé on pwogram * ki ka édé-nou li Labib chak jou é kè ni mwayen enprimé. Montré étidyan-la kijan pou i sèvi èvè-y. Nou ka tou konprann kè pou lèkti-la pòté on biten ba étidyan-la, fò nou ké ankourajé-y réfléchi asi sa i ka li pou i vwè ka sa ka aprann-li asi Jéova é pou i vwè kijan i pé apliké sa adan vi a-y (Akt 17:11 ; Jak 1:25).
11. Ka nou pé fè pou aprann étidyan an nou priyé, é poukwa sa enpòwtan kè i pran labitid priyé Jéova ?
11 Fò nou ankourajé étidyan-la palé èvè Jéova kivédi priyé-y chakjou. Lèwvwè nou ka koumansé étid-la é kè nou ka fini-y, sa enpòwtan kè nou priyé Jéova èvè tout tchè an nou é kè nou palé dè étidyan-la adan sé priyè-lasa. Konsa, étidyan-la ké vwè kijan pou i priyé Jéova èvè tout tchè a-y é sa ké montré-y osi kè fò i priyé Jéova an non a Jézikris (Mat. 6:9 ; Jan 15:16). Ou ka imajiné kijan étidyan a-w ké vin bon bon zanmi èvè Jéova lèwvwè i ké ka li Labib touléjou é lèwvwè i ké ka priyé Jéova ! Pas an réyalité, sé kouté i ké ka kouté Jéova é sé palé i ké ka palé ba Jéova ! (Jak 4:8). Lèwvwè étidyan-la ké pran dé bon labitid konsa, sa ké édé-y pwogrésé pou ba Jéova vi a-y é pran lèbatèm. Men, ni dòt biten a fè ankò. Ki biten ésa ?
FÒ NOU ÉDÉ ÉTIDYAN AN NOU VIN BON BON ZANMI ÈVÈ JÉOVA
12. Kijan on anségnan pé édé étidyan a-y a vin bon bon zanmi èvè Jéova ?
12 Sé vré, sa nou vé sé kè étidyan an nou aprann konnèt Jéova pibyen men sa nou plis anvi ankò sé kè sa i aprann touché tchè a-y é kè sa pousé-y aji. Jézi té ka aprann sé moun-la onlo biten é sé moun-la té enmé lè i té ka anségné-yo. Men an réyalité, sa ki té ka pousé-yo suiv-li, sé pas i té ka touché tchè a yo (Lik 24:15, 27, 32). Fò étidyan a-w byen konprann kè Jéova sé on moun ki ka ègzisté vréman. Fò i mèt an tèt a-y kè Jéova pé vin Pap’a-y, i pé vin Bondyé a-y é i pé vin zanmi a-y osi (Sòm 25:4, 5). Pannan étid-la, fò ou toujou mèt kalité a Jéova douvan (Ègz. 34:5, 6 ; 1 Pyè 5:6, 7). Kèlkèswa sijé-la zò ka étidyé la, fò étidyan-la vwè kijan dè moun Jéova yé. Fò ou édé étidyan-la vwè kè Jéova plen lanmou, kè i vréman janti é kè i ka aji èvè onlo konpasyon. Konsa, i ké aprésyé sé bèl kalité-lasa. Jézi di kè ‘fò-nou enmé Jéova Bondyé an nou’. Sé « pli gran komandman-la é sè-y ki prèmyé-la » (Mat. 22:37, 38). Fò ou édé étidyan-la pou i pé sa enmé Jéova èvè tout tchè a-y.
13. Ka ki pé édé on étidyan vwè ki bèl kalité Jéova ni ?
13 Lè ou ka palé èvè étidyan a-w, èspliké-y poukwa, vou, ou enmé Jéova. Konsa, sa ké fè-y réfléchi ; i ké anvi vin bon bon zanmi èvè Jéova é kè i anvi enmé-y fò osi (Sòm 73:28). Pa ègzanp, ès ni on fraz an piblikasyon-la zò ka étidyé la oben on vèwsé ki ka touché tchè a-w ? Sé pé on biten ki anrapò èvè lanmou a Jéova, èvè sajès a-y, èvè jistis a-y oben èvè puisans a-y. Alò, palé étidyan a-w dè sa, é di-y kè sé on rézon ki ka fè kè ou enmé Pap’a-w ki an syèl-la osi. Men pou on étidyan pwogrésé é pran lèbatèm, i ni ondòt biten a fè ankò.
FÒ OU ANKOURAJÉ-Y VIN RÉINYON
Fè étidyan a-w konprann kè fò pa i tadé a vin réinyon ! (gadé sé paragraf 14 é 15 la).
