1. Ki kèsyon onlo moun ka pozé-yo é poukwa ?

JÒDIJOU, onlo rèlijyon ka di kè yo krétyen é yotout ka di kè sé yo ki ni lavérité. Kifè, onlo moun pa sav kikoté pou yo ay. Yo ka mandé-yo : « Ès ni on sèl vré rèlijyon ? oben ès Bondyé ka aksèpté tout sé rèlijyon-la ? » É vou, ès ou sèten a san pou san kè Témwen a Jéova ka anségné lavérité é kè jan-la yo ka adoré Bondyé la ka fè-y plézi ? Kijan nou pé sèten dè sa ? An-nou ègzaminé déotwa prèv ki ka montré sa.

2. Poukwa lapòt Pòl té sèten a san pou san kè i té touvé lavérité ? (1 Tésalonisyen 1:5).

² Lapòt Pòl té sèten a san pou san kè i té touvé lavérité (li 1 Tésalonisyen 1:5). Si Pòl té sèten dè sa, a pa enki paskè sa té ka fè-y dibyen men sé pas i té ka pran tan ègzaminé Pawòl a Bondyé byen konm i fo é pou-y « tout Ékriti-la, sé Bondyé ki enspiré-y » (2 Tim. 3:16). Lè i té ka étidyé Lézékriti, ka sa aprann-li ? I touvé plizyè prèv ki té solid é ki té ka montré kè Jézi sé té Mési-la ki té pou vin la. Men sé chèf a rèlijyon juif la pa tchenn kont dè sé prèv-lasa. Yo té ni 2 figi : yo té ka di kè yo té ka anségné pèp-la lavérité asi Bondyé men an menm balan-la yo té ka fè onlo biten Bondyé té hay (Tit 1:16). Pòl, kanta li, i pa té ka chwazi adan ki mòso a Pawòl a Bondyé i té ké kwè é adan ki mòso i pa té ké kwè. I té paré a anségné « tousa Bondyé vlé » é a mété-y an pratik (Akt 20:27).

3. Pou nou sèten kè nou touvé lavérité, ès fò-nou ni répons a tout kèsyon kè nou pé ka pozé-nou ? (gadé ti karé-la : «  Si sé té pou rakonté tousa biten Jéova fè é tousa i ka pansé “té’é ni twòp biten a di” »).

³ Pou sèwten moun vré rèlijyon-la dwètèt ba-w répons a tout kalté kèsyon menmsi Labib pa’a réponn vréman a sé kèsyon-lasa. Men ès sé konsa pou nou vwè sa ? An-nou wouvin asi ègzanp a Pòl. Sé vré, i di sé krétyen-la kè fò-yo « vérifyé tout biten » men limenm a-y rèkonnèt kè té ni  onlo biten kè i pa té ka konprann (1 Tés. 5:21). I ni lokazyon di kè nou pa konnèt tout biten é kè sé konsi nou ka gadé adan on glas an métal é kè nou pa’a byen vwè klè (1 Kor. 13:9, 12). Pòl pa té ka konprann tout biten é nou nonplis. Men i té rivé konprann sé vérité-la ki pi enpòwtan la anrapò èvè pwojé a Jéova. I pa té bizwen konnèt plis ki sa pou i té sèten kè i té touvé lavérité !

4. a) Ka nou pé fè pou nou pi sèten ankò kè nou touvé lavérité ? b) Ki biten nou ké ègzaminé anrapò èvè sé vré krétyen-la ?

⁴ Sé vré, nou ja sèten kè nou touvé lavérité men sa ki pé édé-nou vin pi sèten dè sa ankò sé si nou ka konparé jan Jézi té ka adoré Pap’a-y é sa sé Témwen a Jéova la ka fè jòdijou. Adan awtik-lasa, nou ké ègzaminé 4 biten anrapò èvè sé vré krétyen-la : 1) yo pa ka adoré pon idòl, 2) yo ka rèspèkté non a Bondyé, 3) yo enmé lavérité, é 4) yonn enmé lòt poudèbon.

5. Jézi montré kijan pou nou adoré Bondyé, ka ègzanp a-y ka aprann-nou é kijan nou pé mèt sa i anségné-nou an pratik ?

⁵ Jézi té enmé Jéova onlo. Sé pousa, ki lè i té an syèl-la ki lè i té asi latè, i toujou adoré enki Jéova (Lik 4:8). I aprann disip a-y osi kè sé enki Jéova pou yo adoré. Kifè, ni li, ni disip a-y pa jen sèvi èvè on imaj oben on èstati pou adoré Bondyé. Konm nou pé pa vwè Bondyé, ponmoun pé pa fè on biten ki ka sanm-li (Iz. 46:5). Ni onlo moun ki ka kriyé sèwten moun sen é yo jous ka fè imaj a sé moun-lasa pou yo pé sa priyé-yo. Men ès nou ni dwa fè sa ? Lè Jéova ba sé Izraélit-la sé 10 komandman-la, mi sa dézyèm komandman-la té ka di : « Fò pa ou fè pon èstati pou-w ni ayen ki ka sanm  pon biten ki anhola an syèl-la, oben ki asi latè [...]. Fò pa ou mété-w ajounou douvan yo » (Ègz. 20:4, 5). Moun ki vé fè Bondyé plézi ka konprann byen kè Jéova vé pa nou sèvi èvè pon imaj pou adoré-y. Pou yo, sa klè kon dlo asi wòch !

