1. a) Si fò ou té palé dè on moun ki ni mizérikòd, ka ou té’é di ? b) Ki istwa ki ka vin an lèspri an nou lè nou bizwen èspliké on moun ka ki mizérikòd ?

SI FÒ ou té palé dè on moun ki ni mizérikòd, ka ou té’é di ? Sèten kè ou té’é di kè moun-lasa janti, kè toutmoun alèz èvè-y, kè i ni konpasyon é kè i donan. É pétèt ou ké sonjé ègzanp a bon Samariten-la kè Jézi té pran la. Misyé-lasa pa té Juif men i aji èvè mizérikòd èvè on Juif. On bann vòlè té ba misyé-la bon kou é yo blésé-y. Lè Samariten-la vwè Juif-la atè-la, sa fè-y lapenn é i pran swen a-y èvè onlo bonté (Lik 10:29-37). Ègzanp-lasa ka montré-nou on bèl kalité kè Bondyé ni : mizérikòd. Bondyé ka aji èvè mizérikòd épi nou pas i enmé-nou é i ka montré-nou sa plizyè fason diféran. Anplisdisa, i ka fè sa touléjou.

2. On moun pé aji èvè mizérikòd ondòt mannyè ankò. Kilès ?

² On moun pé aji èvè mizérikòd ondòt mannyè ankò. Pa ègzanp, i pé désidé kè i pé’é pini on moun alòskè moun-lasa té’é mérité yo pini-y. Pli souvan ki rarman, sé konsa Jéova ka aji èvè nou. Dayè, sé sa David ni lokazyon di : « I pa ka aji èvè nou sèlon péché nou fè » (Sòm 103:10). Sé vré, men sa pé rivé ké Jéova karé lè i ka korijé on moun ki fè on péché.

3. A ki kèsyon nou ké réponn adan awtik-lasa ?

³ Adan awtik-lasa nou ké réponn a 3 kèsyon : Poukwa Jéova ka aji èvè mizérikòd ? Lèwvwè yo ka korijé on moun adan lasanblé-la, si yo karé èvè-y, ès sa vlé di kè yo pa ka aji èvè mizérikòd èvè-y ? É ka ki ké édé-nou aji èvè mizérikòd ? An-nou vwè kijan Labib ka réponn a sé kèsyon-lasa.

4. Poukwa Jéova ka aji épi mizérikòd èvè nou ?

⁴ Jéova ka aji èvè mizérikòd èvè nou pas i enmé nou. Lapòt Pòl maké on lèt pou sé Éfézyen-la é i di-yo kè Jéova ni onlo onlo mizérikòd. I di-yo kè Jéova montré kè i ni mizérikòd pas  i chwazi moun ki enpawfè pou vin wen é i ba-yo lèspwa dè ay viv an syèl-la (Éféz. 2:4-7). Men a pa enki èvè sé krétyen wen la Jéova ka aji èvè mizérikòd. Mi sa David ni lokazyon maké : « Jéova ka fè toutmoun dibyen, é kèlkanswa sa i ka fè, ou ka vwè sé èvè mizérikòd i ka fè-y » (Sòm 145:9). Dépi sa posib, Jéova ka aji èvè mizérikòd èvè noutout pas i enmé-nou.

5. Jéova enmé aji èvè mizérikòd. Kijan Jézi fè pou vwè sa ?

⁵ Jézi sav kijan Pap’a-y enmé aji èvè mizérikòd é pa ni ponmoun ki sav sa myé ki-y. Avan i té désann asi latè, li é Pap’a-y rété onpakèt lanné ansanm an syèl-la (Pwov. 8:30, 31). Jézi vwè Pap’a-y aji èvè mizérikòd èvè moun ki enpawfè é i ni lokazyon vwè sa a plizyé rèpriz (Sòm 78:37-42). É lè i té ka anségné moun, souvantfwa, Jézi té ka palé dè jan Pap’a-y té ni bèl kalité-lasa.

