1. Ka ki ka ban-nou onlo jwa é ki bèl lonnè nou ni ?

 A PA TI kontan nou kontan kè nou Témwen a Jéova ! Mi on bèl lonnè mi ! Nou ka pòté non a Bondyé é nou ka montré kè nou sé Témwen a-y lèwvwè nou ka préché é lèwvwè nou ka anségné sé moun-la pou yo aprann konnèt Bondyé. A pa ti kontan nou kontan lèwvwè nou ka touvé on moun ki ni « mantalité-la ki fo la pou ni lavi étèwnèl » é kè nou ka édé-y vin sèwvitè a Bondyé (Akt 13:48). Nou ka rèsanti menm biten ki Jézi lèwvwè disip a-y vin di-y jan prédikasyon a yo maché. Jou-lasa « lèspri sen plen tchè a-y èvè jwa » (Lik 10:1, 17, 21).

2. Kijan nou ka montré kè prédikasyon an nou ni onlo valè pou nou ?

² Prédikasyon an nou ni onlo valè pou nou. Mi sa Pòl ni lokazyon di Timoté : « Toutlè, fò ou fè atansyon a voumenm é a sa ou ka anségné. » É mi sa i ajouté : « Pas lè ou ké fè sa ou ké sové ki voumenm ki séla ki ka kouté-w la » (1 Tim. 4:16). Donk, prédikasyon an nou ka sové vi a moun. Toutlè nou ka fè atansyon a noumenm pas nou chwazi viv anba dominasyon a Bondyé. Adan tousa nou ka fè nou vé toujou chèché a ba Jéova glwa é nou vé viv annakò èvè sa nou ka préché (Filip. 1:27). Nou ka montré kè nou ka ‘fè atansyon a sa nou ka anségné’ lèwvwè nou ka préparé-nou byen avan nou ay préché é lèwvwè nou ka mandé Jéova édé-nou.

3. Dépawfwa, kijan sé moun-la ka réyaji lèwvwè nou ka préché bon nouvèl a Wayòm-la ? Bay on ègzanp.

³ Menmsi nou ka fè tousa nou pé pou préché, sa pé rivé kè mésaj a Wayòm-la pa ka entérésé ponmoun adan téritwa an nou. An-nou palé dè on frè non a-y sé Georg Lindal. I té ka préché tousèl an Izland ant 1929 é 1947. Pannan péryòd-lasa i ba moun a péyi-lasa plizyè milyé piblikasyon men yo  ponyonn pa aksèpté. Mi sa i maké : « Mésaj-la pa té ka entérésé lamajorité a sé moun-la ditou-ditou, é i ka sanm sa sèwten adan yo té kont lavérité. » Yo voyé déotwa misyonè ki fè lékòl a Galaad pou préché men pannan plizyè lanné sa pa bay ayen. Anfinaldikont, sé 9 an apré kè déotwa Izlandè vin Témwen a Jéova b.

4. Ka nou pé rèsanti lèwvwè sé moun-la pa ka kouté-nou ?

⁴ Lèwvwè sé moun-la pa ka kouté mésaj-la nou ka préché la, sa ka fè-nou lapenn. Dépawfwa, nou pé jou rivé a santi-nou kon Pòl. Sa té ka fè-y mal toubònman é i té ka soufè akontinyé pas lamajorité a sé Juif-la pa té vé kwè kè Jézi sé té Mési-la (Wom. 9:1-3). Imajiné ou ka étidyé Labib èvè on moun, ou ka fè onlo éfò pou anségné moun-lasa byen é ou toujou ka sonjé-y adan priyè a-w. Men lèwgadé, moun-lasa pa’a fè ni kim ni bouyon, kifè, ou oblijé arété étidyé èvè-y. Oben imajiné kè ou étidyé èvè on moun oben plizyè moun é ponyonn adan yo pa jen pran lèbatèm. Ès sa vé di kè sé fòt a-w oben kè Jéova pa ka béni prédikasyon a-w ? Adan awtik-lasa, nou ké réponn a sé 2 kèsyon-lasa : 1) Ka pou nou gadé pou nou sav kè nou ka fè travay a prédikasyon-la byen konm i fo ? 2) Ka pou nou mèt an tèt an nou lèwvwè nou ka préché ?

5. Dépawfwa, magré nou ka fè onlo éfò adan travay a prédikasyon-la, sa pa’a maché kon nou té’é vé. Poukwa ?

⁵ Labib ka di kè on moun ki ka fè volonté a Bondyé « ké réyisi adan tousa i ka fè » (Sòm 1:3). Men sa vé pa di kè tousa nou ka fè ba Jéova ké toujou maché kon nou vé. Anplisdisa, vi a on moun ranpli èvè pwoblèm pas i ni défo é pas sé moun-la ki alantou a-y la ni défo osi (Jòb 14:1). Ni onlo moun osi ki kont nou é dépawfwa yo ka anpéché-nou préché kon nou té’é vé (1 Kor. 16:9 ; 1 Tés. 2:18). Alò, ka Jéova ka gadé pou di kè nou ka fè travay a prédikasyon-la byen konm i fo ? An-nou vwè déotwa prensip a Labib ki ké édé-nou réponn a kèsyon-lasa.