6. Ki ègzanp Témwen a Jéova ka suiv ?

⁶ Moun ki ka étidyé listwa ka di kè an tan a sé apòt-la, sé yenki Bondyé sé krétyen-la té ka adoré. Pa ègzanp, on liv ki ka palé dè istwa a sé krétyen-la * ka di kè ‘sonjé sé krétyen-la té’é sonjé pou yo sèvi èvè imaj pou adoré Bondyé sa té’é ba-yo malotchè’. Sé Témwen a Jéova la ka suiv ègzanp a sé prèmyé krétyen-lasa. Sé pousa, jòdijou, nou pa’a priyé pon « sen », nou pa’a priyé pon zanj é nou pa’a priyé Jézi nonplis. Nou pa ka adoré pon drapo é nou pa ka fè ayen nonplis ki ka montré kè nou ka adoré gouvènman a péyi an nou. Kèlkèswa sa yo té’é éséyé fè-nou fè, nou byen désidé a fè sa Jézi mandé-nou fè : « Sé Jéova Dyé a-w ou dwèt adoré » (Mat. 4:10).

7. Sé Témwen a Jéova la pa ni ayen a vwè èvè sélézòt rèlijyon-la. Pou ki rézon ?

⁷ Jòdijou, ni onlo moun ki enmé kouté bèl diskou a sèwten moun kè toutmoun konnèt adan légliz a yo. Tèlman yo ka pòté sé moun-lasa anlè, ou té jou di yo ka adoré-yo. Légliz a sé moun-lasa foul. Onlo moun ka achté liv a yo. Yo ka ba-yo lajan pou mèt an pòch a yo oben pou soutyenn sé òwganizasyon-la yo ni la. Sèwten moun ka bwè tout ti pawòl ki sòti an bouch a sé moun-lasa. Ou jous ni lenprésyon kè sé Jézi ki douvan yo tèlman yo kontan lè sé moun-lasa ka palé ba yo ! Men nou, sé Jéova nou ka adoré. Nou pa ka suiv lézòm, nou ka rèspèkté séla ki antèt a òwganizasyon an nou men nou pa ka oubliyé kè Jézi di osi :« Zòtout zo sé frè » (Mat. 23:8-10). Kifè, ki on moun té’é chèf a on rèlijyon, ki on moun té’é chèf a on pawti politik, nou pa ka adoré-y é nou pa ka soutyenn lidé a-y nonplis. Okontrè, nou pa ka pran pawti é nou pa ka mélanjé-nou adan zafè a mond-lasa. Adan domenn-lasa, nou pa ni ayen a vwè èvè tout sélézòt rèlijyon-la ki ka di kè yo krétyen la (Jan 18:36).

8. Kijan nou fè sav kè Jéova vé kè yo ba non a-y glwa é kè toutmoun konnèt non a-y ?

⁸ On jou, mi sa Jézi di adan on priyè : « Papa, ba non a-w glwa. » Alò, Jéova réponn-li é i palé fò pou toutmoun tann é i pwomèt-li kè i ké ba non a-y glwa (Jan 12:28). Pannan tout tan-la i préché asi latè, Jézi ba non a Pap’a-y glwa (Jan 17:26). Nou ka tou konprann kè sé vré krétyen-la fyèw dè sèvi èvè non a Bondyé é dè fè moun konnèt-li.

9. O 1^é syèk, kijan sé krétyen-la té ka montré kè yo té ka rèspèkté non a Bondyé ?

⁹ An tan a sé apòt-la, kèlkè tan apré yo mèt lasanblé krétyèn la anplas, Jéova « okipé dè sé nasyon-la pou chwazi moun adan yo pou yo vin on pèp pou non a-y » (Akt 15:14). Sé prèmyé krétyen-lasa té ka sèvi èvè non a Bondyé. Yo té ka fè toutmoun konnèt-li é yo té fyèw dè fè sa. Sé apòt-la é sé prèmyé krétyen-la té ka sèvi èvè non a Bondyé lèwvwè yo té ka préché é lèwvwè yo té ka maké sèwten liv a Labib *. Lè yo fè sa, yo montré kè yo sé pèp a Bondyé é kè sé yo tousèl ki té ka fè moun konnèt non a-y (Akt 2:14, 21).