6. Ki ègzanp Jézi pran pou montré-nou jan Pap’a-y ni mizérikòd ?

⁶ Kon nou vwè-y adan awtik a simenn pasé, Jézi sèvi èvè istwa a gason-la ki té pèd la pou édé-nou konprann jan Jéova ni mizérikòd. Tiboug-la kité kaz-la é i dépansé tousa i té ni pas i menné on vyé vi. I fè onlo biten ki pa té pwòp (Lik 15:13). Men aprésa, i rèpanti-y, i montré-y toupiti é i viré akaz a-y. Kijan pap’a-y réyaji ? Jenngason-la pa tadé pou ni répons-la. Mi sa Jézi di : « Alòskè i té ka rété-y bon tibwen chimen a fè toujou, pap’a-y vwè-y olwen é sa fè-y lapenn pou-y. I kouri jwenn-li, i pran-y an dé bra a-y é i bo-y èvè tandrès. » Pap’a-y pa fè-y wont, men èvè mizérikòd, i padonné-y é i akéyi-y bra gran wouvè akaz a-y. Gason-la ki té pèd la fè onlo péché ki té grav toubònman men konm i rèpanti-y, pap’a-y padonné-y. Adan istwa-lasa papa-la ki plen mizérikòd, sé Jéova. É Jézi sèvi èvè ègzanp-lasa pou montré-nou jan Pap’a-y anvi padonné moun ki ka fè péché é ki ka rèpanti-yo poudèbon. Sé on istwa ki ka touché-nou tonbònman (Lik 15:17-24).

7. Lè Jéova ka aji èvè mizérikòd, sa ka montré kè i ni onlo sajès. Kijansa ?

⁷ Jéova ka aji èvè mizérikòd épi nou pas i ni onlo onlo sajès. Lèwvwè Jéova ka pran on désizyon, sé toujou bon biten sa ka menné pou kréyasyon a-y, pas Labib ka di kè « sajès-la ki ka sòti anhola [...] plen mizérikòd é i ka fè enpé bon biten » (Jak 3:17). Menmjan ki on papa ki plen lanmou, Jéova ka aji èvè mizérikòd épi timoun a-y pas i sav sa ké fè-yo dibyen (Sòm 103:13 ;  Iz. 49:15). Konm Jéova ka aji èvè mizérikòd épi nou, sa ka ban-nou on èspwa pou dèmen menmsi nou enpawfè. Dépi ni on bon rèzon, sajès a Jéova ka pousé-y aji èvè mizérikòd épi nou. Men a pa paskè Jéova ka aji épi mizérikòd èvè nou kè i ka aksèpté kè nou fè nenpòt kibiten !

8. Délè ki dispozisyon ki nésésè é poukwa ?

⁸ Asipozé on frè oben on sè désidé menné on vyé vi. A moman-lasa ka pou nou fè ? Jéova mandé Pòl di lasanblé-la « arété frékanté » on moun konsa (1 Kor. 5:11). Sé pousa, yo ka èskominyé moun ki ka fè péché men ki pa ka rèpanti-yo. Dispozisyon-lasa annakò èvè prensip a Jéova é sé on biten ki nésésè pou pwotéjé sé frè é sè-la adan lasanblé-la. Men sa pé rivé kè sèwten moun ni dimal a vwè mizérikòd a Jéova dèyè dispozisyon-lasa. An-nou pran tan ègzaminé sa byen.

9-10. Sèlon Ébré 12:5, 6, poukwa nou pé di kè lèwvwè yo ka èskominyé on moun, yo ka aji èvè mizérikòd épi-y ? Bay on ègzanp.

⁹ Si nou lasal é nou ka tann kè yo ka di kè on moun nou enmé « pa Témwen a Jéova ankò », sèten sa ké fè-nou lapenn. Pétèt nou pé mandé-nou ès yo té oblijé èskominyé-y. Lè yo ka èskominyé on moun, ès yo ka aji épi mizérikòd èvè-y ? Wi. Si on moun mérité kè yo korijé-y men kè yo pa’a fè-y, sé té ké konsi yo pa té ka aji èvè sajès, mizérikòd é lanmou èvè-y (Pwov. 13:24). Lè on moun pa ka rèpanti-y é kè yo ka èskominyè-y, ès sa pé édé-y chanjé ? Wi. Onlo moun ka di kè sé lèwvwè yo èskominyé-yo kè yo rann-yo kont kè yo fè on péché ki grav, é sa édé-yo chanjé é viré an 2 bra a Jéova (li Ébré 12:5, 6).