6. Ka Jéova ka gadé pou di kè nou ka fè travay a prédikasyon-la byen konm i fo ?

⁶ Pou Jéova, lè nou ka fè éfò é lè kè nou ka andiré, sa ni onlo valè. Lèwvwè nou ka pòté bon mannèv an prédikasyon menmsi sé moun-la pa’a kouté-nou, Jéova fyèw dè nou pas nou ka montré-y kè nou enmé-y. Mi sa Pòl maké : « Bondyé pa enjis pou oubliyé sa zò fè é lanmou-la zò montré la pou non a-y lè zò té ka sèvi lésen é lè zò ka kontinyé sèvi-yo » (Ébr. 6:10). Sa Jéova ka sonjé sé kè nou enmé-y é kè nou ka fè onlo éfò menmsi sé moun-la pa ka kouté-nou. Mi sa Pòl ni lokazyon di sé Korentyen-la :  « Travay-la zò ka fè la anrapò èvè Ségnè-la pa initil » (1 Kor. 15:58). Sé pawòl-lasa valab pou nou osi menmsi travay a prédikasyon-la pa ka maché kon nou té’é vé magré nou ka fè onlo éfò.

7. Jan-la Pòl ka palé dè prédikasyon-la ka aprann-nou on biten. Ki biten ésa ?

⁷ Lapòt Pòl té misyonè é i té ka fè on bèl travay toubònman an prédikasyon. Grasa-y, plizyè lasanblé vwè jou adan diféran vil. Men lèwvwè sèwten moun té ka malpalé-y, i pa té ka kouri di-yo kè i té ka anségné byen é kè i menné onlo moun a lavérité. Okontrè, mi sa i maké : « An travay plis ki yo » (2 Kor. 11:23). Kon Pòl, fò pa nou jen oubliyé kè sa ki ka konté pou Jéova sé kè nou ka fè onlo éfò é kè nou pa’a jen lagé.

8. Ka pou nou sonjé lèwvwè nou ka préché ?

⁸ Prédikasyon an nou ka fè Jéova plézi. Jézi voyé disip a-y préché bon nouvèl a Wayòm-la é yo té 70. Lè yo fin ti prédikasyon a yo, yo viré é yo té ni tchè-kontan. Poukwa yo té kontan konsa ? Mi sa yo di Jézi : « Menm sé démon-la anba men an nou lèwvwè nou ka sèvi èvè non a-w ». Men Jézi réponn-yo : « Fò pa zò kontan pas sé lèspri-la anba men a zòt ; fò zò kontan pas non a zòt maké an syèl-la » (Lik 10:17-20). Jézi té sav kè a pa toutlè kè disip a-y té’é viv onlo bèl biten konsa an prédikasyon. An réyalité, pawmi tout sé moun-la yo vwè la, nou pa sav konmen moun ki vin disip. Fò sé disip-la té byen konprann kè pòté bon mannèv an prédikasyon ni plis valè pou Jéova ki rézilta nou pé ni lè nou ka fè travay-lasa.

9. Dapré Galat 6:7-9, ka Bondyé ké ban-nou si nou pa jen arété préché ?

⁹ Si nou ka andiré lè nou ka préché, nou ké ni lavi étèwnèl. Lè nou ka fè tousa nou pé pou préché é pou anségné bon nouvèl a Wayòm-la, nou ka « simé pou lèspri » kivédi nou ka lésé lèspri sen a Bondyé aji adan tout domenn a vi an nou. Si ‘nou pa ka arété fè sa ki byen é si nou pa ka lésé fatig pran lanmen asi nou’, Jéova ka pwomèt-nou kè i ké ban-nou lavi étèwnèl menmsi nou pa rivé édé ponmoun pran lèbatèm (li Galat 6:7-9).

