1-2. a) Ki diférans ki ni ant Akab é Manasé ? b) A ki kèsyon nou ké réponn adan awtik-lasa ?

 AN-NOU gadé tibwen istwa a 2 wa ki viv an tan a Labib. Prèmyé-la té wa asi wayòm a Izrayèl ki té ni 10 tribi adan-y é dézyèm-la té wa asi wayòm a Jida ki té ni 2 tribi adan-y. Menmsi yo pa viv a menm épòk-la, ni onlo biten yo fè menmjan-la. Yo toulédé rèbélé-yo kont Jéova é yo fè pèp-la péché. Yo toulédé té ka adoré fo-dyé é yo tchouyé onlo moun. Men té ni on gran gran diférans ant sé dé nonm-lasa osi. Prèmyé-la kontinyé fè mové biten jistan i mò, men dézyèm-la rèpanti-y é yo padonné-y pou tout sé mové biten-la i té fè la. Aki sé 2 moun lasa ?

² Prèmyé-la sé Akab, wa a Izrayèl é dézyèm-la sé Manasé, wa a Jida. Jan-la sé 2 wa-lasa aji la ké aprann-nou onlo biten asi on sijé ki enpòwtan toubònman : lè on moun ka rèpanti-y (Akt 17:30 ; Wom. 3:23). Lè on moun ka rèpanti-y, ka sa vlé di é kijan i ka montré sa ? Si nou vlé Jéova padonné péché an nou, fò-nou réponn a sé kèsyon-lasa. Pou nou réponn, nou ké ègzaminé vi a Akab é ta Manasé é nou ké vwè ka sa ka aprann-nou. Aprésa, nou ké vwè ka Jézi di anrapò èvè on moun ki ka rèpanti-y.

3. Ki kalté wa Akab té yé ?

³ Akab sé té sétyèm wa-la ki té ka gouvèné asi sé 10 tribi a Izrayèl la. I mayé èvè Jézabèl, ki té fi a wa a Sidon. Sidon sé té on vil ki té rich é i té o nò a Izrayèl. Kifè, lèwvwè yo mayé, sa pèwmèt Izrayèl ni onpakèt lajan. Men pwoblèm-la sé kè akòz dè mayé-lasa, sé Izraélit-la koumansé  fè péché é yo pa té bon bon zanmi èvè Jéova ankò. Konm Jézabèl té ka adoré Baal, i té ka ankourajé Akab fè toutmoun rantré an rèlijyon a-y. Men rèlijyon-lasa pa té pwòp menm paskè non sèlman sé moun-la té ka vann kò a yo adan tanp a yo men yo té ka sakrifyé timoun a yo osi. Lè Jézabèl té rèn, tout pwofèt a Jéova té andanjé pas i té tchouyé onlo adan yo (1 Wa 18:13). Kanta Akab aprézan, i « fè biten pli mové an zyé a Jéova ki touséla ki té avan-y la » (1 Wa 16:30). Jéova té ka vwè byen tout sé mové biten-la Akab é Jézabèl té ka fè la. Men konm Jéova ni onlo mizérikòd, i voyé pwofèt Éli avèti-yo é avèti pèp a-y kè fò-yo té lagé mové biten yo té ka fè avan twota maré-yo. Men Akab é Jézabèl pa té vlé tann ayen.

4. Kijan Jéova di kè i té kay pini Akab, é kijan Akab réyaji ?

⁴ Rivé on lè, Jéova désidé aji. I voyé Éli di Akab kijan i té kay pini ki li, ki madanm a-y. Yo té kay tchouyé tout fanmi a-y. Sa Éli di la touché Akab toubònman ! Nou pé ni dimal a kwè sa, men tout akwè-y Akab té ka akwè-y, i montré-y toupiti (1 Wa 21:19-29).

5-6. Ka ki ka montré kè Akab pa té rèpanti-y poudèbon ?