14. Ka Ébré 10:24, 25 ka di anrapò èvè sé réinyon-la é kijan sa pé édé on étidyan pwogrésé ?
14 Noutout vé kè étidyan an nou pwogrésé é pran lèbatèm. On biten nou pé fè pou édé-yo sé ankourajé-yo vin réinyon. É sé on biten ki enpòwtan toubònman ! (Sòm 111:1). Frè é sè ki ni onlo èkspéryans an prédikasyon ka di kè lè on étidyan pa’a pèd tan pou vin lasal, i ka pwogrésé pi vit. Onlo anségnan ka di étidyan a yo kè sé vré kè yo ké aprann onlo biten pannan étid a yo, men kè lè yo ké vin lasal yo ké aprann plis biten ankò. Li Ébré 10:24, 25 èvè étidyan a-w é èspliké-y ki byenfé i ké jwenn si i vin lasal. Montré-y vidéo-la Ka ki ka fèt adan on Sal di Wayòm ? *. Édé étidyan a-w konprann kè fò i byen désidé a vin réinyon chak simenn.
15. Ka nou pé fè pou on étidyan pran labitid vin réinyon ?
15 Ka pou ou fè si étidyan a-w po’o jen vin lasal oben si i pa’a vin toutlè ? Palé-y dè on biten kè ou aprésyé adan on réinyon ki fèt pa ni lontan. Fè-y santi kè ou kontan sa ou aprann la toubònman ! Lè i ké vwè jan ou ka aprésyé sa ou ka aprann, i ké pi anvi vin vwè kijan sa ka pasé ki si ou kontanté-w dè envité-y. Ba-y Tou dè Gad a-y é Kayé Vi é Ministè a-y pou i pé sa suiv lè i ké vin lasal. Montré-y dè ki biten nou ké palé an pwochen réinyon-la é mandé-y ka i ka touvé pi entérésan. Lè étidyan a-w ké vin lasal, sa i ké tann é sa i ké vwè ké vréman diféran dè tousa i ja vwè adan sélézòt rèlijyon-la ! É pétèt kè sa ké touché tchè a-y toubònman ! (1 Kor. 14:24, 25). I ké fè konésans èvè dòt moun ki ké ba-y on bèl ègzanp é ki ké édé-y pwogrésé pou i pran lèbatèm.
16. Ka pou nou fè pou édé étidyan an nou pwogrésé é pran lèbatèm é ka nou ké vwè adan awtik-la ki ka vin la ?
16 Ka nou pé fè pou on étidyan pwogrésé é pran lèbatèm ? Si nou ankourajé étidyan an nou fè étid a-y chak simenn é si nou ankourajé-y préparé-y avan chak étid, sa ké édé-y vwè kè étid-la ni onlo enpòwtans. Nou vé ankourajé-y palé èvè Jéova é kouté-y touléjou é nou vé édé-y vin bon bon zanmi èvè Jéova osi. Nou vé ankourajé-y pou i anvi vin réinyon osi. (Gadé ti karé-la « Sa on étidyan dwètèt fè pou i pwogrésé é pran lèbatèm ».) Nou sòti vwè ka pou nou fè pou édé on étidyan pwogrésé pou i pran lèbatèm. Adan awtik-la ki ka vin la, nou ké vwè 5 biten pou nou fè ankò pou édé étidyan an nou.
KANTIK 76 Dis, qu’est-ce que tu ressens ?
^ par. 5 Lè nou ka anségné on moun savédi nou ka édé-y chanjé mantalité a-y, nou ka édé-y mèt dòt santiman anfon a tchè a-y é nou ka édé-y aji ondòt jan ki avan. An 2020, tèks a lanné-la sé té Matyé 28:19. I fè-nou sonjé on biten enpòwtan. Fò nou étidyé Labib èvè sé moun-la é fò nou montré-yo ka pou yo fè pou yo pran lèbatèm é pou yo vin disip a Jézikri. Adan awtik-lasa, é adan awtik-la ki ka vin la, nou ké vwè ka pou nou fè pou kò an nou vin pibon adan travay-lasa pas sé on travay ki vréman enpòwtan.
^ par. 2 POU NOU BYEN KONPRANN : Si ou ka diskité èvè on moun chak simenn é ou ka sèvi èvè Labib, ou pé di kè ou ni on étid biblik. Siwvwè ou montré on moun kijan on étid ka déwoulé é aprésa ou fè-y 2 fwa, ou pé konté on étid. Men sèlman, fò ou sèten kè étid-lasa ké kontinyé.
^ par. 3 Adan awtik-lasa, nou ké touvé 2 ou 3 lidé entérésan ki té adan sé Ministère du Royaume la ki parèt ant juiyé 2004 é mé 2005.
^ par. 9 Gadé vidéo-la Aprann étidyan a-w kijan pou i préparé-y. I ka diré 4 minit. (Ay adan JW Library®, asi MULTIMÉDIA > NOS RÉUNIONS ET NOTRE MINISTÈRE > DEVENONS PLUS HABILES).
^ par. 10 Ay asi LA BIBLE ET VOUS > OUTILS D’ÉTUDE DE LA BIBLE.
^ par. 14 Adan JW Library®, ay asi MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