10. Lèwvwè nou ka préché, poukwa ni sèwten moun ki ka kouté-nou alòskè ni dòt ki pa’a kouté-nou ?

¹⁰ Pou on moun aksèpté lavérité, sa ki pi enpòwtan sé sa i ni an tchè a-y. Sé sa Jézi ni lokazyon montré adan on ègzanp i té pran. Adan ègzanp-lasa, ni on misyé ki ka simé grenn asi diféran tè, é sé grenn-la ka pousé yenki asi bon tè-la (Lik 8:5-8). Jézi èspliké kè sé diféran tè-la ka rèprézanté tchè a sé moun-la é lèwvwè yo ka tann pawòl-la, yo pa ka réyaji menmjan-la (Lik 8:11-15). Kon ègzanp a misyé-la ki ka simé la, nou pé pa fè ayen pou fè sé grenn a vérité-la pousé adan tchè a sé moun-la nou préché ba yo la. Nou, travay an nou sé kontinyé simé grenn a vérité asi Wayòm-la. Kon Pòl di, ‘nouchak ké ni rékonpans an nou sèlon travay-la nou fè la’. Rékonpans an nou pé ké dépann dè sé rézilta-la nou ni la (1 Kor. 3:8).

11. Magré ponmoun pa kouté Noé, poukwa Jéova té fyèw dè-y ? (gadé imaj-la ki anlè po a jounal-la).

¹¹ An tan a Labib, onlo Témwen a Jéova préché ba moun ki rèfizé kouté-yo. Pa ègzanp, Labib ka di kè Noé sé té ‘on moun ki té ka préché lajistis’, é pétèt i fè sa pannan 40 ou 50 an apépré (2 Pyè 2:5). Nou ka imajiné jan Noé té’é kontan si sé moun-la i té préché ba yo la té kouté-y. Men a pa konsa Jéova té di kè sa té’é pasé. Lè i mandé Noé fè lawch-la, mi sa i di-y : « Fò ou ké antré adan lawch-la, vou èvè gason a-w,  madanm a-w é madanm a gason a-w » (Jén. 6:18). Anplisdisa, lè Noé pran tan réfléchi asi grandè a lawch-la, i dwèt rann-li kont kè konm pa té ni plas pou onlo moun, a pa granzafè a moun ki té’é kouté-y (Jén. 6:15). É kon nou sav, pa menm onsèl moun pa kouté Noé (Jén. 7:7). Ès sa té vé di kè pou Jéova Noé té échwé ? Awa ! Jéova té fyèw dè Noé toubònman pas i fè ègzaktèman sa i té mandé-y fè (Jén. 6:22).

12. Ka ki édé Jérémi ni tchè-kontan lèwvwè i té ka préché menmsi sé moun-la pa té ka kouté-y oben menmsi yo té kont li ?

¹² Jérémi rété ka préché pannan plis ki 40 lanné menmsi sé moun-la pa té ka kouté-y é menmsi sé moun-la té kont li. Lènmi a-y té ka ‘jiré-y é té ka fè jé èvè tèt a-y’. Kifè, rivé onlè, i té ka santi-y tèlman dékourajé kè i té anvi lagé travay-la Jéova té ba-y fè la (Jér. 20:8, 9). Men anfinaldikont, i pa lagé ! Ka ki ba-y fòs pou i té pé sa kontinyé préché é pou i té pé sa ni tchè-kontan ? I konsantré-y asi 2 lidé enpòwtan. Prèmyèwman, mésaj-la Bondyé té ba-y préché la té ka pòté « on landèmen é on èspwa » (Jér. 29:11). É dézyèmman, sé Jéova ki té chwazi-y pou i té pé sa palé dè-y é pou i té pé sa ba pèp-la mésaj a-y (Jér. 15:16). Nou osi, lèwvwè nou ka préché, nou ka ba sé moun-la on èspwa é nou ka palé an non a Jéova pas nou sé Témwen a-y. Nou osi, si nou ka konsantré-nou asi sé 2 lidé enpòwtan lasa, nou ké ni tchè-kontan ki sé moun-la ka kouté-nou ki yo pa’a kouté-nou.

13. An Mawk 4:26-29, Jézi ka pran on bèl ègzanp. Ka ègzanp-lasa ka aprann-nou ?

¹³ Sa pé pran onlo tan pou on moun pé sa ni fwa an Bondyé. Jézi sèvi èvè on ègzanp pou montré-nou sa. Adan ègzanp-lasa, misyé-la ka simé grenn é i k’ay dòmi (li Mawk 4:26-29). Sé grenn-la i simé la pété é yo ka pousé piti-a-piti. Men i pé pa fè ayen pou fè sé grenn-la pousé pi vit. Menmjan-la osi, dépawfwa sa pé pran onlo tan avan nou vwè étidyan an nou apliké sa i ka aprann. Menmsi on kiltivatè té vé kè plant a-y pousé pi vit, a pa li ki ka désidé konmen tan sa ké pran. Menmjan-la osi, nou pé pa fè ayen pou fè fwa a étidyan nou grandi pi vit. Sé pousa, fò pa nou dékourajé-nou si sa ka pran onlo tan. Men kon kiltivatè-la, fò nou ké ni pasyans é fò nou ké atann jiskatan étidyan-la désidé sèvi Jéova (Jak 5:7, 8).