⁵ Menmsi lè sa rivé Akab montré kè i té ni imilité, jan-la i aji apré la ka montré kè i pa té rèpanti-y vréman. Asi téritwa a wayòm a-y, pèp-la té ka adoré Baal é i pa fè ayen pou yo arété fè sa. É i pa fè ayen nonplis pou ankourajé pèp-la adoré Jéova. Anplisdisa, i fè dòt biten ankò ki té ka montré kè i pa té rèpanti-y vréman.

⁶ Kèlkètan apré, Akab mandé Jozafat, wa a Jida, si i té pé vin èvè-y pou yo té pé sa ay goumé èvè sé Siriyen-la. Men konm Jozafat sé té on bon wa é kè i té ka fè Jéova konfyans. I mandé Akab si avan sa, yo té pé ay vwè pwofèt a Jéova. Men Akab pa té dakò. Mi sa i réponn : « Ni ondòt moun ankò ki pé di-nou sa Jéova ka pansé, men an pé pa vwè misyé, pas chakfwa i ni on pwofési anrapò èvè mwen, sé toujou pou di-mwen on mové biten ! » Finalman, yo toulédé ay vwè pwofèt Mikaya. É kon Akab té di, sa pwofèt la anonsé la pa té on bon nouvèl pou Akab ! Men olyé i rèpanti-y é olyé i mandé Jéova padon, Akab fè-yo fèmé Mikaya lajòl (1 Wa 22:7-9, 23, 27). Menmsi i té mèt Mikaya lajòl, i pa té pé anpéché pwofési-la réyalizé. Anfinaldikont, i mò adan lagè-la (1 Wa 22:34-38).

7. Kijan Jéova palé dè Akab lèwvwè i mò ?

⁷ Jéova pèwmèt kè Jozafat rantré akaz a-y é pon malè pa rivé-y. Men apré mò a Akab, i di ka i té ka pansé dè Akab. I voyé pwofèt Jéyi tonbé an zo a Jozafat akòz dè alyans-la i té fè la èvè Akab. Mi sa Jéyi di-y : « Ès sé moun méchan pou ou té édé ? Ès sé moun ki hay Jéova pou ou enmé ? » (2 Kron. 19:1, 2). An-nou réfléchi asi sa : si Akab té rèpanti-y poudèbon, Jéyi pa té’é di kè i té méchan é kè i té hay Jéova. Menmsi Akab té di kè i té ka règrété, an réyalité i pa jen rèpanti-y vréman pou sé péché-la i té fè la.

8. Ka ègzanp a Akab ka aprann-nou ?

⁸ Ka ègzanp a Akab ka aprann-nou ? Odépa, lè Éli di-y konsa kè malè té’é rivé fanmi a-y, Akab montré-y toupiti. Lèwvwè i fè sa sé té on bon biten. Men jan-la i aji la apré té ka montré kè i pa té rèpanti-y poudèbon. Lè on moun ka rèpanti-y, i pé pa kontanté-y dè di kè i ka règrété sa i fè. Pou nou konprann sa plibyen, an-nou palé dè ègzanp a Manasé.

9. Ki kalté wa Manasé té yé ?

⁹ 200 an apré, Manasé vin wa a Jida. É pétèt kè Manasé té pli mové ki Akab ankò ! Mi sa Labib ka di : « I fè onlo onlo mové biten kè Jéova pa té enmé, èspré pou fè-y fè kòlè » (2 Kron. 33:1-9). I konstwi lotèl pou sé fo-dyé-la, i fè on poto ki sakré pou on dyé ki payen é i jous mèt sa adan Tanp a Jéova ki sen ! I ay vwè manti-mantè, i pratiké lamaji, i fè sòsyé é i tchouyé onpakèt inosan. I jous sakrifyé pwòp gason a-y. I brilé-yo an difé pou sé fo-dyé-la (2 Wa 21:6, 7, 10, 11, 16).

10. a) Kijan Jéova korijé Manasé ? b) Kijan Manasé réyaji ?