¹⁰ An-nou pran on ègzanp : Imajiné on bèwjé ka rann-li kont kè yonn adan timouton a-y malad. I sav kè pou timouton-la géri fò i woté-y adan twoupo-la é mété-y apa. Men nou sav kè sé timouton-la enmé viv ansanm é lèwvwè yo ka mété-yo apa, sa pé istrésé-yo. Si bèwjé-la ka désidé mèt timouton-la apa pou swangné-y, ès sa vlé di kè i rèd èvè-y oben kè i méchan ? Awa. I sav byen kè si i lésé timouton malad la èvè sélézòt mouton-la, yotout ké malad osi. Kifè, lè i ka mèt timouton-la apa, sé pwotéjé i ka pwotéjé tout twoupo-la (gadé Lévitik 13:3, 4).

11. a) Poukwa nou pé di kè on moun ki èskominyé kon on timouton ki malad ? b) Lèwvwè on moun èskominyé, dè kibiten i pé bénéfisyé ?

¹¹ Nou pé konparé on moun ki èskominyé èvè on timouton ki malad. Konm moun-lasa pa bon zanmi èvè Jéova ankò, sé konsi i malad (Jak 5:14). Défwa, lè on moun malad, i pé ba dòt moun maladi a-y. Menmjan-la, lèwvwè on moun pa bon zanmi èvè Jéova ankò, i pé pousé dòt moun fè mové biten kon-y. Sé pousa délè, sa enpòwtan kè yo mèt moun-lasa apa. Lèwvwè Jéova ka korijé on moun, i ka montré kè i enmé sélézòt frè é sè-la ki adan lasanblé-la é ki ka fè éfò pou rété fidèl a-y. I ka montré osi kè i anvi kè moun-lasa rann-li kont kè i fè on mové biten é kè i rèpanti-y. Menmsi moun-lasa èskominyé, i pé kontinyé vin réinyon, konsa, i ké tann sé konsèy-la ki an Bib-la é i ké pé konsolidé fwa a-y. Anplisdisa, i pé li é i pé étidyé piblikasyon an nou. I pé gadé émisyon a JW Télédifizyon^® osi. Lè sé ansyen-la ké vwè kè moun-lasa ka fè chanjman an vi a-y, dè tanzantan yo ké pé ba-y déotwa konsèy pou i wouvin bon bon zanmi èvè Jéova é aprésa i ké pé woufè pawti a lasanblé-la *.

12. Lè on moun vlé pa rèpanti-y, ka sé ansyen-la pé fè pou montré kè yo enmé-y é pou aji épi mizérikòd èvè-y ?

 ¹² Sa enpòwtan toubònman kè nou sonjé kè sé sèlman si on moun ki péché pa ka rèpanti-y kè yo ka èskominyé-y. Sé ansyen-la sav kè avan yo désidé èskominyé on moun, fò-yo pran tan réfléchi byen. Yo sav kè lèwvwè Jéova ka korijé on moun, i ka fè sa byen konm i fo é yo vlé aji menmjan ki-y (Jér. 30:11). Yo enmé frè é sè a yo é yo vlé pa fè ayen ki ka anpéché-yo rété bon bon zanmi èvè Jéova. Men défwa, méyè mannyè sé ansyen-la pé montré on moun ki péché kè yo enmé-y é kè yo ka aji èvè mizérikòd épi-y, sé lè yo ka woté-y adan lasanblé-la pannan on sèwten tan.

13. Poukwa yo èskominyé on krétyen adan lasanblé a Korent ?

¹³ A Korent, ni on frè ki fè on péché é i pa té vlé rèpanti-y. An-nou vwè ki enstriksyon Pòl ba sé krétyen Korent la asi sa. Misyé-lasa té ka viv èvè madanm a pap’a-y. Mi on malpwòpté mi ! Pòl té sav kè Jéova té di sé Izraélit-la : « Lè on misyé ka kouché èvè madanm a pap’a-y, i ka dérèspèkté pap’a-y. Fò-yo ké tchouyé ki misyé-la ki madanm-la » (Lév. 20:11). Nou ka tou konprann kè Pòl pa mandé sé krétyen-la tchouyé misyé-la. Men i mandé sé krétyen Korent la èskominyé misyé-lasa. Mové konduit-la misyé-la té ni la té ka détenn asi sé moun-la ki té adan lasanblé-la pas ni onlo adan yo ki pa té ka vwè pon pwoblèm adan sa (1 Kor. 5:1, 2, 13).