14. Délè sa pé pran tan avan sé moun-la kouté-nou. Ki ègzanp ki ka montré sa ?

¹⁴ Adan sèwten téritwa, sa pé pran plizyè lanné avan onsèl moun pran lèbatèm. Sé sa Gladys Allen c é sè a-y Ruby konstaté. An 1959, yo toulédé té pyonyé pèwmanan é yo voyé-yo préché adan on vil ki o Kébèk, o Kanada. Lè yo té ka préché, sé moun-la té ka rèfizé kouté mésaj a Wayòm-la pas yo té pè sa moun té’é di é pas sé prèt katolik la té ka mèt présyon asi yo. Mi sa Gladys ka sonjé : « Pannan 2 an, nou ay préché dè kaz an kaz. Nou té ka pasé 8 èdtan ka fè sa chakjou. Men ponmoun pa janmen réponn-nou. Sé moun-la té ka fèmé pòt a yo lèwvwè yo té ka vwè-nou men nou pa lagé. » Piti-a-piti, atitid a sé moun-la chanjé é yo koumansé kouté. Jòdila, ni 3 lasanblé adan vil-lasa (Iz. 60:22).

15. Dapré 1 Korentyen 3:6, 7, ès sé onsèl pwoklamatè ki ka sifi pou fè on disip ?

¹⁵ Nou bizwen tout on lasanblé pou fè on disip. Adan lasanblé-la tout sé pwoklamatè-la pé édé on étidyan pwogrésé (li 1 Korentyen 3:6, 7). Pétèt kè on frè ké lésé on trak pou on moun ki  entérésé men konm pwogram a-y pa’a pèwmèt-li viré vwè moun-la, i ké mandé ondòt pwoklamatè kontinyé ti kozé-la èvè moun-la. Pwoklamatè-lasa ké koumansé on étid èvè moun-lasa é piti-a-piti i ké envité dòt frè é sè vin èvè-y adan étid-la. Chak pwoklamatè frè-la ké menné adan étid-la ké ankourajé moun-la. Kifè, yochak ké édé moun-lasa aprann plis biten asi Jéova. Anfinaldikont, chakmoun ki ké édé étidyan-la pwogrésé ké kontan lèwvwè i ké pran lèbatèm (Jan 4:35-38).

16. Dépawfwa, nou pé pa fè onlo biten an prédikasyon pas santé-la pa ka pèwmèt oben pas nou pa ni asé fòs, men ès nou pé ni tchè-kontan kanmenm ?

¹⁶ Pétèt kè ou pé pa préché oben anségné moun kon ou té’é vé pas santé-la pa two flanbo oben pas ou pa ni asé fòs. Men ès ou pé ni tchè-kontan kanmenm ? Wi, pas ou pawtisipé adan travay-la ki ka fèt toupatou asi latè. An-nou vwè ka ki rivé wa David é sé sòlda a-y la. Sé Amalésit-la té pati èvè biten a David, èvè biten a sé boug a-y la é yo té jous pati èvè fanmi a yo osi. Kifè, fò-yo té kouri dèyè do a yo pou yo té rékipéré tout biten a yo. Men David té ni 200 sòlda ki té las bon las la é yo pa té pé ay goumé. Alò, yo rété ka véyé sa David é sélézòt sòlda-la té lésé adan kan-la. David é sé boug a-y la gangné lagè-lasa é yo pran tout biten ki té ni valè aka lènmi a yo. Lèwvwè yo viré, David mandé pou yo té séparé tout sé biten-la yo té rékipéré la. I fè ansòt pou sé sòlda-la ki té ay goumé la é pou sé sòlda-la ki té rété an kan-la té pé sa ni menm kantité biten-la (1 Sam. 30:21-25). Ègzanp-lasa pé sèvi-nou adan travay a prédikasyon-la osi. Pétèt kè ou pé pa fè tousa ou té anvi fè adan travay a prédikasyon-la é pou anségné sé moun-la. Men si ou ka fè tousa ou pé, vou osi, ou pé ni tchè-kontan chakfwa on moun ka aprann konnèt Jéova é ka pran lèbatèm.

17. Pou kibiten fò-nou di Jéova mèsi ?

¹⁷ Nou ka di Jéova mèsi pas i ka aprésyé travay-la nou ka fè la an prédikasyon. I sav nou pé pa oblijé sé moun-la kouté-nou men i ka vwè jan nou ka travay rèd é jan nou enmé-y onlo é i ka rékonpansé-nou pou sa. I ka montré-nou kijan nou pé ni tchè-kontan kèlkèswa sa nou pé fè adan travay a prédikasyon-la (Jan 14:12). Nou pé sèten kè Jéova ké kontinyé béni-nou si nou pa lagé !