¹⁰ Menmjan ki Akab, Manasé rèfizé tchenn kont dè sé avèwtisman-la Jéova té bay la lèwvwè i té voyé pwofèt a-y palé ba-y. Anfinaldikont, Jéova fè ansòt pou chèf a lawmé a Lasiri ataké Jida. « Yo kòchté Manasé pou yo pé sa kenbé-y, yo maré-y èvè dé chenn an kuiv é yo menné-y Babilòn ». Lèwvwè yo mété-y lajòl adan on péyi i pa té konnèt, i ka sanm sa Manasé mété-y ka réfléchi asi tousa i té fè. « I montré-y toupiti toubònman douvan Bondyé a zansèt a-y ». Men i pa fè enki sa. « I sipliyé Jéova Bondyé a-y. » Anfèt, i kontinyé priyé-y èvè tout fòs a-y. Tout méchan misyé té méchan, i koumansé vin ondòt jan dè moun. I koumansé vwè Jéova kon Bondyé a-y é i té ka priyé-y toutlè (2 Kron. 33:10-13).

11. Dapré 2 Kronik 33:15, 16, kijan Manasé montré kè i rèpanti-y poudèbon ?

¹¹ Anfinaldikont, Jéova réponn a priyè a Manasé. Lè Jéova té ka kouté priyè a-y, i té ka rann-li kont kè i té chanjé. Sa touché tchè a Jéova, kifè i désidé woufè-y vin wa. A moman-lasa, Manasé fè tousa i té pé pou montré ké i té rèpanti-y poudèbon. I fè on biten Akab pa jen fè : i chanjé konpòwtèman a-y. I pòté bon mannèv pou i té pé sa woté tousa ki té anrapò èvè sé fo-dyé-la an péyi-la. É i ankourajé pèp-la adoré Jéova (li 2 Kronik 33:15, 16). Manasé té bizwen onlo kouraj é i té bizwen onlo fwa osi pas pannan plizyè lanné i té on mové ègzanp ki sé pou fanmi a-y, ki sé pou sé moun-la ki té enpòwtan la adan wayòm-la, ki sé pou pèp-la. Men asi dènyé jou a-y, i fè tousa i té pé pou réparé sèwten mové biten i té fè. Lè i fè sa, i vin on bon ègzanp pou Jozyas, timoun a gason a-y, pas plita Jozyas vin on bon wa (2 Wa 22:1, 2).

12. Ka ègzanp a Manasé ka aprann-nou ?

¹² Ka ègzanp a Manasé ka aprann-nou ? Manasé montré-y toupiti men i pa fè enki sa. I priyé Jéova é i sipliyé-y pou i té pé sa aji èvè mizérikòd épi-y. I chanjé konpòwtèman a-y. I fè lèmaksimòm pou  réparé sé déga-la i té fè la. I fè tousa i té pé osi pou adoré Jéova é i ankourajé lézòt a fè menm biten-la. Ègzanp a Manasé ka ba moun ki fè mové biten on èspwa menmsi sé péché-la yo fè la grav toubònman. Istwa-lasa ka montré kijan Jéova sé on Bondyé ki « enmé sa ki byen » é ki « paré a padonné » (Sòm 86:5). Jéova pé padonné-nou si nou ka rèpanti-nou èvè tout tchè an nou.

13. Lè nou fè on péché, sa enpòwtan kè nou règrété sa nou fè men sa pa’a sifi. Ki ègzanp ki ka montré-nou sa ?

¹³ Sé vré kè Manasé règrété sé péché-la i té fè la. Men a pa sa tousèl i fè. Sa ka montré-nou kè lèwvwè on moun bizwen rèpanti-y i ni ondòt biten enpòwtan a fè ankò. An-nou pran on ègzanp. Imajiné ou k’ay adan on patisri é ou ka mandé on gato. Lèwgadé olyé moun-la ki an patisri-la ba-w on gato, i ka ba-w on zé. Ès ou ké kontan ? Sèten sa pé ké fè-w plézi ! É si moun-la ka di-w kè dè tout fason sé èvè zé yo ka fè gato, ès ou ké aksèpté sa ? Awa ! Menmjan-la osi, Jéova ka mandé on moun ki fè on péché rèpanti-y. Si moun-la ki fè péché-la ka règrété sa i fè, sé on biten ki byen pas pou ou pé sa rèpanti-w, dabò, fò ou règrété sa ou fè. Men sa pa’a sifi. Ka pou nou fè ankò ? Ében sé sa nou ké vwè adan on istwa Jézi rakonté.