14. Dapré 2 Korentyen 2:5-8, 11, kijan Pòl aji èvè mizérikòd èvè frè Korent la yo té èskominyé la, é poukwa i fé sa ?

¹⁴ Plita Pòl aprann kè boug-lasa té fè dé gwo chanjman adan vi a-y. I rèpanti-y poudèbon ! Menmsi sa i té fè la té sali lasanblé-la, Pòl di sé ansyen-la kè i pa té vlé montré-y two rèd èvè-y. Mi sa i di-yo : « Sé plito padonné pou zò padonné-y volontyé, é fò-zòt konsolé-y ». Pòl èspliké poukwa i di sa. Mi sa i di : « Pou pon gwo lapenn pa chayé-y. » Pòl té ni pityé pou boug-lasa pas i rèpanti-y. I pa té vlé kè boug-lasa néyé anba on gwo tristès é kè sa fè-y arété mandé Bondyé padon (li 2 Korentyen 2:5-8, 11).

15. Kijan sé ansyen-la pé montré kè yo karé èvè on moun é aji èvè mizérikòd épi-y an menm balan-la ?

¹⁵ Menmjan ki Jéova, a pa ti kontan sé ansyen-la ka kontan lè yo ka aji épi mizérikòd èvè on moun ! Yo ka montré kè yo karé lèwvwè sa nésésè é yo ka aji épi mizérikòd lèwvwè sa posib. Si sé ansyen-la pa té ka korijé moun-la ki péché la ditou, yo  pa té ké aji épi mizérikòd èvè-y. Okontrè, sé soutiré yo té’é ka soutiré-y. Men èskè sé enki sé ansyen-la ki dwètèt aji èvè mizérikòd ?

16. Dapré Pwovèb 21:13, ka Jéova ké fè moun ki pa ka aji épi mizérikòd èvè lézòt ?

¹⁶ Tout sé krétyen-la ka fè éfò pou imité Jéova é aji èvè mizérikòd. Poukwa yo ka fè sa ? Pas yo sav kè si yo pa’a aji èvè mizérikòd, Jéova pé’é kouté-yo (li Pwovèb 21:13). Sa té’é byen domaj si Jéova pa té ka kouté priyè an nou. Sé pousa, an-nou fè atansyon pou nou pa vin two rèd èvè lézòt oben pou nou pa vin kon dé moun ki pa ni tchè. Olyé nou fè konsi nou pa’a tann lè frè é sè an nou ka soufè, an-nou toujou paré a kouté lè piti-la ka hélé. An-nou fè tousa nou pé pou mèt konsèy-lasa an pratik : « Pas sila ki pa ni labitid aji èvè mizérikòd, yo ka jijé-y san pon mizérikòd » (Jak 2:13). Si nou ni imilité, nou ké sonjé kè nou osi nou bizwen kè yo aji èvè mizérikòd épi nou é sa ké pi fasil pou nou aji èvè mizérikòd èvè lézòt. Men siwtou nou vlé aji épi mizérikòd èvè moun ki rèpanti-yo é ki wouvin a Jéova.

17. David aji èvè mizérikòd é sa té ka sòti anfon a tchè a-y. Kijansa ?

¹⁷ Adan Labib nou ka touvé ègzanp a onlo sèwvitè a Bondyé ki pé édé-nou aji épi mizérikòd é a pa vin two rèd èvè lézòt. An-nou palé dè ègzanp a wa David. Souvantfwa, i aji èvè mizérikòd é sa té ka sòti an fon a tchè a-y. Lèwvwè Sayil té ka chèché a tchouyé-y i aji épi mizérikòd èvè-y pas i té sav sé Jéova ki té chwazi Sayil. I pa jen chèché a vanjé-y é i pa jen chèché a fè-y ditò (1 Sam. 24:9-12, 18, 19).

18-19. Délè, David pa aji épi mizérikòd. Bay 2 ègzanp ki ka montré sa.