10. Ka ki ka montré kè sé Témwen a Jéova la sé on pèp pou non a Bondyé ?

 ¹⁰ Ès sé Témwen a Jéova la sé on pèp pou non a Bondyé ? An-nou gadé pou vwè si sé sa menm. A épòk an nou, ni onlo chèf a rèlijyon ki fè tousa yo té pé pou anpéché moun sav kè Bondyé ni on non ki ta-y. Sé moun-lasa woté non a Bondyé adan sé Bib-la yo tradui la é délè, yo té ka entèwdi sé moun-la sèvi èvè non a Bondyé adan légliz a yo *. On biten ki klè, sé kè sé Témwen a Jéova tousèl ki ka ba non a Bondyé lonnè-la é rèspé-la i mérité la. Ki dòt rèlijyon ki ka pòté tousa mannèv pou fè moun konnèt non a Bondyé ? Nou sé Témwen a Jéova é dépi sé pou fè moun konnèt non a Bondyé, adan domenn-lasa, nou ka pòté non a Bondyé byen konm i fo (Iz. 43:10-12). Nou pwodui plis ki 240 milyon Bib : La Bible. Traduction du monde nouveau é adan yo, ou ka touvé non a Jéova. Nou woumèt non a Bondyé tout sé koté-la sélézòt tradiktè-la té woté-y la é nou ka pwodui piblikasyon ki bazé asi Labib an plis ki 1 000 lang é adan yochak ou ka touvé non a Bondyé. Konsa, onlo moun ka pé konnèt non-lasa !

11. Kijan sé prèmyé krétyen-la montré kè yo té enmé lavérité ?

¹¹ Jézi té enmé lavérité kivédi i té enmé vérité-la ki anrapò èvè Bondyé é èvè  pwojé a Bondyé osi. I viv annakò èvè vérité-lasa tout vi a-y é i fè lézòt konnèt vérité-lasa osi (Jan 18:37). É sé disip-la ki té ka suiv-li la aprézan ? Yo osi, yo té enmé lavérité (Jan 4:23, 24). Sé pousa, lapòt Pyè di konsa kè fwa a sé krétyen-la ka touvé-y kon chimen a lavérité (2 Pyè 2:2). Konm yo té enmé lavérité toubònman, yo té ka rèfizé kwè adan sa sé rèlijyon-la té ka anségné é ki pa té annakò èvè sé vérité-lasa. Anplisdisa, yo pa té ka aksèpté pon tradisyon ni pon lidé ki pa té annakò èvè vérité-lasa nonplis (Kol. 2:8). Menmjan-la jòdijou, sé vré krétyen-la ka « kontinyé maché adan lavérité » é yo ka fè sa lèwvwè yo ka fè tousa yo pé pou vi a yo é kwayans a yo annakò èvè Pawòl a Jéova (3 Jan 3, 4).

12. Lè sé frè a Komité santral la ka rann-yo kont kè ni on biten nou té ka kwè ki mérité chanjé, ka yo ka fè é poukwa yo ka fè sa ?

¹² Témwen a Jéova pa’a di kè yo ka konprann tout biten adan Bib-la konsi sé yo ki té maké-y. Délè, sa rivé kè yo tronpé-yo adan jan yo té ka èspliké on biten Labib ka anségné oben kè yo tronpé-yo adan mannyè yo té ka òwganizé-yo. Fò pa sa étoné-nou pas Labib ka montré on mannyè ki klè kè pi tan té’é ka pasé é pi pèp a Bondyé té’é konprann sé vérité-la myé (Kol. 1:9, 10). Sé piti-a-piti, Jéova ka fè-nou konprann vérité-la. Sé pousa, fò-nou ni pasyans é fò-nou atann jiskatan nou konprann sé vérité-la pibyen (Pwov. 4:18). Lè sé frè a Komité santral la ka rann-yo kont kè sa nou té ka kwè avan oben sa nou té ka fè avan mérité chanjé, yo pa’a pèd tan pou fè sé chanjman-lasa. Jòdijou, adan onlo légliz, sé moun-la ka chanjé sa yo ka anségné pas yo anvi fè sé moun a légliz-la plézi oben yo anvi fè toutmoun plézi. Men, a pa konsa Témwen a Jéova ka aji. Si yo fè sèwten chanjman, sé pas yo anvi vin pibon zanmi èvè Bondyé é sé pas yo anvi imité Jézi pibyen (Jak 4:4). Kifè, lèwvwè nou ka fè sèwten chanjman, a pa pou fè moun plézi men sé pas nou ka konprann Labib pibyen. A pa ti enmé nou enmé lavérité ! (1 Tés. 2:3, 4).