14. Adan ègzanp-la Jézi pran la, gason-la fè plizyè biten ki montré kè i té vlé rèpanti-y. Ki biten ésa ?

¹⁴ Jézi rakonté istwa a on gason ki té pèd é sa ka ankourajé-nou. Nou ka touvé istwa-lasa an Lik 15:11-32. On jenn gason ba pap’a-y do é i pati lwen lwen lwen adan ondòt péyi. Aprésa i mété-y ka menné on vyé vi. Men lè i vwè kè zafè a-y té mélé, i koumansé réfléchi asi sé mové désizyon-la i té pran la. I rann-li kont kè lè i té aka pap’a-y, i té alèz a-y. Men aprésa, Jézi di kè « i woupran sans a-y ». Kifè, i désidé viré akaz a-y é i désidé mandé pap’a-y padon. Sa té enpòwtan kè i té rann-li kont kè i té tonbé byen ba. Ès sa té ka sifi ? Awa, fò i té chanjé konpòwtèman a-y !

15. Kijan gason-la ki té pèd la montré kè i té ka rèpanti-y vréman ?

¹⁵ Gason-la ki té pèd la rèpanti-y vréman. I fè onpakèt chimen pou rantré akaz a-y. Lèwvwè i rivé owa pap’a-y, mi sa i di-y : « Papa, an péché kont Bondyé é an péché kont vou. An pa mérité yo kriyé-mwen gason a-w ankò » (Lik 15:21). Lè i di sé pawòl-lasa i té sensè é sa té ka montré kè i té anvi wouvin bon bon zanmi èvè Jéova. I rèkonnèt osi kè sa i té fè la té fè pap’a-y lapenn. I té paré a fè sa ki fo pou wouvin byen èvè pap’a-y. I té  jou paré a travay konm ouvriyé pou pap’a-y ! (Lik 15:19). Istwa-lasa pé itil pou sé ansyen-la toubònman. Sa pé édé-yo lèwvwè yo bizwen sav si on moun ki fè on péché grav ka rèpanti-y vréman.

16. Poukwa sé ansyen-la pé ni dimal a vwè si on moun ka rèpanti-y vréman ?

¹⁶ Lè sé ansyen-la ka chèché a sav si on moun ka rèpanti-y vréman sa pa fasil. Poukwa nou ka di sa ? Pas sé ansyen-la pé pa sav sa ki an tchè a on moun. Kifè, fò-yo éséyé touvé prèv ki ka montré ké konnyéla moun-la hay péché-la i fè la toubònman. Dépawfwa, sitiyasyon-la ka choké moun tèlman, kè sé ansyen-la pé ni dimal a vwè si moun la ka rèpanti-y vréman.

17. a) A pa paskè on moun ka di kè i ka règrété sa i fè kè sa vlé di kè i ka rèpanti-y poudèbon. Ki ègzanp ki ka montré sa ? b) Dapré 2 Korentyen 7:11, lè on moun ka di kè i ka rèpanti-y poudèbon, ka pou i fè ?

¹⁷ An-nou pran on ègzanp. On frè rété ka tronpé madanm a-y pannan plizyè lanné. Olyé i mandé moun édé-y, i pa’a di ni madanm a-y, ni zanmi a-y, ni sé ansyen-la ayen. Lèwgadé, on moun k’ay di sé ansyen-la sa. Lè sé ansyen-la ka di-y kè yo ni prèv kè i fè on péché, i ka di-yo toutbiten-la é i ka sanm sa sa ka chouboulé-y toubònman. Men ès sa ka sifi ? Menmsi i ka règrété sa i fè la, sé ansyen-la ki ka okipé-yo dè afè-lasa pé pa kontanté-yo dè sa sèlman. A pa onsèl fwa moun-la péché akòz dè on mové désizyon kè i pran. Men i kontinyé fè plizyè péché ki grav pannan plizyè lanné. Anplisdisa, a pa li ki ay di sé ansyen-la sa i fè, sé ondòt moun ki ay di-yo sa. Alò sé ansyen-la ké bizwen prèv ki ka montré kè i chanjé létadèspri a-y é kè i chanjé konpòwtèman a-y osi (li 2 Korentyen 7:11). Pétèt sa ké mandé moun-lasa onlo tan pou fè sé chanjman-la ki fo la. É pétèt kè sa ké nésésè kè yo èskominyé-y jiskatan i montré kè i rèpanti-y poudèbon (1 Kor. 5:11-13 ; 6:9, 10).