¹⁸ Men, David pa toujou aji épi mizérikòd. On jou, mi sa ki rivé-y èvè on dénonmé Nabal, on boug ki té rèd toubònman. David té mandé-y tibwen manjé pou li é sé boug-la ki té èvè-y la men i rèfizé. Anplisdisa, i méprizé David é i voyé-y pwonmlé. Kifè, David pa pran sa, i fè gwo kòlè é i désidé i kay tchouyé Nabal é tout sé boug-la ki té ka travay pou-y la. Men érèzman, Abigayil, madanm a Nabal, sé té on madanm ki té janti é ki té ni pasyans. I pòté mannèv pou i menné manjé ba David. Grasa sa David pa tchouyé ni Nabal ni sé boug-la ki té ka travay pou-y la (1 Sam. 25:9-22, 32-35).

¹⁹ Ondòt jou, pwofèt Natan rakonté David on istwa. I palé-y dè on boug rich ki ay volé timouton a vwazen a-y alòskè vwazen a-y té maléré. Kou-lasa ankò, David fè kòlè é mi sa i di Natan : « Menmjan sa sèten kè Jéova vivan, moun-la ki fè sa la mérité mò ! » (2 Sam. 12:1-6). David té konnèt byen Lwa a Moyiz. I té sav kè si on moun té volé mouton a ondòt moun, fò i té ba-y 4 mouton pou ranbousé-y (Ègz. 22:1). Men David di kè vòlè-la té mérité lanmò. Mi on jijman ki rèd mi ! Anréyalité, Natan té envanté istwa-lasa pou i té édé David konprann kè sé péché-la i té fè la té lontan pli grav ki sa vòlè-la té fè la. Jéova montré kè i  té ni lontan plis mizérikòd ki David. Jéova padonné David pou sé gwo péché-la i té fè la alòskè li David, i pa té vlé padonné vòlè-la (2 Sam. 12:7-13).

20. Ka ègzanp a David ka aprann-nou ?

²⁰ Lè nou ka gadé byen, nou ka rann-nou kont kè sé lè David fè kòlè kè i désidé tchouyé Nabal é tout sé boug-la ki té èvè-y la. Plita, i di kè boug-la ki té volé mouton-la adan istwa a Natan la té mérité yo tchouyé-y pou sa i té fè la. Men David a pa té on mové boug. Alò, poukwa i jijé vòlè-la rèd konsa ? An-nou gadé ka ki té sòti rivé-y. A moman-lasa, konsyans a David té ka bat-li. Alò, sa ka montré kè lè on moun ka jijé lézòt on mannyè ki rèd sa vlé di kè i pa bon bon zanmi èvè Jéova. Jézi ba disip a-y on avèwtisman ki klè. Mi sa i di-yo : « Arété jijé pou yo pa jijé-zòt. Pas sé dapré jan zò ka jijé kè yo ké jijé-zòt » (Mat. 7:1, 2). Alò, an-nou fè atansyon pou nou pa two rèd èvè lézòt é an-nou imité Pap’an nou ki ni onlo onlo mizérikòd.

21-22. Ka nou pé fè pou aji épi mizérikòd èvè lézòt ?

²¹ A pa enki pityé on moun ki ni mizérikòd ka rèsanti. I vlé édé moun ki bizwen èd. Alò an-nou mandé-nou kimoun nou pé édé adan fanmi an nou, adan lasanblé an nou oben adan lantouraj an nou. Sèten nou ké touvé diféran lokazyon pou aji èvè mizérikòd ! Pa ègzanp, ès on moun bizwen yo konsolé-y ? Oben ès on moun bizwen yo préparé on ti manjé ba-y oben kè yo fè ondòt biten ba-y ? É si on moun ka woufè pawti a lasanblé-la, ès i bizwen kè yo pasé tibwen tan èvè-y oben kè yo ankourajé-y ? Ès nou té’é pé konsolé sé moun-la èvè mésaj a bon nouvèl-la ? Nou pé fè plizyè biten pou aji èvè mizérikòd épi sé moun-la, men lè nou ka préché ba yo, sé yonn adan sé pli bèl biten-la nou pé fè la (Jòb 29:12, 13 ; Wom. 10:14, 15 ; Jak 1:27).

²² Si nou konnèt sa lézòt bizwen, nou ké rann-nou kont kè nou pé fè onlo biten pou aji épi mizérikòd èvè yo. Lè nou ka fè sa, nou ka fè Pap’an nou ki an syèl-la plézi toubònman pas sé on Bondyé ki ni onlo onlo mizérikòd !