13. Sé vré krétyen-la ni onlo bèl kalité. Pawmi sé kalité-lasa, kilès ki pi bèl é kijan sé Témwen a Jéova la ka montré kè yo ni kalité-lasa ?

¹³ O 1^é syèk, toutmoun té sav kè sé prèmyé krétyen-la té ni onlo bèl kalité, men pi bèl la yo té ni la sé lanmou. Mi sa Jézi di : « Sé konsa toutmoun ké sav zò sé disip an mwen : si zò ni lanmou yonn pou lòt » (Jan 13:34, 35). Jòdila, sa ki ka fè si Témwen a Jéova soudé konsa sé lanmou. Nou pa ni ayen a vwè èvè pondòt rèlijyon pas nou ka fè pawti a on fanmi ki soudé. Adan fanmi-lasa, ou ka touvé moun ki sòti toupatou si latè é ki ni diféran kilti. Lè nou k’ay réinyon oben lè nou k’ay lasanblé nou ka vwè lanmou-lasa. Lè nou ka vwè lanmou-lasa, nou ka kwè pi fò ankò kè jan nou ka adoré Bondyé ka fè-y plézi.

14. Adan Kolosyen 3:12-14, yo ka palé dè on bèl mannyè nou pé montré frè é sè an nou kè nou enmé-yo fò. Ki mannyè ésa ?

¹⁴ Labib ka di-nou kè fò-nou ni « on lanmou ki fò toubònman yonn pou lòt » (1 Pyè 4:8). Kijan nou pé fè sa ? On bèl mannyè nou pé fè sa, sé lè nou ka padonné lézòt é lè nou ka pasé asi défo a yo. Nou ka fè sa osi lèwvwè nou ka chèché diféran lokazyon pou akéyi frè é sè an nou bra gran wouvè é lè nou ka montré-nou donan èvè yo menmsi nou ja trapé on ti bab èvè sèwten adan yo (li Kolosyen 3:12-14). Lèwvwè nou ka montré kè nou enmé frè é sè an nou konsa, nou ka montré kè nou sé disip a Kris vréman.

15. Pou nou adoré Jéova nou ka suiv ègzanp a sé prèmyé krétyen-la adan dòt domenn ankò. Kilès ?

¹⁵ Pou nou adoré Jéova, nou ka suiv ègzanp a sé prèmyé krétyen-la adan dòt domenn ankò. Pa ègzanp, nou òwganizé kon yo. Nou ni rèsponsab a siwkonskripsyon, nou ni ansyen, nou ni asistan é sé ègzaktèman konsa sé apòt-la té òwganizé osi (Filip. 1:1 ; Tit 1:5). É kon yo, nou ka rèspèkté sa Jéova ka di asi rèlasyon sèksyèl é asi mayé. Kon yo osi, nou ka rèspèkté tousa Jéova mandé-nou fè anrapò èvè san-la é menmjan ki yo nou ka fè sa ki fo pou pwotéjé lasanblé-la sianka on moun fè on péché adan lasanblé-la é kè i vé pa rèpanti-y (Akt 15:28, 29 ; 1 Kor. 5:11-13 ; 6:9, 10 ; Ébr. 13:4).

16. Ka Éfézyen 4:4-6 ka aprann-nou ?

¹⁶ Jézi té anonsé kè onlo moun té’é di dapré yo kè yo sé disip a-y men kè a pa yotout ki té’é suiv sa i anségné (Mat. 7:21-23). Lapòt Pòl té anonsé osi kè adan sé dènyé jou-la, onlo moun ké « sanm sa yo enmé Bondyé » (2 Tim. 3:1, 5). Poutan, Labib ka di on mannyè ki klè kè Bondyé ka aksèpté yenki « onsèl fwa » (li Éfézyen 4:4-6).

17. Jòdijou, kimoun ki ka imité Jézi é ki ka montré kè yo ni vré fwa-la ?

¹⁷ Jòdijou, kimoun ki ka montré kè yo ni vré fwa-la ? Adan awtik-lasa, nou ègzaminé déotwa prèv. Nou vwè kijan Jézi té ka adoré Pap’a-y é kijan sé disip-la fè éfò pou kontinyé imité-y. Alò, kimoun ki ka montré kè yo ni vré fwa-la jòdijou ? Ében sé enki sé Témwen a Jéova la. A pa ti kontan nou kontan pas nou ka fè pawti a pèp a Jéova é pas nou konnèt lavérité asi Jéova é asi pwojé a-y. Mi on bèl lonnè mi ! Alò, an-nou kontinyé fè tousa nou pé pou nou sèten a san pou san kè nou touvé lavérité.