18. Lèwvwè on moun yo èskominyé ka rèpanti-y vréman, ka i ka fè ? É si i ka fè sa, ka ki ké rivé ?

¹⁸ Lè on moun yo èskominyé ka rèpanti-y poudèbon i ka fè ansòt pou vin réinyon chak simenn. Anplisdisa, i ka kouté sé konsèy-la sé ansyen-la ka ba-y la, i ka pran labitid priyé é étidyé. I ka fè atansyon pou i pa touvé-y adan dé sitiyasyon ki pé fè-y woutonbé adan menm péché-la. Si i ka fè tousa i pé pou wouvin bon bon zanmi èvè Jéova, i pé sèten kè Jéova ké padonné-y é kè sé ansyen-la ké édé-y pou i pé sa wouvin adan pèp a Bondyé. Nou ka tou konprann kè pou sé  ansyen-la chak sitiyasyon diféran, kifè yo ka pran tan a yo pou ègzaminé chak sitiyasyon é yo pa’a jen two rèd lèwvwè yo ka jijé on afè.

19. Dapré Ézékyèl 33:14-16, lè on moun ka rèpanti-y poudèbon ka sa vlé di ?

¹⁹ Kon nou vwè-y, lè on moun ka rèpanti-y poudèbon a pa di i ka di tousèl kè i ka règrété sa i fè la men i ka chanjé létadèspri a-y é i ka mété-y ka aji byen konm i fò. Sa vlé di kè i ka viré owa Bondyé, kivédi i ka lagé tout mové biten kè i té ka fè é i ka suiv prensip a Jéova adan vi a-y (li Ézékyèl 33:14-16). Sa ki dwètèt pli enpòwtan pou on moun ki fè on péché sé kè i wouvin bon bon zanmi èvè Jéova.

20-21. Kijan nou té’é pé édé on moun ki fè on péché rèpanti-y ?

²⁰ An Lik 5:32, Jézi palé dè on biten enpòwtan ki té ka fè pawti a ministè a-y. Mi sa i di : « An vin pou di moun ki ka fè péché rèpanti-yo. » Nou osi nou dwèt anvi fè menm biten ki-y. Asipozé kè ou aprann kè on zanmi a-w fè on péché ki grav, ka pou-w fè ?

²¹ Si ou ka éséyé kaché fòt a zanmi a-w sé enki ditò kè ou ké fè-y. Sa pé’é menné-zòt ponkoté pas Jéova ka vwè toutbiten (Pwov. 5:21, 22 ; 28:13). Ou pé éséyé fè-y rézonné é fè-y sonjé kè sé ansyen-la ké kontan édé-y. É siwvwè zanmi a-w vé pa ay di sé ansyen-la sa i fè, a moman-lasa sé voumenm ki dwètèt ay di-yo sa. Konsa ou ké montré kè ou vlé édé zanmi a-w vréman. Sa enpòwtan pas si ou pa’a fè sa i ka riské dè pèd lanmityé a-y èvè Jéova !

22. Ka nou ké vwè adan awtik-la ki ka vin la ?

²² Délè, sa pé rivé kè on moun fè on péché ki tèlman grav é kè i fè sa pannan onpakèt tan kè sé ansyen-la ka désidé èskominyé-y. Ès sa vlé di kè sé ansyen-la pa ka aji èvè mizérikòd épi moun-lasa ? Adan awtik-la ki ka vin la, nou ké vwè kè lèwvwè Jéova ka korijé on moun ki fè on péché, i ka aji èvè mizérikòd épi-y é nou ké vwè osi kijan nou pé imité-y.